ផលិតកម្មបារមីបានចេញមកបញ្ជាក់ទស្សនិកជនថាកម្មវិធីទូរទស្សន៍ «Rapper Fighter»ជាកម្មវិធីពីរដាច់ដោយឡែកពីគ្នានៃកម្មវិធី The Rapper Cambodia គ្មានទំនាក់ទំនងជាមួយគ្នាឡើយបើទោះបីជាមានការសង្កេតឃើញថា កម្មវិធីទាំងពីរនេះមានលក្ខណៈ និងឈ្មោះ ស្រដៀងគ្នាក៏ដោយ។ ចំពោះបេក្ខភាពដែលមានបំណងចង់ចូលរួមប្រកួតក្នុងកម្មវិធី «The Rapper Cambodia» រដូវកាលទី២ ត្រូវតែជាបេក្ខភាពដែលមិនបាន ឬកំពុងដាក់ពាក្យសម្រាប់កម្មវិធីប្រលងរ៉េប ឬ មានការបង្ហាញមុខ ក្នុងកម្មវិធីទូរទស្សន៍ប្រភេទរ៉េបផ្សេងទៀតដែលមានលក្ខណៈស្រដៀងគ្នា។

នាពេលថ្មីៗនេះអ្នកមួយចំនួនបានជជែកញែកយ៉ាងខ្លាំង ហើយអ្នកមួយចំនួនក៏មានការយល់ច្រលំថាកម្មវីធីប្រលងចម្រៀងថ្មីមួយដូចទៅនឹងកម្មវិធីប្រលងចម្រៀងរ៉េប The Rapper Cambodia ។ មានការយល់ច្រលំច្រើនពីសំណាកទស្សនិកជននេះខាងផលិតកម្មបារមី និងផលិតកម្មភ្លើងគប់បានបញ្ជាក់នៅថ្ងៃទី១៧ កក្កដា នេះយ៉ាងច្បាស់លាស់ថា «The Rapper Cambodia» និង «Rapper Fighter» គឺជាកម្មវិធីពីរដាច់ដោយឡែកពីគ្នា ហើយយើងពិតជាមិនមានទំនាក់ទំនងជាមួយនឹងកម្មវិធីថ្មីនេះទេ បើទោះបីជាមានការសង្កេតឃើញថា កម្មវិធីទាំងពីរនេះមានលក្ខណៈ និងឈ្មោះ ស្រដៀងគ្នាក៏ដោយ។

លើសពីនេះ តាមលក្ខន្តិកៈនៃភាពផ្តាច់មុខរបស់កម្មវិធីបារមីបញ្ជាក់ថា បេក្ខភាព ដែលមានបំណង ចង់ចូលរួម ប្រកួត ក្នុងកម្មវិធី “The Rapper Cambodia” រដូវកាលទី២ត្រូវតែជាបេក្ខភាពដែលមិនបាន ឬកំពុងដាក់ពាក្យសម្រាប់កម្មវិធីប្រលងរ៉េប ឬ មានការបង្ហាញមុខ ក្នុងកម្មវិធីទូរទស្សន៍ប្រភេទវ៉េបផ្សេងទៀត ដែលមានលក្ខណៈស្រដៀងគ្នា។

ក្នុងសេចក្តីជូនដំណឹងនេះ ផលិតកម្មបារមីបានបញ្ជាក់ទៀថា ក្នុងឆ្នាំនេះ កម្មវិធី The Rapper Cambodia នឹងត្រលប់មកវិញជាមួយនឹងការផ្លាស់ប្តូរដ៏គួរឱ្យរំភើប ជាមួយនឹង សិល្បករ សិល្បការិនីថ្មី ក្នុងទម្រង់ច្នៃប្រឌិតជាងមុន ព្រមទាំងឱកាស ឈ្នះពានរង្វាន់ជ័យលាភី កាន់តែធំជាងមុន រួមជាមួយនឹងឱកាស ឈានជើង ទៅកាន់កម្រិតអន្តរជាតិផងដែរ។

The Rapper Cambodia រដូវកាលទី២ នឹងបន្តស្មារតីនៃការសហការជាមួយនឹងស្លាកសញ្ញាផលិតផល សិល្បករសិល្បការិនី និង ទេពកោសល្យដែលមានចក្ខុវិស័យក្នុងការបង្កើតវេទិកាលើកស្ទួយសិល្បៈខ្មែរនិងជំរុញឱ្យមានតន្ត្រីរស់រវើកព្រមទាំងឆាកហ៊ីបហបដ៏មានគុណភាព។

គួរបញ្ជាក់ផងដែរថា កម្មវិធី The Rapper Cambodia បានបញ្ចប់រដូវកាលទី១របស់ខ្លួនរយៈពេលជិត៧ខែមកហើយ ខណៈ យូហៃ គឺជាម្ចាស់ជ័យលាភីជាកូនក្រុមរបស់ នរិទ្ធ។ រដូវកាលមុនមានគ្រូបង្វឹកចំនួន៤នាក់គឺ ខ្មែរមួយជីវិត , នរិទ្ធ , Kingchi និង RuthKo និងមាន Producers ពីរនាក់គឺ វណ្ណដា និង ជូវី លីន៕

កាបូបកំប្លោករបស់កូនខ្មែរ ក្រោមស្លាកយីហោ «បាលិលេយ្យ» ជាសមិទ្ធផលក្នុងខេត្តសៀមរាប កំពុងទទួលបានការគាំទ្រយ៉ាងច្រើនផុសផុលក្នុងចំណោមកូនខ្មែរគ្រប់ៗរូប ខណៈក៏ល្បីខ្ទរខ្ទារដល់ក្រៅប្រទេស។

ដូចដែលយើងគ្រប់គ្នាបានដឹងមកហើយថា កំប្លោក គឺជារុក្ខជាតិម្យ៉ាង ដែលតែងតែដុះពាសពេញផ្ទៃបឹងបួរឬទន្លេ ហើយកំប្លោកនេះ ពិតជាផ្តល់នូវអត្ថប្រយោជន៍ជាច្រើន ដែលអាចធ្វើជាម្ហូបអាហារ ឬ កែច្នៃធ្វើជាសម្ភារប្រើប្រាស់ផ្សេងៗដូចជា កាបូប អង្រឹង ស្បែកជើង ទ្រនាប់ចាន ទ្រនាប់កែវជាដើម ។

ដោយឡែកនៅឯខេត្តសៀមរាបឯណ្ណេះវិញ ប្រជាពលរដ្ឋបាននាំគ្នាកែច្នៃកំប្លោកធ្វើជាកាបូបយ៉ាងស្រស់ស្អាត មានភាពទាក់ទាញដើម្បីលក់ជូនភ្ញៀវទេសចរអន្តរជាតិ និងប្រជាពលរដ្ឋក្នុងស្រុក។ ខណៈដែលសិប្បកម្មផលិតកាបូបកំប្លោកមួយ ក្រោមយីហោ«បាលិលេយ្យ» ក៏បានលេចឡើង និងបានកែច្នៃម៉ូតកាបូបកំប្លោក បានយ៉ាងច្រើនម៉ូត ច្រើនសណ្ឋាន ដែលធ្វើពីដៃរបស់សិប្បករខ្មែរសុទ្ធសាធ។

កាបូបនីមួយៗដែលបានផុសចេញមកពីហាង«បាលិលេយ្យ» ប្រកបដោយភាពប្រណិត មានគុណភាពល្អ ជាប់ធន់ ស្រស់ស្អាត និងតម្លៃសមរម្យ ក៏ទទួលបាននូវចំណាប់អារម្មណ៍ពីភ្ញៀវទេសចរគ្រប់ៗរូប និងសូម្បីតែតារាល្បីៗ ក៏បានចូលរួមគាំទ្រផលិតផលខ្មែរមួយនេះដែរ។ កាបូបកំប្លោក ដែលមិនត្រឹមតែបង្ហាញពីភាពប៉ិនប្រសប់ខ្ពស់របស់កូនខ្មែរប៉ុណ្ណោះទេ ប៉ុន្តែវាបានក្លាយជាប្រភពចំណូលរបស់បងប្អូនប្រជាពលរដ្ឋដែលរស់នៅក្នុងខេត្តសៀមរាបផងដែរ។

បើយោងតាមការបញ្ជាក់កាលពីពេលកន្លងទៅនេះបានឲ្យដឹងថា បាលិលេយ្យ គឺជាឈ្មោះរបស់ប្រាសាទខ្មែរមួយកន្លែង កសាងឡើងនៅក្នុងសតវត្សទី ១២ ដែលមានទីតាំងស្ថិតក្នុងខេត្តសៀមរាបនេះផ្ទាល់តែម្តង ពោលប្រាសាទនេះគឺមានចម្ងាយប្រមាណ ១១ គីឡូម៉ែត្រពីក្រុងសៀមរាប រឺចម្ងាយពីប្រាសាទបាយ័នត្រឹមតែ ១.៥ គីឡូម៉ែត្រប៉ុណ្ណោះ៕

អ្នកប្រាជ្ញ ឬទស្សនវិទូ មិនមែនជាក្រុមមនុស្សធម្មតាដូចមនុស្សយើងឡើយ។ ពួកគេកើតមកតែងមានការគិតខុសប្លែកពីមនុស្សដទៃ តាំងពីរបៀបរបបក្នុងការរស់នៅ ទម្លាប់ប្រចាំថ្ងៃដូចជាការគេង ការនិយាយ និងអាកប្បកិរិយាមួយចំនួនក៏ខុសប្លែកពីគេឯងផងដែរ។ និយាយឱ្យចំទៅ ក្រុមមនុស្សជំនាន់មុន ឬក្រុមអ្នកប្រាជ្ញ តែងតែមានទម្លាប់ចម្លែកៗទៅតាមធម្មជាតិរបស់ពួកគេ ដោយទម្លាប់ទាំងនោះបានធ្វើឱ្យពួកគេធ្វើការងារបានល្អ និងរកឃើញអ្វីដែលថ្មីៗ និងពិសេសៗជាដើម។ ដូច្នេះនៅក្នុងអត្ថបទនេះ យើងនឹងនាំប្រិយមិត្តមកស្គាល់កំពូលអ្នកប្រាជ្ញ ៥ រូបដែលមានទម្លាប់ចម្លែកៗ ត្រូវបានចារទុកក្នុងប្រវត្តិសាស្ត្រ។

១.Albert Einstein៖ គឺជាអ្នកប្រាជ្ញរូបវិទ្យា និងគណិតវិទ្យាដ៏ល្បីល្បាញម្នាក់របស់ពិភពលោក។ លោក Einstein មានទម្លាប់មិនពាក់ស្រោមជើងនោះទេ ទោះបីស្ថិតក្នុងអាកាសធាតុត្រជាក់ខ្លាំងប៉ុណ្ណាក៏ដោយ ឬនៅពេលពាក់ស្បែកជើងឃ្លប់ក៏លោកមិនពាក់ស្រោមជើងដែរ ដោយលោកជឿថា ការពាក់ស្រោមជើងគឺគ្មានប្រយោជន៍។

២. Friedrich Schiller៖ លោក ហ្វ្រីឌ្រីច ស្គីលឡឺ គឺជាអ្នកប្រាជ្ញជនជាតិអាល្លឺម៉ង់ដ៏ល្បីល្បាញម្នាក់ និងជាកវីខាងកំណាព្យមួយរូប ដែលចូលចិត្តហិតក្លិនផ្លែប៉ោមស្អុយ លោកក៏ជាអ្នកទស្សនវិទូផងដែរ។ លោកតែងមានទម្លាប់រក្សាទុកផ្លែប៉ោមស្អុយឱ្យគរពេញបន្ទប់ ព្រោះពេលលោកធុំក្លិនផ្លែប៉ោមស្អុយ ធ្វើឱ្យអ្នកប្រាជ្ញរូបនេះសរសេរកំណាព្យបានល្អ។

៣.Benjamin Franklin៖ បេនចាមីន ហ្វ្រែងឃ្លីន ដែលជាបិតាស្ថាបនិកម្នាក់របស់អាមេរិក មានចំណាប់អារម្មណ៍លើការងូតទឹកខ្យល់។ លោកតែងតែចំណាយពេលអង្គុយអាក្រាតនៅមុខបង្អួចបើកចំហ ដោយជឿថាការប៉ះពាល់នឹងខ្យល់អាកាសបរិសុទ្ធមានសារៈសំខាន់សម្រាប់សុខភាព។

៤.Voltaire៖ លោក វ៉ុលទែរ គឺជាអ្នកប្រាជ្ញជនជាតិបារាំង កើតនៅឆ្នាំ ១៦៩៤ និងស្លាប់ទៅវិញនៅឆ្នាំ ១៧៧៨។ វ៉ុលទែរ មានទម្លាប់ម្យ៉ាង គឺចូលចិត្តហូបកាហ្វេណាស់ ប៉ុន្តែការហូបកាហ្វេរបស់លោក គឺខុសប្លែកពីមនុស្សម្នាយើងឆ្ងាយណាស់ និយាយឱ្យងាយយល់ទៅ លោកហូបកាហ្វេរវាង ២០ ទៅ ៤០ ពែងឯណោះក្នុងមួយថ្ងៃៗ។

៥.Sigmund Freud៖ លោក ស៊ីហ្គម៉ុន ហ្វ្រូដ គឺជាអ្នកប្រាជ្ញជនជាតិអូស្ត្រាលី កើតនៅឆ្នាំ ១៨៥៦ និងស្លាប់ទៅវិញនៅឆ្នាំ ១៩៣៩។ ស្របពេលដែលមនុស្សជាច្រើនស្គាល់ថា ហ្វូដ ជាបិតាផ្នែកវិភាគពីគំនិតមនុស្ស (មនោវិទូ), លោកក៏ជាអ្នកប្រាជ្ញ ដែលបានសរសេរសៀវភៅ ស្តីពីការងារទស្សនវិជ្ជាផងដែរ។ លោកគិតថា ពេលវេលាពិតជាមានតម្លៃណាស់ រហូតដល់ថ្នាក់លោកមិនចង់ចំណាយពេលដុសធ្មេញ ហើយប្រការនេះធ្វើឱ្យប្រពន្ធរបស់លោក ជាអ្នកច្របាច់ថ្នាំដុសធ្មេញដាក់លើច្រាសដុសធ្មេញឱ្យលោកជារៀងរាល់ព្រឹក។ នេះបង្ហាញថា លោកមិនបានចំណាយពេលវេលាចោល ដោយឥតប្រយោជន៍នោះទេ៕

ផ្សិតផ្ចាក់ ដែលជារុក្ខជាតិម្យ៉ាង និយមបំផុតមួយសម្រាប់អ្នកខេត្តស្វាយរៀង ចូលចិត្តបរិភោគខ្លាំងណាស់ ដោយអាចយកទៅធ្វើមុខម្ហូបបានច្រើនមុខដូចជា ស្លរម្សៅ ឆាជាមួយសាច់គោ ជ្រូក ខសាច់ជាដើមដោយមានរស់ជាតិល្វីងតិចៗប៉ុន្តែឆ្ញាញ់។

នៅក្នុងការដកផ្សិតផ្ចាក់នេះ ពលរដ្ឋក្នុងមួយគ្រួសសារអាចដកផ្សិតបានចាប់ពី៣ទៅ៥គីឡូក្រាម ដែលភាគច្រើនត្រូវដើរទៅក្នុងព្រៃប្រមាណជា២-៣គីឡូ ពីក្រោយផ្ទះរបស់ពួកគាត់។

បើតាមទីផ្សារបច្ចុប្បន្ន ផ្សិតផ្ចាក់នេះ អាចលក់បានក្នុង១គីឡូក្រាមតម្លៃចាប់ពី២០០០០រៀលទៅ២៥.០០០រៀល ដោយភាគច្រើន ពួកគាត់ដាក់លក់ជាប់ផ្លូវជាតិលេខ១ដោយមានអ្នកធ្វើដំណើរឆ្លងកាត់ចូលមកទិញជាហូរហែ។ការដកផ្សិតលក់នេះ ជាចំណូលមួយផ្នែក ដែលជួយសម្រួលជីវភាពរបស់ពលរដ្ឋអ្នកខេត្តស្វាយរៀង។

គួរបញ្ជាក់ផងដែរថា ផ្សិតផ្ចាក់នេះ អាចលក់បានថ្លៃជាងនេះទៅទៀត ប្រសិនបើគេយកទៅហាលឱ្យស្ងួតទុកលក់៕

អគ្គនាយកដ្ឋានអន្តោប្រវេសន៍ ក្រសួងមហាផ្ទៃ បានធ្វើការស្រាវជ្រាវ បន្ទាប់ពីបានទទួលដំណឹងអំពីជនជាតិចិនម្នាក់ ដែលត្រូវបានតុលាការប្រទេសសឹង្ហបូរី ផ្តន្ទាទោសដាក់ពន្ធនាគារពីបទសម្អាតប្រាក់ និងបានចូលមកប្រទេសកម្ពុជា។

ជនជាតិចិននោះមានឈ្មោះ ZHANG RUIJIN ភេទប្រុស កាន់លិខិតឆ្លងដែនប្រទេស Saint Kitts and Nenis ដែលត្រូវបានតុលាការប្រទេសសឹង្ហបូរី ផ្តន្ទាទោសដាក់ពន្ធនាគារពីបទសម្អាតប្រាក់។

ជនជាតិចិនខាងបានចូលមកប្រទេសកម្ពុជានៅថ្ងៃទី១៥ ខែមិថុនា ឆ្នាំ២០២៤ ហើយក៏ត្រូវបាន ស្វែងរកឃាត់ខ្លួនបាន ដោយអគ្គនាយកដ្ឋានអន្តោប្រវេសន៍ ព្រមទាំងបានរៀបចំនីតិវីធី រួចក៏បានធ្វើការបណ្តេញចេញពីព្រះរាជាណាចក្រកម្ពុជា នៅថ្ងៃទី១៦ ខែកក្កដា ឆ្នាំ២០២៤ តាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ៕