ប្រទេសអង់គ្លេស ៖ កាលពីថ្ងៃទី១ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ប្រទេសអង់គ្លេសបានរៀបចំការប្រកួតជីកសត្វជន្លេន (World Worm Charming Championship) ដើម្បីដណ្តើមជើងឯកពិភពលោក និងមានមនុស្សរាប់រយនាក់មកចូលរួមប្រកួត ។

ការប្រកួតជីកសត្វជន្លេនដើម្បីដណ្តើមជើងឯកពិភពលោកនេះ គឺបានរៀបចំឡើងនៅទីក្រុងឈេសឃៀ ប្រទេសអង់គ្លេស កាលពីថ្ងៃទី២៩ ខែមិថុនា ឆ្នាំ២០២៤ កន្លងមក ។ ការប្រកួតនេះមានមនុស្សរាប់រយនាក់មកចូលរួម ហើយពួកគេបានកាន់ឧបករណ៍ជាច្រើនប្រភេទសម្រាប់ជីកដីស្វែងរកជន្លេន ។

គណៈកម្មការនឹងបែងចែកផ្ទៃដីតូចៗអ្នកឱ្យប្រកួត ហើយការជីកដីរកជន្លេននឹងចំណាយពេលសរុបចំនួន៣០នាទី ។ បើអ្នកណាអាចជីកជន្លេនបានច្រើនបំផុត នឹងទទួលបានជ័យជម្នះក្នុងការប្រកួត ។ ប៉ុន្តែគណៈកម្មការមានបម្រាមមួយចំនួន ដូចជា ៖ ហាមជីកដីឡើងលើ ហើយអ្នកជីកជន្លេន មានសិទ្ធិត្រឹមតែស៊ក ឬដំឧបករណ៍របស់ពួកគេចូលក្នុងដីប៉ុណ្ណោះ ព្រមទាំងហាមបាចថ្នាំ ឬបាចម្សៅគីមី ឬស្រោចទឹកលើដីផងដែរ ។

ហេតុនេះ អ្នកចូលរួមប្រកួតទាំងអស់បាននាំគ្នាគោះឧបករណ៍ផ្សេងៗរបស់ខ្លួនចូលក្នុងដី ដូចជា ៖ គោះឆ្នាំង និងគោះធុងជ័រខ្លាំងៗ ។ រីឯអ្នកខ្លះទៀតព្យាយាមផ្លំឧបករណ៍ភ្លេង, ច្រៀងចម្រៀង និងលោតលើដី ដើម្បីឱ្យជន្លេនចេញពីក្នុងដី ។

បេក្ខជនទទួលបានជ័យជម្នះក្នុងការប្រកួតនេះ គឺអ្នកស្រី អេឡិច កប់ព្រី ដោយសារអ្នកស្រីអាចចាប់ជន្លេនបានជាងគេ រហូតដល់១៩៥ក្បាល ។ អ្នកស្រី អេឡិច និយាយថា ៖ «ក្រុមរបស់យើងមានគ្នា៥នាក់ ហើយយើងបានជួយគ្នាធ្វើឱ្យដីរង្គើ និងឆ្លាស់គ្នាចេញ-ចូលបរិវេណប្រកួត ។ យើងប្រើប្រាស់រនាស់តែ២ប៉ុណ្ណោះ អូសវាចុះឡើង បន្ទាប់មក យើងនាំគ្នាវាយជន្លេន ទើបយើងអាចចាប់ជន្លេនបានច្រើនបែបនេះ» ។

កាលពីឆ្នាំ១៩៨០ កំណត់ត្រាស្ថិតិពិភពលោក ធ្លាប់បានកត់ត្រាថា ថមសាបឺបូថាំ គឺជាបុគ្គលអាចចាប់ជន្លេនបានច្រើនជាងគេក្នុងការប្រកួតដណ្តើមជើងឯកពិភពលោក គឺស្មើរហូតដល់៥១១ក្បាល ៕

វាបានធ្វើឱ្យអ្នកលេងបណ្តាញសង្គមថៃចាប់អារម្មណ៍មិនតិចនាក់ទេ នៅពេលជនបរទេសម្នាក់លើកឡើងក្នុងបណ្តាញសង្គមអំពីប្រទេសថៃថា លោកស្រឡាញ់អ្វីៗគ្រប់យ៉ាងនៅប្រទេសថៃ លើកលែងតែម្យ៉ាងគត់ គឺអាហារថៃមានរសជាតិផ្អែមខ្លាំងពេក ។ ហេតុនេះ វាមិនចម្លែកចិត្តទេ ដែលថៃជាប់ចំណាត់ថ្នាក់ជាប្រទេសមានពលរដ្ឋកើតជំងឺទឹកនោមផ្អែមច្រើននៅតំបន់អាស៊ី ។

ជនបរទេសរូបនេះរៀបរាប់ថា លោក និងភរិយាបាននាំគ្នាទៅបរិភោគគុយទាវនៅហាងមួយកន្លែង ដែលភរិយារបស់លោកជាអ្នកបបួលមកហាងនេះ ។ ពេលដើរចូលក្នុងហាង លោកបានឃើញអ្វីម្យ៉ាងមុនគេដែលទទួលយកមិនបាន គឺទឹកស៊ុបផ្អែមពេក ។ តាមធម្មតា លោកចូលចិត្តបរិភោគគុយទាវណាស់ ជាពិសេស គុយទាវដាក់សាច់ជ្រូកពណ៌ក្រហម ប៉ុន្តែលោកពុំយល់ថា ហេតុអ្វីទើបហាងនេះត្រូវដាក់ស្ករយ៉ាងច្រើនក្នុងទឹកស៊ុបគុយទាវដែរ ។

ជនបរទេសរូបនេះបន្តថា ពេលអ្នកលក់ធ្វើបែបនេះ វាធ្វើឱ្យសត្វរុយយ៉ាងច្រើនហើរពាសពេញហាងគុយទាវ ។ លើសពីនេះ ពេលលោកហារមាត់បរិភោគគុយទាវ សត្វរុយទាំងនេះអាចហើរចូលក្នុងមាត់របស់លោកក៏ថាបាន ។ ដូច្នេះ លោកចង់សួរថា តើមានអ្នកណាខ្លះពុំចូលចិត្តរសជាតិអាហារផ្អែម?

ក្រោយពីជនបរទេសលើកឡើងបែបនេះ ធ្វើឱ្យជនជាតិថៃជាច្រើននាក់បញ្ចេញមតិខុសៗគ្នា ។ ជនជាតិថៃខ្លះណែនាំថា ម្ហូបអាហារថៃពុំមានរសជាតិផ្អែមទាំងអស់ទេ គួរតែសាកល្បងបរិភោគអាហារផ្សេងពីនេះ ។ ជនជាតិថៃខ្លះទៀតប្រាប់ថា នៅពេលកុម្ម៉ង់អាហារថៃ អ្នកអាចប្រាប់អ្នកលក់ថា កុំដាក់ស្ករ ពេលនោះ អ្នកនឹងចូលចិត្តអាហារថៃមិនខាន ។ ជនជាតិថៃផ្សេងទៀតថា វាពុំចម្លែកចិត្តទេថា ហេតុអ្វីថៃជាប់ចំណាត់ថ្នាក់ជាប្រទេសមានពលរដ្ឋកើតជំងឺទឹកនោមផ្អែមច្រើននៅតំបន់អាស៊ី ។

ចំណែកជនបរទេសម្នាក់និយាយថា ៖ «មិត្តភក្តិជនជាតិថៃប្រាប់ថា វាជារឿងធម្មតាទេ ហើយអ្នកគួរតែបញ្ជាក់ពីតម្រូវការរបស់ខ្លួនពេលកុម្ម៉ង់អាហារ ដូចជា ៖ មិនដាក់ប៊ីចេង ឬស្លឹកជី» ។ ជនបរទេសម្នាក់ទៀតថា ៖ «កាលពីថ្ងៃមុន ខ្ញុំធ្លាប់បានអានអត្ថបទមួយនិយាយថា ថៃជាប់ចំណាត់ថ្នាក់ជាប្រទេសមានពលរដ្ឋកើតជំងឺទឹកនោមផ្អែមនៅអាស៊ី ហើយវាពុំចម្លែកចិត្តទេ» ។

ជនបរទេសផ្សេងទៀតថា ៖ «ខ្ញុំក៏ស្រឡាញ់ប្រទេសថៃដែរ តែកាលពីពេលថ្មីៗនេះ ខ្ញុំបានទៅវៀតណាមជាលើកដំបូង និងមានអារម្មណ៍ធូរស្រាល ពេលបានបរិភោគអាហារពុំដាក់ស្ករ ។ រីឯសង្សារជនជាតិថៃរបស់ខ្ញុំ នាងមានអារម្មណ៍ក្រៀមក្រំខ្លាំងណាស់ ពីព្រោះគ្មានចានចង្កឹះដាក់គ្រឿងផ្សំបន្ថែមនៅលើតុ ។ ពេលនោះ នាងក៏បានសុំស្ករពីហាង តែខ្ញុំគិតថា អ្នករត់តុមុខជាឆ្ងល់ថា ហេតុអ្វីនាងសុំថែមស្ករ?» ៕

នៅលើភពផែនដីរបស់យើងនេះគឺមានសត្វរាប់រយលានប្រភេទឯណោះ ដែលពួកវាតែងតែរស់នៅគ្រប់ទិសទី មិនថាកន្លែងណាឬតំបន់ណានោះទេសុទ្ធតែមានសត្វរស់នៅទាំងអស់។ ទោះជាយ៉ាងណាសត្វខ្លះចូលចិត្តរស់នៅជាមួយមនុស្សដូចជា ឆ្កែ ឆ្មា កណ្តុរ កន្លាត…ជាដើម ខណៈខ្លះទៀតចូលចិត្តរស់នៅតែក្នុងព្រៃដូចជា ខ្លា តោ រមាស និងសត្វជាច្រើនទៀត។ ដូច្នេះហើយតើអ្នកដឹងទេថា កន្លែងណាដែលមានសត្វគ្រប់ប្រភេទរស់នៅជាមួយគ្នាច្រើនជាងគេបំផុតលើភពផែនដី?

បើយោងតាម Live Science កន្លែងដែលសត្វគ្រប់ប្រភេទរស់នៅច្រើនជាងគេបំផុតលើភពផែនដី គឺព្រៃអាម៉ាហ្សូនដែលស្ថិតនៅឧបទ្វីបអាមេរិកខាងជើងគ្របដណ្តប់លើផ្ទៃដីសរុបដល់ទៅ ៧ លានគីឡូម៉ែត្រការ៉េ។ ព្រៃអាម៉ាហ្សូនគឺជាព្រៃដ៏ធំជាងគេនៅលើពិភពលោក មានសត្វរស់នៅច្រើនប្រភេទ ជាគម្របធម្មជាតិលើផ្ទៃដីដ៏ធំល្វឹងល្វើយ និងមានតួនាទីជាអ្នកថែរក្សាអាកាសធាតុនៅលើផែនដីទៀតផង។ ព្រៃនេះគ្របដណ្តប់លើផ្ទៃដីដល់ទៅ ៩ ប្រទេសរួមមានប្រេហ្ស៊ីល, ប៉េរូ, កូឡុំប៊ី, វេណាហ៊្សុយអេឡា, អេក្វាឌ័រ, បូលីវីយ៉ា, ហ្ហ្គុយយ៉ាណា, ស៊ូរីណាមី និងហ្វ្រេនហ្គាណា។

ទោះជាយ៉ាងណា ក្នុងចំណោម ៩ ប្រទេសនោះសត្វដែលរស់នៅច្រើនជាងគេបំផុតគឺនៅទ្វីបអាមេរិកខាងត្បូងក្នុងប្រេស៊ីល នេះបើផ្អែកលើកត្តាជាច្រើន និងការប៉ាន់ស្មានពីសារមន្ទីរ និងទិន្នន័យវិទ្យាសាស្ត្រពលរដ្ឋ។ អ្នកកវិទ្យាសាស្ត្រភាគច្រើនយល់ស្របថា អាមេរិកខាងត្បូងគឺមានសត្វច្រើនជាងគេ ពីព្រោះព្រៃអាម៉ាហ្សូនគឺមានស្រទាប់ជីវិតសត្វចំនួន ៤ ដល់ជួរភ្នំ Andes ដែលមាន microclimates ផ្សេងៗគ្នារាប់សិប អាមេរិកខាងត្បូងមានការរួមបញ្ចូលគ្នាដ៏ល្អឥតខ្ចោះនៃសីតុណ្ហភាព និងទីតាំងភូមិសាស្ត្រ ដូច្នេះវាជាទ្វីបដែលមានសត្វគ្រប់ប្រភេទរស់នៅច្រើនជាងគេបំផុតលើភពផែនដី។

លោក Barnabas Daru អ្នកជំនាញបរិស្ថានវិទ្យានៅសាកលវិទ្យាល័យ Stanford បាននិយាយថា អាមេរិកខាងត្បូងមិនត្រឹមតែមានសត្វច្រើននោះទេ ក៏មានរុក្ខជាតិជាច្រើនប្រភេទផងដែរ។ លោកបានបន្តថា រុក្ខជាតិគឺជាបណ្តុំនៃប្រភេទសត្វ ប្រសិនបើកន្លែងមួយមានរុក្ខជាតិចម្រុះជាង នោះសារពាង្គកាយផ្សេងទៀតដែលពឹងផ្អែកលើរុក្ខជាតិនឹងកាន់តែសម្បូរបែប។ ទោះជាយ៉ាងណាក៏ដោយ បច្ចុប្បន្ននេះជីវចម្រុះនៅអាមេរិកខាងត្បូងគឺមិនដូចពីមុនឡើយ ដោយសារការកាប់បំផ្លាញព្រៃឈើ ការជីកយករ៉ែបារត និងការប្រែប្រួលអាកាសធាតុ សត្វគ្រប់ប្រភេទនៅអាមេរិកខាងត្បូងសព្វថ្ងៃគឺកំពុងប្រឈមមុខនឹងហានិភ័យនៃការផុតពូជមិនធ្លាប់មាន៕

ប្រទេសថៃ ៖ កាលពីថ្ងៃទី៣០ ខែមិថុនា ឆ្នាំ២០២៤ សារព័ត៌មានតៃវ៉ាន់រាយការណ៍ថា មានជនជាតិថៃ ភេ.ទ ទី៣ ម្នាក់បានចូលមកអុកឡុ.ក និងស្រែកឡូឡាក្នុងហាងលក់កាបូប និងស្បែកជើងប្រេនមួយកន្លែងនៅតៃវ៉ាន់ និងធ្វើឱ្យមនុស្សម្នាភ្ញាក់ផ្អើលយ៉ាងខ្លាំង ។ បន្ទាប់មក អាជ្ញាធរតៃវ៉ាន់ក៏ចាប់បញ្ជូននាងទៅរំងាប់អារម្មណ៍នៅមន្ទីរពេទ្យ ។

ក្រោយការចុះផ្សាយរបស់សារព័ត៌មានតៃវ៉ាន់រួចមក សារព័ត៌មានថៃបានបដិសេធថា នារីភេទទី៣ ដែលអុកឡុក និងស្រែកឡូឡានៅតៃវ៉ាន់នេះ មិនមែនជាជនជាតិថៃនោះទេ ពីព្រោះនាងនិយាយភាសាថៃមិនច្បាស់ ។ សារព័ត៌មានថៃបញ្ជាក់ថា នាងជនជាតិខ្មែរ ពីព្រោះនាងគ្មានឯកសារជាប់ខ្លួនបញ្ជាក់ថា នាងជាជនជាតិថៃទេ ។

ក្រោយមក សារព័ត៌មានថៃឈ្មោះ NewsWorkpoint (ข่าวเวิร์คพอยท์ 23) រាយការណ៍ថា នារីភេទទី៣ រូបនេះ គឺជាជនជាតិថៃ ហើយមិត្តភក្តិរបស់នាងប្រាប់ថា នាងធ្លាប់មានជំងឺ ប៉ុន្តែបានព្យាបាលជាសះស្បើយហើយ ។ មុនពេលនាងទៅអុកឡុកនៅហាងកាបូប និងស្បែកជើងប្រេនតៃវ៉ាន់ នាងធ្លាប់ Live តាមបណ្តាញសង្គមថា នឹងធ្វើខ្លួនឱ្យល្បីល្បាញនៅបរទេស ប៉ុន្តែពុំនឹកស្មានថា នាងល្បីល្បាញបែបនេះសោះ ។

សារព័ត៌មានបរទេសបានផ្សព្វផ្សាយពីនារីភេទទី៣ម្នាក់ ទៅស្រែកឡូឡានៅហាងលក់កាបូប និងស្បែកជើងប្រេនក្នុងហាងល្បីមួយឈ្មោះ «Charles & Keith» នៅអគារតៃប៉ិ ១០១ កាលពីថ្ងៃទី៣០ ខែមិថុនា បន្ទាប់មក អាជ្ញាធរតៃវ៉ាន់បានបញ្ជូននាងទៅរំងាប់អារម្មណ៍នៅមន្ទីរពេទ្យ ។ វាធ្វើឱ្យអ្នកលេងបណ្តាញសង្គមប្រកែកគ្នាថា តើនារីនេះជាជនជាតិអ្វីឱ្យប្រាកដ? ព្រោះក្នុងវីដេអូ នាងនិយាយភាសាថៃពុំច្បាស់ ហើយជនជាតិថៃម្នាក់បានសរសេរក្នុងបណ្តាញសង្គមថា នាងពុំមែនជាជនជាតិថៃទេ គឺនាងមកពីប្រទេសជិតខាងរបស់ថៃ ។

ចុងក្រោយ សារព័ត៌មានថៃឈ្មោះ NewsWorkpoint ក៏បានទំនាក់ទំនងទៅកាន់នារីភេទទី៣ ម្នាក់ទៀតឈ្មោះ ជីជី អាយុ២៨ឆ្នាំ ដើម្បីសាកសួរពីហេតុការណ៍អុកឡុកហាងកាបូបប្រេននៅតៃវ៉ាន់ ។ នាង ជីជី រៀបរាប់ថា តាមពិត នារីស្រែកឡូឡានេះ គឺជាមិត្តភក្តិរបស់នាងកាលពីរៀននៅសាកលវិទ្យាល័យឯកជនមួយ ។ មិត្តម្នាក់នេះរៀនពូកែ និងជួយពន្យល់មេរៀន ឬផ្តល់ការណែនាំឱ្យនាងរហូតមក ហើយពេលរៀនចប់ ពួកនាងក៏ទទួលបានសញ្ញាបត្រផងដែរ ។

នាង ជីជី បន្តថា មុននេះ ពួកនាងសង្កេតឃើញថា នារីជាមិត្តរបស់ខ្លួនចាប់ផ្តើមផ្លាស់ប្តូរចរិតខ្លាំង ដោយសារឃើញ Live តាមបណ្តាញសង្គម និងនិយាយស្តីពុំដឹងរឿង គឺនិយាយដូចមានជំងឺផ្លូវចិត្ត ឬគ្មានសតិក្នុងខ្លួន ។ បន្ទាប់មក ក្រុមមិត្តភក្តិក៏នាំគ្នាទៅរកនាងដល់កន្លែងស្នាក់នៅ និងនាំទៅព្យាបាលជំងឺ ទើបបានធូរស្រាលវិញរស់នៅតាមធម្មតា ។

ចំណែកហេតុការណ៍កើតឡើងនៅតៃវ៉ាន់ ពីដំបូង នាង ជីជី ក៏ពុំនឹកស្មានថា នាងជាមិត្តភក្តិរបស់ខ្លួននោះទេ ។ ប៉ុន្តែមិត្តភក្តិធ្លាប់ប្រាប់ថា នឹងទៅធ្វើរឿងល្បីមួយក្រៅប្រទេស ហើយបង្ហោះក្នុង Instagram ថា ទៅក្រៅប្រទេសលើកនេះរាងយូរបន្តិច ។ ក្រោយពីនាងបង្ហោះបានតែ១ថ្ងៃ ស្រាប់តែមានវីដេអូល្បីពេញបណ្តាញសង្គម ហើយនាងក៏ពុំនឹកស្មានថា នាងល្បីបែបនេះសោះ ។

នាង ជីជី បន្ថែមថា នាងចង់ឱ្យមិត្តភក្តិរបស់ខ្លួនល្បីល្បាញក្នុងផ្លូវល្អ មិនមែនល្បីរឿងអាក្រក់បែបនេះទេ ។ ការធ្វើដំណើរទៅតៃវ៉ាន់លើកនេះ គឺមិត្តភក្តិនាងជិះយន្តហោះពេលយប់ទៅតៃវ៉ាន់ម្នាក់ឯង ហើយទៅដល់តៃវ៉ាន់ នៅពេលព្រឹក ៕

ប្រទេសកូរ៉េខាងត្បូង ៖ កាលពីថ្ងៃទី២៩ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ភ្នំខ្ពស់បំផុតនៅប្រទេសកូរ៉េខាងត្បូង និងជាតំបន់ទេសចរណ៍ដ៏ពេញនិយមលើពិភពលោក កំពុងតែប្រឈមនឹង ប.ញ្ហាធំមួយដែលបង្កឡើងដោយភ្ញៀវទេសចរបរទេស ។ វាជាប.ញ្ហា សំរាមកើតឡើងពីកញ្ចប់មី ដែលភ្ញៀវទេសចរយកទៅបរិភោគនៅលើភ្នំ និងពុំព្រមបោះចោលឱ្យបានត្រឹមត្រូវ ។

ខាងឧទ្យានជាតិកោះជេជូរបស់កូរ៉េខាងត្បូង ដែលជាទីតាំងរបស់ភ្នំ Hallasan ជាភ្នំភ្លើងរលត់ និងជាភ្នំខ្ពស់បំផុតនៅកូរ៉េខាងត្បូង បានអំពាវនាវឱ្យភ្ញៀវទេសចរទាំងអស់កុំបោះចោលសំរាមផ្តេសផ្តាសដើម្បីថែរក្សាបរិស្ថាន ។ កន្លងមក ភ្ញៀវទេសចរបរទេស ក៏ដូចជាអ្នកឡើងភ្នំមួយចំនួន តែងតែយកមីកញ្ចប់ទៅបរិភោគនៅតាមផ្លូវ ឬលើកំពូលភ្នំ បន្ទាប់មក ពួកគេក៏បោះចោលកញ្ចប់មីពាសពេញទីធ្លាទាំងអស់ ។

ក្រៅពីការបោះចោលកញ្ចប់មីរួចហើយ ទឹកស្រុះមីនៅសេសសល់ពីការបរិភាគរបស់ភ្ញៀវទេសចរទាំងនេះ ក៏ប៉ះពាល់ដល់បរិស្ថានដូចគ្នាដែរ ពីព្រោះវាមានជាតិអំបិលខ្ពស់ ។ លើសពីនេះ បើភ្ញៀវទេសចរចាក់ទឹកស្រុះមីទាំងនេះចូលក្នុងប្រភពទឹក វានឹងធ្វើឱ្យសត្វផ្សេងៗក្នុងទឹកងាប់ផុតពូជ ។

ហេតុនេះ អាជ្ញាធរកូរ៉េខាងត្បូងបានសំណូមថា សូមភ្ញៀវទេសចរទាំងអស់ចាក់ទឹកស្រុះមីនៅសេសសល់ចូលក្នុងទឹក និងសូមឱ្យភ្ញៀវទេសចរចាក់ទឹកក្តៅចូលក្នុងកញ្ចប់មីដែលផលិតពីក្រដាសរឹងត្រឹមតែពាក់កណ្តាលប៉ុណ្ណោះ ដើម្បីកាត់បន្ថយបរិមាណទឹកស្រុះមីដែលពួកគេចាក់ចោល ។

ចំណែកភ្ញៀវទេសចរណាមានអាកប្បកិរិយាពុំសមរម្យនៅតំបន់ទេសចរណ៍ ដូចជា ៖ ជក់បារី, បោះចោលសំរាម ឬកាកសំណល់អាហារផ្តេសផ្តាស និងការបត់ជើងតូចនៅតាមផ្លូវ អាជ្ញាធរកូរ៉េខាងត្បូងនឹងពិន័យជាប្រាក់ស្មើជាង២លានវ៉ុន (ឬស្មើប្រមាណ ១.៣៩០ដុល្លារអាមេរិក) ។ កន្លងមក អាជ្ញាធរកូរ៉េខាងត្បូងបានពិន័យប្រាក់ភ្ញៀវទេសចរបរទេសចំនួន៩នាក់ ដោយសារពួកគេពុំគោរពច្បាប់របស់កូរ៉េខាងត្បូង ។

ក្រៅពីនេះ សមត្ថកិច្ចក៏បានទទួលពាក្យបណ្តឹងអំពីភាពមិនប្រក្រតីមួយចំនួនផងដែរ ដូចជា ៖ មានកន្លែងលក់សំបុត្រមុនពេលឡើងភ្នំ, ភ្ញៀវទេសចរបរទេសពុំគោរពច្បាប់ចរាចរណ៍ គឺពួកគេដើរឆ្លងកាត់ផ្លូវនៅកន្លែងហាមឃាត់ ។ ហេតុនេះ សមត្ថកិច្ចនឹងព្យាយាមចាត់វិធានការឱ្យភ្ញៀវទេសចរបរទេសគោរពច្បាប់កូរ៉េខាងត្បូងឱ្យបានច្រើន ៕

កាលពីថ្ងៃទី ៣០ ខែមិថុនា ឆ្នាំ ២០២៤នេះ យោងតាមការប្រភពសារព័ត៌មានតៃវ៉ាន់បានចុះផ្សាយថា ឧ.បទ្ទវហេតុអំពើហិ.ង្សា.មួយគឺបានកើតឡើងនៅហាងកាបូបប្រេន Charles & Keith ដែលមានទីតាំងស្ថិតនៅអាគារ Taipei ១០១ ប្រទេសតៃវ៉ាន់ ខណៈដែលសារព័ត៌មានជាច្រើនបានលើកឡើងថាស្រី្តនៅក្នុងហេតុ.ការណ៍នោះគឺជាជនជាតិថៃ។ យ៉ាងណាមិញ ថ្មីៗនេះ ប្រភពសារព័ត៌មានថៃមួយបានចេញមុខមកអះអាងដោយគ្មានភស្តុ.តាងជាក់លាក់ បែរជាចោទថា ស្រ្តីនោះគឺជាជនជាតិខ្មែរទៅវិញទេ។

នៅក្នុងវីដេអូខ្លីមួយដែលត្រូវបានចែករំលែកនៅលើបណ្តាញសង្គម ដែលបានបង្ហាញឲ្យឃើញពីសកម្មភាពរបស់ស្រ្តីម្នាក់ ក្នុងឈុតសម្លៀកបំពាក់ពណ៌ផ្កាឈុត និងបាតជើងទទេរ បានបង្កនូវភាពចលាចលនៅក្នុងហាងប្រេនដ៏ល្បីល្បាញនោះ ទំនងជាមានបញ្ហាការនិយាយភាសាមិនច្បាស់ បានជាសម្តែងនូវអាកប្បកិរិយាបែបខឹងសម្បារយ៉ាងខ្លាំង និងធ្វើការគ្រវែងកាបូបនិងរបស់របរមួយចំនួនទៀត ខ្ទាត់ខ្ចាត់ខ្ចាយពេញហាងតែម្តង ថែមទាំងបានប៉ះទង្គិចជាមួយបុគ្គលិកនៅទីនោះទៀតផង។

យោងតាមគេហទំព័រ ETtoday បានឲ្យដឹងថា បន្ទាប់ពីហេតុការណ៍ដ៏អាក្រក់នេះបានកន្លងផុតទៅមួយរំពេច ប៉ូលីសបានកំណត់អត្តសញ្ញាណស្ត្រីនេះថាជាជនជាតិថៃ។ ទោះជាយ៉ាងណាដោយសារកង្វះឯកសារបញ្ជាក់អត្តសញ្ញាណពិតប្រាកដរបស់នាង នូវមិនទាន់បញ្ជាក់បានឡើយនោះទេ។

យ៉ាងណាមិញ កាលពីរសៀលថ្ងៃទី ១ ខែកក្កដានេះ ប្រភពសារព័ត៌ថៃមួយដែលមានឈ្មោះថា Spring News ក៏បានធ្វើការបកស្រាយថា តាមរយៈឧបវទ្ទហេតុនេះ ស្រី្តដែលបង្កនូវភាពចលាចលខាងលើ តាមពិតគឺជាស្រ្តីខ្មែរទៅវិញនោះទេ។ សារព័ត៌មាននេះបានលើកឡើងថា ស្រ្តីនៅក្នុងហេតុការណ៍នេះ បាននិយាយភាសាថៃមែន ប៉ុន្តែសូរសំនៀង មិនមែនជាជនជាតិថៃពិតប្រាកដនោះទេ។

ការបកស្រាយរបស់សារព័ត៌មានថៃ ដែលគ្មានប្រភពនិងភស្តុតាងច្បាស់លាស់បែបនេះ គឺបានធ្វើឲ្យប្រជាជនខ្មែរជាច្រើន ហាក់ខឹងសម្បារយ៉ាងខ្លាំងពីការចោតប្រកាន់ ទម្លាក់កំហុសមកលើជាតិសាសន៍ខ្មែរបែបនេះ។ ខណៈការបញ្ចេញមតិមួយគឺបានលើកឡើងថា«សារព័ត៌មានថៃ គ្មានក្រមសីលធម៌វិជ្ជាជីវៈ លាបពណ៌ប្រជាជនកម្ពុជា។ ករណីជនជាតិថៃ បង្កចលាចលនៅកណ្តាលអាគារ តៃប៉ិ១០១ សារព័ត៌មានតៃវ៉ាន់ចុះផ្សាយព្រោងព្រាត ជាក្តីអាម៉ាសមុខនៃជនជាតិថៃ តែ សារព័ត៌មានថៃ គ្មាន ក្រមសីលធម៌វិជ្ជាជីវៈមួលបង្កាច់ និងបន្លំ ថាជាប្រជាជនកម្ពុជា»។

ទោះជាយ៉ាងណា រឿងនេះក៏នូវតែមិនទាន់បញ្ចប់ត្រឹមតែប៉ុណ្ណេះនោះទេ គឺនឹងមានការស្រាយបំភ្លឺជាបន្តបន្ទាប់ទៀត ដោយអាជ្ញាធរនឹងធ្វើការស៊ើបអង្កេតបន្ថែមថាជាស្រ្តីជនជាតិថៃឬក៏ជាជនជាតិខ្មែរ ដូចទៅនឹងការលើកឡើងរបស់សារព័ត៌មានថៃ?