បច្ចុប្បន្នដោយសង្កេតឃើញថា ឧស្សាហកម្មភាពយន្តនៅកម្ពុជាកំពុងមានភាពរីកចម្រើនជាលំដាប់ ខណៈដែលសន្ទុះនៃការគាំទ្រភាពយន្តរបស់ខ្មែរនានាក្នុងចំណោមទាំងជនជាតិខ្មែរនិងជនបរទេសក៏កំពុងតែកើនឡើងយ៉ាងច្រើនផុសផុល។ ជាមួយគ្នានោះ កុនខ្មែរមួយរឿងទៀត ក្រោមចំណងជើងថា«សូម៉ា» ក៏កំពុងតែទទួលបាននូវចំណាប់អារម្មណ៍យ៉ាងខ្លាំងពីមហាជន។ 
យោងតាមគេហទំព័រ«រឿង សូម៉ា SOMA» កាលពីថ្ងៃនេះ២២ ខែមិថុនានេះគឺបានបង្ហោះរូបថតប៉ុន្មានសន្លឹក បង្ហាញពីសកម្មភាពថតនិងដឹកនាំសម្តែង លក្ខណៈជាភាពយន្តគុណភាពនិងស្តង់ដារទំនើប ដោយភ្ជាប់ជាមួយនឹងចំណងជើងថា«សូម៉ា ខ្សែភាពយន្តខ្មែរមួយដែលមានទម្រង់ថ្មីបំផុតក្នុងឧស្សាហកម្មកុនខ្មែរ សង្ឃឹមទស្សនិកជនខ្មែរចូលរួម»។
រឿង«សូម៉ា» ក្រោមផលិតកម្ម Wonder Film Entertainment ដែលសាច់រឿងឆ្លុះបញ្ចាំងពីជីវិតនារីម្នាក់ដែលមាន ជីវភាពក្រីក្រ គ្រួសាររបស់នាងរស់នៅក្នុងភូមិនេសាទតូចមួយ ខណៈតាមការបញ្ជាក់ពីផលិតកម្មបានឲ្យដឹងទៀតថា ខ្សែភាពយន្តមួយនេះ នឹងនាំអារម្មណ៍ទស្សនិកជនអោយប្លែកអារម្មណ៍នៅសាច់រឿងដ៏ល្អមួយ ផលិតកម្មសម្រិតសម្រាំងទាំងគុណភាព បច្ចេកទេស ជ្រើសរើសតារាសម្ដែងដែលមាន សមត្ថភាពច្រើនរូបដើម្បីចូលរួមក្នុងខ្សែភាពយន្តមួយនេះ។
យ៉ាងណាមិញ បន្ទាប់ពីមានការបង្ហោះពីសកម្មភាពថតនិងសម្តែងខាងលើនេះហើយ មហាជនខ្មែរជាច្រើនក៏បានចូលទៅបញ្ចេញមតិលើកទឹកចិត្តនិងគាំទ្រព្រៀងព្រោតដោយអ្នកខ្លះគឺបានលើកឡើងថា«ខ្ញុំជិះកាត់កន្លែងកំពុងរៀបចំថត ស្មានតែមានការធ្វើអន្តរាគមន៍ពិសេសអី តាមពិតថតរឿងសោះ»។ អ្នកខ្លះថា«ប្រភេទរឿងដែលចង់មើល»។
អ្នកខ្លះ«ថាជ្រុលមានតួបរទេសចូលមកហើយ អាចទេផលិតរឿង action មួយដែលមានគុណភាព»។ អ្នកខ្លះថា«ចង់មើលឆាប់ៗចេញពេលណាបង»។ អ្នកខ្លះទៀតថា«ស៊ូៗ បង ដើម្បីផលិតភាពយន្តខ្មែរឱ្យល្អ បើមានឱកាសខ្ញុំ ចូលរួម»៕
