BTS បង្កើតប្រវត្តិសាស្រ្តនៅប្រទេសម៉ិកស៊ិក

ប្រវត្តិសាស្ត្រថ្មីត្រូវបានបង្កើតឡើងសម្រាប់ក្រុមចម្រៀង BTS ដែលបានក្លាយជាសិល្បករ Kpop ដំបូងគេបានជួបជាមួយប្រធានាធិបតីម៉ិកស៊ិកហើយទទួលបានសិទ្ធិពិសេសក្នុងការរៀបចំកម្មវិធីជួបជុំអ្នកគាំទ្រសម្រាប់មនុស្ស ៥០,០០០ នាក់នៅឯវិមានជាតិ។

នៅថ្ងៃទី៧ ខែឧសភា ទីភ្នាក់ងារសារព័ត៌មានបានរាយការណ៍ថា ក្រុមចម្រៀង K-pop BTS មានកិត្តិយសបានជួបជាមួយប្រធានាធិបតីម៉ិកស៊ិកលោកស្រី Claudia Sheinbaum នៅវិមានជាតិ។ នៅក្នុងព្រឹត្តិការណ៍នោះ ប្រធានាធិបតីម៉ិកស៊ិកបានសរសើរសមិទ្ធផលតន្ត្រីរបស់ BTS និងឥទ្ធិពលរបស់ពួកគេទៅលើយុវជនទូទាំងពិភពលោក និងជាពិសេសនៅក្នុងប្រទេសម៉ិកស៊ិក។

ប្រធានាធិបតីរូបនេះបានបញ្ជាក់ពីទំនាក់ទំនងរបស់ BTS ទៅនឹងតម្លៃវិជ្ជមានថា «ខ្ញុំមានសេចក្តីសោមនស្សរីករាយក្នុងការស្វាគមន៍ក្រុមចម្រៀងដ៏ពេញនិយមបំផុតមួយក្នុងចំណោមយុវជនម៉ិកស៊ិក។ BTS គឺជាក្រុមចម្រៀងមួយដែលតែងតែបង្ហាញសារនៃមិត្តភាព សន្តិភាព និងសេចក្តីស្រឡាញ់។ តន្ត្រី និងតម្លៃវិជ្ជមានរបស់ពួកគេបានជំរុញមិត្តភាពរវាងម៉ិកស៊ិក និងកូរ៉េខាងត្បូង»។ ប្រធានាធិបតីម៉ិកស៊ិកក៏បានសម្តែងក្តីសង្ឃឹមថា BTS នឹងធ្វើការប្រគំតន្ត្រីបន្ថែមទៀតនៅក្នុងប្រទេសរបស់ខ្លួននាពេលអនាគត។

តាមរបាយការណ៍បានឱ្យដឹងថា BTS គឺជាក្រុមចម្រៀងកូរ៉េតែមួយគត់ដែលមានកិត្តិយសបានជួបជាមួយប្រធានាធិបតីម៉ិកស៊ិក Claudia Sheinbaum និងចូលទៅក្នុងព្រះបរមរាជវាំងបន្ទាប់ពីបានធ្វើការប្រគំតន្ត្រីនៅក្នុងប្រទេស។ ក្រៅពីបានជួបជាមួយប្រធានាធិបតីម៉ិកស៊ិក BTS ក៏ទទួលបានឯកសិទ្ធិដែលមិនធ្លាប់មានពីមុនមកក្នុងការប្រាស្រ័យទាក់ទងជាមួយអ្នកគាំទ្រចំនួន ៥០,០០០នាក់នៅ Zócalo Square។ នៅពេលដែលសមាជិកក្រុម K-pop បានបោះជំហានចេញទៅលើយ៉រព្រះបរមរាជវាំង គ្រវីដៃ និងស្វាគមន៍អ្នកគាំទ្រដែលកំពុងរង់ចាំ បានបង្កើតឈុតឆាកដ៏គួរឱ្យចងចាំមួយ។

កិច្ចប្រជុំរបស់ពួកគេជាមួយប្រធានាធិបតីម៉ិកស៊ិក និងការប្រាស្រ័យទាក់ទងជាមួយអ្នកគាំទ្រចំនួន ៥០,០០០ នាក់នៅ Zócalo Square ត្រូវបានផ្សាយផ្ទាល់នៅលើបណ្តាញប្រព័ន្ធផ្សព្វផ្សាយម៉ិកស៊ិកជាច្រើន។ ពីមុន នៅពេលដែល BTS បានប្រកាសថាពួកគេនឹងធ្វើការប្រគំតន្ត្រីចំនួនបីនៅក្នុងប្រទេសម៉ិកស៊ិកជាផ្នែកមួយនៃដំណើរទេសចរណ៍ពិភពលោក ARIRANG របស់ពួកគេប្រធានាធិបតី Claudia បានហៅវាថាជា «ព្រឹត្តិការណ៍ប្រវត្តិសាស្ត្រ» ពីព្រោះយុវជនម៉ិកស៊ិកបានរង់ចាំជាយូរមកហើយសម្រាប់ BTS ដើម្បីសម្តែងនៅក្នុងប្រទេស៕