វៀតណាម៖ កាលពីថ្ងៃទី២៥ ខែធ្នូ យោងតាមគេហទំព័រក្នុងស្រុករបស់ប្រទេសវៀតណាម បានឱ្យដឹងថា អត្រាការប្រាក់សម្រាប់ប្រាក់បញ្ញើរយៈពេល ១-២ ខែគឺត្រឹមតែ ១.៩% ប៉ុណ្ណោះក្នុងមួយឆ្នាំ ធ្លាក់ចុះ ០.៣% ដែលនេះគឺជាអត្រាការប្រាក់ទាបបំផុតនៅលើទីផ្សារនាពេលបច្ចុប្បន្នផងដែរ។

បច្ចុប្បន្ន អត្រាការប្រាក់សន្សំខ្ពស់បំផុតនៅធនាគារ Vietcombank គឺ ៤.៨% ក្នុងមួយឆ្នាំសម្រាប់រយៈពេលវែង ១២ ខែ ឬច្រើនជាងនេះ។ ដូច្នេះហើយ បច្ចុប្បន្នអត្រាការប្រាក់ទាបបំផុតលើប្រាក់បញ្ញើតាមកាលកំណត់នៅធនាគារនេះគឺ ២.២% ក្នុងមួយឆ្នាំ សម្រាប់លក្ខខណ្ឌ ១-២ ខែ។ ប្រសិនបើអតិថិជនដាក់ប្រាក់សន្សំសម្រាប់រយៈពេល ១២ ខែ ឬច្រើនជាងនេះ អត្រាការប្រាក់គឺ ៥% ក្នុងមួយឆ្នាំ ហើយខ្ពស់បំផុតគឺ ៥.៣% ក្នុងមួយឆ្នាំសម្រាប់រយៈពេល ២៤ ខែ។

ទន្ទឹមនឹងនេះ ធនាគារ VietinBank និង BIDV ក៏អនុវត្តតារាងអត្រាការប្រាក់បញ្ញើដូចគ្នា ជាមួយនឹងអត្រាការប្រាក់រយៈពេលខ្លី ១-២ ខែ ២.៣% ក្នុងមួយឆ្នាំផងដែរ។ អតិថិជនដាក់ប្រាក់រយៈពេលវែង អត្រាការប្រាក់នឹងកើនឡើងពី ៣-៦ ខែដល់ ២.៩% ក្នុងមួយឆ្នាំ។ ហេតុនេះហើយ អត្រាការប្រាក់ខ្ពស់បំផុតនៅធនាគារទាំងពីរនេះគឺ ៥.៣% ក្នុងមួយឆ្នាំ នៅពេលដែលអតិថិជនដាក់ប្រាក់សម្រាប់រយៈពេល ២៤ ខែ ឬច្រើនជាងនេះ។

គួរបញ្ជាក់ដែរថា អត្រាការប្រាក់បញ្ញើបានឈានដល់កម្រិតទាបថ្មីសម្រាប់ការសន្សំ ដូច្នេះនៅក្នុងវិស័យធនាគារភាគហ៊ុនរួមគ្នា អត្រាការប្រាក់ក៏កំពុងធ្លាក់ចុះឥតឈប់ឈរ។ ភាពខុសគ្នានៃអត្រាការប្រាក់រវាងធនាគារពាណិជ្ជដែលគ្រប់គ្រងដោយរដ្ឋ និងភាគហ៊ុនរួមគ្នាក៏បានរួមតូចផងដែរ ជំនួសឱ្យការស្ថិតនៅកម្រិត ២-៣ ភាគរយពីមុនមក ប៉ុន្តែឥឡូវនេះវាតិចជាង ២ ភាគរយ។

ជាឧទាហរណ៍ អត្រាការប្រាក់បញ្ញើខ្ពស់បំផុតសម្រាប់រយៈពេល ១២ ខែនៅធនាគារមួយចំនួនឥឡូវនេះគឺប្រហែល ៥.៧៥% ក្នុងមួយឆ្នាំ មានតែ ០.៩៥ ភាគរយប៉ុណ្ណោះដែលខ្ពស់ជាងអត្រាការប្រាក់ទាបបំផុតនៅធនាគារ Vietcombank សម្រាប់រយៈពេលដូចគ្នា៕

ប្រទេសអង់គ្លេស ៖ សារព័ត៌មានរបស់អង់គ្លេស Daily Mail បានរាយការណ៍កាលពីថ្ងៃទី២៥ ខែធ្នូ ឆ្នាំ២០២៣ ថា តុលាការកំពូលនៅទីក្រុង Manchester បានកាត់ទោសអតីតមន្ត្រីពន្ធនាគារម្នាក់ឱ្យជាប់ពន្ធនាគាររយៈពេល៣ឆ្នាំ ក្រោយពីនាងមានទំនាក់ទំនងផ្លូវ.ភេ.ទជាមួយអ្នកទោសប្រុស ។

នាង Joanne Hunter ជាអតីតមន្ត្រីពន្ធនាគារ អាយុ២៨ឆ្នាំ មានទំនាក់ទំនងស្នេហាជាមួយអ្នកទោសប្រុសម្នាក់ឈ្មោះ Connor Willis ក្នុងពន្ធនាគារមួយកន្លែងស្ថិតនៅទីក្រុង Salford ។ ក្នុងអំឡុងពេលនាងមានទំនាក់ទំនងជាមួយអ្នកទោសប្រុសនោះ នាងតែងតែផ្ញើរូបសិ.ចស៊ីរបស់នាងឱ្យអ្នកទោសមើលជាប្រចាំ ។ លើសពីនេះ នាងក៏បានលួចដឹកជញ្ជូនកញ្ឆាខុសច្បាប់ផងដែរ ។

នាង Joanne Hunter បានចូលបំពេញការងារជាមន្ត្រីពន្ធនាគារ ចាប់ពីខែធ្នូ ឆ្នាំ២០១៨ ។ នៅឆ្នាំ២០២០ ខាងពន្ធនាគារទទួលដំណឹងថា នាងបានលួចបញ្ជូនរបស់របរឱ្យអ្នកទោស បន្ទាប់មក ពន្ធនាគារបានហៅនាងមកសាកសួរ ។ នាងនិយាយថា នាងពិតជាមានទំនាក់ទំនងស៊ីជម្រៅជាមួយអ្នកទោសប្រុស និងផ្ញើរូបសិ.ចស៊ីឱ្យអ្នកទោសនោះមើលទៀតផង ។

ក្រៅពីនេះ នាងបានទទួលយកវត្ថុពីស្ត្រីមិនស្គាល់ឈ្មោះម្នាក់នៅផ្សារទំនើប ហើយនាងយកវត្ថុនេះទៅឱ្យអ្នកទោសប្រុសឈ្មោះ Connor Willis ។ អ្នកទោសប្រុសបានផ្តល់ប្រាក់ឱ្យនាង ចាប់ពី២៤១ដុល្លារ ទៅ៣៦១ដុល្លារអាមេរិក ដើម្បីតបស្នងនាងដែលបានលួចយកវត្ថុនេះមកឱ្យខ្លួន ។ ប៉ុន្តែនាង Joanne Hunter បដិសេធមិនព្រមទទួលយកប្រាក់នេះទេ ។

មេធាវីការពារក្តីរបស់នាង Joanne Hunter បានព្យាយាមការពារនាងថា នាងមិនធ្លាប់មានសង្សារ ឬទំនាក់ទំនងស្នេហាជាមួយអ្នកណាម្នាក់ទេពីមុនមក ដោយសារនាងផ្តោតទៅលើការសិក្សា និងធ្វើការប៉ុណ្ណោះ ។ ហេតុនេះ នាងជានារីសុភាពរាបសារម្នាក់ ទើបធ្វើឱ្យនាងក្លាយជាជនរងគ្រោះ ។

ទោះយ៉ាងណា ចៅក្រមមិនយល់ស្របជាមួយនឹងលើកឡើងរបស់មេធាវីទេ ដោយចៅក្រមបញ្ជាក់ថា ទង្វើរបស់នាងបានធ្វើឱ្យមិត្តរួមការងារ និងអ្នកទោសផ្សេងទៀតមានគ្រោះថ្នាក់ ។ នាងគួរតែដើរតួជាមន្ត្រីល្អមួយរូបនៅក្នុងប្រព័ន្ធច្បាប់ មិនមែនអាត្មានិយមបែបនេះទេ ៕

ប្រទេសចិន ៖ ក្រុមអ្នកស្រាវជ្រាវចិនមកពីសាកលវិទ្យាល័យ Nankai បានបង្ហាញសម្លៀកបំពាក់ដើរដោយថាមពលពន្លឺព្រះអាទិត្យប្រកបដោយប្រសិទ្ធភាពខ្ពស់ ។ សម្លៀកបំពាក់ប្រភេទនេះអាចជួយគ្រប់គ្រងសីតុណ្ហភាពរាងកាយមនុស្ស និងធ្វើឱ្យអ្នកស្លៀកវាមានអារម្មណ៍សប្បាយរីករាយ បើទោះជាពួកគេស្ថិតនៅកន្លែងមានសីតុណ្ហភាពប្រែប្រួលក៏ដោយ ។

សម្លៀកបំពាក់ដើរដោយថាមពលពន្លឺព្រះអាទិត្យនេះ ពុំចាំបាច់ពឹងផ្អែកលើថាមពលពីខាងក្រៅទេ លើកលែងតែពន្លឺព្រះអាទិត្យ ។ ម្យ៉ាងទៀត វាខុសគ្នាពីសម្លៀកបំពាក់អាចគ្រប់គ្រងកំដៅ ដែលគេបានបង្ហាញនាពេលមុននេះ គឺនៅត្រង់វាអាចបង្កើតភាពកក់ក្តៅ និងភាពត្រជាក់តាមរយៈឧបករណ៍អគ្គិសនី ដែលអាចផ្លាស់ប្តូរសីតុណ្ហភាពដោយប្រើប្រាស់វិធីចំនួន២ ក្នុងរយៈពេលពេញ១ថ្ងៃ ។

ការស្រាវជ្រាវមួយចេញផ្សាយក្នុងទស្សនាវដ្តីវិទ្យាសាស្ត្រ កាលពីថ្ងៃទី១៥ ខែធ្នូ ឆ្នាំ២០២៣ ថា ឧបករណ៍អគ្គិសនីអាចគ្រប់គ្រងសីតុណ្ហភាពបានរយៈពេល២៤ម៉ោង ក្រោយពីវាបានទទួលថាមពលពន្លឺព្រះអាទិត្យត្រឹមតែ១២ម៉ោង ។ ក្រៅពីនេះ ឧបករណ៍អគ្គិសនីអាចរក្សាសីតុណ្ហភាពស្បែករបស់មនុស្សឱ្យនៅកម្រិតល្មម គឺក្នុងចន្លោះពី៣២អង្សារសេ ទៅ៣៦អង្សារសេ បើទោះជាសីតុណ្ហភាពនៅខាងក្រៅប្រែប្រួលក្តី ។

ការស្រាវជ្រាវបង្ហាញទៀតថា ឧបករណ៍ថ្មីនេះអាចជួយឱ្យអ្នកស្លៀកសម្លៀកបំពាក់នេះមានអារម្មណ៍សប្បាយរីករាយគ្រប់ពេលវេលា ហើយវាក៏អាចជួយការពារជីវិតមនុស្សនៅក្នុងបរិយាកាសអាក្រក់ផងដែរ ដូចជា ៖ នៅក្នុងលំហ ឬនៅលើភពផ្សេង ជាដើម ៕

បរទេស៖ ប្រធានាធិបតីស្រីលង្កាលោក Ranil Wickremesinghe បានប្រកាសដោះលែងអ្នកទោសជាង ១,០០០ នាក់នៅក្នុងពន្ធនាគារទូទាំងប្រទេសដើម្បីប្រារព្ធពិធីបុណ្យណូអែល។

យោងតាមគេហទំព័រអន្តរជាតិ Al Jazeera ដែលបានចេញផ្សាយនៅថ្ងៃទី២៥ ខែធ្នូថ្មីៗនេះថា មនុស្ស ១,០០៤ នាក់ រួមទាំងបុរស ៩៨៩ នាក់ និងស្ត្រី ១៥ នាក់ ត្រូវបានដោះលែងក្រោមការលើកលែងទោសពិសេសមួយ។

ស្រីលង្កា គឺជាប្រទេសដែលមានប្រជាជនកាន់សាសនាព្រះពុទ្ធភាគច្រើន ហើយប្រទេសនេះក៏បានដោះលែងអ្នកទោសមួយចំនួនក្នុងឱកាសបុណ្យចម្រើនព្រះជន្មព្រះពុទ្ធកាលពីខែឧសភា ឆ្នាំ២០២៣ ផងដែរ។

ការលើកលែងទោសចុងក្រោយនេះបានកើតឡើងបន្ទាប់ពីប៉ូលីសបានចាប់ខ្លួនមនុស្សជិត ១៥,០០០ នាក់ក្នុងអំឡុងពេលយុទ្ធនាការប្រឆាំងគ្រឿងញៀនដែលគាំទ្រដោយយោធារយៈពេលមួយសប្តាហ៍នឹងត្រូវបានបញ្ឈប់នៅមុនថ្ងៃបុណ្យណូអែល។

យោងតាមសេចក្តីថ្លែងការណ៍របស់ប៉ូលីស បានឱ្យដឹងទៀតថា ជនសង្ស័យចំនួន ១៣,៦៦៦ នាក់ត្រូវបានចាប់ខ្លួន ខណៈអ្នកញៀនជិត ១,១០០ នាក់ត្រូវបានឃុំខ្លួន និងបញ្ជូនទៅធ្វើការស្តារនីតិសម្បទាជាកំហិតនៅឯមជ្ឈមណ្ឌលគ្រប់គ្រងដោយយោធា។

ហេតុនេះហើយ បច្ចុប្បន្នពន្ធនាគាររបស់ប្រទេសស្រីលង្កាភាគច្រើនគឺតូចខ្លាំងណាស់ និងមានអ្នកទោសច្រើនពេក នេះបើតាមទិន្នន័យផ្លូវការគិតត្រឹមថ្ងៃទី ២២ ខែធ្នូ មានអ្នកទោសប្រមាណជិត ៣០.០០០ នាក់ដែលកំពុងស្ថិតក្នុងកន្លែងដែលត្រូវបានរចនាឡើងដើម្បីផ្ទុកមនុស្សត្រឹមតែ ១១,០០០ នាក់ប៉ុណ្ណោះ៕

កាលពីថ្ងៃទី ២២ ខែធ្នូ តម្លៃភាគហ៊ុនរបស់ YG Entertainment បានបញ្ចប់នៅចំនួន ៥២,០០០ វ៉ុន (ប្រហែល ៤០ដុល្លារ)ដែលជាការបង្ហាញពីនិន្នាការធ្លាក់ចុះសម្រាប់ថ្ងៃជួញដូរជាប់គ្នារយៈពេលបួនថ្ងៃ។ ការថយចុះនេះគឺស្មើនឹងការធ្លាក់ចុះ ៥.១១% ត្រូវបានគេសន្មតថាភាគច្រើនដោយសារព័ត៌មានថ្មីៗជុំវិញ G-Dragon បានចាកចេញពីផលិតកម្មដែលជះឥទ្ធិពលដល់ដំណើរការភាគហ៊ុនរបស់ក្រុមហ៊ុន។

ក្នុងរយៈពេល៤ ថ្ងៃ ភាគហ៊ុនរបស់ YG Entertainment បានធ្លាក់ចុះយ៉ាងខ្លាំង ដោយបានធ្លាក់ចុះ ២,៨០០ វ៉ុន (ប្រហែល ២.១៦ដុល្លារ) ពី ៥៤,៨០០ វ៉ុន (ប្រហែល៤២.១៩ ដុល្លារ) មក ៥២,០០០ វ៉ុន ប្រមាណ៤០ដុល្លារ ដែលជាការថយចុះ ៥.១១% ។ ការធ្លាក់ចុះនេះបានធ្វើឱ្យបាត់បង់ប្រហែល ៨៣.៥ ពាន់លានវ៉ុន (ប្រហែល ៦៤លានដុល្លារ) ពីមូលធននីយកម្មទីផ្សាររបស់ក្រុមហ៊ុនដែលពេលនេះមានចំនួន ៩៦៣.៩ ពាន់លានវ៉ុន (៧៤២.៦ លានដុល្លារ) ។

នេះមិនមែនជាលើកទីមួយទេដែល G-Dragon ប៉ះពាល់ដល់ភាគហ៊ុនរបស់ YG Entertainment ដូចកាលពីខែមិថុនាឆ្នាំនេះ YG Entertainment បានបាត់បង់តម្លៃទីផ្សារចំនួន ១៣០លានដុល្លារ បន្ទាប់ពីមានព័ត៌មានថា G-Dragon មិនបន្តកុងត្រា។

G-Dragon គឺជាតារាចម្រៀងK-Pop ដ៏ល្បីប្រចាំប្រទេសកូរ៉េខាងត្បូង។ លោកបានបង្ហាញខ្លួនជាលើកដំបូងនៅឆ្នាំ ២០០៦ ក្នុងនាមជាមេក្រុម Big Bang ក្រោមការគ្រប់គ្រងរបស់ផលិតកម្ម YG ។ ជាមួយភាពជោគជ័យលើវិស័យតន្រ្តីនិងម៉ូត G-Dragon ក៏រងនូវរឿងអាស្រូវគ្រឿងញៀនដូចគ្នា។ កាលពីខែឧសភា ឆ្នាំ ២០១១ G-Dragon ត្រូវបានគេរកឃើញប្រើកញ្ឆានៅប្រទេសជប៉ុន ហើយបានធ្វើតេស្តវិជ្ជមានក្នុងខែកក្កដាឆ្នាំដដែល បន្ទាប់មកទទួលបានការព្យួរទោស ខណៈសមាជិករួមក្រុមបីនាក់ទៀតក៏មានរឿងអាស្រូវនេះដូចគ្នា។

ដោយឡែកកាលពីពីចុងខែតុលា ឆ្នាំ២០២៣ G-Dragon ក៏មានរឿងអាស្រូវជាប់ពាក់ព័ន្ធនឹងការចោទប្រកាន់ប្រើប្រាស់គ្រឿងញៀនដូចគ្នា ប៉ុន្តែយ៉ាងណាមិញបន្ទាប់ពីប៉ូលិសរកមិនឃើញភស្តុតាងនិងការធ្វើតេស្តសារធាតុញៀនចេញលទ្ធផលអវិជ្ជមាន៣ដង ទីបំផុតរូបគេក៏រួចផុតពីការចោទប្រកាន់ទាំងស្រុងពីប៉ូលិសកាលពីថ្ងៃទី១៩ ធ្នូ ឆ្នាំ២០២៣៕

ប្រទេសថៃ ៖ កាលពីថ្ងៃទី២៤ ខែធ្នូ ឆ្នាំ២០២៣ សារព័ត៌មាន Thairath រាយការណ៍ថា ខ្សែដែកនៅក្រោមរថភ្លើងអាកាសពណ៌ផ្កាឈូក បានធ្លាក់សង្កត់លើរថយន្តជាច្រើនគ្រឿងដែលចតនៅបរិវេណខាងក្រោមស្ពានអាកាស ព្រមទាំងបណ្តាលឱ្យរលំបង្គោលភ្លើងផងដែរ ប៉ុន្តែគ្មានអ្នករងរបួសទេ ។ ហេតុការណ៍នេះបានកើតឡើងនៅស្រុកប៉ាក្រេត ខេត្តនុនថាក់បុរី ប្រទេសថៃ ។

បើតាមវីដេអូថតដោយកាមេរ៉ារបស់រថយន្ត១គ្រឿង គេបានឃើញខ្សែដែកនៅក្រោមរថភ្លើងអាកាសពណ៌ផ្កាឈូក បានធ្លាក់សង្កត់លើរថយន្តជាច្រើនគ្រឿងចតនៅបរិវេណខាងក្រោម ដែលស្ថិតនៅខាងមុខផ្សារមួយកន្លែង លើផ្លូវទីវ៉ានុន ស្រុកប៉ាក្រេត ខេត្តនុនថាក់បុរី ។ ខ្សែដែកនៅក្រោមរថភ្លើងអាកាស ដែលធ្លាក់ចុះមកក្រោមនេះ បានប៉ះជាមួយខ្សែភ្លើងនៅលើបង្គោលភ្លើង ទើបបណ្តាលឱ្យឆេះចេញផ្កាភ្លើងឡើងមក ។

ហេតុការណ៍នេះបានធ្វើឱ្យអាជីវករលក់ដូរនៅក្នុងតំបន់ភ្ញាក់ផ្អើលយ៉ាងខ្លាំង និងនាំគ្នារត់ចេញពីបរិវេណនេះ ដោយសារខ្លាចបង្គោលភ្លើងរលំសង្កត់ ។ ក្រោយមក សមត្ថកិច្ច និងភ្នាក់ងារពាក់ព័ន្ធបានចុះមកត្រួតពិនិត្យនៅចំណុចកើតហេតុ និងមានការបញ្ជាឱ្យកាត់ផ្តាច់ខ្សែភ្លើងចេញពីបង្គោលភ្លើង ។

អភិបាលខេត្តនុនថាក់បុរី បានបញ្ជាឱ្យស្ថាប័នទាំងអស់ឱ្យដោះស្រាយបញ្ហានេះ និងត្រួតពិនិត្យមើលការខូចខាតឱ្យបានឆាប់រហ័សបំផុត ។ លោក សុធី ថងញ៉ែម អភិបាលខេត្តនុនថាក់បុរី លើកឡើងថា ៖ «ខ្សែដែកនៅក្រោមរថភ្លើងអាកាស បានធ្លាក់ចុះមកក្រោមបណ្តាលឱ្យប៉ះជាមួយខ្សែភ្លើង និងបង្គោលភ្លើង ។ ហេតុនេះ យើងបានព្យាយាមដោះស្រាយបញ្ហានេះ ដើម្បីកុំឱ្យវាធ្លាក់ចុះមកម្តងទៀត» ។

អ្នកខូចខាតទ្រព្យសម្បត្តិដោយសារហេតុការណ៍នេះ បាននាំគ្នាទៅដាក់ពាក្យបណ្តឹងនៅស្ថានីយប៉ូលិស ។ លោក សុផុង អាយុ៥០ឆ្នាំ ជាម្ចាស់រថយន្តខូចខាតដោយសារខ្សែដែកនៅក្រោមរថភ្លើងអាកាសសង្កត់ ប្រាប់ថា ពេលកើតហេតុ លោកកំពុងដើរទិញរបស់របរក្នុងផ្សារ ហើយលោកបានឮសំឡេងស្រដៀងនឹងគ្រាប់បែ.កផ្ទុះជាច្រើនលើក ។ ដូច្នេះ លោកក៏ប្រញាប់មកមើល ស្រាប់តែឃើញរថយន្តរបស់លោក ដែលចតនៅក្រោមស្ពានអាកាស ខូចខាតជាច្រើនកន្លែង ដូចជា ៖ កញ្ចក់ និងដំបូលរថយន្ត ។ ប៉ុន្តែនៅពុំទាន់មានអ្នកតំណាងរថភ្លើងអាកាសពណ៌ផ្កាឈូកទំនាក់ទំនង ឬជជែកជាមួយលោកដើម្បីទទួលខុសត្រូវទេ ។

ចំណែកទំព័រហ្វេសប៊ុករបស់រថភ្លើងពណ៌ផ្កាឈូក លើកឡើងថា ហេតុការណ៍នេះបានកើតឡើងនៅបរិវេណស្ថានីយសាមគ្គី ។ ខ្សែដែកនៅក្រោមរថភ្លើងអាកាស បានធ្លាក់សង្កត់លើរថយន្តចំនួន៣គ្រឿង និងគ្មានអ្នករងរបួសទេ ។ ក្រោយកើតហេតុ បុគ្គលិកក្រុមហ៊ុន, ប៉ូលិស និងស្ថាប័នពាក់ព័ន្ធបានចុះត្រួតពិនិត្យរកមូលហេតុភ្លាមៗ ។ ក្រុមហ៊ុនរថភ្លើងបានសូមទោសចំពោះហេតុការណ៍នេះ បន្ទាប់មក ក្រុមហ៊ុនបានផ្អាកដំណើរការរថភ្លើងអាកាសជាបណ្តោះអាសន្នដើម្បីសុវត្ថិភាព ។

រដ្ឋមន្ត្រីក្រសួងគមនាគមន៍ លោក សុរីយៈ ជឹងរុងរឿងកិច លើកឡើងថា លោកបានបញ្ជាឱ្យផ្អាកដំណើរការរថភ្លើងផ្កាឈូកជាបណ្តោះអាសន្ន នៅថ្ងៃទី២៥ ខែធ្នូ ឆ្នាំ២០២៣ ដើម្បីត្រួតពិនិត្យរកមូលហេតុដែលបណ្តាលឱ្យខ្សែដែកនៅក្រោមរថភ្លើងអាកាស ធ្លាក់ចុះបែបនេះ ៕ ប្រភព ៖ Thairath TV