ត្រីប៉ាសាណាក់ ឬអាចហៅបានថាជាត្រីសាលម៉ុនយក្សទន្លេមេគង្គ ត្រូវបានចាត់ថ្នាក់ជាប្រភេទត្រីទទួលរងការគំរាមកំហែងជិតផុតពូជនៅក្នុងបញ្ជីក្រហមរបស់អង្គការ សហភាពអន្តរជាតិសម្រាប់អភិរក្សធម្មជាតិ (IUCN) នៅតែបង្ហាញវត្តមាននៅកម្ពុជាយើងនៅឡើយទេ។

យោងតាមសៀវភៅស្តីពីត្រីទឹកសាបនៃព្រះរាជាណាចក្រកម្ពុជា ត្រីប៉ាសាណាក់ ដែលមានឈ្មោះវិទ្យាសាស្រ្ត Aaptosyax grypus ជាប្រភេទត្រីមានស្រកាល្អិត មាត់ធំ ថ្គាមខាងក្រោមធំស្នាមគន្លាក់នៅកណ្តាល និងថ្គាមលើគ្របដណ្តប់លើថ្គាមក្រោម គ្មានពុកមាត់ និងព្រុយខ្នងគ្មានទ្រនុងរឹង ហើយពោះរាងមូល ខ្លួនរាងស្រឡូន និងមានប្រវែងវែងបំផុត ១០០សង់ទីម៉ែត្រ ឬ១ម៉ែត្រ។

ត្រីនេះ តែងតែផ្លាស់ទីពីខែមករា ទៅខែកុម្ភៈ ដើម្បីរកកន្លែងពងកូននៅតាមអន្លង់តាមដងទន្លេមេគង្គ ក្នុងខេត្តស្ទឹងត្រែងខាងក្រោមល្បាក់ខោន។

ត្រីនេះកម្រចាប់វាបានណាស់នៅប្រទេសកម្ពុជា ហើយប្រជានេសាទនៅស្រុកថាឡាបរិវាត់ ខេត្តស្ទឹងត្រែង និងខេត្តរតនគិរី (ទន្លេស្រែពក) ធ្លាប់ចាប់ត្រីនេះ នៅទន្លេមេគង្គដោយឧបករណ៍នេសាទមង៕

ថ្លែងក្នុងពិធីធ្វើសំណេះសំណាល និងពិសាភោជនាហារ ជាមួយសមាគមឧកញ៉ាកម្ពុជា និងសមាគមអ្នកអភិវឌ្ឍលំនៅឋានកម្ពុជា នារសៀលថ្ងៃទី២ ខែសីហា ឆ្នាំ២០២៤ សសម្តេចធិបតី ហ៊ុន ម៉ាណែត អនុញ្ញាតឱ្យពលរដ្ឋអាចថត Pre-Wedding នៅតំបន់អង្គរបាន ដោយមិនចាំបាច់សុំច្បាប់អនុញ្ញាត។

សម្តេចធិបតី ហ៊ុន ម៉ាណែត បានមានប្រសាសសន៍ថា៖”ប្រជាពលរដ្ឋ ទៅថត Pre-Wedding ថតដាក់ YouTube ផ្សព្វផ្សាយ នៅតំបន់អង្គរ មិនចាំបាច់ស្នើសុំការអនុញ្ញាត និងបង់លុយនោះទេ ប៉ុន្តែត្រូវមានក្រមសីលធម៌ កុំឱ្យប៉ះពាល់វប្បធម៌”។

សម្តេចក៏បានសង្កត់ធ្ងន់ថា៖”សម្រាប់លក្ខខណ្ឌតម្រូវឱ្យស្នើសុំច្បាប់ពីអាជ្ញាធរជាតិអប្សរា គឺអនុវត្តចំពោះការថតរូបសម្រាប់ធ្វើអាជីវកម្មទាំងឡាយណា មានទាំងការថតភាពយន្តខ្នាតធំគ្រប់ប្រភេទ ការថតរូបសម្រាប់ការផលិតជាស្ព័តពាណិជ្ជកម្ម ឬទស្សនាវដីដើម្បីលក់ ការប្រើប្រាស់ដ្រូនគ្រប់ប្រភេទ គឺត្រូវសុំច្បាប់ហើយ បង់សេវា”។

ដោយឡែក ចំពោះអង្គភាពសារព័ត៌មានផ្លូវការរបស់ជាតិនិងអន្តរជាតិ ដែលចង់ថតនៅរមណីយដ្ឋានអង្គរសម្រាប់ការផ្សព្វផ្សាយព័ត៌មាន ក៏ត្រូវសុំច្បាប់មកអាជ្ញាធរជាតិអប្សរាដែរ តែមិនតម្រូវឱ្យបង់ថ្លៃឡើយ៕

តាំងពីដើមឆ្នាំ ២០១៤មក លិខិតឆ្លងដែនកម្ពុជា មានសុពលភាពរហូតដល់១០ឆ្នាំ ដោយចំណាយ១០០ដុល្លារ ១៥ថ្ងៃក្រោយទើបអាចទទួលបានលិខិតឆ្លងដែនយកទៅប្រើប្រាស់។

ដើម្បីអាចធ្វើលិខិតឆ្លងដែនខ្មែរបាន ពលរដ្ឋត្រូវមានសញ្ញាតិខ្មែរ និងត្រូវមានឯកសារដូចជា អត្តសញ្ញាណប័ណ្ណសញ្ជាតិខ្មែរច្បាប់ដើម សេចក្តីចម្លងសំបុត្រកំណើត ឬ សេចក្តីចម្លងសំបុត្របញ្ជាក់កំណើត និងសៀវភៅគ្រួសារ ឬសៀវភៅស្នាក់នៅ (ច្បាប់ដើម)។

ដោយឡែកនៅក្នុងករណីលិខិតឆ្លងដែនផុតកំណត់ ឬផុតសុពលភាព១០ឆ្នាំ ពលរដ្ឋតម្រូវឱ្យភ្ជាប់មកជាមួយនូវ លិខិតឆ្លងដែនខូច រហែក ឬផុតសុពលភាព រួចធ្វើសំណើស្នើសុំផ្ដល់លិខិឆ្លងដែនសារជាថ្មី និងបំពេញនិតិវិធី និងលក្ខខណ្ឌដូចការស្នើសុំលិខិតឆ្លងដែនដូចលើកទី១៕

នាល្ងាចនេះ អត្តពលិកកម្ពុជា កីឡាការិនី សាក់ប៊ុន អប្សរា កាតារីណា នឹងត្រូវប្រកួតវេលាម៉ោង ៥ល្ងាច ម៉ោងនៅកម្ពុជា លើវិញ្ញាសាហែលទឹកសេរី៥០ម៉ែត្រ។

ចំពោះវិញ្ញាសាហែលទឹកនេះ កីឡាករកម្ពុជាម្នាក់ទៀត កូសុងដីឡាបរ៉ារ៉ង់ អង់គ្វីន ម៉ាតាំងក្លូឌ ដែលប្រកួតក្នុងវិញ្ញាហែលទឹកសេរី១០០ម៉ែត្រ កាលពីថ្ងៃទី៣០ ខែកក្កដា កន្លងទៅបានបាត់បង់សិទ្ធឡើងទៅវគ្គបន្តហើយ ដោយធ្វើបានត្រឹមលេខ៣។

ដោយឡែកកីឡាករ ឈុន ប៊ុនថន ត្រូវប្រកួតថ្ងៃទី៧ ខែសីហា ម៉ោង ៦ល្ងាច ម៉ោងនៅកម្ពុជា លើវិញ្ញាសារត់ចម្ងាយ ៨០០ម៉ែត្រ។

គួរបញ្ជាក់ថា ព្រឹត្តិការណ៍កីឡាអូឡាំពិកនៅទីក្រុងប៉ារីសឆ្នាំ២០២៤ ប្រព្រឹត្តិទៅបាន៨ថ្ងៃហើយ បើរាប់ពីថ្ងៃបើកកម្មវិធីមក ដោយចិនកំពុងឈរលើគេជាប្រទេសទទួលបានមេដាយច្រើនជាងគេចំនួន៣១ ក្នុងនោះមាស១៣គ្រឿង៕

កាលពីថ្ងៃទី ៣១ ខែកក្កដានេះ យោងតាមការបង្ហោះរបស់ ឯកឧត្តមអ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានបង្ហាញនូវវីដេអូខ្លី និងរូបភាពមួយចំនួន ដោយភ្ជាប់មកជាមួយខ្លឹមសារថា «គម្រោងអភិវឌ្ឍន៍ធារាសាស្រ្ត និងកាត់បន្ថយទឹកជំនន់ក្នុងខេត្តបន្ទាយមានជ័យ។ ទេសភាពវាលស្រែក្នុងស្រុកអូរជ្រៅ ខេត្តបន្ទាយមានជ័យ»។

យោងតាមរបាយការណ៍ដែលបានគូសបញ្ជាក់កាលពីខែមិថុនា ឆ្នាំ២០២៤ កន្លងទៅនេះបានឲ្យដឹងថា គម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ (IDFMP) ខេត្តបន្ទាយមានជ័យ ទទួលប្រភពទឹកមកពីតាមបណ្តាអូរ ស្ទឹង នៅតាមបណ្តោយព្រំដែនកម្ពុជា- ថៃ ដែលត្រូវកសាងហេដ្ឋារចនាសម្ព័ន្ធសំខាន់ៗ ដូចជា៖ ប្រឡាយស្រោចស្រព និងដោះទឹកខ្នាតធំចំនួន ៦ខ្សែ មានប្រវែងសរុប ៩២,៦៥គីឡូម៉ែត្រ សំណង់ សិល្បការសរុបចំនួន ២០៨កន្លែង និងស្តារអាងទឹកចំនួន ៣ កន្លែង ( អាងពង្រ អាងវាំងហែង និង អាងកន្សែង) ព្រមទាំងជួសជុលទំនប់តភ្ជាប់អាងទឹកអូរខៃដន ។

គម្រោងនេះ មានលទ្ធភាពស្រោចស្រព ផ្ទៃដីបង្កបង្កើនផលវស្សាសរុបប្រមាណជិត ២០ ០០០ហិកតា និងរដូវប្រាំង ៣៥០០ ហិកតាហើយប្រជាកសិករ ដែលអាចទទួលផលមានចំនួន ៤២ ២១៣ គ្រួសារ ស្ថិតក្នុងឃុំ-សង្កាត់ចំនួន១៧ នៃក្រុងប៉ោយប៉ែត ស្រុកម៉ាឡៃ ស្រុកអូរជ្រៅ និង ក្រុងសិរីសោភ័ណ។

សូមបញ្ជាក់ដែរថា គោលបំណងនៃគម្រោងនេះ គឺដើម្បីបង្កើនផលិតភាពកសិកម្ម ជួយកាត់បន្ថយផលប៉ះពាល់ពីគ្រោះមហន្តរាយធម្មជាតិ និងបង្កើនប្រសិទ្ធភាពនៃប្រភពធនធានទឹក ក្នុងការធានាដល់ការផ្គត់ផ្គង់ទឹកគ្រប់គ្រាន់ សម្រាប់ការបង្កបង្កើនផលស្រូវ ដំណាំគ្រប់ប្រភេទ និង សម្រាប់ការប្រើប្រាស់ប្រចាំថ្ងៃ ព្រមទាំងកាត់បន្ថយបាននូវហានិភ័យបណ្តាលមកពីគ្រោះទឹកជំនន់ និងគ្រោះរាំងស្ងួត ដែលនឹងក្លាយជាផ្នែកមួយដ៏សំខាន់ជួយលើកកម្ពស់ដល់ជីវភាពរស់នៅរបស់បងប្អូនប្រជាពលរដ្ឋ ក៏ដូចជាជួយជំរុញកំណើនសេដ្ឋកិច្ចជាតិផងដែរ៕រូបភាព៖ អ៊ុំ រាត្រី