មនុស្សភាគច្រើនបានផឹកកាហ្វេជាទម្លាប់ប្រចាំថ្ងៃដើម្បីឱ្យមានអារម្មណ៍ស្រស់ស្រាយ និងអាចបំពេញការងារមួយថ្ងៃ ខណៈមនុស្សខ្លះទៀតផឹកកាហ្វេច្រើនជាង១កែវក្នុង១ថ្ងៃ ហើយពេលខ្លះ ពួកគេនៅតែមានអារម្មណ៍ងងុយដេក បើទោះជាបានផឹកកាហ្វេច្រើនក្តី ។ វេជ្ជបណ្ឌិតនិយាយថា វាអាចកើតឡើងដោយសារខ្វះជាតិទឹកក្នុងរាងកាយ ទើបធ្វើឱ្យស្រោមខួរក្បាលចុះខ្សោយ ។ ហេតុនេះ ការផឹកទឹកស្អាតចូលក្នុងរាងកាយអាចធ្វើឱ្យខួរក្បាលដំណើរការល្អឡើងវិញ និងការពារតម្រងនោមផងដែរ ។

វេជ្ជបណ្ឌិតផ្នែកតម្រងនោមម្នាក់ឈ្មោះ Hong Yongxiang បាននិយាយក្នុងកម្មវិធី «Doctors Are So Hot» អំពីអ្នកជំងឺប្រុសម្នាក់ដែលបានមកពិគ្រោះយោបល់ជាមួយវេជ្ជបណ្ឌិតថា កាលពីមុន អ្នកជំងឺរូបនេះបានផឹកកាហ្វេខ្មៅ២កែវក្នុង១ថ្ងៃ ដើម្បីអាចធ្វើការបានពេញមួយថ្ងៃ ។ ប៉ុន្តែក្រោយមក គាត់ត្រូវបង្កើនបរិមាណកាហ្វេច្រើនជាងមុន គឺស្មើ៤កែវក្នុង១ថ្ងៃ ដើម្បីឱ្យរាងកាយដំណើរការ ។ រីឯលទ្ធផលទទួលបាន គឺគាត់ញ័រដៃជើង និងខ្លួនប្រាណ ហើយមានអារម្មណ៍ហត់នឿយ ។

វេជ្ជបណ្ឌិតផ្នែកតម្រងនោមបន្តថា ក្រោយការត្រួតពិនិត្យទឹកនោម និងដំណើរការរបស់តម្រងនោមរបស់អ្នកជំងឺខាងលើឃើញថា តម្រងនោមរបស់គាត់ល្អធម្មតា ប៉ុន្តែទឹកនោមខាប់ នេះបង្ហាញថា បរិមាណទឹកក្នុងរាងកាយមិនគ្រប់គ្រាន់ ។ ការផឹកកាហ្វេច្រើននាពេលរសៀលដើម្បីឱ្យមានអារម្មណ៍ស្រស់ស្រាយ វាធ្វើឱ្យរាងកាយខ្វះទឹក ពីព្រោះកាហ្វេអាចបណ្តេញទឹកនោម និងធ្វើឱ្យរាងកាយខ្វះទឹកខ្លាំង ។

ចំណែកស្រោមខួរក្បាលរបស់យុវវ័យដែលខ្វះជាតិទឹក នឹងបណ្តាលឱ្យខួរក្បាលចុះខ្សោយ គឺដូចគ្នានឹងខួរក្បាលរបស់អ្នកជំងឺអាល់ហ្សៃមឺ ។ ប៉ុន្តែគេអាចព្យាបាលឱ្យជាសះស្បើយ ដោយគ្រាន់តែផឹកទឹកឱ្យបានគ្រប់គ្រាន់ វានឹងធ្វើឱ្យស្រោមខួរក្បាលដំណើរការល្អឡើងវិញ ។

ហេតុនេះ វេជ្ជបណ្ឌិតបានណែនាំឱ្យអ្នកជំងឺផ្លាស់ប្តូរទម្លាប់ប្រចាំថ្ងៃ ដោយការផឹកទឹកស្អាត២កែវនាពេលរសៀល ជំនួសការផឹកកាហ្វេ ។ រយៈពេល១ខែក្រោយមក អ្នកជំងឺរូបនេះបានមកជួបវេជ្ជបណ្ឌិតម្តងទៀត និងប្រាប់ថា ទទួលបានលទ្ធផលល្អខ្លាំង ពីព្រោះការផឹកទឹកស្អាតមានអារម្មណ៍ស្រស់ស្រាយជាងការផឹកកាហ្វេខ្មៅ ។

វេជ្ជបណ្ឌិតផ្នែកតម្រងនោមបញ្ជាក់ថា ទឹកស្អាត គឺល្អបំផុតសម្រាប់ការជួយលាងសម្អាតជាតិពុលយ៉ាងមានប្រសិទ្ធភាព និងអាចការពារដំណើរការរបស់តម្រងនោមផងដែរ ។ ហេតុនេះ ការផឹកទឹកស្អាតគ្រប់គ្រាន់ជារឿងសំខាន់ និងហាមមើលរំលងជាដាច់ខាត ៕

ប្រទេសចិន៖ បុរសជនជាតិចិនអាយុ ៨៦ ឆ្នាំម្នាក់ទើបតែបានរៀបការជាមួយស្នេហាដំបូងរបស់គាត់ ដែលធ្លាប់បានសារភាពស្នេហ៍កាលពីរៀនសកលវិទ្យាល័យជាមួយគ្នា ខណៈដែលពេលនោះនារីដែលគាត់ស្រឡាញ់មិនមានការឆ្លើយតបនោះទេ ទោះជាយ៉ាងណាការតស៊ូព្យាយាមរបស់គាត់ក៏ទទួលបានជោគជ័យ ដោយខាងស្រីទើបតែបានឆ្លើយយល់ព្រមបន្ទាប់ពីគាត់រង់ចាំពាក្យនេះអស់រយៈពេល ៦០ ឆ្នាំ។

យោងតាមការចុះផ្សាយរបស់ SCMP ពិធីមង្គលការនេះបានធ្វើឱ្យមានការចាប់អារម្មណ៍យ៉ាងខ្លាំងពាសពេញបណ្តាញសង្គម ដោយគូស្វាមីភរិយាវ័យចំណាស់ទទួលបានពរជ័យយ៉ាងអស់ពីចិត្តជាបន្តបន្ទាប់ពីមនុស្សទូទាំងសហគមន៍អនឡាញចិន។ អ្នកនិយមលេងអ៊ីនធឺណិតម្នាក់បានបញ្ចេញមតិថា “រំភើបណាស់ ការតស៊ូព្យាយាមគង់តែបានសម្រេចពិតមែន នេះជាស្នេហាពិត” អ្នកខ្លះទៀតក៏បញ្ចេញមតិថា “លោកតាពិតជាមនុស្សពូកែរង់ចាំមែន បុរសល្អដូចលោកតានៅមានទៀតទេ”?

យោងតាមប្រភពដដែលបានឱ្យដឹងទៀតថា កូនកំលោះអាយុ ៨៦ ឆ្នាំរូបនេះមានឈ្មោះថា Zhou Guilin មកពីទីក្រុង Yiyang ក្នុងខេត្ត Hunan ភាគកណ្តាលប្រទេសចិន បានរៀបការជាមួយគូស្នេហ៍ដំបូងរបស់គាត់គឺលោកស្រី Duong Tu Quy អាយុ ៨១ ឆ្នាំកាលពីថ្ងៃទី ១៤ ខែមេសា ឆ្នាំ២០២៤ កន្លងទៅ។ លោក Zhou និងលោកស្រី Duong ធ្លាប់មានទំនាក់ទំនងយ៉ាងល្អជាមួយគ្នាតាំងពីពួកគេជានិស្សិតនៅសាកលវិទ្យាល័យ Peking ដ៏ល្បីល្បាញ។ ប៉ុន្តែដោយសារបញ្ហាគ្រួសារ និងបញ្ហាប្រឈមស្មុគស្មាញផ្សេងទៀតពួកគេក៏ជ្រើសរើសដើរផ្លូវរៀងៗខ្លួន។

ទោះបីជាបែកគ្នាអស់រយៈពេល ៦០ ឆ្នាំក៏ដោយ អំឡុងពេលនោះលោក Zhou នៅតែព្យាយាមទាក់ទងទៅលោកស្រី Duong ខណៈដែលពេលនោះលោកស្រី Duong មានស្វាមីហើយ ប៉ុន្តែលោក Zhou មិនទាន់មានទេហើយក៏មិនរៀបការជាមួយនារីណាម្នាក់ដែរ ដោយនៅតែរង់ចាំលោកស្រី Duong រហូតដល់អ្នកទាំងពីបានចាប់ដៃគ្នារៀបការ។ ភាពស្និទ្ធស្នាលរវាងគូស្នេហ៍មួយគូនេះ បានបង្ហាញឱ្យឃើញ ស្នេហារបស់លោក Zhou ពិតជាមានអត្ថន័យណាស់។

នៅក្នុងឱកាសពិធីបុណ្យនេះ កូនក្រមុំបានរាំច្រៀង និងលេងស្គរយ៉ាងសប្បាយរីករាយ បន្ថែមនូវបរិយាកាសដ៏រស់រវើកនៃក្រុមដែលបានប្រមូលផ្តុំគ្នាដើម្បីអបអរសាទរ។ ពិធីនេះមានលក្ខណៈសាមញ្ញ ដោយមានតុចំនួនបីសម្រាប់មិត្តភ័ក្តិ និងញាតិមិត្តជិតស្និទ្ធប៉ុន្មាននាក់ប៉ុណ្ណោះ។ ទោះជាយ៉ាងណាការរៀបការរបស់គាត់បានធ្វើឱ្យអ្នកនិយមលេងអ៊ីនធឺណិតជាច្រើនមានការរំភើបជាខ្លាំង ដោយពួកគេបានជូនពរអ្នកទាំងពីឱ្យស្រឡាញ់គ្នាជារៀងរហូតនិងជួបគ្នាគ្រប់ៗជាតិ៕

ប្រទេសថៃ ៖ កាលពីថ្ងៃទី២៤ ខែមេសា ឆ្នាំ២០២៤ អាជ្ញាធរក្រុងបាងកកបានរាយការណ៍ពីសន្ទស្សន៍កំដៅ (Heat Index) ប្រចាំថ្ងៃក្នុងតំបន់នានាថា ស្មើនឹង៥២អង្សារសេ គឺជាកម្រិតគ្រោះថ្នា.ក់ ខ្លាំង ហើយអាជ្ញាធរក្រុងបាងកកបានណែនាំឱ្យពលរដ្ឋទាំងអស់ចៀសវាងធ្វើការងារនៅក្រោមកំដៅថ្ងៃ ។

សន្ទស្សន៍កំដៅ (Heat Index) មានន័យថា ជាសីតុណ្ហភាពដែលរាងកាយមានអារម្មណ៍ថា អាកាសធាតុក្តៅខ្លាំងកម្រិតណានៅពេលនោះ ហើយវាអាស្រ័យលើសីតុណ្ហភាព និងសំណើមទាក់ទងនឹងខ្យល់ ។ វាបង្ហាញពីគ្រោះថ្នាក់ដែលរាងកាយនឹងរងផលប៉ះពាល់ ដោយសារកំដៅខ្លាំងជាងសីតុណ្ហភាពខ្ពស់បំផុត ។

បើតាមភ្នាក់ងារអភិវឌ្ឍន៍វិទ្យាសាស្ត្រ និងបច្ចេកវិទ្យាជាតិរបស់ថៃ បានបញ្ជាក់កាលពីថ្ងៃទី៦ ខែមេសា ឆ្នាំ២០២៤ ថា សន្ទស្សន៍កំដៅ (Heat Index) គឺជាការយកសីតុណ្ហភាពខ្យល់មករួមបញ្ចូលជាមួយសំណើម ឬបើនិយាយឱ្យស្រួលស្តាប់ គឺសន្ទស្សន៍កំដៅ មានន័យថា រាងកាយរបស់មនុស្សមានអារម្មណ៍ថា អាកាសធាតុក្តៅខ្លាំងកម្រិតណា ។

ផលប៉ះពាល់ដល់សុខភាពដោយសាររលកកំដៅខ្លាំង គឺបណ្តាលមកពីការប៉ះពាល់សីតុណ្ហភាពខ្យល់លើសពីកម្រិតរាងកាយទទួលយក ។ វាអាចប៉ះពាល់ដល់រាងកាយដោយផ្ទាល់ និងប្រយោល ដូចជា ៖ អស់កម្លាំង, វិលមុខ, ឡើងកន្ទួល, រមួលក្រពើ និងកើតជំងឺដាច់សរសៃឈាមខួរក្បាល ។

អាជ្ញាធរក្រុងបាងកកបានណែនាំឱ្យក្រុមពលរដ្ឋងាយរងគ្រោះប្រុងប្រយ័ត្នពេលអាកាសធាតុក្តៅខ្លាំង ក្នុងនោះមានក្មេងអាយុ៥ឆ្នាំចុះ, មនុស្សចាស់អាយុចាប់ពី៦៥ឆ្នាំឡើង, ស្ត្រីមានផ្ទៃពោះ, អ្នកមានជំងឺប្រចាំកាយ, អ្នកធ្វើការក្រោមកំដៅថ្ងៃរយៈពេលយូរ, អ្នកហាត់ប្រាណក្រោមកំដៅថ្ងៃ និងភ្ញៀវទេសចរ ។

នាយកដ្ឋានឧតុនិយមបានព្យាករអាកាសធាតុនៅថ្ងៃទី២៤ ដល់ថ្ងៃទី២៥ ខែមេសា ឆ្នាំ២០២៤ ថា ក្រុងបាងកក និងតំបន់ជុំវិញនឹងមានអាកាសធាតុក្តៅខ្លាំង ព្រមទាំងមានភ្លៀងធ្លាក់ និងផ្គររន្ទះតិចតួចក្នុងតំបន់ខ្លះ ។ រីឯសីតុណ្ហភាពទាបបំផុត ស្មើចាប់ពី២៨អង្សារ ទៅ៣០អង្សារ និងសីតុណ្ហភាពខ្ពស់បំផុត ស្មើចាប់ពី៣៦អង្សារ ទៅ៤០អង្សារ ។

ដោយឡែក គេហទំព័រការិយាល័យបរិស្ថានក្រុងបាងកកបានប្រកាសថា សន្ទស្សន៍កំដៅ (Heat Index) នៅថ្ងៃទី៣០ ខែមេសា ឆ្នាំ២០២៤ ស្ថិតក្នុងកម្រិតគ្រោះថ្នាក់ខ្លាំង ហើយសំណូមពរឱ្យពលរដ្ឋទាំងអស់ចៀសវាងធ្វើការងារក្រោមកំដៅថ្ងៃជាដាច់ខាត ៕

ប្រទេសជប៉ុន ៖ ទារ.ក នៅប្រទេសជប៉ុនជាង១០០នាក់ ត្រូវបានឪពុក-ម្តាយនាំមកចូលរួមការប្រកួតកីឡាស៊ូម៉ូស្រែកយំឮខ្លាំងបំផុត ដែលជប៉ុនបានរៀបចំឡើងនៅតាមវត្តនានាទូទាំងប្រទេសជារៀងរាល់ឆ្នាំ ។ ជនជាតិជប៉ុនជឿថា ការនាំទារកមកចូលរួមប្រកួតកីឡានេះ នឹងធ្វើឱ្យពួកគេមានសុខភាពល្អ ។

នៅលើសង្វៀនប្រកួតកីឡាស៊ូម៉ូ ដែលរៀបចំឡើងនៅវត្ត Sensoji ស្ថិតក្នុងទីក្រុងតូក្យូ កីឡាករស៊ូម៉ូមាឌធំៗចំនួន២នាក់ មកពីក្លិបចំបាប់សាកលវិទ្យាល័យ Nihon បានលើកទារក២នាក់ ដែលពាក់ខ្សែក្រវ៉ាត់ស៊ូម៉ូទំហំតូចមកដាក់ទល់មុខគ្នា ។ បន្ទាប់មក កីឡាករស៊ូម៉ូមាឌធំៗព្យាយាមធ្វើឱ្យទារកស្រែកយំឮខ្លាំងៗដើម្បីទទួលជ័យជម្នះក្នុងការប្រកួត ។

ចំណែកលក្ខខណ្ឌការប្រកួត បើទារកណាស្រែកយំមុនគេ នឹងទទួលបានជ័យជម្នះក្នុងការប្រកួតនេះ ។ រីឯអ្នករៀបចំកម្មវិធី និងអ្នកចូលរួមទស្សនាការប្រកួតទាំងអស់នាំគ្នាពាក់ម៉ាស់រូបបីសាច និងឆ្កែចចកដែលមានពណ៌ខុសៗគ្នា ដើម្បីឱ្យទារកឃើញមុខរបស់ពួកគេហើយស្រែកយំកាន់តែខ្លាំង ។

ប្រពៃណីការប្រកួតកីឡាស៊ូម៉ូទារកស្រែកយំឮខ្លាំងរបស់ជនជាតិជប៉ុន តែងតែរៀបចំឡើងនៅកន្លែងសក្ការៈបូជា និងតាមវត្តនានាទូទាំងប្រទេស ។ ជារៀងរាល់ឆ្នាំ ឪពុក-ម្តាយជាច្រើននាក់បាននាំកូនតូចរបស់ពួកគេមកចូលរួមការប្រកួតកីឡា ដើម្បីបន្តប្រពៃណីដ៏យូរអង្វែងអស់រយៈពេលជាង៤០០ឆ្នាំ ។

ចំណែកវត្ត Sensoji បានចាប់ផ្តើមរៀបចំការប្រកួតកីឡាប្រភេទនេះ តាំងពីឆ្នាំ១៩៩១ មកម៉្លេះ ។ មុនពេលចាប់ផ្តើមប្រកួត គេនឹងនាំទារកទៅកាន់មុខកន្លែងសក្ការៈបូជាស័ក្តិសិទ្ធិរបស់សាសនាឈីនតូក្នុងព្រះវិហារ ដើម្បីព្រះសង្ឃរៀបចំពិធីឱ្យទារកទទួលភាពបរិសុទ្ធ មុននាំទារកទៅកាន់សង្វៀនប្រកួតកីឡាស៊ូម៉ូនៅក្រៅព្រះវិហារ ។ ព្រះសង្ឃនៅវត្ត Sensoji ឱ្យដឹងថា ជនជាតិជប៉ុនជឿថា សំឡេងយំរបស់ទារកនឹងអាចបណ្តេញខ្មោចព្រាយបីសាច និងជួយការពារទារកពីហេតុការណ៍អាក្រក់ផ្សេងៗ ។

ទោះយ៉ាងណា លក្ខខណ្ឌការប្រកួត គឺខុសៗគ្នាទៅតាមតំបន់នីមួយៗនៅប្រទេសជប៉ុន ក្នុងនោះលក្ខខណ្ឌការប្រកួតក្នុងតំបន់ខ្លះកំណត់ថា បើទារកណាស្រែកយំឮខ្លាំងមុនគេ នឹងឈ្នះការប្រកួត ។ ប៉ុន្តែលក្ខខណ្ឌការប្រកួតក្នុងតំបន់ខ្លះទៀតកំណត់ថា ទារកណាដែលស្រែកយំឮខ្លាំងមុនគេ នឹងចាញ់ការប្រកួត ៕

កម្ពុជាបានចូលជាសមាជិកអាស៊ាននៅថ្ងៃទី ៣០ ខែមេសា ឆ្នាំ ១៩៩៩ និងបានក្លាយជាសមាជិកទី ១០ នៃសមាគមនេះ។

សមាគមប្រជាជាតិអាស៊ីអាគ្នេយ៍ ដែលហៅកាត់ថា អាស៊ាន ត្រូវបានបង្កើតឡើងនៅថ្ងៃទី៨ ខែសីហា ឆ្នាំ១៩៦៧ ក្នុងទីក្រុងបាងកក ប្រទេសថៃ ដោយមានការចុះហត្ថលេខាលើសេចក្តីប្រកាសទីក្រុងបាងកកដោយបិតាស្ថាបនិករបស់អាស៊ាន ដែលមានប្រទេសឥណ្ឌូនេស៊ី ម៉ាឡេស៊ី ហ្វីលីពីន សឹង្ហបុរី និងថៃ។ សមាជិកបន្ទាប់គឺមានប្រុយណេ វៀតណាម ឡាវ ភូមា កម្ពុជា។

អាស៊ានត្រូវបានកសាងឡើងដោយឈរលើសរសរស្តម្ភទាំងបីគឺ៖ សហគមន៍សន្តិសុខនយោបាយអាស៊ាន (APSC) សហគមន៍សេដ្ឋកិច្ចអាស៊ាន (AEC) និងសហគមន៍សង្គមវប្បធ៌មអាស៊ាន (ASCC)។

សមាគមអាស៊ាន គឺបង្កើតឡើងដើម្បីអំពាវនាវឲ្យប្រទេសដែលជាសមាជិករបស់ខ្លួនទាំងអស់មានការប្តេជ្ញាចិត្តនិងទំនួលខុសត្រូវរួមគ្នាក្នុងការស្វែងរកសន្តិភាព ស្ថិរភាព និងវិបុលភាព ដោយផ្អែកលើគោលការណ៍ឯករាជ្យ អធិបតេយ្យភាព ការមិនជ្រៀតជ្រែកកិច្ចការផ្ទៃក្នុង និងការអនុវត្តប្រកបដោយសមធម៌ដោយគ្មានការដាក់ទណ្ឌកម្ម។

គោលបំណងនៃការចូលជាសមាជិកអាស៊ានរបស់កម្ពុជា៖
១ ពង្រីកឱកាសជាអតិបរមាក្នុងការកសាងទំនាក់ទំនងមិត្តភាព និងកិច្ចសហប្រតិបត្តិការក្នុងតំបន់ និងលើសពីឆ្ពោះទៅរកសន្តិភាព ស្ថិរភាព សន្តិសុខ និងការអភិវឌ្ឍន៍សេដ្ឋកិច្ចសង្គមរបស់កម្ពុជា។

២ ពង្រឹងសមាហរណកម្មក្នុងតំបន់ និងអន្តរជាតិរបស់កម្ពុជា និងឈរឈ្មោះជាសមាជិកប្រកបដោយការទទួលខុសត្រូវនៃសហគមន៍អន្តរជាតិ។

៣ លើកកម្ពស់ និងពង្រីកការរួមចំណែករបស់កម្ពុជាក្នុងការដោះស្រាយបញ្ហាប្រឈមក្នុងតំបន់ និងពិភពលោក និងក្នុងការកសាងពិភពលោកប្រកបដោយសុខដុមរមនា សន្តិភាព និងវិបុលភាពសម្រាប់ទាំងអស់គ្នា។

៤ លើកតម្កើងតម្លៃសន្តិភាពក្នុងតំបន់អាស៊ីអាគ្នេយ៍ តាមរយៈការអនុវត្តប្រកបដោយជោគជ័យរបស់កម្ពុជាលើគោលនយោបាយឈ្នះ ឈ្នះ និងការចូលរួមយ៉ាងសកម្មក្នុងការរក្សាសន្តិភាពរបស់អង្គការសហប្រជាជាតិ។

៥ អានុភាពលើវឌ្ឍនភាពនៃការអភិវឌ្ឍន៍សេដ្ឋកិច្ចសង្គមដ៏រឹងមាំរបស់កម្ពុជា និងកំណើនសេដ្ឋកិច្ចខ្ពស់ប្រកបដោយនិរន្តរភាព ដើម្បីពន្លឿនសមាហរណកម្មក្នុងតំបន់ និងកិច្ចខិតខំប្រឹងប្រែងសហគមន៍អាស៊ាន៕

ប្រទេសចិន៖ ឆ្មាមួយក្បាលនៅក្នុងប្រទេសចិន បានធ្វើឱ្យមានការចាប់អារម្មណ៍យ៉ាងខ្លាំង នៅពេលដែលវាបានបង្កើតគ្រោះថ្នាក់ដោយអចេតនា ដែលបណ្តាលឱ្យឆាបឆេះផ្ទះរបស់ម្ចាស់វា និងធ្វើឱ្យខូចខាតទ្រពសម្បត្តិអស់ជាង ១៣.០០០ ដុល្លារអាមេរិក បន្ទាប់ពីម្ចាស់វាបានចេញទៅក្រៅ នេះបើយោងតាម South China Morning Post ដែលបានចុះផ្សាយកាលពីថ្ងៃទី២៩ ខែមេសា ឆ្នាំ២០២៤។

ហេតុការណ៍នេះបានកើតឡើងនៅក្នុងខេត្ត Sichuan ប្រទេសចិន នៅពេលដែលម្ចាស់ផ្ទះបានចេញទៅក្រៅដើរលេង ហើយទុកឆ្មាចោលនៅក្នុងផ្ទះម្នាក់ឯង ខណៈវាកំពុងរត់លេងក្នុងផ្ទះបាយ ហើយចៃដន្យវាក៏រត់ប៉ះចង្រ្កានអាំងភ្លើងអគ្គិសនី បន្ទាប់មកវាក៏បានជាន់លើបន្ទះដំណើរការរបស់ឧបករណ៍ ហើយក៏បណ្តាលឱ្យផ្ទះរបស់ម្ចាស់វាឆាបឆេះ និងបណ្តាលឱ្យខូចខាតអស់ ១.៣ ម៉ឺនដុល្លារអាមេរិក។

ស្ត្រីម្នាក់ឈ្មោះ Dandan ដែលជាម្ចាស់ផ្ទះនិងជាម្ចាស់ឆ្មាបានទទួលទូរស័ព្ទពីបុគ្គលិកគ្រប់គ្រងអចលនទ្រព្យដោយប្រាប់នាងថា ផ្ទះរបស់នាងត្រូវភ្លើងឆេះ។ ភ្លាមនោះនាងក៏បានប្រញាប់ប្រញាល់ទៅផ្ទះល្វែងរបស់នាង ហើយក៏បានរកឃើញថាឆ្មាចិញ្ចឹមរបស់នាងគឺជាមូលហេតុនៃអគ្គីភ័យ ដោយបានឆាបឆេះជាន់ទីមួយទាំងមូលនៃផ្ទះល្វែងតូចមួយរបស់នាង។ ក្រុមសង្គ្រោះបាននិយាយថា ឆ្មាហាក់ដូចជាបានទៅលេងនៅក្នុងផ្ទះបាយ ហើយចៃដន្យបានជាន់លើបន្ទះអាំងឌុចទ័រនៃចង្ក្រានអគ្គិសនី បណ្តាលឱ្យចង្ក្រានបើកហើយក៏បានឆាបឆេះផ្ទះនេះតែម្តង។ ទោះជាយ៉ាងណាឆ្មាមួយក្បាលនេះមិនមានគ្រោះថ្នាក់នោះទេ ដោយសារវាបានលាក់ខ្លួននៅក្នុងទូខោអាវជាន់ខាងលើដោយមិនមានរបួសអ្វីសោះ។

ទោះបីជាឆ្មាមិនមានបញ្ហាពិតមែន ប៉ុន្តែការធ្វេសប្រហែសរបស់ឆ្មាបានបណ្តាលឱ្យខូចខាតទ្រពសម្បត្តិរបស់ម្ចាស់វាអស់ ១០០,០០០ យ័ន (ប្រមាណ ១៣,៨០៧ ដុល្លារអាមេរិក )។ ប្រឈមមុខនឹងស្ថានភាពដ៏គួរឱ្យហួសចិត្តនេះ Dandan ដែលជាម្ចាស់ឆ្មាបានប្តូរឈ្មោះគណនីបណ្តាញសង្គមរបស់នាងទៅជា “ឆ្មាឈាមត្រជាក់” នៅក្នុង Douyin ដែលជា TikTok របស់ចិន។ ហើយក្នុងពេលនោះនាងបាននិយាយថា “ជូនចំពោះអ្នកដែលស្រឡាញ់សត្វទាំងអស់គួរតែប្រុងប្រយ័ត្នឱ្យបានខ្ពស់ ហើយកុំបណ្តោយឱ្យសត្វចិញ្ចឹមរបស់អ្នកនៅម្នាក់ឯងព្រោះអាចកើតមានឧប្បត្តិហេតុដែលមិនអាចនឹកស្មានដល់”៕

ប្រទេសឡាវ ៖ កាលពីថ្ងៃទី២៥ ខែមេសា ឆ្នាំ២០២៤ មន្ទីរវប្បធម៌ និងទេសចរណ៍ប្រចាំទីក្រុងហ្លួងព្រះបាង ប្រទេសឡាវឱ្យដឹងថា ទីក្រុងហ្លួងព្រះបាង បានទទួលភ្ញៀវទេសចរសរុបចំនួន១១០.៣០២នាក់ ក្នុងអំឡុងពេលបុណ្យចូលឆ្នាំថ្មីឡាវ ឆ្នាំ២០២៤ កើនឡើង៣៦៤,៤៤% បើធៀបនឹងអំឡុងពេលដូចគ្នានៅឆ្នាំ២០២៣ ។

តួលេខនេះ មានភ្ញៀវទេសចរបរទេសស្មើជាង៤១.៤០០នាក់ ក្នុងនោះមានភ្ញៀវទេសចរចិនមកកម្សាន្តច្រើនជាងគេ គឺស្មើ១០.៤៩៧នាក់, កូរ៉េខាងត្បូង ស្មើ៥.៥៤១នាក់, ថៃ ស្មើ៤.២៨៤នាក់, វៀតណាម ស្មើ២.៨៤៣នាក់ និងភ្ញៀវទេសចរមកពីប្រទេសផ្សេងទៀត ។ រីឯអំឡុងពេលចូលឆ្នាំថ្មី ឆ្នាំ២០២៣ ទីក្រុងហ្លួងព្រះបាង បានទទួលភ្ញៀវទេសចរជាតិ និងបរទេស ស្មើនឹង២៣.៧៤៩នាក់ ។

នៅឆ្នាំ២០២៤នេះ ទីក្រុងហ្លួងព្រះបាង ដែលស្ថិតនៅឆ្ងាយពីទីក្រុងវៀងចន្ទន៍ ទៅទិសខាងជើងប្រមាណ២២០គីឡូម៉ែត្រ បានរៀបចំពិធីបុណ្យចូលឆ្នាំថ្មីយ៉ាងអធិកអធមជាងឆ្នាំមុនៗ គឺចាប់ពីថ្ងៃទី១០ ដល់ថ្ងៃទី២០ ខែមេសា ។ វាក៏ជាពិធីសំខាន់សម្រាប់គម្រោងទេសចរណ៍ឡាវ (Visit Laos Year) នៅទីក្រុងហ្លួងព្រះបាងផងដែរ ។

ហ្លួងព្រះបាង ជាទីក្រុងមានឈ្មោះល្បីល្បាញបំផុតរបស់ឡាវ និងជាកន្លែងទាក់ទាញភ្ញៀវទេសចរជាច្រើននាក់ ដោយសារមានវត្តបុរាណ និងតំបន់ទេសចរណ៍ដ៏ស្រស់ស្អាតជាច្រើនកន្លែង ។ ទីក្រុងនេះត្រូវបានចុះបញ្ជីជាសម្បត្តិមរតកពិភពលោកដោយអង្គការយូណេស្កូ (UNESCO) កាលពីឆ្នាំ១៩៩៥ ដែលមានតំបន់ទេសចរណ៍កំណត់ជាផ្លូវការ ចំនួន២២៨កន្លែង ក្នុងនោះមានតំបន់ទេសចរណ៍ធម្មជាតិ ១១១កន្លែង, តំបន់ទេសចរណ៍មរតកវប្បធម៌ ៧៨កន្លែង និងតំបន់ទេសចរណ៍ប្រវត្តិសាស្ត្រ ៣៩កន្លែង ។

ប្រទេសឡាវបានរៀបចំក្បួនដង្ហែរទេវតាឆ្នាំថ្មីនៅទីក្រុងហ្លួងព្រះបាង ដើម្បីប្រារព្ធពិធីបុណ្យសង្ក្រាន្ត ឬពិធីបុណ្យចូលឆ្នាំថ្មីតាមប្រពៃណីឡាវ ដោយមានការចូលរួមពីពលរដ្ឋឡាវស្លៀកពាក់សម្លៀកបំពាក់ប្រពៃណីយ៉ាងស្រស់ស្អាត ។ ក្នុងថ្ងៃដង្ហែរទេវតាឆ្នាំថ្មីនេះ មានពលរដ្ឋឡាវ និងភ្ញៀវទេសចរបរទេសយ៉ាងច្រើនកុះករបានមកចូលរួមលេងជះទឹកដាក់អ្នកដំណើរតាមផ្លូវយ៉ាងសប្បាយរីករាយ ៕