ប្រទេសវៀតណាម ៖ នៅដើមខែមិថុនា ឆ្នាំ២០២៤ សារព័ត៌មានវៀតណាមឈ្មោះ Vietnam News Agency រាយការណ៍ថា ចំនួនការនាំចេញទុរេនវៀតណាមសរុបក្នុងរយៈពេល៤ខែដំបូងឆ្នាំ២០២៤ ស្មើទឹកប្រាក់៤៧០លានដុល្លារអាមេរិក និងខ្ពស់ជាងរយៈពេលដូចគ្នាក្នុងឆ្នាំ២០២៣ កើនឡើង១៤៦% បើប្រៀបធៀបប្រចាំឆ្នាំ ។

ប្រទេសចិនបាននាំចូលទុរេនវៀតណាមច្រើនជាងគេក្នុងរយៈពេល៤ខែដំបូង ស្មើទឹកប្រាក់៤៣២លានដុល្លារអាមេរិក ឬស្មើ៩២% នៃចំនួនការនាំចេញសរុប ។ រីឯថៃនាំចូលទុរេនវៀតណាមស្ថិតក្នុងលំដាប់ទី២ ក្នុងរយៈពេល៤ខែដំបូង ស្មើទឹកប្រាក់២២លាន៥សែនដុល្លារអាមេរិក (ឬស្មើប្រមាណ៨២៣លានបាត) កើនឡើង៨២% បើធៀបនឹងឆ្នាំ២០២៣ ។

Dang Phuc Nguyen អគ្គលេខាធិការសមាគមបន្លែ និងផ្លែឈើវៀតណាម បានពន្យល់ពីមូលហេតុដែលប្រទេសថៃនាំចូលទុរេនវៀតណាមរយៈពេល៤ខែដំបូងឆ្នាំ២០២៤ កើនឡើងជិតទ្វេដង បើធៀបនឹងចុងឆ្នាំ២០២៣ គឺបណ្តាលមកពីថៃជួបគ្រោះរាំងស្ងួត ។ ដូច្នេះ ធ្វើឱ្យបរិមាណទុរេនថៃធ្លាក់ចុះ បើទោះជាថៃជាប្រទេសនាំចេញទុរេននាំមុខគេក្តី ប៉ុន្តែថៃត្រូវទិញទុរេនវៀតណាមដើម្បីបំពេញតម្រូវការក្នុងស្រុក និងភ្ញៀវទេសចរ ។

រីឯនាយកក្រុមហ៊ុន Vinafruit ឈ្មោះ Nguyen Thanh Binh លើកឡើងថា ៖ «ចិនបាននាំចូលទុរេនស្រស់ច្រើនបំផុតពីវៀតណាម ប៉ុន្តែថៃនាំចូលទុរេនក្លាសេច្រើនបំផុតពីវៀតណាមដូចគ្នាដែរ» ។ ទុរេនក្លាសេដែលថៃនាំចូលភាគច្រើន ថៃនឹងលក់បន្តទៅប្រទេសទី៣ ភាគច្រើនលក់ឱ្យចិន ដោយសារវៀតណាមពុំអាចនាំចេញទុរេនក្លាសេដោយផ្ទាល់ទៅចិនបានទេ ។

ចំណែកហុងកុងបាននាំចូលទុរេនវៀតណាម ស្ថិតក្នុងលំដាប់ទី៣ ចាប់ពីខែមករា ដល់ខែមេសា ឆ្នាំ២០២៤ ស្មើទឹកប្រាក់៣លាន៦សែនដុល្លារអាមេរិក ។ ហេតុនេះ សហគមន៍អាជីវកម្មវៀតណាមសង្ឃឹមថា នឹងមានកិច្ចព្រមព្រៀងបឋមរវាងវៀតណាម និងចិន ដើម្បីកែលម្អការនាំចេញ និងជាប្រយោជន៍ដល់កសិករ ក៏ដូចជាអតិថិជនផងដែរ ។

សារព័ត៌មាន The Nation បានចុះផ្សាយពីការលើកឡើងរបស់លោក Atth Phisanwanich អ្នកជំនាញសេដ្ឋកិច្ចអន្តរជាតិ និងជាទីប្រឹក្សាក្រុមហ៊ុន Intelligent Research Consultancy ថា ៖ «អាកាសធាតុមិនអំណោយផលបានធ្វើឱ្យការដាំទុរេននៅថៃ ធ្លាក់ចុះ៤២% ឬស្មើប្រមាណ៥៤ម៉ឺនតោន» ៕

ប្រទេសដាណឺម៉ាក ៖ សារព័ត៌មាន KBN នឹងនាំអារម្មណ៍លោកអ្នកមកទស្សនាភាពស្រស់ស្អាតរបស់ភូមិមួយនៅប្រទេសដាណឺម៉ាក ដែលភូមិនេះបានរចនាម៉ូដឡើងដើម្បីបង្ហាញនូវអត្តសញ្ញាណ និងមានភាពខុសប្លែកពីភូមិផ្សេង ។ បើគេថតរូបភាពភូមិនេះពីផ្នែកខាងលើ វានឹងកាន់តែបង្ហាញទិដ្ឋភាពស្រស់ស្អាតខ្លាំងឡើង ហើយធ្វើឱ្យអ្នកបានឃើញភូមិនេះហើយចង់ទៅរស់នៅគ្រប់ៗគ្នា ។

Brondby Haveby គឺជាឈ្មោះភូមិមួយមានរាងជារង្វង់មូលយ៉ាងស្រស់ស្អាត ប្លែកភ្នែក ឬស្រដៀងគ្នានឹងភីសាដ៏ធំ ដែលបែងចែងជាចំណិតៗមានលំនៅឋានក្នុងនោះ ។ ភូមិនេះមានទំហំមិនធំប៉ុន្មាន ស្ថិតនៅទីក្រុង Brondby ប្រទេសដាណឺម៉ាក និងមានពលរដ្ឋរស់នៅជាង៣៥.០០០នាក់ ។

ភូមិរង្វង់មូលនេះបានរចនាឡើងដោយលោក Erik Mygind ដោយសារលោកបានទទួលគំនិតពីកម្មវិធីមួយឈ្មោះ «Runde Haver» ជារបស់ Carl Theodor Sorensen ដែលជាស្ថាបនិកដ៏អស្ចារ្យនៅដាណឺម៉ាក ។ ការរចនាម៉ូដបែបនេះ គឺដើម្បីឱ្យអ្នករស់នៅភូមិនេះមានឱកាសទទួលបានភាពស្ងប់ស្ងាត់ មិនរញ៉េរញ៉ៃ និងរស់នៅតាមបែបធម្មជាតិប្រកបដោយបរិយាកាសបរិសុទ្ធ ។

ភាពលេចធ្លោរបស់ភូមិ Brondby Haveby គឺវាមានរាងជារង្វង់មូលនៅជិតៗគ្នា និងមានផ្លូវតភ្ជាប់ពីរង្វង់មួយទៅរង្វង់មួយទៀត ។ ការរចនាម៉ូដបែបនេះធ្វើឱ្យពលរដ្ឋរស់នៅក្នុងលំនៅឋាននីមួយៗមានទីធ្លាធំទូលាយ និងស្រឡះល្អ ។ លើសពីនេះ ក្នុងភូមិក៏មានទីធ្លារួមសម្រាប់ឱ្យអ្នកភូមិជួបជុំជជែកគ្នា ឬធ្វើការងារអ្វីមួយរួមគ្នាផងដែរ ។

ក្រៅពីនេះ លំនៅឋានទាំងអស់សុទ្ធតែមានរបងដើមឈើពណ៌បៃតង និងមានសួនច្បារនៅខាងមុខសម្រាប់ធ្វើការងារផ្សេងៗ ។ ការរស់នៅក្នុងភូមិនេះងាយស្រួលយ៉ាងខ្លាំងសម្រាប់អ្នកស្រឡាញ់បរិស្ថាន ដោយសារគ្មានសំឡេងរំខាន ។ កាលពីឆ្នាំ១៩៦៤ អាជ្ញាធរទីក្រុង Brondby បានឯកភាពឱ្យបង្កើតទីក្រុងសួនច្បារ (Garden City) ហើយគម្រោង Brondby Garden City ក៏បានបង្ហាញរូបរាងឡើង ។

ទោះយ៉ាងណា មានច្បាប់ហាមឃាត់មួយ គឺពលរដ្ឋមិនអាចរស់នៅទីនេះជាអចិន្ត្រៃយ៍ទេ ព្រោះភូមិនេះសម្រាប់ឱ្យពលរដ្ឋទីក្រុងមកធ្វើកសិកម្មនៅទិទាឃរដូវ និងរដូវក្តៅ ។ រីឯអ្នកជួលលំនៅឋានអាចចូលស្នាក់នៅ ចាប់ពីថ្ងៃទី១ ខែមេសា រហូតដល់ថ្ងៃទី១ ខែតុលា ជារៀងរាល់ឆ្នាំ ព្រមទាំងថ្ងៃឈប់សម្រាកចុងសប្តាហ៍ ៕

បរទេស៖ Cristiano Ronaldo បានបំបែកកំណត់ត្រាពិភពលោកជាមួយនឹងការចូលខំមិនរូបភាពរបស់ Kylian Mbappe ដោយការខំមិននេះមានអ្នកចូល Like ច្រើនជាងធម្មតា ពោលគឺរហូតដល់ជាង ៥ លាននាក់ឯណោះ ខណៈចំនួននេះគឺមិនធ្លាប់មានពីមុនឡើយ។

យោងតាម Sportbible នៅពេលដែលកីឡាករ Kylian Mbappe បានផ្លាស់ប្តូរទៅកាន់ក្លឹបបាល់ទាត់ក្នុងក្តីស្រមៃរបស់លោកគឺ Real Madrid ក្នុងប៉ុន្មានថ្ងៃថ្មីៗនេះ។ លោកក៏បានបង្ហោះរូបភាពខ្លួនពាក់អាវ Real Madrid កាលពីនៅក្មេងជាមួយ Idol ខ្លួនគឺ Ronaldo នៅលើ Instagram របស់លោក អមដោយសំណេរយ៉ាងវែងថា “សុបិន្តក្លាយជាការពិត” រីករាយ និងមោទនៈភាពណាស់ដែលខ្ញុំបានក្លាយជាកីឡាកររបស់ Real Madrid វាជាផ្នែកមួយនៃក្តីស្រមៃរបស់ខ្ញុំ វាមិនអាចទៅរួចទេក្នុងការពន្យល់ពីអារម្មណ៍រីករាយ និងរំភើបនៅពេលនេះ។ ខ្ញុំមិនអាចរង់ចាំជួបអ្នក Madridistas ហើយសូមអរគុណចំពោះការគាំទ្រដ៏អស្ចារ្យរបស់អ្នក។

ភ្លាមនោះ Ronaldo ដែលជាអតីតវិរបុរសរបស់ក្លឹបនេះក៏បានចូលខំមិនថា “រំភើបណាស់ដែលបានឃើញឈានជើងនៅ Bernabeu…hala Madrid”។ ជុំវិញការខំមិននេះ គឺបានធ្វើឱ្យ Cristiano Ronaldo បំបែកកំណត់ត្រាពិភពលោក ដោយការខំមិននេះមានអ្នកចូល Like ច្រើនជាងធម្មតា ពោលគឺរហូតដល់ជាង ៥ លាននាក់ឯណោះ ខណៈចំនួននេះគឺមិនធ្លាប់មានពីមុនឡើយ។

គួរបញ្ជាក់ដែរថា Mbappe គឺជាអ្នកគាំទ្រដ៏កំពូលម្នាក់របស់ Ronaldo នៅពេលអ្នកទាំងពីរបង្ហាញភាពស្និតស្នាលគ្នានៅក្នុងបណ្តាញសង្គម ធ្វើឱ្យអ្នកគាំទ្រមានការរំភើបជាខ្លាំង។ កាលពីថ្ងៃទី៤ មិថុនា កន្លងទៅ ក្លឹប Real Madrid បានប្រកាសជាផ្លូវការអំពីការចុះកុងត្រាយកខ្សែប្រយុទ្ធឆ្នើម Kylian Mbappe ដោយគ្មានតម្លៃខ្លួន ក្នុងកុងត្រារយៈពេល ៥ ឆ្នាំ ខណៈការមកដល់របស់កីឡាករសញ្ជាតិបារាំងរូបនេះ ត្រូវបានគេរំពឹងថា នឹងធ្វើឱ្យក្រុមអធិរាជសក្លាយជាខ្លាដុះស្លាបតែម្តង៕

ដឹងអត់ថា ខ្សាច់សម្រាប់ប្រើប្រាស់ក្នុងការងារសំណង់ គឺគេយកពីក្នុងទន្លេ និងជាខ្សាច់ពុំបានកើតឡើងដោយសារការផ្ទុះភ្នំភ្លើង ។ រីឯខ្សាច់ក្នុងសមុទ្រខ្សាច់ ឬខ្សាច់នៅឆ្នេរសមុទ្រ វាមានសភាពល្អិតខ្លាំងពេក និងមានរូបរាងខុសគ្នាពីខ្សាច់ទន្លេ ទើបក្លាយជាមូលហេតុធ្វើឱ្យប្រសិទ្ធភាពនៃការស្អិតជាប់គ្នារបស់អគារតិចជាងខ្សាច់ទន្លេ ។

ខ្សាច់ក្នុងសមុទ្រខ្សាច់ គឺសម្បូរដោយសារធាតុមិនបរិសុទ្ធជាច្រើន ថែមទាំងមានទំហំតូចៗផងដែរ ។ សារធាតុមិនបរិសុទ្ធក្នុងខ្សាច់ទាំងនេះ ក៏មានសារធាតុអំបិលផងដែរ ហើយការយកសារធាតុមិនបរិសុទ្ធចេញពីខ្សាច់ គឺត្រូវចំណាយប្រាក់ច្រើន និងពិបាក ។

រីឯការយកខ្សាច់នៅឆ្នេរសមុទ្រមកប្រើប្រាស់ក្នុងការងារសំណង់ គឺវាពុំអាចជាប់គ្នាបានល្អទេ ឬមិនណែន ទើបគេមិនយកវាមកប្រើប្រាស់ក្នុងការងារសំណង់ ។ ម្យ៉ាងទៀត ខ្សាច់ឆ្នេរសមុទ្រសម្បូរដោយសារធាតុអំបិលបង្កឱ្យសំណង់ពុំរឹងមាំ និងឆាប់បែកបាក់ ។ ហេតុនេះ បើពេលវេលាកន្លងផុតទៅច្រើនឆ្នាំ អគារទាំងមូលនឹងជ្រាបទឹក ។

ប្រសិនបើយកខ្សាច់នៅឆ្នេរសមុទ្រមកប្រើប្រាស់ក្នុងការងារសំណង់ គឺសារធាតុអំបិលក្នុងខ្សាច់ឆ្នេរសមុទ្រនឹងទទួលយកជាតិសំណើមក្នុងអគារ ហើយវានឹងសន្សំសំណើមនេះកាន់តែច្រើនឡើងៗ ។ ដូច្នេះ គ្មានអ្នកណាម្នាក់ចង់ឱ្យលំនៅឋាន ឬអគាររបស់ខ្លួនមានសំណើម ឬមានក្លិនស្អុយទេ ។

ម្យ៉ាងទៀត ខ្សាច់នៅឆ្នេរសមុទ្រមានសារធាតុក្លរៃ ហើយសារធាតុនេះនឹងបំផ្លាញភាពទន់របស់ដែកក្នុងសំណង់អគារ ។ ពេលនោះ គុណភាពដែកនឹងធ្លាក់ចុះ ដោយសារដែក និងសារធាតុក្លរៃពុំស៊ីគ្នា ។

សរុបមក ខ្សាច់ក្នុងសមុទ្រខ្សាច់មានភាគល្អិតស៊ីលីកាច្រើនខ្លាំង និងផុយស្រួយ ហើយបើយកវាមកប្រើក្នុងការងារសំណង់នឹងធ្វើឱ្យអគារឆាប់ប្រេះបាក់ ។ រីឯខ្សាច់នៅឆ្នេរសមុទ្រមានសារធាតុអំបិល និងជាតិអាស៊ីតច្រើនធ្វើឱ្យអគារពុំរឹងមាំដូចគ្នា ។ ហេតុនេះ ជម្រើសល្អបំផុត គឺត្រូវយកខ្សាច់ពីទន្លេមកប្រើប្រាស់ក្នុងការងារសំណង់ ទើបធ្វើឱ្យអគារមានសភាពរឹងមាំល្អ ៕

Ha Long និង Bai Tu Long គឺជាឈូងសមុទ្រធំៗចំនួន២ ស្ថិតនៅក្នុងខេត្ត Quang Ninh ប្រទេសវៀតណាម នៅទីនោះគឺមានផ្ទាំងទស្សនីយភាពនៃធម្មជាតិគួរជាទីគន់គន់ ដែលត្រូវជាបេតិកភណ្ឌធម្មជាតិពិភពលោក។ ខណៈនៅលើឈូងសមុទ្រ Ha Long គឺរួមមានភូមិបណ្តែតទឹកដ៏លេចធ្លោចំនួន៥កន្លែង ទាក់ទាញភ្ញៀវទេសចរមិនដែលដាច់នោះឡើយ។

ដោយសារប្រជាជនខេត្ត Quang Ninh រស់នៅតាមមាត់សមុទ្រជាច្រើនជំនាន់ ភូមិនេសាទឬក៏ភូមិបណ្តែតទឹកនៅលើឈូងសមុទ្រ Ha Long នេះក៏បានលេចឡើងជាបន្តបន្ទាប់ និងបានប្រែក្លាយជាកន្លែងទេសចរណ៍ដ៏អស្ចារ្យបំផុតសម្រាប់ភ្ញៀវទេសចរគ្រប់ៗរូបដែលបានមកទស្សនាឈូងសមុទ្រ Ha Long និង Bai Tu Long ។

ថ្វីត្បិតតែអ្នកនេសាទមួយចំនួនត្រូវបានផ្លាស់ឲ្យទៅរស់នៅលើច្រាំងទៅហើយក្តី ប៉ុន្តែក៏នៅតែប្រជាជនវៀតណាមជាច្រើនទៀត ដែលកំពុងបន្តរស់នៅលើឈូងសមុទ្រតាំងពីបុរាណកាលរហូតមកដល់បច្ចុប្បន្ន ហើយក៏បានក្លាយជាតំបន់ទេសទេសចរណ៍ប្លែកៗនិងទាក់ទាញបំផុត។ ជាពិសេសនាពេលថ្មីៗនេះ ការអភិរក្ស និងកែសម្រួលនៃភូមិនេសាទបុរាណនៅលើឈូងសមុទ្រហាឡុងនេះរួមមាន៖ ការអភិរក្សផ្ទះក្បូនរបស់អ្នកនេសាទ សាលារៀន បណ្ណាល័យ ផ្សារទំនិញ អាជីវកម្ម កសិដ្ឋានគុជខ្យងជាដើម។

ឈូងសមុទ្រ Ha Long មិនត្រឹមតែជាទេសភាពដ៏ប្លែកមួយប៉ុណ្ណោះទេ ប៉ុន្តែវាគឺបានឆ្លុះបញ្ចាំងពីវប្បធម៌ប្រពៃណីរបស់ជនជាតិវៀតណាម។ នៅពេលទៅទស្សនាភូមិនេសាទ ភ្ញៀវទេសចរនឹងអាចយល់ដឹងពីជីវភាពរស់នៅប្រចាំថ្ងៃរបស់ពលរដ្ឋទីនោះ ទាំងទំនៀមទម្លាប់ និងរបរចិញ្ចឹមជីវិតជាអ្នកនេសាទ។ អ្នកគឺអាចមើលឃើញពីទិដ្ឋភាពដ៏ស្រស់ត្រកាលនៃធម្មជាតិទីនោះ ស្វែងយល់អំពីរឿងរ៉ាវប្រវត្តិសាស្ត្រ វប្បធម៌ និងធ្វើការសិក្សាស្រាវជ្រាវនានាពីប្រព័ន្ធជីវចម្រុះ។

គួរបញ្ជាក់ថា ភូមិបណ្តែតទឹកចំនួន៥ដែលស្ថិតនៅលើឈូងសមុទ្រហាឡុងនេះរួមមាន ភូមិបណ្តែតទឹក Cua Van ,ភូមិបណ្តែតទឹក Vung Vieng ,ភូមិបណ្តែតទឹក Ba Hang, ភូមិបណ្តែតទឹកCong Dam ,ភូមិបណ្តែតទឹក Viet Hai៕

ប្រទេសអង់គ្លេស ៖ យើងអាចធ្លាប់ឃើញស្បែកជើងមានតម្លៃថ្លៃៗជាច្រើន ប៉ុន្តែស្បែកជើងទាំងនោះមិនធ្វើឱ្យយើងភ្ញាក់ផ្អើលដូចស្បែកជើង១គូនេះឡើយ ពីព្រោះវាមិនត្រឹមតែស្រស់ស្អាតបុណ្ណោះទេ ប៉ុន្តែបានជាប់ចំណាត់ថ្នាក់ជាស្បែកជើងមានតម្លៃខ្ពស់បំផុតលើពិភពលោកផងដែរ ។

ស្បែកជើងកែងដ៏ស្រស់ស្អាត១គូនេះបានផលិតពីមាសមានតម្លៃ និងគ្រាប់ពេជ្រដ៏កម្រ ហើយត្រូវបានរចនាម៉ូដដោយអ្នកច្នៃម៉ូដល្បីឈ្មោះជនជាតិអង់គ្លេស គឺអ្នកស្រី Debbie Wingham តាមការកុម្ម៉ង់របស់មហាសេដ្ឋីឌូបៃ ។ អ្នកស្រីជាអ្នករចនាម៉ូដផលិតផលល្បីៗ និងប្រណីតជាច្រើនម៉ាក ហើយអ្នកស្រីត្រូវបានមហាជនស្គាល់ថា ជាអ្នកបង្កើតរបស់ប្រណីតថ្លៃៗលើពិភពលោក ។

កន្លងមក អ្នកស្រីធ្លាប់បានរចនារ៉ូបដ៏ស្អាតបំផុតឈ្មោះ Red Diamond Abaya ដែលលម្អទៅដោយគ្រាប់ពេជ្រ២ពណ៌ គឺពណ៌ខ្មៅ និងក្រហម ព្រមទាំងអង្កាំចំនួន២.០០០គ្រាប់ ។ រីឯតម្លៃរបស់រ៉ូបនេះវិញ គឺស្មើប្រមាណ១៥លាន៤សែន៥ម៉ឺនដុល្លារអាមេរិក ។ លើសពីនេះ អ្នកស្រីបានធ្វើនំខេកបង្កប់គ្រាប់ពេជ្រចំនួន៤.០០០គ្រាប់ សម្រាប់ថ្ងៃខួបកំណើតកូនស្រីមហាសេដ្ឋីអេមីរ៉ាត ដែលមានតម្លៃរហូតដល់៦៤លានដុល្លារអាមេរិក ។

ចំណែកស្បែកជើងមានតម្លៃខ្ពស់នេះ គឺមហាសេដ្ឋីឌូបៃម្នាក់បានកុម្ម៉ង់ឱ្យអ្នកស្រីធ្វើ សម្រាប់ជារង្វាន់ថ្ងៃខួបកំណើតសមាជិកគ្រួសារដ៏ពិសេស ។ ស្បែកជើងនេះតុបតែងលម្អទៅដោយពេជ្រពណ៌ផ្កាឈូក និងពណ៌ខៀវគ្រាប់ធំ ដែលជាពេជ្រកម្រ និងមានតម្លៃស្មើ១៣លានដុល្លារអាមេរិក ។ ក្រៅពីនេះ មានពេជ្រពណ៌ស និងពេជ្ររាងស៊ីឡាំង ចំនួន១.០០០គ្រាប់ ក៏បានបង្កប់ក្នុងស្បែកជើងនេះដែរ ។

ក្រៅពីការតុបតែងលម្អដោយគ្រាប់ពេជ្រចម្រុះពណ៌ ស្បែកជើងនេះក៏មានខ្សែរ៉ូត និងបន្ទះដែកនៅផ្នែកខាងក្រោមផលិតពីមាសរឹង ។ រីឯតួស្បែកជើងធ្វើពីស្បែកសុទ្ធស្រោបមាស ព្រមទាំងមានផ្កាកុលាបពណ៌មាសគួរឱ្យស្រឡាញ់ដើម្បីឱ្យកាន់តែប្រណីតថែមទៀត ។

ក្រៅពីនេះ អ្នកស្រីបានសហការជាមួយវិចិត្រករសហសម័យនៅរដ្ឋផ្លរីដា សហរដ្ឋអាមេរិក ឈ្មោះ Chris Campbell ដែលបានមកជួយរចនាម៉ូដស្បែកជើងនេះ ។ ពួកគេបានចំណាយពេលអស់ជាច្រើនម៉ោង ទើបអាចរចនាម៉ូដស្បែកជើងបាន ហើយវាជាស្នាដៃចុងក្រោយរបស់អ្នកស្រី ៕

បរទេស៖ ក្រុមហ៊ុនជប៉ុន Toyota ថ្មីៗនេះបានប្រកាសឈប់លក់រថយន្តសាំងនៅក្នុងទីផ្សារអូស្ត្រាលី ដោយផ្តោតតែលើរថយន្តកូនកាត់ និងរថយន្តអគ្គិសនីប៉ុណ្ណោះ។ ដូច្នេះម៉ូដែលរថយន្តសាំងតួខ្ពស់ដូចជា RAV4, Kluger, Corolla Cross ក៏ដូចជារថយន្ត Camry និង Corolla នឹងលែងផលិតចាប់ពីថ្ងៃទី៥ ខែមិថុនា ឆ្នាំ២០២៤ នេះតទៅ។
យោងតាម Toyota Australia បានឱ្យដឹងទៀតថា ក្រុមហ៊ុននឹងលក់តែម៉ូដែលកូនកាត់ និងអគ្គិសនីប៉ុណ្ណោះ នៅពេលដែលការលក់រថយន្តទាំងនេះឈានដល់ដំណាក់កាលល្អបំផុត។

លោក Sean Hanley អនុប្រធានផ្នែកលក់ ទីផ្សារនិង Franchise របស់ Toyota Australia បាននិយាយថា ការអភិវឌ្ឍន៍ដ៏សំខាន់នេះ នឹងពន្លឿននិន្នាការនៃការលក់រថយន្តកូនកាត់ឱ្យកាន់តែប្រសើរឡើង នៅពេលដែលរថយន្តនេះបានឈានដល់កម្រិតកំណត់ត្រាខ្ពស់បំផុតមិនធ្លាប់មាន។ នៅក្នុងប្រទេសអូស្ត្រាលីបច្ចុប្បន្នការលក់រថយន្តកូនកាត់គឺមានច្រើនជាង ៩៥% នៃការលក់រថយន្តសាំង ខណៈរថយន្តសាំងលែងជាតម្រូវការរបស់ប្រជាជនអូស្ត្រាលីទៀតហើយ។

ទោះជាយ៉ាងណា រថយន្តដូចជា RAV4, Kluger, Corolla Cross, Camry និង Corolla គឺក្រុមហ៊ុនឈប់ផលិតជាប្រភេទកំណែម៉ាស៊ីនសាំង មានន័យថាក្រុមហ៊ុននឹងយករថយន្តទាំងនេះទៅផលិតកែច្នៃជារថយន្តកូនកាត់វិញ ដោយបង្កើនតម្លៃទ្វេរដង។ ជាឧទាហរណ៍ រថយន្តសាំង Kluger ជាធម្មតាមានតម្លៃជាង ៣៥,០០០ ដុល្លារ ប៉ុន្តែនៅពេល Update ទៅជារថយន្តកូនកាត់(សាំង-អគ្គិសនី) វិញគឺអាចមានតម្លៃចាប់ពី ៤ ម៉ឺនដុល្លារអាមេរិកឡើងទៅ។

គួរបញ្ជាក់ដែរថា សព្វថ្ងៃនៅប្រទេសអូស្ត្រាលីគឺមានរថយន្តតូយ៉ូតាកូនកាត់ជាង ៤៣០,០០០ គ្រឿងត្រូវបានលក់ចាប់តាំងពីម៉ូដែល Prius ត្រូវបានដាក់លក់ក្នុងខែតុលា ឆ្នាំ ២០០១ ដែលក្នុងនោះប្រហែល ៣៣% ត្រូវបានលក់ក្នុងរយៈពេលពីរឆ្នាំកន្លងមក។ នៅក្នុងខែឧសភា រថយន្តកូនកាត់មានចំនួនរហូតដល់ ៤៨.៩% នៃការលក់របស់ក្រុមហ៊ុនតូយ៉ូតានៅក្នុងទីផ្សារនេះ។ នៅឆ្នាំ ២០២៣ ផលិតផលដែលបំពាក់ដោយម៉ាស៊ីនកូនកាត់មានចំនួនរហូតដល់ ៣៣.៥% នៃការលក់សរុប៕