សហរដ្ឋអាមេរិក ៖ R/P FLIP គឺជាឈ្មោះនាវាមួយរបស់អាមេរិកសម្រាប់ស្រាវជ្រាវនៅមហាសមុទ្រ ប៉ុន្តែចំណុចទាក់ទាញខ្លាំងបំផុត គឺវាមានសភាពដូចគ្នានឹងនាវាកំពុងតែលិចក្នុងទឹក ដោយគេគ្រាន់តែចុចប៊ូតុង១លើកប៉ុណ្ណោះ ។ ហេតុនេះ មនុស្សភាគច្រើនតែងតែយល់ខុសថា វាកំពុងតែលិចក្នុងទឹកសមុទ្រ ។

FLIP គឺជាពាក្យកាត់មកពីពាក្យ Floating Instrument Platform ជាកម្មសិទ្ធិរបស់ភ្នាក់ងារស្រាវជ្រាវកងទ័ពជើងទឹកអាមេរិកសម្រាប់ស្រាវជ្រាវមហាសមុទ្រ ។ នាវានេះមានប្រវែងសរុប១០៨ម៉ែត្រ ហើយគេបានរចនាម៉ូដវាឡើងឱ្យផ្នែកខ្លះលិចក្នុងទឹក និងផ្អៀងទៅខាងក្រោយ៩០អង្សា ដោយបន្សល់ទុកតែចុងនាវាមានកម្ពស់ត្រឹមតែ១៧ម៉ែត្រពីទឹក ។

គម្រោងអភិវឌ្ឍន៍នាវានេះបានចាប់ផ្តើមតាំងពីឆ្នាំ១៩៦០ មកម៉្លេះ ហើយអ្នកស្រាវជ្រាវឈ្មោះ Frederick H. Fisher និងនាយកមន្ទីរពិសោធន៍សមុទ្រឈ្មោះ Fred N. Peess បានពិភាក្សាគ្នាអំពីការប្រើប្រាស់នាវាមុជទឹកដើម្បីស្រាវជ្រាវពាក់ព័ន្ធនឹងបញ្ហាសន្តិសុខជាតិ ។ ដូច្នេះ គំនិតការរចនាម៉ូដឱ្យនាវាងើបឡើងពីទឹកអាចជាដំណោះស្រាយដ៏ល្អបំផុតនាពេលនោះ ។

នៅទីបំផុត នាវា FLIP ក៏បានបង្ហាញរូបរាងឡើងក្នុងរយៈពេល២ឆ្នាំក្រោយមក ហើយវាអាចអណ្តែតនៅលើខ្សែទឹកយ៉ាងងាយស្រួល ឬចតនៅមហាសមុទ្រដែលមានជម្រៅជ្រៅបំផុតរហូតដល់៥.០០០ម៉ែត្រ ។ រីឯការផ្លាស់ពីផ្តេកទៅបញ្ឈររបស់នាវា នឹងចំណាយពេលត្រឹមតែ៣០នាទីប៉ុណ្ណោះ ។

ចំណុចគួរឱ្យចាប់អារម្មណ៍មួយទៀត គឺនាវាមិនអាចបើកបរដោយខ្លួនវាបានទេ ហើយគេត្រូវប្រើប្រាស់នាវាផ្សេងទៀតមកជួយអូស ។ នាវានេះមានទម្ងន់ប្រមាណ៧០០តោន និងអាចដឹកបុគ្គលិកក្នុងនាវាចំនួន៥នាក់ ព្រមទាំងអ្នកវិទ្យាសាស្ត្រ១១នាក់ទៀត ។

ចំណែកផ្នែកខាងក្នុងនាវាត្រូវបានផលិតឡើងដើម្បីអាចប្រើប្រាស់គ្រប់កាលៈទេសៈទាំងអស់ មិនថាពេលនាវាផ្តេក ឬបញ្ឈរ ។ ដូចគ្នានេះ ការបំពាក់អគ្គិសនី ចាំបាច់ត្រូវដាក់នៅលើជញ្ជាំងទាំង២ផ្នែក ដែលវានឹងក្លាយជាដំបូល ហើយសម្ភារៈផ្សេងៗក៏ដូចគ្នាដែរ ។ នេះជាភាពអស្ចារ្យរបស់នាវា FLIP ដែលមានភាពខុសប្លែកគ្នាពីនាវាផ្សេងទៀតនៅលើពិភពលោក ហើយពុំគួរឱ្យជឿថា គេបានកសាងវាតាំងពី៦០ឆ្នាំមុន ៕

ប្រទេសតួកគី ៖ កាលពីថ្ងៃទី៣ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ពលរដ្ឋតួកគីរាប់ពាន់នាក់បានប្រមូលផ្តុំគ្នានៅទីក្រុង Istanbul ដើម្បីបង្ហាញការមិនពេញចិត្តចំពោះគម្រោងសម្លា.ប់ ឆ្កែអនាថានៅទូទាំងប្រទេសរបស់រដ្ឋាភិបាល ។ រដ្ឋាភិបាលបានចេញសេចក្តីព្រាងច្បាប់ថ្មីមួយដើម្បីចាប់ក្រៀវឆ្កែអនាថានៅតាមផ្លូវ ព្រមទាំងកម្ចា.ត់ពួកវា ប្រសិនបើគ្មានអ្នកណាយកទៅចិញ្ចឹមក្នុងរយៈពេល៣០ថ្ងៃ ។

គម្រោងកម្ចាត់ឆ្កែអនាថានៅទូទាំងប្រទេសនេះ បានធ្វើឱ្យពលរដ្ឋតួកគីជាច្រើននាក់មិនពេញចិត្ត និងប្រមូលផ្តុំគ្នាតវ៉ានៅទីក្រុង Istanbul ។ ពួកគេបានកាន់ស្លាករូបភាពឆ្កែដែលមានទឹកមុខគួរឱ្យអាណិតអាសូរ ដើម្បីប្រឆាំងនឹងគម្រោងរបស់រដ្ឋាភិបាល ។ អ្នកតវ៉ាម្នាក់និយាយថា ៖ «បញ្ហានេះប៉ះពាល់យ៉ាងខ្លាំងដល់សត្វ ហើយវាជាច្បាប់ឃាតកម្ម ។ ខ្ញុំយល់ថា បន្ទាប់ពីរដ្ឋាភិបាលកម្ចាត់ឆ្កែអនាថាអស់ហើយ គឺអាចនឹងកម្ចាត់ឆ្មាបន្តទៀត» ។

គណបក្សយុត្តិធម៌ និងការអភិវឌ្ឍ ដែលជាគណបក្សរដ្ឋាភិបាលរបស់ប្រធានាធិបតីតួកគី លោក Recep Tayyip Erdogan បញ្ជាក់ថា ការធ្វើវិសោធនកម្មច្បាប់ខាងលើនេះ គឺមានភាពចាំបាច់ដើម្បីកាត់បន្ថយចំនួនឆ្កែអនាថាក្នុងប្រទេស និងបញ្ឈប់ពួកវាកុំឱ្យធ្វើបាបមនុស្សបន្តទៀត ។

រដ្ឋាភិបាលអះអាងថា ប្រទេសតួកគីមានឆ្កែអនាថាសរុបប្រមាណ៤លានក្បាល ហើយក្នុងរយៈពេល៥ឆ្នាំកន្លងមកនេះ ពួកវាធ្វើឱ្យកើតគ្រោះថ្នាក់នៅតាមផ្លូវចំនួន៣.៥៤៤លើក ។ លើសពីនេះ វាជាមូលហេតុធ្វើឱ្យមនុស្សស្លាប់ចំនួន៥៥នាក់ និងរងរបួសជាង៥.០០០នាក់ទៀត ។ រីឯអង្គការសុខភាពពិភពលោក (WHO) បានកំណត់ថា តួកគី គឺជាប្រទេសមានគ្រោះថ្នាក់យ៉ាងខ្លាំងដោយសារជំងឺឆ្កែឆ្កួត ។

ចំណែកលោក Heydar Ozkan អនុប្រធានសហព័ន្ធសិទ្ធិសត្វនៅប្រទេសតួកគី លើកឡើងថា រដ្ឋាភិបាលដោះស្រាយបញ្ហាពុំចំគោលដៅទេ រដ្ឋាភិបាលគួរតែផ្តល់ភាពសំខាន់លើការក្រៀវសត្វ និងរកទីកន្លែងសង្គ្រោះសត្វ វានឹងមានប្រសិទ្ធភាពជាងកម្ចាត់ពួកវា ៕

បរទេស៖ ប្រទេសសិង្ហបុរីបានចាប់ផ្តើមពង្រីករមណីយដ្ឋានកាស៊ីណូលំដាប់ខ្ពស់ចំនួនពីរចាប់ពីចុងឆ្នាំនេះ ដើម្បីទាក់ទាញភ្ញៀវអន្តរជាតិ។
យោងតាម Nikkei Asia នៅពេលដែលនាយករដ្ឋមន្ត្រីសិង្ហបុរីថ្មី លោក Lawrence Wong ចូលកាន់តំណែងក្នុងខែឧសភា លោកបានផ្តោតលើការអភិវឌ្ឍន៍រមណីយដ្ឋាន និងកាស៊ីណូ ដើម្បីទាក់ទាញភ្ញៀវទេសចរ និងជំរុញសេដ្ឋកិច្ចរបស់ប្រទេសកោះនេះ។ លោកបានមើលឃើញថាមានការកើនឡើងនូវប្រាក់ចំណូលពីហ្គេមនៅប្រទេសសិង្ហបុរី ដូច្នេះនាយករដ្ឋមន្ត្រីនឹងចាប់ផ្តើមជាមួយគម្រោងពង្រីកទ្រង់ទ្រាយធំចំនួនពីរ ដែលមានតម្លៃវិនិយោគសរុបជាង ១០ ពាន់លាន SGD (ប្រមាណ ៧.៤ ពាន់លានដុល្លារអាមេរិក)។

ក្នុងឆ្នាំ ២០១០ ប្រទេសសិង្ហបុរីបានបើករមណីយដ្ឋានកាស៊ីណូរួមបញ្ចូលគ្នាចំនួនពីរជាលើកដំបូង ដើម្បីជំរុញទេសចរណ៍ និងនាំមកនូវអត្ថប្រយោជន៍សេដ្ឋកិច្ច “ដ៏សំខាន់”។ បន្ទាប់មកក្នុងឆ្នាំ ២០១៩ ក្រសួងពាណិជ្ជកម្ម និងឧស្សាហកម្មបាននិយាយថា រមណីយដ្ឋានទាំងពីរ បានរួមចំណែក ១-២% នៃផលិតផលក្នុងស្រុកសរុបប្រចាំឆ្នាំ។ ចំនួនភ្ញៀវអន្តរជាតិទៅកាន់ប្រទេសសិង្ហបុរីក៏បានកើនឡើងទ្វេដងផងដែរដល់ ១៩.១ លាននាក់ក្នុងឆ្នាំដដែល បន្ទាប់ពីរយៈពេល ១០ ឆ្នាំ។ ហេតុនេះហើយ នាយករដ្ឋមន្ត្រីសិង្ហបុរីថ្មី លោក Lawrence Wong នឹងចាប់ផ្តើមពង្រីករមណីយដ្ឋានកាស៊ីណូរួមបញ្ចូលគ្នាចំនួនពីរជាលើកទីពីរ ក្នុងគោលបំណងតែមួយគឺដើម្បីទាក់ទាញភ្ញៀវទេសចរ និងជំរុញសេដ្ឋកិច្ច។

Genting Singapore ដែលជាក្រុមហ៊ុនគ្រប់គ្រងដោយម៉ាឡេស៊ីដែលដំណើរការ Resorts World Sentosa នឹងដេញថ្លៃកិច្ចសន្យាសាងសង់សម្រាប់សណ្ឋាគារថ្មីនៅក្នុងខែកញ្ញា ដោយការសាងសង់រំពឹងថានឹងចាប់ផ្តើមនៅចុងឆ្នាំនេះ។ សណ្ឋាគារទាំងពីរនេះត្រូវបានគេប៉ាន់ស្មានថាមានបន្ទប់ចំនួន ៧០០ ។ ហើយរមណីយដ្ឋានដែលនៅសេសសល់ Marina Bay Sands នឹងបន្ថែមអគារសណ្ឋាគារទីបួន ដោយចាប់ផ្តើមសាងសង់នៅខែកក្កដា ឆ្នាំ ២០២៥ ជាមួយនឹងសង្វៀនថ្មីដែលមានទំហំ ១៥,០០០ កៅអី គម្រោងនេះត្រូវបានគេរំពឹងថានឹងបញ្ចប់នៅឆ្នាំ ២០២៩។ ផ្នែកកាស៊ីណូ ដែលជាប្រភពចំណូលសំខាន់សម្រាប់រមណីយដ្ឋានទាំងពីរនេះ ក៏នឹងត្រូវបានពង្រីកផងដែរ។

Marina Bay Sands បានពង្រីកផ្ទៃដីរបស់ខ្លួន ២,០០០ ម៉ែត្រការ៉េ ហើយ Genting ក៏បានបង្កើនវា ៥០០ ម៉ែត្រការ៉េបន្ថែមទៀត។ ការចំណាយលើការវិនិយោគសម្រាប់ការពង្រីកពី ៤.៥ ពាន់លាន SGD កើនឡើងទ្វេដងដោយសារតែអតិផរណា។ ដើមទុនវិនិយោគរបស់ Genting ក៏បានកើនឡើងទ្វេដងផងដែរដល់ ៦.៨ ពាន់លាន SGD (ប្រមាណ ៥ ពាន់លានដុល្លារអាមេរិក)។ មិនត្រឹមតែសិង្ហបុរីទេ ថៃបច្ចុប្បន្នក៏កំពុងពិចារណាធ្វើឱ្យកាស៊ីណូស្របច្បាប់ដើម្បីទាក់ទាញអតិថិជនផងដែរ៕

ប្រទេសឥណ្ឌា ៖ មនុស្សភាគច្រើនធ្លាប់បានឮថា បើចង់សាកល្បងឡើងភ្នំដ៏មានគ្រោះថ្នា.ក់ បំផុតនៅលើពិភពលោក គឺភ្ញៀវទេសចរអាចឡើងភ្នំហួសាន នៅប្រទេសចិន ។ ប៉ុន្តែភ្នំមួយស្ថិតនៅប្រទេសឥណ្ឌា ក៏មានគ្រោះថ្នា.ក់ ខ្លាំងមិនចាញ់ភ្នំនៅចិនឡើយ ហើយភ្ញៀវទេសចរភាគច្រើនពុំបានឡើងទៅដល់កំពូលភ្នំទេ ។ បើសម្លឹងពីចម្ងាយឃើញថា កំពូលភ្នំនេះមិនខុសគ្នាពីបង្គោលថ្មដ៏ខ្ពស់ទេ ប៉ុន្តែបើសម្លឹងមើលជិតៗនឹងឃើញជណ្តើរឡើងទៅលើភ្នំជាច្រើនជាន់ ។

ភ្នំនេះឈ្មោះថា Kalavantin Durg មានកម្ពស់៧០០ម៉ែត្រពីនីវ៉ូទឹកសមុទ្រ និងស្ថិតនៅមិនឆ្ងាយពីទីក្រុងបុមបៃប៉ុន្មានទេ ។ រីឯជណ្តើរឡើងទៅកាន់កំពូលភ្នំ គឺមានសភាពចោតខ្លាំង គ្មានបង្កាន់ដៃ និងរអិលនៅពេលភ្លៀងធ្លាក់ ។

បើតាមជំនឿបុរាណរបស់ជនជាតិឥណ្ឌាឱ្យដឹងថា ការធ្វើជណ្តើរឡើងទៅលើកំពូលភ្នំនេះ គឺដើម្បីគោរពដល់ព្រះមហាក្សត្រី១អង្គ ព្រះនាម Kalavantin ទើបការធ្វើដណ្តើរឡើង-ចុះភ្នំមានលក្ខណៈតូចចង្អៀត គ្មានបង្កាន់ដៃចាប់ ហើយធ្វើឱ្យអ្នកឃើញជណ្តើរនេះមានអារម្មណ៍ញ័រជើង ។ ប៉ុន្តែប្រសិនបើពួកគេអត់ធ្មត់ឡើងឱ្យដល់កំពូលភ្នំនោះ គឺនឹងបានឃើញទេសភាពយ៉ាងស្រស់ស្អាត ដែលកម្រមានអ្នកឡើងទៅដល់ ។

ការឡើងជណ្តើរទៅកាន់កំពូលភ្នំ Kalavantin Durg អាចចំណាយពេលប្រមាណ៣ម៉ោង ហើយដោយសារជណ្តើរមានសភាពតូចចង្អៀត ចោតខ្លាំង និងរអិល វាធ្វើឱ្យភ្ញៀវទេសចរងាយនឹងកើតគ្រោះថ្នាក់ ។ លើសពីនេះ បើពួកគេឡើងកាន់តែជិតដល់កំពូលភ្នំ នឹងកាន់តែមានគ្រោះថ្នាក់ទ្វេដង ប៉ុន្តែភ្ញៀវទេសចរអាចសម្រាក និងថតរូបបាននៅពេលឡើងលើភ្នំបានកម្ពស់៣៩០ម៉ែត្រ ។

ភ្ញៀវទេសចរភាគច្រើនពុំបានឡើងទៅដល់កំពូលភ្នំទេ ហើយពួកគេសម្រេចចិត្តឈប់នៅចំណុចជិតដល់កំពូលភ្នំ ដោយសារជណ្តើរនៅជិតកំពូលភ្នំមានគ្រោះថ្នាក់ខ្លាំង ។ បើទោះជាពុំអាចឡើងទៅដល់កំពូលភ្នំក្តី ក៏ពួកគេអាចមើលឃើញទីក្រុងជាច្រើនដែរ ដូចជា ៖ ទីក្រុង Prabalgad, Chanderi, Peb, Matheran, Irshalgad និងទន្លេ Ulhas ហើយភ្ញៀវទេសចរអាចមកកម្សាន្តនៅភ្នំនេះពេញមួយឆ្នាំ ប៉ុន្តែវានឹងមានគ្រោះថ្នាក់បំផុតនៅរដូវភ្លៀងធ្លាក់ ។

បញ្ហាប្រឈមពាក់ព័ន្ធនឹងការមកកម្សាន្តនៅភ្នំ Kalavantin Durg គឺមានជណ្តើរចោទខ្លាំង ហើយកាំជណ្តើរនៅចំណុចខ្លះមានកម្ពស់ខ្ពស់ ។ ភ្ញៀវទេសចរត្រូវតែប្រុងប្រយ័ត្នជានិច្ចពេលឡើងលើជណ្តើរ និងឡើងបន្តិចម្តងៗ ដោយសារបើភ្លាត់ស្នៀតតែបន្តិច ពួកគេនឹងធ្លាក់ចុះមកក្រោមវិញ ។ កន្លងមក នៅទីនេះធ្លាប់កើតហេតុការណ៍ភ្ញៀវទេសចរស្លាប់ចំនួន២លើក ។

ហេតុនេះ អាជ្ញាធរតម្រូវឱ្យភ្ញៀវទេសចរទាំងអស់ដែលមកកម្សាន្តនៅភ្នំ Kalavantin Durg ត្រូវតែចុះឈ្មោះ និងបញ្ជាក់ព័ត៌មានលម្អិតផ្សេងៗជាមុនសិន ទើបពួកគេទទួលបានការអនុញ្ញាតឱ្យឡើងលើភ្នំដ៏គ្រោះថ្នាក់នេះ ៕