យោងតាមក្រុមប្រឹក្សាមាសពិភពលោក (WGC) បាននិយាយថា មាសគឺជាធាតុផ្សំដ៏សំខាន់នៃទុនបម្រុងរបស់ធនាគារកណ្តាលទូទាំងពិភពលោក ដោយសារសុវត្ថិភាព សាច់ប្រាក់ងាយស្រួល និងប្រាក់ចំណេញខ្ពស់។ ដូច្នេះ ទីភ្នាក់ងារទាំងនេះក៏ជាក្រុមកាន់កាប់មាសដ៏ធំបំផុតរបស់ពិភពលោក ដែលស្មើនឹង ២០% នៃមាសដែលត្រូវបានជីកយករ៉ែទូទាំងពិភពលោកផងដែរ។ ហេតុនេះហើយ ខាងក្រោមនេះគឺជាប្រទេសទាំង ១០ ដែលមានទុនបម្រុងមាសច្រើនជាងគេលើពិភពលោកក្នុងឆ្នាំ ២០២៣៖

១.សហរដ្ឋអាមេរិក៖ អាមេរិកមានទុនបម្រុងមាសប្រមាណ ៨,១៣៣ តោនដែលស្មើនឹងប្រទេសចំនួនបីបន្ទាប់បញ្ចូលគ្នា។ បរិមាណមាសនេះបច្ចុប្បន្នមានតម្លៃជាង ៥០០ ពាន់លានដុល្លារអាមេរិក ដែលត្រូវបានរក្សាទុកជាចម្បងនៅក្នុងឃ្លាំងមាស Fort Knox និងតុមាសនៅឯ Fed ញូវយ៉ក។

២.ប្រទេសអាល្លឺម៉ង់៖ បច្ចុប្បន្នអាល្លឺម៉ង់មានមាសបម្រុងប្រមាណ ៣,៣៥២ តោន ដែលមាសទាំងនេះត្រូវបានរក្សាទុកនៅក្នុងឃ្លាំង និងភាគច្រើនត្រូវបាននាំចូល ឬកែច្នៃឡើងវិញក្នុងស្រុក។

៣.ប្រទេសអ៊ីតាលី៖ អ៊ីតាលីគឺជាប្រទេសដែលមានមាសបម្រុងប្រមាណ ២,៤៥១ តោន។ បរិមាណមាសនេះបច្ចុប្បន្នត្រូវបានរក្សាទុកក្នុងតុដេកនៅទីក្រុងរ៉ូម និងធនាគារកណ្តាលស្វីស ធនាគារកណ្តាលសហរដ្ឋអាមេរិក រួមទាំងធនាគារអង់គ្លេសផងដែរ។ ទោះបីជាមានការលំបាកផ្នែកហិរញ្ញវត្ថុជាច្រើនដងក៏ដោយ ក៏រដ្ឋាភិបាលអ៊ីតាលីគ្មានចេតនាលក់ទុនបម្រុងមាសរបស់ខ្លួនឡើយ។

៤.ប្រទេសបារាំង៖ បារាំងជាប្រទេសស្ថិតនៅចំណាត់ថ្នាក់ទី៤ លើពិភពលោកដែលមានទុនបម្រុងមាសប្រមាណ ២,៤៣៦ តោន។ មាសទាំងនេះត្រូវបានរក្សាទុកនៅក្នុងតុដេកមាសរបស់ធនាគារបារាំង ដោយទុនបំរុងមាសរបស់ប្រទេសនេះស្ទើរតែមិនផ្លាស់ប្តូរក្នុងរយៈពេលប៉ុន្មានឆ្នាំចុងក្រោយនេះ។

៥.ប្រទេសរុស្ស៊ី៖ ប្រទេសរុស្ស៊ីមានមាសបម្រុងប្រមាណ ២,៣២៩ តោនក្នុងឆ្នាំ ២០២៣។ ថ្មីៗនេះ ធនាគារកណ្តាលនៃប្រទេសរុស្ស៊ីបានបង្កើនទុនបម្រុងមាសរបស់ខ្លួនដើម្បីធ្វើពិពិធកម្មទ្រព្យសម្បត្តិ និងជៀសវាងការពឹងផ្អែកលើប្រាក់ដុល្លារអាមេរិក។

៦.ប្រទេសចិន៖ ប្រទេសចិនមានទុនបម្រុងមាសប្រមាណ ២,១១៣ តោនដែលស្ថិតនៅចំណាត់ថ្នាក់ទី៦ លើពិភពលោកក្នុងឆ្នាំ ២០២៣ ។ ចិនគឺជាអ្នកលេងដ៏សំខាន់នៅក្នុងទីផ្សារមាស ទាំងផ្នែកផលិតកម្ម ការប្រើប្រាស់ និងទុនបម្រុង។ យោងតាមធនាគារកណ្តាលចិន (PBOC) ថ្មីៗនេះបានបង្កើនទុនបម្រុងមាសដើម្បីការពារអតិផរណា។ ដូច្នេះសមាគមមាសចិនបាននិយាយថា តម្រូវការប្រើប្រាស់មាសនៅក្នុងប្រទេសនេះបច្ចុប្បន្នគឺធំជាងគេបំផុតក្នុងពិភពលោក ដោយមានចំនួន ៨៣៥ តោនក្នុងត្រីមាសទី ១ នៃឆ្នាំនេះ ដោយសារប្រជាជនថ្នាក់កណ្តាលកើនឡើង។

៧.ប្រទេសស្វីស៖ ស្វីសគឺជាមជ្ឈមណ្ឌលហិរញ្ញវត្ថុរបស់ពិភពលោក ដោយបច្ចុប្បន្នប្រទេសនេះមានទុនបម្រុងមាសប្រមាណ ១,០៤០ តោន។ មាសនេះត្រូវបានគ្រប់គ្រងដោយធនាគារកណ្តាលស្វីស និងបម្រើជាសសរស្តម្ភហិរញ្ញវត្ថុសម្រាប់ប្រទេស។ ដូច្នេះមាសដែលពួកគេមានគឺត្រូវបាននាំចូលជាចម្បង។ នៅឆ្នាំ ២០២២ ពួកគេគឺជាអ្នកនាំចូលមាសដ៏ធំបំផុតរបស់ពិភពលោក។

៨.ប្រទេសជប៉ុន៖ បច្ចុប្បន្នប្រទេសជប៉ុនមានមាសបម្រុងប្រមាណ ៨៤៦ តោនដែលទុនបម្រុងមាសរបស់ប្រទេសនេះគ្រប់គ្រងដោយធនាគារជប៉ុន (BOJ) មានតម្លៃ ៥២ ពាន់លានដុល្លារ។ ប្រទេសនេះជាកន្លែងជីកយករ៉ែមាស Hishikari ដែលល្បីខាងគុណភាពខ្ពស់។ ទោះយ៉ាងណាក៏ដោយ ដោយសារទុនបំរុងក្នុងស្រុកមានកម្រិត ជប៉ុនភាគច្រើននាំចូលមាស។

៩.ប្រទេសឥណ្ឌា៖ ឥណ្ឌាគឺជាប្រទេសដែលមានមាសបម្រុប្រមាណ ៨០០ តោន និងជាប់ចំណាត់ថ្នាក់ទី៩ លើពិភពលោកក្នុងឆ្នាំ ២០២៣ ។

១០.ប្រទេសហូឡង់៖ ប្រទេសហូឡង់មានមាសបម្រុងប្រមាណ ៦១២ តោន ដែលមាសទាំងនេះត្រូវបានរក្សាទុកនៅតុដេកនៃធនាគារកណ្តាលអាមេរិកនៅទីក្រុងញូវយ៉ក។ ដូច្នេះក្នុងរយៈពេលប៉ុន្មានឆ្នាំចុងក្រោយនេះ ទុនបំរុងមាសរបស់ប្រទេសមិនផ្លាស់ប្តូរទេ៕

សហរដ្ឋអាមេរិក ៖ គេហទំព័រ indy100.com រាយការណ៍ថា មាននារីម្នាក់បានបង្ហោះវីដេអូមួយក្នុងបណ្តាញសង្គម TikTok ហើយនិយាយថា នាងបានដាក់ពាក្យបណ្តឹងឪពុក-ម្តាយរបស់ខ្លួននៅតុលាការ ដោយចោទប្រកាន់ថា ពួកគាត់បានផ្តល់កំណើតឱ្យនាង ដោយពុំទទួលបានការយល់ព្រមពីនាងជាមុន ។ ចុងក្រោយ នាងក៏បានឈ្នះក្តី ហើយតុលាការបានសម្រេចឱ្យឪពុក-ម្តាយផ្តល់ប្រាក់ឧបត្ថម្ភឱ្យនាងជារៀងរាល់ខែ ។

នារីរូបនេះឈ្មោះ Kass Theaz និងបានដាក់ឈ្មោះក្នុង TikTok ថា @isatandstared និយាយថា នាងបានដាក់ពាក្យបណ្តឹងឪពុក-ម្តាយរបស់ខ្លួន ដែលធ្វើឱ្យនាងកើតមក ហើយនាងឈ្នះក្តីនៅតុលាការផងដែរ ។ នាងបន្តថា បច្ចុប្បន្ន នាងទទួលបានប្រាក់ឧបត្ថម្ភពីឪពុក-ម្តាយ ចំនួន៥.០០០ដុល្លារអាមេរិកក្នុង១ខែ ។

ហេតុការណ៍នេះបានកើតឡើងតាំងពីឆ្នាំ២០២២ ដោយនារីខាងលើបានបង្ហោះវីដេអូមួយនិយាយថា នាងមិនបានសុំឪពុក-ម្តាយផ្តល់កំណើតឱ្យនាងទេ ។ ដូច្នេះ នាងបានសម្រេចចិត្តប្តឹងពួកគាត់ដែលផ្តល់កំណើតឱ្យនាង ដោយពុំបានសួរនាំនាង១ម៉ាត់សោះ ។

ក្រោយពីនាងបានបង្ហោះវីដេអូរួចមក អ្នកលេងបណ្តាញសង្គមជាច្រើននាក់នៅអាមេរិករិះគន់ថា នាងពុំគួរទទួលបានប្រាក់ពីឪពុក-ម្តាយទេ ពីព្រោះពួកគាត់រកប្រាក់នេះទាំងការនឿយហត់ ។ ប៉ុន្តែនាងឆ្លើយថា ៖ «ខ្ញុំពុំបានសុំមករស់នៅទីនេះទេ ហើយខ្ញុំក៏ពុំបានសុំមកកើតជាមួយពួកគាត់ដែរ ។ ដូច្នេះ ខ្ញុំមិនគួរត្រូវបង្ខំឱ្យធ្វើការងារអ្វីទេ ។ ខ្ញុំគ្មានជម្រើសថា នឹងពុំកើតមកទេ ទើបខ្ញុំព្យាយាមប្តឹងឪពុក-ម្តាយ ដែលផ្តល់កំណើតឱ្យខ្ញុំដោយគ្មានការអនុញ្ញាត» ។

ចុងក្រោយ នាងក៏បានឈ្នះក្តីនេះ ហើយតុលាការបានកាត់ក្តីឱ្យឪពុក-ម្តាយផ្តល់ប្រាក់ឱ្យនាងចំនួន៥.០០០ដុល្លារអាមេរិកក្នុង១ខែ សម្រាប់ឱ្យនាងចំណាយលើផ្នែកផ្សេងៗ ដូចជា ៖ ម្ហូបអាហារ, កន្លែងស្នាក់នៅ, សម្លៀកបំពាក់ និងសម្ភារៈជាច្រើនទៀត ។

នារីឈ្មោះ Kass Theaz និយាយថា ៖ «ខ្ញុំចង់ប្រាប់អ្នកទាំងអស់គ្នាថា ខ្ញុំឈ្នះក្តីហើយ ។ ឪពុក-ម្តាយពុំបានធ្វើឱ្យខ្ញុំកើតមកជាថ្មីទេ តែខ្ញុំបានទទួលប្រាក់ពីពួកគាត់ជំនួសវិញ ។ ប្រាក់នេះសម្រាប់ឧបត្ថម្ភការចំណាយប្រចាំខែរបស់ខ្ញុំ ។ ខ្ញុំបានសម្រេចចិត្តធ្វើការងារឱ្យពួកគាត់ ហើយការងារនោះ គឺខ្ញុំបានកើតមកជាកូនពួកគាត់» ។

នារីរូបនេះបន្តថា ៖ «ពួកគាត់ត្រូវតែទទួលខុសត្រូវលើជីវិតខ្ញុំជារៀងរហូត ។ ខ្ញុំទទួលបានប្រាក់ចំនួន៥.០០០ដុល្លារអាមេរិកក្នុង១ខែ ហើយខ្ញុំអាចធ្វើការងារផ្សេងទៀតដោយខ្លួនឯងបាន ប្រសិនបើខ្ញុំត្រូវការប្រាក់បន្ថែមទៀតដើម្បីចំណាយលើការងារចាំបាច់» ។

បើទោះជាគ្មានភស្តុតាងបញ្ជាក់ថា នាង Kass Theaz បានឈ្នះក្តីនៅតុលាការ ឬគ្រាន់តែជាការលើកឡើងដើម្បីឱ្យល្បីល្បាញក្នុងបណ្តាញសង្គម ប៉ុន្តែវាបានក្លាយជារឿងមួយធ្វើឱ្យអ្នកលេងបណ្តាញសង្គមនៅអាមេរិកជជែកគ្នាយ៉ាងខ្លាំង ៕

ប្រទេសព្រុយណេ ៖ កាលពីថ្ងៃទី២៦ ខែធ្នូ ឆ្នាំ២០២៣ សារព័ត៌មាន Xinhua បានរាយការណ៍ថា ការិយាល័យអភិវឌ្ឍន៍ទេសចរណ៍ស្ថិតនៅក្រោមក្រសួងទេសចរណ៍ បង្ហាញថា ប្រទេសព្រុយណេបានព្យាយាមដោះស្រាយបញ្ហាការប៉ះពាល់មុខមាត់ក្នុងវិស័យទេសចរណ៍ ដែលបណ្តាលមកពីមគ្គុទ្ទេសក៍ទេសចរខុសច្បាប់ និងបុគ្គលគ្មានលិខិតអនុញ្ញាតធ្វើការក្នុងវិស័យទេសចរណ៍ ។

បច្ចុប្បន្ន ប្រទេសព្រុយណេបានក្លាយជាគោលដៅទេសចរណ៍ពេញនិយមពីសំណាក់ភ្ញៀវទេសចរបរទេស ប៉ុន្តែប្រទេសនេះបានប្រឈមនឹងបញ្ហាមួយចំនួនក្នុងវិស័យទេសចរណ៍ ដូចជា ៖ មគ្គុទ្ទេសក៍ទេសចរគ្មានលិខិតអនុញ្ញាតធ្វើការត្រឹមត្រូវ ។ ហេតុនេះ វាបណ្តាលឱ្យប៉ះពាល់ដល់មុខមាត់ទេសចរណ៍របស់ប្រទេសនេះយ៉ាងខ្លាំង ហើយធ្វើឱ្យគេបារម្ភអំពីគុណភាព និងបទពិសោធន៍ក្នុងដំណើរកម្សាន្តផងដែរ ។

ការិយាល័យអភិវឌ្ឍន៍ទេសចរណ៍បានជូនដំណឹងទៅកាន់ភ្ញៀវទេសចរ និងក្រុមហ៊ុនទេសចរណ៍ថា ពួកគេគួរជួលមគ្គុទ្ទេសក៍ទេសចរណាដែលមានលិខិតអនុញ្ញាតធ្វើការត្រឹមត្រូវប៉ុណ្ណោះ ដោយសារអ្នកទាំងនោះមានចំណេះដឹងជ្រៅជ្រះ និងអាចប្រាប់ភ្ញៀវទេសចរអំពីតំបន់កម្សាន្ត ។ ហេតុនេះ ភ្ញៀវទេសចរទាំងអស់នឹងមានសុវត្ថិភាព និងទទួលបាននូវបទពិសោធន៍ល្អៗពេលពួកគេមកកម្សាន្តនៅប្រទេសព្រុយណេ ។

ដូចគ្នានេះ រដ្ឋាភិបាលព្រុយណេប្រកាសថា ភ្ញៀវទេសចរទាំងអស់គួរតែស្វែងរកក្រុមហ៊ុនទេសចរណ៍ណា ដែលមានលិខិតអនុញ្ញាតច្បាស់លាស់ពីរដ្ឋាភិបាល ។ រីឯមគ្គុទ្ទេសក៍ទេសចរវិញ គួរស្វែងរកបុគ្គលណាដែលទទួលបានលិខិតអនុញ្ញាតធ្វើការត្រឹមត្រូវ និងមានសញ្ញាសម្គាល់ជាផ្លូវការ ដូចជា ៖ ឈ្មោះ, រូបថត និងព័ត៌មានផ្សេងៗ ៕

ប្រទេសឥណ្ឌូណេស៊ី ៖ ប្រទេសឥណ្ឌូណេស៊ីគ្រោងផ្តល់អត្ថប្រយោជន៍ផ្នែកពន្ធដល់ក្រុមហ៊ុនផលិតរថយន្ត ដែលមានគម្រោងសាងសង់រោងចក្រផលិតរថយន្តអគ្គិសនី និងការនាំចូលរថយន្តអគ្គិសនីដំឡើងរួច រហូតដល់ឆ្នាំ២០២៥ ។ គម្រោងថ្មីនេះបង្ហាញឱ្យឃើញថា ឥណ្ឌូណេស៊ីបានព្យាយាមទាក់ទាញការវិនិយោគចូលក្នុងប្រទេសរបស់ខ្លួនកាន់តែច្រើន ។

បទប្បញ្ញត្តិថ្មីនេះបានចុះហត្ថលេខា កាលពីថ្ងៃទី៨ ខែធ្នូ ឆ្នាំ២០២៣ បញ្ជាក់ថា ក្រុមហ៊ុនផ្សេងៗដែលបានវិនិយោគសាងសង់រោងចក្រផលិតរថយន្តអគ្គិសនី និងមានគម្រោងបង្កើនការវិនិយោគផ្នែករថយន្តអគ្គិសនី ពួកគេអាចនឹងទទួលបានអត្ថប្រយោជន៍ផ្នែកពន្ធ ។

បទប្បញ្ញត្តិថ្មីនេះនឹងលុបចោលពន្ធនាំចូល និងពន្ធលើការលក់គ្រឿងបន្លាស់ទំនើបសម្រាប់រថយន្តដំឡើងរួច ដែលនាំចូលប្រទេសឥណ្ឌូណេស៊ី ។ ឥណ្ឌូណេស៊ីគ្រោងផ្តល់អត្ថប្រយោជន៍ពន្ធ ដែលប្រមូលពីអាជ្ញាធរក្នុងតំបន់ផងដែរ ។ មុននេះ ឥណ្ឌូណេស៊ីបានផ្តល់អត្ថប្រយោជន៍ពន្ធចំពោះការនាំចូលគ្រឿងបន្លាស់រថយន្ត ដែលដំឡើងនៅប្រទេសឥណ្ឌូណេស៊ីប៉ុណ្ណោះ ។ គេចាត់ទុកថា ឥណ្ឌូណេស៊ី គឺជាទីផ្សាររថយន្តដ៏ធំបំផុតក្នុងតំបន់អាស៊ីអាគ្នេយ៍ ។

ទោះយ៉ាងណា ចំនួនក្រុមហ៊ុនរថយន្តដែលអាចនាំចូលរថយន្តបាន គឺអាស្រ័យលើទំហំការវិនិយោគទុន និងការអភិវឌ្ឍរោងចក្រ ។ លើសពីនេះ ក្រុមហ៊ុនទាំងនោះត្រូវតែទទួលបានការអនុម័តពីក្រសួងវិនិយោគ ។ រដ្ឋាភិបាលឥណ្ឌូណេស៊ីបានកំណត់គោលដៅថា នឹងផលិតរថយន្តអគ្គិសនីឱ្យបានរហូតដល់៦សែនគ្រឿងនៅឆ្នាំ២០៣០ ដែលចំនួននេះលើសពីចំនួនលក់រថយន្តក្នុងឆមាសទី១ នៃឆ្នាំ២០២៣ របស់ឥណ្ឌូណេស៊ី រហូតដល់១០០ដង ។

ចំណែកក្រុមហ៊ុន Hyundai ក៏បានចូលមកវិនិយោគនៅឥណ្ឌូណេស៊ីផងដែរ ខណៈក្រុមហ៊ុនរថយន្តអគ្គិសនី Neta និងក្រុមហ៊ុន Mitsubishi Motors សន្យាថា នឹងវិនិយោគនៅឥណ្ឌូណេស៊ី ។ ក្រៅពីនេះ ឥណ្ឌូណេស៊ីបានអញ្ជើញក្រុមហ៊ុនធំៗមកវិនិយោគផងដែរ ដូចជា ៖ ក្រុមហ៊ុន Tesla និង BYD ៕