យោងតាមការបង្ហោះពីមន្ទីរទេសចរណ៍ខេត្តសៀមរាប កាលពីថ្ងៃទី២៩ ខែមេសា ឆ្នាំ២០២៤នេះ បានបង្ហាញឲ្យឃើញពីទិដ្ឋភាពហ្វូងសត្វប្រចៀវរាប់ពាន់ក្បាលហោះចេញពីកំពូលប្រាសាទភ្នំក្រោម ដែលទំនងជាទីជម្រកដ៏សុខសាន្តរបស់ពួកវា។ ទោះជាយ៉ាងណា ការដែលមើលឃើញសត្វប្រចៀវហោះហើរពេញអាកាសហាក់បង្កើតបានជាទស្សនីយភាពមួយគួរជាទីគយគន់ក៏ពិតមែន ប៉ុន្តែទន្ទឹមនឹងនោះ បើតាមការសិក្សាស្រាវជ្រាវ សត្វប្រចៀវក៏ជាកត្តាមួយធ្វើឲ្យប្រាសាទរងនូវការខូចខាតផងដែរ។
ប្រាសាទភ្នំក្រោម មានទីតាំងស្ថិតក្នុងភូមិភ្នំក្រោម ឃុំចុងឃ្នាស ស្រុកសៀមរាប ដែលមានចំងាយប្រមាណជា ១២ គីឡូម៉ែត្រ ពីក្រុងសៀមរាប ដោយធ្វើដំណើរតាមផ្លូវស្របនឹងដងស្ទឹងសៀមរាប ពីជើងទៅត្បូង និងស្ថិតនៅខាងជើងនៃបឹងទន្លេសាប។
ប្រាសាទភ្នំក្រោម ជាកូនភ្នំមួយមានកំពស់១៤០ម៉ែត្រ ត្រូវបានស្ថាបនាឡើងនៅចុងសតវត្សទី៩ និង ដើមសតវត្សទី១០ ដោយព្រះបាទយសោវរ្ម័នទី១ (៨៨៩-៩១៥) ដើម្បីឧទ្ទិសដល់អាទិទេពទាំងបីក្នុងព្រហ្មញ្ញសាសនាគឺ ព្រះឥសូរ ព្រះវិស្ណុ និង ព្រះព្រហ្ម។ ប្រាសាទនេះមានប្រាង្គបីធ្វើអំពីថ្មភក់ ស្ថិតនៅជាជួរលើខៀនមួយពីខាងជើងទៅត្បូង។ ប្រាង្គកណ្តាលឧទ្ទិសដល់ព្រះឥសូរ ខាងជើងឧទ្ទិសថ្វាយដល់ព្រះវិស្ណុ និង ខាងត្បូងឧទ្ទិសថ្វាយព្រះព្រហ្ម។ កំពូលនៃប្រាង្គទាំងនេះបានដួលរលំអស់ហើយ។ ប្រាសាទនេះមានកំពែងធ្វើអំពីថ្មបាយក្រៀម និង មានគោបុរៈនៅទិសខាងកើត។
យ៉ាងណាមិញ បើតាមការបញ្ជាក់ពីអាជ្ញាធរជាតិអប្សរាបានឲ្យដឹងថា បច្ចុប្បន្ន ប្រាសាទភ្នំក្រោមហាក់មានសភាពទ្រុឌទ្រោមយ៉ាងខ្លាំង ដោយអាចមកពីកត្តាមួយចំនួនដូចជា៖
-ប្រាសាទភ្នំក្រោមកសាងនៅជាប់នឹងទន្លេសាបបណ្ដាលឱ្យប្រាសាទនេះមានសំណើមច្រើនគ្រប់ពេលវេលា។ សំណើមនេះ បានបក់មកពីបឹងទន្លេសាប ជាពិសេសដោយអាកាសធាតុរបស់ប្រទេសកម្ពុជាក្ដៅហើយសើមទៀត ធ្វើឱ្យថ្មមានសភាពសើមស្ងួតរីករួមៗជាកត្ដានាំឱ្យថ្មភក់ពុកផុយ។
-ទឹកភ្លៀង (ទឹកភ្លៀងមានជាតិអាស៊ីត) ហូរចូលទៅផ្នែកខាងក្រោម នៃគ្រឹះប្រាសាទច្រោះដី និងថ្មបាយក្រៀម ធ្វើឱ្យពុកផុយលែងរឹងមាំ ដែលជាហេតុបណ្ដាលឱ្យគ្រឹះប្រាសាទត្រូវបាក់ស្រុតតួប្រាសាទត្រូវហែកបាក់ធ្លាក់ជាអន្លើៗ។
-រុក្ខជាតិ ជាមូលហេតុសំខាន់មួយដែរដែលធ្វើឱ្យប្រាសាទហែកបាក់ធ្លាក់ដោយឫសវាបានចាក់ចូលទៅក្នុងមុខតំណថ្ម។ ពេលណាឫសធំឡើងវាធ្វើឱ្យហើបប៉ើងថ្មបាក់ធ្លាក់ ។
-សត្វក៏ជាមូលហេតុដែរ ។ ប្រចៀវដែលចូលទៅរស់នៅក្នុងប្រាសាទហើយជុះនោមអាចម៍ដែលមានជាតិប្រៃហូរធ្លាក់តាមជញ្ជាំងប្រាសាទក៏ធ្វើឱ្យថ្មពុកផុយដែរ ។
-ក្រៅពីការបំផ្លាញដោយធម្មជាតិ សត្វ ក៏នៅមានមនុស្សដែលជាហេតុនាំឱ្យប្រាសាទត្រូវខូចខាតដែរដូចជាការគាស់កកាយដាប់យករូបចម្លាក់ទៅលក់ឬក៏យកទីតាំងសម្រាប់ធ្វើសឹកសង្គ្រាម៕