បន្ទាប់ពីរូបភាពនៃអគារមួយកន្លែងដែលហ៊ុមព័ទ្ធទៅដោយរុក្ខជាតិបៃតងយ៉ាងខៀវស្រងាត់ ស្រស់បំព្រោងពាសពេញផ្នែកខាងក្រៅទាំងអស់នៃអាគារដ៏ខ្ពស់ស្រឡឹមបែបនេះ សាធារណៈជនខ្មែរជាច្រើនហាក់មានការចាប់អារម្មណ៍ខ្លាំងបំផុត រហូតដល់មានអ្នកខ្លះច្រឡំថានៅបរទេសទៀតផង។

កាលពីថ្ងៃទី២៩ ខែឧសភា ឆ្នាំ២០២៤នេះ យោងតាមការបង្ហោះនៅលើបណ្តាញសង្គមហ្វេសបុកដោយគណនីមួយដែលមានឈ្មោះថា Sok Chanphal គឺបានបង្ហាញរូបភាពចំនួន ៣សន្លឹក ដោយភ្ជាប់មកជាមួយនឹងចំណងជើងថា«នៅក្រុងភ្នំពេញយើងទេណា! (បឹងកេងកង)»។ បន្ទាប់ពីមានការដាក់បង្ហោះរួចមក, មហាជនខ្មែរជាច្រើនមានការចាប់អារម្មណ៍និងស្ងើចសរសើរពីសម្រស់អាគារធម្មជាតិមួយនេះ ហាក់មិនសូវបានឃើញនោះទេ ខណៈអ្នកខ្លះថាធ្លាប់តែឃើញនៅស្រុកគេប៉ុណ្ណោះ។

អគារមួយកន្លែងដែលមានទីតាំងស្ថិតនៅក្នុងសង្កាត់បឹងកេងកងទី១ ខណ្ឌចម្ការមន រាជធានីភ្នំពេញ ត្រូវបានគេស្គាល់ថាជា«ភោជនីយដ្ឋានខ្មែរសុរិន្ទ» ជាភោជនីយដ្ឋានចំណាស់ជាងគេមួយនៅក្នុងទីក្រុងភ្នំពេញ ព្រោះបានឈរជើងមកតាំងពី១៩៩៦ ខណៈមកទល់ពេលនេះគឺមានរយៈពេល២៨ឆ្នាំហើយ។ ភោជនីយដ្ឋានខ្មែរសុរិន្ទ គឺជាហាងអាហារដ៏ពេញនិយមមួយ ដែលបម្រើជាពិសេសចំពោះមុខម្ហូបខ្មែរនិងថៃ(រសជាតិដើមពិតៗ) ខណៈបាននឹងកំពុងទាក់ទាញភ្ញៀវទេសចរណ៍ទាំងជាតិនិងអន្តរជាតិមិនដែលដាច់នោះឡើយ។

លក្ខណៈពិសេសនិងភាពលេចធ្លោរបស់ភោជនីយដ្ឋានមួយនេះគឺស្ថិតនៅក្នុងអាគារបែបអាណានិគមដ៏ស្រស់ស្អាតបំផុតមួយ និងអមទៅដោយធម្មជាតិត្រជាក់ភ្នែក ពាសពេញផ្នែកខាងក្រៅនៃអគារទាំងស្រុងតែម្តង។ លើសពីនេះទៅទៀត ផ្នែកខាងក្នុងនៃអគារគឺត្រូវបានតុបតែងយ៉ាងប្រណីតឥតខ្ចោះ ដោយគ្រឿងសង្ហារិមបែបប្រពៃណីខ្មែរ និងគ្រឿងបរិក្ខារទំនើបៗ។

បន្ថែមពីរសជាតិល្អឯករបស់ភោជនីយដ្ឋានហើយ សេវាកម្មនៅទីនោះគឺល្អបំផុត ខណៈនឹងទទួលបានបរិយាកាសកាន់តែកក់ក្តៅនិងរីករាយ ព្រោះតែជាទីតាំងធំទូលាយ មានបន្ទប់ទទួលទានអាហារខ្នាតធំ បន្ទប់អាហារលក្ខណៈឯកជន ក៏ដូចជាមានបារដែលបម្រើនូវស្រាក្រឡុក ស្រាបៀរ និងស្រាជាច្រើនប្រភេទផងដែរ៕

ក្នុងរយៈពេលប៉ុន្មានឆ្នាំចុងក្រោយនេះ កោះនានារបស់ប្រទេសកម្ពុជាយើងបានចាប់ផ្តើមទទួលការចាប់អារម្មណ៍យ៉ាងខ្លាំងពីភ្ញៀវទេសចរទាំងក្នុងនិងក្រៅប្រទេស ដោយសារតម្លៃសមរម្យ ទេសភាពធម្មជាតិស្រស់បំព្រង បូករួមជាមួយអាហារប្រណិតៗ ខ្យល់អាកាសបរិសុទ្ធ និងទីធ្លារធំទូលាយ។ ជាការពិតណាស់នៅក្នុងប្រទេសកម្ពុជារបស់យើងគឺមានកោះធំៗនិងស្រស់ស្អាតជាច្រើនកន្លែង ដូច្នេះហើយតើអ្នកដឹងទេថា កោះណាខ្លះដែលមានទំហំធំបំផុតនៅក្នុងប្រទេសយើង?

១.កោះកុងក្រៅ៖ កោះនេះស្ថិតនៅឃុំជ្រោយប្រស់ ស្រុកកោះកុង ខេត្តកោះកុង ដែលមានផ្ទៃដីប្រមាណ ៨០ គីឡូម៉ែត្រការ៉េ និងមានកម្ពស់ប្រហែល ៤១០ ម៉ែត្រ លាតសន្ធឹងសន្ធឹងលើផ្ទៃសមុទ្រដ៏ធំល្វឹងល្វើយរបស់កម្ពុជា ជាប់ជាមួយនឹងឈូងសមុទ្រថៃ។ តំបន់កោះកុងក្រៅមានឆ្នេរចំនួន៧ ដែលឆ្នេរនីមួយៗសុទ្ធតែមានខ្សាច់សក្បុស ល្អស្អាត និងភាពទាក់ទាញរៀងៗខ្លួន។ តំបន់កោះកុងក្រៅនេះក៏ជាតំបន់ដែលសម្បូរទៅដោយធនធានធម្មជាតិជាពិសេសជីវចម្រុះ ចំណែកឯការស្នាក់នៅវិញ ភ្ញៀវទេសចរអាចបោះតង់បានយ៉ាងងាយស្រួលនៅលើទីធ្លាឆ្នេរ ដែលលាតសន្ធឹងជាច្រើនម៉ែត្រ និងអាចចាប់ក្ដាម ចាក់មឹក ឬស្ទូចត្រីនៅទីនោះដើម្បីធ្វើជាអាហារទទួលទានខ្លួនឯងផ្ទាល់តែម្តងក៏បាន។

២.កោះរ៉ុង៖ កោះរ៉ុងគឺជាកោះមួយស្ថិតក្នុងខេត្តព្រះសីហនុ ដែលមានផ្ទៃដីទំហំ ៧៨ គីឡូម៉ែត្រការ៉េ និងមានកំពស់ ១៣៣ ម៉ែត្រពីនីវ៉ូទឹកសមុទ្រ។ កោះនេះគឺជាគោលដៅទេសចរណ៍ដែលពេញនិយមនិងស្រស់ស្អាតបំផុតនៃតំបន់កំពង់សោម ហើយត្រូវបានគេស្គាល់ថាជា “កោះឋានសួគ៌”។ វាផ្តល់នូវភាពអស្ចារ្យនៃទឹកសមុទ្រខៀវស្រងាត់ ឆ្នេរខ្សាច់ពណ៌សរក្បុស ស្រស់ស្អាត ជំនោរសមុទ្រដ៏បរិសុទ្ធជាមួយនិងសម្រស់ធម្មជាតិដែលមិនអាចកាត់ថ្លៃបាន។

៣.កោះថ្មី៖ កោះថ្មីមានទីតាំងស្ថិតក្នុងឧទ្យានជាតិរាម ខេត្តព្រះសីហនុ ដែលមានផ្ទៃដី ៤០ គីឡូម៉ែត្រការ៉េ និងមានឆ្នេរ ២៧ គីឡូម៉ែត្រ។ កោះដ៏ស្រស់ស្អាតនេះ គ្របដណ្ដប់ដោយដើមឈរតូចធំរាប់ពាន់ដើម បង្កើតបានជាម្លប់ ក៏ដូចជាទិដ្ឋភាព សោភណ្ឌភាពស្រស់ស្អាតទាក់ភ្នែកទាក់អារម្មណ៍ និងមានភាពស្ងប់ស្ងាត់បំផុត សម្រាប់ភ្ញៀវទេសចរណាដែលចង់បានភាពស្ងប់សុខក្នុងផ្លូវអារម្មណ៍នោះ “កោះថ្មី” ទំនងជាគោលដៅលំហែដ៏ស័ក្តសមបំផុតហើយ។

៤.កោះរ៉ុងសន្លឹម៖ កោះរ៉ុងសន្លឹម ជាកោះមួយស្ថិតក្នុងខេត្តព្រះសីហនុ ដែលកោះនេះមានចំងាយប្រហែល ៤ គីឡូម៉ែត្រពីកោះរ៉ុង។ វាមានទំហំផ្ទៃដី ៥ ពាន់ហិកតា និងមានឆ្នេរខ្សាច់លាតសន្ធឹងជាង ១ គីឡូម៉ែត្រ។ កោះរ៉ុងសន្លឹមបានជួយអភិវឌ្ឍជីវភាពនិងការរស់នៅរបស់ប្រជាពលរដ្ឋយ៉ាងច្រើន បានក្លាយជាគោលដៅទេសចរណ៍ដ៏ទាក់ទាញបំផុតរបស់ប្រទេសកម្ពុជាយើង។

៥.កោះសេះ៖ កោះសេះនេះមានទីតាំងនៅឈូងសមុទ្រថៃ ក្នុងឧទ្យានជាតិរាម ខេត្តព្រះសីហនុ។ វាមានចម្ងាយ ១.៥ គីឡូម៉ែត្រខាងត្បូងកោះថ្មី ដែលកោះនេះមានវិសាលភាពទំហំ ៥០០ ហិចតា ហើយសព្វថ្ងៃពុំទាន់ឃើញមានភ្ញៀវទេសចរណ៍ច្រើនទៅកំសាន្តនៅទីនោះនៅឡើយទេ។ ប្រសិនបើបងប្អូនមានបំណងចង់ទៅទស្សនាកន្លែងនោះ បងប្អូនអាចទៅកំពង់ផែកោះខ្យងរបស់ខេត្តព្រះសីហនុ រួចស្នើរទូកដែលមានទិសដៅទៅកោះថ្មី ដើម្បីជូនទៅកោះសេះ ព្រោះកោះថ្មីខេត្តព្រះសីហនុមានចម្ងាយជិតកោះសេះ៕

ភាពនៅលីវគឺជាស្ថានភាពសង្គមរបស់មនុស្សដែលមិនស្ថិតនៅក្នុងទំនាក់ទំនងស្នេហាជាមួយនរណាម្នាក់។ សព្វថ្ងៃនេះមនុស្សសម័យទំនើបបានចាប់ផ្តើមធ្វើការស្វែងយល់ទៅលើអ្វីដែលពួកគេទទួលបានចំពោះការរស់នៅតែម្នាក់ឯង ហើយនឹងបានរៀនរីករាយសប្បាយចិត្តទៅនឹងជីវិតនៅលីវរបស់ពួកគេ។ ប៉ុន្តែតើអ្នកដឹងទេថាហេតុអ្វីទៅបានជាអ្នកខ្លះជ្រើសរើសនៅលីវបែបនេះ? មានហេតុផលផ្សេងៗគ្នាជាច្រើនដែលមនុស្សសព្វថ្ងៃចង់រស់នៅម្នាក់ឯងក្នុងរយៈពេលយូរ ឬប្រហែលជារហូតក៏មានដែរ។ ទាំងនេះគឺជាហេតុផល ៥ យ៉ាងដែលធ្វើឱ្យមនុស្សមួយចំនួនសម្រេចចិត្តនៅលីវ៖

១.មានពេលវេលាច្រើន៖ ការនៅលីវគឺជាពេលវេលាដ៏ល្អឥតខ្ចោះដើម្បីស្វែងយល់ពីខ្លួនឯង និងតម្រូវការរបស់ខ្លួន ដោយយើងអាចចំណាយពេលធ្វើអ្វីដែលខ្លួនយើងស្រឡាញ់ និងកែលម្អខ្លួនឯងក្នុងផ្នែកផ្សេងៗដែលមានប្រយោជន៍ដល់ថ្ងៃពេលអនាគត។

២.មានឱកាសស្វែងរកអ្វីដែលអ្នកចង់បាននៅក្នុងជីវិត៖ ភាពនៅលីវគឺជាពេលវេលាដ៏ល្អបំផុតដើម្បីស្វែងយល់ពីខ្លួនឯង ហើយអាចស្វែងរកគោលបំណងរបស់យើងក្នុងជីវិត ដោយយើងអាចចំណាយពេលវេលារបស់យើងគិតអំពីអ្វីដែលយើងចង់បាន និងអ្វីដែលធ្វើឱ្យយើងសប្បាយចិត្ត ដែលនេះនឹងជួយឱ្យយើងរស់នៅកាន់តែមានសុភមង្គល និងបំពេញជីវិតកាន់តែច្រើននាពេលអនាគត។

៣.មានភាពច្បាស់លាស់៖ ពេលនៅលីវ អ្នកមានកន្លែងជាច្រើនដើម្បីគិតអំពីខ្លួនឯង និងតម្រូវការផ្ទាល់ខ្លួនរបស់អ្នក ដោយមិនចាំបាច់ខ្វល់ខ្វាយពីតម្រូវការរបស់អ្នកដទៃ ឬព្យាយាមផ្គាប់ចិត្តនរណាម្នាក់ឡើយ។ អ្នកអាចចំណាយពេលវេលារបស់អ្នកគិតអំពីអ្វីដែលអ្នកចង់បាន និងអ្វីដែលធ្វើឱ្យអ្នកសប្បាយចិត្ត ដូច្នេះការនៅលីវគឺជាពេលវេលាដ៏ល្អសម្រាប់ការអភិវឌ្ឍខ្លួនឯង រៀនអ្វីដែលថ្មី និងស្វែងរកអ្វីដែលអ្នកចង់បានក្នុងជីវិត។

៤.បើកចំហចំពោះអ្វីៗគ្រប់យ៉ាង៖ ភាពនៅលីវអាចធ្វើឱ្យមនុស្សមានឆន្ទៈក្នុងការតស៊ូ ដោយគ្មាននរណាម្នាក់រារាំងអ្នកពីការដេញតាមមហិច្ឆតារបស់អ្នកទេ។

៥.ជាពេលវេលាដ៏ល្អបំផុតដើម្បីរៀន និងរីកចម្រើន៖ ឆ្លៀតឱកាសនេះដើម្បីស្វែងរកខ្លួនឯង និងអ្វីដែលអ្នកចង់បានក្នុងជីវិត នៅពេលអ្នកត្រៀមខ្លួនសម្រាប់ទំនាក់ទំនង អ្នកនឹងមានពេលវេលាកាន់តែងាយស្រួលដើម្បីទាក់ទាញមនុស្សត្រឹមត្រូវចូលទៅក្នុងជីវិតរបស់អ្នក៕

ថ្លៃងក្នុងពិធីសម្ពោធដាក់ឱ្យប្រើប្រាស់សមិទ្ធផលមួយចំនួននៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា ស្ថិតនៅឧទ្យានជាតិព្រះសុរាម្រិត-កុសមៈ គិរីរម្យ សម្តេចមហាបវរធិបតី ហ៊ុន ម៉ាណែត បានចេញបទបញ្ជាឱ្យអភិបាលខេត្តតាកែវ បន្តតាមរកមុខ និងចាត់វិធានការចំពោះក្រុមក្មេងទំនើងដែលបានប្រើដាវដេញកាប់គ្នាយ៉ាងអនាធិបតេយ្យនៅក្នុងភូមិសាស្ត្រស្រុកត្រាំកក់ ខេត្តតាកែវ ត្រង់ចំណុចផ្សារអង្គតាសោម។

សម្តេចធិបតី មានប្រសាសន៍ថា៖”កុំប្រកួតប្រជែងកាប់ដាវ ម្សិលមិញ បញ្ជាឱ្យចៅហ្វាយខេត្តតាកែវ រកឱ្យឃើញក្រុមកាប់ដាវនៅត្រាំកក់ ឥលូវរកបាន២ ៣នាក់ហើយ តាមរកឱ្យឃើញថែមទៀត”។

គួរបញ្ជាក់ផងដែរ កាលពីថ្ងៃទី២៨ ខែឧសភា មានករណីក្រុមក្មេងទំនើងពីរក្រុមបានជិះម៉ូតូប្រដេញវាយគ្នាដោយកាំបិត ពូថៅ នៅចំណុចខាងមុខផ្សារអង្គតាសោម លើបណ្ដោយផ្លូវជាតិលេខ៣ ស្ថិតនៅឃុំអង្គតាសោម ស្រុកត្រាំកក់ យ៉ាងអនាធិបតេយ្យ៕