បរទេស៖ កាលពីពេលថ្មីៗនេះ ប្រទេសន័រវេសបានបញ្ចេញគំរូកប៉ាល់ដែលមានប្រវែង ១១៧ ម៉ែត្រអាចផ្ទុកយានជំនិះបាន ១២០ គ្រឿង ដោយប្រើអ៊ីដ្រូសែនពណ៌បៃតង ដែលត្រូវបានគេរំពឹងថានឹងដឹកជញ្ជូនជាផ្លូវការនៅឆ្នាំ ២០២៦។
យោងតាម Interesting engineering ដែលបានរាយការណ៍កាលពីថ្ងៃទី២០ ខែមេសា ឆ្នាំ២០២៤ ថាក្រុមហ៊ុនដឹកជញ្ជូន Torghatten Nord បានចុះកិច្ចសន្យាជាមួយកន្លែងផលិតកប៉ាល់ Myklebust ក្នុងប្រទេសន័រវេស ដើម្បីសាងសង់កប៉ាល់ដើរដោយថាមពលអ៊ីដ្រូសែនដ៏ធំបំផុតរបស់ពិភពលោក។ កប៉ាល់ប្រភេទថ្មីនេះត្រូវបានរចនាឡើងដើម្បីផ្ទុករថយន្តចំនួន ១២០ នៅលើផ្លូវសាឡាងដ៏វែងបំផុតរបស់ប្រទេសន័រវេសដែលមានទីតាំងនៅតំបន់អាក់ទិក។

យោងតាមក្រុមហ៊ុន Myklebust គំរូរថភ្លើងរបស់ពួកគេនឹងតភ្ជាប់ទីក្រុង Bodø នៃកោះ Røst ទៅទីក្រុង Lofoten តាមបណ្តោយផ្លូវសាឡាងដ៏វែងបំផុតរបស់ប្រទេសដែលមានប្រវែង ២៧៨ គីឡូម៉ែត្រ ដូច្នេះនាវាអ៊ីដ្រូសែនដ៏ធំបំផុតរបស់ពិភពលោក នឹងជួយជំរុញចរាចរណ៍តាមសមុទ្រ។ យោងតាមក្រុមហ៊ុន Offshore Energy គម្រោងនេះមានសារសំខាន់ណាស់ ព្រោះការដឹកជញ្ជូនអ្នកដំណើរតាមអ៊ីដ្រូសែនក្នុងរយៈចម្ងាយឆ្ងាយក្នុងស្ថានភាពដ៏លំបាកបែបនេះគឺមិនធ្លាប់មានពីមុនមកនោះទេ។ គម្រោងនេះគឺជាលទ្ធផលនៃកិច្ចសហប្រតិបត្តិការរវាងក្រុមហ៊ុន Torghatten Nord ដែលជាក្រុមហ៊ុនរចនាកប៉ាល់ន័រវេស និងកន្លែងផលិតនាវា Myklebust Verft ដែលរួមបញ្ចូលគ្នានូវប្រព័ន្ធ SEAM និងអ្នកផ្គត់ផ្គង់អ៊ីដ្រូសែន GreenH ។

គួរបញ្ជាក់ដែរថា ការប្រើប្រាស់អ៊ីដ្រូសែនបានកាត់បន្ថយការបំភាយឧស្ម័ន CO2 ប្រចាំឆ្នាំប្រហែល ២៦,៥០០ តោននៅតាមផ្លូវ។ ហេតុនេះហើយគំរូដែលមានសមត្ថភាពខ្ពស់នេះនឹងត្រូវបានសាងសង់នៅរោងចក្ររបស់ Myklebust នៅ Gursken ភាគខាងត្បូងនៃ Ålesund។ ហើយការសាងសង់នឹងត្រូវការបង្កើនបុគ្គលិក និងប្រតិបត្តិការនៅកន្លែងផលិតកប៉ាល់នាពេលខាងមុខ។ បន្ថែមពីលើការធ្វើការយ៉ាងជិតស្និទ្ធជាមួយគណៈកម្មាធិការដឹកនាំដែនសមុទ្រន័រវេស ដើម្បីបង្កើតស្តង់ដារសុវត្ថិភាពសម្រាប់នាវាប្រភេទថ្មីទាំងស្រុង គម្រោងនេះក៏នាំមកនូវការចូលរួមពីអ្នកផ្គត់ផ្គង់ជាច្រើនទាក់ទងនឹងការរចនា បច្ចេកវិទ្យា និងឧបករណ៍ទំនើបៗផងដែរ៕

ប្រទេសសិង្ហបុរី ៖ នៅពេលនិយាយអំពីការជ្រើសរើសបុគ្គលិកចូលធ្វើការនៅប្រទេសកម្ពុជា យើងនឹងឃើញក្រុមហ៊ុនជាច្រើនពិចារណាលើប្រវត្តិរូប និងបទពិសោធន៍ការងាររបស់បេក្ខជនដាក់ពាក្យធ្វើការ ។ ប៉ុន្តែក្រុមហ៊ុនសិង្ហបុរីជាច្រើននឹងពិចារណាទៅលើថ្ងៃខែឆ្នាំកំណើតរបស់បេក្ខជនផងដែរដើម្បីចង់ដឹងថា តើបេក្ខជនអាចធ្វើការជាមួយក្រុមហ៊ុនបានទេ? ប្រសិនបើមើលហុងស៊ុយហើយមិនល្អ ក្រុមហ៊ុននឹងមិនហៅបេក្ខជននោះមកសម្ភាសន៍ទេ ។

លោក Mark Tan គឺជា CEO របស់ក្រុមហ៊ុន Way Fengshui Group ធ្វើការខាងផ្នែកប្រឹក្សាយោបល់រឿងហុងស៊ុយ បានបង្ហាញទិន្នន័យប្រាប់ CNBC ថា ជារៀងរាល់ឆ្នាំ មានក្រុមហ៊ុនប្រមាណជាង១០០ បានមកប្រឹក្សាជាមួយក្រុមហ៊ុនរបស់លោក ពាក់ព័ន្ធនឹងការសម្រេចចិត្តជ្រើសរើសបុគ្គលិកមកធ្វើការ ។

ក្រុមហ៊ុនទាំងនេះនឹងផ្តល់ព័ត៌មានលម្អិត ដូចជា ៖ ថ្ងៃខែឆ្នាំកំណើតរបស់បេក្ខជនសម្រាប់មើលហុងស៊ុយ ប៉ុន្តែវាមិនមែនជាផ្នែកទាំងអស់ដែលក្រុមហ៊ុនយកមកសម្រេចចិត្តហៅបេក្ខជនមកសម្ភាសន៍ ឬទទួលបេក្ខជនចូលធ្វើការនោះទេ ពីព្រោះនៅជំហានចុងក្រោយ ផ្នែកធនធានមនុស្ស (HR) របស់ក្រុមហ៊ុនមានសិទ្ធិសម្រេចចិត្តក្នុងការជ្រើសរើសបេក្ខជនណាម្នាក់មកធ្វើការ ។

លើសពីនេះ ក្រុមហ៊ុនទាំងនេះមិនត្រឹមតែមើលហុងស៊ុយសម្រាប់ជ្រើសរើសបេក្ខជនមកធ្វើការប៉ុណ្ណោះទេ ប៉ុន្តែក្រុមហ៊ុនជាច្រើនបានប្រឹក្សាជាមួយគ្រូមើលហុងស៊ុយផងដែរ មុនពេលសម្រេចចិត្តប្រកបអាជីវកម្ម ដូចជា ៖ ការវិនិយោគសាងសង់រោងចក្រថ្មី ហើយគ្រូទាយនឹងមើលពីទីតាំង និងបរិវេណនៅជុំវិញថា តើការសាងសង់រោងចក្រត្រូវតាមក្បួនហុងស៊ុយដែរឬទេ?

ក្រៅពីក្រុមហ៊ុនជាច្រើននៅសិង្ហបុរីចាប់អារម្មណ៍មើលហុងស៊ុយពាក់ព័ន្ធនឹងការប្រកបអាជីវកម្មហើយ មនុស្សទូទៅក៏ចាប់អារម្មណ៍មើលរាសីផ្ទាល់ខ្លួនផងដែរ ហើយសំណួរដែលពួកគេតែងតែសួរជាញឹកញាប់ គឺតើពេលណាទើបពួកគេក្លាយជាអ្នកមានទ្រព្យសម្បត្តិ? ក្រៅពីនេះ អ្នកខ្លះចង់ដឹងពីជោគវាសនារបស់ខ្លួន និងសុំការប្រឹក្សាអំពីរឿងស្នេហា និងការរៀបអាពាហ៍ពិពាហ៍ផងដែរ ។

ការពេញនិយមមើលរាសី និងហុងស៊ុយបានធ្វើឱ្យក្រុមហ៊ុនរកស៊ីផ្នែកនេះនៅប្រទេសសិង្ហបុរី កើនឡើង៣២,៦% ចាប់ពីឆ្នាំ២០១៧ ដល់ឆ្នាំ២០២១ ។ រយៈពេលជាច្រើនឆ្នាំកន្លងមក ប្រាក់ចំណូលពីផ្នែកនេះកើនឡើងជិតស្មើ៧០% ឬស្មើនឹង៧៦លាន២សែនដុល្លារសិង្ហបុរី ៕

គ្រុនផ្តាសាយត្រូវបានចាត់ទុកថាជាជំងឺមួយដែលតែងកើតមានជារឿយៗរដូវរងា ប៉ុន្តែមនុស្សជាច្រើនឆ្ងល់ថា ចំពោះរដូវប្រាំងក្តៅខ្លាំង ស្ងួតហួតហែងវិញ ពួកគេបែរជាកើតជំងឺផ្តាសាយនេះដូចគ្នាដែរ។

យោងតាមការសិក្សាស្រាវជ្រាវពីមជ្ឈមណ្ឌលគ្រប់គ្រង និងការពារជំងឺ (CDC) បានរកឃើញមេរោគគ្រុនផ្តាសាយគឺអាចកើតមានពេញមួយឆ្នាំ មិនថាក្នុងរដូវក្តៅឬរងារនោះទេ។ប្រភេទនៃជំងឺផ្តាសាយគឺបណ្តាលមកពីវីរុស ឬប៉ារ៉ាស៊ីតដែលរស់នៅពីលើសារពាង្គកាយមានជីវិត។ មេរោគផ្តាសាយនឹងត្រូវបានចម្លងទៅកាន់មនុស្សគ្រប់រូប បើទោះបីជាពួកគេមានសុខភាពល្អក្តីក៏នៅតែអាចឆ្លងជំងឺនេះបានដែរ ប្រសិនបើពួកគេបានស្រូបយកដំណក់ទឹកដែលមានមេរោគនៅលើអាកាស ក៏ដូចជាមានការប៉ះពាល់ដោយផ្ទាល់ជាមួយអ្នកជម្ងឺ ឬក៏មានការប៉ះភ្នែក ច្រមុះ មាត់ បន្ទាប់ពីប៉ះផ្ទៃដែលមានមេរោគ។

សម្រាប់រដូវក្តៅនេះវិញ មនុស្សមួយចំនួននៅតែអាចឆ្លងជំងឺផ្តាសាយនេះបានយ៉ាងងាយ ដោយសារពួកគេតែងមានទំនោរចំណាយពេលវេលាច្រើននៅខាងក្រៅ។ ដូច្នេះហើយ មេរោគអាចឆ្លងតាមទីសាធារណៈដូចជាហ្វូងមនុស្សនៅក្នុងសួនកម្សាន្ត ឬតាមរយៈការប៉ះពាល់ដោយផ្ទាល់ឬប្រយោលចំពោះកន្លែងសំខាន់ៗមួយចំនួនដូចជា ផ្លូវដែកជណ្តើរយន្ត និងប៊ូតុងជណ្តើរយន្តជាដើម។

ទោះជាយ៉ាងណា រោគសញ្ញានៃជំងឺផ្តាសាយទាំងរដូវក្តៅនិងរដូវរងារ គឺវាមានលក្ខណៈស្រដៀងគ្នាច្រើន ប៉ុន្តែគឺវាខុសគ្នាត្រង់ថាប្រភេទមេរោគដែលប៉ះពាល់ដល់រាងកាយគឺខុសគ្នា។ ជំងឺផ្តាសាយរដូវរងា ជាទូទៅបណ្តាលមកពីមេរោគ rhinoviruses ហើយជារឿយៗវាយប្រហារលើផ្លូវដង្ហើមផ្នែកខាងលើ។ ផ្ទុយទៅវិញ ជម្ងឺផ្តាសាយនៅរដូវក្ដៅជួនកាលបណ្តាលមកពីមេរោគ enteroviruses ដែលរស់នៅក្នុងពោះវៀន ហើយលូតលាស់ក្នុងអាកាសធាតុក្តៅខ្លាំង។

បន្ថែមពីនេះ រោគសញ្ញានៃជំងឺគ្រុនផ្តាសាយរដូវក្តៅគឺពិតជាមានលក្ខណៈស្រដៀងនឹងផ្តាសាយរដូវរងារណាស់ ដែលនឹងបណ្តាលឲ្យយើង កណ្តាស់ ហៀរសំបោរ ក្អក ឈឺករជាដើម។ ប៉ុន្តែទោះជាយ៉ាងណា ការបារម្ភមួយទាក់ទងនឹងផ្តាសាយរដូវក្តៅនេះ គឺវាអាចនឹងបណ្តាលឬវិវត្តទៅជាជំងឺផ្សេងទៀត ដែលត្រូវតែតាមតាមដាននិងប្រុងប្រយ័ត្ន ដូចជា ជំងឺរលាកក្រពះពោះវៀន ការរលាកសួត រលាកទងសួត និងការពុលអាហារជាដើម។

រោគសញ្ញាទូទៅនៃជំងឺរលាកក្រពះ ស្រដៀងទៅនឹងគ្រុនផ្ដាសាយរួមមាន គ្រុនក្តៅ ឈឺក្បាល និងឈឺខ្លួនប្រាណ រាគជាទឹក និងរមួលក្រពើ។ ចំណែករោគសញ្ញានៃជំងឺរលាកសួតមានដូចជាគ្រុនក្តៅញាក់ ឈឺក្បាល និងការក្អកដោយមានទឹករំអិលពណ៌បៃតង ឬលឿង ដង្ហើមខ្លី និងឈឺទ្រូងខ្លាំងផងដែរ៕

ប្រទេសម៉ាឡេស៊ី ៖ សារព័ត៌មាន AFP បានរាយការណ៍នូវហេតុការណ៏គួរឱ្យតក់ស្លុតមួយថា ឧទ្ធម្ភាគចក្រកងទ័ពជើងទឹកម៉ាឡេស៊ី ចំនួន២គ្រឿង បានបុកគ្នានៅកណ្តាលអាកាស ក្នុងអំឡុងពេលឧទ្ធម្ភាគចក្រទាំង២គ្រឿងនេះធ្វើការហ្វឹកហាត់នៅមូលដ្ឋានទ័ពជើងទឹក ។ ហេតុការណ៍នេះបណ្តាលឱ្យមនុស្សជិះនៅលើឧទ្ធម្ភាគចក្រទាំងអស់ស្លា.ប់ បាត់ប.ង់ ជីវិត ។

នៅថ្ងៃទី២៣ ខែមេសា ឆ្នាំ២០២៤ នៅវេលាម៉ោង៩និង៣០នាទី (ម៉ោងនៅប្រទេសម៉ាឡេស៊ី) ត្រូវគ្នានឹងម៉ោង៨និង៣០នាទីព្រឹក ម៉ោងនៅប្រទេសកម្ពុជា មានហេតុការណ៍ឧទ្ធម្ភាគចក្ររបស់កងទ័ពជើងទឹកម៉ាឡេស៊ី ចំនួន២គ្រឿងបុកគ្នានៅកណ្តាលអាកាស ក្នុងអំឡុងពេលឧទ្ធម្ភាគចក្រទាំង២គ្រឿងធ្វើការហ្វឹកហាត់នៅមូលដ្ឋានទ័ពជើងទឹក ស្ថិតក្នុងទីក្រុង Lumut រដ្ឋ Perak ។ ហេតុការណ៍នេះបានបណ្តាលឱ្យមនុស្សជិះចំនួន១០នាក់ ស្លាប់នៅកន្លែងភ្លាមៗ ។

បើតាមរូបភាពដែលសារព័ត៌មានម៉ាឡេស៊ីបានចុះផ្សាយបង្ហាញថា ឧទ្ធម្ភាគចក្រ១គ្រឿងបានហោះទៅបុកឧទ្ធម្ភាគចក្រ១គ្រឿងទៀត បន្ទាប់មក ឧទ្ធម្ភាគចក្រទាំង២គ្រឿងនេះ ក៏ធ្លាក់ចុះមកក្រោមក្នុងពេលដំណាលគ្នា ។

លោក Suhami Mohammad Suhail នាយកជាន់ខ្ពស់របស់អង្គការពន្លត់អគ្គិភ័យ និងសង្គ្រោះក្នុងតំបន់ និយាយថា ៖ «អ្នកជិះនៅលើឧទ្ធម្ភាគចក្រទាំង២គ្រឿងបានស្លាប់នៅកន្លែងកើតហេតុ ហើយគេបានបញ្ជូនសពទៅកាន់មន្ទីរពេទ្យយោធានៅទីក្រុង Lumut រដ្ឋ Perak ដើម្បីបញ្ជាក់អត្តសញ្ញាណសព» ។

តាមសេចក្តីរាយការណ៍ឱ្យដឹងថា ឧទ្ធម្ភាគចក្រប្រភេទ HOM M503-3 មានមនុស្សជិះចំនួន៧នាក់ ខណៈឧទ្ធម្ភាគចក្រមួយទៀតប្រភេទ Fennec M502-6 មានមនុស្សជិះចំនួន៣នាក់ ។

កងទ័ពជើងទឹកម៉ាឡេស៊ីបានបញ្ជាក់ក្នុងសេចក្តីថ្លែងការណ៍ថា ហេតុការណ៍គួរឱ្យតក់ស្លុតនេះបានកើតឡើងក្នុងអំឡុងពេលឧទ្ធម្ភាគចក្រទាំង២គ្រឿងធ្វើការហ្វឹកហាត់នៅទីក្រុង Lumut រដ្ឋ Perak ដើម្បីត្រៀមចូលរួមក្នុងពិធីមួយរបស់កងទ័ពជើងទឹកម៉ាឡេស៊ី ដែលនឹងរៀបចំឡើងនៅខែឧសភា ឆ្នាំ២០២៤ ។ ជំហានបន្ទាប់ កងទ័ពជើងទឹកម៉ាឡេស៊ីនឹងបង្កើតគណៈកម្មការស៊ើបអង្កេតមួយ ដើម្បីស្វែងរកមូលហេតុដែលបណ្តាលឱ្យកើតហេតុការណ៍ខាងលើ ៕

ដើមសំរង ដែលមានឈ្មោះវិទ្យាសាស្រ្តហៅថា Scaphium affine ដោយសង្កេតឃើញថាមានដុះនៅតាមតំបន់អាស៊ីមួយចំនួន ដូចជាកម្ពុជា វៀតណាម ឡាវ ចិនជាដើម។ វាគឺជារុក្ខជាតិដើមធំៗ អាចមានកម្ពស់ចាប់ពី២៥ ទៅ ៣០ម៉ែត្រ។ ម៉្យាងវិញទៀត ការប្រមូលផលផលសំរងនឹងផ្តើមធ្វើឡើងពីពេលវាធំធាត់ចន្លោះពី៥ទៅ១០ឆ្នាំម្តង ហើយសម្រាប់រដូវកាលពេញប្រមូលផលផ្លែនេះវិញគឺនៅអំឡុងខែកុម្ភៈដល់ខែមេសាជារៀងរាល់ឆ្នាំ។

ដើមសំរងគឺតែងដុះនៅតាមព្រៃជ្រៅៗនៃប្រទេសកម្ពុជា ប៉ុន្តែទោះជាយ៉ាងណា បច្ចុប្បន្ននេះ ដើមរុក្ខជាតិមួយប្រភេទនេះហាក់ខើចទៅៗ កំពុងប្រឈមទៅនឹងការផុតពូជនាថ្ងៃអនាគត ព្រោះតែសកម្មភាពរបស់បងប្អូនប្រជាពលរដ្ឋភាគច្រើនហាក់ខ្វះការពិចារណា បានទៅប្រមូលផលផ្លែសំរង ដោយធ្វើការកាប់រំលំដើម ដែលមិនមែនជាការឡើងបេះដូចពីមុននោះទេ។ ហេតុនេះហើយ បច្ចុប្បន្ន វាបានធ្វើឲ្យផ្លែសំរងកាន់តែខ្សត់ទៅនៅលើទីផ្សារ ថែមទាំងមានតម្លៃថ្លៃ។

ជាមួយគ្នានេះកាលពីអំឡុងខែមីនា ឆ្នាំ២០២៤ តាមអនុសាសន៍របស់លោកហាក់ ឡេង អភិបាលខេត្តកោះកុង ក៏បានរៀបរាប់អំពីបញ្ហានេះ និងសូមសំណូមពរដល់ពលរដ្ឋទាំងឡាយឈប់បន្តធ្វើសកម្មភាពទាំងឡាយដែលបង្កភាពវិនាសកម្មដល់ធម្មជាតិផងដែរ។

គួរបញ្ជាក់ថា ផ្លែសំរងនេះគឺល្បីល្បាញតាំងពីបុរាណកាលមកម្លេះ ថាជាឱសថបុរាណដ៏កម្រមួយប្រភេទ ថែមទាំងមានឱជារសឆ្ងាញ់ពិសារ ដែលជាទូទៅគេយកវាមកច្នៃជាបង្ហែម និងលាយជាមួយភេសជ្ជៈផ្សេងៗ ជាពិសេសគឺយកវាទៅត្រាំឲ្យរីកជាមួយនឹងគ្រាប់ជី។

អត្ថប្រយោជន៍នៃការទទួលទានផ្លែសំរងជាប្រចាំនឹងផ្តល់ឲ្យយើងទទួលបានសុខភាពល្អ និងមានប្រសិទ្ធភាពលើជំងឺជាច្រើន ដូចជា ជំងឺគ្រុនក្តៅ ក្អកផ្តាសាយ ការឈឺចាប់ឬជំងឺទាក់ទងនឹងប្រហោងឆ្អឹងច្រមុះ ជំងឺហឺត ជំងឺរលាកទងសួត រលាកសាច់បំពង់ក ស្នាមកន្ទួលឬរមាស់ បញ្ហារបត់នៃពោះវៀន រដូវមិនទៀង ឈឺក្បាលវិលមុខ សម្រកទម្ងន់ ជួយបង្កើនឱកាសនៃការមានកូន អាការគេងមិនលក់ជាដើម។ ខណៈដែលនៅប្រទេសចិនវិញ ក៏គេបានយកផ្លែសំរងនេះទៅច្នៃធ្វើជាអាហារបំប៉នសម្រាប់សុខភាព តាមមរយៈផលិតផលជាច្រើនប្រភេទទាំង ថ្នាំគ្រាប់, ភេសជ្ជៈ, សាច់សំរងក្រៀម។ល៕

ប្រទេសចិន ៖ វីដេអូមួយបានធ្វើឱ្យមហាជននៅប្រទេសចិនចែកចាយយ៉ាងច្រើននាពេលថ្មីៗនេះ ដោយវីដេអូបង្ហាញពីអ្នកលក់ម្ហូបចិនម្នាក់បានចម្អិនម្ហូបថ្មី និងប្លែក ដែលគ្មានលក់នៅហាងផ្សេងទៀត ។ អ្នកលក់រូបនេះបានយកផ្លែទុរេន និងស្តរបឺរីមកឆាជាមួយគ្នា បន្ទាប់មកដាក់គ្រឿងផ្សំផ្សេងៗចូល ដែលជាការប្តូរពីបង្អែមឱ្យក្លាយជាម្ហូបបរិភោគជាមួយបាយ ។ ប៉ុន្តែមហាជនប្រាប់ថា ការធ្វើម្ហូបបែបនេះ ស្តាយផ្លែឈើណាស់ ។

វីដេអូនេះចាប់ផ្តើមពីស្ត្រីម្នាក់បានកុម្ម៉ង់មុខម្ហូបទុរេនស្រូបលើបាយស ហើយអ្នកលក់សួរនាងថា ៖ «តើដាក់គ្រឿងផ្សំគ្រប់មុខ មែនទេ?» បន្ទាប់មក អ្នកលក់ក៏យកទុរេនទៅឆាជាមួយខ្លាញ់ និងដាក់ការ៉ុត, ប៊ីចេង, ខ្ញី, ខ្ទឹមសរ, ម្ទេស, ស្តរបឺរី, ស្ករ និងគ្រឿងផ្សំផ្សេងទៀត ហើយចុងក្រោយ ដាក់ជី និងស្លឹកខ្ទឹម ។ នៅពេលឆ្អិន អ្នកលក់ក៏ដួសម្ហូបដាក់លើបាយក្តៅៗ ។

មុខម្ហូបពិសេសនេះមានតម្លៃ៤៨យាន់ក្នុង១ចាន (ឬស្មើជាង៦ដុល្លារអាមេរិក) ហើយពេលសួរថា តើម្ហូបនេះមានដើមកំណើតមកពីណា? អ្នកលក់ខាងលើប្រាប់ថា បងប្អូនជីដូនមួយរស់នៅតំបន់ក្វាងស៊ីចូវ បានឱ្យរូបមន្តធ្វើម្ហូបមកខ្លួន ។ ក្នុង១ថ្ងៃៗ លោកអាចលក់មុខម្ហូបឆាទុរេនដាក់ស្តរបឺរី ចាប់ពី៥ចាន ទៅ៦ចាន ។

ចុងក្រោយ ស្ត្រីអ្នកថតវីដេអូនិយាយថា មុខម្ហូបនេះមានរសជាតិឆ្ងាញ់ល្មមបរិភោគ ប៉ុន្តែវាមិនត្រូវគ្នាជាមួយនាងទេ ។ ដូច្នេះ នាងនឹងមិនត្រឡប់មកទិញវាបរិភោគទៀតទេ ។ វីដេអូនេះត្រូវបានមហាជនយកមកចែកចាយក្នុងបណ្តាញសង្គមហ្វេសប៊ុក ហើយធ្វើឱ្យមានការរិះគន់យ៉ាងច្រើន ក្នុងនោះបុរសម្នាក់និយាយថា ទុរេនមានរសជាតិឆ្ងាញ់បំផុត គឺទុរេនដែលបកពីសំបកមក ប៉ុន្តែមុខម្ហូបខាងលើជាការយកទុរេនមកប្រើប្រាស់ឥតប្រយោជន៍ ។

ចំណែកអ្នកលេងបណ្តាញសង្គមម្នាក់ទៀតនិយាយថា ៖ «ពេលនេះ ខ្ញុំយល់ហើយថា ជនជាតិអ៊ីតាលីមានអារម្មណ៍បែបណា នៅពេលពួកគេឃើញចំណិតម្នាស់នៅលើភីហ្សា ហើយផ្លែឈើឆ្ងាញ់ៗយកទៅធ្វើឱ្យខូចរសជាតិអស់» ៕