ប្រទេសថៃ៖ កាលពីពេលថ្មីៗនេះ ប្រទេសថៃបានដាក់ពង្រាយយន្តហោះចំនួន ៣០ គ្រឿងនៅទូទាំងប្រទេស ដើម្បីបង្កើតជាភ្លៀងសិប្បនិម្មិត ក្នុងគោលបំណងកាត់បន្ថយផលប៉ះពាល់នៃការប្រែប្រួលអាកាសធាតុលើវិស័យកសិកម្ម ទប់ស្កាត់ព្យុះភ្លៀង ភ្លើងឆេះព្រៃ និងកាត់បន្ថយការបំពុលបរិយាកាសដែលបណ្តាលមកពីធូលីដី ក៏ដូចជាដោះស្រាយបញ្ហាគ្រោះរាំងស្ងួតនៅក្នុងតំបន់កសិកម្មសំខាន់ៗ។

បើយោងតាម The Straits Times ដែលបានចុះផ្សាយនៅថ្ងៃទី១ ខែមីនា ឆ្នាំ២០២៤ ថា រដ្ឋាភិបាលថៃបានប្រកាសពីការអនុវត្តកម្មវិធីភ្លៀងសិប្បនិម្មិតប្រចាំឆ្នាំចាប់ពីថ្ងៃទី ២៩ ខែកុម្ភៈនេះតទៅ ដោយបង្កើតមជ្ឈមណ្ឌលចំនួន ៧ នៅទូទាំងខេត្តចំនួន ៧៧ របស់ប្រទេសសម្រាប់ប្រតិបត្តិការនៅក្នុងខែមីនា និងខែមេសា។ នៅក្នុងសេចក្តីថ្លែងការណ៍របស់រដ្ឋាភិបាលបាននិយាយថា ប្រតិបត្តិការនៅឆ្នាំ ២០២៤ នឹងពឹងផ្អែកលើយន្តហោះចំនួន ២៤ គ្រឿងរបស់នាយកដ្ឋាន និងយន្តហោះចំនួន ៦ គ្រឿងរបស់កងទ័ពអាកាសថៃ ដើម្បីចូលរួមក្នុងសកម្មភាពបណ្តុះពពក និងបង្កើតភ្លៀងសិប្បនិម្មិត។

រដ្ឋមន្ត្រីក្រសួងកសិកម្ម Thamanat Prompow បាននិយាយថា ការផលិតទឹកភ្លៀងគឺចាំបាច់ដើម្បីបន្ធូរបន្ថយផលប៉ះពាល់នៃការប្រែប្រួលអាកាសធាតុលើវិស័យកសិកម្មរបស់ប្រទេសថៃ និងទប់ស្កាត់ព្យុះភ្លៀង ឬភ្លើងឆេះព្រៃនៅក្នុងតំបន់មួយចំនួននៃប្រទេស។ លោកបានបន្ថែមថា ភ្លៀងសិប្បនិមិត្តក៏នឹងបន្ធូរបន្ថយបញ្ហាការបំពុលជាបន្តបន្ទាប់ដូចជាផ្សែងអ័ព្ទ និងកម្រិតមិនល្អនៃសារធាតុពុលដែលគេស្គាល់ថា PM2.5។ ប្រតិបត្តិការនេះក៏នឹងបំពេញការផ្គត់ផ្គង់ទឹកនៅក្នុងអាងស្តុកទឹក និងទំនប់នានាក្នុងប្រទេស ដើម្បីបង្កើនប្រព័ន្ធធារាសាស្ត្រកសិកម្ម។

នាយកដ្ឋានឧតុនិយមថៃបានព្រមានថា នៅរដូវក្តៅឆ្នាំនេះនឹងប្រឈមមុខនឹងរដូវក្តៅដ៏អាក្រក់បំផុត ជាមួយនឹងការព្យាករណ៍សីតុណ្ហភាពនឹងកើនឡើងដល់ ៤៤.៥ អង្សារសេនៅក្នុងតំបន់មួយចំនួននៃប្រទេស។ កាលពីឆ្នាំមុន តំបន់ជាច្រើនក្នុងប្រទេសថៃ បានកត់ត្រាកម្រិតកម្ដៅដែលមានអារម្មណ៍លើសពី ៥០ ℃ ដែលជំរុញឱ្យតម្រូវការអគ្គិសនីឡើងដល់កម្រិតខ្ពស់បំផុតមិនធ្លាប់មាន។

ទីក្រុងបាងកក ឈៀងម៉ៃ និងទីក្រុងថៃផ្សេងទៀតបានជួបបញ្ហាគុណភាពខ្យល់មិនល្អក្នុងរយៈពេលប៉ុន្មានឆ្នាំចុងក្រោយនេះ ដែលការបំពុលមាននិន្នាការកាន់តែអាក្រក់ទៅៗក្នុងរដូវប្រាំងដែលចាប់ផ្តើមនៅខែធ្នូ ភាគច្រើនដោយសារការឆេះកសិកម្ម ភ្លើងឆេះព្រៃនៅក្នុងប្រទេសជិតខាង និងការបំភាយយានយន្ត៕

ទំព័រហ្វេសប៊ុកថៃឈ្មោះ «មឿង ញិម» និយាយថា សារព័ត៌មានល្បីនៅកម្ពុជាបានចុះផ្សាយថា ភ្ញៀវទេសចរបរទេសនៅលើពិភពលោក បានធ្វើដំណើរមកលេងប្រទេសថៃជាបន្តបន្ទាប់ ហើយសារព័ត៌មានខ្មែរនេះសួរថា ហេតុអ្វីភ្ញៀវទេសចរបរទេសចូលចិត្តមកកម្សាន្តនៅប្រទេសថៃ? មិនថាភ្ញៀវទេសចរអឺរ៉ុប ឬភ្ញៀវទេសចរអាស៊ី តែងតែធ្វើដំណើរមកប្រទេសថៃ ហើយហេតុអ្វីតំបន់ទេសចរណ៍ថៃទទួលបានភ្ញៀវទេសចរជាច្រើនលើកច្រើនសារ ។

ទំព័រហ្វេសប៊ុកឈ្មោះ «មឿង ញិម» បន្តថា សារព័ត៌មានល្បីខាងលើនេះបានលើកឡើងពីគុណសម្បត្តិរបស់ប្រទេសថៃ ចំនួន៤ចំណុច គឺ ៖

១-ថៃមានធម្មជាតិស្រស់ស្អាត ៖ ភ្ញៀវទេសចរអឺរ៉ុបនឹកឃើញមុនគេ គឺតំបន់ឆ្នេរសមុទ្រ, តំបន់ភ្នំ, ទឹកជ្រោះ និងតំបន់ទេសចរណ៍ធម្មជាតិផ្សេងទៀត ដែលប្រទេសថៃព្យាយាមកែលម្អរហូតមក ព្រមទាំងការថែរក្សាបរិស្ថាន ទើបធ្វើឱ្យថៃអាចប្រមូលប្រាក់ចំណូលចូលប្រទេសពីភ្ញៀវទេសចរ ។

២-ម្ហូបអាហារ ៖ ប្រទេសថៃមានម្ហូបអាហារជាច្រើនមុខអាចទាក់ទាញភ្ញៀវទេសចរបរទេស បើទោះជាអាហារទាំងនេះលក់នៅតាមផ្លូវក្តី ប៉ុន្តែមានអនាម័យ និងវេចខ្ចប់យ៉ាងត្រឹមត្រូវ ។ ក្រៅពីនេះ ប្រទេសថៃមានផ្លែឈើជាច្រើនប្រភេទ ដែលពិបាករកទិញនៅប្រទេសមួយចំនួន ។ ភ្ញៀវទេសចរបរទេសប្រាប់ថា អាហារ និងផ្លែឈើនៅថៃមានតម្លៃសមរម្យ ហើយចំណុចសំខាន់ អាជីវករថៃបានសរសេរពីតម្លៃអាហារយ៉ាងច្បាស់លាស់ ។

៣-សេវាកម្ម ៖ នៅគ្រប់តំបន់ទេសចរណ៍ទូទាំងប្រទេសថៃ គឺជនជាតិថៃបានទទួលស្វាគមន៍ភ្ញៀវទេសចរយ៉ាងល្អ ដោយសារពួកគេបានសិក្សាតាំងពីក្មេង អំពីការថែទាំភ្ញៀវទេសចរ ។ ហេតុនេះ វាមិនប្លែកចិត្តទេ ដែលភ្ញៀវទេសចរចង់ត្រឡប់មករកសេវាកម្មនៅថៃម្តងទៀត ដោយសារតែស្នាមញញឹម និងសេវាកម្មទាំងនេះ ។

៤-ពន្លឺភ្លើងពណ៌ និងសំឡេង ៖ ជនជាតិថៃតែងតែផ្តល់ភាពសំខាន់លើចំណុចនេះ ជាពិសេស នៅទីកន្លែងផ្សេងៗដែលមានភ្លើងពណ៌ទាក់ទាញជនបរទេស ។ នេះជាអ្វីដែលធ្វើឱ្យជនបរទេសចូលចិត្តមកលេងប្រទេសថៃ ដើម្បីទទួលបាននូវបទពិសោធន៍ថ្មីៗ ។

ក្រោយពីសារព័ត៌មានខ្មែរចុះផ្សាយព័ត៌មាននេះរួចមក ធ្វើឱ្យពលរដ្ឋខ្មែរជាច្រើននាក់ចូលមកបញ្ចេញមតិ ក្នុងនោះពលរដ្ឋខ្មែរម្នាក់បានលើកឡើងពីកត្តាដែលធ្វើឱ្យប្រទេសថៃអាចទាក់ទាញភ្ញៀវទេសចរបានច្រើន គឺ ៖ «ថៃមានសេវាកម្មល្អ, មានសុវត្ថិភាព, ហេដ្ឋារចនាសម្ព័ន្ធល្អ, មានច្បាប់ល្អ និងគ្មានអំពើទុច្ចរិត» ។

ប៉ុន្តែជនជាតិថៃបានឆ្លើយតបនឹងការបញ្ចេញមតិនេះថា ៖ «ខ្ញុំមិនយល់ស្របនឹងការបញ្ចេញមតិចំណុចចុងក្រោយរបស់អ្នក ពីព្រោះប្រទេសថៃក៏មានអំពើទុច្ចរិតដែរ ប៉ុន្តែពលរដ្ឋថៃអាចស៊ើបអង្កេតបាន និងអាចដាក់ពាក្យបណ្តឹងទៅស្ថាប័នពាក់ព័ន្ធ ដើម្បីចាត់វិធានការលើមន្ត្រីរូបនោះ ហើយពលរដ្ឋថៃអាចផ្សព្វផ្សាយព័ត៌មាននេះបាន ។ បើអ្នកចង់ចាត់វិធានការលើអំពើទុច្ចរិត គឺពលរដ្ឋខ្មែរអាចស៊ើបអង្កេតអំពើទុច្ចរិតយ៉ាងមានសេរីភាព ហើយយើងជនជាតិថៃនឹងជួយ» ។

ជនជាតិថៃម្នាក់ទៀតឆ្លើយតបថា ៖ «ការពិត ជនជាតិថៃចង់បានច្បាប់តឹងរ៉ឹងជាងពេលបច្ចុប្បន្ន ហើយប្រទេសថៃមានអំពើទុច្ចរិតដូចប្រទេសផ្សេងទៀតនៅលើពិភពលោក តែពលរដ្ឋថៃមានសិទ្ធិត្រួតពិនិត្យថវិកាដែលអ្នកនយោបាយចំណាយ ។ ពលរដ្ឋថៃមានសិទ្ធិដឹងថា តើអ្នកនយោបាយបានចំណាយលើពន្ធអស់ប៉ុន្មាន ហើយពលរដ្ឋថៃមានសិទ្ធិជេរ និងធ្វើបាតុកម្មប្រឆាំងជាមួយអ្នកនយោបាយបាន ។ ចំណុចសំខាន់ ប្រទេសថៃត្រូវតែអភិវឌ្ឍន៍បន្តទៅមុខ ហើយបើខ្មែរឈប់គិតរឿងអតីតកាល និងអភិវឌ្ឍន៍បន្ត ខ្មែរនឹងអភិវឌ្ឍន៍ជឿនលឿនជាងនេះ» ។

រីឯពលរដ្ឋខ្មែរផ្សេងទៀតនិយាយថា ៖ «ប្រទេសថៃមានសុខសន្តិភាពពិតប្រាកដ ហើយរដ្ឋាភិបាលថៃមានភាពទទួលខុសត្រូវចំពោះសុវត្ថិភាពពលរដ្ឋ និងគ្មានអំពើទុច្ចរិត ។ ចំណុចទាំងអស់នេះ គឺជាសុវត្ថិភាពក្នុងការរស់នៅរបស់ពលរដ្ឋ» ។

ជនជាតិថៃផ្សេងទៀតថា ៖ «មុននេះ មានហេតុការណ៍អាក្រក់កើតឡើងនៅប្រទេសថៃជាច្រើនលើក តែមានភ្ញៀវទេសចរជាច្រើននាក់នៅតែមកលេងថៃ ។ ហេតុការណ៍អាក្រក់បានកើតឡើងនៅថៃ តើអ្នកគិតថា ភ្ញៀវទេសចរនឹងប្តូរចិត្តទៅលេងនៅកម្ពុជា មែនទេ?» ។

ជនជាតិថៃម្នាក់ទៀតថា ៖ «កម្ពុជាគួរតែយកចំណុចល្អៗមកអនុវត្តនៅប្រទេសរបស់ខ្លួន តែមិនមែនធ្វើតាមគេគ្រប់យ៉ាងនោះទេ ។ ដូច្នេះ កម្ពុជាត្រូវយល់ព្រមទទួលស្គាល់វប្បធម៌របស់ខ្លួនជាមុន» ។

ជនជាតិថៃម្នាក់ទៀតថា ៖ «កម្ពុជា គឺជាប្រទេសស្រស់ស្អាត ហើយកម្ពុជាមានកាស៊ីណូ ដែលប្រទេសថៃគ្មាន ។ កម្ពុជាមានសិល្បៈជារបស់ខ្លួន តែកម្ពុជាមិនកែលម្អវាឱ្យល្បីល្បាញ ហើយកម្ពុជាព្យាយាមធ្វើគ្រប់យ៉ាងឱ្យដូចថៃ ដោយយកភ្ញៀវទេសចរពីថៃទៅខ្លះ ។ ចាំទុកណា បើកម្ពុជាកាន់តែដូចថៃ គឺកាន់តែគ្មានភ្ញៀវទេសចរទៅលេងទេ ព្រោះវាមិនខុសអី្វពីការចម្លងគេ ។ ហេតុនេះ ភ្ញៀវទេសចរមកលេងថៃ មិនល្អជាងទេឬ ។ កម្ពុជាត្រូវធ្វើឱ្យខុសពីថៃ ទើបភ្ញៀវទេសចរចង់ទៅកម្ពុជា ដើម្បីរកអ្វីប្លែកៗ ។ នេះយើងដាស់តឿនក្នុងបំណងល្អ ប្រយ័ត្នហួសពេល ហើយគ្មានសល់អ្វី» ។

ជនជាតិថៃម្នាក់ទៀតថា ៖ «កម្ពុជាត្រូវអភិវឌ្ឍន៍ហេដ្ឋារចនាសម្ព័ន្ធមុនគេ បន្ទាប់មក គឺបុគ្គលិកការងារ, រថយន្តឈ្នួល និងភោជនីយដ្ឋានផ្សេងៗ គឺកម្ពុជាត្រូវកែលម្អជាបន្ទាន់ ។ ជាក់ស្តែង រថយន្តដឹកភ្ញៀវ គឺពួកគេបានហៅភ្ញៀវជិះ ហើយពេលភ្ញៀវអត់ជិះ ស្រាប់តែស្រែកជេរភ្ញៀវឥតឈប់ ។ មួយទៀត ចាត់ការបញ្ហាចោរឆក់កាបូប និងលួចទូរស័ព្ទដៃភ្ញៀវទេសចរ» ៕

បរទេស៖ បុរសជនជាតិវៀតណាម ២នាក់បានចំណាយពេល ៦ឆ្នាំក្នុងការជិះម៉ូតូផ្សងព្រេងចម្ងាយជាង ៦,០០០ គីឡូម៉ែត្រ ពីប្រទេសវៀតណាមទៅកាន់ប្រទេសសិង្ហបុរី ដោយឆ្លងកាត់ប្រទេសអាស៊ីអាគ្នេយ៍ចំនួន ៣។
ក្នុងឆ្នាំ ២០១៨ លោក Nguyen Tan Thuong អាយុ ៣៣ ឆ្នាំ និងលោក Chau Kiet Phuong អាយុ ៣០ ឆ្នាំ ដែលជាមិត្តភក្តិនឹងគ្នារស់នៅទីក្រុងហូជីមិញ បានបង្កើតគម្រោងជិះម៉ូតូផ្សងព្រេងជុំគ្នាដោយធ្វើដំណើរចម្ងាយជាង ៦,០០០ គីឡូម៉ែត្រពីប្រទេសវៀតណាមឆ្លងកាត់ប្រទេសកម្ពុជា ថៃ ម៉ាឡេស៊ី ទៅកាន់ប្រទេសសិង្ហបុរី។ ការធ្វើដំណើររបស់បុរសទាំងពីរនេះបានទាក់ទាញការចាប់អារម្មណ៍យ៉ាងខ្លាំងពីសហគមន៍អ្នកចូលចិត្តធ្វើដំណើរផ្សងព្រេង។

លោក Thuong និងលោក Phuong បាននិយាយថា នៅពេលដែលគាត់ចាកចេញពីផ្ទះ ក្នុងថ្ងៃដំបូងគាត់បានឆ្លងមកប្រទេសកម្ពុជាមុនគេ។ ល័ក្ខខ័ណ្ឌនៃការយកចូលជាមួយយានជំនិះគឺយានយន្តត្រូវតែមានប័ណ្ណបើកបរត្រឹមត្រូវ ពេលមកដល់ច្រកព្រំដែន អ្នកធ្វើដំណើរទាំងពីរនាក់បានធ្វើឯកសារធ្វើដំណើរដើម្បីធ្វើដំណើរស្របច្បាប់ក្នុងប្រទេសកម្ពុជា ដែលនេះក៏ជាឯកសារតម្រូវដើម្បីមានសិទ្ធិយកយានយន្តទៅប្រទេសថៃផងដែរ។ ដោយសារតែពួកគេធ្លាប់មកកម្ពុជាច្រើនដងពីមុនមក ពួកគេមិនបានផ្តល់អាទិភាពដល់ការទស្សនាទេ ប៉ុន្តែផ្តោតលើការបើកបរតាមបណ្តោយបឹងទន្លេសាប ទៅច្រកទ្វារព្រំដែនប៉ោយប៉ែតដើម្បីឆ្លងទៅប្រទេសថៃ។

បន្ទាប់មកនៅពេលដែលពួកគេមកដល់ប្រទេសថៃ លោក Thuong បាននិយាយថា ការមកប្រទេសថៃ ដោយចេញពីទីក្រុងបាងកកទៅកាន់ទីជនបទដ៏សុខសាន្តនៅភាគខាងត្បូង “ផ្តល់អារម្មណ៍ដល់ខ្ញុំដូចប្រទេសវៀតណាម”។ អាកាសធាតុក្តៅជាង ៣០ អង្សារសេ អាហារហឹរ ជូរ និងគុយទាវគ្រប់កន្លែង គឺជារបស់ដែលធ្លាប់ស្គាល់ទាំងអស់។ បន្ទាប់មកទៀតអ្នកទេសចរទាំងពីរនាក់ក៏បន្តដំណើររហូតមកដល់ច្រកព្រំដែន Sadao ខេត្ត Songkhla ហើយចូលទៅប្រទេសម៉ាឡេស៊ី។

លោក Phuong បាននិយាយថា ប្រទេសម៉ាឡេស៊ី មានប្រព័ន្ធផ្លូវល្បឿនលឿនប្រវែង ១០០០ គីឡូម៉ែត្រ តភ្ជាប់ព្រំដែនថៃ ជាប់នឹងព្រំដែនសិង្ហបុរី ជាមួយនឹងល្បឿនធ្វើដំណើរជាង ១០០ គីឡូម៉ែត្រ។ ពួកគេក៏បានបន្តទៀតថាការធ្វើដំណើរឆ្លងកាត់ប្រទេសអាស៊ីអាគ្នេយ៍ចំនួន ៣ គឺមានសុវត្ថិភាពណាស់ ដូច្នេះមិនមានឧបស័គ្គនោះទេ។ បន្ទាប់ពីឆ្លងកាត់ដោយម៉ូតូអស់រយៈពេលជាច្រើនឆ្នាំ ពួកគេក៏បានមកដល់ប្រទេសសិង្ហបុរីដូចបំណង ទោះជាយ៉ាងណា ដើម្បីយកយានជំនិះចូលប្រទេសសិង្ហបុរី ភ្ញៀវត្រូវឆ្លងកាត់ក្រុមហ៊ុនទេសចរណ៍ក្នុងប្រទេសនេះជាមុនសិន ដោយថ្លៃចូលគឺប្រហែល ៣០% ថ្លៃជាងប្រទេសថៃ និងម៉ាឡេស៊ី។

បន្ថែមពីលើឯកសារបញ្ជាក់អត្តសញ្ញាណ អ្នកទេសចរត្រូវការការយល់ព្រមពីអាជ្ញាធរដឹកជញ្ជូនផ្លូវគោកសិង្ហបុរី (LTA) និងប័ណ្ណឆ្លងកាត់ដោយស្វ័យប្រវត្តិ។ នៅពេលដែលពួកគេចូលប្រទេសសិង្ហបុរីដោយស្របច្បាប់ហើយ អ្នកទេសចរទាំងពីរបានចែករំលែកថា ការធ្វើដំណើរក្នុងប្រទេសថៃ ម៉ាឡេស៊ី និងសិង្ហបុរី យានជំនិះប្រើប្រាស់គន្លងឆ្វេងក្នុងល្បឿនលឿន ដូច្នេះវាមានគ្រោះថ្នាក់ណាស់សម្រាប់ភ្ញៀវទេសចរផ្សេងៗក្នុងការជិះម៉ូតូ។ គួរបញ្ជាក់ដែរថា សម្រាប់ការធ្វើដំណើររយៈពេលប៉ុន្មានឆ្នាំនេះ គឺពួកគេបានចំណាយអស់រាប់ម៉ឺនដុល្លារក្នុងម្នាក់ៗ សម្រាប់ថ្លៃសាំង ការរស់នៅឆ្លងប្រទេស ការធ្វើដំណើរកម្សាន្តនានា ការធ្វើឯកសារយានយន្ត និងការហូបចុកតិចតួចជាដើម៕

ប្រទេសឥណ្ឌា ៖ សារព័ត៌មានឥណ្ឌាបានរាយការណ៍ពីទីក្រុងញូវដេលី ប្រទេសឥណ្ឌា កាលពីថ្ងៃទី១ ខែមីនា ឆ្នាំ២០២៤ ថា ការិយាល័យស្ថិតិជាតិឥណ្ឌាបង្ហាញថា សេដ្ឋកិច្ចឥណ្ឌាបានកើនឡើងរហូតដល់៨,៤% ឯណោះ នៅត្រីមាសទី៤ ឆ្នាំ២០២៣ ។ កំណើននេះ គឺលើសពីការរំពឹងទុករបស់ធនាគារកណ្តាលឥណ្ឌាទៅទៀត ដែលធនាគារនេះរំពឹងថា សេដ្ឋកិច្ចឥណ្ឌា នឹងកើនឡើងត្រឹមតែ៧% ប៉ុណ្ណោះ ។

ចំណែកផលិតកម្មក្នុងវិស័យឧស្សាហកម្មនៅតែជាកត្តាដ៏សំខាន់ ដែលបានធ្វើឱ្យសេដ្ឋកិច្ចប្រទេសឥណ្ឌារីកចម្រើនកាន់តែខ្លាំងឡើង ក្នុងរយៈពេល៣ខែចុងក្រោយនៃឆ្នាំ២០២៣ គឺវាបានកើនឡើងរហូតដល់១១,៦% ។ ហេតុនេះ ធ្វើឱ្យរដ្ឋាភិបាលឥណ្ឌាកំណត់និន្នាការនៃការពង្រីកសេដ្ឋកិច្ចនៅឆ្នាំ២០២៤ ចាប់ពីអត្រា៧,៣% មកស្មើនឹង៧,៦% ។

ជាមួយគ្នានេះ តួលេខសេដ្ឋកិច្ចខាងលើបានធ្វើឱ្យឥណ្ឌាក្លាយជាសមាជិកនៃក្រុមប្រទេសមានសេដ្ឋកិច្ចធំ (G20) ដែលមានសេដ្ឋកិច្ចរីកចម្រើនលឿនជាងគេនៅលើពិភពលោក ។ បើតាមរបាយការណ៍បង្ហាញថា ផលិតផលក្នុងស្រុកសរុប (GDP) របស់ប្រទេសឥណ្ឌា បានកើនឡើង៧,២% ចាប់ពីឆ្នាំ២០២២ ដល់ឆ្នាំ២០២៣ ។

ចំណែករបាយការណ៍របស់មូលនិធិរូបិយវត្ថុអន្តរជាតិ (IMF) រំពឹងថា សេដ្ឋកិច្ចប្រទេសឥណ្ឌានឹងនៅតែរីកចម្រើនយ៉ាងរឹងមាំក្នុងឆ្នាំបន្ទាប់ទៀត ដោយសារតែការផ្លាស់ប្តូរនៃតម្រូវការក្នុងស្រុក ហើយវាផ្ទុយគ្នាជាមួយស្ថានការណ៍ក្នុងប្រទេសជាច្រើនទៀតនៅតំបន់អាស៊ី ៕

ប្រទេសឥណ្ឌូណេស៊ី ៖ វានឹងប៉ះពាល់ដល់ក្រុមគ្រួសាររបស់យើង ប្រសិនបើតម្លៃអង្ករនៅតែកើនឡើងខ្ពស់បែបនេះ ខណៈយើងត្រូវចំណាយលើផ្នែកផ្សេងទៀត ដូចជា ៖ បង់ថ្លៃសាលាឱ្យកូនៗ ។ នេះជាការលើកឡើងរបស់អ្នកស្រី លិលិស សឺយ៉ានិ ជនជាតិឥណ្ឌូណេស៊ី អាយុ៥៤ឆ្នាំ ។

នៅឆ្នាំ២០២៤ ពលរដ្ឋឥណ្ឌូណេស៊ីបានប្រឈមមុខជាមួយតម្លៃអង្ករកើនឡើងខ្ពស់ ដែលបានប៉ះពាល់ដល់ការចំណាយក្នុងគ្រួសារ នៅពេលតម្លៃអង្ករលើពិភពលោកកើនឡើងខ្ពស់បំផុត ក្នុងរយៈពេល១៦ឆ្នាំ ។ តម្លៃអង្ករកើនឡើងនេះ ក្រោយពីឥណ្ឌាជាប្រទេសនាំចេញអង្ករច្រើនបំផុតលើពិភពលោក បាននាំចេញអង្ករមានកម្រិតកាលពីឆ្នាំ២០២៣ ព្រមទាំងគ្រោះរាំងស្ងួតផងដែរ ទើបធ្វើឱ្យប៉ះពាល់ដល់តម្លៃអង្ករនៅឥណ្ឌូណេស៊ី ។

គេសង្កេតឃើញអតិថិជនជាច្រើននាក់នៅទីក្រុងហ្សាការតា ប្រទេសឥណ្ឌូណេស៊ី ដែលភាគច្រើនជាស្ត្រីបាននាំគ្នាមកឈរតម្រង់ជួរយ៉ាងវែង ដើម្បីរង់ចាំទិញអង្ករតម្លៃថោកក្នុងផ្សារមួយកន្លែង ដែលរដ្ឋាភិបាលបានផ្តល់ប្រាក់ឧបត្ថម្ភ ។ ពលរដ្ឋមកឈរប្រជ្រៀតគ្នានេះ ដោយសារមើលឃើញថា តម្លៃអង្ករនៅឥណ្ឌូណេស៊ីបានកើនឡើងជាបន្តបន្ទាប់ ក្រោយពីឥណ្ឌូណេស៊ីជួបគ្រោះរាំងស្ងួតធ្ងន់ធ្ងរ កាលពីឆ្នាំ២០២៣ ។

ហេតុនេះ វាធ្វើឱ្យប៉ះពាល់ដល់ការផលិតស្រូវ ហើយធ្វើឱ្យតម្លៃផលិតផលចាំបាច់កើនឡើងខ្ពស់នៅឥណ្ឌូណេស៊ី ។ រីឯការដាក់លក់អង្ករក្នុងផ្សារនេះ គឺរៀបចំឡើងដោយ «បួឡស់» ជាភ្នាក់ងារស្វែងរកអាហាររបស់រដ្ឋាភិបាល ក្នុងទីក្រុងបេកាស៊ី ។

អ្នកស្រី ឃឺ ម៉ាស៊ី ជាអាជីវករលក់ដូង អាយុ៥៥ឆ្នាំ បាននិយាយមកកាន់សារព័ត៌មានរ៉យទ័រថា គាត់សុខចិត្តឈរតម្រង់ជួរប្រជ្រៀតជាមួយគេឯងដើម្បីទិញអង្ករតម្លៃថោក ។ អ្នកស្រីប្រាប់ថា ៖ «ខ្ញុំចង់បានអង្ករ ទើបសម្រេចចិត្តមកឈរតម្រង់ជួរជាមួយគេ បើទោះជាត្រូវប្រជ្រៀតគ្នាក្តី ព្រោះខ្ញុំត្រូវការអង្ករ ។ បើនៅផ្សារវិញ អង្ករមានតម្លៃថ្លៃណាស់ តែបើខ្ញុំមកទិញនៅទីនេះ វាមានតម្លៃថោកជាង» ។

ប្រទេសឥណ្ឌូណេស៊ី មានពលរដ្ឋសរុបចំនួន២៧០លាននាក់ ហើយអង្ករ គឺជាអាហារចម្បងសម្រាប់ពលរដ្ឋភាគច្រើននៅឥណ្ឌូណេស៊ី ។ តម្លៃអង្ករបានកើនឡើង១៦% តាំងពីឆ្នាំ២០២៣ មកម៉្លេះ ដោយសារបាតុភូតអេលនីណូ ដែលធ្វើឱ្យភ្លៀងធ្លាក់តិចជាងមុននៅទីកន្លែងជាច្រើនក្នុងតំបន់អាស៊ី ។ ហេតុនេះ វាធ្វើឱ្យប៉ះពាល់ដល់ការដាំដុះដំណាំផ្សេងៗ ។

រដ្ឋាភិបាលឥណ្ឌូណេស៊ីបានលក់ផលិតផលអាហារក្នុងតម្លៃសមរម្យដល់ពលរដ្ឋ តាមរយៈការកំណត់គោលនយោបាយផ្តល់ប្រាក់ឧបត្ថម្ភនៅពេលតម្លៃផលិតផលកើនឡើងខ្ពស់ ដែលធ្វើឱ្យប៉ះពាល់ដល់អ្នកបរិភោគ ។

ផ្សារមួយកន្លែងក្នុងទីក្រុងបេកាស៊ី បានលក់អង្ករតម្លៃថោកឱ្យពលរដ្ឋ ដោយសារទទួលបានប្រាក់ឧបត្ថម្ភពីរដ្ឋាភិបាល ។ ផ្សារនេះបានដាក់លក់អង្ករច្រកថង់មានទម្ងន់៥គីឡូក្រាម ដែលមានតម្លៃ១ម៉ឺន៦រយរូពីក្នុង១គីឡូក្រាម (ស្មើប្រមាណ២ពាន់៥រយរៀល) ។ ភ្នាក់ងារស្វែងរកអាហាររបស់រដ្ឋាភិបាល «បួឡស់» បានលក់អង្ករមានកម្រិតឱ្យពលរដ្ឋ គឺពលរដ្ឋម្នាក់មិនអាចទិញអង្ករលើសពី២ថង់ទេ ដើម្បីការពារកុំឱ្យពួកគេទិញអង្ករយកទៅស្តុកទុក ។

គួរបញ្ជាក់ថា កាលពីឆ្នាំ២០២៣ ប្រទេសឥណ្ឌូណេស៊ីបាននាំចូលអង្ករក្នុងបរិមាណច្រើនបំផុតក្នុងប្រវត្តិសាស្ត្រ ។ ហេតុនេះ គេប៉ាន់ស្មានថា វានឹងជំរុញឱ្យតម្លៃអង្ករនៅលើទីផ្សារពិភពលោក កើនឡើងថែមទៀត ៕

បរទេស៖ អ្នកគ្រប់គ្រងនៃប្រទេសអារ៉ាប់រួម មានគម្រោងអភិវឌ្ឍអាកាសយានដ្ឋានអន្តរជាតិ Al Maktoum ឬ Dubai World Central ទៅជាអាកាសយានដ្ឋានដ៏ធំបំផុតរបស់ពិភពលោក ដែលមានសមត្ថភាពផ្ទុកអ្នកដំណើរជាង ១២០ លាននាក់ រួមទាំងទំនិញ ១២ លានតោន ក៏ដូចជានឹងលេចវត្តមាននៅលើវាលខ្សាច់ភាគខាងត្បូងនៃទីក្រុងឌូបៃ។

យោងតាម CNN ដែលបានចុះផ្សាយកាលពីថ្ងៃទី១ ខែមីនា ឆ្នាំ២០២៤ ថា ទីភ្នាក់ងាររដ្ឋាភិបាលមានគម្រោងប្រើប្រាស់ “កម្មវិធីនៃបច្ចេកវិទ្យាច្នៃប្រឌិត និងការកែលម្អដើម្បីគិតឡើងវិញអំពីការប្រើប្រាស់លំហនៅក្នុងការប៉ុនប៉ងដើម្បីបង្កើនសមត្ថភាពរបស់វា”។

អាកាសយានដ្ឋាននេះត្រូវបានបើកដំណើរការដំបូងនៅឆ្នាំ ២០១៣ ដែលជាទូទៅវាផ្គត់ផ្គង់ដល់អ្នកដំណើរ ១០០ លាននាក់ជារៀងរាល់ឆ្នាំ ហើយផែនការថ្មីៗនេះគឺនឹងពង្រីកអាកាសយាដ្ឋានឱ្យធំជាងគេលើពិភពលោក ក៏ដូចជាបន្ថែមអ្នកដំណើរជាង ២០ លាននាក់បន្ថែមទៀតនាពេលអនាគត។ លោក Paul Griffiths នាយកប្រតិបត្តិអាកាសយានដ្ឋានឌូបៃបាននិយាយថា បច្ចុប្បន្នការអភិវឌ្ឍ និងការរចនាសម្រាប់ព្រលានយន្តហោះខ្នាតធំនាពេលអនាគតនេះកំពុងត្រូវបានធ្វើឡើងហើយ។

គម្រោងអាកាសយាដ្ឋានដ៏ធំបំផុតរបស់ពិភពលោក នឹងលេចវត្តមាននៅលើវាលខ្សាច់ ១៤៥ គីឡូម៉ែត្រការ៉េ ភាគនិរតីនៃទីក្រុងឌូបៃនាពេលខាងមុខ។ អាជ្ញាធរគ្រប់គ្រងអាកាសយានដ្ឋានអន្តរជាតិឌូបៃ (DXB) និងអាកាសយានដ្ឋានថ្មីសន្យាថានៅពេលដែលគម្រោង Dubai World Central ត្រូវបានបញ្ចប់ កន្លែងនេះនឹងផ្ទុកអ្នកដំណើរបានច្រើនជាង ១២០ លាននាក់ក្នុងមួយឆ្នាំ និងទំនិញរហូតដល់ ១២ លានតោន ហើយវានឹងក្លាយជាអាកាសយាដ្ឋានដ៏មមារញឹកជាងគេលើពិភពលោក។

ដូច្នោះគម្រោង Dubai World Central នឹងក្លាយជាមជ្ឈមណ្ឌលនៃផែនការដ៏ធំបំផុត ដោយជួយបង្កើតទីក្រុងថ្មីទាំងស្រុងដែលលាតសន្ធឹងលើវាលខ្សាច់ ១៤៥ គីឡូម៉ែត្រការ៉េភាគខាងត្បូងនៃទីក្រុងឌូបៃ។ តំបន់ទីក្រុងថ្មីនេះកំពុងមានរូបរាងជាបណ្តើរៗ ដោយរំពឹងថានឹងរួមបញ្ចូលសង្កាត់ចំនួន ៨ ដែលបែងចែកដោយឧស្សាហកម្ម ឬសកម្មភាពជាក់លាក់ ដោយរួមបញ្ចូលគ្នានូវតំបន់លំនៅដ្ឋាន និងពាណិជ្ជកម្ម។ ជាមួយនឹងអាកាសយានដ្ឋាននៅចំកណ្តាល គម្រោងនេះនឹងបង្កើតបានជាអាកាសយានដ្ឋានដ៏ធំជាងគេលើពិភពលោកនៅពេលអនាគត៕