ប្រទេសកូរ៉េខាងត្បូង ៖ កាលពីថ្ងៃទី២៤ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា មានហេតុការណ៍ឆេះរោងចក្រផលិតថ្មលីចូមដ៏ល្បី ដែលជាកម្មសិទ្ធិក្រុមហ៊ុន Arisel ស្ថិតនៅទីក្រុងវ៉ាសង ខេត្តខាយ៉ងគី ប្រទេសកូរ៉េខាងត្បូង ។ ហេតុការណ៍នេះបានកើតឡើងក្នុងអំឡុងពេលកម្មករជាង១០០នាក់កំពុងធ្វើការនៅខាងក្នុង ហើយជំហានដំបូង អាជ្ញាធរបានរកឃើញមនុស្សស្លា.ប់ យ៉ាងហោចណាស់ ២២នាក់ ។

អ្នកឃើញហេតុការណ៍និយាយថា មុនពេលកើតហេតុ គេបានឮសំឡេងផ្ទុះខ្លាំងៗនៅជាន់ទី២ របស់រោងចក្រ ដែលជាជាន់សម្រាប់ការត្រួតពិនិត្យ និងវេចខ្ចប់ថ្មដាក់ឡាំង ។ ការពន្លត់ភ្លើងធ្វើឡើងយ៉ាងលំបាក ដោយសារភ្នាក់ងារសង្គ្រោះបន្ទាន់ពុំអាចប្រើប្រាស់ទឹកពន្លត់ភ្លើង ហើយពួកគេពុំអាចចូលទៅកាន់ចំណុចកើតហេតុបានទេ ពីព្រោះបារម្ភខ្លាចកើតហេតុការណ៍ផ្ទុះម្តងទៀត ទើបប្រើប្រាស់ខ្សាច់ពន្លត់ភ្លើងជំនួស ។

សារព័ត៌មានកូរ៉េខាងត្បូងរាយការណ៍ថា កម្មករធ្វើការក្នុងរោងចក្រចំនួន៧៨នាក់រួចផុតពីគ្រោះថ្នាក់ ប៉ុន្តែមានកម្មករម្នាក់ទៀតបាត់ខ្លួន ។ មេដឹកនាំកូរ៉េខាងត្បូងបានចេញបញ្ជាបន្ទាន់មួយឱ្យអាជ្ញាធរបន្ថែមកម្លាំង និងឧបករណ៍ដើម្បីស្វែងរក និងជួយសង្គ្រោះជនរងគ្រោះ ព្រមទាំងបានដាស់តឿនឱ្យភ្នាក់ងារសង្គ្រោះថែទាំសុវត្ថិភាពផ្ទាល់ខ្លួន ដោយសារអណ្តាតភ្លើងឆេះរាលដាលយ៉ាងឆាប់រហ័ស ។

លោក គីម ជិនយ៉ង ភ្នាក់ងារពន្លត់អគ្គិភ័យក្នុងតំបន់និយាយថា អ្នកស្លាប់ក្នុងហេតុការណ៍នេះស្មើចំនួន២២នាក់ ក្នុងនោះមានជនជាតិចិន១៨នាក់, ឡាវម្នាក់ និងកូរ៉េខាងត្បូង២នាក់ រីឯអ្នកស្លាប់ម្នាក់ទៀតពុំស្គាល់អត្តសញ្ញាណ ។ ក្រៅពីនេះ មានមនុស្សរងរបួស៨នាក់ ក្នុងនោះ រងរបួសធ្ងន់ធ្ងរ២នាក់ ។ សាកសពទាំង២២នាក់ស្ថិតនៅអគារជាន់ទី២ ដែលជាកន្លែងទុកថ្មចំនួន៣៥.០០០ដុំ ដើម្បីរង់ចាំការត្រួតពិនិត្យ និងវេចខ្ចប់ដាក់ឡាំង ។

លោកបន្តថា ភ្លើងចាប់ផ្តើមឆេះក្រោយពីថ្មក្នុងរោងចក្រនេះបានផ្ទុះជាបន្តបន្ទាប់ ប៉ុន្តែអាជ្ញាធរពុំទាន់ច្បាស់ថា តើនេះជាមូលហេតុចម្បងដែលបណ្តាលឱ្យភ្លើងឆេះដែរឬទេ ហើយអាជ្ញាធរពុំទាន់ដឹងថា ហេតុអ្វីបានជាថ្មទាំងនេះផ្ទុះជាប់ៗគ្នាបែបនេះ?

ចំណែកលោក គីម សេហូ សាស្ត្រាចារ្យផ្នែកបង្ការអគ្គិភ័យ និងគ្រោះមហន្តរាយប្រចាំសាកលវិទ្យាល័យ Daecheon និយាយថា ថ្មលីចូមមានហានិភ័យឆាប់ផ្ទុះ បើវាខូចខាត ឬក្តៅខ្លាំង ។ ករណីមានហេតុការណ៍ភ្លើងឆេះ ភ្លើងនឹងរាលដាលយ៉ាងឆាប់រហ័ស ហើយកម្មកររត់ចេញពីរោងចក្រមិនទាន់ទេ ។

ម្យ៉ាងទៀត ភ្លើងឆេះថ្មលីចូមមានប្រតិកម្មខ្លាំងជាមួយទឹក ទើបភ្នាក់ងារពន្លត់អគ្គិភ័យត្រូវប្រើប្រាស់ម្សៅគីមីពន្លត់ភ្លើង និងចំណាយពេលយូរ ទើបអាចគ្រប់គ្រងស្ថានការណ៍បាន ។ បើទោះជាភ្លើងរលត់វិញក្តី ប៉ុន្តែវានឹងឆាបឆេះម្តងទៀត និងពុំផ្តល់សញ្ញាជាមុនឡើយ ប្រសិនបើវាមានប្រតិកម្មជាមួយគីមី ៕

បរទេស៖ រដ្ឋបាលចំណីអាហារ និងឱសថអាមេរិក (FDA) បានប្រកាសកាលពីថ្ងៃទី២៤ ខែមិថុនា ឆ្នាំ២០២៤ ថាផលិតផលកាហ្វេជាង ២៥០ ប្រភេទរបស់ក្រុមហ៊ុន Snapchill ដែលត្រូវបានចែកចាយជុំវិញពិភពលោក នឹងត្រូវប្រមូលមកវិញ ដោយសង្ស័យថាផលិតផលនេះមានផ្ទុកជាតិពុលធ្ងន់ធ្ងរអាចបង្កគ្រោះថ្នាក់ដល់មនុស្ស។
យោងតាម New Yok Post ក្រុមហ៊ុន Snapchill LLC គឺមានមូលដ្ឋាននៅ Wisconsin សហរដ្ឋអាមេរិក កំពុងប្រមូលមកវិញនូវផលិតផលរាប់រយលានកញ្ចប់របស់ខ្លួន ដែលត្រូវបានចែកចាយទូទាំងប្រទេសទៅកាន់អ្នកលក់ផ្សេងៗ រួមទាំងវេទិកាអនឡាញ ក៏ដូចជាទីផ្សារអឺរ៉ុប និងអាស៊ីផងដែរ។

FDA បាននិយាយថា ផលិតកាហ្វេកំប៉ុងរបស់ Snapchill LLC គឺមិនបានផ្តល់ការជូនដំណឹងអំពីបទប្បញ្ញត្តិទាក់ទងនឹងវិធីសាស្រ្តផលិតកាហ្វេកំប៉ុងឡើយ។ ដូច្នេះដំណើរការផលិតគឺមានហានិភ័យខ្ពស់ខ្លាំងណាស់នៃការអភិវឌ្ឍ និងការចម្លងជាតិពុល botulinum ដែលអាចបណ្តាលឱ្យមនុស្សស្លាប់។ យោងតាម FDA ការពុលកាហ្វេអាចកើតឡើងបន្ទាបពីទទួលទានបាន ៦ ម៉ោងទៅ ២ សប្តាហ៍ ដែលបណ្តាលឱ្យមានរោគសញ្ញាដូចជា ខ្សោយ វិលមុខ ហើមពោះ និងមិនស្រួលខ្លួន ព្រមទាំងពិបាកដកដង្ហើម និយាយមិនចេញជាដើម។

FDA បានបន្តទៀតថា ផលិតផលដែលត្រូវបានប្រមូលមកវិញភាគច្រើនគឺជាកាហ្វេកំប៉ុងដែលមានទំហំចាប់ពី 7oz ដល់ 12oz នៅទីតាំងលក់រាយមួយចំនួនក្រោមឈ្មោះម៉ាកផ្សេងៗ។ ហេតុនេះដើម្បីដឹងថាតើកាហ្វេកំប៉ុងណាខ្លះត្រូវបានផលិតដោយ Snapchill អតិថិជនត្រូវមើលលើកំប៉ុងសម្រាប់ពាក្យ “ផលិតនិងចែកចាយដោយ Snapchill LLC” នៅខាងក្រោមផ្ទាំងព័ត៌មានអាហារូបត្ថម្ភនៅលើវេចខ្ចប់។ អតិថិជនដែលធ្លាប់បានទិញផលិតផលនេះត្រូវបានជំរុញឱ្យបំផ្លាញទំនិញកំប៉ុង ឬប្រគល់វាទៅក្រុមហ៊ុន Snapchill ឬកន្លែងណាដែលមានលក់ផលិតផលនេះ។

ក្រុមហ៊ុនក៏កំពុងផ្តល់ការបង្វិលសងជូនអតិថិជនដែលដាក់ភស្តុតាង ឬរូបថតនៃការទិញផងដែរ។ បច្ចុប្បន្ន Snapchill កំពុងធ្វើការប្រមូលមកវិញដោយសហការជាមួយ FDA ។ អ្នកតំណាងរបស់ក្រុមហ៊ុននេះបានបញ្ជាក់ថា៖ “ក្រុមហ៊ុននិងយកចិត្តទុកដាក់ចំពោះអតិថិជនជាចម្បង ក៏ដូចជាធានាសុវត្ថិភាព និងទទួលខុសត្រូវគ្រប់យ៉ាង ហើយយើងកំពុងធ្វើការយ៉ាងឆាប់រហ័សដើម្បីដោះស្រាយបញ្ហានេះ។ ក្រុមហ៊ុនសូមអភ័យទោសដោយស្មោះចំពោះការរអាក់រអួល ឬការព្រួយបារម្ភណាមួយដែលអាចបណ្តាលឱ្យមានការប្រមូលមកវិញ”៕

Labubu គឺជាតុក្កតាដ៏មានប្រជាប្រិយភាពបំផុតនាពេលបច្ចុប្បន្ននេះ បានឆក់យកបេះដូងមនុស្សម្នានៅជុំវិញពិភពលោក។ ភាពល្បីល្បាញមួយរំពេញនេះ គឺបានកើតឡើងបន្ទាប់ពី Lisa សមាជិក Blackpink បានធ្វើការដាក់បង្ហោះរូបភាព Selfie របស់នាងជាមួយតុក្កតាមួយនេះ ក៏បានធ្វើឲ្យវាលក់ដាច់ពីស្កុកតែម្តង ខណៈតម្លៃវិញគឺកើនឡើងទ្វេគុណ។

ដំបូងឡើយ Labubu Macaron គឺគ្រាន់តែជាតុក្កតាមួយប្រភេទ ដែលដូចទៅនឹងតុក្កតាទូទៅប៉ុណ្ណោះ ដែលបានរចនាមានរូបរាងខ្ជូតៗ គួរឱ្យស្រលាញ់ និងពណ៌ចម្រុះដ៏គួរឲ្យទាក់ទាញ។ យ៉ាងណាមិញ វាក៏ប្រែទៅជាតុក្កតាដ៏ពេញនិយមបំផុតមួយនិងមានតម្លៃថ្លៃមួយរំពេច ក្រោមឥទ្ធិពលរបស់ Lisa សមាជិក Blackpink។

Labubu គឺជាតួអង្គមួយក្នុងចំនោមតួអង្គ Monster Kingdom។ Labubu រចនាឡើងដោយយកលំនាំតាមសត្វទន្សាយ ជាតួអង្គបីសាច ពោរពេញដោយភាពអង់អាច និងធ្មេញមុតស្រួច។ ទោះជាយ៉ាងនេះក្តី តួអង្គនេះមិនគួរឱ្យខ្លាចទាល់តែសោះ ប៉ុន្តែផ្ទុយទៅវិញ វាបែរគួរឱ្យស្រលាញ់ខ្លាំងផងដែរ ដោយសាររូបរាងមូល ភ្នែកមូលធំ និងស្នាមញញឹមដ៏គួរឲ្យខ្នាញ់។

តួអង្គ Labubu ត្រូវបានបង្កើតឡើងក្នុងឆ្នាំ២០១៥ ដោយវិចិត្រករហុងកុងមួយរូប គឺលោក Kasing Lung ដែលត្រូវបានបំផុសគំនិតដោយតួអង្គក្នុងរឿងនិទាន Nordic ។ គាត់បានបង្ហើបថា ថ្វីត្បិតតែជាវាជាបិសាចក៏ពិតមែន ប៉ុន្តែ Labubu មានបុគ្គលិកលក្ខណៈរួសរាយរាក់ទាក់ ហើយតែងតែជួយអ្នកដទៃ មិនមែនជាបិសាចអាក្រក់នោះទេ។ ដំបូងឡើយ Labubu មានរូបរាងស្ដើង មុខតូច និងថ្ពាល់ខ្ពស់។ ទោះជាយ៉ាងណាក៏ដោយ បន្ទាប់ពីចុះកិច្ចសន្យាជាមួយ Pop Mart តួអង្គនេះត្រូវបានរចនាឡើងវិញ ហើយកាន់តែមានរាងមូលបែបនេះ។

នៅក្នុង Kingdom of Monsters មិនត្រឹមតែមាន Labubu ប៉ុណ្ណោះទេ ប៉ុន្តែក៏មានតួអង្គជាច្រើនទៀត ប៉ុន្តែមិនសូវជាទទួលបានភាពល្បីល្បាញដូច Labubu នោះទេ ដែលក្នុងនោះគឺរួមមាន តួអង្គ Tycoco – ដែលតួអង្គនេះមានរូបរាងលលាដ៍ក្បាលដ៏គួរឱ្យស្រលាញ់ និងតួអង្គ Spooky ដែលជាមិត្តប្រុសរបស់ Labubu ជាដើម។

យ៉ាងណាមិញ បន្ទាប់ពីតួអង្គ Labubu ទទួលបានភាពល្បីល្បាញកាលពីពេលថ្មីនេះហើយ គឺឃើញថាមានសន្ទុះនៃការគាំទ្រជុំវិញពិភពលោក ជាពិសេសគឺក្នុងចំនោមជនជាតិថៃ។ Labubu តូចៗក៏ត្រូវបានគេយកទៅបំពាក់លើកាបូបប្រេនៗ មានទាំងការបើពុម្ពរូបតុក្កតានេះលើអាវ ការរចនាខ្សែក្រវាត់ដែលមានរាងជា Labubu ក៏ដូចជាសម្ភារៈមួយចំនួនទៀតសុទ្ធតែរចនាឡើងមានទំនាក់ទំនងជាមួយនឹងតុក្កតានេះ ថែមទាំងដាក់លក់ដាច់អស់គ្មានសល់ផងដែរ៕

ប្រទេសចិន ៖ ពាក្យថា «ទីក្រុង» គឺតែងតែមានទីតាំងស្ថិតនៅបរិវេណធំទូលំទូលាយ និងបង្កលក្ខណៈងាយស្រួលដល់អ្នករស់នៅគ្រប់បែបយ៉ាង ប៉ុន្តែទីក្រុងមួយរបស់ចិនឈ្មោះ «Yanjin» គ្មានចំណុចទាំងអស់នេះទេ ។ ទីក្រុង Yanjin ត្រូវបានសាងសង់ឡើងនៅតាមចន្លោះជ្រលងភ្នំខ្ពស់ៗ និងចង្អៀតខ្លាំង ទើបធ្វើឱ្យទីក្រុងនេះជាប់ចំណាត់ថ្នាក់ជាទីក្រុងតូចចង្អៀតបំផុតនៅលើពិភពលោក ។

Yanjin គឺជាទីក្រុងលាតសន្ធឹងនៅតាមបណ្តោយទន្លេណានស៊ី និងត្រូវបានគេសាងសង់ឡើងនៅកន្លែងដ៏តូចចង្អៀតស្ថិតនៅចន្លោះជួរភ្នំខ្ពស់ៗរបស់ខេត្តយូណាន ។ តាមរយៈការពិនិត្យមើលរូបភាពរបស់ទីក្រុង គឺទីតាំងនេះពុំសាកសមនឹងបង្កើតជាទីក្រុង និងមានមនុស្សរស់នៅនោះទេ ប៉ុន្តែវាសាកសមជាតំបន់ដាច់ស្រយាល ។

លំនៅឋានក្នុងទីក្រុងត្រូវបានសាងសង់ឡើងបែបសាមញ្ញៗ, មានអគារខ្ពស់ៗជាច្រើននៅតាមមាត់ទន្លេ និងមានពលរដ្ឋរស់នៅសរុបចំនួន៤៥ម៉ឺននាក់ ។ រីឯមូលហេតុធ្វើឱ្យ Yanjin ជាប់ចំណាត់ថ្នាក់ជាទីក្រុងតូចចង្អៀតបំផុតលើពិភពលោក គឺដោយសារចំណុចចង្អៀតបំផុតរបស់ទីក្រុងនេះ មានប្រវែងត្រឹមតែ៣០ម៉ែត្រប៉ុណ្ណោះ ខណៈចំណុចធំទូលាយរបស់ទីក្រុង មានប្រវែង៣០០ម៉ែត្រ ។

ចំពោះការធ្វើដំណើររបស់ពលរដ្ឋរស់នៅក្នុងទីក្រុងវិញ គឺពួកគេនឹងប្រើប្រាស់ផ្លូវធំនៅសងខាងទន្លេ ដែលលាតសន្ធឹងស្របគ្នាជាមួយទីក្រុងមានប្រវែងវែងជាច្រើនគីឡូម៉ែត្រ ។ ការធ្វើដំណើរចេញ-ចូលទីក្រុងទៅកាន់ទីក្រុងផ្សេង គឺពួកគេនឹងប្រើប្រាស់ផ្លូវតែ១ខ្សែប៉ុណ្ណោះ ហើយបើទោះជាទីក្រុងនេះស្ថិតនៅសងខាងទន្លេក្តី ប៉ុន្តែក្នុងទីក្រុងពុំមានស្ពានច្រើនកន្លែងសម្រាប់ឱ្យពលរដ្ឋឆ្លងកាត់ទេ ។

ក្រៅពីទីក្រុងមានសភាពតូចចង្អៀតហើយ អ្វីដែលធ្វើឱ្យប្លែកភ្នែកបំផុតនោះ គឺអាផាតមិន ឬអគារជាច្រើនកន្លែងនៅតាមមាត់ទន្លេណានស៊ី គឺបានសាងសង់ឡើងនៅលើបង្គោលខ្ពស់ ដើម្បីការពារទឹកជំនន់ដោយសារកម្រិតទឹកទន្លេឡើងខ្ពស់ ។ ហេតុនេះ អ្នកដែលបានឃើញរូបអគារទាំងនេះហើយនឹងមានអារម្មណ៍ភ័យខ្លាច និងគិតថា អគារទាំងនេះគ្មានសុវត្ថិភាព ។

ទីក្រុងនេះមានពលរដ្ឋរស់នៅរាប់រយឆ្នាំមកហើយ ហើយបើទោះជាវាមានសភាពតូចចង្អៀតក្តី ប៉ុន្តែពលរដ្ឋនៅទីនេះពុំចង់ផ្លាស់ប្តូរទីលំនៅចេញពីទីក្រុងទេ ។ ហេតុនេះ ពេលចំនួនពលរដ្ឋកើនឡើងកាន់តែច្រើន វាធ្វើឱ្យដីធ្លីក្នុងតំបន់មានកំណត់ និងពុំគ្រប់គ្រាន់សម្រាប់ពលរដ្ឋរស់នៅ ។

វិធីដោះស្រាយល្អបំផុត គឺពួកគេបានសម្រេចចិត្តសាងសង់អគារឱ្យកាន់តែខ្ពស់ជាងមុន ដើម្បីទប់ទល់នឹងកំណើនពលរដ្ឋក្នុងទីក្រុង ៕

យោងតាមការស្រាវជ្រាវថ្មីមួយបង្ហាញថា យើងពុំគួរសាកថ្មទូរស័ព្ទដៃពេញរហូតដល់១០០% នោះទេ ប៉ុន្តែគួរតែសាកថ្មត្រឹមតែ៨០% ដើម្បីកុំឱ្យវាឆាប់ខូចថ្ម និងអាចប្រើប្រាស់បានយូរអង្វែង ។ លើសពីនេះ បើពុំចង់ឱ្យថ្មឆាប់ខូច គួរតែចៀសវាងការសាកថ្មពេលទូរស័ព្ទកំពុងក្តៅខ្លាំង ។

មនុស្សភាគច្រើនយល់ឃើញថា គួរតែសាកថ្មទូរស័ព្ទឱ្យបាន១០០% ដើម្បីអាចប្រើប្រាស់ទូរស័ព្ទបានរយៈពេលយូរ ហើយពុំចាំបាច់មកអង្គុយសាកថ្មញឹកញាប់ ។ ប៉ុន្តែការពិត ការសាកថ្មពេញពេក បែរជាធ្វើឱ្យទូរស័ព្ទរបស់យើងឆាប់ខូចថ្ម ហើយយើងនឹងពុំអាចប្រើប្រាស់ទូរស័ព្ទបានយូរឆ្នាំទេ ។

បច្ចុប្បន្ន សារធាតុលីចូម ត្រូវបានគេប្រើប្រាស់ធ្វើជាសមាសធាតុផ្សំដ៏សំខាន់សម្រាប់ផលិតថ្មទូរស័ព្ទ ដោយសារវាមានគុណសម្បត្តិអាចសាកថ្មបានឆាប់រហ័ស និងមានសុពលភាពប្រើប្រាស់បានយូរជាងថ្មផ្សេងៗ ។ ហេតុនេះ ទើបក្រុមហ៊ុនផលិតទូរស័ព្ទដៃ និងសម្ភារៈអគ្គិសនីប្រើប្រាស់ថ្មទូទាំងពិភពលោក ងាកមកប្រើប្រាស់ថ្មផលិតពីសារធាតុលីចូមភាគច្រើន ។

ការស្រាវជ្រាវថ្មីបង្ហាញថា ថ្មផលិតពីសារធាតុលីចូមនឹងមានសុពលភាពប្រើប្រាស់រយៈពេលយូរជាងថ្មផ្សេងៗ បើយើងសាកថ្មត្រឹមតែ៨០% ។ ចំណុចសំខាន់ យើងពុំគួររង់ចាំរហូតដល់ទូរស័ព្ទអស់ថ្មរលីង ទើបយកវាមកសាក ឬសាកថ្មរហូតដល់១០០% ទេ ពីព្រោះការសាកថ្មពេញពេក វានឹងធ្វើឱ្យតង់ស្យុងឡើងខ្ពស់ ឬធ្វើឱ្យថ្មប្រើប្រាស់ពុំបានយូរ ។ នេះជាមូលហេតុធ្វើឱ្យទូរស័ព្ទ iPhone ថ្មីៗតែងតែផ្តាច់ចរន្តអគ្គិសនីដោយស្វ័យប្រវត្តិ ពេលយើងសាកថ្មបាន៨០% ។

យើងគួរតែព្យាយាមសាកថ្មទូរស័ព្ទត្រឹមតែ៨០% បានហើយ និងគួរចៀសវាងការសាកថ្មនៅពេលទូរស័ព្ទកំពុងក្តៅ ។ បើទូរស័ព្ទក្តៅខ្លាំងពេលកំពុងសាកថ្ម ចូរឈប់សាកវាសិន ហើយយើងអាចសាកថ្មបន្តទៀតពេលទូរស័ព្ទត្រជាក់ ។ ហេតុនេះ បើអាចអនុវត្តតាមចំណុចខាងលើបាន វានឹងជួយធ្វើឱ្យថ្មទូរស័ព្ទយើងប្រើប្រាស់បានយូរអង្វែង ៕

ប្រទេសកាណាដា ៖ រូបភាពដែលយើងគ្រប់គ្នាបានឃើញនេះ មិនមែនជាកម្រាលឥដ្ឋនោះទេ ប៉ុន្តែវាជាបឹងទឹកប្រៃពោរពេញទៅដោយរង្វង់មូលតូច-ធំជាច្រើន ដែលមានឈ្មោះថា «Spotted Lake» ហើយទឹកបឹងនេះពុំបានតភ្ជាប់ជាមួយទន្លេ ឬប្រភពទឹកខាងក្រៅទេ ។ បឹងនេះស្ថិតនៅខេត្ត British Columbia ប្រទេសកាណាដា ហើយអ្នកស្រុករស់នៅក្នុងតំបន់បានហៅបឹងនេះថា «Khiluk» ។

ទឹកក្នុងបឹងបានមកពីដុំព្រិលរលាយនៅលើភ្នំ និងទឹកភ្លៀង ដែលប្រមូលផ្តុំគ្នាអស់រយៈពេលជាច្រើនឆ្នាំបង្កើតបានជាទឹកប្រៃ ។ ចំណែករង្វង់មូលតូច-ធំ ដែលយើងបានឃើញក្នុងបឹងនេះ វាជាសារធាតុរ៉ែប្រមូលផ្តុំគ្នាយ៉ាងក្រាស់ ដូចជា ៖ សារធាតុម៉ាញ៉េស្យូមស៊ុលហ្វាត, សូដ្យូមស៊ុលហ្វាត, កាល់ស្យូម និងសារធាតុរ៉ែជាច្រើនប្រភេទទៀត ។

អ្នកស្រុករស់នៅតាមជ្រលងភ្នំអូខាណាកែន ចាត់ទុកថា បឹង Spotted Lake គឺជាទីកន្លែងស័ក្តិសិទ្ធិមួយ ហើយពួកគេមានជំនឿថា ដីភក់ និងទឹកក្នុងបឹងនេះអាចជួយព្យាបាលជំងឺផ្សេងៗឱ្យជាសះស្បើយបាន ។

នៅរៀងរាល់រដូវក្តៅ កម្រិតទឹកក្នុងបឹងនឹងស្រកចុះជាបន្តបន្ទាប់ និងរីងស្ងួតអស់ ពេលនោះ រង្វង់មូលធំៗរាប់រយស្ថិតនៅបាតបឹងដែលគេពុំធ្លាប់បានឃើញ នឹងបង្ហាញរូបរាងឡើងមានពណ៌ចម្រុះគ្នា ដូចជា ៖ ពណ៌លឿង, ខៀវ និងបៃតង ។ វាបានក្លាយជាបឹងមួយមានពណ៌ស្រស់ស្អាតបំផុត ហើយដោយសារទឹកបឹងនេះពុំបានហូរចូលក្នុងទន្លេ ឬហូរទៅទីកន្លែងផ្សេង ទើបនៅពេលព្រិលរលាយហូរចូលក្នុងបឹង វាក៏នាំសារធាតុរ៉ែ និងអំបិលមកប្រមូលផ្តុំគ្នាអស់ជាច្រើនសតវត្សរ៍ ។

ក្នុងអំឡុងពេលសង្គ្រាមលោក លើកទី១ សារធាតុរ៉ែជាច្រើនកន្លែងក្នុងបឹងត្រូវបានគេយកទៅផលិតជាគ្រាប់កាំភ្លើង ។ នៅសម័យនោះ អ្នកមានទ្រព្យសម្បត្តិស្តុកស្តម្ភម្នាក់បានព្យាយាមទិញដីនៅជុំវិញបឹងនេះធ្វើជាកន្លែងម៉ាស្សា ប៉ុន្តែអាជ្ញាធរបានរក្សាវាទុកធ្វើជាសម្បត្តិធម្មជាតិសម្រាប់មនុស្សជំនាន់ក្រោយ ។

បច្ចុប្បន្ន បឹង Spotted Lake បានក្លាយជាតំបន់វប្បធម៌ និងអេកូឡូស៊ីរបស់ប្រទេសកាណាដា ហើយអាជ្ញាធរបានធ្វើរបងការពារ និងរឹតបន្តឹងការចេញ-ចូលក្នុងបរិវេណនេះ ប៉ុន្តែភ្ញៀវទេសចរអាចមកកម្សាន្តនៅទីនេះនារដូវក្តៅបាន ៕