ប្រទេសថៃ ៖ កាលពីវេលាម៉ោង៧យប់ ថ្ងៃទី១៥ ខែមករា ឆ្នាំ២០២៦ អគ្គិភ័យបានឆាបឆេះបំពង់បង្ហូរទឹកសំណល់កម្ពស់ជាង៤០ម៉ែត្រ នៅស្ពានអាកាស Bhumibol Bridge 2 យ៉ាងសន្ធោសន្ធៅ នៅតាមផ្លូវពូចៅសាមីងផ្រាយ ឃុំពូចៅសាមីងផ្រាយ ស្រុកព្រះប្រាឌែង ខេត្តសមុទ្រប្រាកាន ប្រទេសថៃ ។ ហេតុការណ៍នេះបង្កការភ័យស្លន់ស្លោយ៉ាងខ្លាំងពីអ្នកធ្វើដំណើរឆ្លងកាត់ និងរងការរិះគ.ន់ផងដែរ ។

អាជ្ញាធរបានទាក់ទងទៅក្រុមពន្លត់អគ្គិភ័យបញ្ជូនរថយន្តបាញ់ទឹកមកជួយអន្តរាគមន៍ ប៉ុន្តែដោយសារភ្លើងឆេះបំពង់បង្ហូរទឹកសំណល់មានកម្ពស់ខ្ពស់ពេករហូតដល់ជាង៤០ម៉ែត្រ ទើបធ្វើឱ្យក្រុមពន្លត់អគ្គិភ័យមិនអាចបាញ់ទឹកទៅដល់កំពូល ទើបស្នើសុំបញ្ជូនរថយន្តបាញ់ទឹកដែលអាចបាញ់ទឹកដល់ខាងលើដើម្បីពន្លត់ភ្លើង ដោយចំណាយពេលរហូតដល់១ម៉ោង ទើបភ្លើងរលត់អស់ ។ ក្រោយស្ថានការណ៍ស្ងប់ស្ងាត់ អាជ្ញាធរក៏អនុញ្ញាតឱ្យពលរដ្ឋធ្វើដំណើរឆ្លងកាត់ធម្មតាឡើងវិញ ដោយសារខូចខាតតែបំពង់បង្ហូរទឹកសំណល់ និងមិនឆេះរាលដាល ។

ក្រោយពីចុះពិនិត្យមើលទីតាំងកើតហេតុ ចៅហ្វាយស្រុកព្រះប្រាឌែង លោក ព្រីន ចាវ៉ាក់ធិយ៉ាគុន និយាយថា ភ្លើងបានចាប់ផ្តើមឆេះតាំងពីគល់បំពង់បង្ហូរទឹកឡើងទៅលើរហូតដល់បែកផ្កាភ្លើង ដែលបណ្តាលមកពីការឆេះបំពង់ PE បង្ហូរទឹកពីស្ពានចុះមកក្រោម ។ វាមិនឆេះរាលដាលបន្ថែមទៀត ដោយសារក្រុមពន្លត់អគ្គិភ័យ និងភ្នាក់ងារពាក់ព័ន្ធជួយគ្នាបាញ់ទឹកពន្លត់ទាន់ពេលវេលា ។

បើតាមការសេចក្តីរាយការណ៍ចុងក្រោយ គឺហេតុការណ៍នេះអាចកើតឡើងដោយសារភ្លើងឆេះគំនរសំរាមនៅក្បែរបំពង់បង្ហូរទឹកសំណល់ ហើយមូលហេតុពិតប្រាកដ គឺត្រូវរង់ចាំការត្រួតពិនិត្យលម្អិតបន្ថែមទៀត ។ ទោះយ៉ាងណា បំពង់បង្ហូរទឹកមិនបានខូចខាតទាំងស្រុងទេ ប៉ុន្តែត្រូវនឹងមានការត្រួតពិនិត្យជាថ្មីពីអ្នកជំនាញ ។

គួរបញ្ជាក់ថា នេះជាហេតុការណ៍អាក្រក់កើតឡើងផ្ទួនៗគ្នានៅប្រទេសថៃ កាលពីថ្ងៃទី១៤ ខែមករា មានសោកនាដកម្មបាក់ដងស្ទួច (Crane) ដ៏ធំមួយរបស់គម្រោងសាងសង់ផ្លូវរថភ្លើងល្បឿន លឿននៅខេត្តណាខនរ៉ាជសីម៉ា សង្កត់លើរថភ្លើង១ខ្សែដែលដំណើរពីទីក្រុងបាងកក ទៅកាន់ខេត្តឧប៊ុនរ៉ាជថានី ។ ហេតុការណ៍នេះបណ្តាលឱ្យអ្នកដំណើរស្លាប់ជាង៣០នាក់ និងរងរបួសជាច្រើននាក់ ។

បន្ទាប់មក នៅថ្ងៃទី១៥ ខែមករា ដងស្ទួច (Crane) ដ៏ធំមួយទៀតក្នុងការដ្ឋានសាងសង់នៅផ្លូវព្រះរ៉ាម២ ខេត្តសមុទ្រសាខន បានបាក់រលំសង្កត់លើស្ពានអាកាសបណ្តាលឱ្យអ្នកដំណើរស្លា.ប់ ចំនួន២នាក់ និងរងរបួសជាច្រើននាក់ ៕

ប្រធានាធិបតីអាមេរិក លោក Donald Trump បានបង្ហោះសារក្នុងបណ្តាញសង្គម Truth Social ថា កោះហ្គ្រីនឡែន (Greenland) ពិតជាសំខាន់សម្រាប់ការបង្កើត Golden Dome ជាប្រព័ន្ធការពារមីស៊ីល និងបង្កើនសមត្ថភាពកងទ័ព ។ អង្គការសន្ធិសញ្ញាអាត្លង់ទិកខាងជើង (NATO) គួរមានតួនាទីសំខាន់ក្នុងការជួយឱ្យសហរដ្ឋអាមេរិកអាចគ្រប់គ្រងកោះនេះ អង្គការ NATO នឹងកាន់តែមានប្រសិទ្ធភាព និងគួរឱ្យកោតក្រែង បើកោះហ្គ្រីនឡែនស្ថិតក្រោមការគ្រប់គ្រងរបស់អាមេរិក ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី១៦ ខែមករា ឆ្នាំ២០២៦ ។

កាលពីដើមឆ្នាំ២០២៥ លោកប្រធានាធិបតី Trump បានប្រកាសពីគម្រោងផលិត Golden Dome ជាប្រព័ន្ធការពារមីស៊ីល ដែលគេរំពឹងថា ប្រព័ន្ធនេះនឹងមានឧបករណ៍សម្រាប់ប្រើប្រាស់ក្នុងយានអវកាស និងអាវុធសម្រាប់វាយប្រហារសត្រូវ មុនពេលសត្រូវធ្វើសកម្មភាព ប៉ុន្តែត្រូវការប្រាក់ប្រមាណជាង៥សែនលានដុល្លារអាមេរិក និងចំណាយពេលផលិតរហូតដល់២០ឆ្នាំ ទើបរួចរាល់ ។

ចំណែករដ្ឋាភិបាលដាណឺម៉ាកបានបញ្ជូនមេបញ្ជាការកងទ័ពរបស់ខ្លួនទៅប្រចាំការនៅកោះហ្គ្រីនឡែន ដើម្បីត្រៀមសហការជាមួយកងទ័ពបញ្ជូនពីបណ្តាប្រទេសសម្ព័ន្ធមិត្ត ។ សម្ព័ន្ធមិត្តនានារបស់ដាណឺម៉ាក បានបង្ហាញក្តីរីករាយក្នុងការបញ្ជូនកងទ័ពមកកោះហ្គ្រីនឡែន ដែលជាសញ្ញាប្រកាសទៅមហាអំណាចអាមេរិកដែលចង់គ្រប់គ្រងកោះ ។

នៅថ្ងៃទី១៦ ខែមករា កងទ័ពបារាំងបានធ្វើដំណើរមកដល់ទីក្រុង Nuuk របស់កោះហ្គ្រីនឡែនបន្ទាប់ពីការបញ្ជូនកងទ័ពដាណឺម៉ាក ខណៈប្រទេសជាច្រើនទៀតនៅតំបន់អឺរ៉ុប រួមមាន ៖ អាល្លឺម៉ង់ ស៊ុយអែត ន័រវេស ហ្វាំងឡង់ ហូឡង់ និងអង់គ្លេស ចាប់ផ្តើមបញ្ជូនកងទ័ពមកកោះនេះជាបន្តបន្ទាប់ដើម្បីចូលរួមភារកិច្ចល្បាតរួមគ្នា ។

បើតាមអ្នកនាំពាក្យសេតវិមាន អ្នកស្រី Karoline Leavitt ប្រទេសនានានៅអឺរ៉ុបបញ្ជូនកងទ័ពមកកោះហ្គ្រីនឡែន នឹងមិនធ្វើឱ្យលោកប្រធានាធិបតី Trump ផ្លាស់ប្តូរចិត្តក្នុងការគ្រប់គ្រងកោះទេ ពីព្រោះលោកជឿថា កោះជាប្រយោជន៍សម្រាប់សន្តិសុខអាមេរិកខ្លាំងបំផុត ។ រីឯការចរចារវាងអាមេរិកជាមួយមន្ត្រីដាណឺម៉ាក និងកោះហ្គ្រីនឡែន គឺមានប្រសិទ្ធភាព ដោយភាគីទាំងអស់បានឯកភាពបង្កើតក្រុមការងារបន្តការចរចាបច្ចេកទេស ។

កាលពីឆ្នាំ២០១៩ លោកប្រធានាធិបតី Trump ចង់ទិញកោះហ្គ្រីនឡែនម្តងហើយ ប៉ុន្តែត្រូវបានរដ្ឋាភិបាលដាណឺម៉ាក និងនាយករដ្ឋមន្ត្រីកោះហ្គ្រីនឡែនបដិសេធ ដោយអះអាងថា កោះហ្គ្រីនឡែនមិនមែនសម្រាប់លក់ឱ្យអាមេរិកទេ ទើបលោក Trump មិនពេញចិត្ត ក៏លុបចោលដំណើរទស្សនកិច្ចទៅប្រទេសដាណឺម៉ាកនាពេលនោះ ។ នៅឆ្នាំ២០២៦ លោកថា អាមេរិកត្រូវតែគ្រប់គ្រងកោះនេះដើម្បីសន្តិសុខជាតិ និងការពារកុំឱ្យចិន-រុស្ស៊ីគ្រប់គ្រងនាថ្ងៃអនាគត ដោយអាមេរិកនឹងប្រើប្រាស់កម្លាំងទ័ពកាន់កាប់ បើការចរចាទិញកោះមិនជោគជ័យ ។

កំណប់ទ្រព្យដ៏ធំសម្បើមរបស់កោះហ្គ្រីនឡែន គឺធនធានធម្មជាតិ! កោះនេះសម្បូររ៉ែមានតម្លៃជាច្រើនប្រភេទ ដូចជា ៖ រ៉ែស័ង្កសី មាសក្រហម ប្រេងឥន្ធនៈ និងឧស្ម័នធម្មជាតិ ដែលងាយស្រួលរុករកដោយសារផ្ទាំងទឹកកករលាយ ។ កោះនេះថែមទាំងមានរ៉ែកម្រ (Rare Earth) ដែលចាំបាច់សម្រាប់ការផលិតថ្មរថយន្តអគ្គិសនី បន្ទះឈីប បច្ចេកវិទ្យាទំនើប និងបច្ចេកវិទ្យាផ្នែកយោធា ដែលបច្ចុប្បន្ន អាមេរិកបាននាំចូលរ៉ែកម្រច្រើនពីចិន ទើបអាមេរិកចង់កាន់កាប់កោះដើម្បីកាត់បន្ថយការនាំចូលរ៉ែកម្រចិន ៕

តាមការចុះផ្សាយរបស់គេហទំព័រ Channel News Asia នៅថ្ងៃទី១៦ ខែមករា ឆ្នាំ២០២៦ មេគណបក្សប្រឆាំងវេណេស៊ុយអេឡា អ្នកស្រី Maria Corina Machado បានប្រគល់ពានរង្វាន់ណូបែលសន្តិភាពរបស់ខ្លួនជូនប្រធានាធិបតីអាមេរិក លោក Donald Trump ពេលអ្នកទាំងពីរជួបគ្នានៅសេតវិមានក្នុងទីក្រុងវ៉ាស៊ីនតោន សហរដ្ឋអាមេរិក ខណៈមន្ត្រីសេតវិមានថា ប្រធានាធិបតីអាមេរិកនឹងរក្សាទុកពានរង្វាន់នេះ ។

លោកប្រធានាធិបតី Trump បានបង្ហោះសារក្នុងបណ្តាញសង្គមថា ៖ «អ្នកស្រី Maria បានប្រគល់ពានរង្វាន់ណូបែលសន្តិភាពឱ្យខ្ញុំដែលប្រឹងប្រែងបំពេញការងារ ។ នេះជាការបង្ហាញពីការគោរពគ្នាទៅវិញទៅមក អរគុណ! អ្នកស្រី Maria» ។

មេគណបក្សប្រឆាំងវេណេស៊ុយអេឡា អ្នកស្រី Maria ថា ការជួបគ្នារវាងអ្នកស្រីជាមួយលោកប្រធានាធិបតី Trump នៅសេតវិមានដំណើរការយ៉ាងរលូន ហើយពានរង្វាន់ណូបែលសន្តិភាពដែលអ្នកស្រីប្រគល់ជូនលោកប្រធានាធិបតី Trump គឺជាការលះបង់ដើម្បីសេរីភាពរបស់ពលរដ្ឋវេណេស៊ុយអេឡា ។

ការប្រគល់ពានរង្វាន់ណូបែលសន្តិភាពទៅឱ្យលោកប្រធានាធិបតី Trump បន្ទាប់ពីកងកម្លាំងពិសេសអាមេរិកបានធ្វើប្រតិបត្តិការនៅទីក្រុង Caracas ដើម្បីចាប់ខ្លួនលោកប្រធានាធិបតី Nicolas Maduro និងភរិយា កាលពីថ្ងៃទី៣ ខែមករា ដែលធ្វើឱ្យភ្ញាក់ផ្អើលទូទាំងពិភពលោក ។

ទោះជាមេគណបក្សប្រឆាំងវេណេស៊ុយអេឡា អ្នកស្រី Maria ប្រគល់ពានរង្វាន់ណូបែលសន្តិភាពរបស់ខ្លួនឱ្យប្រធានាធិបតីអាមេរិក ប៉ុន្តែលោកស្រីនៅតែជាបុគ្គលដែលទទួលបានពានរង្វាន់ណូបែលសន្តិភាពជាផ្លូវការ ។ វិទ្យាស្ថានណូបែលសន្តិភាពប្រទេសន័រវេសបញ្ជាក់ថា ពានរង្វាន់នេះមិនអាចប្រគល់ឱ្យអ្នកដទៃ បែងចែក ឬដកហូតឡើយ ។

គួរបញ្ជាក់ថា អ្នកស្រី Maria ជាមេគណបក្សប្រឆាំងវេណេស៊ុយអេឡាដ៏មានឥទ្ធិពលនិងលេចធ្លោ ដែលទទួលបានពានរង្វាន់ណូបែលសន្តិភាពកាលពីខែតុលា ឆ្នាំ២០២៥ បន្ទាប់ពីព្យាយាមជំរុញចលនាលទ្ធិប្រជាធិបតេយ្យនៅវេណេស៊ុយអេឡាអស់រយៈពេលជាង២ទសវត្សរ៍ ដើម្បីប្រឆាំងនឹងអំណាចផ្តាច់ការរបស់លោកប្រធានាធិបតី Maduro ។

ក្នុងការតស៊ូដើម្បីប្រជាធិបតេយ្យ អ្នកស្រីរងទុក្ខបុកម្នេញពីសំណាក់មេដឹកនាំផ្តាច់ការវេណេស៊ុយអេឡា និងរងនូវបណ្តឹងជាច្រើន ។ បើតាមវិទ្យាស្ថានណូបែលសន្តិភាព គឺក្រោមអំណាចផ្តាច់ការរបស់លោក Maduro អំពើហិង្សាបានកើតឡើងជាបន្តបន្ទាប់ ពលរដ្ឋធ្លាក់ខ្លួនក្រីក្រកាន់តែខ្លាំង ។

ចំណែកលោកប្រធានាធិបតី Trump ចង់បានពានរង្វាន់ណូបែលសន្តិភាព ប៉ុន្តែបែរជាខកចិត្ត ។ កាលពីខែតុលា ឆ្នាំ២០២៥ លោកថា មិនដឹងវិទ្យាស្ថានណូបែលសន្តិភាពគិតយ៉ាងណាទេ ដែលប្រគល់ពានរង្វាន់ឱ្យអ្នកស្រី Maria ពីព្រោះគ្មានបុគ្គលណាម្នាក់ក្នុងប្រវត្តិសាស្ត្រពិភពលោក អាចដោះស្រាយជម្លោះបញ្ចប់សង្គ្រាមរហូតដល់ចំនួន៨ ក្នុងរយៈពេលត្រឹមតែ៩ខែ មានតែរូបលោកទេដែលស័ក្តិសមនឹងទទួលបានពានរង្វាន់ ៕

បាងកក ៖ ការដួលរលំដងស្ទូចជាបន្តបន្ទាប់នៅក្នុងប្រទេសថៃក្នុងរយៈពេលពីរថ្ងៃជាប់ៗគ្នា និងសម្លា.ប់មនុស្សរាប់សិបនាក់ បានទាក់ទាញការចាប់អារម្មណ៍យ៉ាងខ្លាំងពីជុំវិញពិភពលោក។ ក្នុងនោះប្រព័ន្ធផ្សព្វផ្សាយអន្តរជាតិមួយចំនួន បានចាប់ផ្ដើមចោ.ទសួរអំពីកម្រិតស្តង់ដារសុវត្ថិភាពសំណង់របស់ប្រទេសនេះ ដោយយល់ឃើញថាករណីទាំងនេះលែងជាគ្រោះថ្នាក់ចៃដន្យទៀតហើយ ប៉ុន្តែជាហានិភ័យនៃការធ្វេសប្រហែសជាប្រព័ន្ធ។

ហេតុការណ៍រន្ធ.ត់ចុងក្រោយបំផុត បានកើតឡើងនៅលើផ្លូវរាមាទី ២ ក្នុងទីក្រុងបាងកក នៅព្រឹកថ្ងៃទី ១៥ ខែមករា ដែលត្រឹមតែមួយថ្ងៃបន្ទាប់ពីដងស្ទូចសំណង់ដ៏ធំបានបា.ក់រលំសង្កត់ទៅលើរថភ្លើងដឹកអ្នកដំណើរមួយគ្រឿងនៅក្នុងខេត្តនគររាជសីមា ដែលបានសម្លា.ប់ ៣២នាក់ និងរបួសមនុស្សរាប់សិបនាក់។

ជុំវិញព័ត៌មាននេះ BBC បានរាយការណ៍ថា ហេតុការណ៍ទាំងពីរខាងលើ ពាក់ព័ន្ធនឹងក្រុមហ៊ុនម៉ៅការតែមួយ ពោលគឺក្រុមហ៊ុន Italian-Thai Development Plc ដែលជាក្រុមហ៊ុនសំណង់ធំជាងគេមួយរបស់ប្រទេសថៃ។ ទីភ្នាក់ងារ BBC បាននិយាយថា គ្រោះថ្នាក់ទាំងនេះបានបង្ហាញពីរបៀបដែលឧប្បត្តិហេតុធ្ងន់ធ្ងរនៅការដ្ឋានសំណង់នៅតែកើតមានជាញឹកញាប់នៅក្នុងប្រទេសថៃ ដែលមួយផ្នែកធំ គឺដោយសារតែកម្សោយក្នុងការអនុវត្តបទប្បញ្ញត្តិសុវត្ថិភាព ។

ដោយឡែក បើតាមកាសែតចិន South China Morning Post និង AP របស់សហរដ្ឋអាមេរិក ក៏បានរាយការណ៍ផងដែរថា កំណត់ត្រាសុវត្ថិភាពសំណង់ដ៏អន់ខ្សោយរបស់ប្រទេសថៃ បានរងការរិះគន់យ៉ាងខ្លាំង បន្ទាប់ពីហេតុការណ៍ស្រដៀងគ្នា បានកើតឡើងដល់ទៅ២ដង ក្នុងរយៈពេលត្រឹមតែ២ថ្ងៃ ដោយជំរុញឲ្យមានការស៊ើបអង្កេតលើ ក្រុមហ៊ុន Italian-Thai Development ឡើងវិញ ក្នុងនាមជាអ្នកម៉ៅការនៅការដ្ឋានទាំងពីរ។

គួរជម្រាបថា ការបរាជ័យម្តងហើយម្តងទៀត និងកម្សោយក្នុងការត្រួតពិនិត្យលើប្រព័ន្ធសុវត្ថិភាពសំណង់របស់អាជ្ញាធរថៃ ជាពិសេសការកំណត់ស្តង់ដាចំពោះក្រុមហ៊ុនម៉ៅការសាងសង់ បានធ្វើសាធារណជនថៃមានការខកចិត្ត និងរិះគ.ន់យ៉ាងចាស់ដៃ។

ជាមួយគ្នានេះ ឧបទ្ទវហេតុដដែលៗដែលបានកើតឡើងនាពេលថ្មីៗនេះបានធ្វើឲ្យគេកត់សម្គាល់ឃើញថា វាលែងទាក់ទងនឹងសំណាងអាក្រ.ក់ ឬភាពចៃដន្យទៀតហើយ ប៉ុន្តែជាហានិភ័យរចនាសម្ព័ន្ធដែលបន្តលេចចេញជារូបរាងនៅក្នុងវិស័យសំណង់របស់ថៃ៕

(ភ្នំពេញ) ៖ លោក លី គួង ដែលជាអ្នកជំនួញដ៏ធំមួយរូបនៅកម្ពុជា ជាពិសេសនៅខេត្តព្រះសីហនុ ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ សម្រេចចេញដីកាឃុំខ្លួន ពាក់ព័ន្ធនឹងឧក្រិដ្ឋកម្ម Online Scam និងការលាងលុយកខ្វក់ បន្ទាប់ពីបានប្រព្រឹត្តបទល្មើសទាំងអស់នេះ ចាប់តាំងពីឆ្នាំ ២០១៩ មក។

យោងតាមដីកាបង្គាប់ឱ្យឃុំខ្លួន ជននេះត្រូវបានតំណាងអយ្យការចោទប្រកាន់ពីបទល្មើសរួមមាន៖ ការជ្រើសរើសដោយមិនស្របច្បាប់សម្រាប់កេងប្រវ័ញ្ច បទឆបោ.កមានស្ថានទម្ងន់ទោ.សជាក្រុមមានការចាត់តាំង និងបទសម្អាតប្រាក់ ដែលបានប្រព្រឹត្តនៅក្នុងប្រទេសកម្ពុជា និងទីកន្លែងផ្សេងទៀត ចាប់តាំងពីឆ្នាំ២០១៩ រហូតមកដល់បច្ចុប្បន្ន។

ការសម្រេចឃុំខ្លួននេះ ធ្វើឡើងបន្ទាប់ពីកម្លាំងសមត្ថកិច្ចបានធ្វើការស្រាវជ្រាវយ៉ាងច្បាស់លាស់ និងរកឃើញភស្តុតាងដែលបង្ហាញពីសកម្មភាពមិនប្រក្រតី ក្នុងការកេងប្រវ័ញ្ចទ្រព្យសម្បត្តិរបស់អ្នកដទៃ ក្នុងរូបភាពជាការវិនិយោគ ឬការរកស៊ីដែលគ្មានតម្លាភាព រួចយកថវិកាទាំងនោះទៅធ្វើចរាចរណ៍ដើម្បីបន្លំភ្នែកសមត្ថកិច្ច សម្អាតប្រាក់ និងបានប្រើប្រាស់ទីតាំងកាស៊ីណូ និងសណ្ឋាគារ ដើម្បីបង្ខាំងមនុស្សឱ្យធ្វើការឆបោកអនឡាញ ចាប់តាំងពីឆ្នាំ២០១៩ រហូតមកដល់បច្ចុប្បន្ន។

ក្រោយការចោទប្រកាន់ លោក លី គួង ត្រូវបានបញ្ជូនទៅកាន់មណ្ឌលអប់រំកែប្រែ ដើម្បីអនុវត្តតាមដីកាសម្រេចរបស់ចៅក្រមស៊ើបសួរ។សំណុំរឿងនេះ កំពុងស្ថិតក្នុងដំណាក់កាលស៊ើបសួរយ៉ាងយកចិត្តទុកដាក់បន្ថែមទៀត ដើម្បីស្វែងរកអ្នកពាក់ព័ន្ធផ្សេងទៀត។

សូមជម្រាបថា លោក លី គួង គឺជាអតីតអ្នកឧកញ៉ាមួយរូប ដែលត្រូវបានព្រះមហាក្សត្រត្រាស់បង្គាប់ផ្ដល់គោរមងារនៅថ្ងៃទី២០ ខែមិថុនា ឆ្នាំ២០១៣ និងនៅតែមានគោរម្យងារនេះ រហូតមកដល់ត្រឹមខែសីហា ឆ្នាំ២០២៥ ។

កន្លងមកធ្លាប់មានបណ្ដាញសារព័ត៌មានអន្តរជាតិមួយចំនួន ធ្លាប់ចុះផ្សាយពី ទីតាំងមួយកន្លែងឈ្មោះ ហ័ងឡឺ (Huang Le) ដែលជាកម្មសិទ្ធិរបស់លោក លី គួង ស្ថិតក្នុងខេត្តព្រះសីហនុ ថាជាទីតាំងនៃការជួ.ញដូរមនុស្ស បង្ខាំង និងបង្ខំមនុស្សឱ្យធ្វើការ ដើម្បីបោ.កបញ្ឆោតប្រាក់របស់គេ ប៉ុន្តែកាលណោះលោក លី គួង ចេញមុខបដិសេធច្រានចោល។

គិតចាប់ពីឆ្នាំ២០២៥ រហូតមកដល់ថ្ងៃទី១៥ ខែមករា ឆ្នាំ២០២៦ នេះ តុលាការកម្ពុជាបានអនុវត្តនីតិវិធីលើសំណុំរឿងធំៗចំនួន ៣៧ ករណី ដើម្បីផ្តន្ទាទោសមេខ្លោង និងបក្ខពួកចំនួន ១៧២ នាក់។ ជាមួយគ្នានេះ សមត្ថកិច្ចបាន និងកំពុងបន្តស្រាវជ្រាវដើម្បីវែកមុខបណ្តាញដែលនៅពីក្រោយការឆបោ.កនេះផ្សេងទៀតមកផ្តន្ទាទោសតាមច្បាប់ផងដែរ៕