ប្រទេសដាណឺម៉ាក ៖ ប្រទេសដាណឺម៉ាកគ្រោងហាមឃាត់ការលក់សម្លៀកបំពាក់ និងសម្ភារៈផ្សេងៗដែលប្រើប្រាស់សារធាតុគីមី PFAS ក្នុងការផលិត ហើយបម្រាមនេះនឹងអនុវត្តនៅថ្ងៃទី១ ខែកក្កដា ឆ្នាំ២០២៥ តទៅ ។ សម្លៀកបំពាក់នាំចូល និងសម្លៀកបំពាក់ផលិតក្នុងប្រទេសទាំងអស់ បើអាជ្ញាធររកឃើញមានសារធាតុគីមី PFAS គឺមិនអាចលក់នៅដាណឺម៉ាកបានទេ ។

PFAS គឺជាសារធាតុគីមីមានភាពធន់ខ្ពស់ និងចំណាយពេលរាប់រយឆ្នាំ ទើបវារលាយតាមធម្មជាតិ ។ គេបានផ្សំសារធាតុគីមីប្រភេទនេះក្នុងសម្ភារៈប្រើប្រាស់ប្រចាំថ្ងៃ ដើម្បីឱ្យសម្ភារៈទាំងនេះអាចធន់ជាមួយទឹក ឬកំដៅ ដូចជា ៖ សម្ភារៈផ្ទះបាយ, បំពង់ពន្លត់អគ្គិភ័យ, សម្លៀកបំពាក់, សម្ភារៈវេចខ្ចប់អាហារ, គ្រឿងសម្អាង និងគ្រឿងសង្ហារិម ។

នៅដើមខែឧសភា ឆ្នាំ២០២៤ ក្រសួងបរិស្ថានដាណឺម៉ាកមានគម្រោងហាមឃាត់ការលក់សម្លៀកបំពាក់, ស្បែកជើង និងសម្ភារៈមិនជ្រាបទឹកទឹកអស់ ដែលផ្ទុកសារធាតុ Per- និង Polyfluoroalkyl ជាសារធាតុស្ថិតនៅក្នុងក្រុមសារធាតុគីមី PFAS ដោយអះអាងថា ប្រឈមមុខនឹងគ្រោះថ្នាក់ដល់សុខភាព ។

សារធាតុគីមីក្នុងក្រុម PFAS នេះបានផលិតឡើងលើកដំបូងនៅឆ្នាំ១៩៣០ និងត្រូវបានគេប្រើប្រាស់យ៉ាងទូលំទូលាយនៅឆ្នាំ១៩៥០ ដោយសារវាមានគុណសម្បត្តិជាច្រើន ដូចជា ៖ ការពារកំដៅ និងការពារទឹក ។ ហេតុនេះ សារធាតុគីមី PFAS បានផ្ទុកកក្នុងសម្ភារៈជាច្រើន ដូចជា ៖ សម្ភារៈផ្ទះបាយ, សម្ភារៈប្រើប្រាស់, ឧបករណ៍រថយន្ត និងសម្លៀកបំពាក់ ។

បញ្ហាចម្បង សារធាតុគីមីនេះបានចំណាយពេលរាប់រយឆ្នាំ ទើបវារលាយតាមធម្មជាតិ ។ ដូច្នេះ គេបានដាក់ឈ្មោះវា «សារធាតុគីមី PFAS» ដោយសារវានៅលាយឡំជាមួយបរិស្ថាន ។ រយៈពេលជាច្រើនឆ្នាំកន្លងមក មានការស្រាវជ្រាវពីផលប៉ះពាល់របស់សារធាតុគីមីនេះ ហើយអ្នកវិទ្យាសាស្ត្ររកឃើញថា សារធាតុគីមី PFAS ពាក់ព័ន្ធនឹងបញ្ហាការបន្តពូជ, ការលូតលាស់របស់កុមារយឺតយ៉ាវ, ជំងឺមហារីក និងកូឡេស្តេរ៉ុលខ្ពស់ ។

លោក Magnus Heunicke រដ្ឋមន្ត្រីបរិស្ថានថ្លែងថា ៖ «យើងត្រូវតែនាំមុខគេក្នុងការកម្ចាត់ប្រភពសារធាតុគីមី PFAS ហើយការចេញបម្រាមថ្នាក់ជាតិនឹងជាប្រយោជន៍ដល់សុខភាព និងបរិស្ថាននៅដាណឺម៉ាក» ។

គម្រោងហាមប្រើប្រាស់សារធាតុគីមីរបស់ដាណឺម៉ា នឹងមានការសហការពីប្រទេសនៅសហភាពអឺរ៉ុបចំនួន៤ គឺអាល្លឺម៉ង់, ហូឡង់, ន័រវែស និងស៊ុយអែត ។ វាជាការហាមប្រើប្រាស់សារធាតុគីមីគ្រោះថ្នាក់ខ្លាំងបំផុតលើសម្លៀកបំពាក់, ស្បែកជើង និងសម្ភារៈការពារទឹកផ្សេងៗ ប៉ុន្តែរដ្ឋាភិបាលដាណឺម៉ាកបញ្ជាក់ថា សម្លៀកបំពាក់ពេទ្យ និងសម្លៀកបំពាក់ពន្លត់អគ្គិភ័យ នឹងគ្មានការហាមឃាត់ទេ ។

លោក Magnus Heunicke បន្ថែមថា ៖ «ការហាមនាំចូល និងហាមលក់សម្លៀកបំពាក់, ស្បែកជើង និងសម្ភារៈការពារទឹក ដែលមានសារធាតុគីមី PFAS ទូទាំងប្រទេសដាណឺម៉ាក គឺជាជំហានសំខាន់ដើម្បីកម្ចាត់ការបំភាយឧស្ម័នផ្ទះកញ្ចក់ និងផលប៉ះពាល់បរិស្ថាន ។ ក្រៅពីនេះ វាជាសញ្ញាបញ្ជាក់ទៅកាន់ពិភពលោកថា យើងត្រូវបញ្ឈប់ការប្រើសារធាតុគីមីទាំងនេះយ៉ាងឆាប់រហ័ស» ។

ចំណែកសមាគមឧស្សាហកម្មវាយនភ័ណ្ឌ និងការច្នៃម៉ូដអាល្លឺម៉ង់លើកឡើងថា នឹងមានសារធាតុគីមីជាង១២.០០០ប្រភេទទៀត ក៏ត្រូវហាមឃាត់ដែរ ។ បច្ចុប្បន្ន អាល្លឺម៉ង់បានកំណត់វិធានការពាក់ព័ន្ធនឹងសុវត្ថិភាព និងបរិស្ថាន សម្រាប់ក្រុមហ៊ុនផលិតសម្ភារៈប្រើសារធាតុគីមី PFAS ហើយរំពឹងថា ប្រទេសនៅសហភាពអឺរ៉ុបទាំងអស់នឹងអនុវត្តបម្រាមនេះ ៕

បរទេស៖ ក្រុមអ្នកស្រាវជ្រាវបានព្យាករណ៍ថា ប្រទេសទាំងអស់ជុំវិញពិភពលោកគួរតែត្រៀមខ្លួន និងប្រុងប្រយ័ត្នឱ្យបានខ្ពស់ ខណៈដែលអាកាសធាតុប្រែប្រួលមិនល្អនាំឱ្យមានការកើនឡើងនៃពស់ចឹក ដោយពស់ពិសរាប់ពាន់លានក្បាលបច្ចុប្បន្នបាននឹងកំពុងចូលលុកលុយនៅលើផែនដីនៅពេលអាកាសធាតុពិភពលោកមិនអំណោយផល។
យោងតាម The Guardian ដែលបានរាយការណ៍កាលពីថ្ងៃទី ៣ ខែឧសភា ឆ្នាំ២០២៤ ថាបម្រែបម្រួលអាកាសធាតុទំនងជានាំពស់ពិសគ្រប់ប្រភេទពីបណ្តាប្រទេសជុំវិញពិភពលោកទៅកាន់តំបន់ថ្មី និងប្រទេសមួយចំនួនដូចជា ប្រទេសនេប៉ាល់ នីហ្សេរីយ៉ា ណាមីប៊ី ចិន និងមីយ៉ាន់ម៉ា ដោយប្រទេសទាំងនេះអាចនឹងទទួលរងឥទ្ធិពលពស់ចឹកប្រសិនបើពួកគេមិនប្រុងប្រយ័ត្ននៅពេលដែលអាកាសធាតុកាន់តែក្តៅ។

បើយោងតាមការព្យាករណ៍របស់អ្នកជំនាញ ប្រទេសដែលមានចំណូលទាបនៅអាស៊ីខាងត្បូង និងអាស៊ីអាគ្នេយ៍ ក៏ដូចជាផ្នែកខ្លះនៃទ្វីបអាហ្រ្វិក ក៏នឹងងាយរងគ្រោះដោយសារការកើនឡើងនៃពស់ចឹកផងដែរ។ យោងតាមការសិក្សានេះបានឱ្យដឹងទៀតថា ប្រភេទពស់ពិសចំនួន ២០៩ នឹងអាចបង្កឱ្យមានភាពអាសន្នដល់មនុស្ស ខណៈដែលប្រភេទសត្វពស់ពិសមួយចំនួនដូចជាពស់វែកហ្កាប៊ុនអាហ្វ្រិកខាងលិចនឹងកើនឡើង២៥០% នៅឆ្នាំ ២០៧០។ រីឯពស់ពិសដ៏កាចសហាវនៅជួរនៃ asp អ៊ឺរ៉ុប និងវាលខ្សាច់ horned viper ក៏ត្រូវបានព្យាករណ៍ថានឹងមានច្រើនជាងពីរដងនៅឆ្នាំ ២០៧០ ផងដែរ។

យោងតាមសហអ្នកនិពន្ធ Pablo Ariel Martinez នៃសាកលវិទ្យាល័យ Sergipe Federation ក្នុងប្រទេសប្រេស៊ីល និង Talita F Amado នៅមជ្ឈមណ្ឌលស្រាវជ្រាវជីវចម្រុះក្នុងទីក្រុង Leipzig ប្រទេសអាល្លឺម៉ង់ ក៏បានបង្ហាញលទ្ធផលស្រាវជ្រាវដែរថា ប្រភេទពស់ពិសមួយចំនួនអាចសម្របខ្លួនទៅនឹងដីស្រែចម្ការ ហើយថែមទាំងលូតលាស់នៅតំបន់ដំណាំ ឬបសុសត្វផ្តល់ប្រភពអាហារដូចជាកណ្តុរជាដើម។ យោងតាមអង្គការសុខភាពពិភពលោក (WHO) បានប៉ាន់ប្រមាណថា មនុស្សប្រហែល ១.៨ – ២.៧ លាននាក់ត្រូវបានខាំដោយពស់ពិសជារៀងរាល់ឆ្នាំ ដែលបណ្តាលឱ្យមនុស្សស្លាប់ចំនួន ១៣៨,០០០ នាក់ និងយ៉ាងហោចណាស់ ៤០០,០០០ ករណីគឺពិការភាពអចិន្ត្រៃយ៍ដោយសារពស់ចឹក។

លោក Anna Pintor អ្នកវិទ្យាសាស្ត្រឯកទេសជំងឺត្រូពិចនៅ WHO បាននិយាយថា ប្រភេទសត្វពស់នឹងផ្លាស់ប្តូរការចែកចាយរបស់វាទៅតាមការប្រែប្រួលអាកាសធាតុ។ ការព្រួយបារម្ភនោះគឺថា ពួកវានឹងខាំមនុស្សកាន់តែច្រើន ប្រសិនបើសីតុណ្ហភាពក្តៅ អាកាសធាតុសើម និងទឹកជំនន់ធ្វើឱ្យមនុស្ស និងសត្វពស់បាត់បង់ផ្ទះសម្បែងកើតឡើងញឹកញាប់។ ហេតុនេះហើយយើងត្រូវតែការពារខ្លួនជានិច្ច នៅពេលដើរចូលក្នុងព្រៃ ឬនៅពេលទឹកជំនន់ ក៏ដូចជាត្រូវយល់ឱ្យកាន់តែច្បាស់ថាតើវាប៉ះពាល់ដល់កន្លែងណាដែលមនុស្សត្រូវពស់ចឹក ហើយមនុស្សប៉ុន្មាននាក់ដែលត្រូវពស់ចឹកនៅកន្លែងនោះ ដូច្នេះយើងនឹងអាចត្រៀមខ្លួនបាន៕

ប្រទេសបារាំង ៖ បារាំងបានបំបែកកំណត់ត្រានៅលើពិភពលោក ដោយក្លាយជាប្រទេសផលិតនំប៉័ងវែងបំផុតនៅឆ្នាំ២០២៤ បន្ទាប់ពីប្រទេសអ៊ីតាលី ដែលធ្លាប់បានផលិតនំប៉័ងវែងជាងគេ កាលពីឆ្នាំ២០១៩ ។ នេះបើតាមការចុះផ្សាយរបស់សារព័ត៌មានបរទេស នៅថ្ងៃទី៦ ខែឧសភា ឆ្នាំ២០២៤ ។

កាលពីថ្ងៃទី៥ ខែឧសភា ឆ្នាំ២០២៤ ក្រុមការងារដុតនំប៉័ងជនជាតិបារាំងចំនួន១៨នាក់ បានជួយគ្នាដុតនំប៉័ងនៅតំបន់ Surens ក្នុងទីក្រុងប៉ារីស ប្រទេសបារាំង ។ ពួកគេបានប្រើប្រាស់ម្សៅមានទម្ងន់រហូតដល់៩០គីឡូក្រាម, ទឹក៦០លីត្រ, អំបិល១,២គីឡូក្រាម និងម្សៅ Yeast ១,២គីឡូក្រាមទៀត ដើម្បីធ្វើនំប៉័ងមានទម្ងន់១៥២គីឡូក្រាម និងចំណាយពេលអស់១០ម៉ោង ។

ការផលិតនំប៉័ងមានប្រវែងវែងបំផុតនៅលើពិភពលោកនេះ បានបំបែកកំណត់ត្រាលើពិភពលោកចាស់ ដែលប្រទេសអ៊ីតាលីធ្លាប់ទទួលបានចំណាត់ថ្នាក់ផ្នែកផលិតនំប៉័ងវែងបំផុត កាលពីឆ្នាំ២០១៩ គឺមានប្រវែងជាង១៣២ម៉ែត្រ ។

ការចុះកំណត់ត្រាលើពិភពលោកថ្មីរបស់ Guinness World Records នៅតំបន់ Surens ទីក្រុងប៉ារីស បញ្ជាក់ថា នំប៉័ងផលិតនៅប្រទេសបារាំង មានប្រវែងរហូតដល់ជាង១៤០ម៉ែត្រ និងមានកម្រាស់៥សង់ទីម៉ែត្រ ។ ចំណុចទាំងអស់នេះ គឺគ្រប់តាមលក្ខខណ្ឌកំណត់របស់ Guinness World Records ។

ក្រោយពី Guinness World Records ប្រកាសថា នំប៉័ងដ៏វែងនេះជាបេតិកភណ្ឌវប្បធម៌ដ៏ល្បីល្បាញរបស់ប្រទេសបារាំងរួចមក អ្នករៀបចំកម្មវិធីដុតនំប៉័ង ក៏បានបែងចែកនំប៉័ងឱ្យអ្នកមកចូលរួមទស្សនាទាំងអស់បរិភោគ និងទទួលយករសជាតិដ៏ឆ្ងាញ់បំផុត ៕

បរទេស៖ អាកាសធាតុក្តៅខ្លាំងបានធ្វើឱ្យទុរេននៅក្នុងកសិដ្ឋានថៃទុំមុនអាយុមិនត្រូវស្តង់ដារនិងខូចគុណភាពដែលប៉ះពាល់ដល់ប្រាក់ចំណូលរបស់កសិករ ខណៈការនាំចេញទុរេនវៀតណាមក៏មានការធ្លាក់ចុះខ្លាំងផងដែរដោយសារការប៉ះទង្គិចជាមួយដៃគូប្រកួតប្រជែងម៉ាឡេស៊ី។
ទុរេនជាផលិតផលនាំចេញដ៏សំខាន់មួយដែលនាំមកនូវប្រាក់ចំណេញខ្ពស់នៅក្នុងប្រទេសថៃ និងវៀតណាម។ ទោះជាយ៉ាងណាក៏ដោយ រលកកំដៅដ៏ខ្លាំងនៅអាស៊ីអាគ្នេយ៍ និងការប្រកួតប្រជែងកាន់តែខ្លាំងឡើង បានធ្វើឱ្យទិន្នផលទុរេនធ្លាក់ចុះ ហើយការចំណាយកើនឡើងដល់កម្រិតខ្ពស់។ ដូច្នេះហើយបច្ចុប្បន្នអ្នកដាំទុរេន និងពាណិជ្ជករនៅក្នុងប្រទេសថៃកំពុងមានការព្រួយបារម្ភយ៉ាងខ្លាំង នៅពេលដែលកំដៅផែនដីបានបំផ្លិចបំផ្លាញធ្វើឱ្យខូចឧស្សាហកម្មរបស់ពួកគេ។

កសិករទុរេនឈ្មោះ Busaba Nakpipat អាយុ ៥៤ ឆ្នាំបាននិយាយប្រាប់សារព័ត៌មានថា៖ «ឆ្នាំនេះមានវិបត្តិដោយសារការនាំចេញធ្លាក់ចុះខ្លាំង។ អ្នកស្រី Busaba ដែលបានកាន់កាប់ចម្ការទុរេនរបស់ឪពុកម្តាយនាងនៅខេត្ត Chanthaburi ភាគខាងកើត ដែលជាចម្ការទុរេនដ៏សំខាន់របស់ប្រទេសថៃកាលពីបីទសវត្សរ៍មុន។ អ្នកស្រីបាននិយាយថា៖ «ប្រសិនបើកំដៅនៅតែបន្តកើនឡើងនៅពេលខាងមុខ អ្វីៗនឹងចប់ ហើយកសិករនឹងមិនអាចផលិតទុរេនបានទៀតទេ»។ រដូវទុរេនជាធម្មតាចាប់ផ្តើមពីខែមីនា ដល់ខែមិថុនា ប៉ុន្តែសីតុណ្ហភាពកើនឡើងខ្ពស់ ហក់ឡើងប្រហែល ៤០ អង្សាសេអស់រយៈពេលជាច្រើនសប្តាហ៍នៅក្នុងខេត្តចាន់ថាបុរី ហើយគ្រោះរាំងស្ងួតបានធ្វើឱ្យការប្រមូលផលខ្លី។ យោងតាមអ្នកស្រី Busaba អាកាសធាតុក្តៅ ធ្វើឱ្យផ្លែទុរេនទុំមុនអាយុ និងខូចគុណភាព ក៏ដូចជាគ្មានស្តង់ដារត្រឹមត្រូវ ដែលធ្វើឱ្យតម្លៃទុរេនធ្លាក់ចុះមិនអាចលូតលាស់ដល់ទំហំដែលនាំមកនូវតម្លៃខ្ពស់បំផុតនោះទេ។

បើយោងតាមសារព័ត៌មានវៀតណាមវិញ បច្ចុប្បន្នចម្ការទុរេនក្នុងខេត្ត Tien Giang កំពុងឈានចូលដល់រដូវច្រូតកាត់ ប៉ុន្តែរដូវច្រូតកាត់ដ៏សំខាន់នេះបានធ្វើឱ្យកសិករមិនសប្បាយចិត្តឡើយ ដោយសារផលិតភាពបានធ្លាក់ចុះ ហើយតម្លៃក៏បានធ្លាក់ចុះយ៉ាងខ្លាំងផងដែរ។ យោងតាមអាជីវករដែលមានឯកទេសក្នុងការទិញផ្លែទុរេនដើម្បីនាំចេញ បានឱ្យដឹងថា មូលហេតុដែលនាំឱ្យតម្លៃផ្លែឈើនេះធ្លាក់ចុះយ៉ាងខ្លាំងគឺដោយសារតែ “ការប៉ះទង្គិច” ជាមួយផ្លែទុរេនថៃ និងម៉ាឡេស៊ី។ យោងតាមមន្ទីរកសិកម្ម និងអភិវឌ្ឍន៍ជនបទខេត្ត Tien Giang បច្ចុប្បន្នផ្ទៃដីដាំដុះទុរេនសរុបក្នុងខេត្តមានប្រមាណ ២១.៧៩០ ហិកតា ក្នុងនោះជិត ១៥.០០០ ហិកតាកំពុងដាំផ្លែ។

លោក ទ្រីញ វ៉ាន់ស៊ី ម្ចាស់ចម្ការទុរេន ១ ហិកតា និងជាម្ចាស់ឃ្លាំងទិញផ្លែឈើសម្រាប់នាំចេញបាននិយាយថា កាលពី ២ ខែមុន តម្លៃធូរេន Monthong ជាង ២០ ម៉ឺនដុង/គីឡូក្រាម (ប្រមាណ ២៨,០០០ រៀល) ឥឡូវនេះវាបានធ្លាក់ចុះមកត្រឹម ១០ ម៉ឺនដុង/គីឡូក្រាមប៉ុណ្ណោះ (ប្រមាណ ១២,០០០ រៀល)។ រីឯទុរេន Ri6 តម្លៃ ១៥ ម៉ឺនដុងក្នុងមួយគីឡូក្រាម (ប្រហែល ២០,០០០ រៀល) ឥឡូវធ្លាក់មកត្រឹម ៥៥ ០០០ ដុងក្នុងមួយគីឡូក្រាម (ប្រហែល ៨,០០០ រៀល) វិញ ទោះជាយ៉ាងណាតម្លៃនេះនៅតែចំណេញសម្រាប់កសិករ ប៉ុន្តែមិនដំណើរការល្អដូចមុនទេ៕

ប្រទេសសិង្ហបុរី ៖ យោងតាមការស្រាវជ្រាវថ្មីមួយរបស់សិង្ហបុរីបង្ហាញថា ការលាបជញ្ជាំងផ្ទះអាចជួយកាត់បន្ថយកំដៅផែនដី និងធ្វើឱ្យសីតុណ្ហភាពក្នុងទីក្រុងធ្លាក់ចុះ១.៥អង្សាសេ ។ អាកាសធាតុក្តៅខ្លាំងបណ្តាលឱ្យប៉ះពាល់ដល់ជីវិតមនុស្ស សត្វ និងរុក្ខជាតិ ជាពិសេស ប៉ះពាល់ដល់អ្នករស់នៅក្នុងទីក្រុងធំៗ ហើយពួកគេពុំអាចរត់គេចពីបញ្ហានេះទេ ។

ការស្រាវជ្រាវមួយរបស់សាកលវិទ្យាល័យ Nanyang Technological នៅប្រទេសសិង្ហបុរីបង្ហាញថា ការជ្រើសរើសថ្នាំពណ៌សម្រាប់លាបដំបូលផ្ទះ, ជញ្ជាំង និងចិញ្ចើមផ្លូវក្នុងតំបន់ឧស្សាហកម្មនានាអាចជួយឱ្យសីតុណ្ហភាពក្នុងទីក្រុងធ្លាក់ចុះ១.៥អង្សាសេ ។ បើទោះជាការប្រើប្រាស់ថ្នាំពណ៌កាត់បន្ថយផលប៉ះពាល់ដោយសារអាកាសធាតុក្តៅនៅទីក្រុងធំៗមិនមែនជារឿងថ្មីក្តី ប៉ុន្តែការសាកល្បងអនុវត្តក្នុងតំបន់ជាក់ស្តែងរបស់ការស្រាវជ្រាវនេះបង្ហាញថា វាអាចជួយកាត់បន្ថយសីតុណ្ហភាពក្នុងទីក្រុងធំៗពិតមែន ។

កន្លងមក ការស្រាវជ្រាវភាគច្រើនពាក់ព័ន្ធនឹងការលាបថ្នាំផ្ទះច្រើនតែសាកល្បងធ្វើលើគំរូ ប៉ុន្តែអ្នកស្រាវជ្រាវរបស់សាកលវិទ្យាល័យ Nanyang Technological បានអនុវត្តការសាកល្បងក្នុងតំបន់ជាក់ស្តែង ។ ពួកគេអាចប្រៀបធៀបសីតុណ្ហភាពរវាងតំបន់លាបថ្នាំពណ៌ជាមួយតំបន់ផ្សេងទៀត តាមរយៈការត្រួតពិនិត្យការបម្លាស់ទីរបស់អាកាសធាតុ, សំណើម និងវិទ្យុសកម្មកំដៅរយៈពេល២ខែ ហើយពួកគេរកឃើញថា តំបន់លាបថ្នាំពណ៌ Cool Paint អាចកាត់បន្ថយកំដៅរហូតដល់៣០% ។

អ្នកស្រាវជ្រាវម្នាក់ឈ្មោះ Kiran Kumar Donthu និយាយថា ៖ «ការស្រាវជ្រាវរបស់យើងបង្ហាញថា ការលាបថ្នាំ Cool Paint អាចជួយកាត់បន្ថយកំដៅផែនដី និងធ្វើឱ្យសីតុណ្ហភាពក្នុងទីក្រុងធំៗធ្លាក់ចុះ» ។

ការរកឃើញនេះនឹងក្លាយជាប្រយោជន៍សម្រាប់ទីក្រុងផ្សេងៗ ដែលកំពុងស្វែងរកវិធីកាត់បន្ថយកំដៅផែនដីយ៉ាងឆាប់រហ័ស និងសន្សំសំចៃប្រាក់សម្រាប់ដោះស្រាយបញ្ហាកំដៅ ដែលបណ្តាលឱ្យប៉ះពាល់ដល់ជីវិតមនុស្ស ។ វាមិនត្រឹមតែជាប្រយោជន៍សម្រាប់សិង្ហបុរី ដែលមានអាកាសធាតុក្តៅពេញមួយឆ្នាំប៉ុណ្ណោះទេ ប៉ុន្តែវានឹងផ្តល់ប្រយោជន៍សម្រាប់ទីក្រុងផ្សេងទៀតដែលកំពុងប្រឈមនឹងកំដៅខ្លាំង ហើយប្រទេសនានាលើពិភពលោកត្រូវសហការគ្នាដោះស្រាយបញ្ហានេះ ។

សាស្ត្រាចារ្យប្រធានក្រុមស្រាវជ្រាវ ឈ្មោះ Wan Man Pun និយាយថា ៖ «កំដៅផែនដីបានធ្វើឱ្យមនុស្សចាប់ផ្តើមរកវិធីរក្សាភាពត្រជាក់កាន់តែខ្លាំង ហើយការស្រាវជ្រាវរបស់យើងបញ្ជាក់ថា ការលាបថ្នាំពណ៌ Cool Paint គឺជាវិធីកាត់បន្ថយផលប៉ះពាល់ពីរលកកំដៅក្នុងទីក្រុងនាថ្ងៃអនាគត» ៕

ប្រទេសថៃ ៖ មន្ត្រីគណៈកម្មការអប់រំមូលដ្ឋានប្រទេសថៃបានកំណត់ឱ្យសាលារៀនទាំងអស់ផ្អាកសកម្មភាពនៅក្រោមកំដៅថ្ងៃ ក្នុងអំឡុងពេលបើកបវសនកាលថ្មី ឆ្នាំ២០២៤ ហើយបើអាកាសធាតុកាន់តែក្តៅខ្លាំងធ្វើឱ្យប៉ះពាល់ដល់សិស្សសាលា សាលាអាចបង្រៀនសិស្សតាមអនឡាញ ។ មន្ត្រីអប់រំថៃប្រកាសបែបនេះ ក្រោយពីនៅប្រទេសថៃមានសីតុណ្ហភាពក្តៅខ្លាំងកើនឡើងដល់ជាង៤០អង្សាសេ និងបារម្ភពីផលប៉ះពាល់សុខភាពសិស្ស ។

លោក Thanu Wongchinda អគ្គលេខាធិការនៃគណៈកម្មការអប់រំមូលដ្ឋាននិយាយថា បើតាមនាយកដ្ឋានឧតុនិយមបានព្យាករណ៍អាកាសធាតុក្នុងអំឡុងខែឧសភា ឆ្នាំ២០២៤ ថា នៅពាក់កណ្តាលខែឧសភានេះ តំបន់ភាគខាងជើង, តំបន់ឦសាន និងតំបន់កណ្តាល នឹងមានអាកាសធាតុក្តៅខ្លាំង ព្រមទាំងមានភ្លៀង ផ្គររន្ទះផងដែរ ខណៈខ្យល់មូសុងឆ្លងកាត់តំបន់ខាងជើងប្រទេសថៃ នាពេលថ្ងៃ ។ ហេតុនេះ វាអាចបណ្តាលឱ្យមានគ្រោះថ្នាក់ដល់សិស្ស គ្រូបង្រៀន និងបុគ្គលិកអប់រំ ។

គណៈកម្មការអប់រំមូលដ្ឋានបានណែនាំឱ្យមន្ទីរអប់រំគ្រប់ខេត្ត-ក្រុងជូនដំណឹងទៅកាន់ស្ថាប័នអប់រំនានាអនុវត្តតាមវិធានការ និងការពារគ្រោះថ្នាក់កើតឡើងពីអាកាសធាតុក្តៅខ្លាំងចំពោះសិស្ស គ្រូបង្រៀន និងបុគ្គលិកអប់រំ ក្នុងអំឡុងពេលបើកបវសនកាលថ្មី ឆ្នាំ២០២៤ ដូចខាងក្រោម ៖

១-ផ្អាកការធ្វើសកម្មភាពក្រោមកំដៅថ្ងៃ និងចៀសវាងនៅកណ្តាលវាល
២-រៀបចំកន្លែងផ្តល់ទឹកបរិសុទ្ធឱ្យបានគ្រប់គ្រាន់ក្នុងសាលា
៣-ត្រួតពិនិត្យខ្សែភ្លើង, ឧបករណ៍អគ្គិសនី, ម៉ាស៊ីនត្រជាក់ និងកង្ហា ដើម្បីប្រើប្រាស់ក្នុងសាលា
៤-ករណីអាកាសធាតុក្តៅខ្លាំងប៉ះពាល់ដល់សិស្ស សាលាអាចផ្អាកការបង្រៀនសិស្ស និងបង្រៀនតាមអនឡាញ
៥-ត្រួតពិនិត្យការភ្លេចសិស្សក្នុងរថយន្ត ឬការបណ្តោយឱ្យសិស្សនៅក្នុងរថយន្តចតកណ្តាលថ្ងៃ និង
៦-ផ្តល់ចំណេះដឹង និងវិធីជួយសង្គ្រោះដល់សិស្សពេលជួបអ្នកមានជំងឺដាច់សរសៃឈាមខួរក្បាល (Heat Stroke)

ក្រៅពីនេះ លោក Thanu Wongchinda អគ្គលេខាធិការនៃគណៈកម្មការអប់រំមូលដ្ឋានបានស្នើឱ្យសិស្ស គ្រូបង្រៀន និងបុគ្គលិកអប់រំ ពិនិត្យរោគសញ្ញារបស់ខ្លួន និងមនុស្សនៅជុំវិញ បើមានរោគសញ្ញាជំងឺដាច់សរសៃឈាមខួរក្បាល ត្រូវប្រញាប់រាយការណ៍បន្ទាន់ដើម្បីឱ្យអាជ្ញាធរជួយសង្គ្រោះភ្លាមៗ ។

គួរបញ្ជាក់ថា អាកាសធាតុក្តៅខ្លាំងបានធ្វើឱ្យប្រទេសផ្សេងទៀតនៅតំបន់អាស៊ីអាគ្នេយ៍ប្រកាសបិទសាលារៀនផងដែរ ក្នុងនោះមានហ្វីលីពីន និងបង់ក្លាដែស ។ នៅខែមេសា ឆ្នាំ២០២៤ សីតុណ្ហភាពនៅទីក្រុងម៉ានីល បានកើនឡើងដល់៣៨,៨អង្សាសេ ធ្វើឱ្យក្រសួងអប់រំហ្វីលីពីនប្រកាសបិទសាលារៀននៅទូទាំងប្រទេស ស្មើជាង៤៧.០០០កន្លែង ហើយក្រសួងអប់រំហ្វីលីពីនកំណត់ឱ្យសិស្សរៀនអនឡាញនៅផ្ទះ ព្រោះបារម្ភថា សិស្សនឹងមានផលប៉ះពាល់ផ្នែកសុខភាព ។

ចំណែកក្រសួងអប់រំប្រទេសបង់ក្លាដែស ក៏បានប្រកាសឱ្យបិទសាលារៀនដូចគ្នាដែរ ដោយសារសីតុណ្ហភាពកើនឡើងរហូតដល់៤៣អង្សា ។ សារព័ត៌មានជាច្រើនរាយការណ៍ថា រដ្ឋាភិបាលបង់ក្លាដែស មិនប្រាកដចិត្តថា នឹងអនុញ្ញាតឱ្យបើកសាលានៅពេលណាទេ ព្រោះសិស្សរាប់លាននាក់ពិបាករៀនសូត្រ ហើយការរៀនសូត្រមិនងាយស្រួលដូចនៅសាលា ៕