យោងតាមការចុះផ្សាយរបស់ប្រភពសារព័ត៌មាន Jarkata Globe កាលពីថ្ងៃទី៣០ ខែឧសភា ឆ្នាំ២០២៤នេះបានឲ្យដឹងថា ការត្រៀមធ្វើតេស្តសាកល្បង«តាក់ស៊ីអាកាស» នៅក្នុងទីក្រុង Nusantara នៃប្រទេសឥណ្ឌូណេស៊ី នឹងប្រព្រឹត្តិទៅក្នុងខែកក្កដា ឆ្នំាំ២០២៤ឆាប់ៗនេះ។

នៅក្នុងចំណោមមធ្យោបាយធ្វើដំណើរប្រកបដោយភាពច្នៃប្រឌិត និងការដឹកជញ្ជូនកម្រិតខ្ពស់ក្នុងទីក្រុង, «តាក់ស៊ីហោះ» ត្រូវបានគេរំពឹងថានឹងនាំប្រទេសឥណ្ឌូនេស៊ីឲ្យឆ្ពោះទៅរកភាពរីកចម្រើននិងទំនើបបំផុតនាពេលអនាគត។

តាក់ស៊ីហោះ ឬ តាក់ស៊ីអាកាស គឺជាកិច្ចសហការរវាងវិទ្យាស្ថានស្រាវជ្រាវអវកាសកូរ៉េ (KARI) និងក្រុមហ៊ុន Hyundai Motors ។ កាលពីឆ្នាំមុន អាជ្ញាធរក្រុង Nusantara បានចុះហត្ថលេខាលើអនុស្សរណៈនៃការយោគយល់គ្នាជាមួយ Hyundai របស់កូរ៉េខាងត្បូងលើការចល័តផ្លូវអាកាសកម្រិតខ្ពស់។

ក្រុមហ៊ុន Hyundai គ្រោងនឹងចាប់ផ្តើមដំណើរការសាកល្បងសម្រាប់តាក់ស៊ីអាកាសរបស់ខ្លួននៅក្នុងរដ្ឋធានីឥណ្ឌូនេស៊ី នាខែកក្កដានេះ ហើយប្រសិនបើជោគជ័យ «តាក់ស៊ីហោះ»អាចដំណើរការបាននៅទីក្រុង Nusantara ក្នុងរយៈពេលប៉ុន្មានឆ្នាំខាងមុខ។

តាមការបញ្ជាក់ តាក់ស៊ីហោះ គឺអាចផ្ទុកមនុស្សបានរហូតដល់ទៅ៥នាក់។ ចំពោះអត្ថប្រយោជន៍របស់វាវិញ ត្រូវបានគេរំពឹងថានឹងជួយសម្រួលដល់ការធ្វើដំណើរនិងការផ្លាស់ទីប្រកបដោយប្រសិទ្ធភាពខ្ពស់ ដូចជាការចូលទៅកាន់តំបន់ដាច់ស្រយាលដែលពិបាកទៅដល់ ,ការដឹកជញ្ជូនតាមផ្លូវគោក ផ្លូវទឹក ឆ្លងកាត់ភ្នំនិងព្រៃឈើជាដើម ដែលវានឹងក្លាយជាមធ្យោបាយធ្វើដំណើរកាន់តែងាយស្រួល និងឆាប់រហ័សបំផុត។

ចំពោះតម្លៃវិញគឺត្រូវបានគេប៉ាន់ស្មានថា សំបុត្រសម្រាប់តាក់ស៊ីហោះ ក្នុងចម្ងាយ ១០០ គីឡូម៉ែត្រ គឺប្រមាណនឹង៤៦ដុល្លារ ដែលតម្លៃនេះហាក់ខ្ពស់ខ្លាំងបើប្រៀបទៅនឹងតាក់ស៊ីផ្សេងៗក្នុងទីក្រុង។ ទោះជាយ៉ាងណា នេះគ្រាន់តែជាការប៉ាន់ស្មានដំបូងប៉ុណ្ណោះ ចំពោះតម្លៃពិតប្រាកដអាចនឹងប្រែប្រួលយ៉ាងណានោះថាអាចនឹងថោកឬថ្លៃជាងនេះ គឺផ្អែកទៅលើការពិតជាក់ស្តែង បន្ទាប់ពីដាក់ដំណើរការនៃតាក់ស៊ីហោះនេះដោយជោគជ័យ៕

ប្រទេសនីហ្សេរីយ៉ា ៖ បច្ចុប្បន្ន កុមារជាច្រើននៅប្រទេសនីហ្សេរីយ៉ាពុំបានចូលសាលារៀនទេ ហើយពួកគេបានបោះបង់ការសិក្សាជាបន្តបន្ទាប់ ដោយសារគ្មានលទ្ធភាពបង់ថ្លៃសាលា ។ ហេតុនេះ សាលារៀនមួយនៅប្រទេសនីហ្សេរីយ៉ាបានស្វែងរកវិធីដោះស្រាយបញ្ហាដើម្បីឱ្យកុមារមានឱកាសរៀនសូត្រ និងក្លាយជាទំពាំងស្នងឫស្សីរបស់ប្រទេសជាតិ ។

វិធីដោះស្រាយបញ្ហាកុមារបោះបង់ការសិក្សារបស់សាលារៀន គឺសាលាអនុញ្ញាតឱ្យអាណាព្យាបាលសិស្សប្រមូលសំរាមផ្លាស្ទិកមកប្រគល់ឱ្យសាលា ហើយពួកគេនឹងពុំចាំបាច់បង់ថ្លៃសិក្សាទេ ។ ដូច្នេះ វិធីនេះអាចជួយឱ្យកុមារបានចូលរៀនវិញ ថែមទាំងអាចកម្ចាត់សំរាមផ្លាស្ទិកនៅប្រទេសនីហ្សេរីយ៉ាទៀតផង ។

ក្នុងមួយឆ្នាំៗ ទីក្រុង Lagos ប្រទេសនីហ្សេរីយ៉ាមានសំរាមផ្លាស្ទិកប្រមាណ៨៧ម៉ឺនតោន ប៉ុន្តែដោយសារការកែច្នៃ និងកម្ចាត់សំរាមគ្មានប្រសិទ្ធភាពបានធ្វើឱ្យសំរាមផ្លាស្ទិកយ៉ាងច្រើនហូរចូលក្នុងទឹក, ឆ្នេរសមុទ្រ និងរាយប៉ាយពេញផ្លូវ ហើយបានប៉ះពាល់យ៉ាងធ្ងន់ធ្ងរដល់បរិស្ថាន និងសុខភាពមនុស្ស ។ មិនត្រឹមតែបញ្ហាសំរាមផ្លាស្ទិកប៉ុណ្ណោះទេ ដែលជាបញ្ហាធ្ងន់ធ្ងររបស់ប្រទេសនេះ ប៉ុន្តែយុវជនស្មើជាង២០លាន២សែននាក់បានបោះបង់ចោលការសិក្សានៅកម្រិតបឋមសិក្សា បើទោះជាកម្រិតនេះពុំតម្រូវឱ្យសិស្សបង់ថ្លៃសិក្សាក្តី ។

ហេតុនេះ ដោយសារមើលឃើញបញ្ហា និងចង់ជំរុញជីវភាពរស់នៅរបស់ពលរដ្ឋនីហ្សេរីយ៉ាឱ្យល្អប្រសើរ អង្គការជួយសង្គមឈ្មោះ African Clean Up Initiative និង WeCyclers បានចាប់ផ្តើមអនុវត្តគម្រោង «Recycle Pay Educational Project» ដោយសហការជាមួយសាលា Morit International School នៅទីក្រុង Ajegunle ។ គម្រោងនេះនឹងបើកឱកាសឱ្យអាណាព្យាបាលសិស្សយកសំរាមផ្លាស្ទិកមកឱ្យសាលា ហើយពួកគេនឹងពុំបាច់បង់ថ្លៃសាលាឱ្យកូន ។

កាលពី៣ឆ្នាំមុន អ្នកជិតខាងបានណែនាំសាលារៀននេះឱ្យអ្នកស្រី Ijeoma Obiora បានស្គាល់ ហើយអ្នកស្រីក៏នាំកូនមករៀននៅសាលានេះដោយពុំបង់ថ្លៃសាលា គ្រាន់តែយកសំរាមផ្លាស្ទិកមកឱ្យសាលាប៉ុណ្ណោះ ។ វាជារឿងមិនគួរឱ្យជឿទេ ហើយអ្នកស្រីក៏ពុំធ្លាប់ដឹងរឿងនេះដែរ ប៉ុន្តែបច្ចុប្បន្ន កូនស្រីអាយុ១៣ឆ្នាំ របស់អ្នកស្រីមានឱកាសរៀនសូត្រដូចក្មេងដទៃដែរ ។

អ្នកស្រីនិយាយថា ៖ «សាលារៀននេះល្អខ្លាំងណាស់សម្រាប់កូនស្រីខ្ញុំ ហើយខ្ញុំពុំចាំបាច់បារម្ភរឿងរកប្រាក់បង់ថ្លៃសាលាកូនទៀតទេ ។ រាល់ថ្ងៃ ខ្ញុំបានដើរប្រមូលដបផ្លាស្ទិកនៅតាមទីសាធារណៈយកទៅឱ្យសាលាដើម្បីប្តូរជាមួយថ្លៃសាលា» ។

លោក Patrick Mbamarah បានមើលឃើញបញ្ហាសំរាមផ្លាស្ទិក និងសិស្សបោះបង់ការសិក្សានៅនីហ្សេរីយ៉ា ទើបលោកសម្រេចចិត្តបង្កើតសាលា Morit International School នៅឆ្នាំ២០១៥ ។ លោកបានយកថ្លៃសាលាទាបបំផុត ដោយឱ្យអាណាព្យាបាលសិស្សប្រមូលដបផ្លាស្ទិកមកថ្លឹងគីឡូនៅសាលា ដើម្បីប្តូរជាមួយថ្លៃសាលាកូន ។

លោកនាយកសាលានិយាយថា ៖ «ខ្ញុំបានធំឡើងក្នុងសហគមន៍នេះ ហើយវាជាវិធីតបស្នងដល់សហគមន៍វិញ ។ នៅនីហ្សេរីយ៉ា ក្មេងៗច្រើនណាស់ពុំបានចូលរៀនទេ វាធ្វើឱ្យខ្ញុំឈឺចាប់ណាស់ ទើបសម្រេចចិត្តផ្តល់ការអប់រំដ៏ល្អមួយ ។ កូនសិស្សគ្រប់រូបអាចចូលរៀនបាន ហើយវាជាការឆ្លងកាត់ភាពលំបាកយ៉ាងច្រើន» ។

បច្ចុប្បន្ន ពលរដ្ឋនៅសហគមន៍នេះ និងតំបន់ក្បែរៗបានប្រមូលសំរាមផ្លាស្ទិកនៅតាមផ្លូវយកមកឱ្យសាលា ខណៈសាលាបានព្យាយាមកែលម្អវិធីសិក្សាឱ្យល្អដើម្បីអនុវត្តគម្រោងកាត់បន្ថយសំរាមផ្លាស្ទិក ។ សាលាមានគោលដៅប្រមូលដបផ្លាសិ្ទកឱ្យបាន១លានដប ព្រមទាំងជួយឱ្យកុមារជាង១.០០០នាក់បានចូលរៀន ៕

ប្រទេសជប៉ុន៖ ក្រុមហ៊ុនជប៉ុន Icoma បានចាប់ផ្តើមទទួលយកការបញ្ជាទិញជាលើកដំបូងសម្រាប់ម៉ូដែលម៉ូតូអគ្គិសនី Tatamel ជាមួយនឹងការធ្វើដំណើរប្រហែល ៣០ គីឡូម៉ែត្រ និងល្បឿនអតិបរមា ៤០ គីឡូម៉ែត្រក្នុងមួយម៉ោង ដែលលក់ក្នុងតម្លៃចាប់ពី ៣,២០០ ដុល្លារអាមេរិកឡើងទៅ។

យោងតាមសារព័ត៌មានបរទេសដែលចេញផ្សាយកាលពីពេលថ្មីៗនេះថា សមាសធាតុ Icoma Tatamel ទាំងអស់សុទ្ធតែត្រូវបានផលិតនៅក្នុងប្រទេសជប៉ុន ដោយសមាសធាតុបោះពុម្ព 3D ខ្លះជាដែកអ៊ីណុក ខ្លះជាអាលុយមីញ៉ូម និងខ្លះទៀតជាសម្ភារៈប្រពៃណី។ ម៉ូតូអគ្គិសនីនេះមានកង់មុខ ១០ អ៊ីញ កង់ក្រោយ ៦.៥ អ៊ីញ ហើយប្រព័ន្ធព្យួរគឺដូចម៉ូតូធម្មតា បើទោះបីជាវាមានទំហំតូចក៏ដោយ។

សម្រាប់លក្ខណៈពិសេសរបស់ម៉ូតូអគ្គិសនីនេះវិញគឺអាចបត់បានទំហំដូចគ្នានឹងវ៉ាលី ដោយមានទំងន់ត្រឹមតែ ៦៣ គីឡូក្រាមប៉ុណ្ណោះ និងសមត្ថភាពផ្ទុក ១០០ គីឡូក្រាម។ ពេលសាកពេញក្នុងរយៈពេល ៣ ម៉ោង ជាមួយរន្ធសាកក្នុងផ្ទះ រថយន្តអាចធ្វើដំណើរបានប្រហែល ៣០ គីឡូម៉ែត្រ ជាមួយនឹងល្បឿនអតិបរមា ៤០ គីឡូម៉ែត្រក្នុងមួយម៉ោង។ ដូច្នេះ យានជំនិះអាចត្រូវបានរក្សាទុកយ៉ាងស្អាតនៅជ្រុងមួយនៃផ្ទះ ដូចជានៅក្រោមតុ ឬទូ នៅពេលដែលអ្នកមិនប្រើប្រាស់។

លើសពីនេះចំណុចពិសេសមួយទៀត គឺថាបន្ទះតួយានយន្តទាំងសងខាង មានកំពស់ ៣៥០ mm និងទទឹង ៥៧០ mm ដែលជួយអតិថិជនងាយស្រួលក្នុងការទុកដាក់យានយន្តផ្ទាល់ខ្លួន និងមានជម្រើសពណ៌ ក្រាហ្វិកខុសៗគ្នាជាច្រើន ដែលអាចបំពេញចំណូលចិត្តរបស់អ្នកប្រើប្រាស់។ គួរបញ្ជាក់ដែរថា ក្រុមហ៊ុន Icoma បានចាប់ផ្តើមផលិតម៉ូតូអគ្គិសនី Tatamel ដំបូងនៅខែតុលា ឆ្នាំ២០២១។

បន្ទាប់មកនៅខែមករាឆ្នាំ ២០២៣ ក្រុមហ៊ុនបានណែនាំនឹងបង្ហាញផលិតផលនេះនៅឯពិព័រណ៍គ្រឿងអេឡិចត្រូនិករបស់សហរដ្ឋអាមេរិក (CES) ។ ហើយនៅថ្ងៃទី ១៥ ខែឧសភានៃឆ្នាំ ២០២៤ នេះការចាប់ផ្តើមអាជីវកម្មរបស់ជប៉ុនបានចាប់ផ្តើមទទួលយកការបញ្ជាទិញជាមុនជាមួយនឹងតម្លៃលក់ដែលរំពឹងទុក ៣,២០០ ដុល្លារអាមេរិកឡើងទៅ។ នៅពេលចាប់ផ្តើមទទួលយកការបញ្ជាទិញជាលើកដំបូងសម្រាប់ម៉ូដែលម៉ូតូអគ្គិសនី Tatamel ប្រជាជនជប៉ុនហាក់មានការចាប់អារម្មណ៍យ៉ាងខ្លាំងទៅលើរូបរាង និងគុណភាពរបស់វា ដែលវាមើលទៅពិតជាសក្តិសមសម្រាប់មនុស្សគ្រប់វ័យ ព្រមទាំងមានសុវត្ថិភាពទៀតផង៕

ប្រទេសអូស្ត្រាលី ៖ មានរុក្ខជាតិមួយប្រភេទឈ្មោះ «Gympie-Gympie» ឬឈ្មោះម្យ៉ាងទៀតថា «រុក្ខជាតិធ្វើអត្តឃា.ត» ដុះនៅប្រទេសអូស្ត្រាលី គឺវាមានពិសខ្លាំងបំផុតលើពិភពលោក ។ បើទោះជាពិសរបស់វាពុំអាចឆក់យកជីវិតរបស់មនុស្សក្តី ប៉ុន្តែវាជាមូលហេតុធ្វើឱ្យមនុស្សជាច្រើននាក់ស្លា.ប់ ដោយសារពួកគេពុំអាចទ្រាំឈឺចុកចាប់នឹងពិសនេះ ។

តាមឯកសារបញ្ជាក់ថា ប្រសិនបើអ្នកណាម្នាក់ត្រូវបានបន្លារុក្ខជាតិប្រភេទនេះចោះចូលស្បែក គឺពួកគេមិនអាចដកបន្លារបស់វាបានទេ ហើយបន្លានេះស្រដៀងគ្នានឹងម្ជុលមុតស្រួច ។ ម្ជុលស្រួចទាំងនេះបានដុះនៅពាសពេញដើម និងស្លឹក ហើយវានឹងបញ្ចេញសារធាតុម្យ៉ាងឈ្មោះ Neurotoxic Proteins ដែលនឹងប៉ះពាល់ដល់ប្រព័ន្ធប្រសាទ ។ បើតាមផ្នែកគីមីបញ្ជាក់ថា ពិសរបស់វាស្រដៀងជាមួយពិសសត្វពីងពាង និងខ្យាដំរី ។

អ្នកដែលបានប៉ះពាល់រុក្ខជាតិនេះ នឹងមានអាការៈឈឺចុកចាប់ខ្លាំង ចាប់ពី១ថ្ងៃ ទៅ២ថ្ងៃ បើទោះជាប៉ះពាល់តែបន្តិចក្តី ។ វាអាចបណ្តាលឱ្យឈឺចាប់រយៈពេលខ្លី ឬជាច្រើនខែ ហើយបើនៅត្រង់ស្នាមនោះត្រូវទឹកត្រជាក់ នឹងកាន់តែឈឺខ្លាំងថែមទៀត ។ កន្លងមក មានមនុស្សខ្លះបានធ្វើអត្តឃាតខ្លួនឯង ដោយសារពុំអាចទ្រាំឈឺចាប់ជាមួយពិសនេះ ។ ដូច្នេះ ទើបអាជ្ញាធរអូស្ត្រាលីបានសរសេរស្លាកសញ្ញាហាមភ្ញៀវទេសចរប៉ះពាល់រុក្ខជាតិនេះ ។

ជាទូទៅ គេបានប្រទះឃើញរុក្ខជាតិ Gympie-Gympie ដុះនៅតាមតំបន់ព្រៃទឹកភ្លៀងក្នុងប្រទេសអូស្ត្រាលី និងឥណ្ឌូណេស៊ី ហើយកន្លងមក គេក៏បានយកវាមកតាំងបង្ហាញក្នុងសួនរុក្ខជាតិពុលនៅប្រទេសអង់គ្លេសផងដែរ ព្រមទាំងមានស្លាកសរសេរថា «រុក្ខជាតិនេះអាចសម្លាប់អ្នកបាន» ពីព្រោះវាសម្បូរបន្លាស្រួចច្រើន ។ បើមនុស្ស ឬសត្វប៉ះពាល់វា គឺនឹងមានអារម្មណ៍ថា ដូចត្រូវភ្លើងឆក់ ឬដូចភ្លើងឆេះនៅបរិវេណស្បែក ។

ហេតុនេះ ដោយសាររុក្ខជាតិ Gympie-Gympie មានគ្រោះថ្នាក់ខ្លាំង គេបានដាក់វាក្នុងទូរកញ្ចក់ និងមានអ្នកថែទាំយ៉ាងពិសេស ។ រុក្ខជាតិនេះនឹងចេញផ្កា ពេលវាមានកម្ពស់៣ម៉ែត្រ ហើយដើមវានឹងខ្ពស់រហូតដល់១០ម៉ែត្រ ។ គេបានរកឃើញរុក្ខជាតិនេះដំបូងនៅប្រទេសអូស្ត្រាលី កាលពីឆ្នាំ១៨៦៦ ក្នុងអំឡុងពេលសត្វសេះរបស់ក្រុមអ្នកស្រាវជ្រាវបានដើរជាន់លើវា រយៈពេល២ម៉ោងក្រោយមក វាក៏បានងាប់ ៕