រដ្ឋាភិបាល សម្រេចបន្ថែម២ដុល្លារ លើប្រាក់ឈ្នួលដល់កម្មករនិយោជិត ក្នុងវិស័យកាត់ដេរ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញពីរបាយការណ៍លទ្ធផលបោះឆ្នោតរបស់ក្រុមប្រឹក្សាជាតិប្រាក់ឈ្នួលអប្បបរមា លើតួលេខចំនួន ៣ គឺតួលេខ២០២ដុល្លារតួលេខ២០៤ដុល្លារ និងតួលេខ២១៣ដុល្លារ ដោយក្នុងនោះ តួលេខ២០២ដុល្លារ ទទួលបានសម្លេង៤៦លើ៥១សម្លេង និងតួលេខ២១៣ដុល្លារទទួលបានសម្លេង ៥លើ៥១សម្លេង។យោងលើសម្លេងបោះឆ្នោតលើតួលេខនីមួយៗ និងយោងតាមច្បាប់ស្តីពីប្រាក់ឈ្នួលអប្បបរមា ក្រុមប្រឹក្សាជាតិប្រាក់ឈ្នួលអប្បបរមានឹងកំណត់តួលេខ ២០២ដុល្លារ ជាតួលេខប្រាក់ឈ្នួលអប្បបរមាសម្រាប់ឆ្នាំ២០២៤។នៅក្នុងនោះសម្តេចធិបតីនាយករដ្ឋមន្រ្តី បានសម្រេចបន្ថែម ២ដុល្លារ ក្នុង ១ខែ ទៅលើតួលេខ ២០២ដុល្លា ដែលជាលទ្ធផលបោះឆ្នោតរបស់ក្រុមប្រឹក្សាជាតិប្រាក់ឈ្នួលអប្បបរមាខាងលើ។ ដូច្នេះ ប្រាក់ឈ្នួលអប្បបរមាថ្មីសម្រាប់ឆ្នាំ២០២៤ គឺ ២០៤ដុល្លារ ក្នុង១ខែ៕

នៅរសៀលថ្ងៃទី២៨ ខែកញ្ញា នេះក្រសួងសុខាភិបាលបានចេញសេចក្តីប្រកាសសម្រេច បិទមន្ទីរព្យាបាលឯកជន «តូច យ៉ាន» ដោយមូលហេតុមន្ទីរសម្រាកព្យាបាលនេះប្រើប្រាស់បុគ្គលិកមិនមានគុណវុឌ្ឍស្របទៅនឹងច្បាប់ស្តីពីការគ្រប់គ្រងអ្នកប្រកបវិជា្ជជីវៈ សុខាភិបាល និងបានក្លែងបន្លំវិញ្ញាបនបត្របញ្ជាក់ការចុះឈ្មោះគណៈគ្រូពេទ្យក្លែងក្លាយ ព្រមទាំងអនុវត្តមិនបានត្រឹម ត្រូវតាមបទដ្ឋានស្តង់ដារអប្បបរមាសម្រាប់មូលដ្ឋានសុខាភិបាលឯកជន។

លិខិតចុះថ្ងៃទី២៧ កញ្ញា បានបញ្ជាក់ថាយោងតាមការចាំបាច់របស់ក្រសួងសុខាភិបាល
សម្រេចការបិទ និងដកហូតសេចក្ដីសម្រេចឱ្យបើកមន្ទីរសម្រាកព្យាបាលឯកជនឈ្មោះ តូច យ៉ាន ដែលមានទីតាំងនៅផ្ទះលេខ ១៦-១៨-២០-២២ ផ្លូវលេខ១៦ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ដោយយោងទៅតាមមូលហេតុខាងលើនេះ។

ក្រសួងបានបញ្ជាក់ថា ត្រូវទុកជានិរាករណ៍នូវសេចក្តីសម្រេចលេខ ២០៥/២០ អបស/មព ចុះថ្ងៃទី១៨ ខែកញ្ញា ឆ្នាំ២០២០ របស់ក្រសួងសុខាភិបាល។ អគ្គនាយកបច្ចេកទេសសុខាភិបាល ប្រធាននាយកដ្ឋានមន្ទីរពេទ្យ ប្រធានមន្ទីរសុខាភិបាលនៃរដ្ឋបាលរាជធានីភ្នំពេញ និង លោកវេជ្ជបណ្ឌិត តូច យ៉ន មានភារកិច្ចអនុវត្តសេចក្តីសម្រេចនេះតាមភារកិច្ចរៀងៗខ្លួនឱ្យមានប្រសិទ្ធភាព ចាប់ពីថ្ងៃចុះហត្ថលេខាតទៅ៕ 

ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈបានបង្ហាញការគាំទ្រមួយទំហឹងនូវការលើកឡើងរបស់អ្នកបង្កើតមាតិកាឯករាជ្យ Rick KH ទៅលើមតិបងប្អូនប្រជាពលរដ្ឋមួយចំនួនមិនឱ្យតម្លៃ ប្រមាថលើប្រទេសជាតិខ្លួនឯង។

នៅក្នុងវីដេអូដែលឯកឧត្តមយកមកបង្ហោះបន្តលើបណ្តាញសង្គមហ្វេកប៊ុក គឺជាវីដេអូមួយរបស់លោក Rich KH ដែលជាអ្នកបង្កើតមាតិកាមួយរូបចូលចិត្តធ្វើដំណើរកម្សាន្ត រៀបរាប់ពីប្រវត្តិសាស្រ្ត វប្បធម៌ អរិយធម៌ ទាំងក្នុងនិងក្រៅប្រទេស។ វីដេអូដែលមានគាំទ្រនោះ Rich KH បានបញ្ជាក់ថាលោកមិនបានចូលនយោបាយវប្បធម៌ទេ លោករស់នៅប្រទេសកម្ពុជា ស្រលាញ់ព្រះពុទ្ធសាសនា ស្រលាញ់ ជាតិ សាសនា ព្រះមហាក្សត្រ ស្រលាញ់ក្រសួងវប្បធម៌ ស្រលាញ់ការដឹកនាំប្រទេសជាតិ។ ថ្វីដ្បិតប្រទេសកម្ពុជាយើងកំពុងអភិវឌ្ឍមិនល្អឥតខ្ចោះដូចសហរដ្ឋអាម៉េរិក សិង្ហបុរី យើងកើតជាជនជាតិខ្មែរ យើងអត់អាចហាមាត់ថាខ្មែរថោកទាប ខ្មែរមិនចេះមើល ខ្មែរល្ងង់ មិនអភិវឌ្ឍ ជាជនជាតិខ្មែររស់នៅលើទឹកដីខ្មែរ និយាយបែបនេះដូចមើលងាយម្តាយឪពុកខ្លួនឯងអ៊ីចឹង។

Rich KH បាននិយាទៀតថា រស់លើទឹកដីខ្មែរកន្លែងណាខ្វះការអភិវឌ្ឍអត់ទាន់ច្បាស់លាស់យើងខំប្រឹងរៀនខ្លួនឯងថែមថយកន្លែងហ្នឹងមក ក្រសួងធ្វើការកន្លែងណាអត់គ្រប់គ្រាន់យើងប្រាប់ក្រសួងធ្វើការឱ្យគ្រប់គ្រាន់ទៅយើងជួយគ្នាម្នាក់មួយដៃមួយជើងដើម្បីឱ្យប្រទេសយើងអភិវឌ្ឍ។ លោកបន្តទៀតថា មិនចាំតែម្នាក់ប្រឹង គេខំសព្វគ្រប់បែបយ៉ាងយើងទៅស្តីថាឱ្យគេមិនត្រូវនោះទេ យើងបុគ្គលខ្លួនឯងខំប្រឹងរៀន ជួយក្រសួង ជួយរដ្ឋាភិបាល ឈប់យកការគិតអវិជ្ជមាន គិតអាក្រក់លើប្រទេសជាតិ បើយើងនាំគ្នាជាន់ប្រទេសជាតិដុនដាប ។

អ្នកបង្កើតមាតិកា រូបនេះបន្ថែមទៀតថា «ប្រទេសខ្មែរមានសំរាម យើងរើសសំរាមទៅដាក់កំណត់ខ្លួនឯងកុំចោលសំរាម កន្លែងណាមិនអភិវឌ្ឍចូលរួមជាមួយក្រសួងទាំងអស់គ្នាបើរវល់តែស្អប់ជាតិមានតែទៅនៅអាម៉េរិក។ Rich KH បញ្ជាក់ច្បាស់ៗថា លោកមិនមែនជាអ្នកធ្វើការនៅខាងក្រសួងអ្វីនោះទេ តែហួសចិត្ត ហាឡើងជេរខ្មែរ ហាឡើងដៀលក្រសួង ទោះក្រសួងធ្វើមិនល្អឥតខ្ចោះតែក្រសួងធ្វើការអស់ពីសមត្ថភាពដែរ។

សូមបញ្ជាក់ថា អ្វីដែលអ្នកបង្កើតមាតិកា Rich KH លើកឡើងខាងលើនេះគឺជាប់ទាក់ទងនឹងបញ្ហាប្រតិកម្មរបស់ប្រជាជនកម្ពុជាទៅលើការសាងសង់ប្រាសាទថ្មរបស់ថៃដែលលេចរូបរាងស្រដៀលប្លង់ស្ថាបត្យកម្មប្រាសាទអង្គរវត្តនៅពេលដែលក្រសួងពុំទាន់បានចេញសេចក្តីប្រកាសស្របពេលកំពុងតែមានកម្តៅខ្លាំងលើបណ្តាញសង្គម៕

នាព្រឹក ថ្ងៃព្រហស្បតិ៍ ទី២៨ ខែកញ្ញា ឆ្នាំ២០២៣ នៅវិមានសន្តិភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានទទួលបដិសណ្ឋាកិច្ចយ៉ាងកក់ក្តៅ និងបានពិភាក្សាការងារជាមួយ ឯកឧត្តម សេដ្ឋា ថាវីស៊ីន (Srettha Thavisin) នាយករដ្ឋមន្រ្តី នៃព្រះរាជាណាចក្រថៃ។

នៅក្នុងទស្សនកិច្ចផ្លូវការនេះ ប្រមុខរាជរដ្ឋាភិបាលទាំងពីរ បានពិភាក្សាគ្នា ដោយយកចិត្តទុកដាក់ និងដោយស្និទ្ធស្នាល អំពីវិស័យនៃកិច្ចសហការទ្វេភាគីកម្ពុជា-ថៃ ដែលមានភាពសម្បូរបែប និងទូលំទូលាយ។ កិច្ចពិភាក្សាបានផ្តោតជាសំខាន់ទៅលើវិស័យគន្លឹះ ដោយរាប់ចាប់ពី វិស័យពាណិជ្ជកម្ម, វិនិយោគ, ទេសចរណ៍, ការអប់រំ, ការបណ្ដុះបណ្ដាលវិជ្ជាជីវៈ, កិច្ចការទូត, ទំនាក់ទំនងធុរកិច្ច, ទំនាក់ទំនង ប្រជាជន និង ប្រជាជន, ការតភ្ជាប់រវាងប្រទេសទាំងពីរ តាមផ្លូវអាកាស, ផ្លូវរថភ្លើង និង ផ្លូវថ្នល់, សេដ្ឋកិច្ចឌីជីថល និងសេដ្ឋកិច្ចបៃតង, កិច្ចការពាក់ព័ន្ធនឹងអន្តោប្រវេសន៍ រហូតដល់វិស័យសន្តិសុខឆ្លងដែននិង សន្តិសុខអនឡាញ។ជាមួយគ្នានេះ ថ្នាក់ដឹកនាំទាំងពីរក៏បានណែនាំឱ្យក្រសួង-ស្ថាប័នពាក់ព័ន្ធនៃប្រទេសទាំងពីរ បន្តពិភាក្សា និង សហការគ្នា ដើម្បីឱ្យកិច្ចសហប្រតិបត្តិការកម្ពុជា-ថៃ ទទួលបានផ្លែផ្កា សម្រាប់ជាឧត្តមប្រយោជន៍ទាំងសងខាង ។

មិនតែប៉ុណ្ណោះថ្នាក់ដឹកនាំទាំងពីរបានវាយតម្លៃខ្ពស់ទៅវិញទៅមក និងមានជំនឿដ៏មុតមាំថា កិច្ចសហប្រតិបត្តិការកម្ពុជា-ថៃ ដែលនឹងកាន់តែរីកចម្រើន និងរឹងមាំថែមទៀត៕