ទីក្រុង Barcelona របស់ប្រទេសអេស្ប៉ាញ និងកោះបាលីនៅក្នុងប្រទេសឥណ្ឌូនេស៊ីបានតវ៉ាបណ្តេញភ្ញៀវទេសចរចេញពីតំបន់ ដោយសារកំណើនភ្ញៀវទេសចរលើសលប់ពេក ធ្វើឱ្យអ្នកស្រុកតានតឹង។

យោងតាមលោក Sandiaga Uno រដ្ឋមន្ត្រីក្រសួងទេសចរណ៍ និងសេដ្ឋកិច្ចច្នៃប្រឌិតរបស់ប្រទេសឥណ្ឌូណេស៊ី បាននិយាយនៅក្នុងសន្និសីទសារព័ត៌មានមួយកាលពីថ្ងៃទី ១៧ ខែកក្កដា ឆ្នាំ២០២៤ នេះថា ប្រជាជននៅលើកោះបាលីបានចាប់ផ្តើមតវ៉ាបណ្តេញអ្នកទេសចរចេញពីតំបន់ខ្លួន ដែលនេះមិនខុសគ្នាពីប្រជាជនក្នុងទីក្រុង Barcelona ប៉ុន្មានទេ ដោយពួកគេបានដើរតាមផ្លូវដើម្បីតវ៉ា បាញ់កាំភ្លើងទឹកដាក់អ្នកទេសចរ និងបានព្យួរបដាម្តងហើយម្តងទៀតជាមួយនឹងពាក្យបញ្ជូនអ្នកទេសចរទៅផ្ទះវិញ។

បញ្ហានេះត្រូវបានលើកឡើងក្នុងបរិបទដែលមេដឹកនាំឧស្សាហកម្មទេសចរណ៍ អ្នកនយោបាយ និងក្រុមសហគមន៍ជាច្រើននៅកោះបាលីបានដឹងថាកោះនេះមានមនុស្សចង្អៀត។ ប្រសិនបើបន្ថែមភ្ញៀវទេសចរទៀត នោះអ្នកស្រុកនឹងមានភាពតានតឹង ហើយអាចធ្វើសកម្មភាពអវិជ្ជមានណាមួយលេចឡើងទៅលើភ្ញៀវទេសចរ។ លោក Sandiaga Uno បាននិយាយថា បញ្ហានេះចាំបាច់ត្រូវបង្កើតតុល្យភាពរវាងតម្រូវការរបស់ប្រជាជនក្នុងតំបន់ និងបំណងប្រាថ្នារបស់ភ្ញៀវទេសចរ ដើម្បីជៀសវាងការចង្អៀតណែន និងអរិភាពចំពោះឧស្សាហកម្មទេសចរណ៍។

ដូច្នេះសកម្មភាពទេសចរណ៍ចាំបាច់ត្រូវចែកចាយឱ្យស្មើគ្នានៅទូទាំងកោះ។ លោក Sandiaga Uno បានបន្តទៀតថា យើងនឹងជំរុញការវិវឌ្ឍនៃការសាងសង់ផ្លូវធំតភ្ជាប់កោះបាលីខាងកើតជាមួយកោះបាលីខាងលិចឱ្យបានឆាប់តាមដែលអាចធ្វើទៅបាន ដោយហេតុនេះនឹងជួយឱ្យអ្នកទេសចរមិនទៅលេងកោះបាលីខាងត្បូងទៀតទេ។ ជាការពិតណាស់វិស័យទេសចរណ៍គឺជាកត្តាជំរុញសេដ្ឋកិច្ចជាតិយ៉ាងសំខាន់បំផុត ទោះជាយ៉ាងណារដ្ឋមន្ត្រីក្រសួងទេសចរណ៍ក៏មានបំណងចង់ពង្រឹងច្បាប់បន្ថែមទៀតទៅលើភ្ញៀវទេសចរណាដែលមានអាកប្បកិរិយាមិនល្អត្រូវតែទទួលទណ្ឌកម្ម។

គួរបញ្ជាក់ដែរថា នៅឆ្នាំ ២០២៣ កោះបាលីបាននិរទេសជនបរទេសចំនួន ៣៤០ នាក់ កើនឡើងពី ១៨៨ នាក់ក្នុងឆ្នាំ ២០២២ ភាគច្រើនមកពីសហរដ្ឋអាមេរិក រុស្ស៊ី ចក្រភពអង់គ្លេស និងនីហ្សេរីយ៉ា សម្រាប់ការរំលោភបំពានដូចជា ការស្នាក់នៅលើសម៉ោង ការងារខុសច្បាប់ និងការស្លៀកពាក់រសើបនៅកន្លែងពិសិដ្ឋ។ យោងតាមលោក Uno កោះបាលីត្រូវការតែអ្នកទេសចរដែលមានគុណភាពខ្ពស់ជំនួសឱ្យបុគ្គលដែលមិនគោរពច្បាប់ និងវប្បធម៌ក្នុងស្រុក៕

បរទេស៖ ជញ្ជាំងស្ទើរតែគ្រប់អគារទាំងអស់នៅទីក្រុង Nördlingen របស់ប្រទេសអាល្លឺម៉ង់សុទ្ធតែគ្របដណ្តប់ដោយត្បូងពេជ្យប្រហែល ៧២,០០០ តោន។ ក្នុងនោះព្រះវិហារ Georgie តែមួយប៉ុណ្ណោះមានពេជ្រសរុបស្មើនឹង ៥,០០០ ការ៉ាត់ឯណោះ នេះបើយោងតាមការចុះផ្សាយរបស់ CNN កាលពីថ្ងៃទី១៧ ខែកក្កដា ឆ្នាំ២០២៤។

Nördlingen គឺទីក្រុងដែលមានរាងជារង្វង់ដូចជារណ្តៅ និងមានសណ្ឋានដីល្អឥតខ្ចោះ ដោយអាគារធំៗជាច្រើននៅទីនេះសុទ្ធតែដាំពេជ្រ ដែលធ្វើឱ្យវាជាប់ឈ្មោះថាជាទីក្រុងពេជ្រ។ យោងតាមសារព័ត៌មានបរទេស រណ្តៅរបស់ទីក្រុងនេះត្រូវបានបង្កើតឡើងដោយអាចម៍ផ្កាយមួយបុកជាមួយផែនដីកាលពី ១៥ លានឆ្នាំមុន ហើយពេជ្រក៏បានធ្លាក់ចេញពីអាចម៍ផ្កាយនោះ ជាហេតុធ្វើឱ្យទីក្រុងនេះសម្បូរទៅដោយពេជ្រ។

វេជ្ជបណ្ឌិត Stefan Hölzl ក៏បានចែករំលែកថា “នៅកន្លែងខ្លះជុំវិញពិភពលោកក៏មានពេជ្រប្រភេទនេះផងដែរ ដោយមនុស្សបានយកពេជ្រនេះទៅប្រើប្រាស់សម្រាប់ការសាងសង់។ បើយោងតាមភូគព្ភវិទូ និងជានាយកសារមន្ទីរ Nördlingen RiesKrater ក៏បាននិយាយដែរថា នៅទីក្រុង Nördlingen ថ្មដែលធ្វើពីពេជ្រត្រូវបានប្រើប្រាស់សម្រាប់សាងសង់ទីក្រុងទាំងមូល។

ហេតុនេះព្រះវិហារ St. Georgie ក្នុងទីក្រុង Nördlingen តែម្នាក់ឯងមានពេជ្រសរុបស្មើនឹង ៥,០០០ ការ៉ាត់ឯណោះ។ យោងតាមលោក Hölzl អវកាសយានិករបស់ NASA មកពីបេសកកម្ម Apollo 14 និង Apollo 16 បានទៅទីក្រុង Nördlingen មុនពេលរុករកព្រះច័ន្ទ ដើម្បីស្វែងយល់អំពីថ្មដែលពួកគេអាចរកឃើញនៅក្នុងលំហ។ ទោះជាយ៉ាងណាក៏ដោយ ទោះបីជាពេជ្រជួយទីក្រុងឱ្យមានពន្លឺភ្លឺស្វាងក្នុងព្រះអាទិត្យក៏ដោយ ក៏ពេជ្យទាំងនេះមិនមានតម្លៃសម្រាប់សេដ្ឋកិច្ចដែរ៕

ប្រទេសហូឡង់ ៖ បើទោះជាប្រទេសនានាលើពិភពលោក បានព្យាយាមដោះស្រាយបញ្ហាការបំពុលបរិស្ថានខ្លាំងយ៉ាងណាក្តី ប៉ុន្តែឧស្សាហកម្មមួយដែលប្រទេសទាំងនេះនៅតែពុំអាចដោះស្រាយបាននាពេលបច្ចុប្បន្ន គឺឧស្សាហកម្មអាកាសចរណ៍ ។ គេមើលឃើញថា ការបំពុលបរិស្ថាន ពុំមែនកើតឡើងដោយសាររថយន្តប្រើប្រាស់ប្រេងឥន្ធនៈតែម្យ៉ាងទេ ប៉ុន្តែវាក៏បណ្តាលមកពីយន្តហោះផងដែរ ។

ឧបសគ្គចម្បង គឺមកពីការប្រើប្រាស់ថាមពលអគ្គិសនីក្នុងយន្តហោះពុំងាយស្រួលដោះស្រាយបញ្ហាដូចរថយន្តអគ្គិសនីទេ ពីព្រោះមានអត្រាការប្រើប្រាស់ថាមពលខ្ពស់ ព្រមទាំងថ្មមានទម្ងន់ធ្ងន់ ។ ហេតុនេះ ទើបមនុស្សភាគច្រើនយល់ឃើញថា ពិភពលោក នឹងអាចប្រើប្រាស់យន្តហោះអគ្គិសនីនាពេលឆាប់ៗ ប៉ុន្តែត្រូវតែអភិវឌ្ឍន៍បច្ចេកវិទ្យាថ្មយន្តហោះឱ្យកាន់តែទំនើបជាងនេះ ។

កាលពីថ្ងៃទី១៧ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ក្រុមហ៊ុនថ្មីរបស់ប្រទេសហូឡង់ ឈ្មោះ Elysian មានគម្រោងផលិតយន្តហោះអគ្គិសនី ដែលអាចដឹកអ្នកដំណើរបានចំនួន៩០នាក់ និងអាចហោះហើរក្នុងចម្ងាយ៨០៥គីឡូម៉ែត្រ ។ ក្រុមហ៊ុនបញ្ជាក់ថា ក្រុមហ៊ុនគ្រោងផលិតយន្តហោះអគ្គិសនី ហើយវានឹងកាត់បន្ថយការបំភាយឧស្ម័នរហូតដល់៩០% នារយៈពេល១០ឆ្នាំខាងមុខ ។

ក្រោយពីក្រុមហ៊ុន Elysian ប្រកាសបែបនេះ ក៏មានសំណួរសួរថា តើក្រុមហ៊ុនអាចផលិតយន្តហោះអគ្គិសនីដោយរបៀបណា ពីព្រោះបច្ចុប្បន្ន កំពុងតែខ្វះខាតការអភិវឌ្ឍបច្ចេកវិទ្យាថ្មយន្តហោះ?

ក្រុមហ៊ុនបញ្ជាក់ថា បញ្ហានេះពាក់ព័ន្ធនឹងការរចនាម៉ូដ បើទោះជាពេលនេះ យើងមានត្រឹមតែគម្រោង និងរូបតំណាងក៏ដោយ ប៉ុន្តែវាពុំមែនជាការយកយន្តហោះបច្ចុប្បន្នមកបំពាក់ប្រព័ន្ធអគ្គិសនីទេ ។ ក្រុមហ៊ុននឹងរចនាម៉ូដយន្តហោះអគ្គិសនីថ្មីទាំងអស់ ដើម្បីឱ្យវាស្របនឹងការប្រើប្រាស់ថាមពលអគ្គិសនី ។

ក្រៅពីនេះ យើងនឹងបំពាក់ថ្មនៅផ្នែកផ្សេងៗរបស់យន្តហោះ និងព្យាយាមកាត់បន្ថយទម្ងន់ផ្នែកផ្សេងៗរបស់យន្តហោះផងដែរ ។ ការរចនាម៉ូដយន្តហោះអគ្គិសនី គឺស្រដៀងនឹងយន្តហោះ Jet កាលពីឆ្នាំ១៩៦០ ។

រយៈពេល១០ឆ្នាំទៀត ថ្មយន្តហោះនឹងត្រូវបានអភិវឌ្ឍន៍សមត្ថភាពឱ្យកាន់តែទំនើបជាងនេះ ហើយក្រុមហ៊ុននឹងអាចប្រើប្រាស់ឧបករណ៍ថ្មីៗសម្រាប់ផលិតយន្តហោះអគ្គិសនី ដែលពុំប៉ះពាល់បរិស្ថានដូចពេលបច្ចុប្បន្ន ។ ដូច្នេះ វាជាពេលវេលាសមស្របសម្រាប់ក្រុមហ៊ុន Elysian អាចផលិតយន្តហោះអគ្គិសនីសម្រាប់ប្រើប្រាស់នៅលើពិភពលោក ៕

ប្រទេសថៃ ៖ ហេតុការណ៍សម្លា.ប់ ជនជាតិវៀតណាមចំនួន៦នាក់ កាលពីថ្ងៃទី១៦ ខែកក្កដា ឆ្នាំ២០២៤ ក្នុងសណ្ឋាគារប្រណីតមួយនៅតំបន់រ៉ាជប្រាស៊ុង ទីក្រុងបាងកក បានបង្កការភ្ញាក់ផ្អើលពេញទីក្រុងបាងកក ទាំងនៅប្រទេសថៃ និងក្រៅប្រទេស ។ ក្រោយមក សមត្ថកិច្ចបានរកឃើញភស្តុតាងថ្នាំប្រភេទ Cyanide ក្នុងកែវទឹកចំនួន៦កែវនៅបន្ទប់កើតហេតុ ហើយសមត្ថកិច្ចសន្និដ្ឋានថា ហេតុការណ៍នេះកើតឡើងដោយសារការជំពាក់បំណុលការធ្វើជំនួញ ។

សមត្ថកិច្ចជំនាញស៊ើបអង្កេតបានធ្វើសន្និសីទសារព័ត៌មានបញ្ជាក់ថា ជនល្មើស គឺជាមនុស្សម្នាក់ក្នុងចំណោមមនុស្សទាំង៦នាក់ដែលបានស្លាប់ ដោយជនល្មើសបានប្រើប្រាស់ថ្នាំប្រភេទ Cyanide ដាក់ក្នុងទឹកតែ ហើយសមត្ថកិច្ចរកឃើញថ្នាំនេះក្នុងកែវកាហ្វេផងដែរ ។ ប៉ុន្តែពុំដឹងថា តើជនជាតិវៀតណាមទាំងនេះបានផឹកទឹកតែ និងកាហ្វេក្នុងពេលជាមួយគ្នាឬយ៉ាងណា ពីព្រោះពួកគេស្លាប់ក្នុងពេលតែមួយ ។

នៅថ្ងៃទី១៧ ខែកក្កដា សារព័ត៌មានថៃរាយការណ៍ថា ជនជាតិវៀតណាមដែលស្លាប់ក្នុងបន្ទប់សណ្ឋាគារ គឺមានបុរស៣នាក់ និងស្ត្រី៣នាក់ ហើយមូលហេតុបណ្តាលឱ្យពួកគេស្លាប់ គឺដោយសារបញ្ហាការសងបំណុលពាក់ព័ន្ធនឹងការធ្វើជំនួញរួមគ្នា ។ បើតាមការត្រួតពិនិត្យការចេញ-ចូលប្រទេសថៃបង្ហាញថា ជនជាតិវៀតណាមទាំង៦នាក់ បានធ្វើដំណើរមកប្រទេសថៃខុសថ្ងៃគ្នាទាំងអស់ គឺពួកគេចាប់ផ្តើមមកប្រទេសថៃ ចាប់ពីថ្ងៃទី៤ ខែកក្កដា រហូតមក ប៉ុន្តែពួកគេក៏មកស្នាក់នៅសណ្ឋាគារនេះរួមគ្នា ។

លើសពីនេះ ពួកគេបានធ្វើដំណើរចេញ-ចូលប្រទេសថៃជាញឹកញាប់ទៀតផង ហើយសមត្ថកិច្ចនឹងស៊ើបអង្កេតបន្តថា តើការចេញ-ចូលប្រទេសថៃជាញឹកញាប់របស់ពួកគេ ពាក់ព័ន្ធនឹងការងារជំនួញ ឬធ្វើអ្វីខុសច្បាប់ដែរឬទេ?

លោក ទ្រីណុបផាស៊ីន ផុនសុវ៉ាត់ មេបញ្ជាការប៉ូលិស និងមានតួនាទីស៊ើបអង្កេតករណីនេះ បាននិយាយក្នុងសន្នីសីទសារព័ត៌មានថា មានជនជាតិវៀតណា ចំនួន៧នាក់ បានធ្វើដំណើរមកប្រទេសថៃ ប៉ុន្តែជនជាតិវៀតណាមម្នាក់បានចាកចេញពីថៃវិញ នៅថ្ងៃទី១០ ខែកក្កដា ។ ហេតុនេះ ជនជាតិវៀតណាមរូបនេះពុំពាក់ព័ន្ធនឹងហេតុការណ៍ស្លាប់ទេ ។

បើតាមត្រួតការពិនិត្យកាមេរ៉ាសុវត្ថិភាពឃើញថា នៅថ្ងៃទី១៥ ខែកក្កដា ជនជាតិវៀតណាមចំនួន៦នាក់ បានមកស្នាក់នៅបន្ទប់សណ្ឋាគារ លេខ៥០២ និងគ្មានបុគ្គលផ្សេងទៀតមកស្នាក់នៅបន្ទប់នេះទេ ។ ពេលបុគ្គលិកសណ្ឋាគារលើកម្ហូបអាហារមកឱ្យជនជាតិវៀតណាមនៅបន្ទប់លេខ៥០២ គឺអ្នកស្រី Sherine Chong (ជាមនុស្សម្នាក់ដែលបានស្លាប់ក្នុងចំណោមមនុស្ស៦នាក់) ក៏បានដើរមកទទួលអាហារពីបុគ្គលិកសណ្ឋាគារ ។

ពេលនោះ បុគ្គលិកសណ្ឋាគារនិយាយថា «ខ្ញុំនឹងឆុងទឹកតែជូនភ្ញៀវ» ប៉ុន្តែអ្នកស្រី Sherine Chong និយាយថា «ពុំចាំបាច់ទេ ចាំខ្ញុំឆុងខ្លួនឯង» ហើយបុគ្គលិកសណ្ឋាគារក៏ចាកចេញពីបន្ទប់វិញ ។ តាំងពីពេលនោះមក គ្មានអ្នកណាម្នាក់ចេញពីបន្ទប់នេះទៀតឡើយ ។

ហេតុនេះ សមត្ថកិច្ចសន្និដ្ឋានថា មូលហេតុនៃការស្លាប់ជនជាតិវៀតណាម គឺបណ្តាលមកពីបញ្ហាជំពាក់បំណុល ហើយជនជាតិវៀតណាមទាំងនេះធ្លាប់បានណាត់គ្នាទៅដោះស្រាយរឿងបំណុលនៅប្រទេសជប៉ុន ប៉ុន្តែមានបញ្ហារឿងទិដ្ឋាការ ទើបពួកគេណាត់គ្នាមកដោះស្រាយនៅថៃ ។ ក្រោយការត្រួតពិនិត្យឃើញថា ក្នុងឈាមសាកសពបុរសវៀតណាម គឺមានថ្នាំ Cyanide ក្នុងនោះ ។ ប៉ុន្តែសមត្ថកិច្ចពុំដឹងថា តើជនល្មើសយកថ្នាំ Cyanide មកពីណា? ពីព្រោះក្នុងវ៉ាលិសធ្វើដំណើររបស់ពួកគេគ្មានវត្ថុអ្វីខុសច្បាប់ទេ ។

ប៉ុន្តែពេលសមត្ថកិច្ចឆែកវ៉ាលិសរបស់អ្នកស្រី Sherine Chong គឺឃើញឯកសារប្តឹងផ្តល់រឿងដីធ្លី កាលពីឆ្នាំ២០២២ ។ បើតាមសាច់ញាតិអ្នកស្រី ប្រាប់ថា អ្នកស្រីទទួលម៉ៅការសំណង់ និងធ្វើផ្លូវនៅប្រទេសវៀតណាម ។ រីឯអាជីវកម្មដែលអ្នកស្រីវិនិយោគទុនរួមគ្នាជាមួយជនជាតិវៀតណាមផ្សេងទៀត គឺការសាងសង់មន្ទីរពេទ្យនៅប្រទេសជប៉ុន ៕