ប្រទេសចិន៖ បច្ចុប្បន្ន ប្រទេសចិនកំពុងប្រឈមមុខនឹងការផ្ទុះឡើងនៃជំងឺផ្លូវដង្ហើម ឬជំងឺរលាកសួត ដែលភាគច្រើនពាក់ព័ន្ធនឹងកុមារ បានជំរុញឱ្យអង្គការសុខភាពពិភពលោក (WHO) ស្នើសុំព័ត៌មានលម្អិតពីទីក្រុងប៉េកាំង។
កាលពីថ្ងៃទី២៣ ខែវិច្ឆិកា យោងតាម Sky News បានឱ្យដឹងថា ប្រទេសចិនបានកត់ត្រាការកើនឡើងនៃករណី “ជំងឺរលាកសួតស្រដៀងនឹងជំងឺគ្រុនផ្តាសាយ” ចាប់តាំងពីពាក់កណ្តាលខែតុលាមកម្លេះ ដែលវាស្រដៀងទៅនឹងពេលដែលជំងឺរាតត្បាត Covid-19 បានផ្ទុះឡើងកាលពី ៣ ឆ្នាំមុន។ WHO បាននិយាយថា “អង្គការសុខភាពពិភពលោកបានធ្វើសំណើផ្លូវការមួយដោយសុំឱ្យប្រទេសចិនផ្តល់ព័ត៌មានលម្អិតអំពីការកើនឡើងនៃចំនួនករណីជំងឺផ្លូវដង្ហើម និងចង្កោមជំងឺរលាកសួតចំពោះកុមារ” ។

យោងតាមគណៈកម្មការសុខភាពជាតិរបស់ប្រទេសចិន (NHC) បាននិយាយកាលពីសប្តាហ៍មុនថា ការកើនឡើងយ៉ាងខ្លាំងនៃករណីផ្លូវដង្ហើមនេះ គឺដោយសារតែគោលនយោបាយនៃការដកវិធានការរឹតបន្តឹងដើម្បីការពារ Covid-19 និងការរីករាលដាលនៃមេរោគដូចជាជំងឺផ្តាសាយ និងការឆ្លងមេរោគបាក់តេរីផ្លូវដង្ហើមផ្សេងទៀត។ រដ្ឋធានីប៉េកាំងនៅភាគខាងជើងប្រទេសចិនកំពុងជួបប្រទះនឹងភាពត្រជាក់ខ្លាំង ដោយសីតុណ្ហភាពត្រូវបានព្យាករណ៍ថានឹងធ្លាក់ចុះក្រោមសូន្យនៅថ្ងៃទី ២៤ ខែវិច្ឆិកានេះ។ ដូច្នេះហើយ មន្ត្រីបានផ្តល់អនុសាសន៍ឱ្យពង្រឹងការតាមដានជំងឺរាតត្បាតនៅតាមគ្រឹះស្ថានសុខាភិបាល និងសហគមន៍ ក៏ដូចជាការពង្រឹងសមត្ថភាពនៃប្រព័ន្ធសុខាភិបាលផងដែរ។

អង្គការសុខភាពពិភពលោក (WHO) បានទាក់ទងទៅវេជ្ជបណ្ឌិត និងអ្នកវិទ្យាសាស្ត្ររបស់ទីភ្នាក់ងារនៅក្នុងប្រទេសចិន ហើយបានជំរុញឱ្យប្រជាជនក្នុងប្រទេសនេះចាត់វិធានការបង្ការដូចជា ការចាក់វ៉ាក់សាំង រក្សាចម្ងាយ ពាក់ម៉ាស់ និងនៅផ្ទះពេលឈឺ លាងដៃឱ្យបានញឹកញាប់។ ទោះជាយ៉ាងណាក៏ដោយ កាលពីដើមឆ្នាំនេះ អ្នកជំនាញរបស់អង្គការសុខភាពពិភពលោកបាននិយាយថា ពួកគេជឿថាប្រទេសចិនមានទិន្នន័យបន្ថែមទៀតដែលអាចបំភ្លឺអំពីប្រភពដើមនៃ Covid-19 ហើយបានអំពាវនាវឱ្យទីក្រុងប៉េកាំងចែករំលែកព័ត៌មាននេះបន្តទៀត៕

ប្រទេសជប៉ុន ៖ អ្នកចូលរួមប្រកួតមកពី២១ប្រទេសនៅទូទាំងពិភពលោក បានចូលរួមក្នុងកម្មវិធីប្រកួត «ប្រមូលសំរាម» លំដាប់ពិភពលោកនៅទីក្រុងតូក្យូ ប្រទេសជប៉ុន កាលពីថ្ងៃទី២២ ខែវិច្ឆិកា ឆ្នាំ២០២៣ ។ ការប្រកួតប្រមូលសំរាមនេះបានចែកជាក្រុម ហើយក្នុង១ក្រុមមានគ្នា៣នាក់ ដោយពួកគេត្រូវប្រមូលសំរាមឱ្យបានច្រើនបំផុតនៅតាមដងផ្លូវ ដែលត្រូវបានគេកំណត់នៅទីក្រុងតូក្យូ ក្នុងរយៈពេលត្រឹមតែ៩០នាទី ។

អ្នកនាង Beatrice Hernandez ជាអ្នកប្រកួតរើសសំរាមមកពីអាមេរិកនិយាយថា ៖ «យើងធ្វើបានល្អខ្លាំងណាស់ ព្រោះយើងធ្វើការជាក្រុម ហើយព្យាយាមស្វែងរកសំរាម ។ ប៉ុន្តែពេលខ្លះ វាជារឿងពិបាកខ្លាំង ពីព្រោះនៅទីក្រុងតូក្យូ គ្មានសំរាមច្រើនឱ្យយើងរើសទេ ។ ពេលខ្លះ យើងក៏ត្រូវព្យាយាមស្វែងរកកន្ទុយបារីនៅតាមដងផ្លូវផងដែរ» ។

រីឯអ្នកនាង Petra Williams ជាអ្នកប្រកួតរើសសំរាមមកពីអូស្ត្រាលីនិយាយថា ៖ «យើងយល់ថា អ្វីៗគ្រប់យ៉ាងដែលយើងមាន ដូចជា សម្លៀកបំពាក់ និងអគារ គឺសុទ្ធតែបានមកពីព្រះម៉ែធរណីទាំងអស់ ។ ដូច្នេះ យើងចាំបាច់ត្រូវតែការពារវា» ។

ក្រុមរើសសំរាមនីមួយៗអាស្រ័យលើថា តើពួកគេអាចប្រមូលសំរាមបានច្រើនកម្រិតណា ឬរើសបានសំរាមប្រភេទណាខ្លះ ដោយហាមរើសសំរាមនៅក្រៅបរិវេណដែលគេកំណត់ ឬចូលទៅសុំសំរាមក្នុងអគារពាណិជ្ជកម្មផ្សេងៗ ។ នៅពេលប្រមូលសំរាមបានហើយ ពួកគេមានពេលវេលា២០នាទីទៀតដើម្បីបែងចែកសំរាមតាមប្រភេទរបស់វា ដូចជា សំរាមអាចដុតបាន, ដបផ្លាស្ទិកទូទៅ, ដបផ្លាស្ទិកអាចកែច្នៃប្រើឡើងវិញបាន, កំប៉ុងលោហៈ, កន្ទុយបារី និងសំរាមផ្សេងទៀត ។

ចំពោះក្រុមទទួលបានជ័យជម្នះ គឺក្រុមមកពីប្រទេសអង់គ្លេស ដោយពួកគេទទួលបានពិន្ទុច្រើនរហូតដល់៩.០៤៦ពិន្ទុ សម្រាប់សំរាមទាំងអស់ដែលមានទម្ងន់៥៧.២៧គីឡូក្រាម ។ ការប្រកួតប្រមូលសំរាមលំដាប់ពិភពលោកនេះ មានឈ្មោះថា SopoGomi គឺជាការរួមបញ្ចូលពាក្យរបស់ភាសាជប៉ុនថា «កីឡា និងសំរាម» ។

អង្គការសប្បុរសធម៌ The Nippon បានចាប់ផ្តើមធ្វើកម្មវិធីប្រកួតនេះតាំងពីឆ្នាំ២០០៨ មកម៉្លេះ ដើម្បីឱ្យមនុស្សនៅទូទាំងប្រទេសយល់ដឹងអំពីសារសំខាន់នៃការការពារបរិស្ថាន និងកាត់បន្ថយសំរាមក្នុងមហាសមុទ្រ ។ ចំណែកការប្រកួតប្រមូលសំរាមលំដាប់ពិភពលោកលើកក្រោយទៀត នឹងរៀបចំឡើងទីក្រុងតូក្យូ នៅឆ្នាំ២០២៥ ហើយគេរំពឹងថា នឹងមានអ្នកចូលរួមប្រមូលសំរាមច្រើនជាងពេលនេះទៀត ៕

បរទេស៖ ប្រទេសថៃ និងជប៉ុនដែលជាទិសដៅពេញនិយមជាប់លាប់សម្រាប់ភ្ញៀវទេសចរចិន ឥឡូវបានបាត់បង់មុខតំណែងជាទិសដៅដែលភ្ញៀវទេសចរចិនពេញចិត្តជាលំដាប់ដោយសារការព្រួយបារម្ភអំពីអសន្តិសុខ អនាម័យ និងសុវត្ថិភាពអាហារ។

ប្រទេសថៃ និងជប៉ុនគឺជាជាទិសដៅពេញនិយមសម្រាប់ភ្ញៀវទេសចរចិននៅដើមឆ្នាំ ប៉ុន្តែបានធ្លាក់ចុះក្នុងចំណាត់ថ្នាក់ត្រីមាសទី ៣។ បច្ចុប្បន្នប្រទេសថៃជាប់ចំណាត់ថ្នាក់ទី ៦ ហើយជប៉ុនជាប់ចំណាត់ថ្នាក់ទី ៨ នេះបើយោងតាមក្រុមហ៊ុនវាយតម្លៃមនោសញ្ចេតនាចិន China Trading Desk រៀងរាល់ត្រីមាស។ ហេតុផលដែលភ្ញៀវទេសចរចិនមិនរំភើបចំពោះគោលដៅដែលធ្លាប់ពេញចិត្តទាំងពីរនេះគឺថាវាផ្តល់ឱ្យពួកគេនូវអារម្មណ៍នៃភាពអសន្តិសុខ អនាម័យ និងសុវត្ថិភាពអាហារ។

លោក Subramania Bhatt នាយកប្រតិបត្តិនៃ China Trading Desk បាននិយាយថា ការបង្ហូរទឹកសំណល់វិទ្យុសកម្មដែលត្រូវបានព្យាបាលចេញពីរោងចក្រថាមពលនុយក្លេអ៊ែរ Fukushima ចូលទៅក្នុងមហាសមុទ្រប៉ាស៊ីហ្វិកក្នុងខែសីហាបាន “ប៉ះពាល់យ៉ាងខ្លាំងដល់អារម្មណ៍របស់ប្រជាជនចិនដែលចង់ទៅទេសចរណ៍” ។ អង្គការសុខភាពពិភពលោក និងអ្នកជំនាញបាននិយាយថា អាហារសមុទ្រពីប្រទេសជប៉ុនសុទ្ធតែមានសុវត្ថិភាពក្នុងការបរិភោគ ប៉ុន្តែដោយសារការភ័យខ្លាចរបស់អ្នកទេសចរចិន “បានប្រែក្លាយគោលដៅដ៏ពេញនិយមបំផុតមួយនេះ ទៅជាកន្លែងដែលពួកគេចង់ទៅទស្សនាតិចបំផុត” ។ការស្ទង់មតិនេះត្រូវបានធ្វើឡើងជាមួយអតិថិជនចិនជាង ១០,០០០ នាក់ដែលមាន ៩៤% នៃអ្នកឆ្លើយតបមានអាយុក្រោម ៤០ ឆ្នាំ។ រីឯ ២៣% ទៀតនៃអ្នកឆ្លើយសំណួរបាននិយាយថាអាហារល្អគឺជាការលើកទឹកចិត្តកំពូលសម្រាប់ការទៅលេងប្រទេសមួយផ្សេងទៀតមុនប្រវត្តិសាស្រ្តនិងវប្បធម៌ (២២%) ធម្មជាតិ (២២%) និងការដើរទិញឥវ៉ាន់ (១០%) ។

សម្រាប់ប្រទេសថៃវិញ គឺជាអារម្មណ៍អសន្តិសុខចំពោះបញ្ហាសង្គម ខណៈដែលភាពយន្តចិនថ្មីៗដូចជា Lost in the Stars និង No More Bets គឺជារឿងប្រឌិត និងមិនមាននៅក្នុងប្រទេសថៃទេ ប៉ុន្តែមនុស្សមួយចំនួនជឿថា រឿងនេះនឹងឆ្លុះបញ្ចាំងពីព្រឹត្តិការណ៍ពិតដែលធ្វើឱ្យមានការចាប់អារម្មណ៍យ៉ាងខ្លាំងក្នុងប៉ុន្មានឆ្នាំចុងក្រោយនេះ រួមទាំងរឿងរបស់ស្ត្រីជនជាតិចិនម្នាក់ដែលត្រូវបានប្តីរបស់នាងរុញធ្លាក់ពីលើច្រាំងថ្មចោទនៅក្នុងប្រទេសថៃក្នុងឆ្នាំ ២០១៩។

គួរបញ្ជាក់ដែរថា ទិសដៅកំពូលទាំង ១០ ដែលភ្ញៀវទេសចរចិនផ្តល់អាទិភាព និងចង់ទៅទស្សនាច្រើនបំផុតនាពេលបច្ចុប្បន្ននេះ តាមលំដាប់លំដោយពីខ្ពស់ទៅទាប រួមមាន សិង្ហបុរី អឺរ៉ុប កូរ៉េ ម៉ាឡេស៊ី អូស្ត្រាលី ថៃ អង់គ្លេស ជប៉ុន អាមេរិក អារ៉ាប់រួម។ ទោះជាយ៉ាងណាក៏ដោយ សិង្ហបុរីនៅតែជាប់ចំណាត់ថ្នាក់លេខមួយ ដោយសារទីតាំងភូមិសាស្ត្រជិតស្និទ្ធរបស់ខ្លួន ក្នុងតំបន់អាស៊ី និងជាគោលដៅសុវត្ថិភាពបំផុតមួយក្នុងពិភពលោកក្នុងឆ្នាំ ២០២៣ នេះ៕

ទំព័រហ្វេសប៊ុកថៃបានចុះផ្សាយថា ជនបរទេសភ្ញាក់ផ្អើលយ៉ាងខ្លាំង នៅពេលពួកគេបានឃើញការធ្វើចរាចរនៅប្រទេសវៀតណាម ។ ជាទូទៅ អ្នកដំណើរនៅតាមផ្លូវមិនបានខ្វល់ពីអ្នកដំណើរផ្សេងទៀតទេ ហើយពួកគេគិតតែបើកបរទៅមុខរៀងៗខ្លួន រីឯច្បាប់ចរាចរណ៍ ក៏មិនគោរពដែរ ។ លើសពីនេះ បើទោះជាប៉ូលិសចរាចរវៀតណាមបានឈរប្រចាំការនៅផ្លូវបំបែកជា៤ ក្តី ក៏គ្មានអ្នកណាម្នាក់ចាប់អារម្មណ៍ដែរ ។

ទំព័រហ្វេសប៊ុកនេះជឿថា មនុស្សភាគច្រើនបានដឹងយ៉ាងច្បាស់ថា ការធ្វើចរាចរនៅវៀតណាមល្បីល្បាញថា អ្នកបើកបរមិនគោរពច្បាប់ចរាចរណ៍ និងបើកបរគ្មានសណ្តាប់ធ្នាប់ ។ គេសង្កេតឃើញថា អ្នកជិះម៉ូតូជាច្រើនគ្រឿងចូលចិត្តចុចស៊ីប្លេគ្រប់ពេលវេលា ហើយនៅពេលចង់បត់ឆ្វេង ឬបត់ស្តាំ ពួកគេមិនផ្តល់សញ្ញាឱ្យអ្នកបើកបរដូចគ្នាទេ រហូតដល់ភ្ញៀវទេសចរអន្តរជាតិនិយាយថា នេះជាការនិយមបើកបរនៅវៀតណាម និងគ្មានប្រទេសណាដូច ។

កន្លងមក មានអ្នកថតវីដេអូពីការធ្វើចរាចរនៅវៀតណាមយកទៅបង្ហោះក្នុងយូធូបជាច្រើន ។ ជាក់ស្តែង យូធូបមួយឈ្មោះ Amazing New Life និយាយថា ៖ «ការស្ទះចរាចរណ៍ភាគច្រើននៅវៀតណាមបានកើតឡើង ជាពិសេស នៅទីក្រុងហាណូយ និងទីក្រុងហូជីមិញ ។ ពលរដ្ឋវៀតណាមគ្រប់រូបមានទម្លាប់នឹងការស្ទះចរាចរណ៍ ដោយសារពួកគេមិនយល់ដឹងពីច្បាប់ចរាចរណ៍ ។ ការស្ទះចរាចរណ៍ភាគច្រើនបានកើតឡើងនៅពេលពលរដ្ឋប្រញាប់ទៅធ្វើការ ឬត្រឡប់មកផ្ទះ» ។

ទំព័រហ្វេសប៊ុកនេះបន្តថា អ្នកជិះម៉ូតូភាគច្រើនបានព្យាយាមជិះចេញពីផ្លូវតូចចង្អៀត ហើយនៅថ្ងៃណាមានភ្លៀងធ្លាក់ គឺថ្ងៃនោះ នឹងស្ទះចរាចរណ៍ខ្លាំង ព្រមទាំងមានទឹកលិចនៅតាមផ្លូវទៀតផង ។ ទោះយ៉ាងណា ការស្ទះចរាចរណ៍នៅវៀតណាម មានរយៈពេលជាមធ្យម ចាប់ពី៣០នាទី រហូតដល់២ម៉ោង ។ ដូច្នេះ វាមិនអាក្រក់ពេកទេ បើធៀបនឹងប្រទេសផ្សេងទៀត ។

ខាងក្រោមនេះ គឺជាការបញ្ចេញមតិរបស់អ្នកលេងបណ្តាញសង្គមមួយចំនួន ដែលទំព័រហ្វេសប៊ុកថៃបានដកស្រង់យកមកចុះផ្សាយ ។ ជនបរទេសម្នាក់និយាយថា ៖ «ខ្ញុំបានផ្លាស់មកធ្វើការនៅវៀតណាម និងទិញម៉ូតូ១គ្រឿងនៅឆ្នាំ២០១៨ ។ សាកល្បងនឹកដល់រូបភាពដែលខ្ញុំត្រូវជិះម៉ូតូនេះមើល! សំណាងល្អ ខ្ញុំមិនធ្លាប់ជួបគ្រោះថ្នាក់ទេ តែខ្ញុំបានឃើញគ្រោះថ្នាក់ចរាចរណ៍រាល់ថ្ងៃ» ។ ជនបរទេសម្នាក់ទៀតថា ៖ «ខ្ញុំបានទៅលេងវៀតណាមនៅឆ្នាំ២០១៩ ខ្ញុំចូលចិត្តប្រទេសនេះ ប៉ុន្តែការធ្វើចរាចរធ្វើឱ្យខ្ញុំបារម្ភយ៉ាងខ្លាំង» ។

រីឯជនជាតិថៃនិយាយថា ៖ «ខ្ញុំដឹងថា វៀតណាមស្ទះចរាចរណ៍ និងមានសំឡេងរំខានខ្លាំងនៅតាមផ្លូវ ប៉ុន្តែខ្ញុំមិននឹកស្មានថា វាច្រើនបែបនេះទេ ។ វាជាទម្លាប់របស់ជនជាតិវៀតណាម ហើយខ្ញុំចង់ទៅទីនោះបានម្តង ព្រោះការធ្វើចរាចរនៅប្រទេសថៃមិនបែបនេះទេ» ។

ចំណែកជនបរទេសនិយាយថា ៖ «គួរឱ្យចាប់អារម្មណ៍ណាស់ ដែលពួកគេអាចទៅណាមកណាបានដោយមិនបុកគ្នា ឬត្រូវប្រឈមមុខដាក់គ្នាដោយភាពតានតឹង» ។ រីឯជនជាតិអាមេរិកនិយាយថា ៖ «ខ្ញុំធ្លាប់ទៅលេងសាច់ញាតិនៅវៀតណាម តែខ្ញុំមិនចូលចិត្តច្បាប់ចរាចរណ៍នៅទីនោះសោះ ព្រោះគ្មានអ្នកណាគោរព» ។ ជនបរទេសម្នាក់ទៀតថា ៖ «វៀតណាមគួរផ្លាស់ប្តូររថយន្តទាំងអស់ជា Electric Scooter ដើម្បីឱ្យទីក្រុងមានបរិយាកាសល្អជាងមុន ដូចជា នៅទីក្រុងហូជីមិញ ឬហាណូយ» ។ ជនបរទេសម្នាក់ទៀតថា ៖ «ការធ្វើចរាចរណ៍នៅវៀតណាម ដូចគ្នានឹងយើងកំពុងមើលហ្វូងត្រីហែលទឹកដែរ» ។

ជនបរទេសម្នាក់ទៀតថា ៖ «នេះហើយទើបធ្វើឱ្យគ្រប់គ្នាដែលធ្វើដំណើរតាមផ្លូវនៅវៀតណាមមានតែយុវវ័យ ព្រោះមនុស្សចាស់នឹងមានគ្រោះថ្នាក់ ដោយសារការបើកបរគ្មានសណ្តាប់ធ្នាប់» ។ ជនបរទេសម្នាក់ទៀតថា ៖ «តើមានសង្កេតមើលប៉ូលិសចរាចរនៅតាមផ្លូវទេ? ប៉ូលិសចរាចរមិនយកទោសអ្នកបើកបរគ្រប់រូបដែលរំលោភច្បាប់ចរាចរណ៍ទេ ។ ចំណែកអ្នកបើករថយន្តវិញ ក៏មិនចាប់អារម្មណ៍ជាមួយប៉ូលិសចរាចរដូចគ្នា» ។

ជនបរទេសម្នាក់ទៀតថា ៖ «ផ្លូវនៅវៀតណាមទទួលបានចំណាត់ថ្នាក់ថា ជាផ្លូវអាក្រក់បំផុតសម្រាប់អ្នកបើកបររថយន្ត និងម៉ូតូ ។ គ្រោះថ្នាក់ចរាចរណ៍នៅតែជាមូលហេតុតែមួយដែលបណ្តាលឱ្យមនុស្សស្លា.ប់ច្រើនបំផុតនៅវៀតណាម បើទោះជាប្រទេសនេះព្យាយាមធ្វើឱ្យផ្លូវនានាមានសុវត្ថិភាពក្តី» ។

រីឯជនជាតិប្រេស៊ីលនិយាយថា ៖ «នេះបង្ហាញពីការខ្វះសមត្ថភាពរបស់អាជ្ញាធរគ្រប់គ្រងក្នុងតំបន់ ព្រោះយើងអាចឃើញយ៉ាងច្បាស់ថា គ្មានការកែលម្អផ្លូវជា២ខ្សែឱ្យស្របគ្នា ហើយមិនពង្រីកផ្លូវឱ្យធំទូលាយ ។ លើសពីនេះ គួរដាក់ស្លាកសញ្ញាចរាចរណ៍ឱ្យបានគ្រប់គ្រាន់ រួមទាំងធ្វើផ្លូវថ្មើរជើងផងដែរ» ៕

ប្រទេសថៃ ៖ កាលពីថ្ងៃទី២២ ខែវិច្ឆិកា ឆ្នាំ២០២៣ សារព័ត៌មានថៃផ្សាយថា អ្នកនាង Chatuporn Rojanapanich មន្ត្រីក្រសួងអភិវឌ្ឍន៍សង្គម និងសន្តិសុខ បានផ្តល់បទសម្ភាសន៍ពាក់ព័ន្ធនឹងវិធានការគ្រប់គ្រងអ្នកសុំទាននៅប្រទេសថៃថា ៖ «សូមសំណូមពរឱ្យពលរដ្ឋថៃគ្រប់រូបជួយគ្នាទប់ស្កាត់អ្នកសុំទាន ដោយចាប់ផ្តើមពីខ្លួនយើងមុនគេ ។ អ្នកសុំទានដឹងថា ពលរដ្ឋថៃជាមនុស្សចិត្តបុណ្យ ហើយពេលឃើញអ្នកណាម្នាក់គួរឱ្យអាណិត ពួកគេចង់ជួយសង្គ្រោះ» ។

អ្នកនាង Chatuporn Rojanapanich មន្ត្រីក្រសួងអភិវឌ្ឍន៍សង្គម និងសន្តិសុខលើកឡើងថា យើងគ្រប់គ្នាត្រូវយល់ជាមុនថា ការសុំទាន គឺជាទង្វើខុសច្បាប់នៅប្រទេសថៃ ។ ពេលយើងធ្វើបុណ្យឱ្យប្រាក់អ្នកសុំទាន គឺស្មើនឹងយើងជួយជំរុញឱ្យមានការប្រព្រឹត្តខុសច្បាប់ ហើយអ្នកសុំទាននឹងមិនអស់ពីប្រទេសថៃទេ ។ ហេតុនេះ ពលរដ្ឋថៃម្នាក់ៗត្រូវចាប់ផ្តើមពីខ្លួនឯងមុន ដោយបញ្ឈប់ការផ្តល់ប្រាក់ឱ្យអ្នកសុំទាន ហើយត្រូវជួយគ្នាតាមដាន ។

អ្នកនាង Chatuporn ថ្លែងថា ៖ «បើជួបអ្នកសុំទាននៅកន្លែងណា ត្រូវប្រញាប់ជូនដំណឹងមកកាន់ក្រសួងអភិវឌ្ឍន៍សង្គម និងសន្តិសុខ ពីព្រោះការសុំទាននៅប្រទេសថៃជាទង្វើខុសច្បាប់ ។ ពលរដ្ឋថៃអាចជូនដំណឹងមកកាន់ក្រសួង ហើយក្រសួងនឹងមានក្រុមការងារចុះទៅត្រួតពិនិត្យដល់កន្លែងភ្លាមៗ ក្នុងរយៈពេល២៤ម៉ោង» ។

ចំណែកអ្នកសុំទានជាជនជាតិថៃវិញ នាយកដ្ឋានអភិវឌ្ឍន៍សង្គម និងសុខុមាលភាពបានប្រមូលទិន្នន័យ និងចុះត្រួតពិនិត្យនៅតាមតំបន់នីមួយៗឃើញថា អ្នកសុំទានថៃសរុបស្មើប្រមាណ៥.០០០នាក់ ក្នុងចំណោមនេះ អ្នកសុំទានចំនួន៣.០០០នាក់ឈប់ប្រកបមុខរបរសុំទាន ហើយពួកគេបានត្រឡប់ទៅរស់នៅជាមួយក្រុមគ្រួសារវិញ ។ រីឯអ្នកសុំទានចំនួន១.០០០នាក់ទៀតបានសុំមករស់នៅក្រោមការគ្រប់គ្រងរបស់ក្រសួងអភិវឌ្ឍន៍សង្គម និងសន្តិសុខ ។ ហេតុនេះ បើពលរដ្ឋថៃគ្រប់រូបជួយគ្នាការពារតាំងពីដើមទី វានឹងអាចដោះស្រាយបញ្ហាអ្នកសុំទានបាន ។

តាមសេចក្តីរាយការណ៍បញ្ជាក់ថា នៅឆ្នាំ២០២៣ ប៉ូលិសថៃអាចចាប់ឃុំខ្លួនអ្នកសុំទានជនជាតិចិនមានលក្ខណៈដូចជនពិការចំនួន៦នាក់ ដោយពួកគេបានមកសុំទានជាខ្សែបណ្តាញ ។ ករណីនេះស្រដៀងគ្នានឹងករណីអ្នកសុំទាននៅឆ្នាំ២០១៩ ដែរ ពេលនោះ ប្រទេសថៃរកឃើញក្រុមអ្នកសុំទានជនជាតិចិនចូលមកថៃ រហូតដល់៦៨នាក់ ។ ពួកគេបានធ្វើពុតជាមនុស្សគថ្លង់ ឬនិយាយថា ខ្លួនមានជំងឺធ្ងន់ធ្ងរ ប៉ុន្តែការពិត ពួកគេមានរាងកាយល្អធម្មតា ។ តាមការប្រមូលទិន្នន័យបង្ហាញថា ប្រាក់ចំណូលរបស់អ្នកសុំទានម្នាក់ៗស្មើរហូតដល់ជាង១ម៉ឺនបាតឯណោះក្នុង១ថ្ងៃ ដោយសារពលរដ្ឋថៃជាមនុស្សចិត្តបុណ្យ ។

ចំណែកអ្នកសុំទានជនជាតិចិនទាំង៦នាក់ដែលមានរូបរាងដូចជនពិការ ហើយត្រូវប៉ូលិសថៃចាប់បាននៅឆ្នាំ២០២៣ បើតាមការស៊ើបអង្កេតជំហានដំបូងបង្ហាញថា ពួកគេបានចូលមកសុំទាននៅប្រទេសថៃដោយការស្ម័គ្រចិត្ត ដោយសារពលរដ្ឋថៃចិត្តល្អ និងចង់ជួយអ្នកដទៃ ។ ហេតុនេះ ទើបបណ្តាលឱ្យអ្នកសុំទានបរទេសនិយមមកប្រទេសថៃ ដោយសារអាចរកប្រាក់ចំណូលបានស្រួល ៕

នៅលើពិភពលោកយើងនេះមានសត្វសរុបប្រមាណ ១,២ លានប្រភេទ ដែលសត្វនីមួយៗសុទ្ធតែមានរូបរាងប្លែកៗ នឹងអត្តចរិតខុសៗគ្នា ដោយមានសត្វខ្លះក៏ស្លូត ហើយសត្វខ្លះទៀតក៏កាចសាហាវផងដែរ។ ដូច្នេះហើយ តើអ្នកដឹងទេថាសត្វណាខ្លះដែលស.ម្លា.ប់មនុស្សច្រើនជាងគេបំផុតលើពិភពលោក?

១.សត្វមូស៖ មូសគឺជាសត្វដ៏គ្រោះថ្នាក់បំផុតក្នុងពិភពលោក ដោយបានសម្លាប់មនុស្សចំនួន ៧២៥.០០០ នាក់ក្នុងមួយឆ្នាំតាមរយៈការឆ្លងរាលដាលជំងឺដូចជាជំងឺគ្រុនចាញ់។ ការឆ្លងជំងឺគ្រុនចាញ់គឺអាក្រក់ខ្លាំងណាស់ជាពិសេសនៅក្នុងទ្វីបអាហ្រ្វិក ដោយតំបន់នេះមានចំនួន ៩៥ ភាគរយនៃករណីឆ្លង និង ៩៦ ភាគរយនៃការស្លាប់ទូទាំងពិភពលោក។

២.សត្វពស់៖ ពស់គឺជាសត្វដែលមានពិសកាចសាហាវបំផុតលើលោក ហើយវាក៏មានជំនាញសម្លាប់មនុស្សតាមវិធីផ្សេងៗគ្នា និងឃោរឃៅបំផុតផងដែរ។ ជាឧទាហរណ៍ សត្វពស់ Mamba ខ្មៅអាចសម្លាប់មនុស្សដោយពិសពីរដំណក់ពីការខាំ ចំណែកឯពស់ថ្លាន់អាចលេបមនុស្សពេញវ័យបានយ៉ាងងាយ។ ដូច្នេះសត្វពស់អាចសម្លាប់មនុស្សបានរហូតទៅដល់ ១៣៨,០០០ នាក់ក្នុងមួយឆ្នាំ។

៣.សត្វឆ្កែ៖ ឆ្កែគឺជាមិត្តដ៏ល្អបំផុតរបស់មនុស្ស ហើយវាក៏អាចជាសត្រូវដ៏អាក្រក់បំផុតរបស់មនុស្សផងដែរ ប្រសិនបើវាឆ្លងជំងឺឆ្កែឆ្កួត។ ជាទូទៅឆ្កែចូលចិត្តការពារម្ចាស់របស់វាខ្លាំងណាស់ ប៉ុន្តែប្រសិនបើវាមានជំងឺឆ្កែឆ្កួតហើយ វានឹងខាំត្របាក់នាក់គ្មានប្រណីនោះទេ។ ដូច្នេះហើយ យោងតាមអង្គការសុខភាពពិភពលោក (WHO) បានឱ្យដឹងថា ឆ្កែឆ្កួតបានសម្លាប់មនុស្សប្រមាណ ៥៩,០០០ នាក់ក្នុងមួយឆ្នាំ។

៤.សត្វខ្យាដំរី៖ ខ្យាដំរីគឺសត្វដ៏ចំណាស់ និងកាចសាហាវបំផុតលើលោក ដោយបានសម្លាប់មនុស្សចំនួន ៣,៣០០ នាក់ក្នុងមួយឆ្នាំ។ ពួកវានឹងខាំមនុស្សដោយកន្ទុយរបស់វា ហើយចាក់ជាតិពុលចូលទៅក្នុងខ្លួនមនុស្ស ជាមួយនឹងពពួកជាតិពុល arachnid ជាង ២,៦០០ ប្រភេទ ប៉ុន្តែមានតែប្រហែល ២៥ ប្រភេទប៉ុណ្ណោះដែលផ្ទុកជាតិពុលដ៏ខ្លាំងក្លាគ្រប់គ្រាន់ដើម្បីសម្លាប់មនុស្ស។

៥.សត្វក្រពើ៖ ប្រិយមិត្តប្រាកដជាដឹងច្បាស់ហើយថា សត្វក្រពើកាចសាហាវប៉ុណ្ណា ជាទូទៅសត្វនេះបានសម្លាប់មនុស្សប្រមាណ ១,០០០ នាក់ក្នុងមួយឆ្នាំ។ ក្រពើគឺជាសត្វដែលឈ្លានពាន និងមានទឹកដីយ៉ាងខ្លាំង ហើយនឹងវាយប្រហារអ្វីៗដែលចូលទៅក្នុងជម្រករបស់ពួកវា ជាញឹកញាប់វាតែងស្ទាក់ចាប់សត្វព្រៃនៅក្នុងទឹកបានយ៉ាងងាយ ជាមួយនឹងកម្លាងដ៏មហាសាលរបស់វា នឹងថ្គាមដ៏មុតស្រួចរបស់វា៕