ធ្លាប់ទទួលបានបទពិសោធន៍ត្រូវគេជេរឡើងទក់សាច់ កញ្ញា សាន្ត កុសុមៈ បានផ្តាំផ្ញើដល់ Influencer ដទៃទៀតឱ្យសុំការអនុញ្ញាតិម្ចាស់ហាងជាមុនសិនមុននឹងថតផលិតផល។ ការចេញសារបែបនេះស្របពេលបណ្តាញសង្គមមានការជជែកទៅលើ Influencer ម្នាក់និងម្ចាស់ហាងកាហ្វេមួយកន្លែងនៅក្នុងរាជធានីភ្នំពេញ។
តាមរយៈវីដេអូដែលបានចែករំលែកនៅលើបណ្តាញសង្គមទិកតុក តារាស្រី កុសុមៈ បាននិយាយថា សម្រាប់ប្អូនៗដែលជា Influencer ទៅថតហាងគេត្រូវសុំគេសិនបើសិនជាយើងកាន់ផលិតផល ប៉ុន្តែបើគ្រាន់តែជាការថតធម្មតាពុំចាំបាច់សុំនោះទេ។ កញ្ញា សាន្ត កុសុមៈ ថាជាធម្មតាបើសិនជាកាន់ទូរសព្ទថតគេមិនសូវប្រកាន់នោះទេប៉ុន្តែបើទាញកាមេរ៉ាថតហើយភាគច្រើនគេប្រកាន់ណាស់។
តារាសម្តែងរូបនេះបានចែករំលែកថា នាងត្រូវបានគេជេរឡើងស្ពឹកមុខអស់ហើយមិនមែនជារឿងធម្មតានោះទេដូច្នេះយើងត្រូវសុំការអនុញ្ញាតិហាងគេជាមុនសិន។ ជាមួយគ្នានេះ កញ្ញា សាន្ត កុសុមៈ បានបង្ហាញថាហាងខ្លះគឺគេទារថ្លៃសេវា ៣០ទៅ៤០ដុល្លារ ហើយហាងខ្លះគេចិត្តទូលាយមិនតម្រូវឱ្យយើងបង់ប្រាក់ឡើយ។ កញ្ញា ថាមិនចាំបាច់ឱ្យម្ចាស់ហាងគេបិទផ្លាកបិទអ្វីនោះទេនៅហាងកាហ្វេគេអនុញ្ញាតិឱ្យយើងថតធម្មតា ហើយគេហាមហាមតែ Influencer ប៉ុណ្ណោះដោយសារយើងរកលុយនៅកន្លែងគេទាំងដែលហាងគេធ្វើអស់លុយច្រើន។.png)
គួរបញ្ជាក់ផងដែរថា ក្រៅពីអាជីពសិល្បៈកញ្ញា សាន្ត កុសុមៈ គឺជាគ្រូបង្រៀនម្នាក់។ ជាមួយគ្នានេះកញ្ញាក៏បានចែករំលែកវីដេអូផ្សេងៗនៅក្នុងបណ្តាញសង្គមផងដែរ៕
