នៅក្នុងកម្មវិធីមួយ តារាចម្រៀង លីម តិចម៉េង បានទម្លាយប្រវត្តិស្គាល់តារាចម្រៀង ថុល សុភិទិ ដោយបញ្ជាក់ថាអ្នកទាំងពីរស្គាល់គ្នាជិត១០ឆ្នាំមកហើយតាំងពីខ្លួនធ្វើការជាសន្តិសុខ។ ចំណែកឯការហៅ ភិទិ ថាបង ទាំងអាយុប្អូនខ្លួនដោយសារតែ ភិទិ ប្រឡូកអាជីពសិល្បៈមុនលោក និងការឱ្យតម្លៃទៅកាន់តារាចម្រៀងរូបនេះ។
កាលពីយប់ថ្ងៃទី១៧ វិច្ឆិកា តារាចម្រៀង លីម តិចម៉េង ម្ចាស់ពាន Cambodian Idol រដូវកាលទី៤ ត្រូវបានអញ្ជើញធ្វើជាតារាកិត្តិយសនៅក្នុងកម្មវិធី «តាម Trend » ដើម្បីជីកសួរនិងការចែករំលែកពីអតីតកាល បទពិសោធ និងភាពជោគជ័យក្នុងអាជីពសិល្បៈ។ ក្នុងកម្មវិធីនេះដែរ លីម តិចម៉េង បានទម្លាយប្រវត្តិនៃការស្គាល់គ្នារបស់លោកជាមួយ ថុល សុភិទិ ប្រាប់ទស្សនិកជនដោយបានបញ្ជាក់ថារូបគេស្គាល់ ភិទិ តាំងពីខ្លួនធ្វើការជាសន្តិសុខ ហើយគិតមកទល់ពេលនេះជិត១០ឆ្នាំមកហើយ។
តិចម៉េង បាននិយាយថា ភិទិ ប្អូនលោក១ឆ្នាំ ប៉ុន្តែប្រឡូកសិល្បៈមុនដោយ ភិទិ បានប្រលងកម្មវិធី Cambodian Idol តាំងពីរដូវកាលទី២ ចំណែកឯខ្លួនទើបប្រលងរដូវកាលទី៤។ មុនលោកច្រៀងនៅតាម Pub ធ្វើជាសន្តិសុខលោកបានស្គាល់ ភិទិ បាត់ទៅហើយ លុះពេលមានឱកាសបានច្រៀងនៅ Pub ធ្វើឱ្យខ្លួនចាត់ទុក ភិទិ ជារៀមច្បងបាត់តែម្តង។ តិចម៉េង រៀបរាប់ទៀតថា ពេលឃើញភិទិលេងហ្គីតា នៅសួនច្បារវត្តបទុម ខ្លួនបានទៅសួរភិទិពីបទពិសោធផ្សេងៗហើយហៅថាបងតែម្តង។
ម្ចាស់ពានរូបនេះបានឱ្យដឹងទៀតថាការហៅបងទៅកាន់ ភិទិ នេះខ្លួនមិនគិតពីអាយុទេ គិតពីបទពិសោធ ការហៅបងមិនមែនជាការខ្លាចរអារអីទេគឺការឱ្យតម្លៃ ខណៈអ្នកទាំងពីរស្គាល់គ្នាជិត១០ឆ្នាំមកហើយ។
ជាមួយគ្នានេះដែរ លីម តិចម៉េង បាននិយាយដែរថាខ្លួនធ្លាប់បាក់ទឹកចិត្តខ្លះក្នុងការប្រឡូកសិល្បៈតាម Pub ធ្វើការឱ្យគេ៤ ៥ខែ មិនបានលុយនិងបានធ្វើជាបុគ្គលិកពេញសិទ្ធិទើបចង់លាឈប់។ ប៉ុន្តែដោយសារតែការលើកទឹកចិត្ត ភិទិ និងលោក រីណូ កុំឱ្យខ្លួនបោះបង់តស៊ូជាមួយគ្នាចែកគ្នាទៅតាមលទ្ធភាពដែលមានខ្លួនមានទើបលោកវិលចូលច្រៀងនៅតាម Pub វិញ។
គួរបញ្ជាក់ថា អំឡុងពេលប្រលង និងក្រោយពេលប្រលង ហ្វេនៗរបស់ ភិទិ និង តិចម៉េង មួយចំនួនបានបង្កសង្គ្រាមពាក្យសម្តីជាមួយគ្នានៅលើប្រព័ន្ធផ្សព្វផ្សាយ ។ ទោះជាយ៉ាងណាពួកគេទាំងពីរនាក់ពុំមានរឿងរកាំរកូសឡើយ ខណៈមិត្តភាពរបស់អ្នកទាំងពីរនៅតែល្អដូចដើម៕
