ល្អហួស Miss Preteen Junior Idol World 2024 បានបង្ហាញវត្តមានក្នុងកម្មវិធីប្រកួត
Miss Universe Thailand Nonthaburi ជាមួយនឹងសម្រស់ស្អាតនិងមានភាពទាក់ទាញយ៉ាងខ្លាំង។ បវរកញ្ញាវ័យក្មេងរូបនេះពិតជាមិនធម្មតានោះខណៈកម្មវិធីក្រៅស្រុកចាប់អារម្មណ៍អញ្ជើញចូលរួមកាន់តែបោះជំហានទៅមុខជាលំដាប់ដូចជារៀមច្បងក្នុងវិស័យបវរកញ្ញាគឺ ពេជ្រ វត្តីសារ៉ាវឌ្ឍី។
កាលពីរាត្រីថ្ងៃទី៥ ខែឧសភា ឆ្នាំ២០២៤ ក្នុងវគ្គផ្តាច់ព្រ័ត្រការប្រកួត Miss Universe Thailand Nonthaburi ល្អហួស បានចូលរួមជាភ្ញៀវពិសេសក្នុងការប្រកួតនេះរួមជាមួយបវរកញ្ញាវ័យក្មេងម្ចាស់ជ័យលាភីផ្សេងទៀត។ ល្អហួស បានគ្រងឈុតរាត្រីស្រមោលសដ៏ស្រស់ស្អាតជាមួយទឹកមុខញញឹមយ៉ាងស្រស់ស្អាត និងមានភាពទាក់ទាញយ៉ាងខ្លាំង។ នៅក្នុងរូបភាពដែល ល្អហួស បានចែករំលែកនៅលើបណ្តាញសង្គម ល្អហួស ក៏បានឈរជិតបវរកញ្ញា Anntonia Porsild ជា Miss Universe Thailand 2023 និងជា លំដាប់រងទី១ Miss Universe លើកទី៧២ ផងដែរ។
ការចូលរួមរបស់ ល្អហួស ក្នុងកម្មវិធីបវរកញ្ញាក្រៅស្រុកនេះដែរកាន់តែធ្វើឱ្យអ្នកគាំទ្របង្ហាញពីភាពសប្បាយរីករាយជាមួយកេរ្តិ៍ឈ្មោះរបស់នាងជាបវរកញ្ញាវ័យក្មេងដ៏មានសក្កានុពលរបស់ប្រទេសកញ្ញា។ ល្អហួស បានសាងមុខមាត់ជូនប្រទេសជាតិដោយបានឈ្នះមកុដនៅលើឆាកអន្តរជាតិកាលពីកន្លងមកនេះ។
នេះមានន័យថា ល្អហួស បានសាងភាពល្បីល្បាញជាខ្លាំងនៅក្នុងវិស័យបវរកញ្ញាវ័យក្មេង ដែលធ្វើឱ្យកម្មវិធីក្រៅស្រុកពេញចិត្តអញ្ជើញចូលរួមនៅក្នុងកម្មវិធីដូចជារៀមច្បង ពេជ្រ វត្តីសារ៉ាវឌ្ឍី ដែរទៅតាមកម្មវិធីបវរកញ្ញាផ្នែកខុសគ្នា ប៉ុន្តែអ្វីដែលដូចគ្នានោះគឺជាបវរកញ្ញាកម្ពុជាដែលមានឈ្មោះបោះសំឡេងខ្លាំងដូចគ្នា។
គួរបញ្ជាក់ថា ល្អហួស ជាបវរកញ្ញាវ័យក្មេងពោរពេញដោយសមត្ថភាពទាំងព្រម ពូកែសឹងតែគ្រប់ផ្នែក ហើយអ្វីដែលអ្នកគាំទ្ររំពឹងខ្ពស់ក្នុងការដណ្តើមមកុដក្នុងកម្មវិធីធំនោះគឺនៅពេលល្អហួសគ្រប់អាយុ១៨ឆ្នាំរូបនាងនឹងវិលមកប្រកួតបវរកញ្ញាវិញដែលអ្នកគាំទ្ររំពឹងថា ល្អហួស នឹងអាចតំណាងប្រទេសកម្ពុជាចូលប្រកួតដណ្តើមមកុដអន្តរជាតិម្តងទៀត៕