ឬហៅថាម៉ារីម៉ាកាលពីពេលថ្មីៗនេះបានបង្ហាញខ្លួនក្នុងព្រឹត្តិការណ៍មួយនៃរដ្ឋធានីម៉ានីល ប្រទេសហ្វីលីពីន បានធ្វើឱ្យអ្នកសារព័ត៌មាន និងទស្សនិកជនជាច្រើនសរសើរមិនដាច់ពីមាត់អំពីរូបរាងដ៏លេចធ្លោរ និងសម្រស់ដ៏ទាក់ទាញរបស់នាង ទោះបីជាមានវ័យ ៤០ ក៏ដោយ ក៏តារាស្រីរូបនេះនៅតែជាប់ក្នុងបញ្ជីរាជនីសម្រស់ស្រស់ស្អាតបំផុតប្រចាំប្រទេស។

យោងតាមគេហទំព័រកម្សាន្ត Preview តារាសម្តែងស្រីជួរមុខដ៏មានឥទ្ធិពល Marian Rivera បានទាក់ទាញកាមេរ៉ាទាំងអស់នៅពេលចូលរួមក្នុងព្រឹត្តិការណ៍មួយកាលពីរសៀលថ្ងៃទី១២ ខែកក្កដាកន្លងទៅ។ ដោយនាងបានស្លៀកឈុតពណ៌ស អមដោយគ្រឿងអលង្ការគុជខ្យង ចងសក់ និងតុបតែងមុខបែបធម្មជាតិ ធ្វើឱ្យនាងមានភាពលេចធ្លោរខ្លាំងនៅក្នុងកម្មវិធីនេះ។ បន្ទាប់ពីទទួលបានការកោតសរសើរយ៉ាងខ្លាំងពីសំណាក់អ្នកគាំទ្រ ម៉ារីម៉ាក៏ត្រូវបានគេបោះឆ្នោតឱ្យជាប់ក្នុងបញ្ជីរាជនីសម្រស់ស្រស់ស្អាតបំផុតក្នុងប្រទេសហ្វីលីពីនផងដែរ។

បច្ចុប្បន្នតារាស្រីរូបនេះគឺជាទូតសុច្ឆន្ទៈរបស់ម៉ាកយីហោល្បីៗជាច្រើនយ៉ាងហោចណាស់ ៥០ នៅក្នុងប្រទេស ហើយនាងក៏ជាតារា U40 ដែលរកលុយបានច្រើនជាងគេតាមរយៈការផ្សព្វផ្សាយផលិតផលនៅលើ Instagram ផ្ទាល់ខ្លួនផងដែរ។ នៅពេលដែលនាងស្ថិតក្នុងបញ្ជីរាជនីសម្រស់ មានអ្នកគាំទ្រជាច្រើនចោតសួរថា តើនាងមានវិធីសាស្ត្រអ្វីខ្លះ ទើបសម្រស់នាងនៅតែស្រស់ស្អាត និងក្មេងជាងវ័យបែបនេះ។ Marian Rivera បាននិយាយថា វិធីសាស្ត្រគឺសាមញ្ញដោយនាងគ្រាន់តែរឹតបន្តឹងរបបអាហារ និងបង្កើនការហាត់ប្រាណដើម្បីរក្សារាងប៉ុណ្ណោះ។

គួរបញ្ជាក់ដែរថា Marian Rivera ហៅម៉ារីម៉ា និង Dingdong Dantes ហៅសូជីអូបានរៀបការជាមួយគ្នានៅខែធ្នូ ឆ្នាំ ២០១៤ ដោយមានកូន ២ នាក់ស្រីមួយប្រុសមួយ។ អ្នកទាំងពីរធ្លាប់បានសម្តែងជាមួយគ្នាក្នុងរឿង Wild Dance, Mermaid Love Story, Horizon With You …ជាដើម៕

ប្រទេសឥណ្ឌូណេស៊ី ៖ ប្រទេសឥណ្ឌូណេស៊ីបានដំណើរការរោងចក្រផលិតថ្មរថយន្តអគ្គិសនីដំបូងគេនៅតំបន់អាស៊ីអាគ្នេយ៍ ក្នុងខេត្ត Java ស្ថិតនៅភាគខាងលិចប្រទេស ។ រោងចក្រនេះនឹងមានសមត្ថភាពផលិត Battery Cells ប្រចាំឆ្នាំ ស្មើនឹង១០ជីហ្គាវ៉ាត់ម៉ោង ហើយវានឹងអាចបំពេញតម្រូវការប្រើប្រាស់រថយន្តអគ្គិសនីនៅឥណ្ឌូណេស៊ី ស្មើប្រមាណ១៥ម៉ឺនគ្រឿង ។

កាលពីថ្ងៃទី១៣ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ការដំណើរការរោងចក្រនេះបានចំណាយថវិកាវិនិយោគរហូតដល់១ពាន់លានដុល្លារអាមេរិក និងជាការវិនិយោគទុនរួមគ្នាជាមួយក្រុមហ៊ុន Hyundai Motor Group, LG Energy Solution និង Indonesia Battery Corporation ។ វាជាកិច្ចខិតខំប្រឹងប្រែងរួមគ្នាដើម្បីធ្វើកំណែទម្រង់ផ្សេងៗ ។

ក្រៅពីនេះ រោងចក្រផលិតថ្មរថយន្តអគ្គិសនីខាងលើ ក៏បានសហការជាមួយរោងចក្រផលិតរថយន្តរបស់ Hyundai ផងដែរ ដើម្បីផលិតរថយន្តម៉ាក Kona ឱ្យបានចំនួន៥ម៉ឺនគ្រឿងក្នុង១ឆ្នាំ ។

ការដំណើរការរោងចក្ររថយន្តអគ្គិសនីនៅឥណ្ឌូណេស៊ី គឺជាផ្នែកមួយនៃយុទ្ធសាស្ត្រក្លាយជាប្រទេសផលិតថ្មរថយន្តអគ្គិសនីប្រភេទ EV 3 មុនគេលើពិភពលោក នៅឆ្នាំ២០២៧ ។ លើសពីនេះ ឥណ្ឌូណេស៊ីក៏បានកំណត់គោលដៅផលិត Battery Cells ឱ្យបានចំនួន១៤០ជីហ្គាវ៉ាត់ម៉ោងក្នុង១ឆ្នាំ នៅឆ្នាំ២០៣០ ដែលស្មើពី៤% ទៅ៩% របស់តម្រូវការពិភពលោក ។

ក្រៅពីនេះ ឥណ្ឌូណេស៊ី ក៏ជាប្រទេសមានទុនបម្រុងនីកែលច្រើនបំផុតលើពិភពលោកផងដែរ គឺស្មើប្រមាណ២១លានតោន ឬស្មើ២២% នៃទុនបម្រុងនីកែលលើពិភពលោក ។ បើទោះជាការប្រើប្រាស់នីកែលប្រមាណ៧០% ស្ថិតក្នុងឧស្សាហកម្មដែកអ៊ីណុកក្តី ប៉ុន្តែតម្រូវការក្នុងវិស័យផលិតថ្មបានកើនឡើងជាបន្តបន្ទាប់ ។

ក្រុមហ៊ុនផលិតរថយន្តអគ្គិសនីលំដាប់ពិភពលោក រួមទាំងក្រុមហ៊ុន BYD និង Wuling របស់ប្រទេសចិន បានចូលមកវិនិយោគនៅឥណ្ឌូណេស៊ីរួចហើយ ។ ក្រុមហ៊ុនទាំងនេះបានផលិតរថយន្តអគ្គិសនីនៅឥណ្ឌូណេស៊ី និងនាំចេញទៅកាន់ទីផ្សារពិភពលោក ។

បច្ចុប្បន្ន ឥណ្ឌូណេស៊ីកំពុងបង្កើតរោងចក្រចម្រាញ់ប្រេងលីចូម និងរោងចក្រផលិតសម្ភារៈអ៊ីណុក ដើម្បីបន្ថែមលើឧស្សាហកម្មថ្មនីកែល ។ ហេតុនេះ ឥណ្ឌូណេស៊ីគ្មានទុនបម្រុងលីចូមច្រើនទេ ប៉ុន្តែអូស្ត្រាលីបានផលិតលីចូមប្រមាណពាក់កណ្តាលនៃលីចូមសរុបលើពិភពលោក ហើយអាចនាំចេញរ៉ែប្រភេទនេះមកកាន់ឥណ្ឌូណេស៊ីទៀតផង ខណៈលីចូមភាគច្រើនរបស់អូស្ត្រាលីបាននាំចេញទៅចិន ៕

ប្រទេសចិន៖ សាលាមត្តេយ្យជាច្រើននៅតាមជនបទក្នុងប្រទេសចិននាពេលបច្ចុប្បន្នគឺមិនសូវមានសិស្សចូលរៀននោះទេ ដោយនាយកសាលាក៏បានសម្រេចចិត្តកែប្រែសាលាមត្តេយ្យទៅជាមជ្ឈមណ្ឌលថែទាំមនុស្សចាស់វិញ។
យោងតាម CNBC ប្រទេសចិននឹងបន្ថែមមនុស្សចាស់រាប់រយលាននាក់ក្នុងប៉ុន្មានទសវត្សរ៍ខាងមុខនេះ ដោយសារចំនួនប្រជាជនវ័យចំណាស់កើនឡើង និងការថយចុះយ៉ាងខ្លាំងនៃអត្រាកំណើត បានធ្វើឱ្យប៉ះពាល់ដល់វិស័យអប់រំ ដោយសាលាមត្តេយ្យសិក្សារាប់ពាន់ត្រូវបានបិទនៅទូទាំងប្រទេស។

ទោះជាយ៉ាងណាសាលាមត្តេយ្យខ្លះក៏បានបើកឡើងវិញដោយបំប្លែងទៅជាកន្លែងថែទាំមនុស្សចាស់វិញ។ នាយកសាលា Li Xiuling បាននិយាយថា លោកបានបិទសាលាមួយរយៈដោយសារគ្មានកុមារចុះឈ្មោះចូលរៀន ប៉ុន្តែបន្ទាប់មកលោកក៏បានបើកឡើងវិញដោយប្តូរទៅជាមជ្ឈមណ្ឌលកម្សាន្តសម្រាប់មនុស្សចាស់។ មិនយូរប៉ុន្មានសាលានេះក៏មានមនុស្សចាស់ជាច្រើនចុះឈ្មោះចូលរៀន ដោយសព្វថ្ងៃសាលាគឺមានបង្រៀនផ្នែកតន្ត្រី របាំ ម៉ូដែល និងមុខវិជ្ជាជាច្រើនទៀត។ ដូច្នេះការងារថែទាំ និងបង្រៀនមនុស្សចាស់គឺកំពុងមានការរីកចម្រើនខ្លាំងនៅក្នុងប្រទេសចិន។

បើយោងតាមទិន្នន័យរបស់រដ្ឋាភិបាលបានឱ្យដឹងថា សាលាមត្តេយ្យជិត ១៥,០០០ បានបិទកាលពីឆ្នាំមុន ខណៈដែលការចុះឈ្មោះចូលរៀនបានធ្លាក់ចុះចំនួន ៥.៣ លាននាក់កាលពីឆ្នាំ ២០២២។ ទោះជាយ៉ាងណាយោងតាមរបាយការណ៍ គ្រឹះស្ថានមត្តេយ្យសិក្សាជាច្រើនផ្សេងទៀតនៅទូទាំងប្រទេសចិនក៏ចាប់ផ្តើមបើកឡើងវិញ ហើយក៏ទទួលបានទទួលជោគជ័យដោយការផ្លាស់ប្តូរពីការអប់រំកុមារទៅបង្រៀនមនុស្សចាស់វិញ។

យោងតាមស្ថិតិផ្លូវការ ប្រទេសចិនបានឃើញការកើនឡើងគួរឱ្យកត់សម្គាល់នៃចំនួនប្រជាជនចាស់របស់ខ្លួនកាលពីឆ្នាំមុន ដោយបានបន្ថែមមនុស្សជិត ១៧ លាននាក់ដែលមានអាយុលើសពី ៦០ ឆ្នាំ។ ក្រុមអាយុនេះមានច្រើនជាង ២០% នៃចំនួនប្រជាជន ដែលសមាមាត្ររំពឹងថានឹងកើនឡើងដល់ជិត ១/៣ នៅឆ្នាំ ២០៣៥។ រដ្ឋាភិបាលប៉ាន់ប្រមាណថា ផលិតផល និងសេវាកម្មសម្រាប់ផ្គត់ផ្គង់ដល់មនុស្សចាស់ ចាប់ពីវិស័យទេសចរណ៍សម្រាប់មនុស្សចាស់ រហូតដល់ការថែទាំវេជ្ជសាស្រ្តផ្អែកលើបច្ចេកវិទ្យា អាចមានតម្លៃ ៣០ ពាន់ពាន់លានយន់នៅឆ្នាំ ២០៣៥៕

យោងមានប្រភពសារព័ត៌មាន The Korea Time ដែលបានចុះផ្សាយកាលពីថ្ងៃទី ១៤ ខែកក្កដា ឆ្នាំ២០២៤នេះបានឲ្យដឹងថា បច្ចុប្បន្ននេះនៅឯប្រទេសកូរ៉េខាងត្បូង ការដំឡើងប្រាក់ឈ្នួលអប្បបរមាកំពុងដាក់សម្ពាធកាន់តែខ្លាំងលើម្ចាស់អាជីវកម្មខ្នាតតូច ដែលបណ្តាលឲ្យពិបាកក្នុងការជួលកម្មករកាន់តែខ្លាំងឡើង រហូតដល់ប្រកាសក្ស័យធន ហើយកន្លែងខ្លះបានខកខានក្នុងការបើកប្រាក់ឈ្នួលដល់កម្មករផងដែរ។

យោងតាមសហព័ន្ធសហគ្រាសកូរ៉េ (KEF) បានបង្ហាញថា គិតត្រឹមខែឧសភាឆ្នាំ២០២៤នេះ មានការប្រកាសក្ស័យធនរហូតដល់ចំនួន ៨១០ ក្នុងចំណោមអាជីវកម្មខ្នាតតូចដូចជា ផ្នែកភោជនីយដ្ឋាន និងកន្លែងស្នាក់នៅតូចៗជាដើម។ យ៉ាងណាមិញ ការប្រកាសក្ស័យធននៅក្នុងឆ្នាំនេះ គឺបានកើនឡើងយ៉ាងខ្លាំង ប្រមាណ ៣៦.៨ ភាគរយ បើធៀបនឹងឆ្នាំ២០២៣។

ការដំឡើងប្រាក់ឈ្នួលអប្បបរមានៅក្នុងប្រទេសកូរ៉េខាងត្បូងនៅតែជាប្រធានបទដ៏ក្តៅគគុករយៈពេលប៉ុន្មានសតវត្សកន្លងមកនេះ ព្រោះថាវាផ្តល់ទាំងគុណសម្បត្តិនិងគុណវិបត្តិ។ ការតម្លើងប្រាក់ឈ្នួលអប្បបរមា មានន័យថាជាការតម្លើងប្រាក់ខែដល់កម្មករដែលមានប្រាក់ឈ្នួលទាបទូទាំងប្រទេស ដើម្បីផ្តល់ឲ្យពួកគេនូវកម្រិតជីវភាពកាន់តែប្រសើរឡើង ក៏ដូចជាជួយកាត់បន្ថយភាពក្រីក្រ។

ប៉ុន្តែស្របពេលដែលតម្លើងប្រាក់ឈ្មួលអប្បបរមានេះ វានឹងជះឥទ្ធិពលអវិជ្ជមានទៅកាន់ម្ចាស់អាជីវកម្មខ្នាតតូច ដូចជាកាត់បន្ថយការងាររបស់បុគ្គលិកឬក៏បញ្ឈប់បុគ្គលិកតែម្តងព្រោះតែមិនអាចទ្រាំទ្រនឹងការចំណាយផ្សេងៗ។ ការតម្លើងប្រាក់ឈ្មួលអប្បបរមា អាចនឹងធ្វើឲ្យមានការកើនឡើងតម្លៃសម្រាប់អ្នកប្រើប្រាស់ ព្រោះថាអាជីវកម្មខ្នាតតូចអាចនឹងត្រូវដំឡើងថ្លៃទំនិញ និងសេវាកម្ម ដើម្បីរ៉ាប់រងតម្លៃពលកម្មកាន់តែខ្ពស់ ដែលអាចនាំឱ្យអតិផរណាទូទាំងប្រទេស។

ជាថ្នូរត្រឡប់មកវិញ កម្មករឬពលករដែលមានប្រាក់ចំណូលទាបទាំងនោះ គឺងាយប្រឈមមុខនឹងការបាត់បង់ការងារធ្វើ ព្រោះតែការកាត់បន្ថយកម្លាំងពលកម្មពីអាជីវកម្មខ្នាតតូចនានាផងដែរ។ ដូច្នេះហើយ ការស្វែងរកតុល្យភាពរវាងការដំឡើងប្រាក់ឈ្នួលអប្បបរមា និងការគាំទ្រដល់អាជីវកម្មខ្នាតតូច គឺជាបញ្ហាស្មុគស្មាញដែលទាមទារឱ្យមានការពិចារណាដោយប្រុងប្រយ័ត្ន និងសហការគ្នារវាងភាគីពាក់ព័ន្ធផងដែរ៕

ប្រទេសជប៉ុន ៖ សារព័ត៌មាន KBN សូមបង្ហាញលោកអ្នកនូវរូបភាពដ៏អស្ចារ្យមួយចំនួន ប៉ុន្តែរូបទាំងនេះពុំមែនជារូបថតនោះទេ គឺវាជាស្នាដៃរបស់វិចិត្រករជនជាតិជប៉ុនម្នាក់ ដែលពោរពេញទៅដោយបទពិសោធន៍ ។ បើទោះជាលោកអ្នកពិបាកជឿថា វាជារូបគំនូរគូរដោយមនុស្សក្តី ប៉ុន្តែនេះជាការបង្ហាញឱ្យឃើញពីភាពស្រស់ស្អាត, ស្នាដៃប្រកបដោយទេពកោសល្យ និងការហ្វឹកហាត់ជំនាញយ៉ាងពិតប្រាកដ ។

វិចិត្រករជនជាតិជប៉ុនដែលបានគូររូបគំនូរដ៏ល្អឥតខ្ចោះទាំងនេះ គឺលោក ខេ មីអេណុ (K Mieno) ហើយរូបគំនូររបស់លោកភាគច្រើន គឺលោកបានប្រើប្រាស់ថ្នាំពណ៌ទឹក និងពណ៌ប្រេង ។ ស្នាដៃសិល្បៈរបស់លោកត្រូវបានគេចាត់ទុកថា ស្ថិតនៅក្នុងប្រភេទ Hyperrealistic ។

លោក ខេ មីអេណុ បានបញ្ចប់ការសិក្សានៅសាកលវិទ្យាល័យ Hiroshima City University College of Art កាលពីឆ្នាំ២០០៧ ។ លោកស្រឡាញ់ការគូរគំនូរយ៉ាងខ្លាំង ហើយផ្ទាំងគំនូរជាច្រើនរបស់លោក ត្រូវបានដាក់តាំងបង្ហាញពាសពេញប្រទេសជប៉ុន រួមទាំងដាក់តាំងនៅសារមន្ទីររបស់ជប៉ុនផងដែរ ។ ក្រោយមក នៅឆ្នាំ២០១៧ លោកទទួលបានពានរង្វាន់ «Hoki Museum Grand Prize Award» ហើយឈ្មោះរបស់លោក ក៏ត្រូវបានបោះពុម្ពក្នុងស្នាដៃសិល្បៈជាច្រើននារយៈពេលប៉ុន្មានឆ្នាំមកនេះ ។

បើទោះជារូបគំនូរគូរឡើងដោយប្រើប្រាស់ថ្នាំពណ៌ប្រេងមានលក្ខណៈស្រដៀងនឹងរូបភាពពិតប្រាកដបានទាក់ទាញចំណាប់អារម្មណ៍ និងបង្កើតកេរ្តិ៍ឈ្មោះយ៉ាងខ្លាំងដល់លោក ខេ មីអេណុ ក៏ដោយ ក៏លោកជាវិចិត្រករម្នាក់ដែលចូលចិត្តថតរូបផងដែរ ។ ពេលទំនេរ លោកចាប់ផ្តើមគូរគំនូរផ្សេងៗដោយការប្រើប្រាស់ថ្នាំពណ៌ទឹក និងពណ៌ប្រេង ដើម្បីចែករំលែកសេចក្តីសុខដល់មនុស្សផ្សេងទៀតជាញឹកញាប់ ។

លោកនិយាយថា ក្រៅពីការគូរគំនូរឱ្យមានលក្ខណៈល្អិតល្អន់ហើយ ការគូរស្រមោលរបស់រូបភាពក៏ចាត់ទុកថា ជារឿងសំខាន់ផងដែរ ពីព្រោះវានឹងធ្វើឱ្យរូបគំនូរទទួលបានការចាប់អារម្មណ៍កាន់តែខ្លាំងឡើង ។ លើសពីនេះ អ្វីដែលពុំអាចខ្វះខាត គឺការវិភាគពីអារម្មណ៍ពិតរបស់មនុស្ស ព្រមទាំងវិភាគពីបញ្ហាពូជសាសន៍ផងដែរ ពីព្រោះវាពាក់ព័ន្ធនឹងពណ៌សម្បុរស្បែក ។

ស្នាដៃសិល្បៈប្រភេទ Hyperrealistic របស់លោក តែងតែជំរុញឱ្យមានការជជែកគ្នារវាងមនុស្សពីរក្រុមនៅប្រទេសជប៉ុន គឺក្រុមមួយចាប់អារម្មណ៍យ៉ាងខ្លាំងចំពោះស្នាដៃសិល្បៈ ខណៈក្រុមមួយទៀតស្ទាក់ស្ទើរចិត្ត និងសួរថា តើវាពិតជារូបគំនូរឬក៏អត់?

នៅលើពិភពលោកនេះ មានវិចិត្រករជាច្រើនរូបដែលអាចគូរគំនូរដូចគ្នានឹងរូបភាពពិតប្រាកដ ហើយលោក ខេ មីអេណុ គឺស្ថិតក្នុងចំណោមវិចិត្រករដែលមានទេពកោសល្យទាំងនេះ ។ ចុះលោកអ្នកវិញយល់ឃើញយ៉ាងណាដែរ? តើរូបគំនូររបស់លោក ខេ មីអេណុ ដូចរូបភាពពិតប្រាកដដែរឬទេ?

យោងតាមក្រុមហ៊ុនស្រាវជ្រាវ IDC ដែលរាយការណ៍កាលពីថ្ងៃទី១៦ ខែកក្កដាថា ទីផ្សារស្មាតហ្វូនរបស់ពិភពលោកនាពេលបច្ចុប្បន្ននេះគឺបានកើនឡើងរហូតដល់ ៦.៥% ដល់ ២៨៥.៤ លាននៅក្នុងត្រីមាសទី ២ នៃឆ្នាំ ២០២៤ បើធៀបនឹងរយៈពេលដូចគ្នាកាលពីឆ្នាំមុន។ ដោយចំនួនទូរស័ព្ទដែលបានដឹកជញ្ជូនចេញរបស់ក្រុមហ៊ុនធំៗទាំង ៥ ក៏មានចំនួនច្រើនជាងមុនផងដែរ។

ហេតុនេះបើតាមរបាយការណ៍ Counterpoint Research បានកត់ត្រាតួលេខ ៦% ហើយបានវាយតម្លៃថានេះគឺជាការកើនឡើងប្រចាំឆ្នាំដ៏ល្អបំផុតចាប់តាំងពីត្រីមាសទីពីរនៃឆ្នាំ ២០២១ មក។ លោក Tarun Pathak នាយកក្រុមហ៊ុន Counterpoint បានមានប្រសាសន៍ថា “ការផលិតស្មាតហ្វូនគឺមានកម្រិតទាបបំផុតក្នុងរយៈពេលមួយទសវត្សរ៍ជាពិសេសគឺក្នុងឆ្នាំ២០២៣ ប៉ុន្តែនៅឆ្នាំនេះទីផ្សារកំពុងងើបឡើងវិញដោយសារការកែលម្អអារម្មណ៍អ្នកប្រើប្រាស់ និងស្ថានភាពសារពើភ័ណ្ឌ”។

ទន្ទឹមនឹងនេះ លោក Nabila Popal នាយកស្រាវជ្រាវនៃក្រុមអ្នកតាមដានទូទាំងពិភពលោករបស់ IDC បានអត្ថាធិប្បាយថាទីផ្សារមាននិន្នាការនៃបុព្វលាភដោយ Apple និង Samsung កំពុងទទួលបានអត្ថប្រយោជន៍ច្រើនបំផុត។ លើសពីនេះ ស្មាតហ្វូនដែលមាន AI ជំនាន់ថ្មី ក៏ត្រូវបានគេរំពឹងថានឹងដណ្តើមបាន ១៩% នៃទីផ្សារនៅឆ្នាំនេះ ដែលជាការកើនឡើងលឿនបំផុតសម្រាប់ការច្នៃប្រឌិតទូរស័ព្ទដែល IDC មិនធ្លាប់មាន។ ខណៈពេលដែល Apple និង Samsung ផ្តោតលើផ្នែកដែលមានតម្លៃខ្ពស់ ក្រុមហ៊ុនផលិតស្មាតហ្វូនឈានមុខគេជាច្រើនរបស់ចិនក៏បានបង្កើនចំនួនផលិតផលនៅក្នុងផ្នែកដែលមានតម្លៃទាបផងដែរ ដើម្បីចាប់យកចំណែកទីផ្សារនៅក្នុងបរិបទនៃអ្នកប្រើប្រាស់កំណត់ការចំណាយ។

ដូច្នេះ Xiaomi គឺជាក្រុមហ៊ុនដែលរីកលូតលាស់លឿនបំផុតក្នុងចំណាត់ថ្នាក់កំពូលទាំង ៥ ជាមួយនឹង ២៧.៤% និងមានចំណែកទីផ្សារ ១៤.៨% នៅក្នុងត្រីមាសចុងក្រោយនេះ ដោយជាប់ចំណាត់ថ្នាក់លេខ ៣ នៅលើពិភពលោក ដោយសារភាពពេញនិយមនៃស៊េរី Redmi 13 និង Note 13 ។ ហើយក្រុមហ៊ុន Huawei ក៏ជាក្រុមហ៊ុនដែលមានការងើបឡើងវិញខ្លាំងបំផុតក្នុងចំណោមម៉ាកយីហោរបស់ចិនផងដែរ ដែលឈានដល់ ៦៩.៧% ធៀបនឹងរយៈពេលដូចគ្នាកាលពីឆ្នាំមុន។ ទោះជាយ៉ាងណាក៏ដោយ ទិន្នផលទូរស័ព្ទរបស់ក្រុមហ៊ុននេះគឺមិនមានទំហំធំល្មមនឹងស្ថិតក្នុងម៉ាកយីហោកំពូលទាំង ៥ នោះទេ៕

ប្រទេសវៀតណាម ៖ សារព័ត៌មានបរទេសបានរាយការណ៍កាលពីថ្ងៃទី១៥ ខែកក្កដា ឆ្នាំ២០២៤ ថា ក្រុមហ៊ុនផលិតរថយន្តអគ្គិសនីវៀតណាមឈ្មោះ VinFast ប្រកាសថា នឹងពន្យារពេលបើកដំណើរការរោងចក្រនៅសហរដ្ឋអាមេរិក រយៈពេល៣ឆ្នាំទៀត ព្រមទាំងកាត់បន្ថយគោលដៅលក់រថយន្តប្រចាំឆ្នាំផងដែរ ។

ក្រុមហ៊ុន VinFast បានប្រកាសថា នឹងពន្យារពេលបើកដំណើរការរោងចក្រផលិតរថយន្តអគ្គិសនីនៅរដ្ឋ North Carolina សហរដ្ឋអាមេរិក រយៈពេល៣ឆ្នាំទៀត គឺរហូតដល់ឆ្នាំ២០២៨ ។ ការសម្រេចចិត្តពន្យារពេលនេះឆ្លុះបញ្ចាំងពីបញ្ហាប្រឈមរបស់ក្រុមហ៊ុនវៀតណាម ក្នុងការក្លាយជាក្រុមហ៊ុនប្រេនលំដាប់ពិភពលោក ។

ក្រុមហ៊ុនបញ្ជាក់ថា ការពន្យារពេលបើកដំណើរការរោងចក្រនឹងជួយក្រុមហ៊ុនអាចគ្រប់គ្រងការចំណាយថវិការយៈពេលខ្លីឱ្យកាន់តែមានប្រសិទ្ធភាព និងផ្តោតទៅលើធនធានសម្រាប់គោលដៅរីកចម្រើនរបស់ក្រុមហ៊ុននាថ្ងៃអនាគត ។ ក្រៅពីនេះ ក្រុមហ៊ុនក៏បានកាត់បន្ថយគោលដៅលក់រថយន្តប្រចាំឆ្នាំផងដែរ គឺពីចំនួន១សែនគ្រឿង មកស្មើត្រឹម៨ម៉ឺនគ្រឿងប៉ុណ្ណោះ ។

Le Thi Thu Thuy ជានាយកគ្រប់គ្រងក្រុមហ៊ុន VinFast និយាយថា ក្រុមហ៊ុនបានកែសម្រួលទស្សនវិស័យដើម្បីសម្របតាមការប្រែប្រួលទីផ្សារ និងបញ្ហាប្រឈមដែលអាចកើតឡើង ។ ការពន្យារពេលបើកដំណើរការរោងចក្រនេះបង្ហាញថា VinFast កំពុងប្រឈមនឹងឧបសគ្គដើម្បីក្លាយជាក្រុមហ៊ុនផលិតរថយន្តអគ្គិសនីវាយលុកទីផ្សាររថយន្តអគ្គិសនីលើពិភពលោក ដែលបានធ្លាក់ចុះកាលពីឆ្នាំ២០២៣ ។

របាយការណ៍ Electric Vehicle Outlook របស់ BloombergNEF បានកាត់បន្ថយបរិមាណការលក់រថយន្តអគ្គិសនីលើពិភពលោក មកស្មើត្រឹមតែ៦លាន៧សែនគ្រឿង នៅត្រឹមឆ្នាំ២០២៦ ។ រីឯក្រុមហ៊ុនផលិតរថយន្តធំៗជាច្រើន ដូចជា ៖ Ford, General Motors, Volkswagen និង Tesla ក៏បានកាត់បន្ថយគោលដៅផលិតរថយន្តដូចគ្នាដែរ ។

ក្រោយពីបានចាប់ផ្តើមលក់រថយន្តអគ្គិសនីយ៉ាងលេចធ្លោនៅអាមេរិកកាលពីសីហា ឆ្នាំ២០២៣ តម្លៃភាគហ៊ុនរបស់ក្រុមហ៊ុន VinFast បានកើនឡើងខ្ពស់រហូតដល់ជាង+៧០០% ត្រឹមតែរយៈពេល២សប្តាហ៍ប៉ុណ្ណោះ ។ ប៉ុន្តែបច្ចុប្បន្ន តម្លៃភាគហ៊ុនរបស់ក្រុមហ៊ុនដែលពុំអាចស្វែងរកប្រាក់ចំណេញនោះ បានធ្លាក់ចុះរហូតដល់ -៩០% ពីចំណុចខ្ពស់បំផុត ។

ទោះយ៉ាងណា ក្រុមហ៊ុន VinFast បានរៀបចំគម្រោងផ្តោតទៅលើការចាប់យកឱកាសរយៈពេលខ្លីក្នុងទីផ្សារដ៏មានសក្តានុពល ដើម្បីគ្រប់គ្រងការចំណាយដើមទុន និងធនធានឱ្យបានត្រឹមត្រូវ ព្រមទាំងកាត់បន្ថយហានិភ័យយ៉ាងមានប្រសិទ្ធភាពផងដែរ ៕