កាលពីថ្ងៃព្រហស្បហ៍ទី១៩ខែតុលានេះ លោកស៊ីជីនពីងប្រធានាធិបតីចិនបាននិយាយថា «ដំណោះស្រាយរដ្ឋពីរ»ដែលបានរៀបចំឡើងដោយក្រុមកឯករាជ្យប៉ាឡេស្ទីនគឺជាផ្លូវដ៏ល្អមួយ ដើម្បីបញ្ចប់ជម្លោះរវាងអ៊ីស្រាអែលនិងក្រុមហាម៉ាស់ ដែលបានប្រព្រឹត្តទៅអស់រយៈពេល២ សប្តាហ៍កន្លងមកនេះ។

លោកបានបន្តថា អ្វីជាអាទិភាពដែលត្រូវតែធ្វើមុនគេនោះគឺការពន្លត់ភ្លើងនៅដើមទីក្នុងន័យ ដើម្បីបង្ការ កុំឲ្យសង្គ្រាមនោះរីករាលដាលកាន់តែខ្លាំងដែលនាំឲ្យពង្រីកនូវវិសាលភាពនៃ ជម្លោះនិងបង្កឲ្យមានវិបត្តិមនុស្សជាតខូចខាតយ៉ាងធ្ងន់ធ្ងរ។

លោកស៊ីជិនពីងក៏បាននិយាយនៅក្នុងកិច្ចប្រជុំគណៈរដ្ឋមន្រ្តីមួយជាមួយនឹងនាយករដ្ឋមន្រ្តីអេស្សីបនាទីក្រុងប៉េកាំងថា ចិនមានឆន្ទៈដ៏មោះមត់ក្នុងការធ្វើការជាមួយនឹងប្រទេសអេហ្សីបនិង អារ៉ាប់ «ដើម្បីជួយលើកកម្ពស់ក្នុងការស្វែងរកដំណោះស្រាយប្រកបដោយភាពត្រឹមត្រូវនិង តម្លាភាពជុំវិញ បញ្ហារបស់ប៉ាឡេស្ទីន»។

ម៉្យាងវិញទៀត មេដឹកនាំអេហ្សីបក៏បានទៅចូលរួមនៅក្នុងវេទិកា«ខ្សែក្រវ៉ាត់និងផ្លូវ» (Belt and Road Forum) នា ទីក្រុងប៉េកាំង ដែលវាព្រឹត្តិការដ៏ធំមួយនៅក្នុងទសវត្សនេះដែលបានបង្ហាញមហិច្ឆតារបស់ លោកស៊ីនៃ«គំនិតផ្តួចផ្តើមបង្កើតនូវហេដ្ឋារចនាសម្ព័ន្ធពិភពលោក»។

តាមរបាយការណ៍របស់CCTV ក៏បានបញ្ជាក់ដែរថា លោកស៊ីបានកោតសរសើរដល់ប្រទេស អេហ្សីបដែលបានដើរតួនាទីយ៉ាងសំខាន់នៅក្នុងការបន្ធូរបន្ថយភាពតានតឹង ហើយប្រទេស ចិននឹងគាំទ្រដល់កិច្ចខិតខំប្រឹងប្រែងរបស់ខ្លួនក្នុងការផ្តល់ជំនួយមនុស្សធម៌ទៅហ្កាហ្សា។

នៅព្រឹកថ្ងៃទី២០ខែតុលានេះ ប្រធានាធិបតីរុស្សី លោកពូទីនបានទៅដល់ទីក្រុងប៉េកាំង ក្នុងវេទិកា«ខ្សែក្រវ៉ាត់និងផ្លូវ»នេះដែរ។ កិច្ចចរចារទ្វេភាគីរវាងលោកពូទីននិងលោកស៊ីមាន រយៈពេល៣ម៉ោង ដែលមេដឹកនាំទាំងពីរក៏ បានពិភាក្សាគ្នាអំពីរបញ្ហាជម្លោះរវាង អ៊ីស្រាអែល និងហាម៉ាស់ផងដែរ។ ចិននិងរុស្សីបាន អំពាវនាវឲ្យមានការឈប់បាញ់គ្នានៅក្នុងជម្លោះដែល កំពុងតែកើតឡើង ហើយបានបដិសេដ ការដែលមិនថ្កោលទោសចំពោះក្រុមហាម៉ាស់ ដែលផ្ទុយពីការលើកឡើងរបស់អាមេរិកនិងសហភាពអឺរ៉ុប។

ការបដិសេដនៅក្នុងទីក្រុងប៉េកាំងថាមិនថ្កោលទោសក្រុមហាម៉ាស់បានធ្វើឲ្យមានការខកចិត្ត យ៉ាងខ្លាំងពីប្រជាជនអ៊ីស្រាអែល ក៏ដូចជាមានការរិះគន់ពីមន្ត្រីអាមេរិកផងដែរ។ ទោះជាយ៉ាង ណាចិនក៏នៅតែប្រកាន់នូវគោលជំហរមិនមានការថ្កោលទោសចំពោះរុស្សីដែលបានឈ្លានពានទៅលើអ៊ុយក្រែន។

គួរបញ្ជាក់ផងដែរថា ក្រសួងការបរទេសចិនក៏បានលើកឡើងដែរថាខ្លួនកំពុងតែបញ្ជូន បេសកជនគឺលោក Zhai Jun ទៅកាន់តំបន់មជ្ឍិមបូព៌ានៅសប្តាហ៍នេះ ក្នុងគោលបំណងនៅ ក្នុងការជំរុញកិច្ចចរចចាសន្តិភាពនិងបញ្ឈប់ការបាញ់គ្នា៕ CNA News

ប្រទេសថៃ ៖ នៅថ្ងៃទី២០ ខែតុលា ឆ្នាំ២០២៣ ខាងសារព័ត៌មានថៃបានចុះទៅជួបលោក ថាវ៉ន អាយុ៣៨ឆ្នាំ រស់នៅឃុំបានកង ស្រុកណងរឿ ខេត្តខនកែន ។ លោក ថាវ៉ន គឺជាពលករថៃទៅធ្វើការនៅប្រទេសអ៊ីស្រាអែល ហើយបានត្រឡប់មកថៃវិញ ដោយសារបញ្ហាសង្គ្រា.មនៅអ៊ីស្រាអែល ។

លោក ថាវ៉ន រៀបរាប់ថា កាលពីខែកុម្ភៈ ឆ្នាំ២០២៣ លោកបានទៅធ្វើការផ្នែកកសិកម្មនៅទីក្រុង OFAGIM ស្ថិតនៅតំបន់កណ្តាលនៃប្រទេសអ៊ីស្រាអែល តាមរយៈក្រសួងការងារ ។ មុននឹងបានទៅធ្វើការនៅទីនោះ លោកបានប្រមូលប្រាក់សន្សំរបស់លោក និងខ្ចីប្រាក់ពីបងប្អូនសម្រាប់ជាថ្លៃរត់ការឯកសារផ្សេងៗ និងថ្លៃធ្វើដំណើរ ហើយលោកទទួលបានប្រាក់ខែជាមធ្យមចំនួន៥៥.០០០បាតក្នុង១ខែ ។ លោកបានផ្ញើប្រាក់ខែប្រមាណ៣ម៉ឺនបាតមកឱ្យគ្រួសារនៅប្រទេសថៃ ដើម្បីសងបំណុលគេ និងសម្រាប់ការចំណាយផ្សេងៗក្នុងគ្រួសារ ។

លោក ថាវ៉ន បន្តថា រហូតមកដល់ថ្ងៃទី៧ ខែតុលា ក៏មានការវា.យប្រហា.រគ្នាកើតឡើង និងកាន់តែធ្ងន់ធ្ងររវាងក្រុមហាម៉ាស់ និងអ៊ីស្រាអែល ។ ចំណែកតំបន់ដែលលោករស់នៅនោះ គឺជាសមរភូមិក្តៅ ទើបលោកសម្រេចចិត្តត្រឡប់មកប្រទេសថៃវិញ ដោយធ្វើតាមលក្ខខណ្ឌកំណត់របស់ក្រសួងការបរទេស ។ លោកបានធ្វើដំណើរមកដល់ទឹកដីថៃ និងមកដល់ខេត្តខនកែន កាលពីថ្ងៃទី១៦ ខែតុលា ហើយក្រុមគ្រួសារលោកសប្បាយចិត្តខ្លាំងណាស់ ។

លោកបន្ថែមថា ពេលដំបូង លោកមិនចង់ត្រឡប់មកថៃវិញទេ ព្រោះលោកនៅជំពាក់បំណុលគេប្រមាណ៥សែនបាត ក្នុងនោះមានការបង់រំលស់រថយន្ត និងការចំណាយក្នុងគ្រួសារ ។ មុនពេលកើតសង្គ្រាមនៅអ៊ីស្រាអែល លោកបានប្រាប់ឱ្យគ្រួសាររុះរើរបងផ្ទះចេញដើម្បីធ្វើរបងថ្មី ហើយសង្ឃឹមថា លោកនឹងផ្ញើប្រាក់ខែមកឱ្យគ្រួសារទិញសម្ភារៈសាងសង់ និងជួលជាងធ្វើរបង ។

លោកបន្ថែមទៀតថា ហេតុការណ៍សង្គ្រាមបានកើតឡើងភ្លាមៗពេក រហូតលោកត្រៀមខ្លួនមិនទាន់ថា នឹងធ្វើអ្វីបន្តទៀត ។ អ្វីដែលលោកសង្ឃឹមនៅពេលនេះ គឺចង់ឱ្យហេតុការណ៍ជម្លោះគ្នាឆាប់បញ្ចប់ ព្រោះលោកនឹងធ្វើដំណើរទៅធ្វើការនៅអ៊ីស្រាអែលបន្តទៀត ។ លោកចង់ឱ្យរដ្ឋាភិបាលជួយបង្កលក្ខណៈងាយស្រួលក្នុងការធ្វើដំណើរទៅធ្វើការនៅអ៊ីស្រាអែល ដើម្បីលោកទទួលបានប្រាក់ខែដូចមុន ។

ចំណែកលោក អាណាន់ អាយុ៦៥ឆ្នាំ ជាឪពុករបស់លោក ថាវ៉ន និយាយថា នៅពេលកូនប្រុសមានឱកាសបានទៅធ្វើការនៅក្រៅប្រទេស កូនបានផ្ញើលុយមកជួយគ្រួសារ និងធ្វើឱ្យគ្រួសារសប្បាយចិត្ត ព្រោះលោកកាន់តែចាស់ជរា កូនបានសុំឱ្យលោកឈប់ធ្វើការ ហើយកូននឹងចិញ្ចឹមឪពុកវិញ ។ ប៉ុន្តែកូនទៅធ្វើការនៅអ៊ីស្រាអែលបានត្រឹមតែ៧ខែប៉ុណ្ណោះ ក៏ត្រូវត្រឡប់មកផ្ទះវិញ ព្រោះបញ្ហាអសន្តិសុខ ។ ទោះយ៉ាងណា ក្រុមគ្រួសារចង់ឱ្យកូនមករស់នៅផ្ទះវិញ ព្រោះបារម្ភខ្លាចមានគ្រោះថ្នាក់ ហើយចាប់ពីពេលនេះទៅ ត្រូវជួយគ្នារកការងារធ្វើដើម្បីទទួលបានប្រាក់ចំណូលតាមលទ្ធភាពដែលអាចធ្វើបាន ៕ ប្រភព ៖ sanook

ប្រទេសចិន ៖ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានជួបពិភាក្សាជាមួយប្រធានាធិបតីចិន លោក ស៊ី ជិនពីង ក្នុងអំឡុងពេលលោកធ្វើដំណើរទស្សនកិច្ចជាផ្លូវការទៅកាន់ទីក្រុងប៉េកាំង ដើម្បីចូលរួមកិច្ចប្រជុំអំពី «ខ្សែក្រវ៉ាត់១ ផ្លូវ១» សម្រាប់កិច្ចសហការអន្តរជាតិ លើកទី៣ ។

ក្នុងឱកាសនោះ ប្រធានាធិបតីចិន លោក ស៊ី ជិនពីង លើកឡើងថា ចិនជាប្រទេសដំបូងគេនៅក្រៅសមាគមប្រជាជាតិអាស៊ីអាគ្នេយ៍ (អាស៊ាន) ដែលលោក សេដ្ឋា ថាវីស៊ីន នាយករដ្ឋមន្ត្រីថៃ បានមកទស្សនកិច្ចជាផ្លូវការ ។ ហេតុនេះ វាឆ្លុះបញ្ចាំងយ៉ាងច្បាស់ថា រដ្ឋាភិបាលថ្មីរបស់ថៃផ្តល់ភាពសំខាន់ដល់ទំនាក់ទំនងទ្វេភាគីយ៉ាងខ្លាំង ។ ប្រទេសចិននឹងធ្វើការជាមួយថៃនាយុគសម័យថ្មីនេះ ស្របនឹងពាក្យថា «ចិន និងថៃ មិនឃ្លាតឆ្ងាយពីគ្នាទេ ហើយយើងជាបងប្អូននឹងគ្នា» ។ ចំណែកគុណសម្បត្តិនៃមិត្តភាពយូរអង្វែងរវាងប្រទេសទាំងពីរ គឺជាកម្លាំងជំរុញកិច្ចសហការដើម្បីទទួលបានផលប្រយោជន៍រួមគ្នា ។

លោក ស៊ី ជិនពីង បន្តថា ភាគីទាំងពីរគួរតែពន្លឿនការសាងសង់ផ្លូវរថភ្លើងតភ្ជាប់ប្រទេសចិន-ថៃ និងពង្រីកកិច្ចសហការលើផ្នែកផ្សេងៗ ដូចជា សេដ្ឋកិច្ចឌីជីថល, ការអភិវឌ្ឍតំបន់បៃតង និងថាមពលថ្មី ។ លើសពីនេះ ប្រទេសទាំងពីរនឹងពង្រឹងកិច្ចសហការបង្ក្រាបឧក្រិដ្ឋកម្មឆ្លងដែន ដូចជា ការបោកប្រាស់ និងការភ្នាល់តាមអនឡាញ ដើម្បីបង្កើតបរិស្ថានមានសុវត្ថិភាពសម្រាប់ការអភិវឌ្ឍរបស់ប្រទេសទាំងពីរ ។ ប្រទេសចិនរីករាយក្នុងការចែករំលែកឱកាសពីទីផ្សារធំ និងការបើកចំហកម្រិតខ្ពស់របស់ខ្លួន ដើម្បីបន្ថែមថាមពលវិជ្ជមានដល់ការអភិវឌ្ឍនៅតំបន់អាស៊ី ។

ចំណែកលោក សេដ្ឋា ថាវីស៊ីន នាយករដ្ឋមន្ត្រីថៃលើកឡើងថា ប្រទេសថៃនឹងសហការជាមួយចិនដើម្បីកសាងសហគមន៍ថៃ-ចិន ដែលមានអនាគតរួមគ្នា, មានស្ថិរភាព និងនិរន្តរភាព ។ ប្រទេសថៃនឹងព្យាយាមឱ្យអស់ពីសមត្ថភាពដើម្បីធានាសុវត្ថិភាពដល់ភ្ញៀវទេសចរចិននៅប្រទេសថៃ ហើយថៃរីករាយទទួលស្វាគមន៍ក្រុមហ៊ុនចិនចូលមកវិនិយោគផងដែរ ៕ ប្រភព ៖ TNN World

អាមេរិក៖ យោងតាមគេហទំព័រ Audit Central ដែលបានចុះផ្សាយកាលពីថ្ងៃទី ១៨ ខែតុលាថា ជនជាតិអាមេរិកវ័យក្មេងម្នាក់ស្លៀកពាក់ជាព្រះយេស៊ូ កាន់ឈើឆ្កាងដោយថ្មើរជើងពីទីក្រុងវ៉ារស្សាវ៉ា រដ្ឋធានីនៃប្រទេសប៉ូឡូញ ទៅកាន់ទីក្រុងគៀវ រដ្ឋធានីនៃប្រទេសអ៊ុយក្រែនក្នុងចម្ងាយ ៨១៦ គីឡូម៉ែត្រ។

ព័ត៌មាននេះកំពុងផ្ទុះការចាប់អារម្មណ៍យ៉ាងខ្លាំងនៅលើប្រព័ន្ធផ្សព្វផ្សាយសង្គមរបស់អ៊ុយក្រែនដោយបុរសម្នាក់ឈ្មោះ Jimmy អាយុ ៣៣ ឆ្នាំជាជនជាតិអាមេរិកមកពីរដ្ឋ Virginia មានបំណងដើរពីទីក្រុង Warsaw រដ្ឋធានីនៃប្រទេសប៉ូឡូញ ទៅ Kiev រដ្ឋធានីអ៊ុយក្រែន ក្នុងចម្ងាយដ៏ឆ្ងាយដោយគាត់ថែមទាំងស្លៀកពាក់ដូចព្រះយេស៊ូហើយកាន់ឈើឆ្កាងទៀតផង។

លោក Jimmy បាននិយាយក្នុងបទសម្ភាសមួយថា គាត់មិនមានគោលដៅអ្វីទេ គឺគាត់ចង់ដើរផ្សងព្រេង ដោយផ្ញើជីវិតរបស់គាត់នៅក្នុងដៃព្រះ ហើយគាត់បានប្រាប់ថានេះជាវិធីដ៏ល្អបំផុតដើម្បីលើកតម្កើងព្រះ។ លោក Jimmy ក៏បានបន្តទៀតថា គាត់មិនចង់បញ្ជាក់អ្វីច្រើននោះទេ គាត់គ្រាន់តែចង់ក្លាយជាមនុស្សល្អ និងជាមនុស្សម្នាក់ដែលគោរពដល់ព្រះខ្លាំងបំផុត។

គួរបញ្ជាក់ដែរថា ជារឿយៗគេឃើញលោក Jimmy ដើរកាន់ឈើឆ្កាងតាមផ្លូវទាំងថ្ងៃទាំងយប់ នេះបើតាមការស៊ើបអង្កេតពីសារព័ត៌មាន Audit Central បានបន្ថែមថាបើគិតពីចម្ងាយ Warsaw ទៅទីក្រុង Kiev គឺ ៨១៦ គីឡូម៉ែត្រ ដែលនេះជាចម្ងាយឆ្ងាយខ្លាំងណាស់ប្រសិនបើយើងថ្មើរជើង៕

ប្រទេសជប៉ុន ៖ សារព័ត៌មាន Bloomberg រាយការណ៍ថា ក្រុមហ៊ុន Honda គ្រោងចាប់ផ្តើមផ្តល់សេវាកម្មតាក់ស៊ីគ្មានអ្នកបើកបរនៅទីក្រុងតូក្យូ ប្រទេសជប៉ុន នៅដើមឆ្នាំ២០២៦ ដើម្បីជួយសម្រាលការខ្វះខាតអ្នកបើកតាក់ស៊ីក្នុងទីក្រុងនេះ ដែលមានពលរដ្ឋរស់នៅច្រើនបំផុតលើពិភពលោក ខណៈអ្នកបើកតាក់ស៊ីបានលាឈប់ចំនួន១ម៉ឺននាក់ក្នុងអំឡុងពេលជំងឺកូវីដ-១៩ ឆ្លងរាតត្បាត ។

ក្រុមហ៊ុនផលិតរថយន្តរបស់ជប៉ុនបានអភិវឌ្ឍន៍បច្ចេកវិទ្យារថយន្តគ្មានអ្នកបើកបរជាមួយក្រុមហ៊ុន General Motors និងក្រុមហ៊ុន Cruz LLC ហើយបានសាកល្បងតាក់ស៊ីបើកបរដោយស្វ័យប្រវត្តិក្នុងទីក្រុងចំនួន៤ នៅអាមេរិករួចហើយ ។

Toshihiro Mibe ជានាយកប្រតិបត្តិក្រុមហ៊ុន Honda លើកឡើងថា ក្រុមហ៊ុននឹងចាប់ផ្តើមផ្តល់សេវាកម្ម «Cruise Origin» ឬតាក់ស៊ីគ្មានអ្នកបើកបរជាច្រើនគ្រឿងនៅទីក្រុងតូក្យូ ។ ក្រុមហ៊ុនបានដាក់គោលដៅពង្រីកសេវាកម្មតាក់ស៊ីគ្មានអ្នកបើកបរ រហូតដល់៥០០គ្រឿង មុននឹងផ្តល់សេវាកម្មទៅតំបន់ផ្សេងទៀត ។ តាក់ស៊ីនេះអាចទទួលអ្នកដំណើរចំនួន៦នាក់ ហើយគ្មានកៅអីសម្រាប់អ្នកបើកបរ ឬចង្កូតរថយន្តទេ ដោយតម្រូវឱ្យអ្នកដំណើរអង្គុយទល់មុខគ្នា ។ ក្រុមហ៊ុននឹងបង្ហាញរថយន្តប្រភេទនេះក្នុងកម្មវិធី Japan Mobility Show នៅចុងខែតុលា ឆ្នាំ២០២៣ ។

តាក់ស៊ីគ្មានអ្នកបើកបរអាចជួយដោះស្រាយបញ្ហាក្នុងផ្នែកឧស្សាហកម្មរថយន្តក្រុងនៅប្រទេសជប៉ុន គឺបញ្ហាខ្វះខាតអ្នកបើកបររថយន្ត ខណៈអ្នកបើកតាក់ស៊ីបានលាឈប់ចំនួន១ម៉ឺននាក់ក្នុងអំឡុងពេលជំងឺកូវីដ-១៩ ឆ្លងរាតត្បាត ។ Mary Barra ជា CEO ក្រុមហ៊ុននិយាយថា រថយន្តនេះផ្តល់ភាពងាយស្រួលដល់អ្នកដំណើរជាជនពិការ និងមនុស្សចាស់ទៀតផង ។

បើនិយាយពីរថយន្តគ្មានអ្នកបើកបរ គឺប្រទេសជប៉ុនបានដើរតាមក្រោយអាមេរិក និងចិន ខណៈជប៉ុនមានទីក្រុងតែមួយប៉ុណ្ណោះ ដែលមានរថយន្តអាចបើកបរដោយស្វ័យប្រវត្តិ ប៉ុន្តែត្រូវស្ថិតនៅក្រោមលក្ខខណ្ឌ និងមានជម្រើសឱ្យមនុស្សបញ្ជាវា ។ កន្លងមក តាក់ស៊ីគ្មានអ្នកបើកបរមានចំណែកពាក់ព័ន្ធនឹងហេតុការណ៍គ្រោះថ្នាក់ជាច្រើនលើក ដូចជា រថយន្តបុកគ្នាបណ្តាលឱ្យអ្នកដំណើររងរបួ.សជាដើម ៕ ប្រភព ៖ Bangkok biznews