ប្រទេសចិន ៖ ពាក្យថា «ទីក្រុង» គឺតែងតែមានទីតាំងស្ថិតនៅបរិវេណធំទូលំទូលាយ និងបង្កលក្ខណៈងាយស្រួលដល់អ្នករស់នៅគ្រប់បែបយ៉ាង ប៉ុន្តែទីក្រុងមួយរបស់ចិនឈ្មោះ «Yanjin» គ្មានចំណុចទាំងអស់នេះទេ ។ ទីក្រុង Yanjin ត្រូវបានសាងសង់ឡើងនៅតាមចន្លោះជ្រលងភ្នំខ្ពស់ៗ និងចង្អៀតខ្លាំង ទើបធ្វើឱ្យទីក្រុងនេះជាប់ចំណាត់ថ្នាក់ជាទីក្រុងតូចចង្អៀតបំផុតនៅលើពិភពលោក ។

Yanjin គឺជាទីក្រុងលាតសន្ធឹងនៅតាមបណ្តោយទន្លេណានស៊ី និងត្រូវបានគេសាងសង់ឡើងនៅកន្លែងដ៏តូចចង្អៀតស្ថិតនៅចន្លោះជួរភ្នំខ្ពស់ៗរបស់ខេត្តយូណាន ។ តាមរយៈការពិនិត្យមើលរូបភាពរបស់ទីក្រុង គឺទីតាំងនេះពុំសាកសមនឹងបង្កើតជាទីក្រុង និងមានមនុស្សរស់នៅនោះទេ ប៉ុន្តែវាសាកសមជាតំបន់ដាច់ស្រយាល ។

លំនៅឋានក្នុងទីក្រុងត្រូវបានសាងសង់ឡើងបែបសាមញ្ញៗ, មានអគារខ្ពស់ៗជាច្រើននៅតាមមាត់ទន្លេ និងមានពលរដ្ឋរស់នៅសរុបចំនួន៤៥ម៉ឺននាក់ ។ រីឯមូលហេតុធ្វើឱ្យ Yanjin ជាប់ចំណាត់ថ្នាក់ជាទីក្រុងតូចចង្អៀតបំផុតលើពិភពលោក គឺដោយសារចំណុចចង្អៀតបំផុតរបស់ទីក្រុងនេះ មានប្រវែងត្រឹមតែ៣០ម៉ែត្រប៉ុណ្ណោះ ខណៈចំណុចធំទូលាយរបស់ទីក្រុង មានប្រវែង៣០០ម៉ែត្រ ។

ចំពោះការធ្វើដំណើររបស់ពលរដ្ឋរស់នៅក្នុងទីក្រុងវិញ គឺពួកគេនឹងប្រើប្រាស់ផ្លូវធំនៅសងខាងទន្លេ ដែលលាតសន្ធឹងស្របគ្នាជាមួយទីក្រុងមានប្រវែងវែងជាច្រើនគីឡូម៉ែត្រ ។ ការធ្វើដំណើរចេញ-ចូលទីក្រុងទៅកាន់ទីក្រុងផ្សេង គឺពួកគេនឹងប្រើប្រាស់ផ្លូវតែ១ខ្សែប៉ុណ្ណោះ ហើយបើទោះជាទីក្រុងនេះស្ថិតនៅសងខាងទន្លេក្តី ប៉ុន្តែក្នុងទីក្រុងពុំមានស្ពានច្រើនកន្លែងសម្រាប់ឱ្យពលរដ្ឋឆ្លងកាត់ទេ ។

ក្រៅពីទីក្រុងមានសភាពតូចចង្អៀតហើយ អ្វីដែលធ្វើឱ្យប្លែកភ្នែកបំផុតនោះ គឺអាផាតមិន ឬអគារជាច្រើនកន្លែងនៅតាមមាត់ទន្លេណានស៊ី គឺបានសាងសង់ឡើងនៅលើបង្គោលខ្ពស់ ដើម្បីការពារទឹកជំនន់ដោយសារកម្រិតទឹកទន្លេឡើងខ្ពស់ ។ ហេតុនេះ អ្នកដែលបានឃើញរូបអគារទាំងនេះហើយនឹងមានអារម្មណ៍ភ័យខ្លាច និងគិតថា អគារទាំងនេះគ្មានសុវត្ថិភាព ។

ទីក្រុងនេះមានពលរដ្ឋរស់នៅរាប់រយឆ្នាំមកហើយ ហើយបើទោះជាវាមានសភាពតូចចង្អៀតក្តី ប៉ុន្តែពលរដ្ឋនៅទីនេះពុំចង់ផ្លាស់ប្តូរទីលំនៅចេញពីទីក្រុងទេ ។ ហេតុនេះ ពេលចំនួនពលរដ្ឋកើនឡើងកាន់តែច្រើន វាធ្វើឱ្យដីធ្លីក្នុងតំបន់មានកំណត់ និងពុំគ្រប់គ្រាន់សម្រាប់ពលរដ្ឋរស់នៅ ។

វិធីដោះស្រាយល្អបំផុត គឺពួកគេបានសម្រេចចិត្តសាងសង់អគារឱ្យកាន់តែខ្ពស់ជាងមុន ដើម្បីទប់ទល់នឹងកំណើនពលរដ្ឋក្នុងទីក្រុង ៕

យោងតាមការស្រាវជ្រាវថ្មីមួយបង្ហាញថា យើងពុំគួរសាកថ្មទូរស័ព្ទដៃពេញរហូតដល់១០០% នោះទេ ប៉ុន្តែគួរតែសាកថ្មត្រឹមតែ៨០% ដើម្បីកុំឱ្យវាឆាប់ខូចថ្ម និងអាចប្រើប្រាស់បានយូរអង្វែង ។ លើសពីនេះ បើពុំចង់ឱ្យថ្មឆាប់ខូច គួរតែចៀសវាងការសាកថ្មពេលទូរស័ព្ទកំពុងក្តៅខ្លាំង ។

មនុស្សភាគច្រើនយល់ឃើញថា គួរតែសាកថ្មទូរស័ព្ទឱ្យបាន១០០% ដើម្បីអាចប្រើប្រាស់ទូរស័ព្ទបានរយៈពេលយូរ ហើយពុំចាំបាច់មកអង្គុយសាកថ្មញឹកញាប់ ។ ប៉ុន្តែការពិត ការសាកថ្មពេញពេក បែរជាធ្វើឱ្យទូរស័ព្ទរបស់យើងឆាប់ខូចថ្ម ហើយយើងនឹងពុំអាចប្រើប្រាស់ទូរស័ព្ទបានយូរឆ្នាំទេ ។

បច្ចុប្បន្ន សារធាតុលីចូម ត្រូវបានគេប្រើប្រាស់ធ្វើជាសមាសធាតុផ្សំដ៏សំខាន់សម្រាប់ផលិតថ្មទូរស័ព្ទ ដោយសារវាមានគុណសម្បត្តិអាចសាកថ្មបានឆាប់រហ័ស និងមានសុពលភាពប្រើប្រាស់បានយូរជាងថ្មផ្សេងៗ ។ ហេតុនេះ ទើបក្រុមហ៊ុនផលិតទូរស័ព្ទដៃ និងសម្ភារៈអគ្គិសនីប្រើប្រាស់ថ្មទូទាំងពិភពលោក ងាកមកប្រើប្រាស់ថ្មផលិតពីសារធាតុលីចូមភាគច្រើន ។

ការស្រាវជ្រាវថ្មីបង្ហាញថា ថ្មផលិតពីសារធាតុលីចូមនឹងមានសុពលភាពប្រើប្រាស់រយៈពេលយូរជាងថ្មផ្សេងៗ បើយើងសាកថ្មត្រឹមតែ៨០% ។ ចំណុចសំខាន់ យើងពុំគួររង់ចាំរហូតដល់ទូរស័ព្ទអស់ថ្មរលីង ទើបយកវាមកសាក ឬសាកថ្មរហូតដល់១០០% ទេ ពីព្រោះការសាកថ្មពេញពេក វានឹងធ្វើឱ្យតង់ស្យុងឡើងខ្ពស់ ឬធ្វើឱ្យថ្មប្រើប្រាស់ពុំបានយូរ ។ នេះជាមូលហេតុធ្វើឱ្យទូរស័ព្ទ iPhone ថ្មីៗតែងតែផ្តាច់ចរន្តអគ្គិសនីដោយស្វ័យប្រវត្តិ ពេលយើងសាកថ្មបាន៨០% ។

យើងគួរតែព្យាយាមសាកថ្មទូរស័ព្ទត្រឹមតែ៨០% បានហើយ និងគួរចៀសវាងការសាកថ្មនៅពេលទូរស័ព្ទកំពុងក្តៅ ។ បើទូរស័ព្ទក្តៅខ្លាំងពេលកំពុងសាកថ្ម ចូរឈប់សាកវាសិន ហើយយើងអាចសាកថ្មបន្តទៀតពេលទូរស័ព្ទត្រជាក់ ។ ហេតុនេះ បើអាចអនុវត្តតាមចំណុចខាងលើបាន វានឹងជួយធ្វើឱ្យថ្មទូរស័ព្ទយើងប្រើប្រាស់បានយូរអង្វែង ៕

ប្រទេសកាណាដា ៖ រូបភាពដែលយើងគ្រប់គ្នាបានឃើញនេះ មិនមែនជាកម្រាលឥដ្ឋនោះទេ ប៉ុន្តែវាជាបឹងទឹកប្រៃពោរពេញទៅដោយរង្វង់មូលតូច-ធំជាច្រើន ដែលមានឈ្មោះថា «Spotted Lake» ហើយទឹកបឹងនេះពុំបានតភ្ជាប់ជាមួយទន្លេ ឬប្រភពទឹកខាងក្រៅទេ ។ បឹងនេះស្ថិតនៅខេត្ត British Columbia ប្រទេសកាណាដា ហើយអ្នកស្រុករស់នៅក្នុងតំបន់បានហៅបឹងនេះថា «Khiluk» ។

ទឹកក្នុងបឹងបានមកពីដុំព្រិលរលាយនៅលើភ្នំ និងទឹកភ្លៀង ដែលប្រមូលផ្តុំគ្នាអស់រយៈពេលជាច្រើនឆ្នាំបង្កើតបានជាទឹកប្រៃ ។ ចំណែករង្វង់មូលតូច-ធំ ដែលយើងបានឃើញក្នុងបឹងនេះ វាជាសារធាតុរ៉ែប្រមូលផ្តុំគ្នាយ៉ាងក្រាស់ ដូចជា ៖ សារធាតុម៉ាញ៉េស្យូមស៊ុលហ្វាត, សូដ្យូមស៊ុលហ្វាត, កាល់ស្យូម និងសារធាតុរ៉ែជាច្រើនប្រភេទទៀត ។

អ្នកស្រុករស់នៅតាមជ្រលងភ្នំអូខាណាកែន ចាត់ទុកថា បឹង Spotted Lake គឺជាទីកន្លែងស័ក្តិសិទ្ធិមួយ ហើយពួកគេមានជំនឿថា ដីភក់ និងទឹកក្នុងបឹងនេះអាចជួយព្យាបាលជំងឺផ្សេងៗឱ្យជាសះស្បើយបាន ។

នៅរៀងរាល់រដូវក្តៅ កម្រិតទឹកក្នុងបឹងនឹងស្រកចុះជាបន្តបន្ទាប់ និងរីងស្ងួតអស់ ពេលនោះ រង្វង់មូលធំៗរាប់រយស្ថិតនៅបាតបឹងដែលគេពុំធ្លាប់បានឃើញ នឹងបង្ហាញរូបរាងឡើងមានពណ៌ចម្រុះគ្នា ដូចជា ៖ ពណ៌លឿង, ខៀវ និងបៃតង ។ វាបានក្លាយជាបឹងមួយមានពណ៌ស្រស់ស្អាតបំផុត ហើយដោយសារទឹកបឹងនេះពុំបានហូរចូលក្នុងទន្លេ ឬហូរទៅទីកន្លែងផ្សេង ទើបនៅពេលព្រិលរលាយហូរចូលក្នុងបឹង វាក៏នាំសារធាតុរ៉ែ និងអំបិលមកប្រមូលផ្តុំគ្នាអស់ជាច្រើនសតវត្សរ៍ ។

ក្នុងអំឡុងពេលសង្គ្រាមលោក លើកទី១ សារធាតុរ៉ែជាច្រើនកន្លែងក្នុងបឹងត្រូវបានគេយកទៅផលិតជាគ្រាប់កាំភ្លើង ។ នៅសម័យនោះ អ្នកមានទ្រព្យសម្បត្តិស្តុកស្តម្ភម្នាក់បានព្យាយាមទិញដីនៅជុំវិញបឹងនេះធ្វើជាកន្លែងម៉ាស្សា ប៉ុន្តែអាជ្ញាធរបានរក្សាវាទុកធ្វើជាសម្បត្តិធម្មជាតិសម្រាប់មនុស្សជំនាន់ក្រោយ ។

បច្ចុប្បន្ន បឹង Spotted Lake បានក្លាយជាតំបន់វប្បធម៌ និងអេកូឡូស៊ីរបស់ប្រទេសកាណាដា ហើយអាជ្ញាធរបានធ្វើរបងការពារ និងរឹតបន្តឹងការចេញ-ចូលក្នុងបរិវេណនេះ ប៉ុន្តែភ្ញៀវទេសចរអាចមកកម្សាន្តនៅទីនេះនារដូវក្តៅបាន ៕

បរទេស៖ យោងតាម The Guardian ដែលបានចុះផ្សាយកាលពីថ្ងៃទី២៣ ខែមិថុនា ឆ្នាំ២០២៤ ថាកូនឆ្កែ Wild Thang បានឈ្នះពានរង្វាន់ជាឆ្កែដ៏អាក្រក់បំផុតរបស់ពិភពលោក បន្ទាប់ពីយកឈ្នះដៃគូប្រកួតប្រជែងចំនួន ៧ ក្បាលផ្សេងទៀតនៅក្នុងការប្រកួត Ugliest Dog នៃរដ្ឋ California សហរដ្ឋអាមេរិកកាលពីពេលថ្មីៗនេះ។
យោងតាម Ann Lewis ដែលជាម្ចាស់របស់ Wild Thang បាននិយាយថា កូនឆ្កែនេះគឺមានអាយុ ៨ ឆ្នាំ បានចូលរួមក្នុងការប្រលងឆ្កែ Ugliest Dog របស់ពិភពលោកចំនួន ៤ ដងហើយ ប៉ុន្តែមិនទទួលបានជោគជ័យទេ ទោះជាយ៉ាងណានៅការប្រកួតលើកទី ៥ វាក៏បានឈ្នះពានរង្វាន់ជាឆ្កែដ៏អាក្រក់បំផុតលើលោក ដែលនេះគឺជាជ័យជម្នះលើកដំបូងហើយរបស់វា។

ការប្រលងឆ្កែដែលអាក្រក់បំផុតរបស់ពិភពលោកត្រូវបានប្រារព្ធឡើងជារៀងរាល់ឆ្នាំអស់រយៈពេលជិត ៥០ ឆ្នាំមកហើយ ដោយមានគោលដៅសង្កត់ធ្ងន់លើសារៈសំខាន់នៃការស្រឡាញ់សត្វទាំងអស់ស្មើគ្នាៗ និងអត្ថប្រយោជន៍នៃការចិញ្ចឹមវា។ នៅក្នុងកម្មវិធីនោះ មានសត្វឆ្កែចំនួនប្រាំបីក្បាលបានប្រកួតប្រជែងនៅឯពិព័រណ៍ Sonoma-Marin ឆ្នាំ ២០២៤ នៃ Petaluma ក្នុងរដ្ឋ California សហរដ្ឋអាមេរិកកាលពីថ្ងៃទី២១ ខែមិថុនា។ ភាគច្រើនឆ្កែទាំងនេះរស់នៅក្នុងជម្រកសង្គ្រោះសត្វឆ្កែ មុនពេលវាត្រូវបានគេយកទៅចិញ្ចឹម។

កូនឆ្កែ Wild Thang មកពីទីក្រុង Coos Bay រដ្ឋ Oregon ត្រូវបានគេធ្វើរោគវិនិច្ឆ័យថាមានជម្ងឺ Care’s នៅពេលវាមានអាយុ ១០ ខែដែលធ្វើឱ្យវាមិនអាចមានធ្មេញ និងមានបញ្ហាសាច់ដុំនៅជើងម្ខាង ហើយមុខវិញគឺអាក្រក់ខ្លាំង។ Ann Lewis ដែលជាម្ចាស់របស់ Wild Thang ត្រូវបានគេរំពឹងថានឹងទទួលបានប្រាក់រង្វាន់ចំនួន ៥ ពាន់ដុល្លារហើយនឹងបង្ហាញខ្លួននៅក្នុងកម្មវិធី NBC Today ។ គណៈវិនិច្ឆ័យក្នុងឆ្នាំនេះ រួមមានអ្នករាយការណ៍ព័ត៌មាន NBC News លោក Gadi Schwartz សកម្មជនសិទ្ធិមនុស្ស Linda Witong Abrahm និងរតនាគាររដ្ឋកាលីហ្វ័រញ៉ា Fiona Ma ។

គួរបញ្ជាក់ដែរថា សម្រាប់ចំណាត់ថ្នាក់លេខ ២ នៃការប្រកួតនេះគឺបានទៅលើសត្វឆ្កែអាយុ ១៤ ឆ្នាំឈ្មោះ Rome ហើយចំណាត់ថ្នាក់លេខ ៣ បានទៅលើសត្វឆ្កែពូជចម្រុះពណ៌ស Daisy Mae អាយុ ១៤។ បន្ថែមពីលើរង្វាន់ដែលសម្រេចដោយគណៈវិនិច្ឆ័យ សត្វឆ្កែដែលចូលរួមក៏មានឱកាសទទួលបានរង្វាន់ពីអ្នកបោះឆ្នោតតាមអ៊ីនធឺណិតផងដែរ ដូច្នេះនៅឆ្នាំនេះពានរង្វាន់ឆ្កែអាក្រក់បំផុតក្នុងលោកគឺជាកម្មសិទ្ធិរបស់ទីក្រុងរ៉ូម៕

បរទេស៖ ទោះបីជាបច្ចុប្បន្នប្រទេសជប៉ុនមានភ្ញៀវទេសចរបរទេសមកទស្សនាលើសទម្ងន់ក៏ដោយ ក៏ប្រទេសនេះនៅតែចង់បង្កើនចំនួនភ្ញៀវអន្តរជាតិទ្វេដងរហូតដល់ ៦០ លាននាក់បន្ថែមទៀតនៅឆ្នាំនេះ ដោយផ្តោតលើអតិថិជនដែលមានការចំណាយខ្ពស់។

យោងតាមស្នងការទីភ្នាក់ងារទេសចរណ៍ជប៉ុន (JTA) លោក Ichiro Takahashi កាលពីពេលថ្មីៗនេះបាននិយាយថា ប្រទេសជប៉ុនគឺមានកន្លែងជាច្រើនដែលភ្ញៀវអន្តរជាតិមិនស្គាល់ ឬមិនធ្លាប់បានទៅទស្សនា។ Takahashi រំពឹងថាប្រទេសជប៉ុននឹងស្វាគមន៍ភ្ញៀវទេសចរចំនួន ៦០ លាននាក់បន្ថែមទៀតនៅឆ្នាំនេះ ពោលគឺច្រើនជាងពីរដងបើធៀបកាលពីឆ្នាំមុនមានត្រឹមតែ ២៥ លាននាក់ប៉ុណ្ណោះ ហើយគោលដៅនៅឆ្នាំនេះគឺច្រើនជាង ៣៣ លានដង។

លោក Takahashi ជឿជាក់ថា គោលដៅនៃការមកទស្សនាចំនួន ៦០ លាននាក់អាចសម្រេចបាននៅឆ្នាំនេះ ប្រសិនបើប្រទេសជប៉ុនមានយុទ្ធសាស្រ្តត្រឹមត្រូវក្នុងការទាក់ទាញភ្ញៀវទេសចរ។ នៅក្នុងខែឧសភា ប្រទេសជប៉ុនបានស្វាគមន៍ភ្ញៀវទេសចរអន្តរជាតិជាង ៣ លាននាក់ កើនឡើង ៦០% ធៀបនឹងរយៈពេលដូចគ្នាកាលពីឆ្នាំមុន និងជាខែទី ៣ ជាប់ៗគ្នាដែលឧស្សាហកម្មទេសចរណ៍របស់ប្រទេសនេះបានស្វាគមន៍ចំនួនភ្ញៀវទេសចរដ៏ខ្ពស់បែបនេះ។ បើយោងតាមទិន្នន័យពីទីភ្នាក់ងារផ្សព្វផ្សាយទេសចរណ៍ ក៏បានឱ្យដឹងទៀតថា ប្រាក់យ៉េនខ្សោយគឺជាមូលហេតុមួយដែលធ្វើឱ្យឧស្សាហកម្មទេសចរណ៍រីកចម្រើន។

អ្នកទេសចរបានសម្រុកទៅកាន់ប្រទេសជប៉ុនដើម្បីរីករាយជាមួយសេវាកម្មលំដាប់ខ្ពស់ និងទិញទំនិញដែលមានគុណភាពល្អ តម្លៃសមរម្យ ដែលនាំមកនូវសេដ្ឋកិច្ចរបស់ប្រទេសចំនួន ១.៧៥ ពាន់ពាន់លានយ៉េន (ប្រមាណ ១១.១ ពាន់លានដុល្លារអាមេរិក) នៅក្នុងត្រីមាសទីមួយ។ ទីផ្សារដែលបញ្ជូនអ្នកទស្សនាច្រើនជាងគេទៅប្រទេសជប៉ុនសព្វថ្ងៃរួមមាន ចិន ឥណ្ឌា អារ៉ាប់រួម សហរដ្ឋអាមេរិក សិង្ហបុរី និងវៀតណាម។

ទោះជាយ៉ាងណាក៏ដោយ ការប្រកាសរបស់លោក Takahashi ក្នុងការស្វាគមន៍ភ្ញៀវទេសចរពីរដងច្រើនជាងឆ្នាំមុន ត្រូវបានធ្វើឡើងក្នុងបរិបទនៃការព្រួយបារម្ភរបស់មនុស្សជាច្រើនអំពីបញ្ហាទេសចរណ៍លើសទម្ងន់។ ចាប់តាំងពីដើមឆ្នាំមក ប្រជាពលរដ្ឋនៅតាមបណ្តាខេត្ត-ក្រុងបានត្អូញត្អែរជាបន្តបន្ទាប់អំពីចំនួនភ្ញៀវទេសចរណ៍ដែលមកលេងច្រើន និងប្រព្រឹត្តិខុស។ ទោះបីជាយ៉ាងនេះក្តី រដ្ឋាភិបាលជប៉ុននៅតែចង់បង្កើនចំនួនភ្ញៀវបរទេសទ្វេដង ដោយផ្តោតតែលើអតិថិជនដែលមានការចំណាយខ្ពស់ប៉ុណ្ណោះ៕

ប្រទេសចិន ៖ កាលពីថ្ងៃទី១២ ខែមិថុនា ឆ្នាំ២០២៤ នាយកដ្ឋានត្រួតពិនិត្យផ្លែឈើចិនបានប្រកាសផ្អាកនាំចូលទុរេនវៀតណាម ដែលបញ្ជូនពីរោងចក្រចំនួន១៥កន្លែង និងចម្ការផ្លែឈើ១៨កន្លែង ក្រោយពីរកឃើញទុរេនវៀតណាមចំនួន៧៧កុងតឺន័រ ផ្ទុកសារធាតុ Cadmium លើសស្តង់ដារ ។ ការប្រកាសផ្អាកនាំចូលទុរេនវៀតណាមនេះ គឺដើម្បីទប់ស្កាត់ផលប៉ះពាល់សុខភាពអ្នកបរិភោគ ។

សារព័ត៌មានវៀតណាមរាយការណ៍ថា នាយកដ្ឋានត្រួតពិនិត្យផ្លែឈើចិនបានបញ្ជូនឯកសារទៅស្ថានទូតវៀតណាមនៅប្រទេសចិនថា ចិនបានត្រួតពិនិត្យឃើញទុរេនវៀតណាម ដែលនាំចូលមកចិនចំនួន៧៧កុងតឺន័រ លាយឡំសារធាតុ Cadmium ។ ហេតុនេះ ចិនសម្រេចចិត្តផ្អាកការនាំចូលទុរេនពីរោងចក្រ និងចម្ការផ្លែឈើវៀតណាម ចាប់ពីថ្ងៃទី១២ ខែមិថុនា ឆ្នាំ២០២៤ តទៅ ។

នាយកដ្ឋានត្រួតពិនិត្យផ្លែឈើចិនបញ្ជាក់ថា ក្រៅពីនេះ ចិនក៏បានរកឃើញទិន្នផលកសិកម្មវៀតណាមមួយចំនួន ដែលពុំទទួលបានការបញ្ជាក់គុណភាពពីរោងចក្រផ្លែឈើវៀតណាម ចំនួន៣៣កន្លែង និងចម្ការផ្លែឈើវៀតណាមប្រមាណ៤០កន្លែងទៀត ។ ហេតុនេះ ប្រទេសចិនត្រូវតែអនុវត្តតាមច្បាប់សុវត្ថិភាពចំណីអាហារ ដើម្បីកុំឱ្យប៉ះពាល់សុខភាពពលរដ្ឋចិន ។

មន្ត្រីសមាគមបន្លែ និងផ្លែឈើវៀតណាមលើកឡើងថា បានប្រកាសទៅកសិករអំពីការផ្អាកការនាំចូលទុរេនរបស់ចិន ហើយពួកគេនឹងទទួលខុសត្រូវបញ្ហានេះ ដោយការចុះត្រួតពិនិត្យក្នុងតំបន់ និងដាស់តឿនកសិករដើម្បីដោះស្រាយបញ្ហានេះយ៉ាងឆាប់រហ័ស ។ រីឯមូលហេតុធ្វើឱ្យទុរេនវៀតណាមផ្ទុកសារធាតុ Cadmium គឺបណ្តាលមកពីការប្រើប្រាស់ជី, ផ្ទៃដី, ការប្រើប្រាស់ទឹក ឬនៅពេលប្រមូលផល កសិករវៀតណាមបានយកទុរេនទៅត្រាំក្នុងទឹកគីមី ។

កាលពីថ្ងៃទី៤ ខែមេសា ឆ្នាំ២០២៤ នាយកដ្ឋានត្រួតពិនិត្យផ្លែឈើចិនធ្លាប់បានជូនដំណឹងម្តងហើយថា ពួកគេបានរកឃើញសារធាតុលោហៈក្នុងទុរេនវៀតណាមចំនួន៣០កុងតឺន័រ ដែលបាននាំចេញទៅលក់ឱ្យចិន ។ វាហួសពីស្តង់ដារដែលកំណត់ដោយច្បាប់សុវត្ថិភាពចំណីអាហារចិន ហើយចិនក៏បានបញ្ជូនទុរេនចំនួន៣០កុងតឺន័រនេះត្រឡប់មកឱ្យវៀតណាមវិញ ។

ក្រសួងពាណិជ្ជកម្មវៀតណាមបញ្ជាក់ថា វៀតណាមក្លាយជាប្រទេសនាំចេញទុរេនទៅចិន ស្ថិតក្នុងលំដាប់ទី២ បន្ទាប់ពីថៃ ហើយក្នុងរយៈពេល៤ខែដំបូងនៃឆ្នាំ២០២៤ វៀតណាមបាននាំចេញទុរេនទៅចិន កើនឡើងរហូតដល់ដល់៩១% ។ កំណើនការនាំចេញទុរេនវៀតណាមទៅចិន គឺដោយសារ ៖ ទុរេនវៀតណាមផ្តល់ទិន្នផលឆាប់រហ័ស, វៀតណាមនៅជិតចិន និងតម្លៃទុរេនវៀតណាមទាបជាងគូប្រជែង ។

អ្វីដែលជាក្តីបារម្ភរបស់សារព័ត៌មាន KBN NEWS យើងគឺថា តើទុរេនទាំងអស់នោះទំនងអាចនឹងបង្វែរទិសដៅចែកចាយលក់បន្តមកដល់ទីផ្សាកម្ពុជាយើងដែរឬទេ? ខណៈដែលប្រទេសយើងមានព្រំប្រទល់ជាប់គ្នាទាំងទឹកនិងគោក ដែលជាមូលហេតុបង្កជាភាពងាយស្រួល និងលទ្ធភាពលក់ផលិតផលកសិផលមកដល់ទីផ្សារកម្ពុជាយើងបានយ៉ាងងាយ ។ អ្វីជាក្តីបារម្ភ គឺប្រជាជនខ្មែរយើងមិនទទួលបានព័ត៌មានពិតពីប្រភពនៃកសិផលទាំងអស់នោះឡើយ ដោយគ្រប់អ្នកលក់សុទ្ធតែអះអាងថា ជាទុរេនកំពត ឬក៏ជារបស់ប្រទេសយើងនោះឯង ៕