ជាទូទៅនៅក្នុងឱកាសបុណ្យចុលឆ្នាំប្រពៃណីចិន គឺខ្សែស្រឡាយចិនគ្រប់រូបតែងនិយមចែក «អាំងប៉ាវ» ដែលភាសាចិនហៅថា«ហុងប៉ាវ»។ អាំងប៉ាវ(ក្រដាសក្រហមៗ)នេះ គឺតែងតែត្រូវបានផ្តល់ឲ្យនៅក្នុងចំណោមក្រុមគ្រួសារ មិត្តភក្តិ ចាហ្វាយនាយនិងកូនចៅជាដើម។

សារៈសំខាន់នៃការផ្តល់អាំងប៉ាវ ដែលមិនមែនគ្រាន់តែជាស្រោមសំបុត្រដាក់លុយធម្មតាៗប៉ុណ្ណោះទេ ប៉ុន្តែវាគឺមានពណ៌ក្រហម ដែលជាពណ៌តំណាងឲ្យថាមពល សុភមង្គល និងសំណាងល្អក្នុងវប្បធម៌ចិន។ ដូច្នេះអាំងប៉ាវគឺជានិមិត្តរូបនៃការជូនពរ ហេងៗ រកស៊ីមានបាន ជោគជ័យ និងកាកកបពេញមួយឆ្នាំ។

រីឯតំណមខ្លះៗសម្រាប់មានអាំងប៉ាវនេះក៏មានផងដែរគឺ ត្រូវតែជាក្រដាសស្អាតល្អ ដូចជាក្រដាសប្រាក់ថ្មីៗប៉ុណ្ណោះ ពោលគឺហាមមិនឲ្យកង្វក់ឬរហែក ទើបអាចដាក់ចូលក្នុងអាំងបាវបានជាសិរីសួស្តី។ ទោះជាយ៉ាងណា បច្ចុប្បន្ននេះ គេឃើញថាឲ្យអាំងប៉ាវគ្នាតាមរយៈអ៊ីនធើណែតក៏បានដែរ ដោយធ្វើការស្គេន QR កូដ ក៏ដូចជាការផ្ទេរប្រាក់អនឡាញផ្សេងៗ។

ការឲ្យអាំងប៉ាវគឺអាស្រ័យទៅលើចំណូលរបស់អ្នកថាតិចក្តីច្រើនក្តី។ ចំនួនទឹកប្រាក់ដែលផ្តល់ឱ្យក្នុងអាំងប៉ាវ គឺហាមមិនឲ្យដាក់ចំនួនដែលមានលេខ ‘៤’ ទេ – មិនថាជា ៤០០, ៤.០០០ , ៤០.០០០… ព្រោះថាក្នុងភាសាចិនលេខ៤នេះគឺអានស្រដៀងទៅនឹងពាក្យ«ស្លាប់» នឹងបានចាត់ទុកថាជាលេខអពមង្គល។ មិនថាតែនៅប្រទេសចិនទេ គឺប្រទេសអាស៊ីផ្សេងទៀតក៏បានចាត់ទុកថាជាលេខសំណាងអាក្រក់និងតែងតែរំលងក្នុងការប្រើប្រាស់ផងដែរ។ ផ្ទុយទៅវិញ គេតែងតែនិយមប្រើលេខ ‘៨’ ព្រោះជាលេខហុងស៊ុយនឹងនាំមកនូវសំណាងល្អ និងភាពរុងរឿង។

ចំណែកតំណមសម្រាប់អ្នកដែលទទួលបានអាំងប៉ាវពីគេវិញ គឺត្រូវតែទទួលយកដៃពីរ និងមិនត្រូវបើកអាំងប៉ាវឬរាប់លុយនៅចំពោះមុខអ្នកដទៃជាដាច់ខាត ព្រោះនៅក្នុងតម្រាលជនជាតិចិនប្រកាន់ណាស់ ហើយអ្នកក៏មិនគួរចាយលុយអាំងប៉ាវនោះភ្លាមៗទេ ប្រសិនបើគ្មានការចាំបាច់ ព្រោះលុយអាំងប៉ាវគឺជាលុយសំណាង។

គួរបញ្ជាក់ផងដែរថា អាំងប៉ាវគឺត្រូវបានគេនិយមឲ្យគ្នាជាទូទៅនៅក្នុងពិធីសំខាន់ៗរបស់ខ្សែរស្រឡាយកាត់ចិនដូចជា ថ្ងៃបុណ្យចូលឆ្នាំប្រពៃណីចិន អាពាហ៍ពិពាហ៍ និងខួបកំណើតជាដើម៕

នាពេលថ្មីៗនេះជុំវិញរឿងអ្នកបង្កើតមាតិកាពីររូប Rick kh និង ដុកទ័រ សែម រតនា បានធ្វើឱ្យបណ្តាញសង្គមផ្ទុះយ៉ាងខ្លាំងបន្ទាប់ពីលោក Rick kh មានការអាក់អន់ស្រពន់ចិត្តចំពោះពាក្យសម្តីរបស់លោក សែម រតនា។ ស្របពេលជាមួយគ្នានេះព្រះតេជគុណ គូ សុភាព មានសង្ឃដីកាថាអ្នកទាំងពីរសុទ្ធតែជាមនុស្សមានទេពកោសល្យជួយស្រុកទេសបានច្រើនសង្ឃឹមថាអ្នកទាំងពីរនឹងមានពេលជួបគ្នាហើយហ្វេនៗនឹងចូលរួមជួយពន្លត់ភ្លើង។

«ប្អូនៗសុទ្ធតែបានចូលរួមជួយជ្រោមជ្រែងស្រុកទេសយើងយ៉ាងច្រើន។ មិនងាយមានមនុស្សមានទេពកោសល្យដូចប្អូនទេ។ សង្ឃឹមថា ប្អូនៗនឹងមានពេលជួបគ្នា សង្ឃឹមថា ហ្វេនៗនឹងចូលរួមជួយពន្លត់ភ្លើង។ ចូលរួមធ្វើការងារដើម្បីស្រុកទេសយើងទាំងអស់គ្នា។» នេះជាការបង្ហោះរបស់ ព្រះតេជគុណ គូ សុភាព លើបណ្តាញសង្គមហ្វេកប៊ុកនាព្រឹកថ្ងៃទី៨ ខែកុម្ភៈ ឆ្នាំ២០២៤។

កាលពីថ្ងៃទី៦ កុម្ភៈ Rick Kh គោប្រាក់ បានបង្ហាញអារម្មណ៍អន់ចិត្តខ្លាំងមិនបានចូលរួមកម្មវិធីជាតិម្តងត្រូវគេដៀលថា «មិនស្រលាញ់ជាតិគិតតែពីលុយ» បន្ទាប់ពីលោក ដុកទ័រ សែម រតនា បានផ្តល់បទសម្ភាសមួយដោយបានលើកឡើងថាអ្នកបង្កើតមាតិកាមួយចំនួនចំណាយលុយជិះយន្តហោះស្នាក់នៅប្រទេសគេប្រូម៉ូតឱ្យប្រទេសគេ ប៉ុន្តែនៅពេលដែលក្រសួងឬវិស័យទាក់ទងនឹងទេសចរណ៍ក្នុងស្រុកទាក់ទងទៅបែរជាសួររកលុយ ជាមួយនឹងការអំពាវនាវឱ្យអ្នកផលិតមាតិកាវីដេអូរួមគ្នាផ្សាយតំបន់ទេសចរណ៍ក្នុងស្រុកជាជាងការចំណាយប្រាក់ចេញទៅផ្សព្វផ្សាយពីតំបន់ទេចរណ៍បរទេស។

ក្រោយពី Rick kh បង្ហាញអារម្មណ៍អន់ចិត្តនិងបានក្លាយទៅជារឿងដ៏ក្តៅគគុកនៅលើបណ្តាញសង្គមលោកដុកទ័រ សែម រតនា ក៏បានចេញមកបកស្រាយការយល់ច្រលំដោយបានរៀបរាប់ដំណើរដើមទងគ្រប់យ៉ាងនាំឱ្យលោកនិយាយបែបនោះក្នុងអំឡុងពេលផ្តល់បទសម្ភាស។ បញ្ហានេះលោកបានខលទៅកាន់ Rick kh រួចហើយដែរនិងបានសុំជួប Rick kh និយាយជាមួយគ្នាដោយផ្ទាល់ទៀតផង។

ជាមួយខ្លឹមសាររបស់លោកដុកទ័រ សែម រតនា កាលពីថ្ងៃទី៦ កុម្ភៈ លោកក៏បានស្នើដល់អ្នកប្រើប្រាស់បណ្តាញសង្គមកុំព្យាយាមទាញលោកនិងRick kh ឱ្យឈ្លោះគ្នា និងកុំបន្តវែកញែកទៀត ព្រោះលោកមិនមែនជាបុគ្គលបង្ករឿងក្នុងបណ្តាញសង្គមឡើយ៕

ស្រោមសំបុត្រក្រហម ដែលខ្មែរយើងនិយមហោះថា «អាំងប៉ាវ» ឬ ចិនហៅថា «ហុងប៉ាវ» គឺជាអំណោយ(ជាកាក់ ឬ លុយជាដើម)ដាក់ចូលទៅក្នុងស្រោមពណ៌ក្រហម ដែលភាគច្រើនគេនិយមឃើញអ្នកដែលមានឋានៈបងនឹងផ្តល់ឲ្យនៅក្នុងក្រុមគ្រួសារ។

អាំងប៉ាវគឺតែងតែលេចវត្តមានក្នុងឱកាសសំខាន់ៗចំពោះខ្សែរស្រឡាយចិនដូចជា ចូលឆ្នាំចិន ខួបកំណើត និងពិធីមង្គលការ។ល។ ដើម្បីជាសេចក្តីជូនពរ ព្រោះថាពណ៌ក្រហមនៅក្នុងវប្បធម៌ចិនគឺតំណាងឱ្យថាមពល សុភមង្គល និងសំណាងល្អ។ ទោះជាយ៉ាងណា ប្រទេសចិនក៏បានកត់សម្គាល់ថាមានរឿងដំណាលបុរាណទាក់ទងនឹងប្រវត្តិនៃការផ្តល់អំាងប៉ាវនេះផងដែរ ដែលមានប្រភពចេញពីរឿងរ៉ាវអបីយជំនឿនៃថ្ងៃចូលឆ្នាំចិនសម័យដើម។

តាមរឿងព្រេងនិទានគឺមានអារក្សឈ្មោះ «សួយ» ដែលចាត់ទុកថាជាបីសាច គឺតែងតែចេញមកលងបន្លាយក្មេងៗពេលពួកគេកំពុងដេកលក់ថ្ងៃចូលឆ្នាំចិន។ ដូច្នេះហើយ ដើម្បីការពារក្មេងៗកុំឲ្យកើតមានគ្រោះថ្នាក់ផ្សេងៗពីបីសាចសួយ ទើបមាតាបិតាមួយចំនួនបានរកនឹកវិធីមួយគឺនឹងអុជទៀន ហើយនឹងអង្គុយចាំមើលពេញមួយយប់នៃថ្ងៃចូលឆ្នាំចិន។

ជាមួយគ្នានេះ កុមារក៏ត្រូវបានផ្តល់កាក់ចំនួន ៨ ដើម្បីលេងកុំឲ្យងងុយគេង។ កុមារត្រូវខ្ចប់កាក់ទាំងនោះចូលក្នុងក្រដាសពណ៌ក្រហម បន្ទាប់មកក៏បើកក្រដាសចាក់កាក់ចេញ ហើយក៏ខ្ចប់កាក់ចូលក្នុងក្រដាសដដែលនោះម្តងហើយម្តងទៀត គឺធ្វើជារឿយៗរហូតដល់ក្មេងនោះហត់អស់កម្លាំង ហើយក៏ដេកលក់ទៅ។ បន្ទាប់មកឪពុកម្តាយនឹងយកក្រដាសក្រហមខ្ចប់កាក់ចំនួន ៨ ដែលក្មេងខ្ចប់ទៅមកខណៈពេលមុននោះ ទៅដាក់នៅក្រោមខ្នើយរបស់ក្មេងដែលកំពុងគេងលង់លក់។ ជាសំណាងល្អ វាគឺបានផលពិតមែន នៅពេលដែលបិសាច Sui ព្យាយាមប៉ះក្បាលរបស់ក្មេង កាក់ទាំងប្រាំបីនោះនឹងបញ្ចេញពន្លឺដ៏ខ្លាំងមួយ ហើយបំភ័យបិសាចសួយនោះចេញទៅភ្លាមៗតែម្តង។ ដោយបានឃើញពីភាពសាកសិទ្ធនេះ គ្រួសារជាច្រើនក៏បានអនុវត្តតាមវិធីនេះគ្រប់ៗគ្នានៅជារៀងរាល់ថ្ងៃចូលឆ្នាំចិន។

តាមរយៈជំនឿបុរាណនេះ គេក៏បានប្រទះថា ភាគច្រើនមនុស្សដែលមានវ័យចំណាស់ជាងតែងតែផ្តល់ឲ្យក្មេងៗនូវក្រដាសក្រហមដែលសម្មតថាជាអាំងប៉ាវនេះ មកខ្ចប់ជាកាក់ឬលុយ ដើម្បីផ្តល់ឲ្យជាសិរីសួស្តីឆ្នាំថ្មីដល់គ្រួសារពួកគេទាំងមូល។ មិនត្រឹមតែប៉ុណ្ណោះ ក៏មានការវិវត្តពីមួយជំនាន់ទៅមួយជំនាន់ដោយឃើញថាមានក្មេងៗជាកូននិងជាចៅបានផ្តល់អាំងប៉ាវនេះជូនចំពោះឪពុកម្តាយ ជីដូនជីតាវិញ ដើម្បីបង្ហាញនូវការដឹងគុណ ហេងៗ រកស៊ីមានបានអ្វីបែបនិងផងដែរ៕

នៅក្នុងគ្រួសារនីមួយៗ គ្រប់ផ្ទះទាំងអស់សុទ្ធតែមានជំនាងផ្ទះព្រោះគេជឿថា ការដាក់ជំនាងផ្ទះនឹងនាំមកនូវលាភសំណាង ព្រមទាំងអាចថែរក្សាម្ចាស់ផ្ទះមានហុងស៊ុយ រួមទាំងកម្ចាត់ពពួកអមនុស្សបានទៀតផង។ ទោះយ៉ាងណាក៏ដោយ ជំនាងផ្ទះក៏អាចនាំទ្រព្យនិងក្ដីសុខដល់គ្រួសារបានផងដែរ ប្រសិនបើអ្នកដាក់ក្នុងទីតាំងត្រឹមត្រូវ។

នេះបើយោងតាមអបិយជំនឿរបស់ចាស់ៗបុរាណ បានឱ្យដឹងថា ទីតាំងដែលសមរម្យជាងគេបំផុតរបស់ជំនាងផ្ទះនោះគឺចំមុខក្លោងទ្វារផ្ទះ មិនថាទ្វានោះធំឬតូចនោះឡើយ។ បើដាក់ទីតាំងនេះ គឺជំនាងផ្ទះនឹងមានអំណាចអាចហៅលុយហូរចូលផ្ទះបាន។ លើសពីនេះ អ្នកអាចដាក់ជំនាងផ្ទះលើអាសនៈដែលមានជញ្ជាំងមាំទាំ ហើយមិនត្រូវដាក់នៅក្បែរបង្អួចឬមានរន្ធប្រហោងអ្វីទេ ម្យ៉ាងទៀតក៏មិនត្រូវមានជ្រុងស្រួចនៅពីក្រោយទីតាំងអាសនៈដែរ។

បើនិយាយពីការដាក់នៅចំកណ្ដាលអាសនៈវិញ ក៏ត្រូវមានគ្រឿងក្រអូបផងដែរ ចំណែកឯចានផ្លែឈើត្រូវដាក់នៅខាងឆ្វេង ថូផ្កាត្រូវដាក់នៅខាងស្ដាំ។ ផ្កាដែលអ្នកគួរសែនអាចជាផ្កាកុលាប ឬផ្កាឈូកជាដើម សម្រាប់ផ្លែឈើគួរមាន ៥មុខ និងត្រូវមានទឹក ៥ពែងរៀបជារាងឈើឆ្កាងផងដែរ ដើម្បីតំណាងធាតុទាំង៥។

ចំពោះចំណុចចាំបាច់មួយទៀត គឺ អ្នកត្រូវដាក់អង្ករមួយចានតូច អំបិលមួយចានតូច និងទឹកមួយពែងតូចឱ្យពេញៗសម្រាប់ជាសំណែន ដោយដាក់តែពេលចុងឆ្នាំប៉ុណ្ណោះ ដែលទាំងអស់នេះ គេជឿថា មាសប្រាក់ទ្រព្យសម្បត្តិនឹងហូរចូលដូចទឹកបាក់ទំនប់អញ្ចឹង។

ជាទូទៅលោកតាជំនាងផ្ទះតែងចេញចូលទៅនេះទៅនោះ ដើម្បីហៅប្រាក់មកចូលផ្ទះហើយពេលត្រលប់មកវិញ តែងមានធូលីដី។ ដូច្នេះ អ្នកត្រូវឧស្សាហ៍យកទឹកមានដាក់ផ្កាកុលាប ឬម្លិះប្រោះព្រំលើមុខលោកតា ដើម្បីបានសេចក្តីសុខ និងមាសប្រាក់ច្រើន។ ប្រសិនបើមុខលោកតាប្រឡាក់ដីសាម៉ាម គ្មានអ្នកជួយលុបលាងឱ្យនោះលុយនឹងហូរចេញទៅឆ្ងាយជាក់ជាមិនខាន៕

យោងតាមការសិក្សាមួយបានបង្ហាញថា ប្រជាជនកម្ពុជាចំណាយប្រាក់ប្រមាណ ២,៣ ពាន់លានដុល្លារលើស្រាបៀរក្នុងមួយឆ្នាំ ដែលនេះជាតួលេខដ៏គួរភ្ញាក់ផ្អើលបំផុត ដែលតម្រូវឱ្យមានវិធានការតឹងរ៉ឹង ដើម្បីទប់ស្កាត់ការប្រើប្រាស់គ្រឿងស្រវឹងនៅក្នុងប្រទេស។

ប្រជាជនកម្ពុជាជាមធ្យមទទួលទានស្រាបៀរប្រហែល៧២លីត្រក្នុងមួយឆ្នាំ ស្មើនឹង២១៨កំប៉ុង ចំពោះកំប៉ុងដែលមានចំនុះ ៣៣០មីលីលីត្រ។

ស្រាបៀរជាមធ្យម មានតម្លៃចន្លោះពី២០០០រៀល ទៅ២៥០០រៀល ក្នុងមួយកំប៉ុង ហេតុដូច្នេះក្នុងពលរដ្ឋខ្មែរម្នាក់ចំណាយប្រហែល១៣៦ដុល្លារ ក្នុងមួយឆ្នាំទៅលើស្រាបៀរ។

ក៏ប៉ុន្តែអ្នកខ្លះអាចទទួលទាន និងចំណាយថវិការ ច្រើនជាងនេះទៅទៀត ដោយហេតុថាពលរដ្ឋខ្មែរ១៧លាននាក់ ក៏មានមួយចំនួន មិនទទួលទានជាតិស្រវឹងផងដែរ។

ដូច្នេះ យោងតាមការសិក្សារបស់ក្រុមហ៊ុនជប៉ុន Kirin បានឱ្យឃើញថា ពលរដ្ឋខ្មែរទទួលទានគ្រឿងស្រវឹងជាមធ្យមម្នាក់២១៨កំប៉ុង ដែលស្មើនឹង៨.៨កេស ក្នុងមួយឆ្នាំ៕

ប្រភព៖ KIRI POST