ប្រទេសតួកគី ៖ កាលពីថ្ងៃទី៣ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ពលរដ្ឋតួកគីរាប់ពាន់នាក់បានប្រមូលផ្តុំគ្នានៅទីក្រុង Istanbul ដើម្បីបង្ហាញការមិនពេញចិត្តចំពោះគម្រោងសម្លា.ប់ ឆ្កែអនាថានៅទូទាំងប្រទេសរបស់រដ្ឋាភិបាល ។ រដ្ឋាភិបាលបានចេញសេចក្តីព្រាងច្បាប់ថ្មីមួយដើម្បីចាប់ក្រៀវឆ្កែអនាថានៅតាមផ្លូវ ព្រមទាំងកម្ចា.ត់ពួកវា ប្រសិនបើគ្មានអ្នកណាយកទៅចិញ្ចឹមក្នុងរយៈពេល៣០ថ្ងៃ ។

គម្រោងកម្ចាត់ឆ្កែអនាថានៅទូទាំងប្រទេសនេះ បានធ្វើឱ្យពលរដ្ឋតួកគីជាច្រើននាក់មិនពេញចិត្ត និងប្រមូលផ្តុំគ្នាតវ៉ានៅទីក្រុង Istanbul ។ ពួកគេបានកាន់ស្លាករូបភាពឆ្កែដែលមានទឹកមុខគួរឱ្យអាណិតអាសូរ ដើម្បីប្រឆាំងនឹងគម្រោងរបស់រដ្ឋាភិបាល ។ អ្នកតវ៉ាម្នាក់និយាយថា ៖ «បញ្ហានេះប៉ះពាល់យ៉ាងខ្លាំងដល់សត្វ ហើយវាជាច្បាប់ឃាតកម្ម ។ ខ្ញុំយល់ថា បន្ទាប់ពីរដ្ឋាភិបាលកម្ចាត់ឆ្កែអនាថាអស់ហើយ គឺអាចនឹងកម្ចាត់ឆ្មាបន្តទៀត» ។

គណបក្សយុត្តិធម៌ និងការអភិវឌ្ឍ ដែលជាគណបក្សរដ្ឋាភិបាលរបស់ប្រធានាធិបតីតួកគី លោក Recep Tayyip Erdogan បញ្ជាក់ថា ការធ្វើវិសោធនកម្មច្បាប់ខាងលើនេះ គឺមានភាពចាំបាច់ដើម្បីកាត់បន្ថយចំនួនឆ្កែអនាថាក្នុងប្រទេស និងបញ្ឈប់ពួកវាកុំឱ្យធ្វើបាបមនុស្សបន្តទៀត ។

រដ្ឋាភិបាលអះអាងថា ប្រទេសតួកគីមានឆ្កែអនាថាសរុបប្រមាណ៤លានក្បាល ហើយក្នុងរយៈពេល៥ឆ្នាំកន្លងមកនេះ ពួកវាធ្វើឱ្យកើតគ្រោះថ្នាក់នៅតាមផ្លូវចំនួន៣.៥៤៤លើក ។ លើសពីនេះ វាជាមូលហេតុធ្វើឱ្យមនុស្សស្លាប់ចំនួន៥៥នាក់ និងរងរបួសជាង៥.០០០នាក់ទៀត ។ រីឯអង្គការសុខភាពពិភពលោក (WHO) បានកំណត់ថា តួកគី គឺជាប្រទេសមានគ្រោះថ្នាក់យ៉ាងខ្លាំងដោយសារជំងឺឆ្កែឆ្កួត ។

ចំណែកលោក Heydar Ozkan អនុប្រធានសហព័ន្ធសិទ្ធិសត្វនៅប្រទេសតួកគី លើកឡើងថា រដ្ឋាភិបាលដោះស្រាយបញ្ហាពុំចំគោលដៅទេ រដ្ឋាភិបាលគួរតែផ្តល់ភាពសំខាន់លើការក្រៀវសត្វ និងរកទីកន្លែងសង្គ្រោះសត្វ វានឹងមានប្រសិទ្ធភាពជាងកម្ចាត់ពួកវា ៕

បរទេស៖ ប្រទេសសិង្ហបុរីបានចាប់ផ្តើមពង្រីករមណីយដ្ឋានកាស៊ីណូលំដាប់ខ្ពស់ចំនួនពីរចាប់ពីចុងឆ្នាំនេះ ដើម្បីទាក់ទាញភ្ញៀវអន្តរជាតិ។
យោងតាម Nikkei Asia នៅពេលដែលនាយករដ្ឋមន្ត្រីសិង្ហបុរីថ្មី លោក Lawrence Wong ចូលកាន់តំណែងក្នុងខែឧសភា លោកបានផ្តោតលើការអភិវឌ្ឍន៍រមណីយដ្ឋាន និងកាស៊ីណូ ដើម្បីទាក់ទាញភ្ញៀវទេសចរ និងជំរុញសេដ្ឋកិច្ចរបស់ប្រទេសកោះនេះ។ លោកបានមើលឃើញថាមានការកើនឡើងនូវប្រាក់ចំណូលពីហ្គេមនៅប្រទេសសិង្ហបុរី ដូច្នេះនាយករដ្ឋមន្ត្រីនឹងចាប់ផ្តើមជាមួយគម្រោងពង្រីកទ្រង់ទ្រាយធំចំនួនពីរ ដែលមានតម្លៃវិនិយោគសរុបជាង ១០ ពាន់លាន SGD (ប្រមាណ ៧.៤ ពាន់លានដុល្លារអាមេរិក)។

ក្នុងឆ្នាំ ២០១០ ប្រទេសសិង្ហបុរីបានបើករមណីយដ្ឋានកាស៊ីណូរួមបញ្ចូលគ្នាចំនួនពីរជាលើកដំបូង ដើម្បីជំរុញទេសចរណ៍ និងនាំមកនូវអត្ថប្រយោជន៍សេដ្ឋកិច្ច “ដ៏សំខាន់”។ បន្ទាប់មកក្នុងឆ្នាំ ២០១៩ ក្រសួងពាណិជ្ជកម្ម និងឧស្សាហកម្មបាននិយាយថា រមណីយដ្ឋានទាំងពីរ បានរួមចំណែក ១-២% នៃផលិតផលក្នុងស្រុកសរុបប្រចាំឆ្នាំ។ ចំនួនភ្ញៀវអន្តរជាតិទៅកាន់ប្រទេសសិង្ហបុរីក៏បានកើនឡើងទ្វេដងផងដែរដល់ ១៩.១ លាននាក់ក្នុងឆ្នាំដដែល បន្ទាប់ពីរយៈពេល ១០ ឆ្នាំ។ ហេតុនេះហើយ នាយករដ្ឋមន្ត្រីសិង្ហបុរីថ្មី លោក Lawrence Wong នឹងចាប់ផ្តើមពង្រីករមណីយដ្ឋានកាស៊ីណូរួមបញ្ចូលគ្នាចំនួនពីរជាលើកទីពីរ ក្នុងគោលបំណងតែមួយគឺដើម្បីទាក់ទាញភ្ញៀវទេសចរ និងជំរុញសេដ្ឋកិច្ច។

Genting Singapore ដែលជាក្រុមហ៊ុនគ្រប់គ្រងដោយម៉ាឡេស៊ីដែលដំណើរការ Resorts World Sentosa នឹងដេញថ្លៃកិច្ចសន្យាសាងសង់សម្រាប់សណ្ឋាគារថ្មីនៅក្នុងខែកញ្ញា ដោយការសាងសង់រំពឹងថានឹងចាប់ផ្តើមនៅចុងឆ្នាំនេះ។ សណ្ឋាគារទាំងពីរនេះត្រូវបានគេប៉ាន់ស្មានថាមានបន្ទប់ចំនួន ៧០០ ។ ហើយរមណីយដ្ឋានដែលនៅសេសសល់ Marina Bay Sands នឹងបន្ថែមអគារសណ្ឋាគារទីបួន ដោយចាប់ផ្តើមសាងសង់នៅខែកក្កដា ឆ្នាំ ២០២៥ ជាមួយនឹងសង្វៀនថ្មីដែលមានទំហំ ១៥,០០០ កៅអី គម្រោងនេះត្រូវបានគេរំពឹងថានឹងបញ្ចប់នៅឆ្នាំ ២០២៩។ ផ្នែកកាស៊ីណូ ដែលជាប្រភពចំណូលសំខាន់សម្រាប់រមណីយដ្ឋានទាំងពីរនេះ ក៏នឹងត្រូវបានពង្រីកផងដែរ។

Marina Bay Sands បានពង្រីកផ្ទៃដីរបស់ខ្លួន ២,០០០ ម៉ែត្រការ៉េ ហើយ Genting ក៏បានបង្កើនវា ៥០០ ម៉ែត្រការ៉េបន្ថែមទៀត។ ការចំណាយលើការវិនិយោគសម្រាប់ការពង្រីកពី ៤.៥ ពាន់លាន SGD កើនឡើងទ្វេដងដោយសារតែអតិផរណា។ ដើមទុនវិនិយោគរបស់ Genting ក៏បានកើនឡើងទ្វេដងផងដែរដល់ ៦.៨ ពាន់លាន SGD (ប្រមាណ ៥ ពាន់លានដុល្លារអាមេរិក)។ មិនត្រឹមតែសិង្ហបុរីទេ ថៃបច្ចុប្បន្នក៏កំពុងពិចារណាធ្វើឱ្យកាស៊ីណូស្របច្បាប់ដើម្បីទាក់ទាញអតិថិជនផងដែរ៕

ប្រទេសឥណ្ឌា ៖ មនុស្សភាគច្រើនធ្លាប់បានឮថា បើចង់សាកល្បងឡើងភ្នំដ៏មានគ្រោះថ្នា.ក់ បំផុតនៅលើពិភពលោក គឺភ្ញៀវទេសចរអាចឡើងភ្នំហួសាន នៅប្រទេសចិន ។ ប៉ុន្តែភ្នំមួយស្ថិតនៅប្រទេសឥណ្ឌា ក៏មានគ្រោះថ្នា.ក់ ខ្លាំងមិនចាញ់ភ្នំនៅចិនឡើយ ហើយភ្ញៀវទេសចរភាគច្រើនពុំបានឡើងទៅដល់កំពូលភ្នំទេ ។ បើសម្លឹងពីចម្ងាយឃើញថា កំពូលភ្នំនេះមិនខុសគ្នាពីបង្គោលថ្មដ៏ខ្ពស់ទេ ប៉ុន្តែបើសម្លឹងមើលជិតៗនឹងឃើញជណ្តើរឡើងទៅលើភ្នំជាច្រើនជាន់ ។

ភ្នំនេះឈ្មោះថា Kalavantin Durg មានកម្ពស់៧០០ម៉ែត្រពីនីវ៉ូទឹកសមុទ្រ និងស្ថិតនៅមិនឆ្ងាយពីទីក្រុងបុមបៃប៉ុន្មានទេ ។ រីឯជណ្តើរឡើងទៅកាន់កំពូលភ្នំ គឺមានសភាពចោតខ្លាំង គ្មានបង្កាន់ដៃ និងរអិលនៅពេលភ្លៀងធ្លាក់ ។

បើតាមជំនឿបុរាណរបស់ជនជាតិឥណ្ឌាឱ្យដឹងថា ការធ្វើជណ្តើរឡើងទៅលើកំពូលភ្នំនេះ គឺដើម្បីគោរពដល់ព្រះមហាក្សត្រី១អង្គ ព្រះនាម Kalavantin ទើបការធ្វើដណ្តើរឡើង-ចុះភ្នំមានលក្ខណៈតូចចង្អៀត គ្មានបង្កាន់ដៃចាប់ ហើយធ្វើឱ្យអ្នកឃើញជណ្តើរនេះមានអារម្មណ៍ញ័រជើង ។ ប៉ុន្តែប្រសិនបើពួកគេអត់ធ្មត់ឡើងឱ្យដល់កំពូលភ្នំនោះ គឺនឹងបានឃើញទេសភាពយ៉ាងស្រស់ស្អាត ដែលកម្រមានអ្នកឡើងទៅដល់ ។

ការឡើងជណ្តើរទៅកាន់កំពូលភ្នំ Kalavantin Durg អាចចំណាយពេលប្រមាណ៣ម៉ោង ហើយដោយសារជណ្តើរមានសភាពតូចចង្អៀត ចោតខ្លាំង និងរអិល វាធ្វើឱ្យភ្ញៀវទេសចរងាយនឹងកើតគ្រោះថ្នាក់ ។ លើសពីនេះ បើពួកគេឡើងកាន់តែជិតដល់កំពូលភ្នំ នឹងកាន់តែមានគ្រោះថ្នាក់ទ្វេដង ប៉ុន្តែភ្ញៀវទេសចរអាចសម្រាក និងថតរូបបាននៅពេលឡើងលើភ្នំបានកម្ពស់៣៩០ម៉ែត្រ ។

ភ្ញៀវទេសចរភាគច្រើនពុំបានឡើងទៅដល់កំពូលភ្នំទេ ហើយពួកគេសម្រេចចិត្តឈប់នៅចំណុចជិតដល់កំពូលភ្នំ ដោយសារជណ្តើរនៅជិតកំពូលភ្នំមានគ្រោះថ្នាក់ខ្លាំង ។ បើទោះជាពុំអាចឡើងទៅដល់កំពូលភ្នំក្តី ក៏ពួកគេអាចមើលឃើញទីក្រុងជាច្រើនដែរ ដូចជា ៖ ទីក្រុង Prabalgad, Chanderi, Peb, Matheran, Irshalgad និងទន្លេ Ulhas ហើយភ្ញៀវទេសចរអាចមកកម្សាន្តនៅភ្នំនេះពេញមួយឆ្នាំ ប៉ុន្តែវានឹងមានគ្រោះថ្នាក់បំផុតនៅរដូវភ្លៀងធ្លាក់ ។

បញ្ហាប្រឈមពាក់ព័ន្ធនឹងការមកកម្សាន្តនៅភ្នំ Kalavantin Durg គឺមានជណ្តើរចោទខ្លាំង ហើយកាំជណ្តើរនៅចំណុចខ្លះមានកម្ពស់ខ្ពស់ ។ ភ្ញៀវទេសចរត្រូវតែប្រុងប្រយ័ត្នជានិច្ចពេលឡើងលើជណ្តើរ និងឡើងបន្តិចម្តងៗ ដោយសារបើភ្លាត់ស្នៀតតែបន្តិច ពួកគេនឹងធ្លាក់ចុះមកក្រោមវិញ ។ កន្លងមក នៅទីនេះធ្លាប់កើតហេតុការណ៍ភ្ញៀវទេសចរស្លាប់ចំនួន២លើក ។

ហេតុនេះ អាជ្ញាធរតម្រូវឱ្យភ្ញៀវទេសចរទាំងអស់ដែលមកកម្សាន្តនៅភ្នំ Kalavantin Durg ត្រូវតែចុះឈ្មោះ និងបញ្ជាក់ព័ត៌មានលម្អិតផ្សេងៗជាមុនសិន ទើបពួកគេទទួលបានការអនុញ្ញាតឱ្យឡើងលើភ្នំដ៏គ្រោះថ្នាក់នេះ ៕

ប្រទេសម៉ាល់ឌីវ ៖ នៅថ្ងៃទី៣ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ប្រទេសម៉ាល់ឌីវ (ស្ថិតនៅតំបន់អាស៊ីខាងត្បូង) បានប្រកាសហាមឃាត់ពលរដ្ឋអ៊ីស្រាអែលចូលប្រទេសរបស់ខ្លួន ព្រមទាំងត្រៀមធ្វើវិសោធនកម្មច្បាប់ផងដែរដើម្បីប្រឆាំងនឹងសង្គ្រាមនៅតំបន់កាហ្សា ។ រីឯក្រសួងការបរទេសអ៊ីស្រាអែលបានប្រាប់ពលរដ្ឋហាមធ្វើដំណើរទៅប្រទេសម៉ាល់ឌីវ ។

សារព័ត៌មានបរទេសរាយការណ៍ថា វិមានប្រធានាធិបតីប្រទេសម៉ាល់ឌីវ បានចេញសេចក្តីថ្លែងការណ៍១ច្បាប់ កាលពីថ្ងៃទី២ ខែមិថុនា ឆ្នាំ២០២៤ ដោយបញ្ជាក់ពីការអនុវត្តវិធានការហាមជនបរទេសកាន់លិខិតឆ្លងដែនអ៊ីស្រាអែលចូលប្រទេសម៉ាល់ឌីវជាដាច់ខាត ក្រោយទទួលបានការណែនាំពីគណៈរដ្ឋមន្ត្រី ។ ប៉ុន្តែនៅពុំទាន់មានភាពច្បាស់លាស់ថា ការអនុវត្តវិធានការនេះនឹងចាប់ផ្តើមនៅពេលណាទេ ។

លើសពីនេះ ប្រទេសម៉ាល់ឌីវនឹងធ្វើវិសោធនកម្មច្បាប់ឱ្យស្របនឹងវិធានការខាងលើ ព្រមទាំងបង្កើតអនុគណៈកម្មការដើម្បីត្រួតពិនិត្យវិធានការនេះផងដែរ ។ បើតាមសេចក្តីរាយការណ៍បញ្ជាក់ថា លោកប្រធានាធិបតីម៉ាល់ឌីវ Mohamed Muizzu នឹងបង្កើតទូតពិសេសដើម្បីវាយតម្លៃពីតម្រូវការរបស់ពលរដ្ឋប៉ាឡេស្ទីន និងបើកយុទ្ធនាការរៃអង្គាសប្រាក់ ។

ចំណែកលោក Oren Marmorstein មន្ត្រីនាំពាក្យក្រសួងការបរទេសអ៊ីស្រាអែលលើកឡើងថា ក្រសួងការបរទេសបានណែនាំឱ្យពលរដ្ឋអ៊ីស្រាអែលចៀសវាងធ្វើដំណើរទៅប្រទេសម៉ាល់ឌីវ ព្រមទាំងអ្នកកាន់លិខិតឆ្លងដែនបរទេស ។ កាលពីឆ្នាំ២០២៣ ពលរដ្ឋអ៊ីស្រាអែលជិត១១.០០០នាក់បានមកកម្សាន្តនៅប្រទេសម៉ាល់ឌីវ ស្មើនឹង០,៦% នៃចំនួនភ្ញៀវទេសចរសរុប ។

ប៉ុន្តែក្នុងរយៈពេល៤ខែដំបូងឆ្នាំ២០២៤ ទិន្នន័យផ្លូវការបង្ហាញថា ពលរដ្ឋអ៊ីស្រាអែលធ្វើដំណើរមកម៉ាល់ឌីវ បានធ្លាក់ចុះនៅសល់ត្រឹមតែ៥២៨នាក់ប៉ុណ្ណោះ ឬធ្លាក់ចុះរហូតដល់៨៨% បើធៀបនឹងរយៈពេលដូចគ្នាឆ្នាំ២០២៣ ។ កន្លងមក គណបក្សនយោបាយនានាបានព្យាយាមដាក់សម្ពាធឱ្យប្រធានាធិបតីម៉ាល់ឌីវ ហាមឃាត់ការធ្វើដំណើររបស់ពលរដ្ឋអ៊ីស្រាអែល ដើម្បីប្រឆាំងនឹងការធ្វើសង្គ្រាមនៅតំបន់កាហ្សា ។

គួរបញ្ជាក់ថា រដ្ឋាភិបាលម៉ាល់ឌីវធ្លាប់បានហាមឃាត់ពលរដ្ឋអ៊ីស្រាអែលធ្វើដំណើរមកប្រទេសរបស់ខ្លួន កាលពីអំឡុងឆ្នាំ១៩៩០ ។ ក្រោយមក ប្រទេសទាំងពីរនេះក៏បានស្តារទំនាក់ទំនងការទូតឡើងវិញ នៅឆ្នាំ២០១០ ។ បច្ចុប្បន្ន ក្រៅពីការហាមឃាត់របស់ប្រទេសម៉ាល់ឌីវ អ្នកកាន់លិខិតឆ្លងដែនអ៊ីស្រាអែលពុំទទួលការអនុញ្ញាតឱ្យធ្វើដំណើរទៅកាន់ប្រទេសជាង១០ទៀត ដូចជា ៖ អាល់ហ្សេរី, បង់ក្លាដែស, ព្រុយណេ, អ៊ីរ៉ង់, អ៊ីរ៉ាក់, គុយវ៉ែត, លីបង់, លីប៊ី, ប៉ាគីស្ថាន, អារ៉ាប៊ីសាអូឌីត, ស៊ីរី និងយេម៉ែន ៕

ប្រទេសចិន៖ ក្រុមហ៊ុន Huawei បាននិយាយកាលពីពេលថ្មីៗនេះថា ក្រុមហ៊ុនគ្រោងនឹងផលិតម៉ាករថយន្តអគ្គិសនីថ្មី ដើម្បីប្រកួតប្រជែងជាមួយ Rolls-Royce ដោយគេរំពឹងថារយន្តនេះនឹងបង្ហាញខ្លួនជាផ្លូវការនៅឆ្នាំ ២០២៥។
យោងតាមប្រធានក្រុមហ៊ុន Huawei លោក Yu Chengdong បាននិយាយកាលពីដើមខែមិថុនានេះថា បច្ចុប្បន្នខ្លួនកំពុងអភិវឌ្ឍនិងផលិតរថយន្តថ្មីជាបន្តបន្ទាប់ដើម្បីប្រកួតប្រជែងជាមួយនឹងម៉ាកយីហោអន្តរជាតិ ដោយធ្វើការបណ្តាក់ទុនរួមគ្នាជាមួយក្រុមហ៊ុនផលិតរថយន្តចិន JAC។ លោក Yu បានបន្ថែមថា ការបណ្តាក់ទុនថ្មីនេះនឹងផ្តល់នូវកម្រិតខ្ពស់បំផុតនៃភាពប្រណិតដែលអាចធ្វើទៅបានដើម្បីប្រកួតប្រជែងជាពិសេសជាមួយទីផ្សារ Rolls-Royce។

ក្រុមហ៊ុនបច្ចេកវិទ្យាយក្ស Huawei លែងជាឈ្មោះចម្លែកសម្រាប់ឧស្សាហកម្មរថយន្តទៀតហើយ ដោយសារបានបញ្ចេញនូវរថយន្តអគ្គិសនីជាច្រើនម៉ូដែលតាំងពីឆ្នាំ ២០២១ មកម្លេះ។ បន្ទាប់ពីការខិតខំប្រឹងប្រែងអស់រយៈពេលប៉ុន្មានឆ្នាំកន្លងមកនេះ ក្រុមហ៊ុនបានត្រៀមខ្លួនរួចជាស្រេចដើម្បីឈានទៅមុខមួយជំហានទៀតដោយសង្ឃឹមថានឹងអាចយកឈ្នះលើទីផ្សារ Rolls-Royce ។ ក្រុមហ៊ុន Huawei គ្រោងនឹងដាក់លក់ម៉ូដែលថ្មីរបស់ខ្លួនក្នុងតម្លៃប្រហែល ១៣៨,០០០ ដុល្លារអាមេរិក ដែលតម្លៃនេះគឺទាបជាងរថយន្ត Maybach និង Rolls-Royce ទៅទៀត ដោយជាធម្មតារថយន្តបរទេសទាំងពីរនេះមានតម្លៃចាប់ពី ២០០,០០០ ទៅ ៣០០,០០០ ដុល្លារ។

លោក Yu បានបន្តទៀតថា “ម៉ូដែលរថយន្តដែលលក់ក្នុងតម្លៃលើសពី ១៣៨,០០០ ដុល្លារគឺខ្ពស់ណាស់។ ទោះបីរថយន្តរបស់យើងមានតម្លៃទាបជាង Maybach និង Rolls-Royce ក៏ដោយ ប៉ុន្តែវាមានស្តង់ដារ ប្រណិត ទំនើប និងមានផាសុកភាព”។ ម៉ូដែលរថយន្តនេះនឹងក្លាយជារថយន្តអគ្គិសនីដ៏អស្ចារ្យមួយដែលរួមបញ្ចូលបច្ចេកវិទ្យា JAC នៅរោងចក្រដែលរំពឹងថានឹងបញ្ចប់ក្នុងរយៈពេលប៉ុន្មានខែខាងមុខនេះ។ រថយន្តស៊េរីឆ្នាំ ២០២៥ តាមកម្រិតដែលបានបញ្ជាក់អាចប្រកួតប្រជែងជាមួយ BMW 7 និង Mercedes EQS ទោះជាយ៉ាងណាសម្រាប់លក្ខណៈពិសេសរបស់វានៅមិនទាន់បានបង្ហាញឱ្យដឹងនោះទេ។

គួរបញ្ជាក់ដែរថា ម៉ូដែលរថយន្តអគ្គិសនីបច្ចុប្បន្នរបស់ក្រុមហ៊ុន Huawei ដូចជា Luxeed S7 និង Aito M9 មានចម្ងាយពី ៦៩២-៨៥២ គីឡូម៉ែត្រ។ Huawei មានភាពជាដៃគូជាមួយក្រុមហ៊ុនផលិតរថយន្តចិនរួមមាន Seres, Chery, BAIC, Changan, GAC។ ក្រុមហ៊ុនទាំងអស់នេះបានរួមបញ្ចូលបច្ចេកវិជ្ជារបស់ក្រុមហ៊ុន Huawei ដោយលោក Yu ជឿជាក់ថាការយល់ដឹងរបស់ក្រុមហ៊ុន Huawei លើបទពិសោធន៍អ្នកប្រើប្រាស់ គុណភាព និងសេវាកម្មនឹងនាំមកនូវដំណោះស្រាយការបើកបរឆ្លាតវៃល្អបំផុតដល់ឧស្សាហកម្មរថយន្ត៕

ប្រទេសក្រូអាត ៖ កោះភាគច្រើនលើពិភពលោកល្បីល្បាញមានទេសភាពស្រស់ស្អាតទាក់ទាញភ្ញៀវទេសចរ ប៉ុន្តែកោះ Bavljenac បែរជាខុសប្លែកពីកោះផ្សេងៗ ដោយសារកោះនេះល្បីល្បាញថា មានរូបរាងដូចស្នាមក្រយៅដៃមនុស្ស (Fingerprint Island) បើសម្លឹងពីផ្នែកខាងលើ ។ បច្ចុប្បន្ន មានភ្ញៀវទេសចរយ៉ាងច្រើនចាប់អារម្មណ៍មកកម្សាន្តនៅទីនេះ ហើយអ្នកស្រុកបានទទួលស្វាគមន៍ភ្ញៀវទេសចរយ៉ាងល្អ ប៉ុន្តែពួកគេបារម្ភពីផលប៉ះពាល់អាចកើតឡើងក្នុងតំបន់ប្រវត្តិសាស្ត្រ ។

Bavljenac គឺជាកោះតូចមួយមានទីតាំងនៅឆ្នេរ Dalmatian ក្នុងសមុទ្រ Adriatic ប្រទេសក្រូអាត ។ បើទោះជាប្រទេសក្រូអាត មានកោះធំៗចំនួន៧៥ និងកោះតូចៗជាង៥០០ ប៉ុន្តែ Bavljenac ជាកោះតែមួយគត់ដែលមានអត្តសញ្ញាណខុសប្លែកពីកោះផ្សេងៗ គឺមានរបងថ្មរូបរាងដូចក្រយៅដៃមនុស្ស និងមានប្រវត្តិគួរឱ្យចាប់អារម្មណ៍ ។

ភ្ញៀវទេសចរដែលបានធ្វើដំណើរមកដល់កោះនេះឆ្ងល់ថា តើស្នាមក្រយៅដៃទាំងនេះកើតឡើងយ៉ាងដូចម្តេច? តើមនុស្សបានសាងសង់ឡើង ឬកើតឡើងពីធម្មជាតិ? ចម្លើយពិតប្រាកដ គឺវាកើតឡើងដោយសារកត្តាទាំងពីរយ៉ាង ហើយរបងថ្ម (Stone Dry Walls) រូបរាងជាស្នាមក្រយៅដៃនេះមានប្រវែងសរុបស្មើនឹង២៣គីឡូម៉ែត្រ ។

គេអាចគិតថា វាជាជួរភ្នំបុរាណ ប៉ុន្តែការពិតរបងថ្មទាំងនេះមានកម្ពស់ត្រឹមចង្កេះមនុស្សប៉ុណ្ណោះ និងត្រូវបានរចនាម៉ូដឡើងសម្រាប់ជួយសម្រួលដល់ការធ្វើកសិកម្មឱ្យកាន់តែល្អក្នុងតំបន់មិនអំណោយផល ។ អ្នកស្រុកធ្លាប់រស់នៅលើកោះនេះបានប្រកបរបរកសិកម្មជាចម្បង ហើយដោយសារកោះសម្បូរថ្ម និងខ្យល់បក់ខ្លាំង ទើបពួកគេជួយគ្នាសាងសង់របងថ្មដោយដៃសុទ្ធសាធ និងពុំប្រើស៊ីម៉ងត៍ ដើម្បីការពារខ្យល់កុំឱ្យបំផ្លាញដំណាំ ដូចជា ៖ ទំពាំងបាយជូរ និងម្កាក់ ។

បច្ចេកទេសសាងសង់របងថ្មបែបនេះ ក៏បានយកទៅប្រើប្រាស់ក្នុងតំបន់ផ្សេងទៀតនៅអឺរ៉ុបផងដែរ ប៉ុន្តែគ្មានទីណាអាចសាងសង់របងថ្មដូចក្រយៅដៃមនុស្សដូចកោះនេះទេ ។ របងថ្មត្រូវបានដាក់តម្រៀបសង្កត់លើគ្នា ហើយគេជឿថា វាបានសាងសង់ក្នុងអំឡុងសតវត្សរ៍ទី១៩ ប៉ុន្តែមានរបងខ្លះសាងសង់នាពេលមុននេះ ។ ក្រោយពីរូបភាពកោះ Bavljenac បានផ្សព្វផ្សាយក្នុងបណ្តាញសង្គមធ្វើឱ្យវាទទួលបានការចាប់អារម្មណ៍ខ្លាំង ហើយភ្ញៀវទេសចរជាច្រើននាក់ព្យាយាមធ្វើដំណើរមកទីនេះ ។

ការសាងសង់តាមបែបបុរាណ និងពិបាកធ្វើតាមបានធ្វើឱ្យរបងថ្មនេះរឹងមាំរហូតមកដល់បច្ចុប្បន្ន ។ រដ្ឋាភិបាលក្រូអាតបានស្នើសុំឱ្យអង្គការយូណេស្កូចុះបញ្ជីកោះនេះជាសម្បត្តិបេតិកភណ្ឌពិភពលោក ដើម្បីបញ្ជាក់ពីគុណតម្លៃរបងថ្មដែលសាងសង់ឡើងដោយដៃមនុស្ស ។ រដ្ឋាភិបាលអះអាងថា នឹងមានភ្នាក់ងារប្រចាំតំបន់នៅគ្រប់គ្រងកោះនេះផងដែរ ៕