ទីក្រុងបាងកក៖ អាជ្ញាធរថៃបានចេញសេចក្ដីប្រកាស ដល់អ្នករស់នៅតាមឆ្នេរសមុទ្រភាគខាងត្បូងឱ្យត្រៀមខ្លួនផ្លាស់ទៅតំបន់ដែលមានសុវត្ថិភាព និងជំរុញឲ្យអ្នកនេសាទដែលមានទូកតូចៗប្រញាប់ឡើងច្រាំងវិញជាបន្ទាន់ ដោយព្រ.មានពីរលកយក្សធំៗដែលកម្ពស់អាចលើស 3ម៉ែត្រ ត្រូវបានគេព្យាករណ៍ថានឹងបោកបក់ទៅកាន់ឆ្នេរសមុទ្រនៃឈូងសមុទ្រថៃ។ នេះបើយោងតាមការចេញផ្សាយរបស់សារព័ត៌មាន Khaosod។

នៅវេលាម៉ោង 5 ព្រឹក ថ្ងៃទី 6 ខែមករា មជ្ឈមណ្ឌលឧតុនិយមភាគខាងកើតឈាងខាងត្បូងរបស់ថៃ បានចេញសេចក្តីជូនដំណឹងលើកទីបីរបស់ខ្លួន ស្តីពីខ្យល់បក់ខ្លាំង និងរលកយក្សនៅឈូងសមុទ្រថៃ ដែលនឹងមានឥទ្ធិពលចាប់ពីថ្ងៃទី 6-9 ខែមករា ឆ្នាំ 2026។

ការព្រមាននេះបាននិយាយថា ប្រព័ន្ធសម្ពាធខ្ពស់ថ្មីដ៏ខ្លាំងមួយ ឬម៉ាស់ខ្យល់ត្រជាក់ ពីប្រទេសចិនកំពុងផ្លាស់ទីយ៉ាងលឿនទៅភាគខាងត្បូងប្រទេសថៃ និងសមុទ្រចិនខាងត្បូង។ កត្តានេះ រួមផ្សំជាមួយនឹងខ្យល់ឥទ្ធិពលមូសុងឦសាន ដែលកំពុងកើនឡើងគ្របដណ្តប់ឈូងសមុទ្រថៃ, តំបន់ភាគខាងត្បូងប្រទេសថៃ និងសមុទ្រអាន់ដាម៉ាន់។ តាមលក្ខខណ្ឌនេះ វាត្រូវបានគេរំពឹងថានឹងរីករាលដាលកាន់តែខ្លាំងឡើងក្នុងអំឡុងពេលនេះ។

ជាលទ្ធផល តំបន់សមុទ្រនៅឈូងសមុទ្រថៃ ត្រូវបានគេព្យាករថានឹងនាំមកនូវរលកយក្សធំៗ ជាមួយនឹងរលកចាប់ពី 2-3 ម៉ែត្រ ខណៈនៅតំបន់ខ្លះ កម្ពស់ទឹករលកអាចមានលើសពី 3 ម៉ែត្រ និងថែមទាំងអាចរងផលប៉ះពាល់ដោយព្យុះផ្គររន្ទះបោកបក់ពីលើបន្ថែម។

តាមរយៈសេចក្ដីប្រកាសខាងលើ អ្នករស់នៅតាមឆ្នេរសមុទ្រត្រូវបានជំរុញឱ្យមានការប្រុងប្រយ័ត្នខ្ពស់ចំពោះរលកដែលបោកបក់មកលើច្រាំង។ រីឯអ្នកធ្វើដំណើរតាមទូក គួរតែជៀសវាងការជិះទូកក្នុងតំបន់ដែលមានព្យុះផ្គររន្ទះ ហើយទូកតូចៗត្រូវបានណែនាំឱ្យមិនចាកចេញពីកំពង់ផែចាប់ពីថ្ងៃទី 6 ដល់ថ្ងៃទី 9 ខែមករា។

ជាមួយគ្នានេះ អាជ្ញាធរក្នុងតំបន់បានជំរុញឱ្យសាធារណជនតាមដានការព្យាករណ៍អាកាសធាតុ និងព័ត៌មានថ្មីៗពីមជ្ឈមណ្ឌលឧតុនិយមភាគខាងកើតភាគខាងត្បូង ជៀសវាងមានកម្រិតទឹកមានការកើនឡើងខ្លាំង ហើយប្រជាជនមិនបានត្រៀមលក្ខណក្នុងការជម្លៀសខ្លួនទុកជាមុន៕

ប្រតិបត្តិការយោធាពិសេសរបស់អាមេរិក ហៅថា «Operation Absolute Resolve» ដែលធ្វើឡើងនៅរដ្ឋធានីការ៉ាកាស់ ប្រទេសវ៉េណេស៊ុយអេឡា ដើម្បីចាប់ខ្លួនលោកប្រធានាធិបតី នីកូឡាស ម៉ាឌូរ៉ូ និងភរិយាទាំងកណ្តាលអធ្រាត្រ ថ្ងៃទី3 ខែមករា ឆ្នាំ2026 បានធ្វើឲ្យពិភពលោកមានការភ្ញាក់ផ្អើលជាខ្លាំង។ អ្វីដែលកាន់តែគួរឲ្យចាប់អារម្មណ៍ទៀតនោះ គឺក្នុងប្រតិបត្តិការនេះអាមេរិកប្រើរយៈពេលត្រឹមតែ 2ម៉ោង និង20នាទីប៉ុណ្ណោះ ដើម្បីចាប់ផ្ដើមនិងបញ្ចប់វាទៅដោយរលូន។
តើបេសកកម្មដែលមានត្រឹមតែរយៈពេលមិនដល់ 2ម៉ោងកន្លះដូចខាងលើនេះ សហរដ្ឋអាមេរិកបានអនុវត្តយុទ្ធសាស្រ្តអ្វីខ្លះ?

យោងតាមការចេញផ្សាយរបស់ BBC កាលពីថ្ងៃចន្ទទី4 មករា បានបង្ហាញថា ប្រតិបត្តិយោធាត្រឹមពេលដ៏ខ្លីរបស់អាមេរិកអាចសម្រេចទៅបាន បន្ទាប់ពីចារកម្មអាមេរិក (CIA, NSA) បានតាមដានដោយសម្ងាត់លើប្រធានាធិបតីវេណេស៊ុយអេឡា លោក Nicolas Maduro លើសកម្មភាព ចលនា និងប្រព័ន្ធសន្តិសុខរបស់គាត់អស់រយៈពេលជាច្រើនខែ។ តាមការបញ្ជាក់ ផែនការនេះ ត្រូវបានបញ្ជាឲ្យអនុម័តផ្ទាល់ដោយលោក Donald Trump ដោយមិនបានពិគ្រោះយោបល់ជាមុនជាមួយសភាឡើយ។

ប្រតិបត្តិការនេះបានចាប់ផ្តើមនៅម៉ោង 2:01 រំលងអាធ្រាតយប់ថ្ងៃសុក្រ ដោយអាមេរិកបានបញ្ជូនកងកម្លាំងទាំងផ្លូវអាកាស ដីគោក និងសមុទ្រ ក្នុងការវាយប្រហារទ្រង់ទ្រាយធំមួយលើទីក្រុង Caracas។ យន្តហោះអាមេរិកជាង 150 គ្រឿងត្រូវបានដាក់ពង្រាយ ហើយនៅអំឡុងពេលនៃប្រតិបត្តិការ អគ្គិសនីត្រូវបានគេរាយការណ៍ថាត្រូវបានកាត់ផ្តាច់នៅក្នុងតំបន់ខ្លះនៃទីក្រុង និងទីតាំងយោធាសំខាន់ៗដើម្បីបង្កភាពងងឹត និងធ្វើឱ្យប្រព័ន្ធការពារខ្លួនរបស់វេណេស៊ុយអេឡាពិបាកចាប់សញ្ញាវាយប្រហារ។

ក្រោយមក ស្នូរបំ.ផ្ទុះខ្ទរខ្ទារបានបង្កឱ្យមានការភ័យខ្លាចយ៉ាងទូលំទូលាយក្នុងចំណោមអ្នកស្រុក ខណៈដែលកងកម្លាំងពិសេសអាមេរិកបានសម្រុកចូលទៅក្នុងរដ្ឋធានីតែម្ដង ដោយអាមេរិកបានប្រើប្រាស់យន្តហោះចម្បាំងទំនើបៗដូចជា F-22, F-35, យន្តហោះទម្លាក់គ្រាប់បែក B-1 និងដ្រូនជាច្រើនគ្រឿងទៀត ដែលហោះចេញពីមូលដ្ឋានទ័ពចំនួន 20 កន្លែងផ្សេងគ្នា ហើយកងកម្លាំងពិសេស Delta Force គឺជាអ្នកដឹកនាំផ្ទាល់ក្នុងការចុះទៅចាប់ខ្លួនលោក ម៉ាឌូរ៉ូ និងភរិយាដល់ក្នុងភូមិគ្រឹះដែលមានប្រព័ន្ធការពារន្តិសុខដ៏រឹងមាំ។

នៅពេលកងកម្លាំង Delta Force សម្រុកចូលទៅខាងក្នុងបានសម្រេច លោក ម៉ាឌូរ៉ូ ក៏ព្យាយាមរត់ទៅកាន់ «បន្ទប់សុវត្ថិភាព» ដែរ ប៉ុន្តែនៅតែត្រូវបានគេឃាត់ខ្លួនទាន់ពេលជាប់នៅនឹងមុខទ្វារបន្ទប់នោះតែម្តង។ ក្រោយចាប់ខ្លួនបាន លោក ម៉ាឌូរ៉ូ និង ភរិយា ត្រូវបានដឹកតាមឧទ្ធម្ភាគចក្រទៅកាន់នាវាចម្បាំងអាមេរិក USS Iwo Jima រួចបញ្ជូនបន្តទៅកាន់ទីក្រុងញូវយ៉ក ដើម្បីកាត់ទោស។ នៅម៉ោង 4:20 ទាបភ្លឺ គេបានសន្មត់ថាប្រតិបត្តិការនេះបានបញ្ចប់ជាស្ថាបពរ ដោយសម្លេងយន្តហោះ និងឧទ្ធម្ភាគចក្រ បានរសាត់ចេញពីការ៉ាកាស់បន្តិចម្ដងៗ។

យ៉ាងណាមិញ បើទោះជាសហរដ្ឋអាមេរិកទទួលបានជោគជ័យនៅក្នុងបេសកកម្មនេះ ប៉ុន្តែវាបានទាក់ទាញមតិចម្រុះនៅទូទាំងពិភពលោក ដោយក្នុងនោះ មានប្រទេសជាច្រើនបានប្រកាសថ្កោ.លទោសចំពោះទង្វើរបស់សហរដ្ឋអាមេរិក ដ្បិតមនុស្សប្រហែល 80 នាក់ រួមទាំងទាហានគុយបា 32 នាក់ផងដែរត្រូវបានសម្លា.ប់ ឯការចោ.ទប្រកាន់លោក ម៉ាឌូរ៉ូ ទៀតសោត មិនផ្អែកលើមូលដ្ឋានគ្រឹះជាក់ច្បាស់ឡើយ។

យ៉ាងណាក៏ដោយ លោក Trump នៅតែសាទរចំពោះជោគជ័យនេះ និងប្រកាសថាលោក Maduro និងភរិយា នឹងប្រឈមមុខនឹងទោ.សព្រហ្មទណ្ឌដែលនឹងត្រូវកាត់ក្ដីដោយតុលាការរបស់អាមេរិក៕

ប្រទេសមីយ៉ាន់ម៉ា ៖ ពលរដ្ឋមីយ៉ាន់ម៉ារាប់ពាន់នាក់បានចូលបញ្ចេញមតិក្នុងបណ្តាញសង្គម បន្ទាប់ពីស្ថានទូតអាមេរិកនៅទីក្រុងយាំងហ្គន ចេញសេចក្តីថ្លែងការណ៍នៅថ្ងៃបុណ្យឯករាជ្យប្រទេសមីយ៉ាន់ម៉ា ដោយពលរដ្ឋមីយ៉ាន់ម៉ាបានអំពាវនាវឱ្យរដ្ឋាភិបាលអាមេរិករបស់លោកប្រធានាធិបតី Donald Trump ចា.ប់ខ្លួនមេដឹកនាំផ្តា.ច់ការ លោក Min Aung Hlaing ទៅកាត់ទោ.សដូចការចាប់លោក Nicolas Maduro មេដឹកនាំវេណេស៊ុយអេឡា ។

នៅថ្ងៃទី៦ ខែមករា ឆ្នាំ២០២៦ ហ្វេសប៊ុកផេកស្ថានទូតអាមេរិកនៅទីក្រុងយាំងហ្គន ប្រទេសមីយ៉ាន់ម៉ា បានចេញសេចក្តីថ្លែងការណ៍របស់ក្រសួងការបរទេសអាមេរិកក្នុងថ្ងៃឯករាជ្យមីយ៉ាន់ម៉ា ត្រូវនឹងថ្ងៃទី៤ ខែមករា ។ ក្នុងសេចក្តីថ្លែងការណ៍នេះ លោក Marco Rubio រដ្ឋមន្ត្រីក្រសួងការបរទេសអាមេរិកបង្ហាញក្តីបារម្ភយ៉ាងខ្លាំងចំពោះវិបត្តិនៅមីយ៉ាន់ម៉ា ដោយលោកបញ្ជាក់ថា អាមេរិកឈរខាងពលរដ្ឋមីយ៉ាន់ម៉ា និងអំពាវនាវឱ្យកងទ័ពមីយ៉ាន់ម៉ាឈប់ប្រើប្រាស់អំពើហិង្សា, បើកផ្លូវដល់ជំនួយមនុស្សធម៌, ដោះលែងអ្នកទោសដែលរងការចោទប្រកាន់យ៉ាងអយុត្តិធម៌ និងចរចាបញ្ចប់វិបត្តិដោយសន្តិវិធី ។

បន្ទាប់ពីហ្វេសប៊ុកផេកស្ថានទូតអាមេរិកនៅទីក្រុងយាំងហ្គនចេញសេចក្តីថ្លែងការណ៍ ពលរដ្ឋមីយ៉ាន់ម៉ាទាំងក្នុងនិងក្រៅប្រទេសបានចូលមកបញ្ចេញមតិជាច្រើន ក្នុងនោះមតិភាគច្រើនថា អាមេរិកបញ្ជាក់ក្នុងសេចក្តីថ្លែងការណ៍មិនគ្រប់គ្រាន់ និងអំពាវនាវឱ្យរដ្ឋាភិបាលអាមេរិកចាប់មេដឹកនាំផ្តាច់ការមីយ៉ាន់ម៉ា លោក Min Aung Hlaing ទៅកាត់ទោសនៅអាមេរិក ដូចមេដឹកនាំវេណេស៊ុយអេឡា ។ ពលរដ្ឋមីយ៉ាន់ម៉ាជាច្រើននិយាយពីកងទ័ពអាមេរិកវាយប្រហារទីក្រុង Caracas ប្រទេសវេណេស៊ុយអេឡា កាលពីថ្ងៃទី៣ ខែមករា និងចាប់លោកប្រធានាធិបតី Nicolas Maduro រួមទាំងភរិយា បញ្ជូនទៅកាត់ទោសនៅទីក្រុងញូវយ៉ក ។

ក្នុងរយៈពេលដ៏ខ្លីក្រោយពីហ្វេសប៊ុកផេកស្ថានទូតអាមេរិកនៅទីក្រុងយាំងហ្គនផ្សព្វផ្សាយសេចក្តីថ្លែងការណ៍ពីឯករាជ្យមីយ៉ាន់ម៉ា គឺមានពលរដ្ឋមីយ៉ាន់ម៉ាចូលបញ្ចេញមតិរហូតដល់ជាង៤,៧០០នាក់ ក្នុងនោះអ្នកបញ្ចេញមតិប្រមាណ៩០% អំពាវនាវឱ្យអាមេរិកចាត់វិធានការតឹងរ៉ឹងជាមួយរដ្ឋាភិបាលមីយ៉ាន់ម៉ា ដូចគ្នានឹងអាមេរិកចាត់វិធានការជាមួយរដ្ឋាភិបាលវេណេស៊ុយអេឡា ។

ពលរដ្ឋមីយ៉ាន់ម៉ាបានអរគុណអាមេរិកដែលឈរនៅខាងពួកគេ ប៉ុន្តែរដ្ឋាភិបាលកងទ័ពមីយ៉ាន់ម៉ាមិនស្តាប់ពលរដ្ឋទេ ខណៈពលរដ្ឋមីយ៉ាន់ម៉ាផ្សេងទៀតថា សូមអាមេរិកចាប់លោក Min Aung Hlaing ជាមេក្រុមលក់ថ្នាំញៀន និងមេ Scammer ផង ។ រីឯពលរដ្ឋមីយ៉ាន់ម៉ាជាច្រើនទៀតថា ថ្ងៃឯករាជ្យមីយ៉ាន់ម៉ាគ្មានន័យឡើយ ប្រសិនបើប្រទេសនៅតែស្ថិតក្រោមការដឹកនាំផ្តាច់ការរបស់កងទ័ព ដែលបានចាប់ខ្លួន សម្លាប់ពលរដ្ឋ និងសង្កត់សង្កិនជាបន្តបន្ទាប់ ។

បើតាមអ្នកវិភាគ ការអំពាវនាវឱ្យអាមេរិកចាប់ខ្លួនមេដឹកនាំផ្តាច់ការមីយ៉ាន់ម៉ា គឺឆ្លុះបញ្ចាំងពីការអាក់អន់ចិត្តយ៉ាងខ្លាំងរបស់ពលរដ្ឋមីយ៉ាន់ម៉ា ហើយបណ្តាញសង្គមបានក្លាយជាវិធីចុងក្រោយក្នុងការអំពាវនាវឱ្យអន្តរជាតិជួយការពារពួកគេ ខណៈមតិខ្លះថា អាមេរិកពិបាកជ្រៀតជ្រែកកិច្ចការផ្ទៃក្នុងមីយ៉ាន់ម៉ា ដោយសារដែនកំណត់ច្បាប់អន្តរជាតិ និងភូមិសាស្ត្រនយោបាយ ៕

កងទ័ពថៃបានចោទប្រកាន់កម្ពុជាបា.ញ់កាំភ្លើ.ងត្បាល់ចូលដីថៃនៅតំបន់មុំ៣ ត្រង់ភ្នំ៤៦៩ ខេត្តឧប៊ុនរ៉ាជថានី នៅព្រឹកថ្ងៃទី៦ ខែមករា ឆ្នាំ២០២៦ បណ្តាលឱ្យកងទ័ពថៃម្នាក់រងរបួស ។ ក្រោយកើតហេតុ មេបញ្ជាការកងទ័ពភូមិភាគទី២ថៃ បានបញ្ជាឱ្យត្រួតពិនិត្យការពិតជាបន្ទាន់ និងចោទប្រកាន់កម្ពុជាល្មើសបទឈប់បា.ញ់ ។ ការចោទប្រកាន់នេះ ស្របពេលកងទ័ពថៃបាននិងកំពុងតម្រៀបទូរកុងតឺន័រ និងរាយបន្លាលួសព័ទ្ធយកទឹកដីកម្ពុជានៅព្រំដែនដោយខុសច្បាប់ បន្ទាប់ពីប្រទេសទាំងពីរអនុវត្តបទឈប់បា.ញ់ ។

នាវេលាម៉ោង៧និង៣០នាទីព្រឹក ថ្ងៃទី៦ ខែមករា កងទ័ពភូមិភាគទី២ថៃ ចោទប្រកាន់ថា កម្ពុជាបានបាញ់កាំភ្លើងត្បាល់ចូលក្នុងទីតាំងកងទ័ពថៃនៅតំបន់មុំ៣ ត្រង់ភ្នំ៤៦៩ ខេត្តឧប៊ុនរ៉ាជថានី ។ ហេតុការណ៍នេះបណ្តាលឱ្យកងទ័ពថៃម្នាក់រងរបួសដៃស្តាំ និងត្រូវបានបញ្ជូនទៅកាន់មន្ទីរពេទ្យភ្លាមៗ ប៉ុន្តែកងទ័ពរូបនេះមិនគ្រោះថ្នាក់ដល់បាត់បង់ជីវិតទេ ។

មេបញ្ជាការកងទ័ពភូមិភាគទី២ លោក វីរៈយុទ្ធ រ៉ាក់ស៊ីន និយាយថា បានបញ្ជាឱ្យត្រួតពិនិត្យការពិតជាបន្ទាន់ ព្រមទាំងឱ្យស្ថាប័នពាក់ព័ន្ធតាមដានស្ថានការណ៍ និងថែទាំសុវត្ថិភាពក្នុងតំបន់យ៉ាងដិតដល់ ។ ប្រសិនបើមានព័ត៌មានបន្ថែមទៀត លោកនឹងជូនដំណឹងតាមក្រោយ ។

ចំណែកលោក វិនឆ័យ ស៊ុវ៉ារី អ្នកនាំពាក្យកងទ័ពជើងគោកថៃថា កងទ័ពថៃបានត្រៀមខ្លួន និងមានផែនការទប់ទល់គ្រប់ស្ថានការណ៍ដែលកើតឡើងដើម្បីការពារអធិបតេយ្យ និងការពារសុវត្ថិភាព ទ្រព្យសម្បត្តិពលរដ្ឋនៅព្រំដែនជាប់កម្ពុជាយ៉ាងដិតដល់ ។ ស្ថានការណ៍បច្ចុប្បន្នមិនគួរឱ្យបារម្ភទេ និងមិនប្រទះឃើញកម្ពុជាបង្កើនអាវុធនៅតំបន់ផ្សេង ប៉ុន្តែកងទ័ពថៃសូមដាស់តឿនឱ្យកម្ពុជាគោរពបទឈប់បាញ់ បើមានហេតុការណ៍បែបនេះទៀត កងទ័ពថៃនឹងធ្វើប្រតិបត្តិការភ្លាមៗ ។

គួរបញ្ជាក់ថា នាវេលាម៉ោងជាង១០ព្រឹកថ្ងៃទី៦ ខែមករា នៅវិមានរដ្ឋាភិបាល លោក Anutin Charnvirakul នាយករដ្ឋមន្ត្រីចាំផ្ទះ, លោក Sihasak Phuangketkeow រដ្ឋមន្ត្រីក្រសួងការបរទេស, លោក Natthaphon Narkphanit រដ្ឋមន្ត្រីក្រសួងការពារជាតិ និងលេខាធិការក្រុមប្រឹក្សាសន្តិជាតិ បានប្រកាសពីស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃចោទប្រកាន់កម្ពុជាបាញ់កាំភ្លើងចូលដីថៃបណ្តាលឱ្យកងទ័ពរងរបួសម្នាក់ ថារដ្ឋាភិបាលដឹងពីហេតុការណ៍នេះ ហើយស្ថាប័នពាក់ព័ន្ធកំពុងចាត់វិធានការតាមការកំណត់ ។

នៅថ្ងៃដដែល កងទ័ពថៃបានដាក់លិខិតតវ៉ាទៅកម្ពុជាឱ្យបកស្រាយពីហេតុការណ៍ដែលកើតឡើង រួចហើយ ថៃនឹងពិចារណាចាត់វិធានការវិញ ។ រីឯក្រសួងការបរទេសថៃបានផ្ញើលិខិតតវ៉ាទៅកាន់ក្រសួងការបរទេសកម្ពុជា ដោយចោទប្រកាន់កម្ពុជាល្មើសបទឈប់បាញ់ ។

លោក Anutin បានចោទប្រកាន់កម្ពុជាបាញ់កាំភ្លើងចូលដីថៃ ហើយទាមទារឱ្យកម្ពុជាទទួលខុសត្រូវ ដោយលោកថា ពេលនេះ កងទ័ពថៃកំពុងពិចារណាចាត់វិធានការវិញ ។ ប្រទេសថៃអនុវត្តតាមកិច្ចព្រមព្រៀង ប៉ុន្តែប្រសិនបើចាំបាច់ កងទ័ពថៃនឹងចាត់ការវិញចំពោះហេតុការណ៍ដែលកើតឡើង ។ ថៃបានត្រៀមខ្លួនគ្រប់ផ្នែក មិនថាត្រៀមកម្លាំងទ័ព និងទំនាក់ទំនងការបរទេស ។

ឆ្លើយតបនឹងសំណួររបស់អ្នកសារព័ត៌មានដែលសួរថា តើកងទ័ពថៃនឹងបើកការវាយប្រហារកម្ពុជា ជាលើកទី៣ ដែរឬទេ? លោក Anutin ថា នៅថ្ងៃទី៦នេះ នឹងមានកិច្ចប្រជុំគណៈរដ្ឋមន្ត្រី ព្រមទាំងតាមដានស្ថានការណ៍ ប្រសិនបើទទួលបានព័ត៌មានលម្អិតនឹងប្រញាប់យកមកពិចារណា ។

យោងតាមក្រសួងការពារជាតិកម្ពុជា នាវេលាម៉ោង៧និង២៧នាទីព្រឹក ថ្ងៃទី៦ ខែមករា ក្នុងភូមិសាស្ត្រមុំបី ខេត្តព្រះវិហារ កងកម្លាំងកម្ពុជាបានធ្វើការរៀបចំសណ្តាប់ធ្នាប់ និងរបៀបរៀបរយ នៅមូលដ្ឋានឈរជើងរបស់ខ្លួនក្នុងដែនអធិបតេយ្យរបស់កម្ពុជា ស្របជាមួយគ្នានោះ ក៏មានការផ្ទុះគ្រាប់ចេញពីគំនរសំរាម បណ្តាលឱ្យកងកម្លាំងកម្ពុជាដែលកំពុងបំពេញការងារនៅទីនោះរងរបួសធ្ងន់និងស្រាល ចំនួន២នាក់ ។ បច្ចុប្បន្ន អ្នកដែលរងរបួស ដោយសារឧបទ្ទវហេតុនេះបានបញ្ជូនទៅព្យាបាលនៅមន្ទីរពេទ្យរួចហើយ ។

ក្រុមការងារសម្របសម្រួលរវាងភាគីកម្ពុជា-ថៃបាននិងកំពុងធ្វើការរួមគ្នាក្នុងករណីខាងលើនេះ ។ ក្រុមទំនាក់ទំនងនៃប្រទេសទាំងពីរបានសាកសួរ និងផ្តល់ព័ត៌មាន ដើម្បីដោះស្រាយជាមួយគ្នារួចហើយអំពីបញ្ហានេះ ៕

ប្រទេសកូឡុំប៊ី ៖ កាលពីថ្ងៃទី៥ ខែមករា ឆ្នាំ២០២៦ ប្រធានាធិបតីអាមេរិក លោក Donald Trump បានប្រកាសពីគោលដៅបន្ត បន្ទាប់ពីការចា.ប់ខ្លួនប្រធានាធិបតីវេណេស៊ុយអេឡា គឺកងទ័ពអាមេរិកអាចនឹងវាយប្រ.ហារប្រទេសកូឡុំប៊ី ដោយលោកថា ប្រទេសនេះកំពុងតែឈឺ ពីព្រោះគ្រប់គ្រងដោយមេដឹកនាំឈឺ គឺលោកប្រធានាធិបតី Gustavo Petro ។ លោកថែមទាំងចោទប្រកាន់រដ្ឋាភិបាលកូឡុំប៊ីពាក់ព័ន្ធនឹងការផលិត និងនាំចេញថ្នាំញៀនដ៏ច្រើនបំផុតប៉ះពាល់អាមេរិក ដែលកងទ័ពអាមេរិកអាចធ្វើប្រតិបត្តិការបំផ្លា.ញរោងចក្រផលិតថ្នាំញៀននៅកូឡុំប៊ី ។

បន្ទាប់ពីកងទ័ពអាមេរិកចាប់ខ្លួនប្រធានាធិបតីវេណេស៊ុយអេឡា លោក Nicolas Maduro រួមទាំងភរិយា កាលពីថ្ងៃទី៣ ខែមករា ឆ្នាំ២០២៦ កូឡុំប៊ី គឺជាប្រទេសជិតខាងរបស់វេណេស៊ុយអេឡា បានពង្រាយកម្លាំងទ័ពនៅតាមបណ្តោយព្រំដែនជាប់វេណេស៊ុយអេឡា ដើម្បីត្រៀមខ្លួនទប់ទល់នឹងស្ថានការណ៍ ។ ទន្ទឹមនឹងនេះ ប្រធានាធិបតីកូឡុំប៊ី លោក Petro ប្រកាសថា នឹងទប់ទល់ជាមួយអាមេរិកដោយការប្រើប្រាស់អាវុធ បន្ទាប់ពីអាមេរិកកំណត់គោលដៅវាយប្រហារកូឡុំប៊ី ។

ប្រធានាធិបតីកូឡុំប៊ី លោក Petro បាននិយាយកាលពីថ្ងៃទី៥ ខែមករា ថា លោកត្រៀមខ្លួនជាស្រេចក្នុងការប្រើប្រាស់អាវុធទប់ទល់ ប្រសិនបើរងការគំរាមកំហែងពីប្រធានាធិបតីអាមេរិក ក្រោយពីលោក Trump បញ្ជាឱ្យកងទ័ពចាប់ខ្លួនមេដឹកនាំវេណេស៊ុយអេឡា ដែលជាប្រទេសជិតខាងរបស់កូឡុំប៊ី ។

ជាច្រើនខែមកនេះ លោកប្រធានាធិបតី Petro បានរងការគំរាមពីលោកប្រធានាធិបតី Trump ជាបន្តបន្ទាប់ ហើយលោកសរសេរងបណ្តាញសង្គម X ថា ធ្លាប់បានស្បថលែងកាន់អាវុធទៀតហើយ ប៉ុន្តែដើម្បីមាតុភូមិ លោកនឹងកាន់អាវុធម្តងទៀត ។ រីឯលោកប្រធានាធិបតី Trump បាននិយាយកាលពីដើមខែមករា ឆ្នាំ២០២៦ ឱ្យលោក Petro ប្រយ័ត្នខ្លួន ហើយហៅលោក Petro ថា គឺជាអ្នកជំងឺដែលចូលចិត្តផលិតថ្នាំញៀនកូកាអ៊ីនលក់ឱ្យអាមេរិក ។

គួរបញ្ជាក់ថា លោកប្រធានាធិបតី Petro ជាអតីតយុទ្ធជនទ័ពព្រៃ «M-19» ឈប់ប្រើប្រាស់អាវុធក្រោមកិច្ចព្រមព្រៀងសន្តិភាពកាលពីឆ្នាំ១៩៨៩ បានប៉ះទង្គិចពាក្យសម្តីជាមួយលោកប្រធានាធិបតី Trump រហូតមក ចាប់តាំងពីគណបក្សសាធារណរដ្ឋ (Republican) របស់លោក Trump កាន់អំណាចក្នុងសេតវិមានម្តងទៀតកាលពីខែមករា ឆ្នាំ២០២៥ ។ លោក Petro ក៏បានរិះគន់យ៉ាងខ្លាំងផងដែរពីការបញ្ជូនកងទ័ពអាមេរិកមកកាន់សមុទ្រការ៉ាបៀន ។

លោកប្រធានាធិបតី Trump បានចោទប្រកាន់ដោយគ្មានភស្តុតាងថា លោក Petro លក់ថ្នាំញៀន ព្រមទាំងដាក់ទណ្ឌកម្មផ្នែកហិរញ្ញវត្ថុលើលោក Petro និងក្រុមគ្រួសារ ។ ក្រៅពីនេះ អាមេរិកក៏បានដកកូឡុំប៊ីចេញពីបណ្តាប្រទេសសម្ព័ន្ធមិត្តដែលប្រឆាំងនឹងគ្រឿងញៀនរបស់អាមេរិក ។

លោក Petro បានសរសេរក្នុងបណ្តាញសង្គម X ថា កូឡុំប៊ីមានគោលនយោបាយប្រឆាំងនឹងគ្រឿងញៀនយ៉ាងតឹងរ៉ឹង ប្រសិនបើមានការទម្លាក់គ្រាប់បែកលើកសិករ ពលរដ្ឋកូឡុំប៊ីរាប់ពាន់នាក់នឹងក្លាយជាយុទ្ធជនទ័ពព្រៃនៅតំបន់ភ្នំ ។ លើសពីនេះ បើមានការចាប់ខ្លួនប្រធានាធិបតីកូឡុំប៊ី ពលរដ្ឋជាច្រើននាក់គោរពស្រឡាញ់ប្រធានាធិបតី នឹងក្រោកឈរឡើងតស៊ូមិនខាន ៕