Athika បានបង្ហាញអារម្មណ៍ថាខុសដែលមិនបានចេញមុខការពារ ប៉ីប៉ី ឌី នៅលើបណ្តាញសង្គមជុំវិញការចោទប្រកាន់ថា ប៉ីប៉ី ឌី លេបជំនួយក្នុងអំឡុងពេលថៃឈ្លានពានកម្ពុជា។ ទោះយ៉ាងណា Athika បានបង្ហាញថាដ្បិតតែលោកមិនបានចេញមុខការពារនៅលើបណ្តាញសង្គមប៉ុន្តែលោកបានឱ្យប្អូនៗរបស់លោកជួយការពារ ប៉ីប៉ី ឌី នៅខាងក្រៅអស់ពីសមត្ថភាព។.png)
ថ្លែងនៅក្នុងកម្មវិធីសម្ភាស «IDOL PODCAST» Athika ដែលជាសិល្បករមួយរូបបានជួយយ៉ាងសស្រាក់សស្រាំដល់វីរកងទ័ពនិងជនភៀសសឹកបានទម្លាយរឿងមួយចំនួនដែលទស្សនិកជនអាចពុំសូវបានដឹង។ លោកក៏បាននិយាយពីភាពអយុត្តិធម៌ដែលមនុស្សមួយចំនួនទទួលបានកំឡុងពេលមានសង្គ្រាមជាក់ស្តែងលោកបានលើកពី ប៉ីប៉ី ឌី នៅពេលត្រូវការជំនួយបានស្នើសុំ ប៉ីប៉ី ឌី ឱ្យចេញមុខជួយនៅពេលស្ថានភាពបានល្អប្រសើរបែរជាចោទ ប៉ីប៉ី ឌី លេបជំនួយជាដើម។
ជុំវិញការលាតត្រដាងរឿងរបស់ ប៉ីប៉ី ឌី ទាក់ទងនឹងលុយមូលនិធិ Athika បាននិយាយថា គម្រោងធំៗមួយចំនួន ប៉ីប៉ី ឌី ពុំអាចបញ្ចេញបាននោះទេហើយលោកឃើញថាវាមានភាពអយុត្តិធម៌យ៉ាងខ្លាំងចំពោះ ប៉ីប៉ី ឌី ។ លោកក៏សម្លឹងឃើញថាគ្មានអ្នកណាចេញមុខជួយការពារ ប៉ីប៉ី ឌី នោះទេក្រៅពីអ្នកគាំទ្រមួយចំនួន ដោយមិនមានអ្នកមានសំឡេងធំចេញមុខការពារឡើយ។ ត្រង់ចំណុចនេះ Athika បានបន្ថែមថាអ្នកដែលមិនបានចេញមុខការពារ ប៉ីប៉ី ឌី ក្នុងនោះក៏មានលោកផងដែរហើយរឿងនេះធ្វើឱ្យលោកមានអារម្មណ៍ថាខុសចំពោះ ប៉ីប៉ី ឌី ដូចគ្នា។ Athika ពន្យល់ទៀតថាលោកពុំបានចាប់អារម្មណ៍ថាលោកត្រូវទៅបង្ហាញការបកស្រាយនៅលើបណ្តាញសង្គមនោះទេ ប៉ុន្តែបើការពារនៅជីវិតពិតលោកបានធ្វើអស់លទ្ធភាពហើយ ដោយលោកបានឱ្យប្អូនៗលោកពីរបីនាក់តាំងពីជើងមុនឱ្យទៅតាមការពារសុវត្ថិភាព ប៉ីប៉ី ឌី។
គួរបញ្ជាក់ផងដែរថា ប៉ីប៉ី ឌី គឺជាបុគ្គលល្បីល្បាញមួយរូបក្នុងចំណោមជាច្រើនរូបទៀតបានចេញមុខប្រមូលមូលនិធិជួយដល់វីរកងទ័ពនិងជនភៀសសឹកជាច្រើនម៉ឺននាក់ដែលត្រូវរងគ្រោះពីការឈ្លានពានរបស់ថៃ។ ដ្បិតតែកាលពីលើកទី១លោកត្រូវបានមនុស្សមួយចំនួនរិះគន់ចោទប្រកាន់ឥតឈប់ឈរថាលេបលុយជំនួន ប៉ីប៉ី ឌី បានសម្រេចចិត្តត្រឡប់មកវិញជួយដល់ប្រទេសជាតិ។ មិនត្រឹមតែសុខចិត្តចេញមុខចុះជួយដោយផ្ទាល់ទៅតាមបណ្តាខេត្តដែលងាយរងគ្រោះប៉ុណ្ណោះទេ ប៉ីប៉ី ឌី ថែមទាំងសុខចិត្តបិទហាងរបស់ខ្លួននៅសុវណ្ណាថែមទៀតដើម្បីមានទីតាំងផ្ទុកស្បៀង៕
