ពិតណាស់ ជាទូទៅកាសែតភាគច្រើនគឺមានការបោះពុម្ពជារៀងរាល់ថ្ងៃ ដោយចេញផ្សាយនូវព័ត៌មាន ឬព្រឹត្តិការណ៍កើតឡើងផ្សេងៗជាប្រចាំតាមរយៈការចែកចាយផ្ទាល់ ឬតាមបណ្តាញសង្គមនានា។ ទោះជាយ៉ាងណាបើយោងតាម AP កាលពីថ្ងៃទី១ ខែមីនា ឆ្នាំ២០២៤ បានរាយការណ៍រឿងចម្លែកមួយអំពីកាសែតរបស់ស្ថាប័នបារាំងមួយឈ្មោះថា La Bougie du Sapeur ដែលរឿងចម្លែកនោះគឺថាកាសែតនេះបោះពុម្ពចេញផ្សាយព័ត៌មានតែនៅថ្ងៃទី ២៩ ខែកុម្ភៈប៉ុណ្ណោះ ពោលគឺវានឹងបោះពុម្ពរៀងរាល់ ៤ ឆ្នាំម្តង ដែលជាការបោះពុម្ភផ្សាយតែឆ្នាំបង្គ្រប់ប៉ុណ្ណោះ។

កាសែតបារាំងដ៏ចម្លែកនេះ ភាគច្រើនចេញផ្សាយតែព័ត៌មានដែលពោរពេញទៅដោយពាក្យចចាមអារ៉ាម និងអត្ថាធិប្បាយអំពីព្រឹត្តិការណ៍ក្នុងរយៈពេល ៤ ឆ្នាំកន្លងមកនេះ។ ការបោះពុម្ពឆ្នាំ ២០២៤ នៃកាសែតនេះបានរួមបញ្ចូលអត្ថបទមួយដែលបង្ហាញថាប្រទេសបារាំងមិនត្រូវការសាលារៀនទៀតទេ ដោយសារបញ្ញាសិប្បនិម្មិត។ មួយវិញទៀតគឺថាបារាំងនឹងធ្វើការរុះរើ Eiffel Tower ក្នុងអំឡុងពេលកីឡាអូឡាំពិកទីក្រុងប៉ារីស ដើម្បីកាត់បន្ថយហានិភ័យផ្នែកសន្តិសុខ ហើយអនុញ្ញាតឱ្យ IKEA ជួយរៀបចំវាឡើងវិញ។

ការអត្ថាធិប្បាយរបស់កាសែតនេះបានធ្វើឱ្យមនុស្សភាគច្រើនហួសចិត្ត និងអស់សំណើចជាខ្លាំងអំពីការសរសេរមាតិការប្លែកៗទាំងនេះ ទោះជាយ៉ាងណាក៏ដោយ កាសែតនេះមិនមែនជាកាសែតធ្ងន់ធ្ងរទេ។ ក្រុមហ៊ុនកាសែតបារាំង La Bougie du Sapeur បានបង្កើតឡើងនៅថ្ងៃទី២៩ ខែកុម្ភៈ ឆ្នាំ១៩៨០ ដោយកើតឡើងពីក្រុមមិត្តភ័ក្តិដែលសប្បាយរីករាយជាមួយគ្នាហើយពួកគេក៏ចាប់ផ្តើមមានគំនិតចង់បង្កើតកាសែតមួយដែលនិយាយអំពីរឿងកំប្លែង ឬសរុបព្រឹត្តិការណ៍ក្នុងរយៈពេល ៤ ឆ្នាំកន្លងមកដើម្បីចុះផ្សាយរៀងរាល់ ៤ ឆ្នាំម្តងនិងចំតែថ្ងៃទី២៩ ខែកុម្ភៈប៉ុណ្ណោះ ក្នុងគោលបំណងធ្វើឱ្យប្លែកពីគេ។

និពន្ធនាយកបាននិយាយថា អត្ថបទជាច្រើនប្រហែលជាមិនពិត ហើយវាជាព័ត៌មានចាស់ៗ ប៉ុន្តែនោះជាគោលបំណងរបស់កាសែតនេះដើម្បីធ្វើឱ្យមនុស្សមានអារម្មណ៍ល្អ។ សម្រាប់ការបោះពុម្ពមុនៗ ឬកាលពីបួនឆ្នាំមុន ក្នុងអំឡុងពេលនៃការផ្ទុះឡើងនៃ COVID-19 កាសែត La Bougie du Sapeur លក់បាន ១២០,០០០ ច្បាប់ ហើយ ប្រាក់ចំណូលដែលរកបាននោះ បានបរិច្ចាគដល់អង្គការសប្បុរសធម៌សម្រាប់អ្នកដែលមានបញ្ហាក្នុងការអភិវឌ្ឍន៍ រួមទាំងជំងឺអូទីសឹមផងដែរ៕

ប្រទេសវៀតណាម ៖ ប្រទេសវៀតណាមបានបោះជំហានមួយកម្រិតទៀតក្នុងការពង្រឹងទីផ្សារនាំចេញទុរេនទៅក្រៅប្រទេស ដោយវៀតណាមបានកំណត់គោលដៅស្ថិតក្នុងចំណោមប្រទេសនាំចេញទុរេនទៅក្រៅប្រទេសក្នុងបរិមាណច្រើន ស្មើនឹងតម្លៃរាប់លានដុល្លារអាមេរិក ។ លើសពីនេះ វៀតណាមនឹងទាញយកផលប្រយោជន៍ពីគុណសម្បត្តិនាពេលបច្ចុប្បន្ន និងកែលម្អគុណភាពផ្លែឈើ ដោយរដ្ឋាភិបាលវៀតណាមបានពង្រឹងនូវសក្តានុពលក្នុងវិស័យនេះ ។

ក្រសួងកសិកម្ម និងអភិវឌ្ឍន៍ជនបទវៀតណាមលើកឡើងថា ប្រទេសវៀតណាមមានផ្ទៃដីដាំដុះដំណាំទុរេន ស្មើជាង១១ម៉ឺនហិកតាឯណោះ ដែលបានផ្តល់ទិន្នផលជិតស្មើ៨៥ម៉ឺនតោនក្នុង១ឆ្នាំ ។ ចំណែកតំបន់សំខាន់ៗសម្រាប់ដាំដំណាំទុរេន រួមមាន ៖ តំបន់ខ្ពង់រាបកណ្តាលបានគ្របដណ្តប់ផ្ទៃដី៤៧% នៃផ្ទៃដីដាំទុរេនសរុបរបស់វៀតណាម បន្ទាប់មក គឺតំបន់ដីសណ្តទន្លេមេគង្គ ស្មើនឹង៣០% ព្រមទាំងតំបន់អាគ្នេយ៍ ស្មើនឹង១៩% ។

ការពេញនិយម និងតម្លៃលក់ខ្ពស់នៅក្នុងទីផ្សារនាំចូល បានធ្វើឱ្យការនាំចេញទុរេនរបស់វៀតណាមទៅក្រៅប្រទេស មានតម្លៃខ្ពស់ជាងការនាំចេញដំណាំផ្សេងទៀត ដូចជា ៖ ម្រេច, ផ្លែស្រកានាគ និងជ័រកៅស៊ូ ជាដើម ។ ចំណែកផ្ទៃដីដាំដំណាំវិញបានពង្រីករហូតដល់ជិត២៥% ក្នុង១ឆ្នាំៗ សម្រាប់រយៈពេល៥ឆ្នាំកន្លងមកនេះ ។

នាយកក្រុមហ៊ុន Intimex Group បានបញ្ជាក់ពីប្រាក់ចំណេញបានពីការដាំទុរេនថា ក្រុមហ៊ុនរបស់លោកទទួលបានប្រាក់ចំណេញខ្ពស់ គឺរហូតដល់២ពាន់លានដុងក្នុង១ហិកតា សម្រាប់រយៈពេល១ឆ្នាំ ។ ហេតុនេះ ការដាំទុរេនទទួលបានប្រាក់ចំណេញខ្ពស់ជាងការដាំដំណាំផ្សេងៗ ដូចជា ៖ ដំណាំកាហ្វេ និងម្រេច ៕

បរទេស៖ អត្តពលិកជនជាតិវៀតណាមម្នាក់ឈ្មោះ Nguyen Trung Cuong បានចូលរួមក្នុងការប្រកួតវិញ្ញាសារត់ឆ្លងខេត្តពីខេត្ត Hai Duong ទីខេត្ត Kiep Bac ក្នុងប្រទេសវៀតណាម ប៉ុន្តែស្រាប់តែជួបឧប្បត្តិហេតុដ៏កម្រមួយដោយត្រូវឆ្កែដេញខាំនៅតាមផ្លូវ ធ្វើឱ្យគាត់ព្យាយាមរត់យ៉ាងលឿនរហូតទទួលបានជ័យជំនះលេខ ១ ក្នុងការរត់ប្រណាំងនេះ។

បើយោងតាមសារព័ត៌មានបរទេសមួយ ដែលបានចុះផ្សាយកាលពីពេលថ្មីៗនេះថា អត្តពលិកអាជីពម្នាក់ឈ្មោះ Nguyen Trung Cuong អាយុ ២៤ឆ្នាំ បានចូលរួមក្នុងការប្រកួតវិញ្ញាសារត់ឆ្លងខេត្តចម្ងាយ ១៥ គីឡូម៉ែត្រ ដែលគាត់បានបញ្ចប់ជាលើកដំបូងជាមួយនឹងកំណត់ត្រា ៤៧ នាទីនិង ៣៨ វិនាទី។ ក្នុងការប្រកួតនោះមានអ្នករត់ប្រណាំងអាជីពជាង ៨៥០ នាក់ចូលរួមប្រកួតប្រជែងក្នុងចម្ងាយ ៥ គីឡូម៉ែត្រ ១០ គីឡូម៉ែត្រ និង ១៥ គីឡូម៉ែត្រ រួមទាំងកីឡាករជម្រើសជាតិជាច្រើនផងដែរ។

ខណៈពេលដែល Trung Cuong បានបញ្ចប់ក្នុងចំណាត់ថ្នាក់លេខ ១ ក្នុងវិញ្ញាសា ១៥ គីឡូម៉ែត្រ ក្លាយជាជើងឯករត់ប្រណាំងក្នុងការប្រកួតវិញ្ញាសារត់ឆ្លងខេត្ត លោក Trung Cuong បាននិយាយថា គាត់បានជួបប្រទះបញ្ហាប្រឈមមួយក្នុងអំឡុងពេលប្រកួត ដោយត្រូវឆ្កែមួយក្បាលដេញខាំគាត់នៅតាមផ្លូវ ធ្វើឱ្យគាត់ត្រូវបង្កើនល្បឿន និងភ័យខ្លាចយ៉ាងខ្លាំងដើម្បីរត់ចេញពីចង្កូមដ៏មុតស្រួចរបស់ឆ្កែ រហូតដល់គាត់ឆ្លងកាត់ខ្សែបន្ទាត់ទីបញ្ចប់ និងទទួលបានជ័យជំនះនេះ។

អត្តពលិករូបនេះបានបន្តទៀតថា ផ្លូវឡើងភ្នំនេះស្អាតណាស់ ប៉ុន្តែខ្ញុំមានបញ្ហាបន្តិច ដោយសារត្រូវឆ្កែដេញតាម តែក៏អរគុណដែរ ដែលធ្វើឱ្យខ្ញុំបានឈានដល់ទីបញ្ចប់ជាមួយនឹងកំណត់ត្រា ៤៧ នាទីនិង ៣៨ វិនាទីសម្រាប់ចម្ងាយ ១៥ គីឡូម៉ែត្រ។ ទោះជាយ៉ាងណាក៏ដោយ បើយោងតាមការបង្ហោះវីដេអូតាមអ៊ីនធឺណិត អ្នកនិពន្ធអត្ថបទម្នាក់បានអត្ថាធិប្បាយថា អត្តពលិកនេះឈ្នះដោយការខិតខំប្រឹងប្រែងផ្ទាល់ខ្លួនរបស់គាត់ និងជំនួយរបស់ឆ្កែផងដែរ ទើបគាត់អាចយកឈ្នះនឹងការប្រកួតឆ្លងខេត្តនេះបាន។

គួរបញ្ជាក់ដែរថា កន្លងមកមានករណីមួយចំនួនដែលអត្តពលិកត្រូវឆ្កែដេញតាមពេលចូលរួមក្នុងព្រឹត្តិការណ៍រត់។ កាលពីឆ្នាំមុន អត្តពលិកកេនយ៉ាម្នាក់ឈ្មោះ Robert Kimutai Ngeno បានជួបប្រទះឧបទ្ទវហេតុស្រដៀងគ្នានេះ ខណៈពេលដែលចូលរួមក្នុងការប្រកួតនៅទីក្រុង Buenos Aires ប្រទេសអាហ្សង់ទីន។ ពេលនោះ Ngeno កំពុងនាំមុខគេ ប៉ុន្តែស្រាប់តែត្រូវឆ្កែដេញតាមផ្លូវ ដែលធ្វើឱ្យគាត់ត្រូវប្រឹងប្រែងយ៉ាងខ្លាំងដើម្បីគេចចេញពីឆ្កែ។ ទោះជាយ៉ាងណា ឧបទ្ទវហេតុនេះបានប៉ះពាល់ដល់ចិត្តគាត់ ដូច្នេះនៅទីបញ្ចប់គាត់បានត្រឹមលេខ ៣ ប៉ុណ្ណោះ៕

បរទេស៖ កាលពីយប់ថ្ងៃទី៥ ខែមីនា ឆ្នាំ២០២៤ មហាសេដ្ឋី Elon Musk បានបង្ហោះរូបភាព meme មួយសន្លឹកនៅលើបណ្តាញសង្គម X របស់គាត់ បន្ទាប់ពីបណ្តាញទំនាក់ទំនងសង្គមរបស់ក្រុមហ៊ុន Meta មិនដំណើរការ ដោយ Musk បានសរសេរថា បណ្តាញសង្គម X ដំណើរការល្អប្រសើរជាងវេទិកា Meta ទ្វេរដង។ នៅម៉ោង ១១: ១៥ នាទីយប់ លោក Musk បានបង្ហោះរូបថតកំប្លែងពីខ្សែភាពយន្ត Penguins of Madagascar ដែលក្នុងនោះនិមិត្តសញ្ញា X ត្រូវបានភ្ជាប់ទៅនឹងតួអង្គមេបញ្ជាការ ខណៈដែលតួអង្គដែលមាននិមិត្តសញ្ញា Instagram, Facebook និង Threads កំពុងបង្ហាញការស្តាប់បង្គាប់បញ្ជា។

នៅក្នុងរូបថតនោះ Musk ក៏បានបញ្ចូលសេចក្តីថ្លែងការណ៍របស់ Andy Stone ដែលជាប្រធានផ្នែកទំនាក់ទំនងនៅ Meta ថា “យើងដឹងថាមនុស្សកំពុងមានការលំបាកក្នុងការប្រើប្រាស់សេវាកម្មរបស់ Meta ដោយឥឡូវនេះយើងកំពុងធ្វើការយ៉ាងលំបាកដើម្បីដោះស្រាយបញ្ហានេះ។ ការបង្ហោះនេះទទួលបានការចូលមើលជាង ២០ លានដងក្នុងរយៈពេលត្រឹមតែមួយម៉ោងប៉ុណ្ណោះ ដោយមាន ២០ ម៉ឺនមតិ និងជាង ៥០ ម៉ឺន Like។ អ្នកនិយមលេងអ៊ីនធឺណិតភាគច្រើនក៏បានឆ្លើយតបជាមួយនឹង memes របស់ Musk ដោយលេងសើចចំពោះបញ្ហា Meta ព្រមទាំងសង្កត់ធ្ងន់លើតួនាទីរបស់ X នៅពេលនេះ។

ការដាច់ភ្លើងរបស់មេតាបានកើតឡើងទូទាំងពិភពលោកក្នុងរយៈពេលប្រហែលពីរម៉ោង។ អ្នកប្រើសេវាបណ្ដាញសង្គមដូចជា Facebook និង Messenger មានគណនីរបស់ពួកគេចេញហើយមិនអាចចូលបានទេ។ ដល់ម៉ោង ១១:២០ យប់ អ្នកខ្លះអាចចូលបានម្តងទៀត ទោះជាយ៉ាងណាក៏ដោយ មនុស្សជាច្រើននៅតែជួបប្រទះនឹងការលំបាកដោយសារហេតុផលដូចជា ភ្លេចពាក្យសម្ងាត់របស់ពួកគេ ខ្វះឧបករណ៍ផ្ទៀងផ្ទាត់ ឬមិនទទួលបានលេខកូដផ្ទៀងផ្ទាត់ជាដើម។

គួរបញ្ជាក់ដែរថា នេះមិនមែនជាលើកទី១ ទេដែល Meta តែងតែសាងកំហុស កាលពីឆ្នាំ ២០២១ កំហុស Meta ស្រដៀងគ្នានេះបានកើតឡើងនៅពេលដែលសេវាកម្មរបស់ក្រុមហ៊ុនជាបន្តបន្ទាប់ មិនអាចចូលដំណើរការបាន នៅលើគ្រប់វេទិកាទាំងអស់ និងក្នុងតំបន់សកលលោកជាច្រើន ដែលមានរយៈពេល ៦ ម៉ោង។ នៅពេលនោះ Meta បាននិយាយថាបញ្ហាគឺបណ្តាលមកពី “កំហុសក្នុងការកំណត់” នៅលើប្រព័ន្ធ។ ហើយនៅឆ្នាំ ២០១៩ កំណែគេហទំព័ររបស់ Facebook ក៏បានបាត់បង់ការតភ្ជាប់រយៈពេល ២៤ ម៉ោងផងដែរ៕

អ្នកប្រើប្រាស់បណ្តាញសង្គមទូទាំងពិភពលោកភ្ញាក់ផ្អើលយ៉ាងខ្លាំង នៅពេលបណ្តាញសង្គមពេញនិយមលំដាប់ពិភពលោក មិនដំណើរការ ដូចជា ៖ Facebook, Instagram និង Threads ។ វាបានធ្វើឱ្យអ្នកប្រើប្រាស់បណ្តាញសង្គមទាំងនេះរាប់លាននាក់នៅទូទាំងពិភពលោក រួមទាំងប្រទេសកម្ពុជាផងដែរ មិនអាច Log in ចូលប្រើប្រាស់គណនីរបស់ខ្លួនបានអស់រយៈពេលជាង១ម៉ោង ។

បណ្តាញសង្គមរបស់ក្រុមហ៊ុន Meta រួមមាន ៖ Facebook, Instagram និង Threads បានផ្អាកដំណើរការភ្លាមៗ កាលពីថ្ងៃទី៥ ខែមីនា ឆ្នាំ២០២៤ (ម៉ោងនៅប្រទេសកម្ពុជា) ក្នុងនោះអ្នកប្រើប្រាស់ Facebook ពុំអាច Log in ចូលគណនីរបស់ខ្លួនបានទេ ខណៈអ្នកប្រើប្រាស់ Instagram ក៏ពុំអាចប្រើប្រាស់បានដូចគ្នាដែរ ។ ក្រោយពីបណ្តាញសង្គមទាំងនេះគាំងអស់រយៈពេលជាង១ម៉ោង បណ្តាញសង្គម Facebook និង Instagram ក៏ត្រឡប់មកដំណើរការឡើងវិញតាមធម្មតា ។

ចំណែកក្រុមហ៊ុន Meta លើកឡើងថា ក្រុមហ៊ុនបានជ្រាបពីបញ្ហាដែលធ្វើឱ្យប៉ះពាល់ដល់ការ Log in ចូលប្រើប្រាស់ Facebook ហើយក្រុមការងារជំនាញកំពុងតែព្យាយាមដោះស្រាយបញ្ហានេះឱ្យបានឆាប់រហ័សបំផុត ។ ក្រុមហ៊ុន Meta បន្តថា វាជាកំហុសបច្ចេកទេស ប៉ុន្តែក្រុមហ៊ុនពុំបានបញ្ជាក់ឱ្យបានច្បាស់ថា ការគាំងបណ្តាញសង្គមកើតឡើងដោយសារបញ្ហាអ្វីឱ្យពិតប្រាកដទេ ។

Downdetector គឺជាគេហទំព័រសម្រាប់ត្រួតពិនិត្យបញ្ហារអាក់រអួលរបស់បណ្តាញសង្គម រាយការណ៍ថា កម្មវិធីផ្សេងទៀត ដូចជា ៖ Youtube, Tiktok និង Gmail ក៏បានគាំងដូចគ្នាដែរ ។ រីឯ NetBlocks បញ្ជាក់ថា បញ្ហាបណ្តាញសង្គមគាំងបានធ្វើឱ្យប៉ះពាល់ដល់អ្នកប្រើប្រាស់រាប់លាននាក់នៅទូទាំងពិភពលោក ព្រមៗគ្នា ។

ចំណែកសារព័ត៌មានបរទេសបានផ្សព្វផ្សាយ ដោយយោងតាមការលើកឡើងរបស់អ្នកជំនាញថា បញ្ហានេះអាចបណ្តាលមកពីបណ្តាញសង្គមរបស់ក្រុមហ៊ុន Meta ត្រូវបានគេលួចវាយប្រហារក៏ថាបាន ។ ក្រោយកើតហេតុការណ៍បណ្តាញសង្គមគាំងលើកនេះ បានធ្វើឱ្យតម្លៃភាគហ៊ុនរបស់ក្រុមហ៊ុន Meta ធ្លាក់ចុះ១,៥% ៕

ប្រទេសចិន ៖ វីដេអូមួយបានធ្វើឱ្យមហាជនភ្ញាក់ផ្អើល និង រិះ.គ.ន់ ផងដែរ ក្រោយពីពួកគេបានឃើញរថយន្តកង់៣ ដឹកបាច់ផ្កាយ៉ាងធំធ្វើពីដែកដុសឆ្នាំង ចំនួន៩៩៩ដុំ ។ រថយន្តកង់៣ បានដឹកបាច់ផ្កាដ៏ធំនេះទៅប្រគល់ឱ្យនារីម្នាក់ក្នុងពិធីខួបកំណើត នៅទីក្រុង Nantong ខេត្ត Jiangsu ប្រទេសចិន ។

នារីឈ្មោះ Sae Phan អាយុ២៩ឆ្នាំ គឺជាម្ចាស់អាជីវកម្មវាយនភ័ណ្ឌ និងជាអ្នកទទួលបានបាច់ផ្កាដ៏ពិសេសនេះ និយាយថា ម្ចាស់ផ្កានេះ មិនមែនជាស្វាមីរបស់នាងទេ គឺគ្រាន់តែជាបុគ្គលិកស្រីម្នាក់ដែលធ្វើការជាមួយនាង អស់រយៈពេល២ឆ្នាំ ។ ម្យ៉ាងទៀត ដោយសារភាពស្និទ្ធស្នាលជាមួយគ្នា នាងចាត់ទុកថា បុគ្គលិកស្រីរូបនេះ គឺជាប្អូនស្រីបង្កើតរបស់នាង ។

នាង Sae Phan បន្តទៀតថា ថ្ងៃកំណើតរបស់នាង នៅឆ្នាំ២០២៤ គឺត្រូវគ្នាជាមួយពិធីបុណ្យចូលឆ្នាំចិន ។ ហេតុនេះ បុគ្គលិកស្រីរបស់នាងក៏ទាក់ទងទៅហាងលក់ផ្កាជាមុន និងបានទិញដែកដុសឆ្នាំង ចំនួន៩៩៩ដុំ បន្ទាប់មក យកវាទៅឱ្យហាងជួយរៀបចំធ្វើជាបាច់ផ្កា ។ រីឯការចំណាយប្រាក់ទិញដែកដុសឆ្នាំងយកមកធ្វើបាច់ផ្កា និងថ្លៃរៀបចំនោះ គឺអស់ប្រមាណ១៤២ដុល្លារអាមេរិក ។

នាងនិយាយថា ៖ «ខ្ញុំសប្បាយចិត្ត និងភ្ញាក់ផ្អើលខ្លាំងណាស់ ពីព្រោះវាជាអំណោយយ៉ាងពិសេស ។ លើសពីនេះ ដែកដុសឆ្នាំងទាំងនេះអាចប្រើប្រាស់បានយូរ មិនងាយច្រេះ និងក្រៀមស្វិតដូចផ្កាទេ ។ ដូច្នេះ ខ្ញុំអាចរក្សាទុកវាបានយូរ» ។

ក្រោយពីវីដេអូបាច់ផ្កាយក្សបានចែកចាយក្នុងបណ្តាញសង្គម ស្រាប់តែធ្វើឱ្យមហាជនរិះគន់ទៅវិញ ដោយសារអ្នកលេងបណ្តាញសង្គមមួយចំនួនយល់ឃើញថា ម្ចាស់បាច់ផ្កានេះ គឺជាមនុស្សប្រុស ។ ហេតុនេះ បើមនុស្សប្រុសប្រគល់បាច់ផ្កាបែបនេះទៅឱ្យមនុស្សស្រី មានន័យថា មនុស្សប្រុសនោះចង់ប្រាប់ទៅនាងថា នាងត្រូវតែខិតខំធ្វើការងារផ្ទះឱ្យបានច្រើន ។

ប៉ុន្តែនាង Sae Phan ពន្យល់ថា នាង និងបុគ្គលិកស្រី ចូលចិត្តការសប្បាយរីករាយ និងចូលចិត្តធ្វើរឿងកំប្លែងៗច្រើប ហើយអំណោយថ្ងៃកំណើតរបស់នាងសម្រាប់ឆ្នាំ២០២៤ ក៏បានធ្វើពួកនាងអស់សំណើចខ្លាំងផងដែរ ។ ប៉ុន្តែនាងមិនគិតថា បាច់ផ្កាដែកដុសឆ្នាំងរបស់នាង បែរជាធ្វើឱ្យមហាជនយល់ខុសបែបនេះសោះ ៕