តើដឹងឬទេថា ការគិតរបស់យើងបានប៉ះពាល់ដល់ជីវិតប្រចាំថ្ងៃ ច្រើនជាងការគិតរបស់មនុស្សភាគច្រើន ។ ហេតុនេះ គំនិតនៅក្នុងខួរក្បាលរបស់យើងនឹងមានឥទ្ធិពលដល់រាងកាយ និងផ្លូវចិត្ត រហូតដល់រឿងរ៉ាវក្នុងជីវិតប្រចាំថ្ងៃផងដែរ ។

ឥទ្ធិពលនៃការគិតប៉ះពាល់ដល់ខ្លួនយើងនេះ មនុស្សភាគច្រើនអាចធ្លាប់ឮពាក្យថា «ច្បាប់នៃការទាក់ទាញ» គឺបើយើងគិតបែបណា យើងនឹងទទួលបានតាមការគិតបែបនោះ ។ ជាក់ស្តែង បើយើងគិតថា នៅជុំវិញខ្លួនមានតែរឿងមិនល្អ ហើយជីវិតនេះជួបតែភាពបរាជ័យ ។ ដូច្នេះ យើងនឹងទទួលបានភាពបរាជ័យជានិច្ច ហើយយើងជួបតែមនុស្សមិនល្អ, រឿងអាក្រក់ ហើយជីវិតរបស់យើងជួបតែរឿងអាក្រក់ទាំងអស់ ។

ផ្ទុយទៅវិញ បើយើងគិតថា អ្វីគ្រប់យើងដែលចូលមកក្នុងជីវិតរបស់យើង គឺជារសជាតិជីវិត និងជាការសាកល្បងមួយដែលយើងត្រូវតែឆ្លងកាត់វាឱ្យបាន ។ ចូរគិតថា យើងនឹងអាចធ្វើវាបាន និងទទួលបានភាពជោគជ័យ ។ ហេតុនេះ ជីវិតរបស់យើងនឹងល្អប្រសើរឡើងបន្តិចម្តងៗទៅតាមគំនិតក្នុងខួរក្បាល ។

គ្រូពេទ្យព្យាបាលផ្លូវចិត្តបានណែនាំថា ជារៀងរាល់ថ្ងៃ យើងគួរចាប់ផ្តើមគិតបែបវិជ្ជមានសម្រាប់ខ្លួនឯងឱ្យបានច្រើន ដូចជា ៖
-ព្រឹកនេះ ខ្ញុំនឹងមានសេចក្តីសុខ
-ព្រឹកនេះ អាកាសធាតុល្អខ្លាំងណាស់
-ថ្ងៃនេះ ខ្ញុំនឹងមានថ្ងៃល្អយ៉ាងពិតប្រាកដ

លើសពីនេះ មុនពេលចូលសម្រាកពេលយប់ ចូរកត់ត្រានូវរឿងរ៉ាវល្អៗដែលយើងបានជួបប្រទះ និងបានប្រព្រឹត្ត បើទោះជាមើលទៅដូចជារឿងធម្មតាបន្តិចមែន ប៉ុន្តែវាអាចជួយឱ្យយើងមានការចងចាំនូវរឿងល្អៗ ដូចជា ៖
-ថ្ងៃនេះ កាហ្វេឆ្ងាញ់ណាស់
-ថ្ងៃនេះ ពេលត្រឡប់មកផ្ទះវិញ ផ្លូវមិនស្ទះចរាចរណ៍ទេ
-ថ្ងៃនេះ អាហារថ្ងៃត្រង់ឆ្ងាញ់ណាស់
-ថ្ងៃនេះ ចៅហ្វាយនាយសរសើរពីលទ្ធផលការងារ
-ថ្ងៃនេះ បានឱបសត្វឆ្មាផងដែរ

នៅពេលយើងបានប្រាប់ខ្លួនឯងរៀងរាល់ព្រឹក គឺជាការបញ្ជាចិត្តខ្លួនឯងឱ្យចាប់ផ្តើមសម្លឹងមើលពិភពលោកក្នុងផ្លូវវិជ្ជមាន ហើយនៅពេលយើងបានកត់ត្រានូវរឿងរ៉ាវល្អៗមុនពេលចូលសម្រាក វានឹងអាចជួយព្យាបាលផ្លូវចិត្តនៅថ្ងៃដែលយើងនឿយហត់ ។ បើបានអនុវត្តបែបនេះរហូតដល់ក្លាយជាទម្លាប់ យើងនឹងមានសុខភាពផ្លូវចិត្តល្អ, ផ្លូវចិត្តរឹងមាំ ហើយរាងកាយធូរស្បើយពីការនឿយហត់ ។

ការគិតបែបវិជ្ជមាននឹងធ្វើឱ្យខួរក្បាលអាចកម្ចាត់នូវភាពតានតឹង, ការបារម្ភ និងអារម្មណ៍អវិជ្ជមានបានយ៉ាងល្អ ។ វាជួយឱ្យយើងអាចបែងចែក និងរស់នៅយ៉ាងមានហេតុផល, មានរបៀបវិន័យ, មានកម្លាំងចិត្តច្នៃប្រឌិត ឬអនុវត្តសកម្មភាពជាក់ស្តែង ។ នៅពេលមានថាមពលពេញលេញក្នុងរាងកាយ យើងនឹងអាចធ្វើការងារបានគ្រប់យ៉ាងដោយការផ្តោតអារម្មណ៍, ការតាំងចិត្ត, ប្តេជ្ញាចិត្ត និងងាយទទួលបានជោគជ័យ ។

ហេតុនេះ យើងអាចសាកល្បងគិតវិជ្ជមាននៅពេលព្រឹក, គិតពីរឿងរ៉ាវល្អៗ និងគិតពីមនុស្សល្អៗដោយពុំចាំបាច់ចំណាយប្រាក់កាស ហើយយើងនឹងទទួលបាននូវគំនិតថ្មីៗជាងមុន និងមានកម្លាំងចិត្តខ្លាំងឡើង ៕

ជាធម្មតា ការបែងចែកឋានៈ បុណ្យសក្កិត្រូវបានមនុស្សក្នុងលោកបែងចែកជាក្រុមត្រកូលតាំងតែពីយូរណាស់មកហើយ។ ក្រុមមនុស្សមួយក្រុមតូចដែលវិសេសបំផុតលើសគេ និងមានឥទ្ធិពលបំផុតជាងគេក្នុងចំណោមមនុស្សទូទៅក្នុងតំបន់១ ក្រុមមួយ។ល។ គេតែងតែហៅក្រុមនោះថាជាស្តេច។ល។

ពាក្យថាស្តេច សំគាល់ទៅលើអំណាច បុណ្យសក្តិ កិត្តិយស ពូជពង្សវង្សត្រកូល មិនមាននរណាម្នាក់មកប្រៀបបានឡើយ។ បើមានជាតិកំណើតកើតក្នុងត្រកូលស្តេចគឺជាស្តេច ដំណាងអោយអ្នកដែលមានបុណ្យបារមីលើសគេ ទើបមាននិស្ស័យកើតជាសមាជិកក្នុងត្រកូលនោះ គ្រប់គ្នាមិនអាចជ្រើសរើសទីចាប់កំណើតតាមការចង់បាន ការពេញចិត្តរបស់យើង ពិសេសគឺវង្សត្រកូលបានឡើយ។

ថ្ងៃនេះ សារព័ត៌មាន KBN NEWS នឹងលើកបង្ហាញលោកអ្នកអោយបានជ្រាបកាន់តែច្បាស់បន្ថែមទៀតពីកំពូលស្តេចដែលមានទ្រព្យសម្បត្តិច្រើនមហាសាលបំផុតទាំង៥នៅក្នុងពិភពលោក ដែលគ្រប់គ្រងកាន់កាប់ទ្រព្យសម្បត្តិនិងសកម្មភាពអាជីវកម្មក្នុងដៃ ដោយដកស្រង់តាមរបាយការណ៍ស្រាវជ្រាវពី The Business Standard នៅឆ្នាំ២០២៣។

ជាការពិតស្តេចដែលគង់នៅក្នុងប្រទេសលទ្ធិប្រជាធិបតេយ្យគឺមានសិទ្ធិយ៉ាងទូលាយក្នុងវិស័យអចលនទ្រព្យ ការកាន់កាប់ក្រុមហ៊ុន កម្មសិទ្ធិភាគហ៊ុនជាដើម ស្របជាមួយនឹងស្ថេរភាពសេដ្ឋកិច្ច សង្គម និងនយោបាយ ដែលទាំងនេះហើយបាននឹងបង្កើននូវទំហំទ្រព្យសម្បត្តិដ៏មហាសាល បើទោះបីជានៅក្នុងនាមជាក្សត្រក៏ដោយ។
យោងតាមរបាយការណ៍ខាងលើគឺបានប៉ាន់ស្មានទ្រព្យសម្បត្តិនិងចាត់ថ្នាក់ស្តេចទាំង៥អង្គ ដែលមានជាងគេបំផុតលើពិភពលោករួមមាន ៖

1. ព្រះមហាក្សត្រថៃបច្ចុប្បន្ន គឺព្រះមហាក្សត្រ Maha Vajiralongkorn បានជាប់ចំណាត់ថ្នាក់លេខមួយ ថាជាស្តេចដែលមានទ្រព្យសម្បត្តិច្រើនជាងគេបំផុតនៅលើពិភពលោក។ ជាមួយនឹងការប៉ាន់ស្មានទ្រព្យសម្បត្តិសុទ្ធរបស់ទ្រង់មានរហូតដល់ ៤៣ ពាន់លានដុល្លារ ហើយទ្រព្យសម្បត្តិដ៏វិសេសវិសាលបំផុតរបស់ទ្រង់គឺបានមកពីភាគហ៊ុនអចលនទ្រព្យក្នុងទីក្រុងបាងកក និងភាពជាម្ចាស់នៅក្នុងក្រុមហ៊ុនជាច្រើន និងធនាគារ ក្រុមហ៊ុនរោងចក្រស៊ីម៉ង់ត៍ដ៏ធំបំផុតរបស់ប្រទេសថៃ។ អស់រយៈពេល៨០ ឆ្នាំកន្លងមកហើយ ទ្រព្យសម្បត្តិរបស់ព្រះមហាក្សត្រថៃត្រូវបានគ្រប់គ្រងដោយការិយាល័យកម្មសិទ្ធិមួយ ដែលហៅថា«Crown Property Bureau» រហូតឆ្នាំ ២០១៦ ទើបខាងការិយាល័យនេះ ផ្ទេរទ្រព្យសម្បត្តិទៅឱ្យព្រះមហាក្សត្រគ្រប់គ្រងដោយផ្ទាល់វិញ។

2. ព្រះមហាក្សត្រ Sultan Hassanal Bolkiah នៃប្រទេសប្រ៊ុយណេ គឺជាស្តេចដែលមានទ្រព្យសម្បត្តិច្រើនជាងគេទីពីរលើលោក។ ព្រះមហាក្សត្រ អង្គនេះ មានទ្រព្យសម្បត្តិសរុបប្រមាណ ២៨ ពាន់លានដុល្លារ។ ហើយភាគច្រើននៃទ្រព្យសម្បត្តិនេះគឺមានប្រភពមកពីការវិនិយោគលើវិស័យប្រេង និងឧស្ម័ន។ វិស័យនេះគឺជាមូលដ្ឋានគ្រឹះនៃសេដ្ឋកិច្ចរបស់ប្រទេសផងដែរ ហើយពាក់កណ្តាលនៃផលិតផលក្នុងស្រុកសរុបរបស់ប្រទេសប្រ៊ុយណេគឺពឹងផ្អែកលើប្រាក់ចំណូលពីការលក់ប្រេង។ ជាធម្មតាព្រះអង្គចូលចិត្តចំណាយទ្រព្យសម្បត្តិដ៏ច្រើនសន្ធឹកសន្ធាប់របស់ទ្រង់ លើវត្ថុប្រណិតៗជាច្រើន ដូចជា រថយន្តទំនើបៗ មានចំនួន៧.០០០គ្រឿង ដែលមានតម្លៃជាង ៥ពាន់លានដុល្លារ ព្រមទាំងមានយន្តហោះឯកជនមួយចំនួនទៀតផងដែរ។

3. ព្រះមហាក្សត្រ Salman bin Saud នៃប្រទេសអារ៉ាប៊ីសាអូឌីត ដែលមានទ្រព្យសម្បត្តិប្រមាណ ១៨ ពាន់លានដុល្លារ។ ចាប់តាំងពីទសវត្សរ៍ឆ្នាំ ១៩៣០ បន្ទាប់ពីបានរុករកឃើញប្រភពប្រេងកាតដ៏ធំមហិមា និងបច្ចុប្បន្នប្រទេសអារ៉ាប៊ីសាអូឌីត បានក្លាយជាប្រទេសនាំចេញប្រេងឈានមុខគេលើពិភពលោក។

4. ព្រះអង្គម្ចាស់ Sheikh Khalifa bin Zayed Al Nahyan ទីក្រុង Abu Dhabi នៃសហព័ន្ធអារ៉ាប់រួម ដែលមានទ្រព្យសម្បត្តិប្រមាណ ១៨ ពាន់លានដុល្លារ។ បន្ទាប់ពីព្រះអង្គបានទទួលមរណភាពក្នុងខែឧសភា ឆ្នាំ ២០២២ ទ្រព្យសម្បត្តិទ្រង់ត្រូវបានផ្ទេរឲ្យព្រះអង្គម្ចាស់ Mohamed bin Zayed Al Nahyan ។ ប្រាក់ចំណូលចម្បងរបស់ទ្រង់គឺបានមកពីឧស្សាហកម្មប្រេងនិងឧស្ម័នដ៏ធំរបស់ប្រទេស។

5. ព្រះអង្គម្ចាស់ Sheikh Mohammed bin Rashid Al Maktoum នៃទីក្រុងឌូបៃ សហព័ន្ធអារ៉ាប់រួម មានទ្រព្យសម្បត្តិ ១៤ ពាន់លានដុល្លារ។ ប្រាក់ចំណូលរបស់ទ្រង់គឺភាគច្រើនបានមកពីវិស័យអចលនទ្រព្យ ដែលទ្រង់គឺជាអ្នកអភិវឌ្ឍន៍ វិស័យអចលនទ្រព្យដ៏លេចធ្លោលើពិភពលលោកទៀតផង។
តើឆ្នាំ២០២៤នេះ តើស្តេចអង្គណានៅអាចរក្សាតំណែងជាស្តេចដែលមានទ្រព្យសម្បត្តិច្រើនបំផុតទាំង៥លើលោកបន្តទៀត៕

យោងតាមសេចក្តីជូនដំណឹងអំពីក្រសួងធនធានទឹក និងឧតុនិយម នៅថ្ងៃទី១៣ ខែកុម្ភៈ ឆ្នាំ២០២៤ បានឱ្យដឹងថា ចាប់ពីថ្ងៃទី១៣ ដល់ថ្ងៃទី១៥ ខែកុម្ភៈ ឆ្នាំ២០២៤ ធាតុអាកាសនឹងចុះត្រជាក់នៅពេលព្រឹកដល់១៨អង្សាសេ(°C) នៅខេត្តចំនួន៤ (ខេត្តមណ្ឌលគិរី រតនគិរី ព្រះវិហារ និងខេត្តឧត្តរមានជ័យ) ខណៈនៅតាមបណ្តាខេត្តខ្លះទៀតនឹងមានការឡើងកម្តៅក្នុងចន្លោះពី៣៥ទៅ៣៦អង្សាសេ រហូតដល់ថ្ងៃទី១៥ ខែកុម្ភៈ ឆ្នាំ២០២៤។

ចំណែក តំបន់ខ្ពង់រាប មានសីតុណ្ហភាពអប្បបរមាពី១៨-២៥°C និងសីតុណ្ហភាពអតិបរមាពី៣២-៣៥°C ដោយឡែក តំបន់មាត់សមុទ្រ មានសីតុណ្ហភាពអប្បបរមាពី២៣-២៥°C និងសីតុណ្ហភាពអតិបរមាពី៣៣-៣៥°C ហើយរលកសមុទ្រមានកម្ពស់ពី០,៧៥-១,៥០ម៉ែត្រ៕