អាការៈសាមញ្ញៗ តែមិនធម្មតាខាងក្រោមនេះ អាចជាសញ្ញានៃមហារីកក្រពេញអូវែ!

មហារីកក្រពេញអូវែ គឺជាជំងឺដ៏កាចសាហាវមួយដែលបានសម្លាប់ស្ត្រីម្នាក់រៀងរាល់ពីរម៉ោងម្តងនៅក្នុងចក្រភពអង់គ្លេស។ បញ្ហាប្រឈមធំបំផុតនៃជំងឺនេះ គឺរោគសញ្ញារបស់វាមានសភាពស្រដៀងនឹងជំងឺទូទៅដទៃទៀត ដែលធ្វើឱ្យស្ត្រីភាគច្រើនមើលរំលង រហូតដល់ជំងឺឈានចូលដំណាក់កាលធ្ងន់ធ្ងរ។

យោងតាមអង្គការ The Robin Cancer Trust ប្រសិនបើរកឃើញក្នុងដំណាក់កាលដំបូង មហារីកក្រពេញអូវែអាចព្យាបាលជាសះស្បើយរហូតដល់ទៅ ៩០% ឯណោះ។ យ៉ាងណាមិញ រោគសញ្ញាជំងឺនេះ ច្រើនតែត្រូវបានគេភាន់ច្រឡំថាជា បញ្ហាក្រពះពោះវៀន (IBS) ការស្រ្តេស ឬបញ្ហាអស់រដូវធម្មតាៗ ជាដើម។ ប៉ុន្តែប្រសិនជាអ្នកជួបប្រទះសញ្ញាទាំងនេះ ជាប់ៗគ្នា (Persistent) អ្នកត្រូវតែប្រុងប្រយ័ត្នឲ្យមែនទែន និងត្រូវប្រញាប់ទៅជួបគ្រូពេទ្យជាបន្ទាន់ ដូចជា៖

-ការហើមពោះ(Bloating) ជាប់រហូត ដែលមិនមែនក្រោយញ៉ាំអាហារឆ្អែតធម្មតានោះទេ

-ការនោមញឹកញាប់ (Frequent Urination) ទោះបីជាទើបតែនោមរួចក៏ដោយ

-ឆាប់ឆ្អែតខុសធម្មតា (Feeling Full Quickly) សូម្បីតែអ្នកញុាំបន្តិចបន្តួច ក៏មានអារម្មណ៍ថាឆ្អែតភ្លាមៗ ឬមានអារម្មណ៍មិនរំលាយអាហារ និងចង់ក្អួត

-ការធ្លាក់ឈាមខុសប្រក្រតី (Irregular Bleeding) រាប់បញ្ចូលទាំងការធ្លាក់ឈាមចន្លោះពេលមករដូវ ការមករដូវច្រើនខុសពីធម្មតា ឬការធ្លាក់ឈាមក្រោយពេលអស់រដូវ (Post-menopausal bleeding)

-ការឈឺចាប់ក្នុងអាងត្រគាក ឬពោះផ្នែកខាងក្រោម ដែលនេះវាអាចជាការឈឺចុក កន្ត្រាក់ ឬឈឺងំៗនៅតំបន់ពោះខាងក្រោម និងផ្នែកខ្នង ដែលមិនព្រមបាត់ទៅវិញតាមពេលវេលានោះទេ

បើទោះបីជាស្ត្រីគ្រប់រូបសុទ្ធតែមានឱកាសកើតជំងឺនេះក៏ដោយ ប៉ុន្តែមានកត្តាមួយចំនួនដែលបង្កើនហានិភ័យកាន់តែខ្លាំង ដូចជា៖ អ្នកដែលមានហ្សែនដដែលៗដូចជា BRCA1 (ហានិភ័យ ៤០%) ឬ BRCA2 (ហានិភ័យ ២៩%) អ្នកជំងឺស្រទាប់ស្បូន (Endometriosis) អ្នកលើសទម្ងន់ ឬធ្លាប់មានប្រវត្តិមហារីកនៅកន្លែងផ្សេងទៀតក្នុងរាងកាយ។

ដូចនេះ កុំបង្អង់យូរ! ប្រសិនបើមានរោគសញ្ញាខាងលើកើតឡើង ថ្មីប្លែកពីរាល់ដង និងជាប់ៗគ្នា គួរប្រញាប់ទៅជួបគ្រូពេទ្យឲ្យបានទាន់ពេលវេលា ព្រោះអាចជាការសម្រេចចិត្តដែលជួយសង្គ្រោះជីវិតរបស់អ្នកនៅពេលក្រោយ៕