ថ្មីៗនេះ មានការបែកធ្លាយវីដេអូរបស់អ្នកបើកស្រឡាងម្នាក់នៅកំពង់ចម្លងភ្នំពេញ អរិយក្សត្រ យកជើងបញ្ជាចង្កូត មើលទៅហាក់មិនខ្វល់ពីបញ្ហាអ្វីទាំងអស់ ទាំងដែលមានមនុស្សជាច្រើនកំពុងធ្វើដំណើរនៅលើនោះ។
ក្រោយបែកធ្លាយវីដេអូនេះ នាយកកំពង់ចម្លងភ្នំពេញ អរិយក្សត្រ លោក អាន សំអន បានសម្រេចបញ្ឈប់អ្នកបើកបរនោះ ដែលមានឈ្មោះ ឡេង ដារ៉ូ ដោយចោទប្រកាន់ថាប្រព្រឹត្តិខុសវិជ្ជាជីវៈក្នុងការបើកបរ។
ក្នុងការសម្រេចចិត្តបញ្ឈប់នេះ លោកនាយកកំពង់ចម្លងភ្នំពេញ អរិយក្សត្រ ក៏បានណែនាំដល់បុគ្គលិកបើកបរកាណូតផ្សេងទៀតទាំងអស់មិនឱ្យយកគំរូតាម និងប្រកាន់ភ្ជាប់នូវសុជីវធម៌ល្អ អាកប្បកិរិយាសមរម្យ មានស្មារតីប្រុងប្រយ័ត្នខ្ពស់ ធ្វើការងារប្រកបដោយការយកចិត្តទុកដាក់ ដើម្បីធានាឱ្យបាននូវសុខសុវត្ថិភាពជូនប្រជាពលរដ្ឋដែលឆ្លងទៅមកជាប្រចាំ៕
