តារាចម្រៀងដែលរក្សាភាពលេចធ្លោប្រចាំផលិតកម្មរស្មីហង្សមាស អ្នកនាង ពេជ្រ សោភា ត្រូវបានអ្នកបណ្តាញសង្គមម្នាក់រិះគន់ចំៗថាជា«តារាថោ.ក» ក្រោយពីបង្ហោះវីដេអូមួយជាមួយ លីម តិចម៉េង ដោយភ្ជាប់មកជាមួយពាក្យថា «បឿ.ក»។ ពាក្យថា «បឿ.ក» នាពេលបច្ចុប្បន្នអ្នកមួយចំនួនបានសម្គាល់ថាជាពាក្យពេញនិយមទៅរឿងខាងផ្លូ.វភេ.ទ។ ទោះជាយ៉ាងណាតារាចម្រៀងរូបនេះបានតបទៅអ្នករិះគន់នោះវិញថា គិតអាក្រក់ទើបឃើញពាក្យនេះថាអាក្រក់។
នៅល្ងាចថ្ងៃទី២៩ ខែកុម្ភៈ តារាចម្រៀង ពេជ្រ សោភា បានបង្ហោះវីដេអូខ្លីមួយជាមួយ លីម តិចម៉េង ម្ចាស់ពាន Cambodian Idol រដូវកាលទី៤ ដោយភ្ជាប់ជាមួយចំណងជើងថា «ចែខ្ញុំស្រលាញ់ស្រីបឿក»។ ការប្រើពាក្យថា បឿក នេះរបស់ ពេជ្រ សោភា វាបានក្លាយទៅជារឿងរ៉ាវមួយដែលត្រូវរងនូវមតិរិះគន់ពីអ្នកលេងបណ្តាញសង្គមដោយពាក្យធ្ងន់ៗតែម្តងមកកាន់នាង។
គណនីហ្វេកប៊ុកមួយឈ្មោះថា សុមេធ ហេង បានចូលទៅខម្មិនលើការបង្ហោះរបស់ ពេជ្រ សោភា ថា «ភាសាថោកទាបដែលកំពុងពេញនិយម កំពូលតារាថោកៗយកទៅផ្សាយ»។ ប្រយោគថាជាតារាថោកនេះ ពេជ្រ សោភា បានឆ្លើយតបវិញថា «មកពីអ្នកគិតអាក្រក់ទើបយល់ឃើញអាក្រក់ ខ្ញុំសួរមួយវិញចុះ តើអ្នកគិតថាគ្មានមនុស្សឈ្មោះហ្នឹងមែនទេ?»។
ដើមចមនាំឱ្យតារាចម្រៀងល្បីឈ្មោះរូបនេះត្រូវរងនូវមតិរិះគន់ថាជាតារាថោក យកភាសាថោកទាបមកផ្សាយនេះ ដោយសារតែនារយៈពេលចុងក្រោយនេះពាក្យថា «បឿក» ត្រូវបានអ្នកមួយចំនួនពេញនិយមសម្តៅទៅលើរឿងផ្លូវភេទ។
ចំណែកឯអ្នកលេងបណ្តាញសង្គមផ្សេងទៀតបានចូលទៅខម្មិនដែរថា «មកពីគាត់យល់ថាបឿកនឹងគឺប្រើសំរាប់រួមភេទតែបើបឿកសម្រាប់ម៉ែខ្ញុំគឺកណ្ដាលឆ្អឹងខ្នងបឿករត់ទាន់ៗមិនទាន់វែកហោះ»។ ប្រយោគនេះ ពេជ្រ សោភា បានចូលទៅឆ្លើយតបថា «បងនិយាយមែន អាណិតអ្នកគ្នាមានឈ្មោះនឹងណាស់»។ អ្នកផ្សេងទៀត បានខម្មិនដែរថា «ពីមុនមុនពេលវៃកូនៗ ខ្ញុំតែងតែប្រើបឿកនិង និយាយមិនស្តាប់ បឿកកណ្តាលខ្នងលូវហើយ ដល់លូវគេថា បឿក និង. រួម ភេ. ទ. ចឹងខ្ញុំលែងហ៊ាននិយាយពាក្យនឹងទៀតហើយ»។
មិនត្រឹមតែតារាចម្រៀង ពេជ្រ សោភា ទេដែលត្រូវរងនូវសម្តីរិះគន់ពីសំណាក់អ្នកលេងបណ្តាញសង្គម។ ក្នុងនោះតារាចម្រៀងរួមទ្រនំលោក ឆន សុវណ្ណារាជ ក៏ត្រូវគេជេរទក់សាច់ដូចគ្នាដោយសារតែបទចម្រៀងរបស់លោកមួយបទមានចំណងជើងថា «ពូក៏ដូចប៉ា» ៕
