ប្រទេសកូរ៉េខាងត្បូង ៖ កាលពីថ្ងៃទី២៩ ខែកុម្ភៈ ឆ្នាំ២០២៤ លោក Mark Zuckerberg ជា CEO របស់ក្រុមហ៊ុន Meta ដែលជាម្ចាស់ Facebook និង Instagram បានចូលជួបប្រធានាធិបតីកូរ៉េខាងត្បូង លោក Yoon Suk Yeol នៅទីក្រុងសេអ៊ូល ប្រទេសកូរ៉េខាងត្បូង ដើម្បីពិភាក្សាអំពីការពង្រីកកិច្ចសហការផ្នែកបច្ចេកវិទ្យា AI និង Extended Reality (XR) ។

មន្ត្រីវិមានប្រធានាធិបតីកូរ៉េខាងត្បូងលើកឡើងថា លោកប្រធានាធិបតី Yoon Suk Yeol បានថ្លែងទៅកាន់លោក Mark Zuckerberg ថា ប្រទេសកូរ៉េខាងត្បូងមានឈ្មោះបោះសំឡេងផ្នែកផលិតសម្ភារៈប្រើប្រាស់ក្នុងលំនៅឋាន, ឧបករណ៍អេឡិចត្រូនិក និងរថយន្ត ។ ហេតុនេះ វានឹងក្លាយជាលក្ខខណ្ឌដ៏ល្អសម្រាប់បច្ចេកវិទ្យារបស់ក្រុមហ៊ុន Meta ។

មេដឹកនាំកូរ៉េខាងត្បូងក៏បានសន្យាដែរថា ប្រទេសកូរ៉េខាងត្បូងនឹងគាំទ្រកិច្ចព្រមព្រៀងរវាងក្រុមហ៊ុនអាជីវកម្មផងដែរ ហើយមេដឹកនាំកូរ៉េខាងត្បូងសង្ឃឹមថា នឹងមានកិច្ចសហការគ្នាបន្ថែមទៀតក្នុងផ្នែកផ្សេងៗ ដូចជា ៖ Metaverse និង XR Headsets ។

ក្រៅពីនេះ មេដឹកនាំកូរ៉េខាងត្បូង ក៏បានស្នើឱ្យក្រុមហ៊ុន Meta មានតួនាទីបន្ថែមទៀតក្នុងការតាមដាន និងប្រឆាំងជាមួយព័ត៌មានក្លែងក្លាយ ឬ Fake News ព្រមទាំងការប្រព្រឹត្តទង្វើមិនល្អផ្សេងៗនៅលើកម្មវិធីរបស់ក្រុមហ៊ុន Meta ខណៈប្រទេសជាច្រើននឹងរៀបចំការបោះឆ្នោតនៅឆ្នាំ២០២៤ ។

ក្នុងការធ្វើដំណើរទៅប្រទេសកូរ៉េខាងត្បូង រយៈពេល៣ថ្ងៃ លោក Mark Zuckerberg បានជួបជាមួយនាយកគ្រប់គ្រងក្រុមហ៊ុន Samsung LG Electronics និងអ្នកជំនាញផ្នែកបច្ចេកវិទ្យាផ្សេងៗ ដើម្បីពិភាក្សាអំពីកិច្ចសហការផ្នែកឧស្សាហកម្មទំនើប ។

មុននេះ លោក Mark Zuckerberg ទើបតែបានធ្វើដំណើរទៅកាន់ទីក្រុងតូក្យូ ប្រទេសជប៉ុន និងពិភាក្សាជាមួយនាយករដ្ឋមន្ត្រីជប៉ុន លោក Fumio Kishida អំពីប្រធានបទពាក់ព័ន្ធនឹងបច្ចេកវិទ្យា AI និងបច្ចេកវិទ្យានាថ្ងៃអនាគត ។ រីឯរដ្ឋាភិបាល និងក្រុមហ៊ុនបច្ចេកវិទ្យានាំមុខនៅប្រទេសជប៉ុន បានសម្របខ្លួនស្របតាមការអភិវឌ្ឍរបស់បច្ចេកវិទ្យា AI ៕

បរទេស៖ ចង្កោមអគារ Lusail Tower កម្ពស់ជាង ៣០០ ម៉ែត្រ ប្រើកញ្ចក់ការពារកំដៅថ្ងៃអាលុយមីញ៉ូម ដែលមានសមត្ថភាពជួយកាត់បន្ថយកាំរស្មីព្រះអាទិត្យបានរហូតទៅដល់ ៧០% បើប្រៀបធៀបទៅនឹងអាគារផ្សេងៗដែលប្រើប្រាស់កញ្ចក់ធម្មតា។
យោងតាម CNN ដែលបានចុះផ្សាយនៅថ្ងៃទី២៩ ខែកុម្ភៈ ឆ្នាំ២០២៤ ថា អគារ Lusail Tower ជិតបញ្ចប់ការសាងសង់ហើយជាមួយនឹងកម្ពស់ ៣០១ ម៉ែត្រ ដែលជាអាគារខ្ពស់បំផុតនៅក្នុងប្រទេសកាតា។ អគារអគារនេះបានចាប់ផ្តើមការសាងសង់នៅខែមករា ឆ្នាំ ២០២០ ដោយរំពឹងថានឹងបញ្ចប់ជាដំណាក់កាលក្នុងរយៈពេល ១២ ខែខាងមុខ។

គម្រោងនេះមានទីតាំងនៅទីក្រុង Lusail ជាផ្នែកមួយនៃគម្រោងដែលមានផ្ទៃដីសរុប ១.១ លានម៉ែត្រការ៉េ ដោយចង្កោមប៉មមាន ៤ ប្លុកដាច់ដោយឡែក ដែលពីរប្លុកមានកម្ពស់ ៧០ ជាន់ និងប្លុកពីរទៀតមានកម្ពស់ ៥០ ជាន់។ ប៉មនីមួយៗត្រូវបានគេរំពឹងថានឹងដំណើរការជាមជ្ឈមណ្ឌលសម្រាប់ស្ថាប័នហិរញ្ញវត្ថុរបស់ប្រទេសកាតា។ ទោះជាយ៉ាងណាក៏ដោយ ដើម្បីដោះស្រាយបញ្ហាដែលបង្កឡើងដោយអាកាសធាតុក្តៅនៅក្នុងប្រទេសនេះ ក្រុមការងាររបស់ក្រុមហ៊ុនស្ថាបត្យកម្មអង់គ្លេស Foster + Partners បានលុបបំបាត់សម្ភារៈមួយចំនួនដែលប្រើជាទូទៅសម្រាប់អគារខ្ពស់ៗនៅក្នុងប្រទេសដែលមានអាកាសធាតុត្រជាក់។

ក៏ដូចជាការរចនានៃចង្កោមអគារ Lusail រួមបញ្ចូលនូវប្រព័ន្ធការពារកម្តៅថ្ងៃ និងប្រព័ន្ធខ្យល់ចេញចូលដ៏ទំនើប ខណៈពេលដែលផ្នែកខាងក្រៅនៃចង្កោមប៉មត្រូវបានហ៊ុព័ទ្ធដោយអាលុយមីញ៉ូម “ស្តង់ដារសមុទ្រ” ការពារកញ្ចក់ពីពន្លឺថ្ងៃដ៏អាក្រក់ ដែលនៅតែរក្សាទិដ្ឋភាពបែរមុខទៅខាងក្រៅ និងទទួលបានពន្លឺធម្មជាតិ។ ដូច្នេះ សម្រាប់ចំណុចពិសេស និងភាពអស្ចារ្យរបស់ចង្កោមអាគារនេះ គឺកញ្ចក់ការពារកំដៅថ្ងៃអាលុយមីញ៉ូម មានសមត្ថភាពជួយកាត់បន្ថយកាំរស្មីព្រះអាទិត្យបានរហូតទៅដល់ ៧០% ឯណោះ។

Foster បាននិយាយថា “អ្វីដែលយើងធ្វើគឺបង្កើតការយល់ដឹងដោយផ្អែកលើតម្រូវការពិតប្រាកដ ដែលវាមិនមែនជាការដាក់ម៉ូដទេ ប៉ុន្តែបានមកពីការពិតនៃអាកាសធាតុ”។ លោក Luke Fox ប្រធានគម្រោង និងជាដៃគូប្រតិបត្តិជាន់ខ្ពស់នៅ Foster + Partners បាននិយាយថា ប្រព័ន្ធដាក់ស្រមោលបានរួមចំណែកដល់ការកាត់បន្ថយ ៣៥% នៃតម្រូវការត្រជាក់ និងការប្រើប្រាស់ថាមពលទាំងមូល ហើយប៉មត្រូវបានដាក់ជាយុទ្ធសាស្ត្រដើម្បីបង្កើតម្លប់ជាអតិបរមា៕

នៅលើពិភពលោកយើងនេះគឺមានប្រទេសជាង ២០០ ក្នុងចំណោមនោះក៏មានប្រទេសខ្លះតូចខ្លះធំ ខ្លះជាប្រទេសអភិវឌ្ឍនិងកំពុងអភិវឌ្ឍ ដែលទាំងនេះនឹងជិះឥទ្ធិពលដល់មនុស្ស ជាពិសេសគឺទាក់ទងនឹងសុខមាលភាពសង្គម ទាំងការរស់នៅ របរចិញ្ចឹមជីវិត ចំណូលចំណាយ និងសេវាសាធារណៈផ្សេងៗ។ ទោះជាយ៉ាងណា ប្រាក់ឈ្នួលសមរម្យគឺជាកត្តាចម្បងមួយដើម្បីទទួលបានការរស់នៅមួយប្រកបដោយស្តង់ដារខ្ពស់។

យោងតាមទិន្នន័យចុងក្រោយបង្អស់ដែលបានចងក្រងដោយធនាគារពិភពលោក គឺបានបង្ហាញប្រទេសចំនួន១០ ដែលប្រជាពលរដ្ឋទទួលបានប្រាក់បៀវត្សឬប្រាក់ខែជាមធ្យមខ្ពស់បំផុតដូចខាងក្រោម(ដែលរាប់ចាប់ពីចំណាត់ថ្នាក់ពីធំទៅតូច)៖

១០ ប្រទេសអៀរឡង់៖ ប្រាក់ខែជាមធ្យមប្រចាំឆ្នាំ ៤១,៤៦៧ ដុល្លារ និងប្រមាណ ៣,៤៥៥ ដុល្លារជាមធ្យមក្នុងមួយខែសម្រាប់មនុស្សម្នាក់។ អៀរឡង់គឺស្ថិតនៅក្នុងចំណោមប្រទេសដែលមានថ្ងៃបុណ្យឈប់សម្រាកតិចតួចបំផុត។ ការងារអាទិភាពដែលរកប្រាក់ចំណូលបានកាន់ខ្ពស់នៅក្នុងប្រទេសនេះគឺ Software development managers (អ្នកគ្រប់គ្រងផ្នែកអភិវឌ្ឍន៍កម្មវិធី), Sales director (នាយកផ្នែកលក់), និង Operatសional managers (អ្នកគ្រប់គ្រងប្រតិបត្តិការ)។

៩ ប្រទេសសិង្ហបុរី៖ ជាប្រទេសអាស៊ីតែមួយគត់ជាប់ចំណាត់ថ្នាក់ទី៩ ដែលប្រាក់ខែជាមធ្យមប្រចាំឆ្នាំ ៤២,០៤៩ ដុល្លារអាមេរិក។ ប្រាក់ឈ្នួលប្រចាំខែជាមធ្យមរបស់សិង្ហបុរីសម្រាប់បុគ្គលិកពេញម៉ោងមានចំនួន ៥,៨៤៧ដុល្លារសិង្ហបុរី (៤,៤៤៥ដុល្លារ) ។ បើទោះបីប្រទេសនេះមានអត្រាតម្លៃនៃការរស់នៅខ្ពស់ក៏ដោយ ក៏អត្រាអ្នកអត់ការងារធ្វើស្ថិតក្នុងតួលេខទាបបំផុតក្នុងប្រទេសត្រឹមតែ២.១%ប៉ុណ្ណោះ ថែមទាំងជាគោលដៅដ៏ពេញនិយមក្នុងចំណោមអ្នកជំនាញផ្នែកបច្ចេកវិទ្យា ហិរញ្ញវត្ថុ វិស្វកម្ម និងវេជ្ជសាស្ត្រ។ ជាពិសេស គ្រូពេទ្យផ្នែកវះកាត់នឹងទទួលបានប្រាក់បៀវត្សរ៍ខ្ពស់បំផុតនៅក្នុងប្រទេសសិង្ហបុរី ដែលជាមធ្យមទទួលបាន ១១២,៥០៥ ដុល្លារអាមេរិកក្នុងមួយឆ្នាំ។

៨ ប្រទេសហូឡង់៖ ប្រាក់ខែប្រចាំឆ្នាំជាមធ្យម ៤២,២៩៦ ដុល្លារ និងប្រមាណ ៣,៥២៤ ដុល្លារជាមធ្យមក្នុងមួយខែសម្រាប់មនុស្សម្នាក់។ ហូឡង់ត្រូវបានគេស្គាល់ថាជាប្រទេសមួយក្នុងចំណោមប្រទេសមានទីផ្សារការងារល្អ និងអត្រាគ្មានការងារធ្វើទាប។ យោងទៅតាម EURES នៅចុងឆ្នាំ ២០២១ ប្រទេសនេះគឺមានតម្រូវការខ្លាំងសម្រាប់ការងារក្នុងប្រព័ន្ធអប់រំ , eCommerce ,និងអ្នកជំនាញថែទាំសុខភាព។

៧ ប្រទេសស៊ុយអែត៖ ប្រាក់ខែប្រចាំឆ្នាំជាមធ្យម ៤៤,៥៥២ ដុល្លារក្នុងម្នាក់។ ប្រាក់ខែជាមធ្យមប្រចាំខែសម្រាប់អ្នកធ្វើការក្នុងវិស័យឯកជនប្រទេសនេះគឺ ៣,៧១៩ដុល្លារ និង៣,៥២៣ដុល្លារ សម្រាប់អ្នកធ្វើការក្នុងស្ថាប័នរដ្ឋ។ ការងារដែលរកកម្រៃបានល្អបំផុតក្នុងប្រទេសស៊ុយអែត រួមមានមេធាវី អ្នកបើកយន្តហោះ និងគ្រូពេទ្យវះកាត់ជាដើម។

៦ ប្រទេសអ៊ីស្លង់៖ ប្រាក់ខែប្រចាំឆ្នាំជាមធ្យម ៤៨,០៤៧ដុល្លារ និងប្រមាណ ៤,០០០ ដុល្លារជាមធ្យមប្រចាំខែក្នុងម្នាក់។ អ៊ីស្លង់គឺជាកន្លែងដ៏ល្អមួយសម្រាប់អ្នកចង់ផ្លាស់ទីលំនៅ អមជាមួយនឹងលក្ខខណ្ឌនៃប្រាក់បៀវត្សខ្ពស់ ថែមទាំងមានអត្រាឧក្រិដ្ឋកម្មទាប។ កាលពីឆ្នាំ២០២២ វាក៏បានជាប់ជាប្រទេសដែលមានសុវត្ថិភាពបំផុតនៅក្នុងពិភពលោកផងដែរ។

៥ ប្រទេសដាណឺម៉ាក៖ ប្រាក់ខែប្រចាំឆ្នាំជាមធ្យម ៥២,៦៦៦ដុល្លារ។ ប្រាក់ខែជាមធ្យមប្រចាំខែសម្រាប់ម្នាក់ប្រមាណនឹង ៤,៤០០ដុល្លារ។ រីឯទីផ្សារការងារដែលមានអាទិភាពបំផុតក្នុងប្រទេសនេះគឺមានតម្រូវការខ្ពស់សម្រាប់កម្មករក្នុងវិស័យពាណិជ្ជកម្ម, វិទ្យាសាស្ត្រ, អាហារនិងភេសជ្ជៈ, ផ្នែកច្បាប់ ,និងវិស័យសំណង់។

៤ សហរដ្ឋអាមេរិក៖ ប្រាក់ខែប្រចាំឆ្នាំជាមធ្យមប្រមាណ ៥៣,៣២៩ដុល្លារ និង៤,៤០០ដុល្លារជាមធ្យមប្រចាំខែសម្រាប់មនុស្សម្នាក់។ មនុស្សទូទាំងពិភពលោកភាគច្រើនតែងមានក្តីស្រមៃចង់ផ្លាស់ទៅរស់នៅសហរដ្ឋអាមេរិកដើម្បីអាជីពការងារនិងសេវាថែទាំដ៏ប្រសើរ។ ជាមួយគ្នានេះក្រុមហ៊ុនកំពូលៗរបស់ពិភពលោកជាច្រើនកំពុងមានទីស្នាក់ការនៅអាមេរិក រួមទាំង Google និង Amazon ព្រមទាំងមានតម្រូវការអ្នកស្វែងរកការងារជាបន្តបន្ទាប់ ជាពិសេសនៅក្នុងផ្នែកបច្ចេកវិទ្យា ការថែទាំសុខភាព និងហិរញ្ញវត្ថុ។ ទន្ទឹមនឹងនោះ ការិយាល័យស្ថិតិការងាររបស់សហរដ្ឋអាមេរិក ព្យាករថាសេដ្ឋកិច្ចអាមេរិកនឹងបន្ថែមការងារចំនួន ៨,៣ លាននៅឆ្នាំ ២០៣១។

៣ ប្រទេសន័រវេស៖ ប្រាក់ខែប្រចាំឆ្នាំជាមធ្យម ៥៣,៥១៤ ដុល្លារ។ យោងតាមរបាយការណ៍អភិវឌ្ឍន៍មនុស្សរបស់អង្គការសហប្រជាជាតិ ន័រវេសគឺជាប្រទេសដ៏ល្អបំផុតមួយក្នុងការរស់នៅ ហើយកាន់តែពិសេសប្រទេសនេះក៏ផ្តល់នូវកម្មវិធីទិដ្ឋាការការងារពីចម្ងាយផងដែរ។

២ ប្រទេសស្វីស៖ ប្រាក់ខែប្រចាំឆ្នាំជាមធ្យម ៦៣,៧៨២ ដុល្លារ និងប្រមាណ ៥,៣១៥ ដុល្លារជាមធ្យមប្រចាំខែ។ ប្រទេសនេះត្រូវបានគេស្គាល់ដោយសារទេសភាពភ្នំអាល់ផែន សូកូឡាឆ្ងាញ់ ឈីស និងនាឡិកាប្រណីត។ ស្វីសក៏ល្បីល្បាញដោយសារប្រាក់ខែខ្ពស់ ប៉ុន្តែតម្លៃនៃការរស់នៅក៏ខ្ពស់ផងដែរ។ ការចំណាយប្រចាំខែរបស់មនុស្សម្នាក់ជាមធ្យមគឺ ១,៥៦០ដុល្លារ ខណៈអាផាតមិនមួយបន្ទប់ក្រៅក្រុងមានតម្លៃរហូតដល់ ១,៣៥០ដុល្លារក្នុងមួយខែ។

១ ប្រទេសលុចសំបួរ៖ ប្រាក់ខែប្រចាំឆ្នាំជាមធ្យម ៦៧,៩៦៧ ដុល្លារ។ លុចសំបួគឺជាប្រទេសតូចមួយ ប៉ុន្តែគឺមានប្រាក់ចំណូលខ្ពស់បំផុតសម្រាប់មនុស្សម្នាក់ៗ ជាពិសេសគឺ គ្រូពេទ្យ , ទន្តពេទ្យ, អ្នកវិទ្យាសាស្ត្រទិន្នន័យ (Data scientist) , និងនាយកប្រតិបត្តិកម្រិត C ជាដើម។ ជាមធ្យម មនុស្សដែលធ្វើការនៅប្រទេសលុចសំបួរគឺរកចំណូលបានចន្លោះពី ២,៧៩៧ ដល់ ៨,៨២៨ ដុល្លារក្នុងមួយខែ។ ទន្ទឹមនឹងនោះ ទីក្រុងរបស់ប្រទេសនេះ ជាប់ចំណាត់ថ្នាក់ជាទីក្រុងដែលគួរចង់ឱ្យរស់នៅបំផុតក្នុងពិភពលោក ដោយសារកម្រិតជីវភាពរស់នៅខ្ពស់ផងដែរ៕

សហរដ្ឋអាមេរិក ៖ ក្រុមហ៊ុនអាមេរិកឈ្មោះ DartSolar ប្រកាសថា ក្រុមហ៊ុនបានសាកល្បងគម្រោងបំពាក់ផ្ទាំងសូឡាស្រូបពន្លឺព្រះអាទិត្យនៅលើដំបូលរថយន្តអគ្គិសនី ដើម្បីឱ្យវាសាកថ្មរថយន្តដោយស្វ័យប្រវត្តិ ហើយជំហានដំបូង ក្រុមហ៊ុនបានសាកល្បងជាមួយរថយន្តអគ្គិសនី Tesla Model Y ។ ក្រុមហ៊ុនបានប្រើប្រាស់ផ្ទាំងសូឡាទំហំធំ ចំនួន៩ផ្ទាំង ដាក់នៅលើដំបូលរថយន្ត ក្នុងនោះផ្ទាំងសូឡា១ផ្ទាំង នឹងមានសមត្ថភាពផលិតអគ្គិសនី ស្មើនឹង១៧៥វ៉ាត់ ។

ផ្ទាំងសូឡាស្រូបពន្លឺព្រះអាទិត្យនេះ អាចផលិតថាមពលអគ្គិសនីបាន៦គីឡូវ៉ាត់ម៉ោងក្នុង១ថ្ងៃ ប្រសិនបើប្រៀបធៀបជាមួយការបើកបរក្នុងចម្ងាយផ្លូវប្រមាណ៣២គីឡូម៉ែត្រ ខណៈវាស្រូបពន្លឺព្រះអាទិត្យរយៈពេល៥ម៉ោង ។ ផ្ទាំងសូឡាដែលក្រុមហ៊ុនបង្ហាញនេះ គឺជាប្រភេទ Beta 1 ឬជាបន្ទះសូឡាដំបូងគេបង្អស់ ដែលមានទម្ងន់តិចជាង៧៥គីឡូក្រាម ។

ក្រុមហ៊ុនបញ្ជាក់ថា ផ្ទាំងសូឡានេះ គឺមានទម្ងន់ស្រាលសមល្មមសម្រាប់ដាក់នៅលើដំបូលរថយន្ត ។ លើសពីនេះ គេអាចបត់ ឬពង្រីកផ្ទាំងសូឡាបន្ថែមទៀត ដើម្បីឱ្យសមនឹងកន្លែងចតរថយន្តទូទៅផងដែរ ។ ផ្ទាំងសូឡា១ ក្រុមហ៊ុននឹងលក់ក្នុងតម្លៃ៤.០០០ដុល្លារអាមេរិក ។ ផ្នែក DartSolar បញ្ជាក់ថា ការច្នៃប្រឌិតនេះនឹងជួយឱ្យម្ចាស់រថយន្តអគ្គិសនីអាចសន្សំសំចៃប្រាក់ប្រមាណ០.៩៧ដុល្លារអាមេរិកកក្នុង១ថ្ងៃ ។

Tesla គឺជារថយន្តអគ្គិសនីដ៏ពេញនិយមសម្រាប់ការសាកល្បងផ្ទាំងសូឡា ប៉ុន្តែលោក Elon Musk និយាយថា លោកនៅមិនទាន់ប្រាកដចិត្តអំពីការប្រើប្រាស់ពន្លឺព្រះអាទិត្យជាមួយរថយន្តអគ្គិសនីទេ ដោយសារទីធ្លានៅលើដំបូលរថយន្តមានកំណត់ ។ ម្យ៉ាងទៀត ផ្ទាំងសូឡាបានផ្តល់នូវថាមពលតិចពេក បើគេយកវាមកប្រើប្រាស់ជាក់ស្តែង ។

នៅថ្ងៃអនាគត យើងជឿថា ផ្ទាំងសូឡាប្រើប្រាស់ជាមួយរថយន្តអគ្គិសនីនឹងលេចរូបរាងយ៉ាងពិតប្រាកដ ដើម្បីដោះស្រាយបញ្ហាស្ថានីយសាកថ្មរថយន្តអគ្គិសនីមិនគ្រប់គ្រាន់ និងការចំណាយពេលយូរក្នុងការសាកថ្មរថយន្ត ។ លើសពីនេះ គេនឹងអាចកាត់បន្ថយតម្លៃអគ្គិសនីទៀតផង ៕

បរទេស៖ ទីក្រុងម៉ិកស៊ិកដែលមានប្រជាជនប្រមាណ ២២ លាននាក់គឺជាទីក្រុងមួយក្នុងចំនោមទីក្រុងដែលមានប្រជាជនច្រើនជាងគេនៅលើពិភពលោក កំពុងប្រឈមនឹងវិបត្តិខ្វះទឹកយ៉ាងធ្ងន់ធ្ងរ នេះបើយោងតាម CNN ដែលបានរាយការណ៍កាលពីថ្ងៃទី២៩ ខែកុម្ភៈ ឆ្នាំ២០២៤។

Alejandro Gomez ដែលរស់នៅក្នុងស្រុក Tlalpan នៃទីក្រុងម៉ិកស៊ិក បាននិយាយថា នាងគ្មានទឹកប្រើប្រាស់អស់រយៈពេលជាង ៣ ខែមកហើយ។ នាងបានបន្តទៀតថា ជាទូទៅនាងប្រមូលទឹកបានតែមួយ ឬពីរធុងប៉ុណ្ណោះ ដោយរង់ចាំប្រហែល ២-៣ ម៉ោងទើបបាន ហើយបន្ទាប់មកក៏មិនមានទឹកប្រើជាច្រើនថ្ងៃទៀត។ Alejandro Gomez បានបន្ថែមថា នាងមិនមានធុងស្តុកទឹកធំនោះទេដូច្នេះមិនអាចទទួលបានទឹកច្រើនដូចគេនោះទេ ហើយរាល់ពេលងូតទឹក នាងតែងប្រមូលទឹកងូតមកលាងបង្គន់។

បញ្ហាកង្វះទឹកមិនមែនជារឿងចម្លែកនៅក្នុងសង្កាត់នេះទេ ប៉ុន្តែលើកនេះគឺខុសគ្នា។ Gomez បានសម្តែងថា “ឥឡូវនេះ អាកាសធាតុកាន់តែក្តៅ អ្វីៗអាចកាន់តែធ្ងន់ធ្ងរ កាន់តែស្មុគស្មាញ” ហេតុនេះ “យើងត្រូវការទឹក ទឹកគឺមានសារៈសំខាន់សម្រាប់អ្វីៗគ្រប់យ៉ាង”។ ទីក្រុងម៉ិកស៊ិក ដែលជាទីក្រុងធំមួយមានប្រជាជនជិត ២២ លាននាក់ កំពុងប្រឈមមុខនឹងវិបត្តិខ្វះទឹកធ្ងន់ធ្ងរ ដែលផ្តើមចេញពីបញ្ហាជាបន្តបន្ទាប់ដូចជាភូមិសាស្ត្រ ការអភិវឌ្ឍន៍ទីក្រុងដែលមិនបានគ្រោងទុក ហេដ្ឋារចនាសម្ព័ន្ធខ្សោយ ក៏ដូចជាផលប៉ះពាល់នៃការប្រែប្រួលអាកាសធាតុ។ ឆ្នាំដែលមានភ្លៀងធ្លាក់តិចខុសពីធម្មតា រដូវប្រាំងយូរ និងអាកាសធាតុក្តៅ បានដាក់សម្ពាធបន្ថែមលើប្រព័ន្ធទឹកដែលកំពុងតស៊ូដើម្បីបំពេញតម្រូវការដែលកំពុងកើនឡើង។

ទោះជាយ៉ាងណាក៏ដោយ បច្ចុប្បន្នរដ្ឋាភិបាលកំពុងព្យាយាមបំបាត់ការថប់បារម្ភជាសាធារណៈអំពីវិបត្តិនេះ ប៉ុន្តែអ្នកជំនាញបាននិយាយថា ស្ថានភាពនេះគឺធ្ងន់ធ្ងរ ហើយទីក្រុងម៉ិកស៊ិកអាចនឹងអស់ទឹកនៅតំបន់ខ្លះក្នុងប៉ុន្មានខែខាងមុខនេះ។ លោក Christian Domínguez Sarmiento អ្នកវិទ្យាសាស្ត្របរិយាកាសនៅសកលវិទ្យាល័យជាតិស្វយ័តម៉ិកស៊ិក (UNAM) បាននិយាយថា ប្រហែល ៦០% នៃការផ្គត់ផ្គង់ទឹករបស់ទីក្រុងម៉ិកស៊ិកបានមកពីអាងស្តុកទឹក ប៉ុន្តែការប្រើប្រាស់លើសចំណុះនៃប្រភពទឹកនេះបានពន្លឿនការដួលរលំនៃទីក្រុងទៅជាអត្រាដ៏លឿនគួរឱ្យភ័យខ្លាច ដែលមានច្រើនជាង ៥០សង់ទីម៉ែត្រក្នុងមួយឆ្នាំ។

បាតុភូតអាកាសធាតុបានប៉ះពាល់យ៉ាងធ្ងន់ធ្ងរដល់ម៉ិកស៊ិក វិបត្តិនេះបានបង្កឱ្យមានការជជែកវែកញែកយ៉ាងខ្លាំងក្លាអំពីថាតើទីក្រុងអាចនឹងអស់ទឹកដែរឬទេ ដោយសារប្រព័ន្ធទឹក Cutzamala ដ៏ធំរបស់ទីក្រុងធ្លាក់ដល់កម្រិតទឹកទាប រហូតមិនអាចផ្គត់ផ្គង់ទីក្រុងបាន។ ប៉ុន្តែបើយោងតាមសេចក្តីថ្លែងការណ៍របស់រដ្ឋាភិបាលម៉ិកស៊ិក កាលពីពេលថ្មីៗនេះ បានឱ្យដឹងថា ខ្លួនកំពុងអនុវត្តគម្រោងរយៈពេល ៣ ឆ្នាំ ដើម្បីដំឡើង អភិវឌ្ឍ និងកែលម្អហេដ្ឋារចនាសម្ព័ន្ធទឹក ដើម្បីជួយទីក្រុងទប់ទល់នឹងការខ្សោះជីវជាតិនៃប្រព័ន្ធ Cutzamala រួមទាំងការបំពេញបន្ថែមអណ្តូងថ្មី និងដំណើរការរោងចក្រប្រព្រឹត្តកម្មទឹកផងដែរ៕