French Fries គឺជាអាហារដ៏ពេញនិយមសម្រាប់មនុស្សភាគច្រើននៅលើពិភពលោក ជាពិសេស ក្មេងៗ គឺពួកគេចូលចិត្តញ៉ាំ French Fries យ៉ាងខ្លាំង ។ វាជាប្រភេទអាហារសម្រន់ ដែលគេតែងតែបរិភោគជាមួយទឹកជ្រលក់ប៉េងប៉ោះ ឬទឹកជ្រលក់ Mayonnaise ។
ប្រសិនបើឱ្យទាយថា តើ French Fries មានដើមកំណើតមកពីប្រទេសណា? មនុស្សភាគច្រើននឹងទាញថា វាមានដើមកំណើតមកពីប្រទេសបារាំង ពីព្រោះពួកគេបានមើលតាមឈ្មោះរបស់វា ប៉ុន្តែវាគឺជាចម្លើយខុស ។ ការពិត French Fries មានដើមកំណើតមកពីប្រទេសបែលហ្ស៊ិក វាមិនមែនមានដើមកំណើតមកពីប្រទេសបារាំង ដូចមនុស្សគ្រប់គ្នាគិតនោះទេ ។
បើយើងក្រឡេកមើលនៅចុងឆ្នាំ១៦០០ ឃើញថា ពលរដ្ឋមានជីវភាពក្រីក្ររស់នៅតំបន់ Meuse Valley ក្នុងប្រទេសបែលហ្ស៊ិក ពួកគេនិយមបរិភោគត្រីចៀនតូចៗ ដែលអាចរកបានក្នុងទឹកទន្លេ ។ ប៉ុន្តែនៅពេលរដូវរងាមកដល់ ទឹកទន្លេបានប្រែក្លាយទៅជាផ្ទាំងទឹកកក ហើយអ្នកភូមិមិនអាចចាប់ត្រីមកបរិភោគដូចមុនបានទៀតទេ ។
ហេតុនេះ អ្នកភូមិចាំបាច់ត្រូវស្វែងរកម្ហូបអាហារផ្សេងទៀតមកបរិភោគជំនួសវិញ ។ ពួកគេបាននាំគ្នាយកមើមដំឡូងបារាំងមកហាន់ជាដុំតូចៗ និងបំពងខ្លាញ់ឱ្យស្រួយ ហើយនាំគ្នាបរិភោគវាជំនួសត្រីចៀន ។
ក្រោយមក ក្នុងអំឡុងពេលសង្គ្រាមលោកលើកទី១ ទាហានអាមេរិកបានចូលមកប្រទេសបែលហ្ស៊ិក ហើយទាហានទាំងនេះបានភ្លក់ដំឡូងបារាំងបំពងនេះ ស្រាប់តែពួកគេចូលចិត្តនូវរសជាតិរបស់វាគ្រប់ៗគ្នា ។ ប៉ុន្តែដោយសារនៅសម័យនោះ ប្រទេសបែលហ្ស៊ិកប្រើប្រាស់ភាសាបារាំងធ្វើជាភាសាផ្លូវការ ទើបទាហានអាមេរិកដាក់ឈ្មោះដំឡូងបារាំងបំពង ថា «French Fries» ៕
