ប្រទេសប៉េរូ ៖ ទឹកជ្រោះកូនក្រមុំ ឬមានឈ្មោះម្យ៉ាងទៀតថា «The Bride’s Waterfall» ដែលមានទីតាំងនៅខាងក្រៅទីក្រុង Cajamarca ស្ថិតនៅភាគខាងជើងប្រទេសប៉េរូ បានល្បីល្បាញពាសពេញពិភពលោកឡើងវិញ ក្រោយពីមានការបង្ហោះវីដេអូក្នុងបណ្តាញសង្គម ។ រីឯមូលហេតុដែលគេដាក់ឈ្មោះទឹកជ្រោះនេះថា «ទឹកជ្រោះកូនក្រមុំ» ដោយសារទឹកហូរធ្លាក់ចុះមកមានលក្ខណៈដូចគ្នានឹងស្ត្រីម្នាក់ស្លៀករ៉ូបអាពាហ៍ពិពាហ៍ពណ៌ស ។

ទឹកជ្រោះកូនក្រមុំ បានទាក់ទាញចំណាប់អារម្មណ៍របស់ភ្ញៀវទេសចរយ៉ាងច្រើន ដែលបានមកកម្សាន្តនៅទីនេះ ។ ខ្សែទឹកពណ៌ស ហូរធ្លាក់ចុះមកតាមផ្ទាំងថ្មពណ៌ខ្មៅ ដោយគ្មានគោលដៅ គឺធ្វើឱ្យគេមើលឃើញរូបរាងរបស់ស្ត្រីម្នាក់កំពុងតែឈរ និងស្លៀកពាក់រ៉ូបអាពាហ៍ពិពាហ៍ពណ៌ស ដ៏ស្រស់ស្អាត ។

បើទោះជាទឹកជ្រោះកូនក្រមុំ មិនមែនជាទឹកជ្រោះមានទំហំធំក្តី បើធៀបនឹងទឹកជ្រោះជាច្រើនកន្លែងទៀតនៅទូទាំងពិភពលោក ប៉ុន្តែទឹកជ្រោះនេះមានលក្ខណៈពិសេស និងខុសប្លែកពីទឹកជ្រោះផ្សេងៗ ។ លក្ខណៈពិសេសនេះបានកើតឡើងដោយសារធម្មជាតិបង្កើតឡើងមក និងធ្វើឱ្យភ្ញៀវទេសចរលង់ស្នេហ៍យ៉ាងខ្លាំង រហូតដល់ពួកគេចង់សម្លឹងមើលហើយ សម្លឹងមើលទៀត ពុំដាក់ភ្នែក និងស្ទើរតែភ្លេចដកដង្ហើម ។

ក្រោយពីវីដេអូទឹកជ្រោះនេះបានបង្ហោះក្នុងបណ្តាញសង្គម នៅខែឧសភា ឆ្នាំ២០២៤ ធ្វើឱ្យវាទទួលបានចំណាប់អារម្មណ៍យ៉ាងខ្លាំងពីមហាជន និងនាំគ្នាសរសើរពុំដាច់ពីមាត់ថា ពិតជាទីកន្លែងអស្ចារ្យខ្លាំងណាស់នៅលើពិភពលោក ដែលភ្ញៀវទេសចរប៉ងប្រាថ្នាមកកម្សាន្តនៅទីនេះបានម្តងក្នុងមួយជីវិត ។ អ្នកលេងបណ្តាញសង្គមមួយចំនួននិយាយថា ធម្មជាតិបានបង្កើតទឹកជ្រោះកូនក្រមុំរួចហើយ និងស្រស់ស្អាតខ្លាំងណាស់ ហើយចុះមានទឹកជ្រោះកូនកំលោះដែរឬទេ? បើមាន តើស្ថិតនៅប្រទេសណា?

ភ្ញៀវទេសចរមកកម្សាន្តនៅតំបន់ទឹកជ្រោះកូនក្រមុំ អាចសប្បាយរីករាយនឹងភាពស្រស់ស្អាតនៅទីនេះ តាមរយៈការដើរលេងក្នុងព្រៃនៅបរិវេណជុំវិញ ។ តំបន់នេះទទួលបានការថែទាំយ៉ាងល្អពីសំណាក់អាជ្ញាធរប៉េរូ ដើម្បីទទួលស្វាគមន៍ភ្ញៀវទេសចរជាតិ និងអន្តរជាតិ ក៏ដូចជាការស្រាវជ្រាវ ៕

ប្រទេសកូរ៉េខាងត្បូង ៖ នៅថ្ងៃទី២៩ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា ប្រទេសកូរ៉េខាងត្បូងបានប្រទះឃើញបាឡុងប្រមាណជា១០០គ្រឿង ព្រមទាំងមានវត្ថុមួយចំនួនក្នុងនោះផងដែរ ដែលបានហោះឆ្លងកាត់ព្រំដែនមកពីប្រទេសកូរ៉េខាងជើង ។ ក្រោយមក មន្ត្រីសន្តិសុខកូរ៉េខាងត្បូងបានប្រមូលយកវត្ថុក្នុងបាឡុងទៅត្រួតពិនិត្យយ៉ាងលម្អិត ។

ការិយាល័យអគ្គសេនាធិការចម្រុះកងទ័ពកូរ៉េខាងត្បូងបានចេញសេចក្តីថ្លែងការណ៍១ច្បាប់ ពាក់ព័ន្ធនឹងការប្រទះឃើញបាឡុងប្រមាណ១០០គ្រឿង ព្រមទាំងសំរាម និងវត្ថុផ្សេងៗដែលគេពុំអាចបញ្ជាក់ឈ្មោះបាន ។ ជំហានដំបូង គេសន្និដ្ឋានថា ប្រទេសកូរ៉េខាងជើងបានបញ្ជូនបាឡុងទាំងនេះមកឱ្យកូរ៉េខាងត្បូង ពីព្រោះបាឡុងទាំងនេះបានហោះនៅត្រង់បរិវេណព្រំដែនរវាងខេត្តខាយ៉ុងគី និងខេត្តកាំងវ៉ុន ហើយមន្ត្រីសន្តិសុខកូរ៉េខាងត្បូងបានប្រមូលយកវត្ថុក្នុងបាឡុងទៅត្រួតពិនិត្យយ៉ាងលម្អិត ។

ជាមួយគ្នានេះ សេចក្តីថ្លែងការណ៍របស់កងទ័ពកូរ៉េខាងត្បូង ក៏បានដាស់តឿនពលរដ្ឋរស់នៅក្នុងតំបន់ព្រំដែន ដែលពួកគេបានឃើញបាឡុងទាំងនេះ ត្រូវចៀសវាងធ្វើសកម្មភាពអ្វីមួយនៅក្រៅផ្ទះ, កុំប៉ះពាល់វត្ថុចម្លែក និងសូមឱ្យជូនដំណឹងមកកាន់អាជ្ញាធរជាបន្ទាន់ នៅពេលពលរដ្ឋប្រទះឃើញវត្ថុអ្វីមួយគួរឱ្យសង្ស័យ ។

ចំណែករដ្ឋាភិបាលក្រុងព្យុងយ៉ាងពុំបានមានមតិជាផ្លូវការទេ ប៉ុន្តែសារព័ត៌មានកណ្តាលកូរ៉េ (KCNA) ទើបតែបានរាយការណ៍ កាលពីថ្ងៃទី២៦ ខែឧសភា ឆ្នាំ២០២៤ ថា កូរ៉េខាងជើងនឹងចាត់វិធានការឆ្លើយតបវិញទៅកាន់កូរ៉េខាងត្បូង ដែលអនុញ្ញាតឱ្យសកម្មជនកូរ៉េខាងជើងបញ្ជូនបាឡុងដាក់លិខិតឃោសនាប្រឆាំងជាមួយកូរ៉េខាងជើង ឆ្លងកាត់ព្រំដែនមកកូរ៉េខាងជើងកាលពីពេលថ្មីៗនេះ ។

ហេតុការណ៍នេះមិនមែនជាលើកទី១ ទេ ដែលប្រទេសកូរ៉េខាងជើងបានបញ្ជូនបាឡុងសំរាមមកឱ្យកូរ៉េខាងត្បូង ។ កាលពីឆ្នាំ២០១៦ កូរ៉េខាងជើងក៏ធ្លាប់បានបញ្ជូនបាឡុងឆ្លងកាត់ព្រំដែនមកឱ្យកូរ៉េខាងត្បូងផងដែរ ហើយក្នុងបាឡុងនោះមានលិខិតឱ្យពលរដ្ឋកូរ៉េខាងត្បូងប្រឆាំងនឹងរដ្ឋាភិបាលក្រុងសេអ៊ូល ។

សារព័ត៌មានកូរ៉េខាងត្បូងជាច្រើនរាយការណ៍ថា វត្ថុដែលកូរ៉េខាងជើងបានដាក់ក្នុងបាឡុង និងបញ្ជូនមកឱ្យកូរ៉េខាងត្បូងលើកនេះ គឺសុទ្ធតែជាសំរាមទាំងអស់ ដូចជា ៖ ក្រដាសអនាម័យ និងថ្មផលិតនៅប្រទេសចិន ៕

បន្ទាប់ពីបាត់វត្តមាននៃម៉ាកទូរស័ព្ទ Nokia អស់រយៈពេលជាង ២០ ឆ្នាំមក ថ្មីៗនេះក្រុមហ៊ុន Nokia គ្រោងនឹងបញ្ចេញផលិតផលរបស់ខ្លួនជាច្រើននៅលើទីផ្សារពិភពលោក ដោយសង្ឃឹមថានឹងអាចប្រកួតប្រជែងជាមួយស្មាតហ្វូនដទៃទៀតបាន។
Nokia គឺជាម៉ាកទូរស័ព្ទមកពីប្រទេសហ្វាំងឡង់ ដែលផលិតផលនេះគឺមានប្រជាប្រិយភាព និងពេញនិយមយ៉ាងខ្លាំងនៅជុំវិញពិភពលោកកាលពីអំឡុងឆ្នាំ ១៩៩៩។ ទោះបីជាបច្ចុប្បន្នមានស្មាតហ្វូនទំនើបៗជាច្រើនបានវាយលុយទីផ្សារក៏ដោយ ក៏ក្រុមហ៊ុនចាប់ផ្តើមងើបឡើងវិញជាមួយនឹងការអភិវឌ្ឍនូវបច្ចេកវិទ្យាទំនើបរបស់ខ្លួន រួមបញ្ចូលជាមួយ AI ដើម្បីអភិវឌ្ឍផលិតផលរបស់ខ្លួនឱ្យក្លាយជាការពេញនិយមម្តងទៀត និងសាងកេរ្តិ៍ឈ្មោះរបស់ខ្លួនឱ្យរស់ឡើងវិញ។

ក្នុងរយៈពេលប៉ុន្មានសប្តាហ៍ថ្មីៗនេះក្រុមហ៊ុនក៏ធ្លាប់បានបញ្ចេញនូវម៉ាកទូរស័ព្ទ Nokia 3210 ដែលមានការអាប់ដេតប្លែកជាងមុន រួមបញ្ចូលនៅការររចនាស្ដើងជាងមុន ជាមួយនឹងប្រព័ន្ធគន្លឹះរុករកត្រូវបានជំនួសដោយប៊ូតុងជាច្រើន ដែលឧបករណ៍នេះក៏មានកាមេរ៉ាខាងក្រោយទំហំ ២ មេហ្គាភិចសែល និងប្រើប្រាស់រន្ធ USB-C ផងដែរ។ ផលិតផលនេះត្រូវបានចេញលក់ដំបូងនៅក្នុងទីផ្សារអឺរ៉ុប និងចិនក្នុងតម្លៃសមរម្យបំផុត ហើយកំពុងមានការចាប់អារម្មណ៍យ៉ាងខ្លាំងពីអ្នកប្រើប្រាស់ចិន។ ដូច្នេះហើយកាលពីថ្ងៃទី២៨ ឧសភា ឆ្នាំ២០២៤ នេះក្រុមហ៊ុននឹងនាំយកផលិតផលរបស់ខ្លួនមួយទៀតគឺ Lumia ដែលជាម៉ាកទូរស័ព្ទល្បីល្បាញបំផុតនៅដើមទសវត្សរ៍ឆ្នាំ ២០១០ មកបង្ហាញនៅលើទីផ្សារពិភពលោកជាថ្មីម្តងទៀត។

Lumia ត្រូវបានចាត់ទុកថាជាម៉ាកទូរស័ព្ទដ៏រុងរឿងបំផុតរបស់ Nokia ហេតុនេះក្រុមហ៊ុនគ្រោងនឹងអភិវឌ្ឍផលិតផលនេះឱ្យក្លាយជាផលិតផលថ្មីប្លែកនិងទាន់សម័យ ជាមួយការភ្ជាប់បន្ទះឈីប Snapdragon 7s Gen 3 ជាប្រភេទ AMOLED រួមជាមួយនឹងកម្រិតភាពច្បាស់ Full HD+ និងកម្រិត Refresh Rate 120Hz ដោយបន្តបង្កើនភាពប្រកួតប្រជែងរបស់ផលិតផល ខណៈដែលថ្មនៅលើឧបករណ៍នេះមានសមត្ថភាព 4900 mAh ជាមួយនឹងសមត្ថភាពសាក 33W ។

ស្មាតហ្វូនថ្មីនេះអាចត្រូវបានបំពាក់ដោយកាមេរ៉ាមេ 108MP រួមជាមួយនឹងកាមេរ៉ាបន្ទាប់បន្សំ 2MP ដែលអាចប្រើកញ្ចក់ម៉ាក្រូ។ ផលិតផលនេះថែមទាំងអាចគាំទ្របច្ចេកវិទ្យា PureView ដើម្បីជួយកែលម្អសមត្ថភាពពង្រីក និងបង្កើនគុណភាពលម្អិតរូបភាពផងដែរ។ ទូរស័ព្ទថ្មីនេះក៏ត្រូវបានគេនិយាយថានឹងដំណើរការលើប្រព័ន្ធប្រតិបត្តិការ Android 14 ជំនួសឱ្យប្រព័ន្ធប្រតិបត្តិការ Windows របស់ Microsoft ជាមួយនឹងការរចនាដោយផ្អែកលើ Nokia Lumia ។ ដូច្នេះហើយការលេចធ្លាយព័ត៌មាននេះគឺពិតជាទាក់ទាញចំណាប់អារម្មណ៍យ៉ាងខ្លាំងរបស់មនុស្សជាច្រើនជុំវិញពិភពលោក ទោះជាយ៉ាងណាសម្រាប់ទំហំអេក្រង់ជាក់លាក់មិនត្រូវបានគេបង្ហាញនោះទេ ហើយម៉ូដែលថ្មីនេះក៏មិនទាន់មានឈ្មោះផ្លូវការនៅឡើយដែរ៕

ប្រទេសស៊ុយអែត ៖ ប្រសិនបើលោកអ្នកធុញទ្រាន់ជាមួយអាកាសធាតុក្តៅនៅប្រទេសកម្ពុជា សារព័ត៌មាន KBN សូមណែនាំលោកអ្នកអំពីកន្លែងសម្រាកដ៏ល្បីល្បាញមួយនៅលើពិភពលោក ហើយពេលមកដល់ទីនេះ នឹងមានអារម្មណ៍ថា ដូចស្ថិតនៅប្រាសាទព្រិលក្នុងភាពយន្តតុក្កតា ។ ទីកន្លែងនេះជាសណ្ឋាគារទឹកកក (Ice Hotel) ដែលស្ថិតនៅទីក្រុង Jukkasjarvi ប្រទេសស៊ុយអែត ។

សណ្ឋាគារនេះត្រូវបានគេចាត់ទុកថា គឺជាសណ្ឋាគារទឹកកកដំបូងនៅលើពិភពលោក ដែលបានស្វាគមន៍ទទួលភ្ញៀវមកស្នាក់នៅលើកដំបូងនៅឆ្នាំ១៩៩០ ។ លើសពីនេះ សណ្ឋាគារទឹកកក ក៏ជាតំបន់ទេសចរណ៍ប្លែកបំផុតនៅអឺរ៉ុបផងដែរ ខណៈភ្ញៀវចូលមកសម្រាកនៅទីនេះនឹងមានអារម្មណ៍ប្លែកខ្លាំង ។ សម្ភារៈផ្សេងៗក្នុងសណ្ឋាគារ ដូចជា ៖ តុ, កៅអី, គ្រែសម្រាក និងគ្រឿងសង្ហារិមទាំងឡាយសុទ្ធតែធ្វើពីទឹកកកទាំងអស់ ហើយសូម្បីតែកែវដាក់ទឹក ឬកែវស្រាក្នុងក្លិប ក៏ធ្វើពីទឹកកកដែរ ។

សណ្ឋាគារទឹកកកនឹងត្រូវសាងសង់ថ្មីជារៀងរាល់ឆ្នាំ និងទទួលភ្ញៀវចូលមកស្នាក់នៅ ឬមកកម្សាន្តតែនៅរដូវរងាប៉ុណ្ណោះ ដោយសារនៅរដូវផ្សេងទៀត ទឹកកកនឹងឆាប់រលាយ ។ ហេតុនេះ គេបានរចនាម៉ូដសណ្ឋាគារថ្មីជារៀងរាល់ឆ្នាំ ហើយភ្ញៀវមកកាន់ទីនេះ ពួកគេនឹងទទួលបានអារម្មណ៍ប្លែក និងគិតថា ស្នាក់នៅក្នុងសណ្ឋាគារផ្សេងខុសពីឆ្នាំមុនៗ ។

យើងនឹងឆ្ងល់ថា បើវាជាសណ្ឋាគារទឹកកកបែបនេះ តើបន្ទប់សម្រាកនឹងមានសភាពបែបណា? សម្រាប់បន្ទប់សម្រាករបស់សណ្ឋាគារ ក៏បានធ្វើឡើងពីទឹកកកដូចគ្នាដែរ ។ សណ្ឋាគារនេះមានបន្ទប់សម្រាកសរុបចំនួន១០០បន្ទប់ ហើយបន្ទប់នីមួយៗបានរចនាម៉ូដខុសៗគ្នា និងមានសីតុណ្ហភាពចាប់ពី-៥អង្សារសេ ទៅ-៨អង្សារសេ ។ ភ្ញៀវអាចសម្រាកនៅលើគ្រែទឹកកក ដែលក្រាលដោយកម្រាលស្បែកសត្វ ។

គួរបញ្ជាក់ថា សណ្ឋាគារនេះបានកសាងឡើងពីដុំព្រិល និងផ្ទាំងទឹកកក គឺយកពីទន្លេ Torne ដែលស្ថិតនៅក្បែរគ្នា ពីព្រោះទឹកទន្លេនេះមានសភាពថ្លា និងស្អាតបំផុតនៅតំបន់អឺរ៉ុប ។ នៅពេលផុតរដូវរងា សីតុណ្ហភាពកើនឡើងខ្ពស់ វានឹងធ្វើឱ្យអ្វីៗគ្រប់យ៉ាងនៅទីនេះរលាយក្លាយជាទឹក រួចហើយវាក៏ហូរទៅកាន់ទន្លេ Torne វិញ ។ ហេតុនេះ សណ្ឋាគារទឹកកកអាចបង្ហាញរូបរាង និងទទួលស្វាគមន៍ភ្ញៀវទេសចរជាតិ និងអន្តរជាតិ ចាប់ពីខែធ្នូ ដល់ខែមេសាតែប៉ុណ្ណោះ ។

គេទទួលស្គាល់ថា សណ្ឋាគារទឹកកក គឺជាទីកន្លែងអស្ចារ្យមួយក្នុងចំណោមទីកន្លែងដ៏អស្ចារ្យទាំង៧ របស់ប្រទេសស៊ុយអែតផងដែរ ។ កាលពីដើមឆ្នាំ២០២៣ កន្លងមក គណៈកម្មការសហភាពអឺរ៉ុបបានរៀបចំកិច្ចប្រជុំក្នុងសណ្ឋាគារនេះជាលើកដំបូង ដែលប្រទេសស៊ុយអែតបានធ្វើជាម្ចាស់ផ្ទះក្នុងឋានៈជាប្រធានសហភាពអឺរ៉ុប ៕

បើនិយាយថា នៅលើពិភពលោកនេះមានបឹងមួយកន្លែងមានទឹកស្អិតខ្លាំងដូចជ័រកៅស៊ូ តើលោកអ្នកជឿដែរឬទេ? យើងសូមណែនាំលោក-អ្នកឱ្យស្គាល់បឹងមួយឈ្មោះ Pitch គឺជាបឹងមានទឹកពណ៌ខ្មៅ និងស្អិតដូចជ័រកៅស៊ូ ដែលមានទីតាំងស្ថិតនៅទីក្រុង La Brea សាធារណរដ្ឋទ្រីនីដាដ និងតូបាហ្គោ ។ គេចាត់ទុកថា វាជាបឹងមួយដែលប្រមូលផ្តុំជ័រកៅស៊ូស្អិតបែបធម្មជាតិដ៏ធំបំផុតនៅលើពិភពលោក ។

អ្នកវិទ្យាសាស្ត្រជឿជាក់ថា នៅបាតបឹង Pitch មានស្នាមប្រេះនៃសំបកផែនដីចំនួន២ខ្សែប៉ះគ្នា ទើបធ្វើឱ្យប្រេងឆៅនៅក្រោមដីផុសចេញមកលើតាមរយៈស្នាមប្រេះនេះ ។ បន្ទាប់មក ប្រេងឆៅទាំងនេះបានផ្សំគ្នាជាមួយកំទេចកំទីថ្ម, ក្រួស និងខ្សាច់អស់រយៈពេលរាប់លានឆ្នាំ រហូតបណ្តាលទឹកក្នុងបឹងទាំងមូលមានសភាពស្អិតដូចជ័រកៅស៊ូធម្មជាតិ ។

ទោះយ៉ាងណា ទឹកបឹងដែលមានសភាពដូចជ័រកៅស៊ូនេះ គឺមិនដូចគ្នានឹងជ័រកៅស៊ូធ្វើផ្លូវថ្នល់ទេ ពីព្រោះជ័រកៅស៊ូធ្វើផ្លូវថ្នល់នៅសេសសល់ពីការផលិតជាសម្ភារៈផ្សេងៗ ។ រីឯទឹកក្នុងបឹង Pitch មានពណ៌ខ្មៅ និងមានសភាពទន់ ហើយភ្ញៀវទេសចរអាចដើរនៅលើចំណុចរឹងលើបឹងបាន លើកលែងតែចំណុចខ្លះ បើភ្ញៀវទេសចរឈរយូរបន្តិច ពួកគេអាចធ្លាក់ចូលក្នុងទឹក ។

បើទោះជាគេមើលទៅឃើញថា ទឹកក្នុងបឹងនេះមានសភាពហ្នឹងថ្កល់ក្តី ប៉ុន្តែការពិត ទឹកបឹងបានបម្លាស់ទីយឺតៗ ។ ចំណុចមួយគួរឱ្យចាប់អារម្មណ៍ គឺអាជ្ញាធរពុំអនុញ្ញាតឱ្យភ្ញៀវទេសចរជក់បារីនៅបរិវេណក្បែរបឹងទេ ដោយសារតែប្រេងឆៅនៅទីនេះអាចធ្វើឱ្យបឹងទាំងមូលឆៅបាន ។

គេបានរកឃើញបឹង Pitch នៅឆ្នាំ១៥៩៥ និងត្រូវបានគេជួញដូរប្រេងក្នុងបឹងនេះតាំងពីឆ្នាំ១៨៦៧ មកម៉្លេះ ។ រហូតមកដល់បច្ចុប្បន្ន គេបានយកប្រេងពីក្នុងបឹងនេះប្រមាណ១០លានតោន និងនៅសល់ប្រេងប្រមាណ៦លានតោនទៀត ។ លើសពីនេះ វាជាប្រភពនៃវត្ថុធាតុដើមរបស់ក្រុមហ៊ុននាំចេញស៊ីម៉ងត៍ ហើយប្រេងក្នុងបឹងនេះត្រូវបានគេយកមកប្រើប្រាស់ក្នុងផ្នែកសំណង់ផងដែរ ។

ក្នុងមួយឆ្នាំៗ មានភ្ញៀវទេសចរមកកម្សាន្តនៅបឹង Pitch ស្មើប្រមាណ២ម៉ឺននាក់ ហើយភ្ញៀវទេសចរមួយចំនួនបានសាកល្បងចុះហែលទឹកបឹង ដោយសារពួកគេជឿថា អាចព្យាបាលជំងឺឱ្យជាសះស្បើយ ។

បឹងនេះបានក្លាយជាតំបន់ដែលអ្នកស្រាវជ្រាវផ្នែកភូមិសាស្ត្រចាប់អារម្មណ៍យ៉ាងខ្លាំង ហើយរយៈពេលរាប់ពាន់ឆ្នាំមុន សត្វមានជីវិតតូច-ធំជាច្រើនក្បាល ដូចជា ៖ គោ, សេះ, អណ្តើក, ខ្យង, បក្សី និងកណ្តុរ បានធ្លាក់ចូលក្នុងទឹកបឹងពុំអាចឡើងលើគោកវិញបានទេ ហើយចុងក្រោយ ពួកវាក៏បានងាប់នៅក្នុងទឹកបឹងដ៏ស្អិតនេះ ៕

យោងតាមទិន្នន័យពីវេទិកាសេដ្ឋកិច្ចពិភពលោក (WEF) ដែលបានចេញផ្សាយនៅចុងខែឧសភាថ្មីៗនេះថា ក្នុងចំណោមប្រទេសចំនួន ១១៩ មានតែ ១០ ប្រទេសប៉ុណ្ណោះដែលមានភាពជឿនលឿនខ្លាំងបំផុតក្នុងវិស័យទេសចរសម្រាប់ឆ្នាំ ២០២៤។ ក្នុងនោះរួមមាន សហរដ្ឋអាមេរិក អេស្ប៉ាញ ជប៉ុន បារាំង អូស្ត្រាលី អាល្លឺម៉ង់ អង់គ្លេស ចិន អ៊ីតាលី និងប្រទេសស្វីស។ យោងតាម WEF សហរដ្ឋអាមេរិកគឺជាទីផ្សារទេសចរណ៍ “ទំនើប” នៅពេលដែលប្រទេសនេះមានហេដ្ឋារចនាសម្ព័ន្ធសម្រាប់ស្វាគមន៍ភ្ញៀវទេសចរដូចជាផ្លូវអាកាសដែលតភ្ជាប់គ្រប់ទីកន្លែងក្នុងពិភពលោក។

សហរដ្ឋអាមេរិកគឺជាប្រទេសឈានមុខគេរបស់ពិភពលោកជាប់ចំណាត់ថ្នាក់លេខ១ នៅក្នុងសន្ទស្សន៍អភិវឌ្ឍន៍ការធ្វើដំណើរ និងទេសចរណ៍ឆ្នាំ ២០២៤ ជាមួយនឹងពិន្ទុសរុប ៥.២៤ (មាត្រដ្ឋាន ៧ ពិន្ទុ)។ លើសពីនេះ ជំហររបស់អាមេរិកនៅលើឆាកអន្តរជាតិក៏ជាចំណុចខ្លាំងដែលជួយឱ្យប្រទេសនេះមានភាពលេចធ្លោផងដែរ។ តំបន់របស់អាមេរិកគឺធំទូលាយ មានទេសភាពធម្មជាតិប្លែកៗជាច្រើន ចាប់ពីឧទ្យានជាតិរហូតដល់ទីក្រុងធំៗ ឆ្នេរដ៏ស្រស់ស្អាតជាច្រើន និងសេវាកម្មធ្វើដំណើរពេញលេញ។

តាមពីក្រោយអាមេរិកគឺប្រទេសអេស្ប៉ាញជាប់ចំណាត់ថ្នាក់លេខ ២ ជាមួយនឹងពិន្ទុសរុប ៥.១៨។ WEF បានអត្ថាធិប្បាយថាអឺរ៉ុបគឺជា “ទិសដៅដែលអាចបត់បែនបានជាមួយនឹងលំហូរទេសចរណ៍ក្នុងតំបន់ដ៏រឹងមាំ” ហើយបានវាយតម្លៃខ្ពស់ចំពោះសមត្ថភាពដឹកជញ្ជូនផ្លូវដែករបស់ទ្វីបនេះ។ ដូច្នេះសេដ្ឋកិច្ចដ៏រឹងមាំ ទីតាំងល្អនៃប្រាក់អឺរ៉ូ និងប្រាក់ផោនអង់គ្លេស បានធ្វើឱ្យលទ្ធភាពរបស់ជនជាតិអឺរ៉ុបធូរធារជាងមុន។ សម្រាប់ចំណាត់ថ្នាក់ទី៣ វិញបានទៅលើប្រទេសជប៉ុន ដែលស្ថិតក្នុងទ្វីបអាស៊ីត្រូវបានចាត់ទុកថា ជាប្រទេសដែលរីកចម្រើនខ្លាំងផ្នែកទេសចរណ៍ក្នុងឆ្នាំ ២០២៤ នេះ។

ទោះជាយ៉ាងណាក៏ដោយ ចំណាត់ថ្នាក់ខ្ពស់ក្នុងវិស័យទេសចរណ៍ និងការអភិវឌ្ឍន៍ការធ្វើដំណើរ យោងតាមអ្នកជំនាញជាច្រើន មិនមែនជារឿងល្អនោះទេ។ ការអភិវឌ្ឍទេសចរណ៍ហួសហេតុនាំឱ្យមានមនុស្សច្រើនលើសចំណុះ។ នៅក្នុងប្រទេសជាច្រើន ទេសចរណ៍ហួសប្រមាណគឺជាបញ្ហាដែលបង្កការឈឺក្បាលសម្រាប់រដ្ឋាភិបាលក្នុងតំបន់ ដោយសារផលប៉ះពាល់របស់វាទៅលើបរិស្ថាន និងកង្វះនិរន្តរភាព។

គួរបញ្ជាក់ដែរថា ចំណាត់ថ្នាក់នេះត្រូវបានកំណត់ដោយផ្អែកលើលក្ខណៈវិនិច្ឆ័យជាច្រើនដូចជា ហេដ្ឋារចនាសម្ព័ន្ធ ធនធានធម្មជាតិ និរន្តរភាព ភាពអាចរកបានកម្លាំងពលកម្ម និងតម្លៃប្រកួតប្រជែង។ បន្ថែមពីលើលក្ខណៈវិនិច្ឆ័យដែលមាន WEF ក៏ដាក់តម្លៃខ្ពស់លើសកម្មភាពអាជីវកម្មនៃសណ្ឋាគារ អាកាសយានដ្ឋាន ភាពទាក់ទាញ និងក្រុមហ៊ុនអាកាសចរណ៍ផងដែរ៕