កាលពីខែមករា នៅក្នុងពិធីប្រគល់រង្វាន់ Golden Disc Awards លើកទី៤០ ឆ្នាំ២០២៦ Jennie សមាជិក BLACKPINK បានធ្វើឱ្យទស្សនិកជនចាប់អារម្មណ៍យ៉ាងខ្លាំងបន្ទាប់ពីបានគ្រងឈុតពណ៌ក្រហមឆ្អិនឆ្អៅពីការប្រមូលផ្ដុំម៉ូដរដូវស្លឹកឈើជ្រុះឆ្នាំ២០២៥ របស់ Maison Margiela ដើរលើកម្រាលព្រំក្រហម។ មុននឹង Jennie ស្លៀកម៉ូតបែបនេះ Kim Kardashian ធ្លាប់បានស្លៀកចូលរួមនៅឯពិធីជប់លៀង Academy Museum Gala 2025។
ភាពទាន់សម័យនិងភាពលេចធ្លោរបស់ Jennie និងសេចក្តីស្រលាញ់ចំពោះអាយដលផងបានជំរុញឱ្យ ម៉ែសេះ កាត់ម៉ូតដែលបំផុសគំនិតពីតារាចម្រៀង K-Pop រូបនេះស្លៀកពាក់ចូលរួមពិធីមង្គលការធ្វើឱ្យមានការភ្ញាក់ផ្អើលពេញកម្មវិធី។ មានវីដេអូមួយដែលប្រៀបធៀបពីការដើរលើកម្រាលព្រំក្រហមរបស់ Jennie នៅក្នុងកម្មវិធី GDA និង វីដេអូរបស់ ម៉ែសេះ លេងស្ទាយ៍ទឹកមុខតែមួយធ្វើឱ្យមានភាពទាក់ទាញនិងការចាប់អារម្មណ៍យ៉ាងខ្លាំង។
ការប្រៀបធៀប Jennie និង ម៉ែសេះ ទទួលបាននូវមតិវិជ្ជមានរហូតមានអ្នកគាំទ្រមួយចំនួនដាក់នាមឱ្យ ម៉ែសេះថា Jenses ទៀតផង។
ម៉ែសេះ ត្រូវបានគេស្គាល់តាមរយៈវីដេអូកំប្លែងៗនិងជាមនុស្សជំនិតរបស់ ប៉ីប៉ី ឌី។ មុននឹងមានប្រជាប្រិយភាពនៅលើបណ្តាញសង្គម ម៉ែសេះ ឆ្លងកាត់ការលំបាកជាច្រើនដូចជាធ្លាប់ធ្វើជាអ្នកអនាម័យជាដើម។
បន្ទាប់ពីរស់នៅជាមួយ ប៉ីប៉ី ឌី ក្រោមដំបូលតែមួយជាយូរនិងបានជួយការងាររកស៊ីជាផ្នែកមួយជួយឱ្យមុខជំនួញកាក់កប ម៉ែសេះ ទទួលបានទាំងផ្ទះ ដើរលេងក្រៅប្រទេស មានមុខមាត់ក្នុងសង្គម សម្តែងតួធំក្នុងខ្សែភាពយន្តជាដើម។ ទោះបីជាយ៉ាងណា ថ្មីៗនេះ ម៉ែសេះ ទើបតែត្រូវបានមនុស្សប្រុសបោកប្រាស់សេចក្តីស្រលាញ់ផងដែរ៕
