នៅលើពិភពលោកយើងនេះគឺមានប្រទេសជាង ២០០ ក្នុងចំណោមនោះក៏មានប្រទេសខ្លះតូចខ្លះធំ ខ្លះជាប្រទេសអភិវឌ្ឍនិងកំពុងអភិវឌ្ឍ ដែលទាំងនេះនឹងជិះឥទ្ធិពលដល់មនុស្ស ជាពិសេសគឺទាក់ទងនឹងសុខមាលភាពសង្គម ទាំងការរស់នៅ របរចិញ្ចឹមជីវិត ចំណូលចំណាយ និងសេវាសាធារណៈផ្សេងៗ។ ទោះជាយ៉ាងណា ប្រាក់ឈ្នួលសមរម្យគឺជាកត្តាចម្បងមួយដើម្បីទទួលបានការរស់នៅមួយប្រកបដោយស្តង់ដារខ្ពស់។

យោងតាមទិន្នន័យចុងក្រោយបង្អស់ដែលបានចងក្រងដោយធនាគារពិភពលោក គឺបានបង្ហាញប្រទេសចំនួន១០ ដែលប្រជាពលរដ្ឋទទួលបានប្រាក់បៀវត្សឬប្រាក់ខែជាមធ្យមខ្ពស់បំផុតដូចខាងក្រោម(ដែលរាប់ចាប់ពីចំណាត់ថ្នាក់ពីធំទៅតូច)៖

១០ ប្រទេសអៀរឡង់៖ ប្រាក់ខែជាមធ្យមប្រចាំឆ្នាំ ៤១,៤៦៧ ដុល្លារ និងប្រមាណ ៣,៤៥៥ ដុល្លារជាមធ្យមក្នុងមួយខែសម្រាប់មនុស្សម្នាក់។ អៀរឡង់គឺស្ថិតនៅក្នុងចំណោមប្រទេសដែលមានថ្ងៃបុណ្យឈប់សម្រាកតិចតួចបំផុត។ ការងារអាទិភាពដែលរកប្រាក់ចំណូលបានកាន់ខ្ពស់នៅក្នុងប្រទេសនេះគឺ Software development managers (អ្នកគ្រប់គ្រងផ្នែកអភិវឌ្ឍន៍កម្មវិធី), Sales director (នាយកផ្នែកលក់), និង Operatសional managers (អ្នកគ្រប់គ្រងប្រតិបត្តិការ)។

៩ ប្រទេសសិង្ហបុរី៖ ជាប្រទេសអាស៊ីតែមួយគត់ជាប់ចំណាត់ថ្នាក់ទី៩ ដែលប្រាក់ខែជាមធ្យមប្រចាំឆ្នាំ ៤២,០៤៩ ដុល្លារអាមេរិក។ ប្រាក់ឈ្នួលប្រចាំខែជាមធ្យមរបស់សិង្ហបុរីសម្រាប់បុគ្គលិកពេញម៉ោងមានចំនួន ៥,៨៤៧ដុល្លារសិង្ហបុរី (៤,៤៤៥ដុល្លារ) ។ បើទោះបីប្រទេសនេះមានអត្រាតម្លៃនៃការរស់នៅខ្ពស់ក៏ដោយ ក៏អត្រាអ្នកអត់ការងារធ្វើស្ថិតក្នុងតួលេខទាបបំផុតក្នុងប្រទេសត្រឹមតែ២.១%ប៉ុណ្ណោះ ថែមទាំងជាគោលដៅដ៏ពេញនិយមក្នុងចំណោមអ្នកជំនាញផ្នែកបច្ចេកវិទ្យា ហិរញ្ញវត្ថុ វិស្វកម្ម និងវេជ្ជសាស្ត្រ។ ជាពិសេស គ្រូពេទ្យផ្នែកវះកាត់នឹងទទួលបានប្រាក់បៀវត្សរ៍ខ្ពស់បំផុតនៅក្នុងប្រទេសសិង្ហបុរី ដែលជាមធ្យមទទួលបាន ១១២,៥០៥ ដុល្លារអាមេរិកក្នុងមួយឆ្នាំ។

៨ ប្រទេសហូឡង់៖ ប្រាក់ខែប្រចាំឆ្នាំជាមធ្យម ៤២,២៩៦ ដុល្លារ និងប្រមាណ ៣,៥២៤ ដុល្លារជាមធ្យមក្នុងមួយខែសម្រាប់មនុស្សម្នាក់។ ហូឡង់ត្រូវបានគេស្គាល់ថាជាប្រទេសមួយក្នុងចំណោមប្រទេសមានទីផ្សារការងារល្អ និងអត្រាគ្មានការងារធ្វើទាប។ យោងទៅតាម EURES នៅចុងឆ្នាំ ២០២១ ប្រទេសនេះគឺមានតម្រូវការខ្លាំងសម្រាប់ការងារក្នុងប្រព័ន្ធអប់រំ , eCommerce ,និងអ្នកជំនាញថែទាំសុខភាព។

៧ ប្រទេសស៊ុយអែត៖ ប្រាក់ខែប្រចាំឆ្នាំជាមធ្យម ៤៤,៥៥២ ដុល្លារក្នុងម្នាក់។ ប្រាក់ខែជាមធ្យមប្រចាំខែសម្រាប់អ្នកធ្វើការក្នុងវិស័យឯកជនប្រទេសនេះគឺ ៣,៧១៩ដុល្លារ និង៣,៥២៣ដុល្លារ សម្រាប់អ្នកធ្វើការក្នុងស្ថាប័នរដ្ឋ។ ការងារដែលរកកម្រៃបានល្អបំផុតក្នុងប្រទេសស៊ុយអែត រួមមានមេធាវី អ្នកបើកយន្តហោះ និងគ្រូពេទ្យវះកាត់ជាដើម។

៦ ប្រទេសអ៊ីស្លង់៖ ប្រាក់ខែប្រចាំឆ្នាំជាមធ្យម ៤៨,០៤៧ដុល្លារ និងប្រមាណ ៤,០០០ ដុល្លារជាមធ្យមប្រចាំខែក្នុងម្នាក់។ អ៊ីស្លង់គឺជាកន្លែងដ៏ល្អមួយសម្រាប់អ្នកចង់ផ្លាស់ទីលំនៅ អមជាមួយនឹងលក្ខខណ្ឌនៃប្រាក់បៀវត្សខ្ពស់ ថែមទាំងមានអត្រាឧក្រិដ្ឋកម្មទាប។ កាលពីឆ្នាំ២០២២ វាក៏បានជាប់ជាប្រទេសដែលមានសុវត្ថិភាពបំផុតនៅក្នុងពិភពលោកផងដែរ។

៥ ប្រទេសដាណឺម៉ាក៖ ប្រាក់ខែប្រចាំឆ្នាំជាមធ្យម ៥២,៦៦៦ដុល្លារ។ ប្រាក់ខែជាមធ្យមប្រចាំខែសម្រាប់ម្នាក់ប្រមាណនឹង ៤,៤០០ដុល្លារ។ រីឯទីផ្សារការងារដែលមានអាទិភាពបំផុតក្នុងប្រទេសនេះគឺមានតម្រូវការខ្ពស់សម្រាប់កម្មករក្នុងវិស័យពាណិជ្ជកម្ម, វិទ្យាសាស្ត្រ, អាហារនិងភេសជ្ជៈ, ផ្នែកច្បាប់ ,និងវិស័យសំណង់។

៤ សហរដ្ឋអាមេរិក៖ ប្រាក់ខែប្រចាំឆ្នាំជាមធ្យមប្រមាណ ៥៣,៣២៩ដុល្លារ និង៤,៤០០ដុល្លារជាមធ្យមប្រចាំខែសម្រាប់មនុស្សម្នាក់។ មនុស្សទូទាំងពិភពលោកភាគច្រើនតែងមានក្តីស្រមៃចង់ផ្លាស់ទៅរស់នៅសហរដ្ឋអាមេរិកដើម្បីអាជីពការងារនិងសេវាថែទាំដ៏ប្រសើរ។ ជាមួយគ្នានេះក្រុមហ៊ុនកំពូលៗរបស់ពិភពលោកជាច្រើនកំពុងមានទីស្នាក់ការនៅអាមេរិក រួមទាំង Google និង Amazon ព្រមទាំងមានតម្រូវការអ្នកស្វែងរកការងារជាបន្តបន្ទាប់ ជាពិសេសនៅក្នុងផ្នែកបច្ចេកវិទ្យា ការថែទាំសុខភាព និងហិរញ្ញវត្ថុ។ ទន្ទឹមនឹងនោះ ការិយាល័យស្ថិតិការងាររបស់សហរដ្ឋអាមេរិក ព្យាករថាសេដ្ឋកិច្ចអាមេរិកនឹងបន្ថែមការងារចំនួន ៨,៣ លាននៅឆ្នាំ ២០៣១។

៣ ប្រទេសន័រវេស៖ ប្រាក់ខែប្រចាំឆ្នាំជាមធ្យម ៥៣,៥១៤ ដុល្លារ។ យោងតាមរបាយការណ៍អភិវឌ្ឍន៍មនុស្សរបស់អង្គការសហប្រជាជាតិ ន័រវេសគឺជាប្រទេសដ៏ល្អបំផុតមួយក្នុងការរស់នៅ ហើយកាន់តែពិសេសប្រទេសនេះក៏ផ្តល់នូវកម្មវិធីទិដ្ឋាការការងារពីចម្ងាយផងដែរ។

២ ប្រទេសស្វីស៖ ប្រាក់ខែប្រចាំឆ្នាំជាមធ្យម ៦៣,៧៨២ ដុល្លារ និងប្រមាណ ៥,៣១៥ ដុល្លារជាមធ្យមប្រចាំខែ។ ប្រទេសនេះត្រូវបានគេស្គាល់ដោយសារទេសភាពភ្នំអាល់ផែន សូកូឡាឆ្ងាញ់ ឈីស និងនាឡិកាប្រណីត។ ស្វីសក៏ល្បីល្បាញដោយសារប្រាក់ខែខ្ពស់ ប៉ុន្តែតម្លៃនៃការរស់នៅក៏ខ្ពស់ផងដែរ។ ការចំណាយប្រចាំខែរបស់មនុស្សម្នាក់ជាមធ្យមគឺ ១,៥៦០ដុល្លារ ខណៈអាផាតមិនមួយបន្ទប់ក្រៅក្រុងមានតម្លៃរហូតដល់ ១,៣៥០ដុល្លារក្នុងមួយខែ។

១ ប្រទេសលុចសំបួរ៖ ប្រាក់ខែប្រចាំឆ្នាំជាមធ្យម ៦៧,៩៦៧ ដុល្លារ។ លុចសំបួគឺជាប្រទេសតូចមួយ ប៉ុន្តែគឺមានប្រាក់ចំណូលខ្ពស់បំផុតសម្រាប់មនុស្សម្នាក់ៗ ជាពិសេសគឺ គ្រូពេទ្យ , ទន្តពេទ្យ, អ្នកវិទ្យាសាស្ត្រទិន្នន័យ (Data scientist) , និងនាយកប្រតិបត្តិកម្រិត C ជាដើម។ ជាមធ្យម មនុស្សដែលធ្វើការនៅប្រទេសលុចសំបួរគឺរកចំណូលបានចន្លោះពី ២,៧៩៧ ដល់ ៨,៨២៨ ដុល្លារក្នុងមួយខែ។ ទន្ទឹមនឹងនោះ ទីក្រុងរបស់ប្រទេសនេះ ជាប់ចំណាត់ថ្នាក់ជាទីក្រុងដែលគួរចង់ឱ្យរស់នៅបំផុតក្នុងពិភពលោក ដោយសារកម្រិតជីវភាពរស់នៅខ្ពស់ផងដែរ៕

សហរដ្ឋអាមេរិក ៖ ក្រុមហ៊ុនអាមេរិកឈ្មោះ DartSolar ប្រកាសថា ក្រុមហ៊ុនបានសាកល្បងគម្រោងបំពាក់ផ្ទាំងសូឡាស្រូបពន្លឺព្រះអាទិត្យនៅលើដំបូលរថយន្តអគ្គិសនី ដើម្បីឱ្យវាសាកថ្មរថយន្តដោយស្វ័យប្រវត្តិ ហើយជំហានដំបូង ក្រុមហ៊ុនបានសាកល្បងជាមួយរថយន្តអគ្គិសនី Tesla Model Y ។ ក្រុមហ៊ុនបានប្រើប្រាស់ផ្ទាំងសូឡាទំហំធំ ចំនួន៩ផ្ទាំង ដាក់នៅលើដំបូលរថយន្ត ក្នុងនោះផ្ទាំងសូឡា១ផ្ទាំង នឹងមានសមត្ថភាពផលិតអគ្គិសនី ស្មើនឹង១៧៥វ៉ាត់ ។

ផ្ទាំងសូឡាស្រូបពន្លឺព្រះអាទិត្យនេះ អាចផលិតថាមពលអគ្គិសនីបាន៦គីឡូវ៉ាត់ម៉ោងក្នុង១ថ្ងៃ ប្រសិនបើប្រៀបធៀបជាមួយការបើកបរក្នុងចម្ងាយផ្លូវប្រមាណ៣២គីឡូម៉ែត្រ ខណៈវាស្រូបពន្លឺព្រះអាទិត្យរយៈពេល៥ម៉ោង ។ ផ្ទាំងសូឡាដែលក្រុមហ៊ុនបង្ហាញនេះ គឺជាប្រភេទ Beta 1 ឬជាបន្ទះសូឡាដំបូងគេបង្អស់ ដែលមានទម្ងន់តិចជាង៧៥គីឡូក្រាម ។

ក្រុមហ៊ុនបញ្ជាក់ថា ផ្ទាំងសូឡានេះ គឺមានទម្ងន់ស្រាលសមល្មមសម្រាប់ដាក់នៅលើដំបូលរថយន្ត ។ លើសពីនេះ គេអាចបត់ ឬពង្រីកផ្ទាំងសូឡាបន្ថែមទៀត ដើម្បីឱ្យសមនឹងកន្លែងចតរថយន្តទូទៅផងដែរ ។ ផ្ទាំងសូឡា១ ក្រុមហ៊ុននឹងលក់ក្នុងតម្លៃ៤.០០០ដុល្លារអាមេរិក ។ ផ្នែក DartSolar បញ្ជាក់ថា ការច្នៃប្រឌិតនេះនឹងជួយឱ្យម្ចាស់រថយន្តអគ្គិសនីអាចសន្សំសំចៃប្រាក់ប្រមាណ០.៩៧ដុល្លារអាមេរិកកក្នុង១ថ្ងៃ ។

Tesla គឺជារថយន្តអគ្គិសនីដ៏ពេញនិយមសម្រាប់ការសាកល្បងផ្ទាំងសូឡា ប៉ុន្តែលោក Elon Musk និយាយថា លោកនៅមិនទាន់ប្រាកដចិត្តអំពីការប្រើប្រាស់ពន្លឺព្រះអាទិត្យជាមួយរថយន្តអគ្គិសនីទេ ដោយសារទីធ្លានៅលើដំបូលរថយន្តមានកំណត់ ។ ម្យ៉ាងទៀត ផ្ទាំងសូឡាបានផ្តល់នូវថាមពលតិចពេក បើគេយកវាមកប្រើប្រាស់ជាក់ស្តែង ។

នៅថ្ងៃអនាគត យើងជឿថា ផ្ទាំងសូឡាប្រើប្រាស់ជាមួយរថយន្តអគ្គិសនីនឹងលេចរូបរាងយ៉ាងពិតប្រាកដ ដើម្បីដោះស្រាយបញ្ហាស្ថានីយសាកថ្មរថយន្តអគ្គិសនីមិនគ្រប់គ្រាន់ និងការចំណាយពេលយូរក្នុងការសាកថ្មរថយន្ត ។ លើសពីនេះ គេនឹងអាចកាត់បន្ថយតម្លៃអគ្គិសនីទៀតផង ៕

បរទេស៖ ទីក្រុងម៉ិកស៊ិកដែលមានប្រជាជនប្រមាណ ២២ លាននាក់គឺជាទីក្រុងមួយក្នុងចំនោមទីក្រុងដែលមានប្រជាជនច្រើនជាងគេនៅលើពិភពលោក កំពុងប្រឈមនឹងវិបត្តិខ្វះទឹកយ៉ាងធ្ងន់ធ្ងរ នេះបើយោងតាម CNN ដែលបានរាយការណ៍កាលពីថ្ងៃទី២៩ ខែកុម្ភៈ ឆ្នាំ២០២៤។

Alejandro Gomez ដែលរស់នៅក្នុងស្រុក Tlalpan នៃទីក្រុងម៉ិកស៊ិក បាននិយាយថា នាងគ្មានទឹកប្រើប្រាស់អស់រយៈពេលជាង ៣ ខែមកហើយ។ នាងបានបន្តទៀតថា ជាទូទៅនាងប្រមូលទឹកបានតែមួយ ឬពីរធុងប៉ុណ្ណោះ ដោយរង់ចាំប្រហែល ២-៣ ម៉ោងទើបបាន ហើយបន្ទាប់មកក៏មិនមានទឹកប្រើជាច្រើនថ្ងៃទៀត។ Alejandro Gomez បានបន្ថែមថា នាងមិនមានធុងស្តុកទឹកធំនោះទេដូច្នេះមិនអាចទទួលបានទឹកច្រើនដូចគេនោះទេ ហើយរាល់ពេលងូតទឹក នាងតែងប្រមូលទឹកងូតមកលាងបង្គន់។

បញ្ហាកង្វះទឹកមិនមែនជារឿងចម្លែកនៅក្នុងសង្កាត់នេះទេ ប៉ុន្តែលើកនេះគឺខុសគ្នា។ Gomez បានសម្តែងថា “ឥឡូវនេះ អាកាសធាតុកាន់តែក្តៅ អ្វីៗអាចកាន់តែធ្ងន់ធ្ងរ កាន់តែស្មុគស្មាញ” ហេតុនេះ “យើងត្រូវការទឹក ទឹកគឺមានសារៈសំខាន់សម្រាប់អ្វីៗគ្រប់យ៉ាង”។ ទីក្រុងម៉ិកស៊ិក ដែលជាទីក្រុងធំមួយមានប្រជាជនជិត ២២ លាននាក់ កំពុងប្រឈមមុខនឹងវិបត្តិខ្វះទឹកធ្ងន់ធ្ងរ ដែលផ្តើមចេញពីបញ្ហាជាបន្តបន្ទាប់ដូចជាភូមិសាស្ត្រ ការអភិវឌ្ឍន៍ទីក្រុងដែលមិនបានគ្រោងទុក ហេដ្ឋារចនាសម្ព័ន្ធខ្សោយ ក៏ដូចជាផលប៉ះពាល់នៃការប្រែប្រួលអាកាសធាតុ។ ឆ្នាំដែលមានភ្លៀងធ្លាក់តិចខុសពីធម្មតា រដូវប្រាំងយូរ និងអាកាសធាតុក្តៅ បានដាក់សម្ពាធបន្ថែមលើប្រព័ន្ធទឹកដែលកំពុងតស៊ូដើម្បីបំពេញតម្រូវការដែលកំពុងកើនឡើង។

ទោះជាយ៉ាងណាក៏ដោយ បច្ចុប្បន្នរដ្ឋាភិបាលកំពុងព្យាយាមបំបាត់ការថប់បារម្ភជាសាធារណៈអំពីវិបត្តិនេះ ប៉ុន្តែអ្នកជំនាញបាននិយាយថា ស្ថានភាពនេះគឺធ្ងន់ធ្ងរ ហើយទីក្រុងម៉ិកស៊ិកអាចនឹងអស់ទឹកនៅតំបន់ខ្លះក្នុងប៉ុន្មានខែខាងមុខនេះ។ លោក Christian Domínguez Sarmiento អ្នកវិទ្យាសាស្ត្របរិយាកាសនៅសកលវិទ្យាល័យជាតិស្វយ័តម៉ិកស៊ិក (UNAM) បាននិយាយថា ប្រហែល ៦០% នៃការផ្គត់ផ្គង់ទឹករបស់ទីក្រុងម៉ិកស៊ិកបានមកពីអាងស្តុកទឹក ប៉ុន្តែការប្រើប្រាស់លើសចំណុះនៃប្រភពទឹកនេះបានពន្លឿនការដួលរលំនៃទីក្រុងទៅជាអត្រាដ៏លឿនគួរឱ្យភ័យខ្លាច ដែលមានច្រើនជាង ៥០សង់ទីម៉ែត្រក្នុងមួយឆ្នាំ។

បាតុភូតអាកាសធាតុបានប៉ះពាល់យ៉ាងធ្ងន់ធ្ងរដល់ម៉ិកស៊ិក វិបត្តិនេះបានបង្កឱ្យមានការជជែកវែកញែកយ៉ាងខ្លាំងក្លាអំពីថាតើទីក្រុងអាចនឹងអស់ទឹកដែរឬទេ ដោយសារប្រព័ន្ធទឹក Cutzamala ដ៏ធំរបស់ទីក្រុងធ្លាក់ដល់កម្រិតទឹកទាប រហូតមិនអាចផ្គត់ផ្គង់ទីក្រុងបាន។ ប៉ុន្តែបើយោងតាមសេចក្តីថ្លែងការណ៍របស់រដ្ឋាភិបាលម៉ិកស៊ិក កាលពីពេលថ្មីៗនេះ បានឱ្យដឹងថា ខ្លួនកំពុងអនុវត្តគម្រោងរយៈពេល ៣ ឆ្នាំ ដើម្បីដំឡើង អភិវឌ្ឍ និងកែលម្អហេដ្ឋារចនាសម្ព័ន្ធទឹក ដើម្បីជួយទីក្រុងទប់ទល់នឹងការខ្សោះជីវជាតិនៃប្រព័ន្ធ Cutzamala រួមទាំងការបំពេញបន្ថែមអណ្តូងថ្មី និងដំណើរការរោងចក្រប្រព្រឹត្តកម្មទឹកផងដែរ៕

បរទេស៖ កាលពីពេលថ្មីៗនេះក្រុមហ៊ុន Apple ហាក់កំពុងត្រៀមខ្លួនសម្រាប់ការប្តូរឈ្មោះថ្មីរបស់ Apple ID ទៅជា “Apple Account” វិញ នេះបើយោងតាម MacRumors ដែលបានរាយការណ៍នៅថ្ងៃទី២៩ ខែកុម្ភៈ ឆ្នាំ២០២៤។

Apple ID គឺជាគណនីរបស់អ្នកប្រើប្រាស់ iPhone គ្រប់ទូរស័ព្ទ iPhone ទាំងអស់សុទ្ធតែតម្រូវឱ្យមានគណនី Apple ID ដោយសារតែវានឹងផ្តល់ការចូលប្រើប្រាស់សេវាកម្មផ្សេងៗដូចជា App Store, និង i Cloud រួមទាំងការភ្ជាប់ជាមួយកម្មវិធី ឬឧបករណ៍ផ្សេងៗជាដើម។ ជាមួយនឹង Apple ID អ្នកប្រើប្រាស់អាចទិញកម្មវិធី និងតន្ត្រី ធ្វើសមកាលកម្មទិន្នន័យឥតខ្សែរវាងឧបករណ៍ដោយប្រើ iCloud និងធ្វើការទិញនៅលើហាងអនឡាញរបស់ Apple ក្នុងចំណោមរបស់ផ្សេងៗទៀត។

បើយោងតាមសារព័ត៌មានបរទេសបានឱ្យដឹងថា ក្រុមហ៊ុន Apple កំពុងពិសោធន៍ជាមួយឈ្មោះគណនី Apple ថ្មី ដែលវាអាចត្រូវបានណែនាំភ្លាមៗនៅឆ្នាំនេះ។ ប្រសិនបើអ្នកកំពុងប្រើប្រាស់គណនី Apple ID នៅក្នុងទូរស័ព្ទ iPhone អ្នកប្រហែលជាត្រូវចងចាំឈ្មោះនៅពេលនេះ ព្រោះវាអាចនឹងប្តូរឈ្មោះ Apple ID របស់អ្នកទៅជាគណនី Apple Account វិញនាពេលអនាគត។ គេរំពឹងថាការផ្លាស់ប្តូរឈ្មោះ Apple ID អាចនឹងកើតឡើងនៅឆ្នាំ ២០២៤ ដែលនឹងមកជាមួយ iOS 18 និង macOS 15 ថ្មី ដែលនឹងចេញក្នុងពេលឆាប់ៗនេះ។

ទោះជាយ៉ាងណា បច្ចុប្បន្ននេះវាមិនច្បាស់ទេថាហេតុអ្វីបានជា Apple កំពុងពិចារណាលើការផ្លាស់ប្តូរនេះ ហើយវាជារឿងសំខាន់ក្នុងការពិចារណាថា Apple ជាញឹកញាប់មានឈ្មោះទីផ្សារជាច្រើនដែលត្រៀមរួចជាស្រេចមុនពេលសេវាកម្មឬផលិតផលថ្មីចាប់ផ្តើម។ ជាឧទាហរណ៍ ជាមួយនឹងប្រព័ន្ធប្រតិបត្តិការសម្រាប់កាស Vision Pro ដែលទើបចេញថ្មីៗនេះ ក្រុមហ៊ុន Apple បានប្រើឈ្មោះបីផ្សេងគ្នានៅក្នុងការធ្វើតេស្តខាងក្នុងរបស់វាគឺ realityOS, xrOS និង visionOS ។ អាស្រ័យហេតុនេះ យើងមិនដឹងច្បាស់ទេថា Apple គ្រោងនឹងប្តូរឈ្មោះអ្វីបន្តទៀតនោះទេនាពេលអនាគត៕

បរទេស៖ វិទ្យាស្ថាន Tata ក្នុងទីក្រុង Mumbai ប្រទេសឥណ្ឌា បានស្រាវជ្រាវដោយជោគជ័យនូវឱសថពិសេសមួយដែលមានសមត្ថភាពការពារការកើតឡើងវិញនៃជំងឺមហារីក និងកាត់បន្ថយផលប៉ះពាល់នៃការព្យាបាលដោយប្រើគីមីបាន ៥០%។កាលពីពេលថ្មីនេះ យោងតាម Live Mint បានឱ្យដឹងថា ក្រុមអ្នកស្រាវជ្រាវនៅវិទ្យាស្ថាន Tata ក្នុងទីក្រុង Mumbai បានប្រកាសពីការបង្កើតថ្នាំប្រភេទគ្រាប់ដែលមានឈ្មោះថា R+Cu ត្រូវបានបង្កើតឡើងបន្ទាប់ពីការស្រាវជ្រាវអស់រយៈពេល ១០ ឆ្នាំមកហើយ។ ថ្នាំនេះមានសមត្ថភាពបញ្ឈប់ការកើតមហារីកជាលើកទីពីរចំពោះអ្នកជំងឺ លើសពីនេះវាក៏កាត់បន្ថយផលប៉ះពាល់នៃវិធីសាស្រ្តដូចជា ការព្យាបាលដោយវិទ្យុសកម្ម ឬការព្យាបាលដោយគីមី ៥០% ផងដែរ។

វេជ្ជបណ្ឌិត Rajendra Badve គ្រូពេទ្យវះកាត់ផ្នែកមហារីកជាន់ខ្ពស់នៅមន្ទីរពេទ្យ Tata Memorial បាននិយាយថា ថ្នាំនេះត្រូវបានធ្វើតេស្តលើសត្វកណ្តុរ មានផលប៉ះពាល់តិចតួចណាស់ និងបង្ហាញលទ្ធផលដ៏ជោគជ័យ។ ក្រុមស្រាវជ្រាវក៏បាននិយាយដែរថា ថ្នាំនេះគឺជាក់លាក់ចំពោះអ្នកដែលមានជំងឺមហារីកលំពែង សួត និងមាត់។ បច្ចុប្បន្នអ្នកវិទ្យាសាស្ត្រកំពុងរង់ចាំការយល់ព្រមពីអាជ្ញាធរសុវត្ថិភាពចំណីអាហារ និងស្តង់ដារនៃប្រទេសឥណ្ឌា (FSSAI) ដែលត្រូវបានគេរំពឹងថានឹងចាប់ផ្តើមដំណើរការនៅក្នុងខែមិថុនាដល់ខែកក្កដា ឆ្នាំ២០២៤ ខាងមុខនេះ។

បើយោងតាម Tata Memorial ក៏បានឱ្យដឹងទៀតថា ទិដ្ឋភាពដ៏សំខាន់បំផុតមួយនៅពេលនេះគឺការកំណត់តម្លៃ ដើម្បីផ្គូផ្គងលទ្ធភាពនៃការទូទាត់របស់អ្នកជំងឺ។ ថ្នាំនេះត្រូវបានគេរំពឹងថានឹងមានតម្លៃ ១០០ រូពី ដែលស្មើនឹង ១ ដុល្លារអាមេរិក ដែលធ្វើឱ្យវាអាចប្រើប្រាស់បានសម្រាប់អ្នកជំងឺកាន់តែច្រើន។

គួរបញ្ជាក់ដែរថា Tata Memorial គឺជាកន្លែងស្រាវជ្រាវជំងឺមហារីកដ៏ធំ និងចំណាស់ជាងគេបំផុតមួយនៅក្នុងពិភពលោក ដែលផ្តល់មូលនិធិ និងគ្រប់គ្រងដោយនាយកដ្ឋានថាមពលអាតូមិករបស់ប្រទេសឥណ្ឌា។ រដ្ឋាភិបាលឥណ្ឌាចាត់ទុកជំងឺមហារីកជាមូលហេតុនៃការព្រួយបារម្ភ ដោយមានអត្រាកើតឡើង និងអត្រាស្លាប់ខ្ពស់បំផុតនៅអាស៊ី។ យោងតាមក្រុមប្រឹក្សាស្រាវជ្រាវវេជ្ជសាស្ត្រឥណ្ឌា (ICMR) ចំនួនករណីមហារីកនៅក្នុងប្រទេសអាចកើនឡើងពី ១.៤៦ លានករណីក្នុងឆ្នាំ ២០២២ ដល់ ១.៥៧ លានករណីក្នុងឆ្នាំ ២០២៥៕