នេះជាលើកដំបូងហើយក្នុងប្រវត្តិសាស្ត្រដែលក្រុមហ៊ុន Huawei របស់ចិនបានដណ្តើមរាជ្យបល្ល័ង្កដ៏កំពូលពី Samsung ដែលធ្លាប់តែជាម៉ាកយីហោកូរ៉េលក់ដាច់បំផុតក្នុងពិភពលោក។
យោងតាម South China Morning Post បានរាយការណ៍ថ្មីៗនេះថា ស្មាតហ្វូនអេក្រង់បត់ 5G របស់ Huawei បានយកឈ្នះស្មាតហ្វូនអេក្រង់បត់របស់ Samsung ក្លាយជាម៉ាកស្មាតហ្វូនអេក្រង់បត់ដែលលក់ដាច់បំផុតនៅលើពិភពលោកក្នុងត្រីមាសទីមួយនៃឆ្នាំ ២០២៤។ នេះជាលើកទីមួយហើយដែលក្រុមហ៊ុន Huawei របស់ចិនបានយកឈ្នះ Samsung ក្នុងផ្នែកនេះជាពិសេសក្នុងបរិបទនៃការហ៊ុមព័ទ្ធបច្ចេកវិទ្យារបស់លោកខាងលិច។

យោងតាមទិន្នន័យពីក្រុមហ៊ុនប្រឹក្សាយោបល់ Counterpoint ក៏បានបង្ហាញដែរថាការលក់ទូរស័ព្ទអេក្រង់បត់របស់ក្រុមហ៊ុន Huawei ក្នុងរយៈពេល ៣ ខែដំបូងនៃឆ្នាំនេះបានកើនឡើងរហូតដល់ ២៥៧% ឯណោះបើធៀបនឹងរយៈពេលដូចគ្នាកាលពីឆ្នាំមុន។ នៅក្នុងត្រីមាសទីមួយនៃឆ្នាំ ២០២៣ ក្រុមហ៊ុន Huawei មានចំណែកទីផ្សារត្រឹមតែ ១៤% ប៉ុណ្ណោះ ខណៈក្រុមហ៊ុន Samsung មានចំនួន ៥៨% នៃចំណែកទីផ្សារទូរស័ព្ទដែលអាចបត់បានរបស់ពិភពលោក។ ទោះជាយ៉ាងណានៅឆ្នាំ ២០២៤ វិញចំណែកទីផ្សាររបស់ក្រុមហ៊ុនទូរស័ព្ទចិន Huawei បានកើនឡើងលើសពី ៣៥% ខណៈក្រុមហ៊ុនទូរស័ព្ទកូរ៉េ Samsung បានថយចុះមកត្រឹម ២៣% វិញ។

យោងតាម Counterpoint នេះគឺជាដំណឹងដ៏ល្អនិងជាការត្រឡប់មកវិញដ៏អស្ចារ្យសម្រាប់ក្រុមហ៊ុន Huawei ដែលធ្លាប់ជាក្រុមហ៊ុនទូរស័ព្ទត្រូវបានលោកខាងលិចហាមឃាត់មិនឱ្យផលិតអស់រយៈពេលជាច្រើនឆ្នាំ។ ការចេញលក់ទូរសព្ទបច្ចេកវិទ្យាខ្ពស់របស់ក្រុមហ៊ុន Huawei បានធ្វើឱ្យពិភពលោកទាំងមូលភ្ញាក់ផ្អើលយ៉ាងខ្លាំងនៅសមត្ថភាពមិនធ្លាប់មាននិងគុណភាពគ្មានពីររបស់វា ព្រមទាំងរបៀបដែលអាជីវកម្មនេះអាចយកឈ្នះដោយជោគជ័យលើការហ៊ុមព័ទ្ធបច្ចេកវិទ្យារបស់លោកខាងលិច។

គួរបញ្ជាក់ដែរថា ការលក់ទូរស័ព្ទសរុបរបស់ក្រុមហ៊ុន Huawei ក្នុងរយៈពេល ៣ ខែដំបូងនៃឆ្នាំនេះបានកើនឡើង ៧០% បើធៀបនឹងរយៈពេលដូចគ្នាកាលពីឆ្នាំមុន។ បច្ចុប្បន្នទូរសព្ទអេក្រង់បត់ គឺជាផលិតផលដ៏ពេញនិយមមួយនៅក្នុងប្រទេសចិន ជាមួយនឹងការលក់កើនឡើងទ្វេដងពី ៣.២ លានគ្រឿងក្នុងឆ្នាំ ២០២២ ដល់ ៧.១ លានគ្រឿងក្នុងឆ្នាំ ២០២៣។ ដូច្នេះនៅទូទាំងពិភពលោក ការលក់ទូរស័ព្ទអេក្រង់បត់របស់ក្រុមហ៊ុន Huawei ក៏បានកើនឡើង ៤៩% ផងដែរ៕

ប្រទេសឥណ្ឌា ៖ ភូមិ Piplantri ស្ថិតក្នុងរដ្ឋ Rajasthan ប្រទេសឥណ្ឌា មានទំនៀមទម្លាប់មួយដែលបានអនុវត្តអស់រយៈពេលជាង១០ឆ្នាំមកហើយ គឺនៅពេលមានទារិ.កា កើតម្តងៗ អ្នកភូមិនាំរួមគ្នាដាំដើមឈើចំនួន១១១ដើម ។ ហេតុអ្វីអ្នកភូមិនៅទីនេះដាំដើមឈើចំនួន១១១ដើម ពេលមានទារិ.កាកើត?

គេពុំអាចបដិសេធបានថា ប្រទេសឥណ្ឌាមានការរំលោភបំពានលើស្ត្រីយ៉ាងច្រើន ជាពិសេស ក្មេងស្រីបានរងទុក្ខវេទនា និងត្រូវគេធ្វើឃាតកម្មជាបន្តបន្ទាប់ ។ វាធ្វើឱ្យមនុស្សទូទៅសោកស្តាយយ៉ាងខ្លាំងពេលទទួលដំណឹងនេះ ប៉ុន្តែនៅភូមិ Piplantri បានបង្កើតស្នាមញញឹមដល់ក្មេងស្រី តាមរយៈប្រពៃណីដ៏ប្លែកមួយ គឺបង្កើតតំបន់បៃតងក្នុងភូមិ ។

Piplantri គឺជាភូមិតូចមួយស្ថិតនៅភាគខាងត្បូងរដ្ឋ Rajasthan ហើយអ្នកភូមិនេះតែងតែលើកកម្ពស់សិទ្ធិក្មេងស្រី និងរៀបចំបរិស្ថានក្នុងភូមិ ។ នៅពេលមានទារិកាចាប់កំណើតក្នុងភូមិ អ្នកភូមិនឹងនាំគ្នាដាំដើមឈើចំនួន១១១ដើម បន្ទាប់មក ពួកគេជួយគ្នាថែទាំដើមឈើទាំងនេះរហូតដល់ធំ ទើបប្រគល់ដើមឈើឱ្យទារិកានោះ ។

ទំនៀមទម្លាប់នេះធ្វើឡើងក្នុងគោលបំណងដោះស្រាយបញ្ហាសង្គមដែលតែងតែកើតឡើងចំពោះក្មេងស្រី គឺការផ្តល់សិទ្ធិអំណាចដល់ពួកនាង និងការដាំដើមឈើ ។ ពួកគេបានអនុវត្តទំនៀមទម្លាប់នេះអស់រយៈពេល១៥ឆ្នាំហើយ ដើម្បីឱ្យអ្នកភូមិចេះស្រឡាញ់ និងការពារបរិស្ថាន ព្រមទាំងថែទាំដើមឈើឱ្យដូចនឹងការថែទាំកូនស្រី ។

លោក Shyam Sundar Paliwal ជាអ្នកចាប់ផ្តើមបង្កើតទំនៀមទម្លាប់នេះនិយាយថា ជារៀងរាល់ឆ្នាំ នឹងមានទារិកាកើតក្នុងភូមិជាមធ្យមចំនួន៦០នាក់ ហើយលោកចង់ធ្វើអ្វីដើម្បីរំលឹកដល់កូនស្រីរបស់លោក ដែលបានស្លាប់ដោយសារខ្វះខាតទឹកពេលនាងអាយុ១៨ឆ្នាំ ។ តាំងពីកូនស្រីស្លាប់ទៅ លោកក៏សន្យាជាមួយខ្លួនឯងថា នឹងធ្វើឱ្យភូមិនេះក្លាយជាតំបន់បៃតង ដើម្បីកុំឱ្យភូមិខ្វះទឹកបន្តទៀត ។

លោក Shyam និយាយថា ៖ «បើយើងការពារបរិស្ថានខ្លាំងប៉ុនណា ធម្មជាតិនឹងតបស្នងយើងខ្លាំងដែរ ។ រីឯអ្នកដែលរីករាយការពារធម្មជាតិពុំចាំបាច់បារម្ភទេ ពីព្រោះធម្មជាតិនឹងផ្តល់ថាមពលដល់យើង» ។

បច្ចុប្បន្ន ក្មេងស្រីដែលមានឈ្មោះនៅលើដើមឈើនឹងរួមគ្នាប្រារព្ធពិធីចងខ្សែដៃពិសេសដល់ដើមឈើរបស់ពួកនាង ដើម្បីបង្ហាញពីទំនាក់ទំនងអមតៈជាមួយដើមឈើ ។ ការដាំដើមឈើជាច្រើនដើមក្នុងរយៈពេលប៉ុន្មានឆ្នាំមកនេះ បានធ្វើឱ្យភូមិ Piplantri ប្រែក្លាយជាតំបន់បៃតង ហើយអ្នកភូមិមានបន្ទប់ទឹក និងអគ្គិសនីប្រើប្រាស់គ្រប់គ្រាន់ ។ រីឯអំពើឧក្រិដ្ឋកម្មផ្សេងៗដែលតែងតែងកើតឡើងមកលើក្មេងស្រីក្នុងភូមិបានធ្លាក់ចុះជាបន្តបន្ទាប់ ៕

បរទេស៖ ថ្មីៗនេះប្រទេសអេស្ប៉ាញបានបង្កើតឧបករណ៍ស្វែងរក និងជួយសង្គ្រោះមនុស្សពេលបាត់ខ្លួននៅកន្លែងណាមួយត្រឹមតែរយៈពេលប៉ុន្មាននាទីប៉ុណ្ណោះ។
យោងតាម Interesting engineering បច្ចេកវិទ្យាថ្មីនេះហៅថា Lifeseeker ត្រូវបានរចនាឡើងជាពិសេសសម្រាប់ស្វែងរកតាមឧទ្ធម្ភាគចក្រ ដោយឧបករណ៍នេះមានសមត្ថភាពរកឃើញទូរសព្ទដៃរបស់ជនរងគ្រោះក្នុងចម្ងាយ ៣២ គីឡូម៉ែត្រ និងកំណត់ទីតាំងយ៉ាងត្រឹមត្រូវក្នុងរង្វង់តិចជាង ៥ គីឡូម៉ែត្រទោះបីនៅតំបន់នោះគ្មានសេវាក៏ដោយ។

នៅពេលដែលយើងរកឃើញទូរសព្ទហើយ វានឹងបង្ហាញជាចំនុចតូចមួយនៅលើផែនទី។ បន្ទាប់មកនៅពេលដែលយើងហោះហើរជុំវិញតំបន់នោះ ចំនុចនោះកាន់តែធំទៅៗ រហូតដល់យើងដឹងច្បាស់ថាពួកវានៅទីណា។ លោកវេជ្ជបណ្ឌិត Tim Durkin អ្នកសម្របសម្រួលកម្មវិធីស្វែងរក និងជួយសង្គ្រោះសម្រាប់ឧទ្ធម្ភាគចក្រ Colorado Highland បាននិយាយថា ក្រុមការងារអាចរកឃើញមនុស្សបាន គឺអាស្រ័យលើស្ថានភាព ប្រសិនបើទីតាំងនោះមានដីបើកចំហ និងលក្ខខណ្ឌអំណោយផលសម្រាប់ការចុះចតប្រកបដោយសុវត្ថិភាព នោះពួកយើងនឹងងាយស្រួលចុះទៅជួយសង្គ្រោះមនុស្សបានដោយផ្ទាល់។

មូលហេតុដែលគេបង្កើតឧបករណ៍ Lifeseeker គឺដោយសារមានមនុស្សជាច្រើនបានបាត់ខ្លួន ហើយរកមិនឃើញពេលពួកគេចូលក្នុងព្រៃ La Plata Canyon។ ព្រៃនេះត្រូវបានហ៊ុព័ទ្ធដោយ ៣,៦៥៨ ម៉ែត្រ និងកំពូលភ្នំ ៣,៩៦២ ម៉ែត្រ នៅសងខាងមានព្រៃក្រាស់ៗជាច្រើន។ តំបន់ភ្នំដាច់ស្រយាលនេះគឺជាទីតាំងដ៏ទាក់ទាញសម្រាប់មនុស្សដែលចូលចិត្តឡើងភ្នំ និងការផ្សងព្រេង។ ទោះជាយ៉ាងណាមនុស្សដែលទៅតំបន់នោះច្រើនបាត់ខ្លួន។

កាលពីមុនបេសកកម្មមួយចំនួនបានបន្តស្វែងរកមនុស្សអស់រយៈពេលជាច្រើនសប្តាហ៍ ដោយមិនទទួលបានលទ្ធផលទាល់តែសោះ នៅទីបំផុតការស្វែងរកក៏ត្រូវបានបញ្ឈប់។ ដូច្នេះការបង្កើតឧបករណ៍នេះនឹងអាចជាដំណោះស្រាយដ៏ល្អបំផុតមួយរបស់អ្នកស្រាវជ្រាវក្នុងការស្វែងរកជនរងគ្រោះដែលបាត់ខ្លួន៕

Burj Khalifa បច្ចុប្បន្នគឺជាអាគារខ្ពស់ជាងគេបំផុតលើលោកស្ថិតក្នុងទីក្រុងឌូបៃ ត្រូវបានគេទទួលស្គាល់ថាជាអាគារដែលមានតម្លៃថ្លៃ។ នៅទីនេះមានទេសភាពធម្មជាតិស្រស់បំព្រង ខ្យល់អាកាសបរិសុទ្ធ អមដោយអាផាតមិនជាច្រើន ដោយអតិថិជនអាចប្រើប្រាស់សេវាកម្មដូចជា បណ្ណាល័យ បន្ទប់ប្រជុំ អាងទឹកក្តៅ អាងហែលទឹក សួនច្បារ ទីលានវាយកូនបាល់ និងសេវាកម្មជាច្រើនទៀតដោយសេរី។

មូលហេតុនេះហើយទើបអាគារខ្ពស់ជាងគេមានតម្លៃទិញ និងជួលខ្ពស់កប់ពពកបែបនេះ។ ទោះជាយ៉ាងណា ប្រិយមិត្តមួយចំនួនប្រហែលជាចង់ដឹងហើយថា អាគារខ្ពស់ៗនៅទីក្រុងឌូបៃដូចជា Burj Khalifa មានតម្លៃប៉ុន្មាន ប្រសិនបើយើងចង់ទិញ ឬជួលដើម្បីស្នាក់នៅតើយើងត្រូវចំណាយប៉ុន្មាន? ដូច្នេះមកដឹងពីតម្លៃទាំងអស់គ្នា៖
ដើម្បីអាចរស់នៅក្នុងអាផាតមិនមួយនៃអាគារខ្ពស់ជាងគេលើលោក Burj Khalifa អ្នកត្រូវចំណាយលុយលើទីតាំងដូចខាងក្រោម៖

-សម្រាប់អាផាតមិនដែលមានបន្ទប់គេងមួយ និងមានទីធ្លារ ៨៧ ម៉ែត្រការ៉េ គឺមានតម្លៃទិញចាប់ពី (៥៤ម៉ឺន-១ លានដុល្លារអាមេរិក)
-សម្រាប់អាផាតមិនដែលមានបន្ទប់គេងពីរ បន្ទប់ទទួលភ្ញៀវមួយ និងមានទីធ្លារ ១៩០ ម៉ែត្រការ៉េ គឺមានតម្លៃទិញចាប់ពី (៩៥ ម៉ឺន-១.៩ លានដុល្លារអាមេរិក)
-សម្រាប់អាផាតមិនដែលមានបន្ទប់គេងបី បន្ទប់ទទួលភ្ញៀវមួយ និងមានទីធ្លារ ២១៦ ម៉ែត្រការ៉េ គឺមានតម្លៃទិញចាប់ពី (១.៦-៣.៣ លានដុល្លារអាមេរិក)។

រីឯតម្លៃជួលអាផាតមិននៅ Burj Khalifa វិញគឺអាផាតមិនដែលមានបន្ទប់គេងមួយតម្លៃជួលប្រហែល (៣,២០០-៦,៨០០ ដុល្លារអាមេរិក) ក្នុងមួយខែ។ ប្រសិនបើអ្នកជួលអាផាតមិន ២ បន្ទប់គេង តម្លៃគឺខ្ពស់ជាងមួយដងកន្លះ។ សម្រាប់អាផាតមិន ៣ បន្ទប់គេង អ្នកជួលនឹងត្រូវចំណាយក្នុងមួយខែ (៩,៥០០-១៩,០០០ ដុល្លារអាមេរិក)។ ទោះជាយ៉ាងណានៅពេលអ្នកជួលឬទិញនៅទីនោះហើយអ្នកក៏ត្រូវចំណាយលើថ្លៃសេវាកម្មដូចជា ថ្លៃថែទាំ ថ្លៃសន្តិសុខ និងសេវាកម្មជាច្រើនទៀតចំនួន (១៧៤-២០៤ ដុល្លារអាមេរិក) ក្នុងមួយម៉ែត្រការ៉េសម្រាប់មួយខែ។

ចំណែកតម្លៃអគ្គិសនី និងទឹកក្នុងមួយខែ ប្រសិនបើរស់នៅអាគារ Burj Khalifa អ្នកនឹងត្រូវចំណាយប្រហែល (៨២០-១,៦៣០ ដុល្លារអាមេរិក)។ ការរស់នៅទីនេះគឺភ្ជាប់ជាមួយនូវភាពប្រណីតជាច្រើន ដូច្នេះសម្រាប់ប្រិយមិត្តដែលចង់សាកល្បងរស់នៅក្នុងជីវិតបែបអភិជនអ្នកអាចសាកល្បងនៅទីនេះបាន៕

លិខិតឆ្លងដែន គឺជាឯកសារផ្លូវការសម្រាប់អ្នកធ្វើដំណើរទៅក្រៅប្រទេសដែលចេញដោយរដ្ឋាភិបាល ហើយក៏មានផ្ទុកអត្តសញ្ញាណរបស់អ្នកដែលកាន់លិខិតនោះផងដែរ។ ដូច្នេះហើយតើអ្នកដឹងដែរទេថា តើលិខិតឆ្លងដែនរបស់ប្រទេសណាខ្លះដែលមានឥទ្ធិពលជាងគេបំផុតនៅលើពិភពលោក? ពោលគឺអាចប្រើប្រាស់ដើម្បីធ្វើដំណើរទៅកាន់ ប្រទេសនិងដែនដីដទៃទៀត ដោយពុំចាំបាច់តម្រូវឱ្យមានការស្នើសុំទិដ្ឋាការជាមុន ឬមិនត្រូវការទិដ្ឋាការតែម្តង។ ខាងក្រោមនេះគឺជាលិខិតឆ្លងដែនទាំង ១០ ដែលមានឥទ្ធិពលជាងគេបំផុតក្នុងឆ្នាំ ២០២៤៖

១.លិខិតឆ្លងដែនជប៉ុន (Japan)៖ ១៩៣ គោលដៅ
២.លិខិតឆ្លងដែនសិង្ហបុរី (Singapore) និង កូរ៉េខាងត្បូង (South Korea)៖ ១៩២ គោលដៅ
៣.លិខិតឆ្លងដែនអាល្លឺម៉ង់ (Germany) និង អេស៉្បាញ (Spain)៖ ១៩០ គោលដៅ
៤.លិខិតឆ្លងដែនហ្វាំងឡង់ (Finland), អ៊ីតាលី (Italy), និង លុចសំបួ (Luxembourg)៖ ១៨៩ គោលដៅ
៥.លិខិតឆ្លងដែនអូទ្រីស (Austria), ដាណឺម៉ាក (Denmark), ហូឡង់ (Netherlands), និងស៊ុយអែត (Sweden)៖ ១៨៨ គោលដៅ
៦.លិខិតឆ្លងដែនបារាំង (France), អៀរឡង់ (Ireland), ព័រទុយហ្កាល់ (Portugal), និងចក្រភពអង់គ្លេស (United Kingdom)៖ ១៨៧ គោលដៅ
៧.លិខិតឆ្លងដែនបែលហ្ស៉ិក (Belgium), នូវែលសេឡង់ (New Zealand), ន័រវែស (Norway), ស្វីស (Switzerland), និងសហរដ្ឋអាមេរិក (United States)៖ ១៨៦ គោលដៅ
៨.លិខិតឆ្លងដែនអូស្រ្តាលី (Australia), កាណាដា (Canada), ក្រិក (Greece), និងម៉ាល់តា (Malta)៖ ១៨៥ គោលដៅ
៩.លិខិតឆ្លងដែនហុងគ្រី (Hungary), និងប៉ូឡូញ (Poland)៖ ១៨៤ គោលដៅ
១០.លិខិតឆ្លងដែនលីទុយអានី (Lithuania), និងស្លូវ៉ាគី (Slovakia)៖ ១៨៣ គោលដៅ ៕