ជប៉ុន៖ អត្រាចំនួនប្រជាជនវ័យចំណាស់នៅក្នុងប្រទេសជប៉ុនកាន់តែច្រើនបានសម្រុកមកដាក់ពាក្យរកការងារធ្វើ ដើម្បីរកប្រាក់ចំណូលបន្ថែម ក៏ដូចជាមិនចង់ស្ថិតក្នុងភាពទំនេរច្រើនពេកនោះទេ។

យោងតាមមជ្ឈមណ្ឌលការងារ Hello Work ក្នុងស្រុក Ikebukuro នៃទីក្រុងតូក្យូ បានឱ្យដឹងថា បច្ចុប្បន្នក្រុមហ៊ុនជប៉ុនជិត ៤០% បានជួលមនុស្សដែលមានអាយុលើសពី ៦០ ឆ្នាំមកធ្វើការទាំងពេញម៉ោង និងក្រៅម៉ោងដោយសារតែតម្រូវការកើនឡើងខ្លាំង។ បុរសវ័យ ៦៦ ឆ្នាំដែលមកបំពេញពាក្យស្នើសុំនោះបាននិយាយថា៖ «គាត់ចង់ធ្វើការរហូតដល់អាយុ ៧០ ឆ្នាំ»។ “ការនៅផ្ទះគ្រប់ពេលវេលាធ្វើឱ្យគាត់មានអារម្មណ៍មិនមានសុវត្ថិភាព និងគ្មានសុខភាពល្អ”។

គាត់បានចូលនិវត្តន៍កាលពីខែវិច្ឆិកាឆ្នាំមុន ហើយកំពុងស្វែងរកមុខរបរថ្មី។ ទិន្នន័យពីរដ្ឋាភិបាលជប៉ុនបង្ហាញថាតម្រូវការសម្រាប់មនុស្សដែលមានអាយុលើសពី ៦៥ ឆ្នាំដើម្បីស្វែងរកការងារបានកើនឡើងទ្វេដងក្នុងរយៈពេល ១០ ឆ្នាំ។ មនុស្សចាស់ខ្លះត្រូវការប្រាក់ចំណូល ប៉ុន្តែអ្នកផ្សេងទៀតគ្រាន់តែចង់បន្តការងារតែប៉ុណ្ណោះ។ នៅ Hello Work មានមនុស្សចាស់ប្រហែល ១០០ នាក់មកកន្លែងពិគ្រោះយោបល់ជារៀងរាល់ថ្ងៃ ដែលភាគច្រើនមានអាយុ ៧០ ឆ្នាំ និង ៨០ ឆ្នាំ។ បាតុភូតនេះបានកើតឡើងតាំងពីឆ្នាំ ២០២០ រហូតមកដល់បច្ចុប្បន្ន ដោយពួកគាត់ស្វែងរកការងារពេញម៉ោងជំនួសឱ្យការងារក្រៅម៉ោង។

អ្នកតំណាង Hello Work បាននិយាយថា “ពួកគាត់ចូលចិត្តការងារការិយាល័យ ប៉ុន្តែជារឿយៗត្រូវទទួលការងារសម្អាត ឬគ្រប់គ្រងអាផាតមិន”។ បីដងក្នុងមួយខែ អង្គភាពនេះរៀបចំសិក្ខាសាលាសម្រាប់មនុស្សចាស់ ដើម្បីលើកទឹកចិត្តពួកគាត់ឱ្យពិចារណាពីឱកាសការងារក្នុងមុខជំនាញផ្សេងៗជាច្រើន។ លើសពីនេះ ក្រុមហ៊ុនមួយចំនួនក៏កំពុងប្រឈមនឹងកង្វះកម្លាំងពលកម្មយូរ ដូច្នេះហើយទើបពួកគេជ្រើសរើសមនុស្សចាស់បន្ថែមទៀត។

គួរបញ្ជាក់ដែរថា ប្រទេសជប៉ុនមាន ៥២% នៃប្រជាជនដែលមានអាយុពី ៦៥-៦៩ ឆ្នាំចូលរួមក្នុងទីផ្សារការងារ ដែលជាចំនួនខ្ពស់បំផុតក្នុងចំណោមប្រទេសចំនួន ៣៧ ដែលមានទិន្នន័យ។ អត្រានេះនៅសហរដ្ឋអាមេរិកគឺ ៣៣%, ចក្រភពអង់គ្លេស ២៦% និងអាល្លឺម៉ង់ ២០% ។ នៅក្នុងក្រុមអាយុធ្វើការ ៧០-៧៤ ប្រទេសជប៉ុនមានអត្រា ៣៤% ទីពីរបន្ទាប់ពីកូរ៉េខាងត្បូងដែលមានអត្រា ៤១% នៃចំនួនប្រជាជនវ័យចំណាស់ដែលស្វែងរកការងារធ្វើ នេះបើយោងតាមការស្ទង់មតិរបស់អង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ឆ្នាំ ២០២២៕

លោក Jin Chao chun ដែលមហាជនស្គាល់យ៉ាងទូលំទូលាយថាជាតួអង្គ ប៉ាវចិន ក្នុងរឿង តុលាការមុខដែក ឆ្នាំ១៩៩៣ បានលេចមុខជាលើកដំបូងក្នុងរយៈពេល៦ឆ្នាំបន្ទាប់ពីលោកវះកាត់ខួរក្បាល។ ការលេចមុខសិល្បករតៃវ៉ាន់ដ៏មានប្រជាប្រិយរូបនេះគឺលោកថែមទាំងស្លៀកសំលៀកបំពាក់ជាតួអង្គប៉ាវចិន និងតុបតែងមុខខ្មៅផងដែរ។

យោងតាមការចុះផ្សាយពីសារព័ត៌មានបរទេសកាលពីថ្ងៃទី២៧ ខែកុម្ភៈ លោក Jin Chao chun ហៅ ប៉ាវចិន មានអាយុ៧៣ឆ្នាំ បានចូលរួមជាភ្ញៀវកិត្តិយសកម្មវិធីនៅលើឆាណែលយូធូបរបស់មិត្តលោកដែលជាផលិតករហុងកុងគឺលោក Gary Yeung។ ការចូលរួមរបស់ ប៉ាវចិន កាន់តែពិសេសទោះបីជាក្តៅយ៉ាងណាប៉ុន្តែ លោកបានយល់ព្រមស្លៀកសម្លៀកបំពាក់ដូចគ្នានៅក្នុងរឿង តុលាការមុខដែក ជាមួយនឹងការតុបតែងមុខខ្មៅ។ វាជាពេលវេលាដ៏កម្រមួយសម្រាប់សិល្បកររូបនេះក្នុងការថតកម្មវិធីនេះ ចាប់តាំងពីលោកបានឈឺនៅឆ្នាំ២០១៧ ។

លោក Jin Chao chun ត្រូវបានគេធ្វើរោគវិនិច្ឆ័យថាមានដុំសាច់ខួរក្បាលទំហំ៩សង់ទៅម៉ែត្រ ហើយត្រូវការវះកាត់ ខណៈលោកក៏មានជំងឺពេលគេងពិបាកដកដង្ហើម ដូច្នេះលោកតែងតែពាក់ឧបករណ៍ដកដង្ហើមពេលគេង។ ក្រោយចូលនិវត្តន៍ជាង១០ឆ្នាំ ប៉ាវចិន មិនបានចូលរួមក្នុងគម្រោងភាពយន្តណាមួយទេ។ ទោះជាយ៉ាងណាក៏ដោយ លោកគ្រោងនឹងផលិតរឿងថ្មី ប៉ាវចិន នៅពេលដែលតួអង្គចាស់ ហើយសក់របស់លោកប្រែជាពណ៌ស។ តារាសម្តែងរូបនេះ បានព្យាយាមបង្កើតរូបភាព ប៉ុន្តែមិនបានបង្ហាញពីពេលវេលាថតនោះទេ។

នៅក្នុងកម្មវិធី ប៉ាវចិន បាននិយាយអំពីអនុស្សាវរីយ៍នៃការថតរឿង តុលាការមុខដែក ឆ្នាំ ១៩៩៣ ។ ដោយសារតែលោកមានភាពស្រើបស្រាលក្នុងតួអង្គខ្លាំងពេក លោកបានកំណត់ការរួមភេទជាមួយភរិយារបស់លោក។ ភាពយន្ដនេះបានធ្វើឱ្យលោកខ្ជះខ្ជាយថាមពល ការតុបតែងខ្លួនតែម្នាក់ឯង ធ្វើឱ្យតារាសម្ដែងមានការលំបាក ដោយសារតែលោកត្រូវស្លៀកពាក់ជាច្រើនជាន់ ដើម្បីមើលទៅខ្ពស់ជាងមុន ហើយនឹងត្រូវតុបតែងមុខខ្មៅស្រអាប់។

ទោះយ៉ាងណា ការងារនេះទទួលបានជោគជ័យលើសពីការរំពឹងទុក ព្រោះកាលពីដំបូងស្ថានីយគ្រោងនឹងថតចំនួន ១៥ ភាគ ប៉ុន្តែបន្ទាប់មកថតបានជិត ២៥០ ភាគ។ លោក បាននិយាយថា «បន្ទាប់ពីលេងជាតួអង្គប៉ាវចិន លោកមិនអាចចូលទៅក្នុងស្មារតីនៃការដើរតួផ្សេងទៀតទេលោកមានអារម្មណ៍ថាតួអង្គផ្សេងទៀត លោកលែងចាប់អារម្មណ៍ទៀតហើយ» ។

សិល្បករជើងចាស់រូបនេះធ្លាប់និយាយថាមុននឹងសម្តែងជាតួអង្គ ប៉ាវចិន លោកញ៉ាំច្រើនដើម្បីឱ្យធាត់ ដើម្បីបង្ហាញពីអំណាចរបស់តួអង្គ ប៉ាវចិន។ ទោះជាយ៉ាងណាក៏ដោយចាប់ពីពេលនោះមកលោកមិនអាចស្រកទម្ងន់បានទេ។ លោកទទួលរងពីជំងឺលើសឈាម ជាតិស្ករក្នុងឈាមខ្ពស់ និងខ្លាញ់ក្នុងឈាមខ្ពស់។ ដ្បិតតែលោកមានជំងឺក្តី ប៉ុន្តែភរិយារបស់លោកមើលថែទាំតាមបែបវិទ្យាសាស្ត្រ ដូច្នេះហើយស្ថានភាពរបស់លោកបានប្រសើរឡើងបន្តិចម្តងៗ។

គួរបញ្ជាក់ថា បច្ចុប្បន្នសិល្បកររូបនេះរស់នៅតៃវ៉ាន់ជាមួយភរិយាដោយអ្នកទាំងពីរពុំមានកូននោះទេ៕

បទ “SOLO” របស់ Jennie ក្លាយជា MV តារា K-Pop នារីទី១ ដែលមានអ្នកចូលមើលចំនួន១ពាន់លានលើឆាណែលយូធូប។ នេះគឺវីដេអូចម្រៀងរបស់សមាជិកក្រុម BLACKPINK ដំបូងគេដែលបានចេញបទចម្រៀងទោល។

បទ “SOLO” មានការចូលមើលលើសពី ១ពាន់លានដង នៅថ្ងៃទី២៩ ខែកុម្ភៈ ឆ្នាំ២០២៤ ។ ដែលអាចនិយាយបានថានេះគឺប្រហែល៥ ឆ្នាំ ៣និង១៧ ថ្ងៃចាប់តាំងពីការចេញផ្សាយរបស់វានៅថ្ងៃទី១២ ខែវិច្ឆិកា ឆ្នាំ២០១៨ ។ ជាមួយគ្នានេះផងដែរ “SOLO” គឺជាវីដេអូចម្រៀង K-pop ដំបូងបង្អស់ដែលមិនធ្លាប់មានរបស់តារាចម្រៀងនារី Kpop ដែលមានអ្នកចូលមើល ១ ពាន់លានដង។

មិនត្រឹមតែ Jennie ប៉ុណ្ណោះទេដែលបញ្ចេញឥទ្ធិពលរបស់ខ្លួននៅក្នុងប្រវត្តិសាស្រ្តកូរ៉េខាងត្បូង សម្រាប់ជាក្រុមវិញ BLACKPINK បច្ចុប្បន្នមានវីដេអូចម្រៀងចំនួន ៥ ដែលមានអ្នកចូលមើលជាង ១ ពាន់លានដង ខណៈបទ “DDU-DU DDU-DU” លើសពី ២ ពាន់លានដង។

បច្ចុប្បន្ន Jennie បានបង្កើតក្រុមហ៊ុនផ្ទាល់ខ្លួនមានឈ្មោះថា OA សម្រាប់សកម្មភាពទោលរបស់ខ្លួន បន្ទាប់ពីមិនបន្តកុងត្រាបុគ្គលជាមួយផលិតកម្ម YG ហើយរយៈពេលចុងក្រោយនេះនាងបានបង្ហាញមុខជាច្រើននៅក្នុងកម្មវិធីផ្សេងៗទាំងនៅឆាណែលយូធូប និងកម្មវិធីទូរទស្សន៍។ ក្រៅពី Jennie បង្កើតក្រុមហ៊ុនផ្ទាល់ខ្លួនសមាជិកផ្សេងទៀតដូចជា Lisa និង Jisoo ក៏បានបង្កើតក្រុមហ៊ុនផ្ទាល់ខ្លួនសម្រាប់សកម្មភាពបុគ្គលផងដែរ៕

ប្រទេសម៉ាឡេស៊ី ៖ យោងតាមសារព័ត៌មានបរទេសបានរាយការណ៍ កាលពីថ្ងៃទី២៨ ខែកុម្ភៈ ឆ្នាំ២០២៤ ថា នារីម៉ាឡេស៊ីម្នាក់បានផឹកកាហ្វេសម្រកទម្ងន់ ហើយជាលទ្ធផល ទម្ងន់របស់នាងក៏បានស្រកចុះចាប់ពី១០គីឡូក្រាម ទៅ២០គីឡូក្រាម ។ ប៉ុន្តែនាងមានអារម្មណ៍សោកស្តាយអស់មួយជីវិត ពីព្រោះអ្វីដែលនាងទទួលបាន គឺមិនមែនគ្រាន់តែធ្វើឱ្យនាងស្គមជាងមុននោះទេ ប៉ុន្តែនាងបានកើតជំងឺកាចសាហាវផងដែរ ។

មនុស្សភាគច្រើនអាចធ្លាប់ឮពាក្យថា ការផឹកកាហ្វេនឹងអាចជួយសម្រកទម្ងន់បាន ដោយសារវាអាចធ្វើឱ្យអ្នកផឹកស្រកទម្ងន់ក្នុងរយៈពេលខ្លី ។ ប៉ុន្តែសម្រាប់មនុស្សចំនួនទៀតដែលសម្រកទម្ងន់ដោយការផឹកកាហ្វេខុសក្បួននោះ គឺអាចនឹងធ្វើឱ្យអ្នកនោះកើតជំងឺកាចសាហាវទៅវិញ ។ ជាក់ស្តែង នារីម្នាក់ឈ្មោះ Jazira Julaili អាយុ៣០ឆ្នាំ រស់នៅប្រទេសម៉ាឡេស៊ី បានលើកឡើងពីការសម្រកទម្ងន់ខុសក្បួនរបស់ខ្លួន រហូតដល់ក្លាយជាប្រធានបទដែលមហាជនចាប់អារម្មណ៍យ៉ាងខ្លាំងក្នុងបណ្តាញសង្គម ។

នារីរូបនេះបានប្រឈមជាមួយបញ្ហាសុខភាពយ៉ាងខ្លាំងក្លា ក្រោយពីនាងជ្រើសរើសយកការផឹកកាហ្វេដើម្បីសម្រកទម្ងន់អស់រយៈពេលយូរ ។ បើតាមការចុះផ្សាយរបស់សារព័ត៌មានបរទេសឱ្យដឹងថា នារីនេះបានផឹកកាហ្វេសម្រកទម្ងន់ តាំងពីឆ្នាំ២០២២ មកម៉្លេះ ។ នាងយល់ថា នាងនឹងទទួលបានលទ្ធផលគួរឱ្យពេញចិត្ត គឺទម្ងន់របស់នាងនឹងស្រកចុះ ចាប់ពី១០គីឡូក្រាម ទៅ២០គីឡូក្រាម ដោយគ្រាន់តែនាងផឹកកាហ្វេឱ្យបានរាល់ថ្ងៃ ។

ការយល់ឃើញបែបនេះ ទើបនាងសម្រេចចិត្តផឹកកាហ្វេរហូតមក ហើយនាងពុំបានគិតពីផលប៉ះពាល់របស់វាទេ ។ ប៉ុន្តែតើដឹងឬទេថា ពេលវេលាបានកន្លងផុតទៅ ស្រាប់តែសុខភាពរបស់នាងចាប់ផ្តើមចុះខ្សោយបន្តិចម្តងៗ រហូតដល់នាងដួលងងឹតមុខលែងដឹងខ្លួន និងត្រូវបានគេបញ្ជូនទៅកាន់បន្ទប់សង្គ្រោះបន្ទាន់នៅមន្ទីរពេទ្យ ។ គ្រូពេទ្យលើកឡើងថា តម្រងនោមរបស់នាងដំណើរការខុសប្រក្រតី ឬដំណើរការតិចជាងមុន ។ ចុងក្រោយ នាងត្រូវព្យាបាលតម្រងនោមអស់រយៈពេលជាច្រើនឆ្នាំ និងចំណាយប្រាក់យ៉ាងច្រើន ។

នាង Jazira Julaili ប្រាប់ថា នាងបានអនុញ្ញាតឱ្យគេយករឿងរ៉ាវរបស់ខ្លួនមកចុះផ្សាយក្នុងបណ្តាញសង្គម ដោយសារនាងចង់ដាស់តឿនទៅកាន់មនុស្សផ្សេងទៀតឱ្យគិតពីផលប៉ះពាល់នៃការសម្រកទម្ងន់ខុសវិធី ព្រោះតែចង់ឱ្យរូបរាងខាងក្រៅរបស់ខ្លួនមើលទៅស្រស់ស្អាត ប៉ុន្តែវាបានបំផ្លាញរាងកាយដោយមិនដឹងខ្លួន ។ បច្ចុប្បន្ន ជំងឺរបស់នាងបានឈានទៅដល់ចំណុចធ្ងន់ធ្ងរ និងពុំអាចដោះស្រាយអ្វីបានឡើយ ។

ចុងក្រោយ នាងនិយាយថា ៖ «តម្លៃព្យាបាលតម្រងនោមរបស់ខ្ញុំខ្ពស់ណាស់ ហើយបើអ្នកពុំបានទិញធានារ៉ាប់រងសុខភាព ឬគ្មានប្រាក់សម្រាប់ព្យាបាលតម្រងនោមទេនោះ ចូរអ្នកកុំបរិភោគអាហារបំប៉នដែលមិនចាំបាច់បែបនេះ ។ បើអ្នកចង់សម្រកទម្ងន់ ចូរព្យាយាមហាត់ប្រាណ និងបរិភោគអាហារប្រចាំថ្ងៃឱ្យមានតុល្យភាព ហើយបណ្តោយឱ្យរាងកាយរបស់អ្នកស្រកទម្ងន់បន្តិចម្តងៗ តែមានសុវត្ថិភាព ។ ចូរចាំថា កុំប្រើប្រាស់ផ្លូវកាត់ដើម្បីសម្រកទម្ងន់ឱ្យសោះ» ៕

បរទេស៖ កាលពីថ្មីៗនេះ នៅក្នុងកម្មវិធីពិព័រណ៍ Mobile Word (MWC) 2024 ក្រុមហ៊ុន Samsung បានដាក់បង្ហាញនូវចិញ្ចៀនឆ្លាតវៃ Galaxy Ring របស់ខ្លួនជាផ្លូវការ ក្រៅពីផលិតផលនេះក្រុមហ៊ុនក៏បានបញ្ចេញនូវផលិតផលពិសេសបំផុតមួយទៀតគឺទូរស័ព្ទកោង ដែលអាចបត់បាន និងពាក់នៅលើកដៃបាន។គំនិតទូរស័ព្ទបត់តូចដែល Samsung បង្ហាញក្នុងពិព័រណ៍នេះមានឈ្មោះថា Cling Band ។ ឧបករណ៍នេះមានអេក្រង់ OLED ដែលអាចបត់បែនបាន និងអាចប្រើប្រាស់បានជាស្មាតហ្វូនធម្មតា ឬនាឡិកាឆ្លាតវៃនៅពេលពាក់នៅលើកដៃ ដោយអាស្រ័យលើគោលបំណងនៃការប្រើប្រាស់។

នៅក្នុងទម្រង់បញ្ឈរ ឧបករណ៍នេះមើលទៅដូចជាទូរស័ព្ទដៃផ្សេងទៀតនៅលើទីផ្សារ ជាមួយនឹងទម្រង់ស្តើង កាមេរ៉ាមុខពេញអេក្រង់ និងខាងក្រោយ។ ឧបករណ៍នេះក៏មានរន្ធ USB Type-C និងឧបករណ៍បំពងសម្លេងខាងក្រៅនៅខាងក្រោមផងដែរ។ រចនាសម្ព័នដែលមានចង្អូរតូចៗជាច្រើននៅចំកណ្តាលរាងកាយគាំទ្រការពត់កោងនៃអេក្រង់ដែលអាចបត់បែនបាន។
នៅពេលដែលពត់ នោះឧបករណ៍នេះមើលទៅដូចជាលំហ រីឯនៅផ្នែកខាងក្រោយ រួមជាមួយនឹងកាមេរ៉ា គឺជាប្រព័ន្ធសេនស័រវាស់ចង្វាក់បេះដូង ដែលបម្រើមុខងារសុខភាពនៅពេលពាក់នៅលើកដៃ បើទោះបីជាវាមើលទៅប្លែកប៉ុណ្ណាក៏ដោយ ក៏វាពិតជាមានភាពទាក់ទាញខ្លាំងណាស់នាបច្ចុប្បន្ននេះ។

ទោះជាយ៉ាងណា នេះគ្រាន់តែជាគំនិតថ្មីមួយដើម្បីណែនាំពីភាពបត់បែននៃអេក្រង់ OLED ដែលអាចបត់បែនបានពី Samsung Display ។ វាក៏មានគុណវិបត្តិចំពោះគំនិតនេះផងដែរ នៅពេលប្រើក្នុងរបៀបទូរស័ព្ទ ឧបករណ៍ចាប់សញ្ញាត្រួតពិនិត្យសុខភាពនឹងមិនដំណើរការទេ។ លើសពីនេះ ការពាក់វាពេលគេងក៏នឹងធ្វើឱ្យមានអារម្មណ៍មិនស្រួលផងដែរ។
ថ្វីត្បិតតែវាគ្រាន់តែជាគំនិតដើម្បីបង្ហាញពីបច្ចេកវិទ្យាក៏ដោយ ក៏វាមិនអាចប្រកែកបានថា បច្ចេកវិទ្យាអេក្រង់ OLED បានឈានដល់ជំហានថ្មីមួយ ដោយសម្រេចបាននូវគំនិតជាច្រើនដែលទើបតែបានលេចឡើងនៅក្នុងការស្រមើស្រមៃរបស់មនុស្សជាច្រើនឆ្នាំមុន៕