ប្រទេសថៃ ៖ ថ្មីៗនេះ ហ្វេសប៊ុកផេករបស់ថៃមួយឈ្មោះ «CSI LA» បានចែករំលែកព័ត៌មានពីអ្នកនយោបាយថៃមកពីគណបក្សធំៗ ចំនួន១០រូប ជាប់ពាក់ព័ន្ធនឹងការឆបោ.កអនឡាញ និងជួញដូរគ្រឿ.ងញៀន ប៉ុន្តែមិនបានបង្ហាញឈ្មោះអ្នកនយោបាយណាខ្លះទេ ។ មហាជនដាក់ការសង្ស័យទៅលើនាយករដ្ឋមន្ត្រីចាំផ្ទះ លោក Anutin Charnvirakul និងអ្នកនយោបាយមួយចំនួនក្នុងគណបក្សភូមិចៃថៃ ថាពាក់ព័ន្ធនឹងការឆបោ.កអនឡាញ និងជួញដូរគ្រឿ.ងញៀន ដោយព្យាយាមបិទបាំងព័ត៌មាន ។

តាមការចុះផ្សាយរបស់សារព័ត៌មាន Thai Post នៅថ្ងៃទី២១ ខែមករា ឆ្នាំ២០២៦ លោក Anutin បានបដិសេធការផ្សព្វផ្សាយព័ត៌មានថា ខ្លួនលោក និងអ្នកនយោបាយមួយចំនួនទៀតក្នុងគណបក្សភូមិចៃថៃជាប់ពាក់ព័ន្ធនឹងការឆបោកអនឡាញ និងជួញដូរគ្រឿងញៀន ។ លោកថា បានដឹងព័ត៌មាននេះ ប៉ុន្តែមិនមែនជារូបលោកទេ ហើយក៏មិនពាក់ព័ន្ធនឹងអ្នកនយោបាយផ្សេងៗក្នុងគណបក្សភូមិចៃថៃដែរ ទោះជារដ្ឋាភិបាលរបស់លោកមានគោលនយោបាយរក្សាការសម្ងាត់អ្នកឆបោកអនឡាញ និងជួញដូរគ្រឿងញៀន ប៉ុន្តែនឹងចាត់វិធានការអ្នកនយោបាយណាដែលប្រព្រឹត្តខុស ។

នៅថ្ងៃទី២១ ខែមករា លោក Anutin បានផ្តល់សម្ភាសន៍ជាមួយសារព័ត៌មានអំពីករណីហ្វេសប៊ុកផេក CSI LA ចែករំលែកព័ត៌មានពីអ្នកនយោបាយថៃមកពីគណបក្សធំៗ ចំនួន១០រូបជាប់ពាក់ព័ន្ធនឹងការឆបោកអនឡាញ និងជួញដូរគ្រឿងញៀន ថាសមត្ថកិច្ចមិនទាន់រាយការណ៍ពីករណីនេះទេ ប៉ុន្តែលោកដឹងតាមរយៈព័ត៌មានចុះផ្សាយ គឺលោកមិនពាក់ព័ន្ធឡើយ ។

ពេលអ្នកសារព័ត៌មានសួរថា តើនេះអាចជាការលាបពណ៌អ្នកនយោបាយនៅមុនការបោះឆ្នោតដែរឬទេ? លោក Anutin ថា វាមិនពាក់ព័ន្ធនឹងគណបក្សភូមិចៃថៃ និងមិនពាក់ព័ន្ធជាមួយរដ្ឋាភិបាល ពីព្រោះលោកបានបំពេញតួនាទីកម្ចាត់ការឆបោកអនឡាញ និងជួញដូរគ្រឿងញៀនជាបន្តបន្ទាប់ ។ បច្ចុប្បន្ន លោកផ្តោតតែលើការងាររកសំឡេងឆ្នោតប៉ុណ្ណោះ និងការងារដឹកនាំរដ្ឋាភិបាល ។ រីឯអ្នកនយោបាយថៃចំនួន១០រូប ពាក់ព័ន្ធនឹងការឆបោកអនឡាញ និងជួញដូរគ្រឿង ប្រសិនបើដឹងអត្តសញ្ញាណនឹងចាត់វិធានការតាមផ្លូវច្បាប់ គ្មានការលើកលែងអ្នកនយោបាយណាឡើយ ។

មហាជនបានដាក់ការសង្ស័យលោក Anutin ជាប់ពាក់ព័ន្ធនឹងការឆបោ.កអនឡាញ និងជួញដូរគ្រឿ.ងញៀន ពីព្រោះកន្លងមក ក្នុងប្រព័ន្ធអ៊ីនធើរណេតបានបែកធ្លាយរូបភាពរបស់លោកមានទំនាក់ទំនងជិតស្និទ្ធអង្គុយបរិភោគអាហារជាមួយឧក្រិដ្ឋជនឆ្លងដែនជនបរទេស ដែលពេលនោះ លោកបដិសេធមិនដឹងរឿង និងចាត់ទុកជាការចោទប្រកាន់ ។

គួរបញ្ជាក់ថា ប្រទេសថៃជាទីតាំងឆបោកអនឡាញ និងជួញដូរគ្រឿងញៀនដ៏ធំនៅតំបន់អាស៊ីអាគ្នេយ៍ ប៉ុន្តែសារព័ត៌មានថៃនានាព្យាយាមបិទបាំងព័ត៌មាននេះមិនហ៊ានចុះផ្សាយ ហើយបង្វែរមកទម្លាក់កំហុសលើកម្ពុជា ខណៈកម្ពុជាគ្រាន់តែរងផលប៉ះពាល់ការហូរចូលបទល្មើសពីប្រទេសថៃ ។ អ្នកនយោបាយថៃចំនួន១០រូប ដែលពាក់ព័ន្ធនឹងការឆបោកអនឡាញ និងជួញដូរគ្រឿងញៀននាពេលនេះ មិនត្រូវបានបញ្ចេញអត្តសញ្ញាណទេ ៕

ត្រឹមតែប៉ុន្មានថ្ងៃបន្ទាប់ពីការចេញផ្សាយនៃខ្សែភាពយន្ត «Can This Love be Translated?» បានក្លាយជារឿងល្បីដ៏ឆាប់រហ័ស ជារឿងភាគកូរ៉េមួយក្នុងចំណោមរឿងភាគដែលមានការនិយាយច្រើនបំផុតនៅលើ Netflix នៅដើមឆ្នាំ២០២៦។

យោងតាមតារាងចំណាត់ថ្នាក់របស់ Netflix រឿង Can This Love be Translated ពីតារាសម្តែង Kim Seon Ho និង Go Youn Jung បានឡើងដល់ចំណាត់ថ្នាក់លេខ ១ នៅក្នុងប្រទេសចំនួន១៣និងលេខ៣ទូទាំងពិភពលោកនៅលើវេទិកានេះ។ រឿងនេះស្វែងយល់ពីប្រធានបទនៃការប្រាស្រ័យទាក់ទង ឧបសគ្គភាសា និងភាពខុសគ្នាខាងវប្បធម៌ ដោយបើកដំណើរនៃការតភ្ជាប់អារម្មណ៍រវាងមនុស្សពីរនាក់ដែលហាក់ដូចជានៅឆ្ងាយពីគ្នា។ ខ្សែភាពយន្តនេះមិនផ្តោតលើភាពតានតឹងយ៉ាងខ្លាំងនោះទេ ប៉ុន្តែជ្រើសរើសរចនាប័ទ្មនិទានរឿងដ៏ទន់ភ្លន់ និងសម្បូរបែបខាងអារម្មណ៍ ដែលងាយស្រួលយល់សម្រាប់ទស្សនិកជនយ៉ាងទូលំទូលាយ។ ក្រៅពីរឿងរ៉ាវស្នេហា ខ្សែភាពយន្តនេះក៏ទទួលបានពិន្ទុជាមួយនឹងទេសភាពធម្មជាតិដ៏អស្ចារ្យ និងសម្រស់វប្បធម៌ដ៏ប្លែករបស់ប្រទេសផ្សេងៗ ដែលផ្តល់នូវបទពិសោធន៍ដ៏សម្បូរបែបខាងរូបភាព។

ទន្ទឹមនឹងភាពល្បីល្បាញរឿងនេះ Kim Seon Ho ក៏បានទាក់ទាញការចាប់អារម្មណ៍លើ ជីវិតផ្ទាល់ខ្លួននៃព្រឹត្តិការណ៍ជុំវិញរឿងអាស្រូវស្នេហារបស់ Kim Seon Ho ក្នុងឆ្នាំ ២០២១ ជាមួយអតីតមិត្តស្រីដោយនាង បានចោទប្រកាន់តារាសម្តែងរូបនេះថាបានបង្ខំនាងឱ្យរំលូតកូនដោយខ្លាចបំផ្លាញអាជីពរបស់លោក។ នាងក៏បានចោទប្រកាន់ផងដែរថា Kim Seon Ho ជាមនុស្សលាក់ពុត ហើយតែងតែនិយាយអាក្រក់ និងប្រមាថមិត្តរួមការងាររបស់ខ្លួន។

ទោះយ៉ាងណាមួយសប្តាហ៍ក្រោយមក ស្ថានភាពបានផ្លាស់ប្តូរដោយមិននឹកស្មានដល់ នៅពេលដែលទីភ្នាក់ងារសារព័ត៌មាន Dispatch បានចេញផ្សាយអត្ថបទមួយដែលបង្ហាញពីប្រវត្តិស្នេហារបស់ Kim Seon Ho ជាមួយអតីតមិត្តស្រីរបស់ខ្លួនដោយលោកមិនបានបង្ខំមិត្តស្រីរំលូតកូនទេពួកគេបានពិភាក្សាគ្នាហើយមានការយល់ព្រម។ អតីតមិត្តស្រីលោកក៏បានបោកប្រាស់មិត្តប្រុសរបស់នាងម្តងហើយម្តងទៀតឱ្យទៅជួបអ្នកផ្សេងទៀត ខណៈពេលដែលពួកគេកំពុងណាត់ជួប។ មិត្តរួមការងារម្នាក់របស់ Kim Seon Ho បាននិយាយថាទទួលខុសត្រូវទាំងអស់លើKim Seon Hoខ្លួនឯង ពីព្រោះលោកស្រឡាញ់អតីតមិត្តស្រីខ្លាំងហើយមិនចង់លាតត្រដាងជីវិតឯកជនរបស់ពួកគេទាំងពីរ។

វិធានការសកម្មរបស់ Dispatch ដើម្បីសម្អាតឈ្មោះរបស់តារាល្បីម្នាក់ត្រូវបានចាត់ទុកថាជារឿង «កម្រ»។ ទីភ្នាក់ងារព័ត៌មាននេះត្រូវបានគេស្គាល់អស់រយៈពេលជាច្រើនឆ្នាំមកហើយសម្រាប់ការលាតត្រដាងជីវិតឯកជន រឿងអាស្រូវ និងជាពិសេសទំនាក់ទំនងស្នេហារបស់សិល្បករ។ Dispatch បាន «ជួយសង្គ្រោះ» អាជីពរបស់ Kim Seon Ho។ មនុស្សជាច្រើនជឿថា Kim Seon Ho ពិតជា «មនុស្សចិត្តល្អ» និង «បុរសចិត្តល្អ» ទាំងនៅលើអេក្រង់ និងក្នុងជីវិតពិត៕

សហរដ្ឋអាមេរិក ៖ កាលពីថ្ងៃទី២០ ខែមករា ឆ្នាំ២០២៦ ប្រធានាធិបតីអាមេរិក លោក Donald Trump បានបង្ហោះរូបភាពខ្លួនលោកកាន់ទង់ជាតិអាមេរិកឈរលើកោះហ្គ្រីនឡែនក្នុងបណ្តាញសង្គម Truth Social ដែលមានអនុប្រធានាធិបតីអាមេរិក លោក JD Vance និងរដ្ឋមន្ត្រីក្រសួងការបរទេសអាមេរិក លោក Marco Rubio ឈរនៅក្បែរ ព្រមទាំងមានស្លាកសញ្ញាសរសេរថា «កោះហ្គ្រីនឡែន គឺជាទឹកដីអាមេរិកនៅឆ្នាំ២០២៦» ។

នៅថ្ងៃដដែលនេះ លោកប្រធានាធិបតី Trump ក៏បានបង្ហោះរូបភាពមួយផ្សេងទៀតបង្ហាញពីលោកអង្គុយពិភាក្សាជាមួយមេដឹកនាំអឺរ៉ុបជាច្រើនរូបក្នុងបន្ទប់ធ្វើការ (Oval Office) ដែលនៅក្នុងបន្ទប់នោះមានផ្ទាំងផែនទីប្រទេសកាណាដា វេណេស៊ុយអេឡា និងកោះហ្គ្រីនឡែន សុទ្ធតែដាក់ទង់ជាតិអាមេរិក ។

លោកប្រធានាធិបតី Trump បង្ហោះសារក្នុងបណ្តាញសង្គមថា បានជជែកតាមទូរស័ព្ទជាមួយអគ្គលេខាធិការអង្គការ NATO លោក Mark Rutte ស្តីពីកោះហ្គ្រីនឡែន (Greenland) ដោយបានបង្ហាញជំហរទៅកាន់មនុស្សគ្រប់គ្នាយ៉ាងច្បាស់លាស់ថា កោះហ្គ្រីនឡែនមានភាពចាំបាច់យ៉ាងខ្លាំងសម្រាប់សន្តិសុខអាមេរិក និងពិភពលោក ។ លោកមិនអាចត្រឡប់ក្រោយរឿងកោះនេះទេ សង្ឃឹមគ្រប់គ្នាយល់ស្រប ។

ចំណែកនាយករដ្ឋមន្ត្រីកោះហ្គ្រីនឡែន លោក Jens-Frederik Nielsen និយាយកាលពីថ្ងៃទី២០ ខែមករា ថា ការបង្ហោះរូបភាពរបស់លោកប្រធានាធិបតី Trump បង្ហាញពីអាមេរិកគ្រប់គ្រងកោះហ្គ្រីនឡែន គឺជាទង្វើមិនគោរពអធិបតេយ្យភាព ។ លោកបានតាមដានការបង្ហោះរូបភាពនេះក្នុងបណ្តាញសង្គម វាជាការមិនផ្តល់កិត្តិយសឱ្យគ្នា កោះហ្គ្រីនឡែនចង់ចរចាតាមរយៈវិធីសមស្របដើម្បីកុំឱ្យមានការបង្ហោះរូបភាពបែបនេះក្នុងបណ្តាញសង្គម និងសារព័ត៌មាននានា ។

លោកនាយករដ្ឋមន្ត្រី Nielsen បានបញ្ជាក់ពីកោះហ្គ្រីនឡែនត្រៀមខ្លួនទប់ទល់នឹងស្ថានការណ៍កើតឡើង ដោយសារលោកប្រធានាធិបតី Trump អាចនឹងប្រើប្រាស់កម្លាំងទ័ពកាន់កាប់កោះ ។ កោះនេះជាផ្នែកមួយរបស់អង្គការ NATO ហើយការធ្វើប្រតិបត្តិការរបស់កងទ័ពអាមេរិកនឹងប៉ះពាល់ហួសពីព្រំដែនហ្គ្រីនឡែន ពេលនេះ ស្ថានការណ៍តានតឹងនៅតំបន់អាកទិក យើងត្រូវបង្កើនកម្លាំងទ័ពឱ្យច្រើន ។

គួរបញ្ជាក់ថា រូបភាពលោកប្រធានាធិបតី Trump អង្គុយពិភាក្សាជាមួយមេដឹកនាំអឺរ៉ុបជាច្រើនរូបក្នុងបន្ទប់ធ្វើការ ដែលក្នុងបន្ទប់នោះមានផ្ទាំងផែនទីប្រទេសកាណាដា វេណេស៊ុយអេឡា និងកោះហ្គ្រីនឡែន ដាក់ទង់ជាតិអាមេរិក ដែលលោក Trump យកមកបង្ហោះក្នុងបណ្តាញសង្គម គឺជារូបភាពចាស់ ។ រូបភាពចាស់នេះថតតាំងពីថ្ងៃទី១៨ ខែសីហា ឆ្នាំ២០២៥ ក្នុងពេលលោកពិភាក្សាពីបញ្ហាសង្គ្រាមអ៊ុយក្រែន និងរុស្ស៊ីដណ្តើមកាន់កាប់ដែនដីខាងជើង និងខាងកើតរបស់អ៊ុយក្រែន ។

ការបង្ហោះរូបភាពទាំងនេះធ្វើឱ្យអ្នកលេងបណ្តាញសង្គមនៅទូទាំងពិភពលោក រិះគន់យ៉ាងខ្លាំងពីប្រធានាធិបតីអាមេរិកមិនត្រឹមតែចង់គ្រប់គ្រងកោះហ្គ្រីនឡែនរបស់ដាណឺម៉ាកប៉ុណ្ណោះទេ គឺថែមទាំងចង់គ្រប់គ្រងប្រទេសកាណាដា និងវេណេស៊ុយអេឡាផងដែរ ៕

ប្រទេសបារាំង ៖ ប្រធានាធិបតីបារាំង លោក Emmanuel Macron បាននិយាយក្នុងកិច្ចប្រជុំសេដ្ឋកិច្ចពិភពលោក (World Economic Forum) នៅទីក្រុង Davos ប្រទេសស្វីស និងរិះគ.ន់ខ្លាំងៗចំពោះការដំឡើងពន្ធទំនិញបារាំងក្នុងអត្រាខ្ពស់របស់ប្រធានាធិបតីអាមេរិក លោក Donald Trump ដោយសារបារាំងប្រឆាំងការកាន់កាប់កោះហ្គ្រីនឡែន និងមិនចូលជាសមាជិកក្រុមប្រឹក្សាសន្តិភាព ដោយលោកថា មិនបារម្ភការបំភិតភ័យឡើយ និងត្រៀមការពារផលប្រយោជន៍ជាតិ ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី២១ ខែមករា ឆ្នាំ២០២៦ ។

លោកប្រធានាធិបតី Macron បានផ្តល់សម្ភាសន៍ជាមួយសារព័ត៌មានថា ប្រទេសបារាំងមិនគួររងការគំរាមកំហែងណាមួយ និងចាំបាច់ត្រូវការពារផលប្រយោជន៍ជាតិរបស់ខ្លួន ដោយមិនប្រើប្រាស់ពាក្យសម្តីធ្ងន់ៗ ។ លោកថែមទាំងថ្កោលទោសការគំរាមកំហែងពាណិជ្ជកម្មពីអាមេរិកថា ពុំអាចទទួលយកបានឡើយ ។

ក្នុងកិច្ចប្រជុំសេដ្ឋកិច្ចពិភពលោក (World Economic Forum) នៅទីក្រុង Davos ប្រទេសស្វីស លោក Macron និយាយថា បណ្តាប្រទេសនៅតំបន់អឺរ៉ុបនឹងមិនចុះចាញ់ការសំឡុត ឬរងសម្ពាធអ្វីទាំងអស់ ។ ពាក្យសម្តីរបស់លោកត្រូវបានគេចាត់ទុកជាការរិះគន់លោកប្រធានាធិបតី Trump ដែលបានប្រកាសដំឡើងពន្ធទំនិញបារាំងក្នុងអត្រាខ្ពស់ ប្រសិនបើប្រឆាំងនឹងអាមេរិកកាន់កាប់កោះហ្គ្រីនឡែន ។

តាមការលើកឡើងរបស់ប្រធានាធិបតីបារាំង កិច្ចព្រមព្រៀងពាណិជ្ជកម្មដែលប៉ះពាល់ផលប្រយោជន៍នាំចេញទំនិញ គឺមានគោលដៅធ្វើឱ្យតំបន់អឺរ៉ុបអន់ខ្សោយ និងធ្លាក់ក្រោមឥទ្ធិពលរបស់អាមេរិក ។ ស្ថានការណ៍ផ្សេងៗកាន់តែតានតឹងពេលអាមេរិកយកការដំឡើងពន្ធទំនិញមកដាក់សម្ពាធឱ្យប្រទេសនានាគាំទ្រការកាន់កាប់កោះហ្គ្រីនឡែន ខណៈបារាំង និងបណ្តាប្រទេសអឺរ៉ុបប្រកាន់គោលជំហររក្សាអធិបតេយ្យ និងឯករាជ្យ ព្រមទាំងប្តេជ្ញាចិត្តសហការគ្នាបន្តទៀត ។ នេះជាមូលហេតុសំខាន់ដែលបារាំងសម្រេចចិត្តបញ្ជូនកងទ័ពទៅហ្វឹកហាត់នៅកោះហ្គ្រីនឡែន ដើម្បីគាំទ្រដាណឺម៉ាកជាសម្ព័ន្ធមិត្តអឺរ៉ុប ។

ក្រៅពីនេះ ប្រធានាធិបតីបារាំងបានអំពាវនាវឱ្យសហភាពអឺរ៉ុបចាត់វិធានការប្រឆាំងនឹងការបង្ខិតបង្ខំ (ឬវិធានការ ACI) ជាលើកដំបូង ដែលការបង្កើតវិធានការសម្រាប់ប្រើប្រាស់ជាមួយចិន ប៉ុន្តែពេលនេះ សហភាពអឺរ៉ុបចាំបាច់ត្រូវតែអនុវត្តវិធានការនេះជាមួយអាមេរិក ។

លោក Macron មិនស្នាក់នៅទីក្រុង Davos រហូតដល់ថ្ងៃទី២១ ខែមករា ទេ ពីព្រោះលោកមិនចង់ប្រឈមមុខជាមួយលោកប្រធានាធិបតី Trump ដែលមានគម្រោងធ្វើដំណើរមកទីក្រុង Davos នៅថ្ងៃទី២១ ខែមករា ។ លោកប្រធានាធិបតី Trump នឹងចូលរួមកិច្ចប្រជុំសេដ្ឋកិច្ចពិភពលោក (World Economic Forum) នៅទីក្រុង Davos ចាប់ពីថ្ងៃទី២១ ដល់ថ្ងៃទី២២ ខែមករា ដើម្បីនិយាយពីស្ថានការណ៍ពិភពលោក ។

គួរបញ្ជាក់ថា ថ្មីៗនេះ លោកប្រធានាធិបតី Trump ថែមទាំងប្រកាសដាក់ពន្ធលើស្រា Wine និងស្រាសាំប៉ាញនាំចូលពីប្រទេសបារាំងក្នុងអត្រាខ្ពស់រហូតដល់២០០% ដើម្បីបង្ខំឱ្ប្រធានាធិបតីបារាំងយល់ព្រមចូលរួមជាសមាជិកក្រុមប្រឹក្សាសន្តិភាព (Board of Peace) ដែលបង្កើតឡើងដោយលោក Trump ដើម្បីដោះស្រាយបញ្ហាជម្លោះនៅទូទាំងពិភពលោក ។ ប៉ុន្តែលោក Macron មិនចាប់អារម្មណ៍ចូលរួមក្នុងក្រុមប្រឹក្សានេះទេ ៕

ប្រទេសបារាំង ៖ កាលពីថ្ងៃទី២០ ខែមករា ឆ្នាំ២០២៦ ប្រធានាធិបតីបារាំង លោក Emmanuel Macron បានជំរុញឱ្យចិនបង្កើនការវិនិយោគនៅតំបន់អឺរ៉ុប ស្របពេលមានភាពតានតឹងកាន់តែខ្លាំងជាមួយអាមេរិកបណ្តាលមកពីការខ្វែងគំនិតគ្នាលើបញ្ហាប្រធានាធិបតីអាមេរិកទាមទារកាន់កាប់កោះហ្គ្រីនឡែន ដែលបច្ចុប្បន្ន ស្ថិតនៅក្រោមការគ្រប់គ្រងរបស់ដាណឺម៉ាក ។ ការជំរុញឱ្យចិនបង្កើនការវិនិយោគនៅអឺរ៉ុបត្រូវបានគេចាត់ទុកថា បារាំងកំពុងតែងាកទៅរកចិនពាក់ព័ន្ធនឹងការធ្វើពាណិជ្ជកម្ម ។

ប្រធានាធិបតីបារាំងសង្កត់ធ្ងន់ថា ទោះជាតំបន់អឺរ៉ុបបើកចំហទទួលយកភាពជាដៃគូក្នុងការវិនិយោគជាមួយចិន ប៉ុន្តែចាំបាច់ត្រូវតែផ្លាស់ប្តូរពីការនាំចេញទំនិញទៅជាការផលិតក្នុងស្រុក និងផ្ទេរបច្ចេកវិទ្យាក្នុងវិស័យឧស្សាហកម្មសំខាន់ៗ ។

ពេលនិយាយជាមួយមេដឹកនាំប្រទេសនានាក្នុងកិច្ចប្រជុំសេដ្ឋកិច្ចពិភពលោក (World Economic Forum) នៅទីក្រុង Davos ប្រទេសស្វីស លោកប្រធានាធិបតី Macron ថា កំណើនសេដ្ឋកិច្ចអឺរ៉ុបនឹងល្អប្រសើរដោយសារក្រុមហ៊ុនចិនចូលមកវិនិយោគ ។ វាល្អជាងការនាំចូលទំនិញមកកាន់អឺរ៉ុបនាពេលបច្ចុប្បន្ន ដែលទាញយកអត្ថប្រយោជន៍ពីការឧបត្ថម្ភទុនខ្ពស់ និងផ្ទុយបទប្បញ្ញត្តិអឺរ៉ុប ។ អឺរ៉ុបស្វាគមន៍ការវិនិយោគរបស់ចិន ប៉ុន្តែយើងត្រូវការការវិនិយោគផ្ទាល់ពីប្រទេសចិនក្នុងឧស្សាហកម្មមួយចំនួនដែលចិននាំមុខផ្នែកបច្ចេកវិទ្យា ដើម្បីគាំទ្រកំណើនសេដ្ឋកិច្ចអឺរ៉ុប រួមមាន ៖ ឧស្សាហកម្មថ្មរថយន្តអគ្គិសនី, បន្ទះសូឡា និងថាមពលស្អាត ។

ការលើកឡើងរបស់លោកប្រធានាធិបតី Macron បន្ទាប់ពីលោកធ្វើដំណើរទៅទីក្រុងប៉េកាំងកាលពីខែធ្នូ ឆ្នាំ២០២៥ ដែលពេលនោះ លោកបានជួបប្រធានាធិបតីចិន លោក Xi Jinping ពិភាក្សាពីគម្រោងផ្សេងៗដែលផ្តល់អត្ថប្រយោជន៍រួមគ្នា ។

ក្នុងកិច្ចប្រជុំសេដ្ឋកិច្ចពិភពលោក (World Economic Forum) នៅទីក្រុង Davos លោកប្រធានាធិបតី Macron បាននិយាយពីសារៈសំខាន់ដែលត្រូវការពារឧស្សាហកម្មរបស់អឺរ៉ុប ប៉ុន្តែលោកក៏ទទួលស្គាល់ចិនមានប្រៀបក្នុងការប្រកួតប្រជែងបច្ចេកវិទ្យា ។ យុទ្ធសាស្ត្រសំខាន់របស់ប្រធានាធិបតីបារាំង គឺគោលនយោបាយសិទ្ធិពិសេសរបស់អឺរ៉ុប ដោយគាំទ្រឱ្យរថយន្តគ្រប់ប្រភេទដែលលក់នៅអឺរ៉ុបត្រូវប្រើប្រាស់គ្រឿងបន្លាស់ផលិតក្នុងស្រុក យ៉ាងហោចណាស់ ៧៥% ។ គោលដៅនេះស្របតាមប្រព័ន្ធផ្គត់ផ្គង់រថយន្តប្រើប្រាស់ប្រេងឥន្ធនៈបច្ចុប្បន្ន និងផ្លាស់ប្តូរទៅប្រើប្រាស់រថយន្តអគ្គិសនី ដោយមិនធ្វើឱ្យការផលិតរថយន្តក្នុងស្រុកធ្លាក់ចុះ ។

គួរបញ្ជាក់ថា ប្រធានាធិបតីបារាំងជំរុញឱ្យចិនបង្កើនការវិនិយោគនៅអឺរ៉ុប ស្របពេលមានភាពតានតឹងខ្លាំងជាមួយអាមេរិក និងទំនាក់ទំនងពាណិជ្ជកម្មរវាងសហគមន៍អឺរ៉ុប (EU) ជាមួយចិន ធ្លាក់ចុះកាលពីចុងឆ្នាំ២០២៤ ដោយសារសហគមន៍អឺរ៉ុបដំឡើងពន្ធរថយន្តអគ្គិសនីចិន បន្ថែមលើពន្ធនាំចូលទំនិញស្មើ១០% ៕