ប្រទេសចិន ៖ យន្តហោះអគ្គិសនីបានអភិវឌ្ឍន៍ និងផលិតឡើងដោយក្រុមហ៊ុនមួយនៅប្រទេសចិន បានសាកល្បងហោះហើរជាលើកដំបូងនៅអាកាសយានដ្ឋានមួយកន្លែងក្នុងខេត្ត Zhejiang ដែលស្ថិតនៅភាគខាងកើតប្រទេសចិន ។ ក្រុមហ៊ុនបានអភិវឌ្ឍន៍យន្តហោះធម្មតាឱ្យទៅជាយន្តហោះអគ្គិសនីដើម្បីផ្តល់អត្ថប្រយោជន៍ និងលើកកម្ពស់ការហោះហើរក្នុងប្រទេស ។

សារព័ត៌មានបរទេសបានចុះផ្សាយកាលពីថ្ងៃទី៧ ខែមករា ឆ្នាំ២០២៤ ថា យន្តហោះអគ្គិសនីប្រភេទ AG60E នេះ ត្រូវបានផលិតឡើងដោយក្រុមហ៊ុនអាកាសចរណ៍ទូទៅនៃឧស្សាហកម្មអាកាសចរណ៍ចិន (CAIGA) ។ វាជាយន្តហោះដែលមានសមត្ថភាពបំលែងទៅជាប្រព័ន្ធអគ្គិសនីតាមរយៈ AG60 ។

យន្តហោះអគ្គិសនីមួយនេះមានប្រវែងសរុប៦,៩ម៉ែត្រ និងមានស្លាបប្រវែង៨,៦ម៉ែត្រ ។ វាអាចហោះហើរបានចម្ងាយផ្លូវ១៨៥គីឡូម៉ែត្រក្នុង១ម៉ោង ដោយប្រើប្រាស់ម៉ាស៊ីនតែ១ប៉ុណ្ណោះ ។ នៅក្នុងយន្តហោះមានកៅអីអង្គុយចំនួន២កន្លែង ដែលផលិតឡើងពីលោហៈទាំងអស់ ។ ក្រុមហ៊ុនបានសាកល្បងការហោះហើរជាលើកដំបូង កាលពីឆ្នាំ២០២០ ។

ក្រុមហ៊ុនអាកាសចរណ៍ទូទៅនៃឧស្សាហកម្មអាកាសចរណ៍ចិន (CAIGA) ឱ្យដឹងថា គម្រោងអភិវឌ្ឍន៍យន្តហោះធម្មតាឱ្យទៅជាយន្តហោះអគ្គិសនី គឺជាការព្យាយាមមួយដែលផ្តល់នូវអត្ថប្រយោជន៍ និងអាចរួមចំណែកដល់ការលើកកម្ពស់ការហោះហើរ Low-Altitude Economy ។ វាជាឧស្សាហកម្មកើតថ្មី និងរីកចម្រើនជាយុទ្ធសាស្ត្រ របស់ប្រទេសចិន ៕

បរទេស៖ មហាសេដ្ឋីពិភពលោក Elon Musk ត្រូវបានគេចោទប្រកាន់ពីបទប្រើប្រាស់ថ្នាំញៀនមុនពេលចូលរួមកិច្ចប្រជុំ SpaceX ដែលធ្វើឱ្យប៉ះពាល់ដល់កិច្ចសន្យាសម្បទានរបស់រដ្ឋាភិបាលរាប់ពាន់លានដុល្លារ។
យោងតាមប្រភពព័ត៌មាន Business Insider ដែលបានចុះផ្សាយនៅថ្ងៃទី៨ ខែមករាថ្មីៗនេះថា Elon Musk ដែលជាម្ចាស់ក្រុមហ៊ុន X និងជាស្ថាបនិក SpaceX បានប្រើប្រាស់ថ្នាំញៀនដូចជា ketamine, LSD, កូកាអ៊ីន, ecstasy និងផ្សិត psychedelic ជាញឹកញាប់នៅឯពិធីជប់លៀងឯកជន។

នេះបើតាមរបាយការណ៍បានឱ្យដឹងទៀតថា ឧប្បត្តិហេតុនៃការប្រើប្រាស់គ្រឿងញៀនរបស់គាត់រួមមានការប្រើប្រាស់អាស៊ីតនៅឯពិធីជប់លៀង Los Angeles ក្នុងឆ្នាំ ២០១៨, ការជក់កញ្ឆាជាសាធារណៈក្នុងឆ្នាំ ២០១៨ ដូចគ្នា, និងការប្រើប្រាស់ផ្សិត psychedelic នៅម៉ិកស៊ិកក្នុងឆ្នាំ ២០១៩ រួមទាំងការប្រើថ្នាំ ketamine នៅឯពិធីជប់លៀង Art Basel ក្នុងទីក្រុង Miami នៅឆ្នាំ ២០២១។ ដូច្នេះ ការប្រើប្រាស់គ្រឿងញៀនគឺជាការខុសច្បាប់ទាំងស្រុងនៅ SpaceX និង Tesla ហើយនឹងអាចប៉ះពាល់ដល់តួនាទីដឹកនាំរបស់មហាសេដ្ឋីរូបនេះផងដែរ។

ទោះជាយ៉ាងណាក៏ដោយ Musk បានច្រានចោលការចោតប្រកាន់នេះ ដោយបានអះអាងថា នៅក្នុងខ្លួនរបស់គាត់មិនមានសារធាតុថ្នាំញៀនឡើយ។ Musk បានបន្តទៀតថា ហេតុផលសម្រាប់ការប្រើប្រាស់ថ្នាំទាំងនេះគឺដោយសារ គាត់មានជំងឺ Stress ក៏ដូចជាប្រឈមនឹងការខ្វះដំណេករ៉ាំរ៉ៃផងដែរ។ មហាសេដ្ឋីវ័យ ៥២ ឆ្នាំរូបនេះក៏បាននិយាយដែរថា ជាទូទៅគាត់តែងតែសម្រាកនៅក្នុងការិយាល័យ Tesla និង SpaceX ហើយធ្វើការស្ទើរតែជានិច្ច។

យោងតាមអ្នកនិពន្ធ Walter Isaacson ដែលពិពណ៌នាអំពីជីវប្រវត្តិរបស់ Musk បានឱ្យដឹងថា មហាសេដ្ឋីរូបនេះពិតជាមិនចូលចិត្តការប្រើប្រាស់គ្រឿងញៀនពិតមែន ប៉ុន្តែដោយសារបញ្ហាសុខភាពទើបគាត់ប្រើ។ ទោះជាយ៉ាងណាក៏ដោយ ការប្រើថ្នាំញៀនគឺខុសច្បាប់និងជាការបំពានគោលការណ៍សហព័ន្ធ ដែលនេះអាចប៉ះពាល់ដល់កិច្ចសន្យាសម្បទានរដ្ឋាភិបាលដែលមានតម្លៃរាប់ពាន់លានដុល្លាររបស់ក្រុមហ៊ុន SpaceX ដែលជាក្រុមហ៊ុនតែមួយគត់នៅក្នុងសហរដ្ឋអាមេរិក៕

សហរដ្ឋអាមេរិក ៖ ក្រុមហ៊ុនរថយន្តតាក់ស៊ីមួយនៅអាមេរិកបានបង្ហាញរថយន្តបើកបរដោយស្វ័យប្រវត្តិ និងសម្រាប់ដឹកមនុស្សចាស់ក្នុងមជ្ឈមណ្ឌលថែទាំមនុស្សចាស់មួយកន្លែងនៅរដ្ឋអារីហ្សូណា ។ ក្រុមហ៊ុនឱ្យដឹងថា ក្រុមហ៊ុនបានសាកល្បងផ្តល់សេវាកម្មរថយន្តតាក់ស៊ីដឹកមនុស្សចាស់ដោយមិនគិតថ្លៃ ហើយបើទទួលបានជោគជ័យ ក្រុមហ៊ុននឹងពង្រីកសេវាកម្មបន្ថែមទៀតនាថ្ងៃអនាគត ។

រថយន្តតាក់ស៊ីបើកបរដោយស្វ័យប្រវត្តិនេះ ពុំចាំបាច់មានបុគ្គលិកប្រចាំការនៅក្នុងរថយន្តទេ ។ វាជារបស់ក្រុមហ៊ុន May Mobility ដែលជាក្រុមហ៊ុនអភិវឌ្ឍន៍រថយន្តតាក់ស៊ីបើកបរដោយស្វ័យប្រវត្តិនៅអាមេរិក ។ នេះបើតាមការចុះផ្សាយរបស់សារព័ត៌មានបរទេស នៅដើមខែមករា ឆ្នាំ២០២៤ ។

បច្ចេកវិទ្យាបើកបរដោយស្វ័យប្រវត្តិបានដើរតួនាទីយ៉ាងសំខាន់សម្រាប់សេវាកម្មរថយន្តតាក់ស៊ីគ្មានអ្នកបើកបរ ។ បច្ចេកវិទ្យានេះអាចតាមដានស្ថានការណ៍ជុំវិញក្នុងពេលរថយន្តកំពុងបើកបរនៅតាមដងផ្លូវ ។ រថយន្តនឹងទទួលបានទិន្នន័យពីប្រព័ន្ធផ្សេងៗដែលគេបានបំពាក់នៅផ្នែកខាងមុខរថយន្ត ដើម្បីឱ្យរថយន្តអាចសម្រេចចិត្តបញ្ជាប្រព័ន្ធផ្សេងៗដោយខ្លួនវា និងមានសុវត្ថិភាពបំផុត ។

ទោះយ៉ាងណា ក្រុមហ៊ុន May Mobility មិនបានផ្តល់ព័ត៌មានលម្អិតអំពីល្បឿនបើកបររបស់រថយន្តទេ ដោយក្រុមហ៊ុនបញ្ជាក់ថា បានសាកល្បងដំណើរការប្រព័ន្ធបច្ចេកវិទ្យាផ្សេងៗក្នុងរថយន្ត តាំងពីខែមេសា ឆ្នាំ២០២៣ ។ បន្ទាប់មក នៅថ្ងៃទី១៨ ខែធ្នូ ឆ្នាំ២០២៣ ក្រុមហ៊ុនបានផ្តល់សេវាកម្មរថយន្តនេះនៅមជ្ឈមណ្ឌលថែទាំមនុស្សចាស់ក្នុងរដ្ឋអារីហ្សូណាជាផ្លូវការ ដោយអ្នកជិះពុំចាំបាច់ចំណាយប្រាក់ទេ ។

ពលរដ្ឋអាមេរិកមានអាយុច្រើនអាចហៅរថយន្តនេះជិះបាន តាមរយៈការដោនឡូតកម្មវិធីក្នុងទូរស័ព្ទដៃ ហើយក្រុមហ៊ុនបានកំណត់ទីកន្លែងសម្រាប់ដឹកមនុស្សចាស់ក្នុងចម្ងាយផ្លូវប្រមាណជាង៧គីឡូម៉ែត្រ ។ ក្នុងការសាកល្បងជំហានដំបូង រថយន្តបើកបរដោយស្វ័យប្រវត្តិបានដឹកមនុស្សចាស់ស្មើជិត៤ម៉ឺននាក់ ទៅកាន់ទីកន្លែងផ្សេងៗ ដូចជា ៖ កន្លែងស្នាក់នៅ, មន្ទីរពេទ្យ និងទីកន្លែងសំខាន់ៗ ។

ក្រុមហ៊ុនបញ្ជាក់ថា បើការសាកល្បងរថយន្តតាក់ស៊ីបើកបរដោយស្វ័យប្រវត្តិនេះទទួលបានជោគជ័យ ក្រុមហ៊ុននឹងពង្រីកការផ្តល់សេវាកម្មបន្ថែមទៀតទៅកាន់ទីប្រជុំជននានានៅលើពិភពលោក ៕

ប្រទេសប្រេស៊ីល ៖ នៅដើមខែមករា ឆ្នាំ២០២៤ សារព័ត៌មាន New York Post បានចុះផ្សាយថា មានបុរសម្នាក់អាយុ៤០ឆ្នាំ មុខរបរចិញ្ចឹមគោ ត្រូវបានសត្វខ្លា១ក្បាលក្នុងកសិដ្ឋានវាយប្រហារមកលើរូបគាត់ ហើយមិត្តភក្តិរបស់គាត់ម្នាក់ទៀតបានព្យាយាមកាន់កាំបិតដើម្បីជួយសង្គ្រោះគាត់ ប៉ុន្តែពុំអាចជួយបានទេ ។ ហេតុការណ៍នេះបានកើតឡើងកាលពីថ្ងៃទី២៩ ខែសីហា ឆ្នាំ២០២៣ នៅកសិដ្ឋានមួយកន្លែងក្នុងប្រទេសប្រេស៊ីល ។

សារព័ត៌មានរាយការណ៍ទៀតថា ក្នុងថ្ងៃកើតហេតុ បុរសចិញ្ចឹមគោរូបនេះគិតថា គាត់មុខជាត្រូវស្លាប់ជាមិនខាន ដោយសារគាត់ពុំអាចរួចផុតពីសត្វខ្លា ប៉ុន្តែភ្លាមនោះ ទូរស័ព្ទដៃនៅក្នុងហោប៉ៅខោរបស់គាត់បានផ្ទុះឡើងនៅចំពោះមុខខ្លាដ៏កាចសាហាវ ដោយសារតែវាខាំជើងគាត់ ហើយវាខាំត្រូវទូរស័ព្ទដៃផងដែរ ។ គេជឿថា ទូរស័ព្ទក្នុងហោប៉ៅខោគាត់ដែលផ្ទុះឆេះនេះមិនបណ្តាលឱ្យខ្លាងា.ប់ទេ គឺវាគ្រាន់តែភ័យហើយរត់ចូលព្រៃវិញ ដោយសារទូរស័ព្ទផ្ទុះត្រូវមុខរបស់វា ។

មនុស្សមួយចំនួននិយាយថា ដោយសារសំឡេងទូរស័ព្ទផ្ទុះឡើងធ្វើឱ្យខ្លាដ៏ធំនេះបញ្ឈប់ការវាយប្រហារមកលើបុរសចិញ្ចឹមគោ ខណៈបុរសនេះស្ទើរតែក្លាយជាចំណីរបស់វាទៅហើយ ។

បន្ទាប់មក គេក៏បានបញ្ជូនគាត់ទៅកាន់មន្ទីរពេទ្យភ្លាមៗ ដោយសារគាត់ត្រូវរបួសធ្ងន់ធ្ងរជាច្រើនកន្លែងនៅលើដៃ និងជើង ។ រីឯគ្រូពេទ្យប្រាប់ថា ជើងរបស់គាត់មានរបួសធ្ងន់ធ្ងរ និងរលាកខ្លាំង ដោយសារទូរស័ព្ទផ្ទុះឆេះ ហើយគាត់បាក់ដៃផងដែរ ៕

បរទេស៖ ចំនួននៃការក្ស័យធនរបស់ក្រុមហ៊ុននៅសហរដ្ឋអាមេរិកកើនឡើងយ៉ាងខ្លាំង ដោយសារអត្រាការប្រាក់ខ្ពស់ ការរឹតបន្តឹងលក្ខខណ្ឌផ្តល់ប្រាក់កម្ចី និងការកាត់បន្ថយការទូទាត់គាំទ្រជំងឺរាតត្បាតដែលបណ្តាលឱ្យប្រជាជនអាមេរិក និងអាជីវកម្មជាច្រើនបានសម្រេចដាក់ពាក្យសុំក្ស័យធននៅឆ្នាំ ២០២៣ កើនឡើង ១៨% បើប្រៀបធៀបទៅនឹងឆ្នាំ ២០២២។យោងតាម Epiq ACER ដែលជាអ្នកផ្តល់ទិន្នន័យក្ស័យធន បាននិយាយកាលពីថ្ងៃទី៧ ខែមករាថា ចំនួនឯកសារក្ស័យធនសរុបនៅក្នុងសហរដ្ឋអាមេរិកកាលពីឆ្នាំមុនមានច្រើនជាង ៤៤៥,០០០ ដែលក្នុងនោះចំនួននៃការដាក់ពាក្យក្ស័យធនបុគ្គលមានប្រហែល ៤១៩,០០០។

កាលពីឆ្នាំ ២០២៣ អាជីវកម្ម និងប្រជាជនអាមេរិកបានប្រឈមមុខនឹងអត្រាការប្រាក់ខ្ពស់ ការរឹតបន្តឹងលក្ខខណ្ឌផ្តល់ប្រាក់កម្ចី និងការបញ្ចប់បន្តិចម្តងៗនៃការទូទាត់ប្រាក់ដែលគាំទ្រជំងឺរាតត្បាត។ ដូច្នេះ ចំនួននៃកម្មវិធីសម្រាប់ការរៀបចំរចនាសម្ព័ន្ធអាជីវកម្មក៏កើនឡើង ៧២% ផងដែរ បើប្រៀបធៀបទៅនឹងឆ្នាំ ២០២២ ដល់ជាង ៦,៥០០ ករណី។ ហេតុនេះហើយ រលកនៃការក្ស័យធននេះត្រូវបានព្យាករណ៍ថានឹងបន្តកើនឡើងនៅឆ្នាំ ២០២៤។ ទោះជាយ៉ាងណាក៏ដោយ បច្ចុប្បន្នចំនួននៃការដាក់ពាក្យក្ស័យធនថ្មីនៅដើមឆ្នាំ ២០២៤ បានកើនឡើងជាបន្តបន្ទាប់ ដោយសារគោលនយោបាយជំរុញសេដ្ឋកិច្ចអំឡុងពេលជំងឺរាតត្បាតត្រូវបានលុបចោលជាបណ្តើរៗ ក៏ដូចជាការរឹតបន្តឹងអត្រាការប្រាក់កម្ចីផងដែរ។

យោងតាមទិន្នន័យពីធនាគារកណ្តាលអាមេរិក (Fed) ក្នុងទីក្រុងញូវយ៉កបានបង្ហាញថា នៅចុងត្រីមាសទីបីនៃឆ្នាំ ២០២៣ បំណុលគ្រួសារនៅសហរដ្ឋអាមេរិកមានចំនួន ១៧,៣០០ ពាន់លានដុល្លារ ដែលអត្រាលំនាំដើមក៏កំពុងកើនឡើងផងដែរ ទោះបីជានៅតែទាបជាងកម្រិតមុនការរាតត្បាតក៏ដោយ។ គោលនយោបាយរបស់ Fed ក្នុងការបង្កើនអត្រាការប្រាក់នេះគឺដើម្បីទប់ស្កាត់អតិផរណាក្នុងរយៈពេល ២ ឆ្នាំកន្លងមក ដែលបណ្តាលឱ្យទីផ្សារហិរញ្ញវត្ថុមានការរឹតបន្តឹងយ៉ាងខ្លាំងសម្រាប់អាជីវកម្ម និងគ្រួសារ។

ទោះជាយ៉ាងណាក៏ដោយ ចាប់តាំងពីត្រីមាសចុងក្រោយនៃឆ្នាំមុន ការចំណាយលើការខ្ចីប្រាក់ និងទីផ្សារហិរញ្ញវត្ថុបានក្លាយទៅជា “ភាពងាយស្រួល” បន្តិចម្តងៗសម្រាប់អាជីវកម្ម និងគ្រួសារ។ ហេតុផលគឺថា Fed បានរក្សាអត្រាការប្រាក់មិនផ្លាស់ប្តូរពេញមួយឆមាសទីពីរនៃឆ្នាំនេះ ហើយក្នុងពេលជាមួយគ្នានេះ Fed ក៏បានបង្ហាញសញ្ញាថាដំណើរការរឹតបន្តឹងបានបញ្ចប់ ហើយទីភ្នាក់ងារនេះក៏អាចកាត់បន្ថយអត្រាការប្រាក់ចាប់ពីឆ្នាំក្រោយផងដែរ៕

សហរដ្ឋអាមេរិក ៖ កាលពីថ្ងៃទី៧ ខែមករា ឆ្នាំ២០២៤ សារព័ត៌មានបរទេសរាយការណ៍ថា មានចៅក្រមស្រីម្នាក់ត្រូវបានចុងចោទប្រុសលោតធាក់ភ្លាមៗនៅក្នុងតុលាការ បន្ទាប់ពីរូបគេមិនពេញចិត្តនឹងការកាត់ក្តីរបស់ចៅក្រមរូបនេះ ។ ហេតុការណ៍នេះបានកើតឡើងនៅទីក្រុងឡាសវេហ្គាស រដ្ឋណែវ៉ាដា សហរដ្ឋអាមេរិក ។

បើតាមកាមេរ៉ាសុវត្ថិភាពបង្ហាញថា ចៅក្រមស្រីកំពុងតែអង្គុយវិនិច្ឆ័យក្តីជនជាប់ចោទ អំពីករណីធ្វើបាបរាងកាយសមាជិកគ្រួសាររបស់ខ្លួន ។ ពេលនោះ ចៅក្រមអានសាលក្រមមិនទាន់ចប់ស្រួលបួលផង ស្រាប់តែចុងចោទមិនពេញចិត្តយ៉ាងខ្លាំង ហើយរូបគេក៏លោតឡើងលើតុចៅក្រម និងវាយតប់ចៅក្រមភ្លាមៗ ។

ចំណែកមន្ត្រីតុលាការផ្សេងទៀតបាននាំគ្នាជួយហាមឃាត់ និងចាប់ខ្លួនជនបង្កហេតុកុំឱ្យវាយដំចៅក្រម រហូតដល់កើតចលាចលពេញតុលាការ ។ ហេតុការណ៍នេះបណ្តាលឱ្យចៅក្រម និងមន្ត្រីតុលាការជាច្រើនរូបទៀតរងរបួស ខណៈជនបង្កហេតុត្រូវបានគេបញ្ជូនទៅកន្លែងឃុំខ្លួន និងរង់ចាំការកាត់ក្តីជាថ្មីអំពីបទវាយតប់រាងកាយចៅក្រម និងមន្ត្រីតុលាការជាច្រើនរូប ។

គួរបញ្ជាក់ថា តុលាការបានកាត់ក្តីជនជាប់ចោទម្នាក់នេះពីបទវាយធ្វើបាបមនុស្សនៅក្នុងក្រុមគ្រួសាររបស់ខ្លួនជាញឹកញាប់ ។ នៅថ្ងៃកើតហេតុ រូបគេបានស្នើសុំឱ្យតុលាការសម្រាលទោសឱ្យខ្លួន ដោយសារមានជំងឺផ្លូវចិត្ត និងមិនគួរជាប់ពន្ធនាគារទេ ។ ប៉ុន្តែនៅពេលចៅក្រមកាត់ក្តីឱ្យរូបគេជាប់ពន្ធនាគារ ទើបធ្វើឱ្យជនជាប់ចោទមិនពេញចិត្ត និងទប់អារម្មណ៍លែងជាប់ ទើបកើតហេតុកាណ៍វាយចៅក្រមបែបនេះ ៕

សហរដ្ឋអាមេរិក ៖ កាលពីថ្ងៃទី៧ ខែមករា ឆ្នាំ២០២៤ សារព័ត៌មានបរទេសរាយការណ៍ថា ទ្វារសង្គ្រោះបន្ទាន់របស់យន្តហោះ «Boeing 737 Max 9» បានធ្លាក់នៅលើអាកាសពេលយន្តហោះនេះកំពុងហោះហើរ ។ ភ្នាក់ងារអាកាសចរណ៍អាមេរិកបានបញ្ជាឱ្យក្រុមហ៊ុនអាកាសចរណ៍ទាំងអស់ផ្អាកការប្រើប្រាស់យន្តហោះដឹកអ្នកដំណើរប្រភេទ «Boeing 737 Max 9» ស្មើចំនួនជាង១០០គ្រឿង ជាបណ្តោះអាសន្ន ។

ការផ្អាកដំណើរការយន្តហោះប្រភេទនេះ បន្ទាប់ពីកើតហេតុការណ៍គួរឱ្យភ្ញាក់ផ្អើលមួយ ដោយសារទ្វារសង្គ្រោះបន្ទាន់នៅចំណុចកណ្តាលនៃយន្តហោះនេះ ដែលដំណើរការដោយក្រុមហ៊ុនអាកាសចរណ៍ Alaska Airlines បានធ្លាក់នៅកណ្តាលអាកាស ។ ពេលនោះ មានអ្នកដំណើរចំនួន១៧១នាក់បានធ្វើដំណើរពីទីក្រុង Portland រដ្ឋ Oregon ទៅកាន់ទីក្រុង Ontario រដ្ឋ California បន្ទាប់ពីយន្តហោះបានហោះឡើងលើបន្តិច ។

ហេតុនេះ អ្នកបើកបរយន្តហោះបានសម្រេចចិត្តចុះចតជាបន្ទាន់នៅអាកាសយានដ្ឋានដដែលវិញ ហើយសំណាងល្អ គ្មានអ្នកដំណើរណាម្នាក់រងរបួស ឬស្លា.ប់បាត់បង់ជីវិតទេ ។ ប៉ុន្តែហេតុការណ៍នេះបានធ្វើឱ្យអ្នកដំណើរជាច្រើននាក់ភ័យតក់ស្លុតយ៉ាងខ្លាំង ។

តាមការស៊ើបអង្កេតជំហានដំបូងរបស់អ្នកជំនាញមកពីភ្នាក់ងារគ្រប់គ្រងការហោះហើរ និងក្រសួងគមនាគមន៍អាមេរិកបង្ហាញថា ហេតុការណ៍នេះអាចបណ្តាលមកពីប្រព័ន្ធគ្រប់គ្រងសម្ពាធខ្យល់នៅកន្លែងអ្នកដំណើរមានបញ្ហា ។ ហេតុនេះ ទើបវាបណ្តាលឱ្យទ្វារសង្គ្រោះបន្ទាន់របស់យន្តហោះធ្លាក់ ។

សារព័ត៌មានរាយការណ៍ថា គេបានបញ្ជូនយន្តហោះប្រភេទ Boeing 737 Max 9 ចំនួន២១៨គ្រឿងទៅឱ្យក្រុមហ៊ុនអាកាសចរណ៍ផ្សេងៗនៅលើពិភពលោករួចហើយ ។ ហេតុការណ៍នេះនឹងធ្វើឱ្យក្រុមហ៊ុនអាកាសចរណ៍នៅអាមេរិក ដែលប្រើប្រាស់យន្តហោះប្រភេទនេះត្រូវផ្អាកការប្រើប្រាស់ជាបណ្តោះអាសន្ន ៕

BENZ និង BMW គឺជាប្រភេទរថយន្តដែលទំនើបបំផុតមួយនៅអឺរ៉ុបរួមទាំងមានតម្លៃខ្ពស់ផងដែរ ទោះជាយ៉ាងណារថយន្តទាំងពីរនេះនៅតែមានតម្លៃទាបជាងរថយន្តរបស់ប្រទេសជប៉ុន។ ដូច្នេះហើយ តើហេតុអ្វីបានជារថយន្តទំនើបៗនៅអឺរ៉ុបភាគច្រើនតែងតែមានតម្លៃទាបជាងរថយន្តជប៉ុន? ចំពោះមូលហេតុនោះគឺមាន ៤ ចំណុចធំៗដែលអ្នកត្រូវដឹង៖

១.រថយន្តអឺរ៉ុបមានតម្លៃថ្លៃក្នុងការជួសជុល៖ គ្រប់រថយន្តទាំងអស់ មិនថាជារថយន្តជប៉ុន ឬរថយន្តអឺរ៉ុបនោះទេ នៅពេលដែលវាត្រូវបានប្រើប្រាស់ប្រហែល ៥-៧ ឆ្នាំ ឬច្រើនជាងនេះ ចាំបាច់ត្រូវឆ្លងកាត់ការថែទាំបន្ថែមលើការត្រួតពិនិត្យតាមកាលកំណត់។ ដូច្នេះសម្រាប់ថ្លៃថែទាំរថយន្តនៅអឺរ៉ុប ជាធម្មតាមានតម្លៃខ្ពស់ជាងរថយន្តជប៉ុន បើទោះជារថយន្តត្រូវបាននាំយកទៅយានដ្ឋាននៅក្រៅប្រទេសក៏ដោយ។ ហេតុនេះហើយ ជាលទ្ធផលតម្លៃរបស់រថយន្តអឺរ៉ុបនឹងធ្លាក់ថ្លៃជាងរថយន្តជប៉ុនពេលចូលទៅដល់ទីផ្សាររថយន្តជជុះ។

២.រថយន្តអឺរ៉ុបមានបច្ចេកវិទ្យាស្មុគស្មាញជាង៖ រថយន្តអឺរ៉ុបទាំងអស់ត្រូវបានគេស្គាល់ថាមានបច្ចេកវិទ្យាទំនើប មិនថាបច្ចេកវិទ្យាម៉ាស៊ីន ប្រព័ន្ធព្យួរ ប្រព័ន្ធសុវត្ថិភាពជាដើម គឺវាមានភាពស្មុគស្មាញក្នុងការថែទាំរយៈពេលវែង។ ដូច្នេះគ្រឿងបរិក្ខារខ្លះមិនមានផ្នែកជំនួសនោះទេ។ ហេតុនេះហើយ អ្នកត្រូវតែប្រើផលិតផលពិតពីមជ្ឈមណ្ឌលប៉ុណ្ណោះ ដោយសារមូលហេតុនេះហើយ ទើបតម្លៃរថយន្តនៅអឺរ៉ុបធ្លាក់ចុះ។

៣.រថយន្តអឺរ៉ុបមានតម្លៃបង់រំលស់ខ្ពស់ជាង៖ កត្តាសំខាន់សម្រាប់រថយន្តអឺរ៉ុបដែលបណ្តាលឱ្យតម្លៃធ្លាក់ចុះយ៉ាងខ្លាំង គឺដោយសារតម្លៃបង់រំលោះខ្ពស់ជាងរថយន្តជប៉ុន។ អាស្រ័យហេតុនេះ ម្ចាស់រថយន្តអឺរ៉ុបត្រូវតែប្រឈមមុខនឹងការបង់រំលស់ខ្ពស់ដោយជៀសមិនរួច។ ជាឧទាហរណ៍ រថយន្តជប៉ុនដែលមានស្លាកលេខថ្មីតម្លៃ ២៨,០០០ ដុល្លារធៀបនឹងរថយន្តអឺរ៉ុប ៨៦,០០០ ដុល្លារទោះបីរថយន្តទាំងពីរមានលក់បន្តទាបជាង ៥០ ភាគរយក៏ដោយ ក៏តម្លៃរថយន្តជប៉ុនទទួលបានជាង ១ ម៉ឺនដុល្លារក្នុងការរំលោះ ខណៈដែលរថយន្តអឺរ៉ុបត្រូវទទួលការរំលស់ខ្ពស់រហូតដល់ទៅជាង ៤ ម៉ឺនដុល្លារ។ កត្តាទាំងនេះធ្វើឱ្យអ្នកដែលប្រើប្រាស់រថយន្តអឺរ៉ុបមានការភ័យខ្លាច ដោយមនុស្សមួយចំនួនតូចតែងចង់ត្រឡប់ទៅប្រើរថយន្តជប៉ុនជំនួសវិញ។

៤.រថយន្តជប៉ុនអាចមានភាពប្រសើរជាង៖ បើប្រៀបធៀបតម្លៃរវាងរថយន្តអឺរ៉ុបនិងរថយន្តជប៉ុនគឺប្រហាក់ប្រហែលគ្នាទេ។ ប៉ុន្តែទោះជាយ៉ាងណាក៏ដោយ រថយន្តជប៉ុនអាចបំពេញតម្រូវការរបស់អតិថិជនបានល្អជាង ដោយសារទំហំតួខ្លួនធំទូលាយជាង និងការបើកបរផ្លូវឆ្ងាយមានផាសុកភាពជាង រួមទាំងជួយសន្សំសំចៃកាន់តែច្រើនលើប្រេងឥន្ធនៈ រីឯថ្លៃថែទាំវិញគឺមិនថ្លៃនោះទេ ដែលនេះធ្វើឱ្យរថយន្តជប៉ុនកាន់តែពេញនិយមក្នុងទីផ្សារជជុះ៕