ថ្មីៗនេះគឺមានការបង្ហោះចែកចាយផ្អើលពេញសង្គមប្រទេសភូមា បន្ទាប់ពីបានដឹងបានឃើញថា គ្រោងការណ៍សាងសង់វត្តចេតីយមួយកន្លែងក្នុងប្រទេសថៃបាននឹងកំពុងលេចរូបរាងជាបណ្តើរៗហើយ ខណៈវាគឺដូចគ្នាបេះបិទនឹងវត្តចេតីយរាប់ពាន់ឆ្នាំរបស់ប្រទេសភូមា ទើបជាហេតុបណ្តាលឲ្យមានមតិវែកញែកព្រោងព្រាតនៅក្នុងចំណោមជនជាតិភូមាគ្រប់រូប។

យោងតាមការបង្ហោះនៅលើបណ្តាញសង្គមដោយគណនីមួយដែលមានឈ្មោះថា Soe Zeya Tun ដែលបានភ្ជាប់មកជាមួយនឹងរូបថតប្រមាណ៣សន្លឹក អមជាមួយនឹងចំណងជើងថា « វត្តចេតីយ Shwedagon នឹងបង្ហាញខ្លួនក្នុងពេលឆាប់ៗ»។ តាមរយៈរូបភាពទាំងនោះ គេបានសង្កេតឃើញថា គ្រោងការណ៍សាងសង់វត្តចេតីយមួយកន្លែងស្ថិតក្នុងប្រទេសថៃ(មិនបានបញ្ជាក់ទីតាំង) គឺបាននឹងកំពុងលេចចេញជារូបរាងជាបណ្តើរៗហើយ។

ខណៈដែលរូបរាងនៃវត្តដែលគ្រោងទុកនោះ បានបង្ហាញនៅលើផ្លាកប៉ាណូយ៉ាងធំៗច្បាស់ៗបែបនេះ ទើបបណ្តាលឲ្យមានការខឹងសម្បារ ហាក់ហួសចិត្តជាខ្លាំងនៅក្នុងចំណោមពលរដ្ឋមីយ៉ាងម៉ាដែលបានបញ្ចេញមតិនៅលើបណ្តាញសង្គម ពីព្រោះថាស្ថាបតិយ្យកម្មនេះ គឺវាដូចគ្នាបេះបិទទៅនឹងវត្តចេតីយ Shwedagon Pagoda អាយុកាលជាងរាប់ពាន់ឆ្នាំរបស់ប្រទេសមីយ៉ាន់ម៉ា ដែលមានទីតាំងស្ថិតនៅលើភ្នំ Singuttara កណ្តាលទីក្រុង Yangoon របស់ប្រទេសនេះបច្ចុប្បន្ន។

Shwedagon Pagoda គឺជាទីសក្ការៈបូជាព្រះពុទ្ធសាសនាដ៏ចំណាស់ជាងគេមួយនៅក្នុងប្រទេសមីយ៉ាន់ម៉ា ដែលមានអាយុកាលជាង២៥០០ឆ្នាំមកហើយ (ស.តទី១០-ស.វទី៦ មុនគ.ស)។ វត្តនេះត្រូវធ្វើឡើងពីឥដ្ឋនិងថ្មម៉ាប រួមបញ្ចូលទាំងវត្ថុមានតម្លៃជាច្រើនទៀត ទាំងចេតីយ កូនប្រាសាទតូចៗ និងរូបបដិមាជាច្រើនទៀត ដែលគ្របបណ្តំដោយមាសនិងបន្ទះមាស។ វត្តចេតីយ Shwedagon Pagoda នេះ ត្រូវបានបង្កើតឡើងបម្រើផ្លូវចិត្តនិងអារម្មណ៍ ទាំងជាកន្លែងអធិស្ឋាន អប់រំ សមាធិ បន់ស្រន់ជាដើមផងដែរ។

ទោះជាយ៉ាងណា បើទោះបីជាមានការង្ហោះចែកចាយផ្អើលពេញបណ្តាញសង្គមភូមាបែបនេះក្តី ខណៈការពិតប្រាកដយ៉ាងណានោះ គឺនូវតែមិនទាន់មានការបញ្ជាក់ពីភាគីខាងថៃនៅឡើយនោះទេ។

ជាមួយគ្នានោះ មហាជនមីយ៉ាន់ម៉ាក៏បានចូលទៅបញ្ចេញមតិរិះគន់ ឌឺដងព្រាត ដោយអ្នកខ្លះគឺបានលើកឡើងថា «ជនជាតិថៃតែងតែលួចចម្លងប្រទេសភូមា ចំណែកជនជាតិភូមា រមែង Follow តាមស្តាយ៍ថៃ»។ អ្នកខ្លះថា «ដោយសារតែមីយ៉ាន់ម៉ាគឺជាប្រទេសអច្ឆរិយៈ ខណៈថៃគឺជាប្រទេសពូកែខាងលួចចម្លងតាំងអើយរៀងមក»។ អ្នកខ្លះថា«ថៃមានជំនាញខាងលួចម្លងបានល្អខ្លាំងណាស់»។ អ្នកខ្លះថា«នៅថ្ងៃបន្ទាប់ សម្រាប់ភ្ញៀវទេសចរអន្តរជាតិដែលចង់មកទស្សនាវត្តចេតីយនេះ ប្រហែលគេមិនមកមីយ៉ាន់ម៉ាទៀតទេ»៕

បរទេស៖ ក្រុមហ៊ុន American Auto Industr ថ្មីៗនេះបានប្រាប់សារព័ត៌មានបរទេសមួយថា ខ្លួនគ្រោងផលិតរថយន្តសាកថ្មម្តងជិះបានមួយជីវិត ដែលរថយន្តនោះមានឈ្មោះថា Thorium។
Thorium គឺជាធាតុស្រដៀងទៅនឹងសារធាតុអ៊ុយរ៉ាញ៉ូម ដោយសារតែវាជាវត្ថុធាតុក្រាស់ មានសក្តានុពលក្នុងការផលិតកំដៅក្នុងបរិមាណដ៏ច្រើន ក្រុមហ៊ុនគ្រោងនឹងយកសារធាតុនេះទៅផលិតជារថយន្ត។ ដូច្នេះ Thorium មួយក្រាមផលិតថាមពលច្រើនជាង ២៨,០០០ លីត្រនៃប្រេងឥន្ធនៈ។ ហេតុនេះត្រឹមតែ ៨ ក្រាមនៃ thorium នឹងគ្រប់គ្រាន់ដើម្បីផ្តល់ថាមពលដល់យានយន្តពេញមួយជីវិតរបស់វា។

យោងតាមនាយកប្រតិបត្តិរបស់ក្រុមហ៊ុននេះគឺលោក Charles Stevens បាននិយាយថា ប្រសិនបើយើងជោគជ័យក្នុងការផលិតនោះ Thorium នឹងក្លាយជារថយន្តដំបូងបង្អស់របស់ពិភពលោកដែលមានសមត្ថភាពអស្ចារ្យបំផុតមិនធ្លាប់មាន ដោយសារការសាកថ្មម្តងជិះបានមួយសតវត្ស។

នៅក្នុងបទសម្ភាសន៍ជាមួយ Ward’s Auto នាយកប្រតិបត្តិរូបនេះបានពន្យល់ថា បំណែកតូចៗនៃ thorium ត្រូវបានប្រើដើម្បីបង្កើតកំដៅ ហើយត្រូវបានគេដាក់ទីតាំងដើម្បីបង្កើតឡាស៊ែរ thorium ។ ឡាស៊ែរកំដៅទឹកនេះនឹងផលិតចំហាយទឹក ក៏ដូចជាផ្តល់ថាមពលជាស៊េរីនៃទួរប៊ីនខ្នាតតូច។ ហេតុនេះបច្ចុប្បន្នក្រុមហ៊ុនកំពុងបង្កើតវិធីសាស្រ្តនៃការជំរុញសារធាតុ thorium ដើម្បីផលិតអគ្គិសនីនិងផ្តល់ថាមពលដល់ម៉ាស៊ីនរថយន្ត។

លោក Stevens បានបន្តទៀតថាម៉ាស៊ីននេះនឹងមានទម្ងន់ប្រហែល ២២៧ គីឡូក្រាម មានពន្លឺគ្រប់គ្រាន់ សម្រាប់ដាក់នៅក្រោមដំបូលរបស់រថយន្ត។ ប្រសិនបើរយន្តនេះផលិតបានជោគជ័យ នោះវានឹងក្លាយជាបច្ចេកវិទ្យាជំនួសសម្រាប់ម៉ាស៊ីនចំហេះខាងក្នុង ដោយសារ thorium ស្មើនឹងប្រហែល ៧៣៥០ លីត្រនៃឧស្ម័ន។ បច្ចេកវិទ្យាតូច ទម្ងន់ស្រាល កម្លាំងខ្លាំង និងគ្មានការបំភាយឧស្ម័ន តម្លៃសមរម្យ ងាយស្រួលក្នុងការថែទាំ នឹងក្លាយជាការពេញនិយមខ្លាំងនាពេលអនាគត។

ទោះជាយ៉ាងណានេះគ្រាន់តែជាគម្រោងមិនទាន់បានផលិតជាផ្លូវការនោះទេ។ គំនិតនៃការបង្កើតរថយន្តដោយប្រើថាមពល thorium មិនមែនជាគំនិតថ្មីនោះទេ គំនិតនេះកើតចេញតាំងពីឆ្នាំ ២០០៩ មកម្លេះ។ ដូច្នេះហើយតើប្រិយមិត្តគិតយ៉ាងម៉េចដែរនៃគំនិតបង្កើតរថយន្តសាកថ្មម្តងជិះបានមួយជីវិត តើប្រិយមិត្តគិតថាក្រុមហ៊ុននេះអាចទៅរួចដែរឬទេ?

សហរដ្ឋអាមេរិក ៖ អាមេរិក និងប្រទេសមួយចំនួននៅអឺរ៉ុបបានព្យាយាមហាមឃាត់ TikTok ជាបន្តបន្ទាប់ ពីព្រោះប្រទេសទាំងនេះបារម្ភពីបញ្ហាសន្តិសុខជាតិ និងការបញ្ជូនទិន្នន័យផ្ទាល់ខ្លួនរបស់អ្នកប្រើប្រាស់ទៅឱ្យរដ្ឋាភិបាលចិន ។ ប៉ុន្តែបណ្តាញសង្គម TikTok នៅតែទទួលបានការពេញនិយមពីយុវជនអាមេរិក ទើបធ្វើឱ្យមេដឹកនាំអាមេរិកប្រើប្រាស់កម្មវិធីនេះដើម្បីប្រមូលសំឡេងឆ្នោតពីយុវជន ។

កាលពីថ្ងៃទី២ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា អតីតប្រធានាធិបតីអាមេរិកបានចាប់ផ្តើមប្រើប្រាស់បញ្ជី TikTok ជាផ្លូវការដើម្បីប្រមូលសំឡេងឆ្នោតពីក្រុមយុវជន មុនពេលអាមេរិកបោះឆ្នោតជ្រើសរើសប្រធានាធិបតីអាណត្តិថ្មី នៅខែវិច្ឆិកា ឆ្នាំ២០២៤ ។

សារព័ត៌មានបរទេសបានរាយការណ៍ពីទីក្រុងវ៉ាស៊ីនតោន សហរដ្ឋអាមេរិកថា លោក ដូណាល់ ត្រាំ អតីតប្រធានាធិបតីអាមេរិកបានបើកបញ្ជី TikTok ឈ្មោះថា «@realdonaldtrump» ហើយការបង្ហោះវីដេអូដំបូងរបស់លោកមានអ្នកចូលទស្សនារហូតដល់ជាង២លានលើក ក្រោយពេលលោកបង្ហោះមិនយូរប៉ុន្មាន ។

ការបើកគណនី TikTok របស់អតីតប្រធានាធិបតីអាមេរិក គឺក្នុងគោលបំណងប្រមូលសំឡេងឆ្នោតពីក្រុមយុវជន ស្របពេលអាមេរិកហាមឃាត់បណ្តាញសង្គមមួយនេះ ព្រោះបារម្ភពីផលប៉ះពាល់ដល់សន្តិសុខជាតិ មុនពេលអាមេរិករៀបចំការបោះឆ្នោតនៅថ្ងៃទី៥ ខែវិច្ឆិកា ឆ្នាំ២០២៤ ។ លោក ដូណាល់ ត្រាំ មកពីគណបក្ស Republican នឹងប្រជែងយកតំណែងជាប្រធានាធិបតីអាមេរិកអាណត្តិថ្មីពីលោក ចូ បៃដិន ជាប្រធានាធិបតីអាមេរិកបច្ចុប្បន្នមកពីគណបក្ស Democrats ។

លោក ចូ បៃដិន ក៏បានប្រើប្រាស់ TikTok ដើម្បីប្រមូលសំឡេងឆ្នោតពីក្រុមយុវជនដូចគ្នាដែរ ហើយបញ្ជី TikTok របស់លោកឈ្មោះ @bidenhq ។ ទោះយ៉ាងណា កាលពីខែមេសា ឆ្នាំ២០២៤ សភាអាមេរិកបានអនុម័តច្បាប់ការពារពលរដ្ឋដែលប្រើប្រាស់បណ្តាញសង្គមគ្រប់គ្រងដោយសត្រូវបរទេស គឺការបង្កើតច្បាប់ហាមឃាត់ TikTok ។

ច្បាប់របស់អាមេរិកចែងថា Byte Dance គឺជាក្រុមហ៊ុនមេរបស់ TikTok ដែលមានស្នាក់ការកណ្តាលនៅទីក្រុងប៉េកាំង ប្រទេសចិន ត្រូវតែបញ្ឈប់គ្រប់គ្រងបណ្តាញសង្គមនេះក្នុងរយៈពេល៩ខែ គិតចាប់ពីច្បាប់ចូលជាធរមាន ។

បើទោះជាមានការពន្យារពេលឱ្យ TikTok ចំនួន៣ខែទៀត បើដំណើរការទិញ-លក់ពុំទាន់រួចរាល់ ប៉ុន្តែករណីគ្មានការចាត់វិធានការក្នុងរយៈពេលកំណត់ទេនោះ TikTok នឹងពុំអាចចូលមកអាមេរិកបានទៀតទេ ។ ខ្លឹមសារច្បាប់អាមេរិកបញ្ជាក់ថា ដោយសារមូលហេតុសន្តិសុខជាតិ ពីព្រោះចិនអាចដឹងព័ត៌មានផ្ទាល់ខ្លួនរបស់ពលរដ្ឋអាមេរិកតាមរយៈ TikTok ៕

ប្រទេសអារ៉ាប៊ីសាអូឌីត ៖ ដុំថ្មដ៏ធំមួយឈ្មោះ Al Naslaa មានអាយុកាល៤.០០០ឆ្នាំ ស្ថិតនៅទីក្រុង Tayma Oasis ប្រទេសអារ៉ាប៊ីសាអូឌីត ត្រូវបានកាត់ផ្តាច់ចេញពីគ្នាជា២កំណាត់ យ៉ាងស្មើត្រឹមដូចបន្ទាត់ ។ មតិមួយចំនួនលើកឡើងថា ថ្មនេះត្រូវបានកាត់ដោយពន្លឺឡាស៊ែរ ដែលប្រើប្រាស់បច្ចេកវិទ្យាខ្ពស់ដូចក្នុងខ្សែភាពយន្ត ។

រូបភាពដុំថ្ម Al Naslaa បានធ្វើឱ្យមានការជជែកវែកញែកគ្នាក្នុងបណ្តាញសង្គមកាលពីឆ្នាំ២០២១ អំពីមូលហេតុដែលបណ្តាលឱ្យថ្មត្រូវកាត់ផ្តាច់ជា២ផ្នែកស្មើដូចបន្ទាត់ ហើយអ្នកលេងបណ្តាញសង្គមបានបញ្ចេញមតិផ្សេងៗគ្នាពាក់ព័ន្ធនឹងថ្មនេះ ។ ដុំថ្មខាងលើមានកម្ពស់ប្រមាណ៦ម៉ែត្រ និងមានទទឹង៩ម៉ែត្រ ហើយនៅលើថ្មមានស្នាមឆ្លាក់អាថ៌កំបាំង និងរូបភាពផ្សេងៗផងដែរ ។

ចំណែកចំណុចទាក់ទាញបំផុតរបស់ថ្ម Al Naslaa គឺវាស្នាមកាត់ផ្តាច់ចេញពីគ្នាស្មើដូចបន្ទាត់ រហូតដល់គេពុំជឿថា នេះជាស្នាដៃរបស់មនុស្សសម័យបុរាណ ។ ហេតុនេះ មតិមួយចំនួនលើកឡើងថា អាចជាស្នាដៃរបស់មនុស្សក្រៅភព ក៏ថាបាន ។

ប៉ុន្តែបើបកស្រាយតាមគោលការណ៍វិទ្យាសាស្ត្រ គឺមានទ្រឹស្តីជាច្រើនខុសៗគ្នា ហើយខាងក្រោមនេះ គ្រាន់តែជាទ្រឹស្តីខ្លះៗប៉ុណ្ណោះ ៖

-ទ្រឹស្តីទី១ ៖ ថ្មនេះបានកាត់ផ្តាច់ពីគ្នាតាមធម្មជាតិ ដោយកាលពីដំបូង វាគ្រាន់តែជាស្នាមដាច់ពីគ្នាតូចៗប៉ុណ្ណោះ ។ ប៉ុន្តែក្រោយមក ខ្យល់ និងខ្សាច់ ក៏បានបក់ចូលក្នុងស្នាមដាច់នេះអស់រយៈពេលរាប់ពាន់ឆ្នាំ ធ្វើឱ្យថ្មកាត់ផ្តាច់ពីគ្នាគ្រប់ពេលវេលា ។ ដូច្នេះ វាបានដាច់ពីគ្នាយ៉ាងស្មើត្រឹមដូចគេបានឃើញសព្វថ្ងៃនេះ ។

-ទ្រឹស្តីទី២ ៖ ស្នាមកាត់ផ្តាច់របស់ថ្មកើតឡើងដោយសារស្នាដៃរបស់មនុស្ស ហើយពួកគេជាអ្នកឆ្លាក់រូបស្អាតៗនៅលើថ្ម ។ ហេតុនេះ វាអាចជាការបង្ហាញពីផ្នែកសិល្បៈនៅសម័យបុរាណ ។

បើទោះជាអ្នកស្រាវជ្រាវជាច្រើនបានបញ្ចេញយោបល់ផ្សេងៗគ្នាក្តី ប៉ុន្តែរហូតមកដល់បច្ចុប្បន្ននេះ (ឆ្នាំ២០២៤) គ្មានអ្នកណាម្នាក់ដឹងថា តើថ្មនេះកាត់ផ្តាច់ពីគ្នាដោយរបៀបណាទេ ។ ដូច្នេះ មនុស្សខ្លះជឿថា វាត្រូវបានកាត់ផ្តាច់ដោយសារការប្រើប្រាស់បច្ចេកវិទ្យាខ្ពស់នៅសម័យនោះ និងពុំធ្លាប់បានកត់ត្រាទុក ៕

ប្រទេសអ៊ីស្លង់ ៖ រូបភាពដែលយើងបានឃើញនេះមិនមែនជារូបកាត់តទេ ប៉ុន្តែវាជារូបលំនៅឋានពិតប្រាកដ ដែលឯកោបំផុតស្ថិតនៅលើកោះ Ellioaey ជាកោះដាច់ស្រយាលមួយនៅភាគខាងត្បូងប្រទេសអ៊ីស្លង់ ។ រូបភាពលំនៅឋាននេះធ្លាប់ជាប្រធានបទមួយជជែកវែកញែកគ្នាយ៉ាងខ្លាំងក្នុងបណ្តាញសង្គម កាលពីឆ្នាំ២០១០ ។

ចំណុចទាក់ទាញរបស់កោះ Ellioaey គឺនៅលើកោះមានលំនៅឋានតែមួយប៉ុណ្ណោះ រហូតដល់ក្លាយជាចំណុចលេចធ្លោ និងមានលក្ខណៈខុសប្លែកពីបណ្តាកោះផ្សេងទៀត ។ នៅពេលរូបភាពកោះត្រូវបានផ្សព្វផ្សាយក្នុងបណ្តាញសង្គមលើកដំបូងឃើញថា មានមនុស្សជាច្រើនបានរៀបរាប់រឿងរ៉ាវពាក់ព័ន្ធនឹងទីកន្លែងនេះ ។

មតិមួយចំនួនលើកឡើងថា លំនៅឋានមួយខ្នងនេះសាងសង់ឡើងដោយមហាសេដ្ឋីមានប្រាក់រាប់លានដុល្លារ ។ មហាសេដ្ឋីរូបនេះមានគម្រោងផ្លាស់ប្តូរទីលំនៅមករស់នៅលើកោះ នៅពេលថ្ងៃអវសានពិភពលោកមកដល់ ពីព្រោះជឿថា មិនយូរទៀតទេ ពិភពលោកទាំងមូលនឹងរលាយដោយសារតែមេរោគ Zombie ។

ចំណែកមតិផ្សេងទៀតថា លំនៅឋាននេះគ្មានពិតប្រាកដទេ ប៉ុន្តែវាជារូបភាពកាត់តប៉ុណ្ណោះ ។ រីឯការលើកឡើងដែលគេជឿជាក់ច្រើនបំផុត គឺរដ្ឋាភិបាលអ៊ីស្លង់បានប្រគល់កោះនេះជារង្វាន់ដល់តារាចម្រៀងម្នាក់ ប៉ុន្តែក្រោយមក រដ្ឋាភិបាលអ៊ីស្លង់ក៏បានបដិសេធចំពោះការលើកឡើងខាងលើ ។

តើកោះនេះមានប្រវត្តិដូចម្តេចខ្លះ? កាលពីប្រមាណ៣០០ឆ្នាំមុន កោះ Ellioaey ដែលស្ថិតនៅក្បែរកោះជាច្រើនទៀត ធ្លាប់មានមនុស្សរស់នៅ ហើយពួកគេប្រកបមុខរបររកត្រី, បាញ់សត្វស្លាប និងចិញ្ចឹមគោ ។ ប៉ុន្តែនៅឆ្នាំ១៩៣០ អ្នករស់នៅលើកោះចុងក្រោយគេបានបោះបង់កោះចោល ទើបវាក្លាយជាកោះស្ងាត់ជ្រងំ និងគ្មានមនុស្សរស់នៅរហូតដល់ពេលបច្ចុប្បន្ន (ឆ្នាំ២០២៤) ។

ចំណែកលំនៅឋានតែមួយគត់នៅលើកោះ គឺមិនពាក់ព័ន្ធនឹងការលើកឡើងខាងលើទេ ។ បើទោះជាលំនៅឋាននេះស្ថិតនៅឆ្ងាយពីទីប្រជុំជន គ្មានអគ្គិសនី និងគ្មានទឹកម៉ាស៊ីនប្រើប្រាស់ដូចលំនៅឋានក្នុងទីក្រុងក្តី ប៉ុន្តែលំនៅឋានត្រូវបានរចនាម៉ូដយ៉ាងស្អាត មានប្រព័ន្ធស្តុកទឹកភ្លៀង, មានរបងជុំវិញ និងនៅក្បែរសំបុក្រសត្វស្លាបសមុទ្រទៀតផង ។

ក្រៅពីនេះ មានអ្នកភូមិជាច្រើនគ្រួសារបានរស់នៅលើកោះក្បែរៗ ប៉ុន្តែក្រោយមក ពួកគេក៏បានផ្លាស់ប្តូរទីលំនៅចេញពីកោះទៅរស់នៅទីក្រុងវិញ ដោយសារកោះនៅឆ្ងាយពីទីប្រជុំជន និងគ្មានការអភិវឌ្ឍ ។

លំនៅឋាននេះបានសាងសង់ឡើងកាលពីឆ្នាំ១៩៥០ ដោយសមាគមបរបាញ់សត្វនៅលើកោះ Ellioaey ដើម្បីធ្វើជាកន្លែងសម្រាកក្នុងអំឡុងពេលពួកគេមកបាញ់សត្វស្លាបនៅលើកោះ ។ ក្រោយមក កោះ Ellioaey ត្រូវបានគេដាក់ឱ្យស្ថិតក្រោមការគ្រប់គ្រងរបស់ឧទ្យានជាតិតាមច្បាប់ និងធ្វើជាកោះទេសចរណ៍ ទើបធ្វើឱ្យពួកបាញ់សត្វស្លាបពុំអាចត្រឡប់មកទីនេះទៀតទេ ៕