បរទេស៖ ក្រុមហ៊ុន Meta ត្រូវបានពិន័យជាប្រាក់ចំនួន ៦.៤ លានដុល្លារអាមេរិក ដោយសារការផ្សាយពាណិជ្ជកម្មល្បែងអនឡាញដែលបានលេចឡើងនៅលើ Facebook និង Instagram ។

យោងតាមគេហទំព័រអន្តរជាតិ The Economic Times ដែលបានចុះផ្សាយនៅថ្ងៃទី២៤ ខែធ្នូថា ក្រុមហ៊ុនរបស់លោក Mark Zuckerberg ត្រូវបានប្រទេសអ៊ីតាលីចោទប្រកាន់ថាមិនគោរពតាមការអនុវត្តច្បាប់ ដោយផ្សាយពាណិជ្ជកម្មប្រយោល រួមទាំងការផ្សាយពាណិជ្ជកម្មសម្រាប់ការភ្នាល់ ឬហ្គេមទាក់ទងនឹងលុយ ដែលនេះគឺជាការខុសច្បាប់របស់ប្រទេសអ៊ីតាលី។

ចាប់តាំងពីឆ្នាំ ២០១៨ មកប្រទេសអ៊ីតាលីបានហាមឃាត់ការផ្សាយពាណិជ្ជកម្មល្បែងស៊ីសងនៅលើប្រព័ន្ធផ្សព្វផ្សាយទាំងអស់ រួមទាំងបណ្តាញសង្គមផងដែរ។ ដូច្នេះហើយកន្លងទៅ YouTube របស់ Google និង Twitch របស់ Amazon ក៏ត្រូវបានពិន័យផងដែរចំពោះការរំលោភលើបម្រាមនេះ។ ដោយ YouTube ត្រូវបានពិន័យជាប្រាក់ ២.៤ លានដុលា្លរអាមេរិក និង Twitch ជិត ១ លានដុល្លារអាមេរិកឯណោះ។ ទោះជាយ៉ាងណាក៏ដោយ Meta មិនបានធ្វើអត្ថាធិប្បាយជុំវិញព័ត៌មានខាងលើនេះទេ ដោយវេទិកានេះជាទូទៅមិនបានហាមឃាត់ការផ្សាយពាណិជ្ជកម្មល្បែងស៊ីសងទេ។

នៅក្នុងគោលការណ៍របស់ក្រុមហ៊ុននេះមានបទប្បញ្ញត្តិដាច់ដោយឡែកពីគ្នាសម្រាប់ខ្លឹមសារខាងលើ ដោយមានតម្រូវការដូចជាអ្នកផ្សាយពាណិជ្ជកម្មត្រូវផ្តល់ភស្តុតាងដែលថាសកម្មភាពល្បែងស៊ីសងត្រូវបានអនុញ្ញាតដោយនិយតករសម្រាប់តំបន់ ក៏ដូចជាកំណត់គោលដៅផ្សាយពាណិជ្ជកម្ម ខណៈពេលដែលហាមប្រាមតែមនុស្សដែលមានអាយុក្រោម ១៨ ឆ្នាំប៉ុណ្ណោះ។ ហេតុនេះហើយ បច្ចុប្បន្នសកម្មភាពភ្នាល់ និងល្បែងតាមអ៊ីនធឺណិត គឺជាសេវាកម្ម និងផលិតផលដែលប្រើប្រាស់អ្វីៗដែលមានតម្លៃជារូបិយវត្ថុជាផ្នែកនៃរង្វាន់ និងវិធីសាស្រ្តនៃការចូលរួម៕

ប្រទេសចិន ៖ សារព័ត៌មានចិនបានរាយការណ៍ កាលពីថ្ងៃទី២៣ ខែធ្នូ ឆ្នាំ២០២៣ ថា សមាគមទូរគមនាគមន៍ហិរញ្ញវត្ថុអន្តរធនាគារនៅលើពិភពលោក (SWIFT) បានបង្ហាញថា ប្រាក់យន់របស់ប្រទេសចិន បានជាប់ចំណាត់ថ្នាក់ទី៤ គឺជាប្រាក់ដែលគេបានចាយវាយច្រើនបំផុតនៅលើពិភពលោក កាលពីខែវិច្ឆិកា ឆ្នាំ២០២៣ ។ ប្រាក់យន់ចិនមានចំណែកក្នុងទីផ្សារ ស្មើនឹង៤,៦១% កើនឡើងពីអត្រា៣,៦០% បើធៀបនឹងខែតុលា ឆ្នាំ២០២៣ ។

ចំណែកការទូទាត់ប្រាក់ឆ្លងប្រទេសវិញ លើកលែងតែការទូទាត់ប្រាក់អឺរ៉ូ គឺប្រាក់យន់របស់ប្រទេសចិនបានជាប់ចំណាត់ថ្នាក់ទី៥ កាលពីខែវិច្ឆិកា ឆ្នាំ២០២៣ ដែលមានចំណែកក្នុងទីផ្សារ ស្មើនឹង៣,១៥% ។ នេះបើយោងតាមការចុះផ្សាយរបស់សារព័ត៌មានបរទេស កាលពីថ្ងៃទី២៣ ខែធ្នូ ឆ្នាំ២០២៣ ។

ប្រាក់ដែលគេបានចាយវាយច្រើនបំផុតនៅលើពិភពលោក រួមមាន ៖
១-ប្រាក់ដុល្លារអាមេរិក
២-ប្រាក់អឺរ៉ូ
៣-ប្រាក់ផោន
៤-ប្រាក់យន់ចិន និង
៥-ប្រាក់យេនជប៉ុន

គួរបញ្ជាក់ថា ក្នុងរយៈពេល១០ខែនៃឆ្នាំ២០២៣ (គឺចាប់ពីខែមករា រហូតដល់ខែតុលា) ការខ្ចីប្រាក់ឆ្លងប្រទេស គិតជាប្រាក់យន់ បានកើនឡើង២៨% ។ បច្ចុប្បន្ន ធនាគារប្រជាជនចិន (People’s Bank of China) បានចុះកិច្ចព្រមព្រៀងរូបិយប័ណ្ណទ្វេភាគីជាមួយធនាគារមកពីបណ្តាប្រទេសជាង៣០ រួមទាំងប្រទេសអារ៉ាប៊ី សាអូឌីត និងអាហ្សង់ទីនផងដែរ ៕ ប្រភព ៖ daily news

កាលពីថ្ងៃទី២៣ ខែធ្នូ ឆ្នាំ២០២៣ បើយោងទៅលើការបង្ហោះតាមរយៈគណនីផ្លូវការរបស់សម្តេចធីបតីហ៊ុន ម៉ាណែត ប្រមុខររាជរដ្ឋាភិបាលកម្ពុជានាពេលបច្ចុប្បន្នបានគូសបញ្ជាក់ថា បើយោងតាមតារាង FDI Standouts Watchlist 2024, ចន្លោះឆ្នាំ២០០៧-២០២២ កម្ពុជាបានឈរលើលេខរៀងទី១ នៃប្រទេសដែលមានសន្ទុះការវិនិយោគដោយផ្ទាល់ពីបរទេស (FDI) ដោយទទួលបានពិន្ទុ Index Score ៩៦.១១ លើ១០០។

កម្ពុជា ពោរពេញដោយសក្តានុពលសម្រាប់វិនិយោគជាច្រើនឥតគណនាសម្រាប់វិនិយោគិនធ្វើការបោះទុនវិនិយោគ ដោយហេតុថា កម្ពុជាបានរក្សាបាននូវស្ថិរភាពកំណើនសេដ្ឋកិច្ចក្នុងរង្វង់ ៧ភាគរយក្នុងមួយឆ្នាំ ដែលសម្រេចបាននូវវឌ្ឍនភាពលើគ្រប់វិស័យ ដោយទំហំផលិតផលក្នុងស្រុកសរុប (GDP) បានកើនឡើង ១០ដង ពី ៣.១១ពាន់លានដុល្លារក្នុងឆ្នាំ១៩៩៨ រហូតដល់ ២៩.៦០ពាន់លានដុល្លារនៅឆ្នាំ២០២២។ សន្ទុះនៃការវិនិយោគដោយផ្ទាល់ពីបរទេស (FDI) បានកើនឡើង ១៥ដងក្នុងចន្លោះឆ្នាំ២០០៧-២០២២ យោងតាមតារាង FDI Standouts Watchlist 2024, កម្ពុជាបានឈរលើលេខរៀងទី១ នៃប្រទេសដែលមានសន្ទុះការវិនិយោគដោយផ្ទាល់ពីបរទេស (FDI) ដោយទទួលបានពិន្ទុ Index Score ៩៦.១១ លើ១០០។

លើសពីនេះ កម្ពុជាជាប្រទេសពោរពេញទៅដោយកម្លាំងពលកម្មដែលមានវ័យក្មេង ប្រកបដោយសក្តានុពល និងជាកាតាលីករដ៏សំខាន់នៅក្នុងចរន្តសេដ្ឋកិច្ចជាតិ។ កម្ពុជាក៏បានធ្វើទំនើបកម្មហេដ្ឋារចនសម្ព័ន្ធរូបវន្តបានយ៉ាងល្អប្រសើរ រាប់ចាប់ពីអាកាសយានដ្ឋានអន្តរជាតិ កំពង់ផែទឹកជ្រៅ ផ្លូវគោក ផ្លូវទឹក ក៏ដូចជាប្រព័ន្ធឡូជីស្ទីក បូកផ្សំនឹងទីតាំងដ៏មានសក្តានុពលដែលផ្តល់នូវកាលានុវត្តភាពប្លែកពីគេសម្រាប់វិនិយោគ។

សន្តិភាពដែលកម្ពុជារកបាន និងរក្សាបាន ក៏ក្លាយជាឱកាសបន្ថែមដល់ការបើកចំហរជើងមេឃលើមាគ៌ាសេដ្ឋកិច្ចទីផ្សារសេរី ដើម្បីជំរុញដល់វិស័យដទៃទៀត ដូចជា ថាមពលកកើតឡើងវិញ កម្មន្តសាល ព្រមទាំងវិស័យទេសចរណ៍ ដែលជាគន្លឹះសេដ្ឋកិច្ចដ៏សំខាន់នៃកំណើនសេដ្ឋកិច្ចជាតិ។

ចំណែកឯវិស័យកម្មន្តសាល កម្ពុជាបានរៀបចំរចនាសម្ព័ន្ធច្បាស់លាស់ដើម្បីរក្សានូវថ្លៃដើមកម្លាំងពលកម្មសមរម្យ និងមានទីតាំងជាយុទ្ធសាស្ត្រ ដែលជាច្រកដ៏ល្អប្រសើរសម្រាប់ការនាំចេញទំនិញទៅកាន់ប្រទេសដទៃទៀតលើសកលលោក តាមរយៈកិច្ចព្រមព្រៀងពាណិជ្ជកម្មសេរីក្នុងតំបន់អាស៊ាន និងទ្វេភាគីជាច្រើនទៀត។

ចំពោះវិស័យដ៏មានសក្តានុពលដែលកំពុងមានសន្ទុះខ្លាំងក្លានៅកម្ពុជា គឺវិស័យអចលនទ្រព្យ ដោយបច្ចុប្បន្ន វិនិយោគិននឹងអាចពើបប្រទះទៅដោយសំណង់អគារ និងគម្រោងអភិវឌ្ឍន៍ជាច្រើនពាសពេញផ្ទៃប្រទេស។

ក្នុងយុទ្ធសាស្ត្របញ្ចកោណដែលបានដាក់ចេញដោយរាជរដ្ឋាភិបាល នីតិកាលទី៧ ក៏បានបន្ថែមនូវមុំយុទ្ធសាស្ត្រថ្មីបន្ថែមលើបច្ចេកវិទ្យា ដែលកំពុងតែសាយភាយលូតលាស់ពេញស្រទាប់យុវជនវ័យក្មេងរបស់កម្ពុជា ដោយអភិវឌ្ឍបាននូវប្រព័ន្ធឌីជីថលសម្រាប់ប្រើប្រាស់បានដ៏ល្អប្រសើរ។ រដ្ឋាភិបាលកម្ពុជា ក៏ប្តេជ្ញាធ្វើកំណែទម្រង់សេដ្ឋកិច្ច និងទស្សនទានច្បាស់លាស់ ក្នុងការសម្រេចបានជាប្រទេសដែលមានចំណូលមធ្យមកម្រិតខ្ពស់ក្នុងឆ្នាំ២០៣០ និងក្លាយជាប្រទេសដែលមានចំណូលខ្ពស់ក្នុង២០៥០។ មិនតែប៉ុណ្ណោះ តាមរយៈការព្យាករណ៍សេដ្ឋកិច្ចរបស់IMF ក៏បានបង្ហាញថា កម្ពុជាបានកើនឡើងនូវសេដ្ឋកិច្ចក្នុងរង្វង់ ៥.៦ភាគរយ ក្នុងឆ្នាំ២០២៣ ហើយនឹងកើនដល់ ៦.៦ភាគរយក្នុងឆ្នាំ២០២៤។

កម្ពុជាក៏បានត្រៀមខ្លួនរួចជាស្រេចដើម្បីស្វាគមន៍នូវវិនិយោគិនពីគ្រប់តំបន់លើសកលលោក ក្នុងការវិនិយោគនៅព្រះរាជាណាចក្រកម្ពុជា៕

សហរដ្ឋអាមេរិក៖ ទន្លេ និងស្ទ្រីមជាច្រើននៅតំបន់អាឡាស្កាបានប្រែទៅជាពណ៌ទឹកក្រូចភ្លឺយ៉ាងចម្លែក ដោយអ្នកវិទ្យាសាស្ត្រកំពុងស្វែងរកមូលហេតុពិតប្រាកដនៃបាតុភូតនេះ។

យោងតាមគេហទំព័រអន្តរជាតិ Scientific American ដែលបានចេញផ្សាយនៅថ្ងៃទី២៤ ខែធ្នូថា ក្នុងរយៈពេលប៉ុន្មានឆ្នាំចុងក្រោយនេះ អ្នកវិទ្យាសាស្ត្របានសង្កេតឃើញទន្លេ និងស្ទ្រីមជាច្រើនប្រែទៅជាពណ៌ទឹកក្រូចភ្លឺនៅក្នុងតំបន់អាក់ទិកនៃអាឡាស្កា ដែលការប្រែពណ៌នៃទន្លេ Salmon ហូរកាត់ឧទ្យានជាតិ Kobuk Valley គឺពិតជាគួរឱ្យព្រួយបារម្ភខ្លាំងណាស់។

យោងតាមប្រភពដដែលបានឱ្យដឹងទៀតថា ហេតុការណ៍នេះបានកើតឡើងចំពោះទន្លេ និងទឹកហូរពេញជួរភ្នំ Brooks ក្នុងរដ្ឋ Alaska ហើយទំនងជានឹងកើតឡើងនៅកន្លែងជាច្រើនទៀតនៅតំបន់អាក់ទិក។ លោក Patrick Sullivan អ្នកបរិស្ថានវិទ្យានៅសាកលវិទ្យាល័យ Alaska Anchorage និងសហការីរបស់គាត់ជឿថា មូលហេតុនៃការប្រែពណ៌នេះគឺមកពីការប្រែប្រួលអាកាសធាតុ នេះបើតាមលទ្ធផលស្រាវជ្រាវក៏បានបង្ហាញថាតំបន់អាក់ទិកកំពុងឡើងកម្តៅក្នុងអត្រាលឿនជាងពិភពលោក។ ដូច្នេះការកើនឡើងសីតុណ្ហភាពអាចធ្វើឱ្យ permafrost នៅក្នុងឧទ្យានជាតិរលាយបាន។

ទោះជាយ៉ាងណាក៏ដោយ អ្នកស្រាវជ្រាវមិនប្រាកដថា ដីរលាយអាចប្រែទៅជាពណ៌ទឹកក្រូចឬយ៉ាងណានោះទេ។ អ្នកជំនាញខ្លះជឿថា អាស៊ីតដែលចេញពីសារធាតុរ៉ែបានបញ្ចេញជាតិដែកពីថ្ម នៅពេលដែលដីល្បាប់មកប៉ះនឹងទឹកហូរ ឬខ្យល់ ទើបពួកវាប្រែទៅជាពណ៌ទឹកក្រូចបែបនេះ។ ដូច្នេះហើយ ការស្វែងយល់ពីមូលហេតុនៃបាតុភូតនេះមានសារៈសំខាន់ខ្លាំងណាស់ក្នុងការបង្កើនការយល់ដឹងអំពីផលប៉ះពាល់អេកូឡូស៊ី រួមទាំងហានិភ័យចំពោះសត្វព្រៃតាមដងទន្លេ និងសហគមន៍ដែលពឹងផ្អែកលើទឹកផងដែរ។ ហេតុនេះហើយ ដៃទន្លេជាច្រើននៃទន្លេ Wulik បានប្រែទៅជាពណ៌ទឹកក្រូច ដែលអាចប៉ះពាល់ដល់ភូមិរបស់អ្នកស្រុកចំនួន ៤៤៤ ដែលមានជំនាញក្នុងការនេសាទ និងទាញយកទឹកផឹកពីទន្លេ។

យោងតាមការស្ទាបស្ទង់ភូមិសាស្ត្រអាមេរិក (USGS) បានឱ្យដឹងដែរថា បច្ចុប្បន្នអ្នកវិទ្យាសាស្ត្រកំពុងធ្វើការសិក្សាមួយ ដោយពិនិត្យមើលទន្លេ និងអូរពណ៌ទឹកក្រូចនៅអាឡាស្កា ដែលការសិក្សានេះមានគោលបំណងសាកល្បងសម្មតិកម្មជាច្រើនអំពីមូលហេតុនៃបាតុភូត និងទំនាក់ទំនងរបស់វាទៅនឹងអាកាសធាតុក្តៅ និងដីរលាយ។ អ្នកជំនាញ USGS ក៏នឹងពិចារណាពីផលប៉ះពាល់លើគុណភាពទឹក និងប្រព័ន្ធអេកូឡូស៊ីផងដែរ៕

គេហទំព័រ Oddity Central បានសរសេរថា ក្រុមអ្នកវិទ្យាសាស្ត្រនៅប្រទេសដាណឺម៉ាក និងអាមេរិកបានសហការគ្នាបង្កើតគំរូបញ្ញាសិប្បនិម្មិតមួយឈ្មោះ Life2vec ។ បច្ចេកវិទ្យានេះនឹងទទួលបានការហ្វឹកហាត់ចំណេះដឹង និងប្រមូលលទ្ធផលមកពីព័ត៌មានជាច្រើន ដើម្បីទស្សន៍ទាយអំពីជីវិតមនុស្សជាច្រើនផ្នែក ក្នុងនោះវាមានសមត្ថភាពទស្សន៍ទាយពីពេលវេលាស្លា.ប់របស់មនុស្សផងដែរ ។

បើតាមរបាយការណ៍ស្រាវជ្រាវបញ្ជាក់ថា បច្ចេកវិទ្យា Life2vec ទទួលបានព័ត៌មានពីការកត់ត្រាផ្នែកសុខភាព និងទិន្នន័យផ្ទាល់ខ្លួនរបស់ពលរដ្ឋដាណឺម៉ាកចំនួន៦លាននាក់ ដូចជា ៖ ថ្ងៃខែឆ្នាំកំណើត, ទីកន្លែងសិក្សា, ការរៀនសូត្រ, អាសយដ្ឋាន និងព័ត៌មានសុខភាព ។ បន្ទាប់មក បច្ចេកវិទ្យានេះត្រូវបានគេហ្វឹកហាត់ឱ្យវាអាចទស្សន៍ទាយពីអ្វីដែលនឹងកើតឡើងនៅថ្ងៃអនាគត រួមទាំងការទស្សន៍ទាយថា មនុស្សម្នាក់ៗនឹងស្លា.ប់នៅពេលណា ។

ក្រុមអ្នកស្រាវជ្រាវបានបង្ហាញលទ្ធផលគួរឱ្យភ្ញាក់ផ្អើលមួយ នៅពេលបច្ចេកវិទ្យា Life2vec អាចទស្សន៍ទាយដឹងថា មនុស្សម្នាក់ៗនឹងស្លា.ប់នៅពេលណា ដោយសារផ្អែកតាមការវិភាគទិន្នន័យផ្សេងៗ ។ ជាក់ស្តែង មនុស្សមួយក្រុមមានអាយុចាប់ពី៣៥ឆ្នាំ ទៅ៦៥ឆ្នាំ ហើយមនុស្សពាក់កណ្តាលក្នុងចំណោមនេះ បានស្លាប់ចាប់ពីឆ្នាំ២០១៦ ដល់ឆ្នាំ២០២០ ហើយបច្ចេកវិទ្យានេះអាចទស្សន៍ទាយដឹងថា មនុស្សណាខ្លះដែលបានស្លាប់ ហើយមនុស្សណាទៀតនៅមានជីវិត ។ វាអាចទស្សន៍ទាយបានត្រឹមត្រូវរហូតដល់៧៨% ។

សាស្ត្រាចារ្យម្នាក់ឈ្មោះ Sune Lehmann Jorgensen ជាប្រធានដឹកនាំក្រុមស្រាវជ្រាវមកពីសាកលវិទ្យាល័យបច្ចេកទេសនៅដាណឺម៉ាកលើកឡើងថា គេបានហ្វឹកហាត់បច្ចេកវិទ្យា Life2vec តាមរយៈទិន្នន័យជាក់លាក់ គឺសំដៅដល់ទិន្នន័យបានពីពលរដ្ឋដាណាម៉ាក ។ ហេតុនេះ លទ្ធផលដែលទទួលបានអាចមិនដូចគ្នាទេ សម្រាប់អ្នករស់នៅប្រទេសផ្សេងទៀត ។ គេបានអភិវឌ្ឍន៍បច្ចេកវិទ្យានេះឡើងដើម្បីជាប្រយោជន៍ដល់មនុស្ស ប៉ុន្តែវាមិនគួរស្ថិតនៅក្រោមការគ្រប់គ្រងរបស់ក្រុមហ៊ុនមួយចំនួនទេ ដូចជា ក្រុមហ៊ុនធានារ៉ាប់រង ។

រីឯក្រុមអ្នកស្រាវជ្រាវលើកឡើងថា បើទោះជាការប្រើប្រាស់បច្ចេកវិទ្យា AI ប្រឈមនឹងបញ្ហាសីលធម៌ក្តី ប៉ុន្តែវាមានគុណសម្បត្តិល្អមួយ គឺការទស្សន៍ទាយពីការស្លា.ប់អាចជួយឱ្យគេការពារការស្លា.ប់មុនអាយុបាន ។ អ្នកស្រាវជ្រាវអាចរកឃើញពីផលប៉ះពាល់ដល់អាយុជីវិត ដោយសារការបំពេញការងាររបស់មនុស្សម្នាក់ៗ រួមទាំងហេតុការណ៍ផ្សេងៗដែលនឹងកើតឡើងក្នុងជីវិត ៕ ប្រភព ៖ chiangmai news