បន្ទាប់ពីមហាជនមតិរិះគន់យ៉ាងខ្លាំងក្លាចេញចម្រៀងផ្សព្វផ្សាយពីល្បែងអនឡាញតារាកំប្លែងនាយគ្រឿនបានចេញវីដេអូទទួលស្គាល់កំហុសនិងសូមទោសមហាជនព្រមទាំងសន្យាថាឈប់ផ្សាយល្បែងនិងស្រាជារៀងរហូតដើម្បីឱ្យអ្នកគាំទ្រសប្បាយចិត្ត។ ក្នុងនោះនាយគ្រឿនបានទម្លាយហេតុផលតែមួយគត់ជំរុញឱ្យលោកបោះបង់លុយរាប់ម៉ឺនដុល្លារនិងផ្តាំទៅមហាជនវិញដែរថាលោកឈប់ផ្សាយល្បែងហើយប៉ុន្តែទស្សនិកជនវិញទេប្រយ័ត្នឃាត់ខួរក្បាលខ្លួនឯងមិនបានទៅលេងល្បែង។
នៅល្ងាចថ្ងៃទី១២ ខែកុម្ភៈ តារាកំប្លែងនាយគ្រឿន បានចេញវីដេអូចេញ៧នាទីព្រមជាមួយចំណងជើងថា «បងប្អូនជាទីស្រលាញ់បានឃើញវីឌីអូនេះហើយឈប់ជេរដល់ម្ដាយខ្ញុំ សូមទោសបងប្អូនដែលខ្ញុំធ្វើខុស»។ ក្នុងវីដេអូនេះដែរតារាកំប្លែងរូបនេះបានឃើញមតិរិះគន់លោកយ៉ាងខ្លាំងក្លារហូតឈានដល់ម្តាយរបស់ខ្លួនទៀតហើយលោកក៏ទទួលស្គាល់ថារឿងនេះលោកពិតជាធ្វើខុសពិតមែន។ នាយគ្រឿន បានរៀបរាប់ទៀតថា បន្ទាប់ពីមហាជនរិះគន់លើខ្លួនលោកក៏បានស្នើសុំបញ្ចប់កិច្ចសន្យាជាមួយល្បែងលោកផ្សាយហើយឆ្លៀតពេលរឿងនេះកើតឡើងលោកបានប្រកាសថា មិនត្រឹមតែល្បែងតែប៉ុណ្ណោះទេចាប់ពីពេលនេះតទៅលោកក៏ឈប់ផ្សាយស្រាដូចគ្នា។
នាយគ្រឿន ទម្លាយទៀតថាដំបូងឡើយលោកបានផ្សាយស្រាបៀរហើយមហាជនក៏បានរិះគន់លោកក៏ឈប់វិញទើបតែរយៈពេលចុងក្រោយនេះលោកក៏ទទួលផ្សាយវិញបន្ទាប់ពីឃើញតារាល្បីៗជាច្រើនរូបផ្សព្វផ្សាយយ៉ាងគគ្រឹងគគ្រេង។ តារាកំប្លែងមានដើមកំណើតពីខេត្តស្វាយរៀងរូបនេះលើកឡើងទៀតថា ការផ្សាយល្បែងអនឡាញនេះទៀតសោតលោកក៏ឃើញគេផ្សព្វផ្សាយដូចគ្នាហើយស្របច្បាប់នៃការផ្សាយទើបលោកទទួលផ្សាយ។
តារាកំប្លែងនាយគ្រឿន បានទម្លាយមូលហេតុបោះបង់ចំណូលរាប់ម៉ឺនដុល្លារនេះថា ក្នុងចំណោមពាក្យរិះគន់រាប់រយពោរពេញដោយពាក្យសម្តីមិនល្អជេរប្រមាថដាក់លោកដោយទាំងម្តាយលោកទៀតតែលោកបានឃើញខម្មិនមួយ និយាយថាស្រលាញ់លោក ជាហ្វេនរបស់លោកមិនចង់ឃើញលោកផ្សាយល្បែងទើបលោកសម្រេចចិត្តឈប់តែម្តងដើម្បីឱ្យអ្នកគាំទ្រសប្បាយចិត្តទៅតាមបណ្តាំរបស់ម្តាយដែលចង់ឃើញកូនទទួលបានការស្រលាញ់ពីមនុស្សជុំវិញខ្លួន។
ពាក្យសម្តីចុងក្រោយនាយគ្រឿនក៏បានលើកឡើងដែរថា លោកផ្សាយល្បែងនេះគឺបានលុយហើយមិនបានលេងនោះទេ ប៉ុន្តែប្រយ័ត្នទស្សនិកជនបញ្ជាខ្លួនឯងមិនបាន បងប្អូនខ្លះប្រមាថលោកតែប្រយ័ត្នឃាត់ខួរក្បាលខ្លួនឯងមិនបានទៅលេងល្បែងប្រយ័ត្នវិនាសខ្លួនឯងព្រោះមានអ្នកផ្សេងទៀតក្រៅពីលោកក៏គេផ្សាយគ្រប់ច្រកល្ហកដដែល៕
