ការច្នៃម៉ូតតាមបែប Fashion របស់លោក ឯម រៀម ហាក់ទទួលបានការរិះគន់ជាបន្តបន្ទាប់ពីសំណាកអ្នកលេងបណ្តាញសង្គមមិនសូវទទួលបានការសរសើរនោះទេ។ ជាក់ស្តែងឈុតមួយរបស់លោកចូលរួមកម្មវិធីរបស់តារាចម្រៀង ទេព បូព្រឹក្ស ទទួលបានការរិះគន់ជាថ្មីស្របពេលរូបផ្ទៃខាងក្រោយមានរូបប្រាសាទអង្គរវត្ត។ លើកនេះមិនត្រឹមតែទស្សនិកជនប៉ុណ្ណោះទេដែលបញ្ចេញមតិរិះគន់សូម្បីអ្នកក្នុងចង្កោមសិល្បៈក៏បានផ្លែផ្កាឱ្យអ្នកច្នៃម៉ូតរូបនេះស្លៀកពាក់មិនស្របកាលៈទេសៈខុសគេតែឯង។

សម្រាប់អ្នកនិយមតាមដានវិស័យម៉ូតជ្រាបមកហើយថាលោក ឯម រៀម ជាអ្នកច្នៃម៉ូតរូបនិងបានបញ្ចប់ថ្នាក់បណ្ឌិតនៅប្រទេសបារាំងទៀតផង។ បើក្រលេកការច្នៃម៉ូតរបស់លោកវិញគឺមានខុសប្លែកពីគេតែម្តងកម្រនឹងមានអ្នកច្នៃបានដូចលោកណាស់។ ដ្បិតការច្នៃម៉ូតរបស់លោកនិយមតាមបែប Fashion ក្តីប៉ុន្តែជារឿយៗមិនសូវទទួលបានការសរសើរពីមហាជននោះទេ ដោយសារតែពេលលោក ឯម រៀម ទៅចូលរួមកម្មវិធីផ្សេងៗលោកតែងខ្លួនមួយអស់ដៃហើយបញ្ចេញស៊ិចស៊ីលើក្រោម ដែលមានគម្លាតខុសពីអ្នកច្នៃម៉ូតដទៃទៀត។

កាលពីថ្ងៃចូលរួមសម្ពោធបទ ទេវរាជ របស់តារាចម្រៀង ទេព បូព្រឹក្ស កម្មវិធីនេះបានស្នើឱ្យសិល្បករ សិល្បការិនី រួមទាំងទស្សនិកជនចូលរួមស្លៀកពាក់បុរាណ ប្រពៃណី សហសម័យ ទៅតាមសម័យកាលដែលខ្លួនពេញចិត្តក្នុងស្មារតីជាធ្លុងមួយលើកស្ទួយវប្បធម៌ខ្មែរ។ នៅក្នុងថ្ងៃសម្ពោធនោះគេក៏បានឃើញអ្នកសិល្បៈពិតជាស្រុះដៃគ្នាខ្លាំងព្រោះបានតែងខ្លួនយ៉ាងស្រស់ស្អាតជាមួយឈុតបុរាណ អ្នកខ្លះក៏ប្រពៃណី និងអ្នកខ្លះទៀតបែបសហសម័យ។
ទោះយ៉ាងណា អ្នកច្នៃម៉ូត ឯម រៀម ពួយលេងខ្លួនខុសគេតែម្តងជាមួយឈុតរាជិនី AI គ្រឿងអេឡិចត្រូនិក ផ្អើលពេញកម្មវិធីនិងអ្នកតាមដានលើបណ្តាញសង្គម។ ឈុតដែលយកគ្រឿងបង្គុំអេឡិចត្រូនិក ដ្បិតថាប្លែកមែនពិតប៉ុន្តែមិនទទួលបានការសរសើរនោះទេគឺឆ្លើយតបមកវិញជាមួយមតិរិះគន់។ អ្វីដែលធ្វើឱ្យមហាជនសម្តែងក្តីខឹងសម្បារនោះគឺរូបភាពដែលលោក ឯម រៀម ឈរថតដែលមានផ្ទៃខាងក្រោយរូបប្រាសាទអង្គរវត្ត។

ទស្សនិកជនបានរិះគន់លោក ឯម រៀម ថាការធ្វើដូចនេះមិនសមទំនងនោះទេយល់ថាសំលៀកបំពាក់របស់លោក Fashion ប៉ុន្តែគួរតែគិតពីរូប Background ផង ថាសំលៀកបំពាក់របស់ខ្លួនសមនឹងថតជាមួយប្រាសាទអង្គរវត្តដែលជាសម្បត្តិបេតិកភណ្ឌពិភពលោកឬអត់បើលោកច្នៃម៉ូតលេចលើ លេចក្រោមបែបនេះ។

នេះមិនមែនជាលើកទី១ទេ ដែលលោក ឯម រៀម អ្នកច្នៃម៉ូតដ៏ល្បីឈ្មោះរងពាក្យរិះគន់ពីអ្នកលេងបណ្តាញសង្គមដោយសារតែការស្លៀកពាក់របស់លោកស៊ិចស៊ី បញ្ចេញលើក្រោមខុសប្លែកពីអ្នកដទៃទៀត។ ទោះបីជាយ៉ាងនេះក្តីអ្នកច្នៃម៉ូតរូបនេះនៅបន្តសកម្មភាពរបស់ខ្លួនដដែល ដោយលោកបានលើកឡើងថា នេះជាការច្នៃម៉ូតបែប Fashion មិនមានលក្ខណៈទាស់ខុសអ្វីនោះទេ។

កាលពីខែមិថុនា ឆ្នាំ២០២៣ ក្រុមប្រឹក្សាវិន័យនិងលើកសរសើរនៃអ្នកសិល្បៈ បានប្រតិកម្ម ចំពោះរូបភាពរបស់ អ្នកច្នៃម៉ូត ឯម រៀម ដែលបានលេងខ្លួនននោលគោក បិទបាំងបន្តិចនៅតំបន់កេរ្តិ៍ខ្មាសបង្ហោះនៅលើបណ្តាញសង្គម។ ក្នុងនោះក៏តម្រូវឱ្យអ្នកច្នៃម៉ូតរូបនេះលុបរូបភាពនោះជាបន្ទាន់ព្រោះរូបភាពមានលក្ខណៈអាសដែលនាំឱ្យប៉ះពាល់វប្បធម៌ខ្មែរមិនដូច្នេះទេនឹងប្រឈមតាមផ្លូវច្បាប់ជាដាច់ខាត។ ក្រុមប្រឹក្សាវិន័យនិងលើកសរសើរនៃអ្នកសិល្បៈស្នើឱ្យលោក ឯម រៀម បញ្ឈប់រាល់ការប្រើប្រាស់រូបភាពដែលនាំឱ្យមានផលប៉ះពាល់ដល់ទំនៀមទម្លាប់ប្រពៃណីជាតិ ហើយងាកមកប្រើប្រាស់ទេពកោសល្យដែលមានចូលរួមលើកស្ទួយវប្បធម៌ ប្រពៃណីជាតិក្នុងនាមជាកុលបុត្រខ្មែរវិញ។ ក្រោយមកលោក ឯម រៀម បានទទួលស្គាល់កំហុសឆ្គងរបស់ខ្លួននិងបានសូមទោសផងដែរដោយអះអាងថាមិនមានចេតនាធ្វើឱ្យប៉ះពាល់ដល់វប្បធម៌ ប្រពៃណី និង សេចក្តីថ្លៃថ្នូររបស់កម្ពុជាទេ៕

កាលពីកន្លងទៅនេះអ្នកតាមដានព្រឹតិ្តការណ៍មហាស្រពកានលើកទី៧៧ ជ្រាបមកហើយថាតារាសម្តែង មាន សូនីតា និងតារាចម្រៀង ម៉ុង ម៉ានិត បានចូលរួមកម្មវិធីនេះជាលើកដំបូងធ្វើឱ្យមានការចាប់អារម្មណ៍យ៉ាងខ្លាំង។ អ្វីដែលកាន់តែចាប់អារម្មណ៍នេះជាលើកទី១ហើយដែលគេសង្កេតឃើញថា ម៉ានិត បានទម្លាយសម្ព័ន្ធភាពជាមួយតារាស្រីរូបនេះថាជាផ្នែកមួយនៃភាពជោគជ័យរបស់លោក ទោះបីជាពេលខ្លះល្អជាមួយគ្នាពេលខ្លះឈ្លោះទាស់ទែងគ្នាប៉ុន្តែអ្នកទាំងពីរមិនដែលចោលគ្នាឡើយ។

កាលពីពេលថ្មីៗនេះ ម៉ានិត បានបង្ហោះរូបប៉ុន្មានសន្លឹកជាមួយ មាន សូនីតា លើទឹកដីប្រទេសបារាំងដោយអមជាមួយពាក្យពេចន៍ដែលមានអត្ថន័យថា «Finally we did it! សូនីតា គឺជាមនុស្សស្រីម្នាក់នៅពីក្រោយភាពជោគជ័យជាច្រើនរបស់ខ្ញុំ។ អ្នកទាំងអស់គ្នាធ្លាប់ឃើញដៃគូសិល្បៈជាគូស្នេហា តែខ្ញុំនិងគាត់ដៃគូគ្នាជាលក្ខណៈបងប្អូនតែម្ដង។ ជួយគិត ជួយគ្នា ប្រឹក្សា លើកទឹកចិត្តគ្នា គាំទ្រគ្នា ជំរុញគ្នា ភ័យស្លន់ជាមួយគ្នា ឈ្លោះគ្នា ប្រកែកគ្នា យំសោក ហើយងើបធ្វើការតទៀត គឺជារឿងធម្មតាទៅហើយ តែសំខាន់ខ្ញុំនិងគាត់មិនដែលបោះបង់ចោលគ្នាទេ។ យើងជោគជ័យជាមួយគ្នា ដើរជាមួយគ្នា។ ធ្វើអីគិតឃើញគ្នាមុនគេ។ សួរថាល្អល្អូកល្អើនរហូតអត់? គឺអត់ទេ តែយោគយល់ ការពារគ្នា ស្រលាញ់គ្នាដូចគ្រួសារបង្កើត។

លោក បន្ថែមទៀតថា «ពេលនេះ បេសកកម្មមក Cannes Film Festival បានរួចរាល់ជាស្ថាពរ។ ផ្ទះស្រលាញ់ ស្រលាញ់សៀវភៅ កម្ពុជាឋានសួគ៌លើដី នៅតែដំណើរការល្អទៅមុខ ដោយមានពួកយើងទាំងពីរស្រាក់ដៃគ្នា ស្រលាញ់ គោរព ជួយគ្នា មិនបោះបង់ចោលគ្នា។ I love you my បងស្រី សង្ឃឹមថាពួកយើងនឹងមានដំណឹងពិសេសការងារថ្មីៗឆាប់ៗនេះសម្រាប់អ្នកគាំទ្ររបស់យើង»។ ការបង្ហាញអារម្មណ៍បែបនេះរបស់ ម៉ានិត ទៅកាន់តារាស្រី មាន សូនីតា សាមីខ្លួនវិញបានចែករំលែកអមជាមួយពាក្យដោយខ្លីថា «I Love You»។

ងាកទៅកាន់អ្នកគាំទ្រវិញបានបង្ហាញអារម្មណ៍រំភើបចំពោះទំនាក់ទំនងអ្នកទាំងពីរនិងបង្ហាញការស្រលាញ់ទៅកាន់ពួកគេ ហើយនេះជាមិត្តភាពដ៏កម្រមួយហើយមានមនុស្សជាច្រើនតែងចង់បានដូចនេះឆ្លងកាត់ឧបសគ្គនិងភាពជោគជ័យជាមួយគ្នា។ គ្មានមិត្តភាពណាដែលរលូនទៅមុខគ្មានការឈ្លោះប្រកែកគ្នានោះទេ ប៉ុន្តែការអធ្យាស្រ័យយោគយល់គ្នា វិលមកត្រូវគ្នាវិញយកមកបញ្ហាមកដោះស្រាយទើបចំណងមិត្តភាព មានភាពយូរអង្វែង។

គួរបញ្ជាក់ថា កញ្ញា មាន សូនីតា និងតារាចម្រៀងនិងជាអ្នកនិពន្ធ ម៉ុង ម៉ានិត បានបង្កើតកម្មវិធីមួយឈ្មោះថា «កម្ពុជាឋានសួគ៌លើដី» ដើម្បីលើកស្ទួយតំបន់ទេសចរណ៍ដ៏ស្រស់ស្អាតក្នុងប្រទេសកម្ពុជាព្រមទាំងហ៊ានចំណាយលុយខ្លួនឯងខ្ទង់ម៉ឺនដុល្លារបន្ថែមទៀតគោលបំណងតែមួយគឺលើកស្ទួយតំបន់ទេសចរណ៍ក្នុងស្រុក៕

លោក ហ៊ុយ យ៉ាឡេង ជាផលិតករមួយរូបបានពោលយ៉ាងកំសត់នៅលើបណ្តាញសង្គមពីវិស័យភាពយន្តខ្មែរចាយទុនត្រឹមតែ៥ទៅ៧ម៉ឺនដុល្លារ កំសត់មិនសូវមានអ្នកជួយជ្រោង ខុសឆ្ងាយពីវិស័យចម្រៀងដែលមានការរីកចម្រើនខ្លាំងដែល MV មួយបទរយៈពេល៥នាទីដែលហាក់សម្តៅទៅកាន់បទ «ទេវរាជ» របស់ ទេព បូព្រឹក្ស ហ៊ានចំណាយដល់៣០ម៉ឺនដុល្លារមានក្រុមហ៊ុនធំៗចាយលុយឧបត្ថម្ភ។

ដូចមហាជនមួយចំនួនធំជ្រាបហើយថា ជី ដេវីត និង ទេព បូព្រឹក្ស បានចំណាយដើមទុនយ៉ាងក្រាស់ក្រែលដើម្បីថតវីដេអូចម្រៀងបទ «ទេវរាជ» លើសបទ «វីរៈនារី» ដល់ទៅ៣ដង ខណៈតួលេខចំណាយត្រូវបានគេបង្ហើបឱ្យដឹងថាចាយរហូតដល់៣០ម៉ឺនដុល្លារព្រមទាំងមានការគាំទ្រពីក្រសួងវប្បធម៌និងវិចិត្រសិល្បៈ។
ការចំណាយដើមទុនយ៉ាងច្រើននៅក្នុង MV នេះដែរជំរុញឱ្យផលិតករ ហ៊ុយ យ៉ាឡេង ម្ចាស់ស្នាដៃផលិតករភាពយន្តខ្មែរល្បីៗមានដូចជា «ខ្មោចដើមចេកជ្វា», «ផ្ទះខ្មោចទិញ», «វិកលចរិត» រួមទាំងភាពយន្ត «ដើម្បីកូន» បានពោលយ៉ាងកំសត់ទៅលើទុកវិស័យភាពយន្តខ្មែរត្រឹម៥ទៅ៧ម៉ឺនដុល្លារពិបាកមានអ្នកជួយជ្រោង។

លោក ហ៊ុយ យ៉ាឡេង បានសរសេរនៅលើបណ្តាញសង្គមថ្ងៃទី២៧ ឧសភា ថា «សូមអបអរសាទរដែលវិស័យចម្រៀងកំពុងរីកចម្រើនខ្លាំងដែលMV១បទ៥នាទីគេហ៊ានចាយដល់៣០ម៉ឺនដុល្លារ ក្រុមហ៊ុនធំៗហ៊ានចាយលុយឧបត្ថម្ភដោយក្តីរីករាយ។ នៅឡើយតែវិស័យភាពយន្តដែលខ្មែរតែងតែហៅតាមបារាំងថាពួកថតកុនចាយទុនត្រឹម៥ម៉ឺនទៅ៧ម៉ឺនដុល្លារសោះហាក់ដូចនៅកំសត់មិនសូវមានអ្នកជួយជ្រោង»។

ផលិតកររូបនេះ បានបន្ថែមទៀតថា «បើមានអ្នកជួយឱ្យ៣០ម៉ឺនដុល្លារដូចគេយកមកថតកុនវិញសុំលេងឱ្យអស់ដៃហើយបើមិនបានល្បី១ពិភពលោកក៏បានល្បីពាក់កណ្តាលពិភពលោកដែរ តែនេះនៅគ្រាន់តែជាការស្រមៃនៅឡើយទេសង្ឃឹមមានអ្នកចិត្តបុណ្យជួយបំពេញ។ ក្តីស្រមៃនេះដើម្បីនាំភាពយន្តខ្មែរទៅកាន់ពិភពលោក ឈប់ហៅពួកខ្ញុំថាពួកថតកុនទៅកុំឱ្យចេះ តែកុនទៅកុនទៅដូចមាត់ សូមហៅថាអ្នកភាពយន្តអង់គ្លេសគេហៅថា Film Maker»។

គួរបញ្ជាក់ថា កន្លងមកនេះផលិតករ ហ៊ុយ យ៉ាឡេង ជារឿយៗបានត្អូញត្អែរពិបាករកអ្នកបណ្តាក់ទុកលើវិស័យភាពយន្តពេលខ្លះលោកថែមទាំងប្រកាស លក់ឡាន លក់ផ្ទះ ដើម្បីយកលុយមកថតកុនទៀតផង៕

ជឿជាក់ថាអ្នកមួយចំនួនធំប្រាកដជាបានដឹងហើយថាវីដេអូចម្រៀង «ទេវរាជ» បានសម្ពោធជាផ្លូវការកាលពីពេលថ្មីៗនេះអមជាមួយទស្សនីយភាពសិល្បៈវប្បធម៌ជាច្រើន។ អ្វីដែលកាន់តែរំភើបការលះបង់ទាំងកម្លាំងកាយចិត្តរបស់តារាចម្រៀង ទេព បូព្រឹក្ស និង ជី ដេវីត ទទួលបានពិតជាស័ក្តិសមត្រូវបាននាយករដ្ឋមន្រ្តីកម្ពុជាយកទៅផ្សព្វផ្សាយបន្ត។ ជាមួយក្តីរំភើបនេះអ្នកគាំទ្រក៏ភ្លេចស្ញើចសរសើរទឹកចិត្តគូស្នេហ៍មួយគូនេះបំពេញកាតព្វកិច្ចរបស់ខ្លួនបានយ៉ាងល្អទាំងជាឪពុកម្តាយល្អ អ្នកសិល្បៈគំរូបបរិច្ចាគទឹកប្រាក់ទៅកាន់សាលាមធ្យមវិចិត្រសិល្បៈសម្រាប់ការបណ្តុះបណ្តាលសិល្បៈវប្បធម៌ រួមទាំងទទួលការស្វាគមន៍ DJ Soda ដែលហោះឆ្លងដែនអាកាសមកចូលរួមកម្មវិធីរបស់ខ្លួន។

កាលពីល្ងាចថ្ងៃទី២៦ ខែឧសភា នៅសាលមហោស្រពកោះពេជ្រមានការសម្ពោធ MV ខ្នាតធំរបស់ ទេព បូព្រឹក្ស មានចំណងជើងថា «ទេវរាជ» ដោយមានទស្សនីយភាពជាច្រើន ខណៈសិល្បករ សិល្បការនី ចូលរួមបានស្រុះដៃគ្នាយ៉ាងខ្លាំងដោយបានគ្រងឈុតសំលៀកបំពាក់បុរាណ ទៅតាមសម័យកាលយ៉ាងស្រស់ស្អាតរៀងៗខ្លួន។ កម្មវីធីនេះមានវត្តមានអញ្ជើញចូលរួមឯកឧត្ដម លោកជំទាវ អ្នកឧកញ៉ា លោក លោកស្រី សិល្បករ សិល្បការិនី និងទស្សនិជនប្រហែល៣០០០នាក់។

ទឹកចិត្តសប្បុរសរបស់អ្នកទាំងពីរដូចតាមការសន្យាចំណូលបានពីការលក់សំបុត្រត្រូវបានប្រគល់ជូនសាលាមធ្យមវិចិត្រសិល្បៈសម្រាប់ការបណ្តុះបណ្តាលសិល្បៈវប្បធម៌ផងដែរជាមួយទឹកប្រាក់ចំនួន ៧៣,៤៥២,០០០៛ និងថវិការបស់អ្នកនាង ទេព បូព្រឹក្ស ចំនួន ៨,០០០,០០០៛។
ជាមួយនឹងការលើកស្ទួយវប្បធម៌ជាតិខ្មែរ កាតព្វកិច្ចធំមួយដែល ទេព បូព្រឹក្ស និង ជី ដេវីត ចប់កម្មវិធីភ្លាមៗមិនអាចនៅរាក់ទាក់ជាមួយសិល្បករ សិល្បការិនី និងអ្នកគាំទ្រគឺពួកគេរ៉ូតរះទៅមន្ទីរពេទ្យភ្លាមដោយសារតែកូនសម្លាញ់អ្នកទាំងពីរឈឺចូលមន្ទីរពេទ្យ សូម្បីតែខ្លួននៅកម្មវិធីក្តីប៉ុន្តែចិត្តវិញគឺកំពុងព្រួយបារម្ភពីកូនដែលអាចបញ្ជាក់ថាកាតព្វកិច្ចកម្មវិធីខ្លួនក៏ត្រូវបំពេញតែកាតព្វកិច្ចជាឪពុកម្តាយក៏មិនរំលង។

នៅយប់តែមួយ ទេព បូព្រឹក្ស និង ជី ដេវីត ត្រូវមានតួនាទីមួយទៀតនោះគឺធ្វើជាម្ចាស់ផ្ទះដ៏កក់ក្តៅចំពោះ DJ Soda ដែលខំហោះឆ្លងដែនអាកាសពីប្រទេសកូរ៉េខាងត្បូងដើម្បីមកចូលរួមសម្ពោធ MV អ្នកទាំងពីរក៏ឆ្លៀតញុំាអាហារជុំគ្នាដើម្បីអបអរសាទរភាពជោគជ័យលើកនេះដូចគ្នា។ វត្តមានរបស់ DJ Soda ដែលនិយមចូលចិត្តលេងខ្លួនស៊ិចស៊ីបែរជាមកស្លៀកពាក់ឈុតអប្សរាធ្វើឱ្យមហាជនកោតសរសើរនាងយ៉ាងខ្លាំងដូចគ្នា។

កាតព្វកិច្ចនិងទំនួលខុសត្រូវបំពេញបានយ៉ាងល្អរបស់ ទេព បូព្រឹក្ស និង ជី ដេវីត ពិតជាធ្វើឱ្យអ្នកគាំទ្រស្ងើចសរសើរយ៉ាងខ្លាំង៕