ប្រទេសចិន៖ ផ្លូវរថភ្លើងល្បឿនលឿនឆ្លងកាត់សមុទ្រពី Fuzhou ទៅ Zhangzhou បានបើកដំណើរការនៅថ្ងៃទី ២៧ ខែកញ្ញាដោយឈានដល់ល្បឿនអតិបរមា ៣៥០ គីឡូម៉ែត្រក្នុងមួយម៉ោង ដែលនេះជារថភ្លើងល្បឿនលឿនដំបូងគេរបស់ចិនដែលធ្វើដំណើរលើស្ពាននឹងលាតសន្ធឹងតាមឆ្នេរសមុទ្រចំនួនបី។

រថភ្លើងមានល្បឿនអតិបរមា ៣៥០ គីឡូម៉ែត្រក្នុងមួយម៉ោងនេះ មានឈ្មោះថា Fuxia ដែលវាអាចជួយកាត់បន្ថយពេលវេលាធ្វើដំណើររវាងទីក្រុង Fuzhou និង Xiamen ពី ៩០ នាទីទៅ ៥៥ នាទី។ ផ្លូវដែកនេះក៏រត់កាត់ទីក្រុង Putian, Quanzhou, និង Zhangzhou ដោយកាត់បន្ថយពេលវេលាធ្វើដំណើររវាងទីក្រុងទាំងនេះមកត្រឹម ៣០ នាទីប៉ុណ្ណោះ។ប្រទេសចិនសង្ឃឹមថាផ្លូវរថភ្លើងនឹងបង្កើនឱកាសវិនិយោគ រួមទាំងធ្វើឱ្យការធ្វើដំណើរកាន់តែងាយស្រួលនៅក្នុងខេត្ត Fujian ដែលជាតំបន់មានទីតាំងឆ្លងកាត់ច្រកសមុទ្រពីកោះតៃវ៉ាន់។

មន្ត្រីរដ្ឋាភិបាលចិនបាននិយាយថា បណ្តាញដឹកជញ្ជូនរួមបញ្ចូលគ្នាដែលកំពុងត្រូវបានសាងសង់នៅក្នុងខេត្ត Fujian នឹង “ធ្វើឱ្យវាអាចបង្កើតខ្សែដឹកជញ្ជូនល្បឿនលឿនដោយតភ្ជាប់ខេត្តនេះជាមួយតៃវ៉ាន់”។ រថភ្លើងល្បឿនលឿនឆ្លងកាត់សមុទ្រលឿនបំផុតរបស់ចិនបានចាប់ផ្តើមសាងសង់នៅឆ្នាំ ២០១៧ នឹងសម្ពោធជាផ្លូវការនៅថ្ងៃទី ២៧ ខែកញ្ញា ឆ្នាំ ២០២៣ ដែលជារថភ្លើងបំពាក់ដោយបច្ចេកវិទ្យាឆ្លាតវៃ រួមទាំង Internet of Things នឹងជាជំហានថ្មីមួយនៅក្នុងឧស្សាហកម្មសំណង់ដឹកជញ្ជូនដ៏ឆ្លាតវៃបំផុតរបស់ប្រទេសចិន៕
ប្រភព៖vnexpress

ប្រទេសវៀតណាម ៖ គណៈកម្មការគ្រប់គ្រងផ្លូវដែកប្រចាំក្រុងហូជីមិញ ប្រទេសវៀតណាម លើកឡើងថា រថភ្លើងអាកាសដំបូងគេរបស់ក្រុងហូជីមិញ នឹងផ្តល់សេវាកម្មសម្រាប់ពាណិជ្ជកម្ម ចាប់ពីខែកក្កដា ឆ្នាំ២០២៤ តទៅ ។ ការសាងសង់នឹងបញ្ចប់រួចរាល់នៅចុងឆ្នាំ២០២៣ បន្ទាប់មក គណៈកម្មការនឹងអប់រំដល់បុគ្គលិកនៅខែមិថុនា ឆ្នាំ២០២៤ ។ ទោះយ៉ាងណា បទប្បញ្ញត្តិ ស្តង់ដារ និងនីតិវិធីផ្សេងៗដែលពាក់ព័ន្ធនឹងការធានាសុវត្ថិភាពរបស់ផ្លូវរថភ្លើងមិនទាន់រួចរាល់នៅឡើយទេ ហើយវាប៉ះពាល់ដល់ដំណើរការគម្រោង ។

ក្រៅពីនេះ គណៈកម្មការគ្រប់គ្រងផ្លូវដែកប្រចាំក្រុងហូជីមិញបានកំណត់គោលដៅសាងសង់ស្ពានអាកាសចំនួន៩កន្លែងសម្រាប់តភ្ជាប់ជាមួយស្ថានីយ ហើយការសាងសង់នឹងរួចរាល់នៅពាក់កណ្តាលឆ្នាំ២០២៤ ដោយធានាបាននូវសុវត្ថិភាព និងការអប់រំបុគ្គលិកបើករថភ្លើង និងបុគ្គលិកផ្នែកផ្សេងៗ ។ រថភ្លើងនេះមានចម្ងាយផ្លូវសរុបជាង១៩គីឡូម៉ែត្រ ក្នុងនោះផ្លូវក្រោមដីមានចម្ងាយជាង២គីឡូម៉ែត្រ និងមាន១១ស្ថានីយ ។

ចំណែកថ្លៃសំបុត្រធ្វើដំណើរ គឺនឹងកំណត់តាមចម្ងាយផ្លូវ ហើយថ្លៃសំបុត្រស្មើត្រឹមតែ១២.០០០ដុងសម្រាប់ចម្ងាយផ្លូវមិនលើសពី៥គីឡូម៉ែត្រ ។ ១៤.០០០ដុងសម្រាប់ចម្ងាយផ្លូវចាប់ពី៥គីឡូម៉ែត្រ ទៅ១០គីឡូម៉ែត្រ, ១៦.០០០ដុងសម្រាប់ចម្ងាយផ្លូវចាប់ពី១០គីឡូម៉ែត្រ ទៅ១៥គីឡូម៉ែត្រ ព្រមទាំង១៨.០០០ដុងសម្រាប់ចម្ងាយផ្លូវលើសពី១៥គីឡូម៉ែត្រ ។ ចំណែកសំបុត្រធ្វើដំណើរប្រចាំខែ នឹងមានតម្លៃ២៦ម៉ឺនដុង ហើយអតិថិជននឹងអាចជ្រើសរើសទិញសំបុត្រជិះរថភ្លើងសម្រាប់១ថ្ងៃ ឬ៣ថ្ងៃ ក្នុងតម្លៃ៤ម៉ឺនដុង និង៩ម៉ឺនដុង តាមលំដាប់ ។

គួរបញ្ជាក់ថា គម្រោងនេះបានប្រឈមនឹងការយឺតយ៉ាវជាច្រើនលើក ខណៈពេលកន្លងមក ប្រទេសវៀតណាមបានកំណត់បញ្ចប់គម្រោងនៅឆ្នាំ២០១៨ ប៉ុន្តែដោយសារបញ្ហាប្រាក់វិនិយោគ និងផលប៉ះពាល់ពីការឆ្លងរាតត្បាតនៃជំងឺកូវីដ-១៩ ទើបធ្វើឱ្យគម្រោងនេះដំណើរការយឺតយ៉ាវជាបន្តបន្ទាប់ ៕ ប្រភព ៖ AEC connect

ប្រទេសចិន៖ អ្នកបុរាណវិទូបានរកឃើញផ្នូរដែលជាកម្មសិទ្ធិរបស់អធិរាជទីមួយនៃរាជវង្សចូវខាងជើង ដែលផ្នូរថ្មីនេះត្រូវបានគេរកឃើញនៅទីក្រុង Xianyang ក្នុងខេត្ត Shaanxi ភាគខាងជើង និងភាគកណ្តាលនៃប្រទេសចិន នេះបើយោងតាមការប្រកាសរបស់បណ្ឌិតសភាបុរាណវិទ្យា Shaanxi កាលពីថ្ងៃទី ២៦ ខែកញ្ញា។ អ្នកស្រាវជ្រាវបាននិយាយថាផ្នូរនេះជាកម្មសិទ្ធិរបស់អធិរាជស្ថាបនិកនៃរាជវង្សចូវខាងជើងដែលមានអាយុកាលពីឆ្នាំ ៥៥៧ ដល់ឆ្នាំ ៥៨១ ដោយផ្អែកលើ epitaph ដែលដាក់នៅផ្នែកខាងកើតនៃច្រកចូលផ្នូរ។

អធិរាជស្ថាបនិកនៃរាជវង្សចូវខាងជើងមានឈ្មោះថា វូ វ៉ាន់យ៉ាក ប្រសូតនៅឆ្នាំ ៥៤២ និងសោយទិវង្គតនៅឆ្នាំ ៥៥៧ ក្នុងព្រះជន្ម ១៥ ព្រះវស្សា។ ពេលឡើងកាន់អំណាច ព្រះអង្គមិនបានប្រើងារជា “អធិរាជ” ទេ គឺគេបានហៅព្រះអង្គថា “ស្តេចសួគ៌”។ ក្រោយមក នៅឆ្នាំ ៥៥៧ គាត់ត្រូវបានបងប្អូនជីដូនមួយរបស់គាត់ឈ្មោះ វូ វ៉ាន់ហូ ទម្លាក់ក្នុងសង្រ្គាមនិងធ្វើឃាតទ្រង់ ដើម្បីដណ្តើមអំណាច។

ផ្នូររបស់ស្តេចមានប្រវែងជាង ៥៦.៧ ម៉ែត្រ ពីខាងជើងទៅខាងត្បូង និងមានជម្រៅជាង ១០ ម៉ែត្រពីដី។ ក្រុមបុរាណវិទ្យាបានរកឃើញវត្ថុបញ្ចុះសពយ៉ាងហោចណាស់ ១៤៦ នៅក្នុងផ្នូរ។ វត្ថុទាំងនេះត្រូវបានប្រមូលផ្តុំនៅភាគអាគ្នេយ៍នៃផ្នូរ ហើយភាគច្រើនរួមមានរូបចម្លាក់សេរ៉ាមិច និងពាងប៉សឺឡែន។ ទោះជាយ៉ាងណាក៏ដោយ យោងតាមក្រុមស្រាវជ្រាវ បានឱ្យដឹងថា នៅក្នុងផ្នូរហាក់ដូចជាត្រូវបានបំផ្លាញ ជាពិសេសផ្ទៃខាងលើហាក់ដូចជាមានសំណល់អេតចាយ ដែលបង្ហាញថាមានក្រុមចោរបានលួចយកវត្ថុមានតម្លៃជាច្រើននៅក្នុងផ្នូរ។

យោងតាមលោក Zhao Zhanrui ជំនួយការស្រាវជ្រាវនៅសាលា Shaanxi Academy បានឱ្យដឹងថា ការរកឃើញផ្នូរបុរាណនេះ មានអត្ថន័យដ៏អស្ចារ្យសម្រាប់ការសិក្សាអំពីអធិរាជនៃរាជវង្សភាគខាងជើង។ តំបន់ផ្នូរបុរាណនេះ ធ្លាប់ជាចំណុចប្រសព្វនៃសកម្មភាពពាណិជ្ជកម្ម វប្បធម៌ និងសាសនា៕
ប្រភព៖vnexpress

ប្រទេសថៃ ៖ កាលពីថ្ងៃទី២៨ ខែកញ្ញា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃ បានបង្ហោះបទចម្រៀងក្នុងហ្វេសប៊ុក ដែលរាជរដ្ឋាភិបាលកម្ពុជានិពន្ធឡើងដើម្បីទទួលស្វាគមន៍ដំណើរទស្សនកិច្ចរបស់នាយករដ្ឋមន្ត្រីថៃមកកាន់ទឹកដីកម្ពុជា ។ លោកនាយករដ្ឋមន្ត្រីថៃសរសេរថា ៖ «ខ្ញុំមកកាន់ប្រទេសកម្ពុជាថ្ងៃនេះ (ថ្ងៃទី២៨ ខែកញ្ញា) ពិតជាមានការចាប់អារម្មណ៍យ៉ាងខ្លាំង ហើយខ្ញុំមានឱកាសសម្តែងការអរគុណដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយខ្លួនខ្ញុំផ្ទាល់ ។ សម្តេចជាមេដឹកនាំប្រទេសដំបូងគេ ដែលបានទូរស័ព្ទមកសម្តែងក្តីត្រេកអរដល់ខ្ញុំ ដែលបានចូលកាន់តំណែងជានាយករដ្ឋមន្ត្រី» ។

លោក សេដ្ឋា ថាវីស៊ីន នាយករដ្ឋមន្ត្រីថៃ បានសរសេរក្នុងហ្វេសប៊ុកទៀតថា ៖ «សំខាន់ជាងនេះទៀត ខ្ញុំមានអារម្មណ៍រីករាយបំផុតដែលប្រទេសកម្ពុជា និងថៃ មានគោលដៅដូចគ្នា គឺជំរុញទំនាក់ទំនងរវាងប្រទេសទាំងពីរឱ្យកាន់តែរឹងមាំគ្រប់ផ្នែក ។ យើងនឹងលើកកម្ពស់កិច្ចសហការផ្នែកពាណិជ្ជកម្ម, ទេសចរណ៍, ការវិនិយោគ, ការអភិវឌ្ឍតំបន់ជាយដែន និងវិស័យសេដ្ឋកិច្ចថ្មី ។ លើសពីនេះ យើងនឹងរួមគ្នាផ្តល់ភាពងាយស្រួលដើម្បីបង្កើនបរិមាណពាណិជ្ជកម្មឱ្យសម្រេចគោលដៅចំនួន១សែន៥ម៉ឺនលានដុល្លារអាមេរិកនៅឆ្នាំ២០២៥ រួមទាំងជំរុញផ្នែកដឹកជញ្ជូនឆ្លងកាត់ព្រំដែន ដោយពន្លឿនការបើកសម្ពោធស្ពានមិត្តភាពនៅតំបន់បានណងអៀន និងស្ទឹងបត់» ។

លោកនាយករដ្ឋមន្ត្រីបន្ថែមថា ៖ «ប្រទេសកម្ពុជា និងថៃ មានសក្តានុពលបង្កើនកិច្ចសហប្រតិបត្តិការផ្នែកទេសចរណ៍វេជ្ជសាស្ត្រ និងសុខភាព ដែលខ្ញុំបានស្នើឱ្យប្រទេសកម្ពុជាអនុញ្ញាតឱ្យប្រើប្រាស់ប័ណ្ណព្រំដែនបណ្តោះអាសន្ន ដើម្បីលើកកម្ពស់វិស័យទេសចរណ៍តាមព្រំដែន ។ ហេតុនេះ វាជាការគាំទ្រការវិនិយោគរវាងប្រទេសទាំងពីរថែមទៀត ហើយយើងនឹងគាំទ្រ SMEs និងក្រុមហ៊ុនប្រកបអាជីវកម្មថ្មីរបស់ប្រទេសយើងទាំងពីរផងដែរ» ។

ចុងក្រោយ លោកនាយករដ្ឋមន្ត្រីលើកឡើងថា ៖ «សូមអរគុណបទចម្រៀងពិរោះៗដែលរាជរដ្ឋាភិបាលកម្ពុជាតាំងចិត្តនិពន្ធឱ្យខ្ញុំ ព្រមទាំងគណៈប្រតិភូថៃ នៅក្នុងឱកាសមកទស្សនកិច្ចនៅកម្ពុជាលើកនេះផងដែរ ។ បទចម្រៀងពិរោះណាស់ ហើយខ្លឹមសារបទចម្រៀងបានឆ្លុះបញ្ចាំងអំពីទំនាក់ទំនងរវាងប្រទេសទាំងពីរយ៉ាងខ្លាំង» ៕ ប្រភព ៖ khaosod

បរទេស៖ តម្លៃអង្ករដែលនាំចូលពីបរទេសបានកើនឡើងខ្ពស់បន្ទាប់ពីការប្រែប្រួលអន្តរជាតិ ដែលបណ្តាលឱ្យប្រជាជនម៉ាឡេស៊ីប្រញាប់ប្រញាល់ទិញអង្ករក្នុងស្រុកដែលត្រូវបានកាត់បន្ថយក្នុងកម្រិតទាប។

លោក Ameer Ali Mydin នាយកប្រតិបត្តិនៃសង្វាក់ផ្សារទំនើប Mydin បាននិយាយថា កង្វះខាតនេះគឺដោយសារតែការកើនឡើងនៃតម្លៃខុសគ្នារវាងអង្ករដែលផលិតក្នុងស្រុក និងនាំចូល។ ការឡើងថ្លៃរបស់អង្ករនាំចូលបានធ្វើឱ្យតម្រូវការអង្ករក្នុងស្រុកមានតម្លៃថោក។ ដូច្នេះ ការខ្វះខាតនេះកើតឡើងដោយសារប្រជាពលរដ្ឋព្រួយបារម្ភពេលឃើញតម្លៃខុសគ្នា ប្រញាប់ប្រញាល់ទិញហើយស្តុកទុក បើមនុស្សពីរបីសែននាក់ទិញអង្ករបន្ថែម ២ បាវឬ ៣ បាវគឺច្រើនណាស់។

នៅប្រទេសម៉ាឡេស៊ី បច្ចុប្បន្នអង្ករសក្នុងស្រុកគឺជាទំនិញដែលគ្រប់គ្រងដោយតម្លៃពិដាន ២៦ រីងហ្គីត (ជាង ៥ ដុល្លារ) ក្នុង ១០ គីឡូក្រាម។ ទោះជាយ៉ាងណាក៏ដោយ ឧស្សាហកម្មផលិតស្រូវអាចបំពេញតម្រូវការបានត្រឹមតែ ៧០% ប៉ុណ្ណោះ។ ដូច្នេះហើយ ប្រទេសនេះបាននាំចូលអង្ករសជាចម្បងពីប្រទេសឥណ្ឌា ប៉ាគីស្ថាន ថៃ វៀតណាម និងកម្ពុជា។
អង្ករដែលនាំចូលជាទូទៅមានតម្លៃថ្លៃជាងអង្ករក្នុងស្រុកចាប់តាំងពីមុនពេលមានការកើនឡើងតម្លៃពិភពលោកនាពេលថ្មីៗនេះ។ គម្លាតនេះបានពង្រីកយ៉ាងខ្លាំងបន្ទាប់ពី Padiberas Nasional (Bernas) ដែលជាក្រុមគ្រប់គ្រងការចែកចាយបានសម្រេចចិត្តដំឡើងតម្លៃលក់រាយអង្ករនាំចូលចំនួន ៣៦% ចាប់ពីថ្ងៃទី ១ ខែតុលា ដើម្បីស្របទៅនឹងការកើនឡើងនៃតម្លៃពិភពលោក។ បច្ចុប្បន្នតម្លៃអង្ករសដែលនាំចូលមានតម្លៃចន្លោះពី ៣០ ទៅ ៧០ រីងហ្គីត (ជាង ៦ ដល់ជាង ១៤ ដុល្លារ) សម្រាប់ ១០ គីឡូក្រាម។

ទោះជាយ៉ាងណាក៏ដោយ បច្ចុប្បន្ននេះប្រទេសម៉ាឡេស៊ីក៏កំពុងព្យាយាមបង្កើនផលិតកម្មក្នុងស្រុក ដូច្នោះហើយ អ្នកផលិតត្រូវបានផ្តល់អនុសាសន៍ឱ្យបង្កើនផលិតកម្ម ២០% ក្នុងមួយឆ្នាំ។ ពួកគេបានអនុវត្តគម្រោងដើម្បីបង្កើនផលិតភាពដល់ជាមធ្យម ៧ តោនក្នុងមួយហិកតា នៅក្នុងវាលស្រែធំៗមួយចំនួន និងបង្កើនចំនួនរដូវដាំដុះ។
មន្ត្រីក្នុងប្រទេសនេះក៏មានគម្រោងស្រាវជ្រាវ និងអភិវឌ្ឍពូជស្រូវថ្មីដែលអាចប្រមូលផលបានក្នុងរយៈពេល ៧៥ ថ្ងៃ ធន់នឹងអាកាសធាតុ និងជំងឺផ្សេងៗផងដែរ។ លោក Fakhrurrazi Rashid អ្នកវិភាគជាន់ខ្ពស់នៅមជ្ឈមណ្ឌលប្រឹក្សា Merdeka បាននិយាយថា វិបត្តិបច្ចុប្បន្នគឺជាឱកាសដ៏ល្អសម្រាប់រដ្ឋាភិបាលម៉ាឡេស៊ីដើម្បីពិនិត្យមើលឡើងវិញនូវក្របខ័ណ្ឌគោលនយោបាយសន្តិសុខស្បៀងទាំងមូល៕
ប្រភព៖vnexpress

រដ្ឋធានីហ្សាការតា៖ បច្ចុប្បន្ន ប្រជាជន នៅលើពិភពលោក កំពុងតែនិយមប្រើប្រាស់បណ្ដាញសង្គម និង ផ្សព្វផ្សាយពាណិជ្ជកម្ម លើប្រព័ន្ធឌីជីថល ព្រោះវាមានភាពងាយស្រួល ប៉ុន្ដែឥឡូវ ប្រទេសឥណ្ឌូណេស៊ី បានដាក់បម្រាមដល់ការផ្សព្វផ្សាយពាណិជ្ជកម្ម នៅលើប្រព័ន្ធផ្សព្វផ្សាយទាំងនេះ ហើយនឹងត្រូវអនុវត្ដភ្លាមៗ ដោយមិនព្យារពេលយូរ។

ទីភ្នាក់ងារសារព័ត៌មាន Reuters បានចេញផ្សាយ កាលពីថ្ងៃពុធ ទី២៧ ខែកញ្ញា ថា ប្រទេសឥណ្ឌូណេស៊ី បានហាមឃាត់ដល់ប្រតិបត្តិការពាណិជ្ជកម្ម តាមប្រព័ន្ធអេឡិកត្រូនិក នៅលើផ្លេតហ្វម (Platform) នានារបស់ប្រព័ន្ធផ្សព្វផ្សាយសង្គម នៅក្នុងប្រទេស ដែលមានប្រជាជន ចំនួន២៧៤លាននាក់។ ប៉ុន្ដែវិធានការនេះ កំពុងតែធ្វើឲ្យមានផលប៉ះពាល់យ៉ាងធ្ងន់ធ្ងរ ដល់ការនិយមចូលចិត្ត TikTok របស់បណ្ដាញសង្គម នៃប្រទេសចិន។

ចំណាត់ការរបស់រដ្ឋាភិបាលឥណ្ឌូណេស៊ី មានគោលបំណង ការពារពាណិជ្ជករអហ្វឡាញ និង ទីផ្សារនានារបស់ប្រទេសមហាសេដ្ឋកិច្ច នៅក្នុងតំបន់អាស៊ីអាគ្នេយ៍មួយបេះ។ បន្ថែមពីលើនេះ រដ្ឋាភិបាល បានកំណត់តម្លៃលក់ហួសហេតុខ្លាំង នៅលើផ្លេតហ្វមបណ្តាញទំនាក់ទំនងសង្គម។ សកម្មភាពបែបនេះ កំពុងតែគំរាមកំហែង ដល់សហគ្រាសធុនតូច និង មធ្យម ផងដែរ។

លោក ហ្ស៊ូលគីហ្ល៊ី ហាសាន់ (Zulkifli Hasan) រដ្ឋមន្ត្រី ក្រសួងពាណិជ្ជកម្មឥណ្ឌូណេស៊ី បានប្រាប់ដល់ក្រុមអ្នកយកព័ត៌មាន ថា បទប្បញ្ញត្តិនេះ នឹងចូលជាធរមានភ្លាមៗ ព្រោះមានបំណងធានាដល់ការប្រកួតប្រជែងអាជីវកម្ម «ដោយស្មើភាពគ្នា និង យុត្តិធម៌»។ ច្បាប់នេះ ក៏មានគោលបំណង ធានាការការពារទិន្នន័យរបស់អ្នកប្រើប្រាស់ បន្ថែមទៀតផង។

បទប្បញ្ញត្តិនោះ តម្រូវឱ្យផ្លេតហ្វមពាណិជ្ជកម្មអេឡិកត្រូនិក នៅក្នុងប្រទេសឥណ្ឌូណេស៊ី កំណត់តម្លៃអប្បបរមា ចំនួន១០០ដុល្លារអាមេរិក សម្រាប់ទំនិញមួយចំនួន ត្រូវបានទិញ ដោយផ្ទាល់ មកពីបរទេស។

ថ្វីបើលោក ជេរី សាមប៊ួហ្កា (Jerry Sambuaga) អនុរដ្ឋមន្រ្ដី ក្រសួងពាណិជ្ជកម្ម បាននិយាយជាចំហ សំដៅដល់ TikTok ជាឧទាហរណ៍ សម្រាប់ការលក់ទំនិញ នៅលើបណ្តាញសង្គម យ៉ាងណាក៏ដោយ ក៏លោក រដ្ឋមន្ត្រី ក្រសួងពាណិជ្ជកម្មឥណ្ឌូណេស៊ី មិនបាននិយាយនោះឡើយ។

ដោយឡែក អ្នកនាំពាក្យ របស់ក្រុមហ៊ុនបណ្ដាញសង្គម TikTok ប្រចាំនៅក្នុងឥណ្ឌូណេស៊ី មិនបានឆ្លើយតប ជុំវិញការស្នើអត្ថាធិប្បាយពីទីភ្នាក់ងារព័ត៌មាន Reuters កាលពីថ្ងៃពុធ នោះឡើយ។ ប៉ុន្ដែអ្នកនាំពាក្យរបស់ក្រុមហ៊ុនមួយនេះ បានអះអាង កាលពីថ្ងៃចន្ទ ថា រដ្ឋាភិបាលឥណ្ឌូណេស៊ី គួរតែពិចារណា លើ «ជីវភាពរបស់អ្នកលក់ក្នុងស្រុក ជាង៦លាននាក់»នៅលើបណ្ដាសង្គម TikTok ផងដែរ៕